Faasilasilaga Faaperofeta o le Soifua Mai o Keriso
I le taimi o le Kerisimasi, e faamanatu ai e i tatou o e talitonu le soifua mai o Iesu Keriso, le Alo e Toatasi na Fanaua o le Atua, le Tama Faavavau. I le avea ai ma se vaega o lenei Faigalotu o le Kerisimasi a le Au Peresitene Sili lea e setiina ai le mamanu mo lo tatou faamanatuina, o le a ou talanoa atu ai e uiga i faasilasilaga faaperofeta o Lona soifua mai.
E leai se isi faasilasilaga e sili atu ona iloga nai lo le faaaliga a le agelu ia Maria.
“Ua fai mai foi le agelu ia te ia, Maria e, aua e te Fefe; aua ua alofaina mai oe e le Atua.
“Faauta foi, o le a to oe, ma e fanauina se tama tane, e te faaigoa ia te ia o Iesu.
“E sili o ia, e ta’ua foi o le Alo o le Silisili ese: e foai atu e le Alii o le Atua ia te ia le nofoaiga a Tavita lona tama:
“E fai o ia ma tupu i le aiga o Iakopo e faavavau; o lona malo foi e leai sona gataaga” (Luka 1:30–33).
O le soifua mai faaletino ma le soifuaga ma le maliu o le Alo o le Atua sa taua i le fuafuaga a lo tatou Tama “ia aumaia le tino ola pea ma le ola faavavau o le tagata” (Mose 1:39). A o lei foafoaina le lalolagi, sa filifilia Iesu Keriso ia soifua i le olaga faaletino ma ia avea ma Faaola ina ia mafai ai ona faataunuuina lena fuafuaga (tagai Mose 4:2). Sa poloaiina le Tama ia Atamu e osi atu ni taulaga e fai ma “se faatusa o le taulaga a le Toatasi na Fanaua e le Tamā, o lē ua tumu i le alofa tunoa ma le upumoni. O le mea lea, [sa aoaoina ai o ia], ia e faia mea uma e te faia i le suafa o le Alo, ma ia e salamo ma valaau atu i le Atua i le suafa o le Alo e faavavau” (Mose 5:7–8).
I tusi a Mose tatou te faitau ai foi i le faamalamalamaga a le Atua o lenei mea, o Lana “fuafuaga o le faaolataga mo tagata uma, e ala i le toto o la’u Toatasi na Fanaua, o lē o le a afio mai i le meritiana o taimi” (Mose 6:62). Sa poloaiina e le Atua le Tama i tatou ia salamo ma ia papatisoina “i le suafa o lo’u Atalii e Toatasi na Fanaua, o lē ua tumu i le alofa tunoa ma le upumoni, o Iesu Keriso lea, le suafa lava lea e tasi o le a tuuina atu i lalo o le lagi, o le a oo mai ai le olataga i le fanauga a tagata” (Mose 6:52).
O Isaia, o se perofeta maoae o le Feagaiga Tuai, sa faasilasila maia le oo mai o le soifua mai o le Mesia. “O le mea lea e tuuina mai ai e le Alii lava le faailoga ia te outou,” sa ia tautino mai ai. “Faauta, e to le taupou, ma fanau mai se tamatane, na te faaigoa foi ia te ia o Emanuelu” (Isaia 7:14).
Sa tautino mai foi Isaia.
“Aua ua fanau mai mo i tatou le tama, ua foaiina mai mo i tatou le atalii; e i lona ua le malo; e igoa foi o ia o le Silisili ese, o le Faipule, o le Atua malosi, o le Tamā o le Faavavau, o le Alii o le filemu.
“E leai se mea e gata mai ai ona tele lona malo ma le filemu o lona malo i le nofoalii o Tavita ma lona malo, e faatumauina, ma faamausali i le faamasinoga ma le amiotonu, e afua mai i ia ona po e oo i le faavavau” (Isaia 9:6–7).
O le soifua mai o Keriso sa faaali atu foi i perofeta o le Tusi a Mamona. I le ono selau tausaga a o lei soifua mai le Faaola sa aoao atu ai Liae e faapea o le a faatu ae e le Atua i tagata Iutaia “se Mesia lava, po o, i ni isi upu, o le Faaola o le lalolagi” (1 Nifae 10:4).
Sa tautino mai e le perofeta o Apinati:
“Sa lei vavalo atu ea Mose ia te i latou e uiga i le afio mai o le Mesia, ma o le a togiola e le Atua ona tagata? Ioe, ma e oo i perofeta uma o e sa vavalo talu mai le amataga o le lalolagi—sa latou lei tautatala tetele pe itiiti mai ea e uiga i nei mea?
“Latou te lei fai mai ea o le a afio mai le Atua lava ia i lalo i totonu o le fanauga a tagata, ma ave i ona luga foliga o le tagata, ma afio atu i le mana tele i luga o le lalolagi?” (Mosaea 13:33–34).
Sa tusia e le perofeta o Nifae le auala na faaali atu ai e le agelu ia te ia se taupou i le aai o Nasareta, ma tautino atu, “Faauta, o le taupou lea ua e vaai atu i ai o le tina lea o le Alo o le Atua e tusa ma la le tino” (1 Nifae 11:18).
“Ma sa oo ina ou [na tusia e Nifae] vaai atu ua segia ese atu o ia i le Agaga; ma ina ua mavae ona segia atu o ia i le Agaga mo le va o se taimi, sa fetalai mai le agelu ia te aʼu, ua fetalai mai: Vaai ia!
“Ma sa ou vaai ma toe iloa atu le taupou, ua sapasapaia e ia se tamameamea i ona lima.
“Ma sa fetalai mai le agelu ia te au: “Faauta, o le Tamai Mamoe a le Atua, ioe o le Alo lava o le Tama Faavavau!” (1 Nifae 11:19–21; tagai foi Alema 7:9–10).
Ua tatou masani uma ma le uluai faasilasilaga ina ua mavae le soifua mai o Iesu. O le mea moni e maoae le taua tele o lenei faasilasilaga faalelagi sa fitoitonu i se vaega o ē, ua ta’umai ia i tatou, o tagata sa sili ona lotomaualalalo i le faatulagaga faaleagafesootai o lena taimi.
“Sa i le vao o lea nuu leoleo mamoe sa nonofo ai ma leoleo po i lo latou lafu mamoe.
“Faauta foi, ua tu mai ia i latou le agelu a le Alii, ua pupula faataaliolio mai foi ia te i latou le pupula o le Alii: ua matua fefefe ai lava i latou.
“Ona fai mai lea o le agelu ia te i latou, Aua tou te matatau: aua faauta, ou te aumai ia te outou le tala lelei, e olioli tele i le nuu uma.
“Aua o le aso nei ua fanau ai i le aai o Tavita, lo outou Faaola, o le Alii o Keriso. …
“Ona faafuasei lea ona faatasi mai ma le agelu o ‘au mai le lagi e toatele, ua vivii i le Atua, ua faapea ane,
“O le viiga i le Atua i mea aupitoaluga, ma le manuia i le lalolagi i tagata ua alofagia e ia” (Luka 2:8–11, 13–14).
O Lona soifua mai sa sosoo ai i totonu o ni nai aso i ni faasilasilaga eseese i ni tagata paia lava se toalua—o tagata faigaluega i le malumalu e pei ona tatou ta’ua ai i latou i aso nei:
“Faauta foi, sa i Ierusalema le tagata e igoa ia Simeona; o le tagata amiotonu o ia ma amioatua, sa faatalitali atu o ia i le faamafanafanaina o Isaraelu; ua i luga ia te ia le Agaga Paia.
“Ua uma ona faaalia ia te ia e le Agaga Paia, na te le iloa le oti seia muai iloa atu le Keriso o le Alii.
“O le Agaga ua alu ai o ia i le malumalu; ua au mai le tama o Iesu e ona matua, ia la faia ia te ia faapei ona tatau ai i le tulafono.
“Ona sapaia lea e ia i ona lima, ua vivii atu i le Atua, ua faapea atu,
“Le Alii e, e te tuu nei lau auauna ia alu ma le manuia pei o lau afioga:
“Aua ua iloa e o’u mata lau faaolataga”(Luka 2:25–30).
O le faasilasilaga lona lua sa tuu atu i se tamaitai paia, i totonu foi o le malumalu. O Ana lea e ta’ua e le mau “o se perofeta fafine, … sa loomatua o ia, …
“A ua oti lana tane; o ona tausaga ua tusa ma le valugafulu ma le fa. E lei alu ese ia i le malumalu, a ua auauna o ia i le Atua i anapogi ma talosaga i le ao ma le po.
“O lea lava itu aso ua sau ai o ia, ua faafetai atu i le Alii, ma tautala ia te ia i tagata uma lava, e na faatali atu i le togiola i Ierusalema”(Luka 2:36–38).
O valoaga ma faasilasilaga ua ta’ua o loo faamatala ai le uluai afio mai o le Faaola. O loo tatou saunia nei mo le Afio Mai Faalua o le Alii, o se taimi o loo faatalitali ma le naunautai i ai ē talitonu ma matata’u pe teena e le au lē talitonu. Ua poloaiina ai tatou ia “tutu ... i nofoaga paia, ma aua le masiʼi ese, seia oo mai le aso o le Alii; aua faauta, e vave lava ona oo mai” (MF&F 87:8). O na “nofoaga paia” e mautinoa lava e aofia ai le malumalu ma ona feagaiga e tausia ma le faamaoni, o se aiga o i ai fanau e faatauaina ma aoaoina, ma o tatou valaauga eseese o tiute na tofia ai e taitai perisitua, e aofia ai misiona, malumalu ma isi valaauga e faataunuuina ma le faamaoni i paranesi, uarota, ma siteki.
A o tatou sauniuni mo Lona Afio Mai Faalua, ma a o tatou tutu ai i nofoaga paia, tatou te faaauau pea ona faamamaluina le Kerisimasi e le na o se vaitau o “Faamanuiaga” po o “Aso Malolo Fiafia” ae o se faamanatuga o le soifua mai o le Alo o le Atua ma se taimi e manatua ai Ana aoaoga ma le taua e faavavau o Lana Togiola. Ou te tatalo ina ia tatou faamaoni i le faia o lea mea.
Ou te molimau atu ai i nei mea uma i le suafa o Ia o Le ana le aso fanau ua tatou faamanatuina, le suafa o Iesu Keriso, amene.