Maseeh ke Janam ki Bhavishyevaaniyaan
Badadin par, hum vishwaasi Ishu Maseeh ka janam manate hai, jo Parmeshwar, Anant Pita ka Iklauta Priye Putra hai. Is Pratham Adhyakshta ke Badadin ke Sandesh ke zariye jo hamare samaroh ko shuru karta hai, mai Unke janam ke bhavishyevaaniyaan bataunga.
Koi bhi bhavishyevaani swargdut ka Mary ke paas aane se mahatvapurn nahin tha.
“Swargdut ne usse kaha, he Mary: bhaybheet na ho, kyunki Parmeshwar ka anugrah tum par hua hai.
“Aur dekh, tu garbhwati hogi, aur tujhe ek putra utpann hoga, tu uska naam Ishu rakhna.
“Woh mahaan hoga, aur Parampradhaan ka putra kehlaaega: aur Prabhu Parmeshwar uske pita David ka singhasan usko dega:
“Aur woh Jacob ke gharane par sada raajye karega; aur uske raajye ka ant na hoga” (Luke 1:30–33).
Parmeshwar ke Putra ka maransheel janam aur jiwan aur mrityu avashyak tha hamare Swarg ke Pita ke yojna ke liye “taaki manushye ko amransheelta aur anant jiwan mil sake” (Moses 1:39). Dharti ki rachna se pehle, Ishu Maseeh ko maransheel jiwan anubhav karne ke liye chuna gaya tha aur woh Uddhaarkarta banna tha jo us yojna ko pura karega (dekhiye Moses 4:2). Pita Adam ko bataya gaya tha ki woh chadhawa dein “ek samaanta Pita ke Eklaute ke balidaan ka, jo ki mahima aur sachchaai se bhara hai. Isilye [use sikhlaya gaya tha], aap apna sab kaam Putra ke naam par karna, aur aap pashchataap karke aur Parmeshwar ke naam ko pukaarna sada Putra ke naam se” (Moses 5:7–8).
Moses ke pustak mein hum ispar Parmeshwar ka jawaab bhi padhte hai, Unka “uddhaar ka yojna sabhi manushyon ke liye, mere Eklaute Putra ke lahoo ke zariye, jo samay ke madhyaan mein aayega” (Moses 6:62). Parmeshwar jo Pita hai ne hamein pashchataap karne aur baptisma lene ki aagya di “mere Eklaute Putra ke naam se, jo mahima aur sachchaai se bhara hai, jo ki Ishu Maseeh hai, wohi ek naam jo ki swarg ke dwara diya jaaega, manushye ke bachcho ko uddhaar dene ke liye” (Moses 6:52).
Isaiah, Puraane Niyam ke ek mahaan bhavishyevakta, ne Maseeha ka janam ki bhavishyevaani ki thi.” Prabhu khud tumhe chinh dega,” usne kaha. “Dekho, ek kuwaari garbhwati hogi, aur ek putra janmegi, aur uska naam Immanuel bulaegi” (Isaiah 7:14).
Isaiah ne aur batlaya:
Kyunki hamare liye ek baalak utpann hua, hamein ek putra diya gaya: prabhuta uske kaandhe par hogi: aur uska naam Adhdhut, Salaahkaar, parakrami Parmeshwar, anantkaal ka Pita, Shaanti ka Raajkumar rakha jaaega.
“Uski prabhuta sada badhti rahegi, aur uski shaanti ka ant na hoga, isliye woh usko David ki gaddhi par is samay se lekar sarvada ke liye nyaye aur dharm ke dwara sthir kiye aur sambhale rahega” (Isaiah 9:6–7).
Maseeh ka janam ka gyaan Mormon Dharamshaastra ke bhavishyevaktaaon ko bhi diya gaya tha. Uddhaarkarta ke janam se che sao(600) saal pehle, Lehi ne sikhaya ki Parmeshwar Jews ke beech ek bhavishyevakta dega “ek Maseeha ya, dusre shabdon mein jagat ka rakshak bhejega” (1 Nephi 10:4).
Bhavishyevakta Abinadi ne ghoshna kiya:
“Kya Moses ne Maseeh ke aane, aur Parmeshwar ka apne logon ka uddhaar karne ki bhavishyevaani nahin ki thi? Aur jagat ke aarambh se sabhi bhavishyevaktaaon ne—kya thodi bahut baate in vishayon par nahin ki hai?
“Kya unhonne yeh nahin kaha ki Parmeshwar khud maanav samaaj mein, maanav sharir dhaaran karke, aur mahaan shakti ke saath prithvi par aaega?” (Mosiah 13:33–34).
Bhavishyevakta Nephi ne likha kaise swargdut ne use Nazareth ke shahar mein ek kuwari ko dikhaya tha, yeh kehte huwe, “Dekho, jis kuwari ko tum dekh rahe ho, woh maanav sharir mein Parmeshwar ke Putra ki maata hai” (1 Nephi 11:18).
“Aur aysa hua[Nephi ne likha] ki maine us kuwari ko Aatma mein kuch samay ke liye liye jaate dekha; aur tab swargdut ne mujh se kaha: Dekho!
“Aur jab maine phir se dekha, tab mujhe wohi kuwari apne godh mein ek bachche ko liye huwe dikhaai di.
“Aur woh swargdut mujhse bola: Parmeshwar ke Memne ko dekho, haan, yah Anant Pita ka Putra hai!” (1 Nephi 11:19–21; Alma 7:9–10bhi dekhiye).
Hum sab parichit hai us pehle ghoshna se Ishu ke janam ke baad. Yeh mahatvapurn hai jaanna ki yeh swarg ka ghoshna ek ayse dal ke liye tha jo, hamein batlaya gaya hai, woh us samay ke sabse vineet logon mein se the.
“Aur us desh mein kitne charwaahe the, jo raat ko maedaan mein rehkar apne bhed ka pehra dete the.
“Aur, Prabhu ka ek dut unke paas aa khada hua, aur Prabhu ka mahima unke chaaro or chamka: aur woh bahut dar gaye.
“Tab swargdut ne un se kaha, Mat daro: kyunki, mai tumhe bade anand ka susamachaar sunata hoon, jo sab logon ke liye hoga.
“Ki aaj David ke shahar mein tumhare liye ek Uddhaarkarta janma hai, aur yahi Maseeh Prabhu hai. …
“Tab achanak us swargdut ke saath swargduton ka dal Parmeshwar ki stuti karte huwe aur yeh kehte dikhaai diya,
“Aakaash mein Parmeshwar ki mahima, aur prithvi par un manushyon mein jinse woh prasann hai, shaanti ho” (Luke 2:8–11, 13–14).
Uddhaarkarta ke janam ke kuch hi dinon baad do alag ghoshnaaen hui do bahut pavitra logon ke dwara—jinhe hum aaj mandir mein kaam karne waale kehte hai:
“Aur, dekho, Jerusalem mein Simeon naam ka manushye tha; aur woh manushye dharmi aur bhakt tha, aur Israel mein shaanti laa raha tha: aur Pavitra Aatma uspar tha.
“Aur use Pavitra Aatma ke dwara prakat hua tha, ki woh mrityu ko na dekhega, jab tak usne Prabhu ke Maseeh ko na dekh liya hoga.
“Aur woh Aatma ke sikhane se mandir mein aaya: aur jab maata-pita us baalak Ishu ko andar laaye, ki uske liye vyavastha ki riti ke anusaar karein,
“To usne use apne godh mein liya, aur Parmeshwar ka dhanyevaad karke kaha,
“Prabhu, ab tu apne daas ko apne vachan ke anusaar, shaanti se vida karta hai:
“Kyunki meri aankhon ne tere uddhaar ko dekh liya hai” (Luke 2:25–30).
Dusra ghoshna ek pavitra mahila se kiya gaya, mandir mein. Anna, jise dharamshaastra “ek mahila bhavishyevakta kehti hai, … woh bahut budhi thi, …
“Aur woh ek vidhwa thi chaalis aur chaar saalon ki, jo kabhi mandir nahin chodti thi, par Parmeshwar ka sewa upwaas aur prarthnaaon se raat din karti thi.
“Aur woh us ghadi wahan aakar Prabhu ka dhanyevaad karne lagi, aur un sabhon se boli jo Jerusalem ki mukti chahate the” (Luke 2:36–38).
Jo bhavishyevaaniyaan aur ghoshnaaen abhi dohraai gayi hai Uddhaarkarta ke pehle aagman ki batlaati hai. Ab hum Prabhu ke Dusre Aagman ki tayyaari kar rahe hai, woh samay jiska apeksha vishwaasiyon ne ki hai aur avishwaasi darte ya khandan karte the. Hamein aagya di jaati hai “pavitra sthaanon mein khade …, aur unse hatna nahin, jab tak Prabhu ka din na aaye; kyunki dekho, woh jald aayega” (D&C 87:8). Yeh “pavitra sthaanon” mein zaroor se shaamil hai mandir aur woh vachanein jo hum vishwaasi rup se apnaate hai, ek ghar jahan bachchon ko anmol samjha jaata aur sikhalaya jaata hai, aur hamare anek zimmedaariyaan purohiti adhikaariyon dwara di jaaegi, jaise mission, mandirein, aur anye niyktiyaan jo shaakhaaon, ward, aur stake mein puri hoti hai.
Jab hum Unke Dusre Aagman ka tayaari karenge, aur jab hum pavitra sthaanon mein khade honge, hum Badadin ko sirf “Shubkaamnaaye baatne” ya “Khushaal Chuttiyon” ka avsar nahin maante rahenge par Parmeshwar ke Putra ke janam ka tyohaar maanenge aur ek samay jab Unke shikshan aur Unke Praeshchit ke anant mahatva ko yaad karenge. Mai prarthna karta hoon ki hum aysa karne mein vishwaasi rahe.
Mai in sab baato ki sachchaai ki gawahi deta hoon Unke naam se jinka hum janam din manate hai, khud Ishu Maseeh ka naam, amen.