ការប្រកាសរបស់ព្យាការីស្ដីពីការប្រសូតរបស់ព្រះគ្រីស្ទ
នៅពេលបុណ្យគ្រីស្ទម៉ាស់ យើងដែលជាពួកអ្នកជឿសាទរចំពោះការប្រសូតរបស់ព្រះយេស៊ូវគ្រីស្ទ ជាបុត្រាបង្កើតតែមួយនៃព្រះជាព្រះវរបិតាដ៏អស់កល្បជានិច្ច ។ ជាផ្នែកមួយនៃការប្រជុំធម្មនិដ្ឋានបុណ្យគ្រីស្ទម៉ាស់របស់គណៈប្រធានទីមួយដែលបង្កើតជាគន្លងសម្រាប់ការសាទររបស់យើង ខ្ញុំនឹងនិយាយអំពីការប្រកាសរបស់ព្យាការីស្ដីពីការប្រសូតរបស់ទ្រង់ ។
គ្មានការប្រកាសណាមួយដែលសំខាន់ជាងការបង្ហាញខ្លួនរបស់ទេវតាទៅដល់ម៉ារាឡើយ ។
« ទេវតាមានបន្ទូលថា កុំខ្លាចអី ម៉ារាអើយ ដ្បិតព្រះបានប្រោសមេត្តាដល់នាងហើយ ។
« មើល នាងនឹងមានគភ៌ប្រសូតបានបុត្រា១ ដែលនាងត្រូវថ្វាយព្រះនាមថា ‹ យេស៊ូវ › ។
« បុត្រនោះនឹងបានជាធំឧត្តម ហើយគេនឹងហៅទ្រង់ ជាព្រះរាជបុត្រានៃព្រះដ៏ខ្ពស់បំផុត ព្រះអម្ចាស់ដ៏ជាព្រះ ទ្រង់នឹងប្រទានរាជ្យនៃហ្លួងដាវីឌ ជាឰយុកោទ្រង់ថ្វាយទ្រង់សោយ
«ទ្រង់នឹងសោយរាជ្យលើពួកវង្សរបស់យ៉ាកុប នៅអស់កល្បរៀងទៅ ហើយរាជ្យទ្រង់នឹងមិនផុតឡើយ » (លូកា ១:៣០–៣៣) ។
ការប្រសូត និងព្រះជន្មនៅលើផែនដី និងការសុគតនៃព្រះរាជបុត្រារបស់ព្រះគឺចាំបាច់ចំពោះផែនការរបស់ព្រះវរបិតាសួគ៌ « នាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » (ម៉ូសេ ១:៣៩) ។ ពីមុនផែនដីត្រូវបានបង្កើត ព្រះយេស៊ូវគ្រីស្ទត្រូវបានជ្រើសឲ្យមកដកពិសោធន៍ជីវិតរមែងស្លាប់ ហើយធ្វើជាព្រះអង្គសង្គ្រោះដើម្បីឲ្យផែនការនោះអាចកើតឡើងបាន ( សូមមើល ម៉ូសេ ៤:២) ។ លោកអ័ដាមត្រូវបានបង្គាប់ឲ្យថ្វាយដង្វាយជា « និមិត្តរូបអំពីការបូជានៃព្រះរាជបុត្រាបង្កើតតែមួយនៃព្រះវរបិតា ដែលពោរពេញទៅដោយព្រះគុណ និងសេចក្ដីពិត ។ ហេតុដូច្នោះហើយ [លោកត្រូវបានបង្រៀនថា] អ្នកនឹងត្រូវធ្វើអ្វីៗទាំងអស់ដែលអ្នកធ្វើដោយនូវព្រះនាមនៃព្រះរាជបុត្រា ហើយអ្នកត្រូវប្រែចិត្ត ហើយអំពាវនាវដល់ព្រះដោយនូវព្រះនាមនៃព្រះរាជបុត្រាជារៀងដរាបរហូតតទៅ » (ម៉ូសេ ៥:៧–៨) ។
នៅក្នុងព្រះគម្ពីរម៉ូសេ យើងក៏បានអាននូវការពន្យល់របស់ព្រះអំពី « ផែនការនៃសេចក្ដីសង្គ្រោះដល់មនុស្សទាំងអស់ គឺតាមរយៈព្រះលោហិតនៃព្រះរាជបុត្រាបង្កើតតែមួយរបស់យើង ដែលនឹងយាងមកក្នុងពេលដ៏ខ្ពង់ខ្ពស់បំផុត » (ម៉ូសេ ៦:៦២) ។ ព្រះជាព្រះវរបិតាបានបង្គាប់យើងឲ្យប្រែចិត្ត ហើយទទួលបុណ្យជ្រមុជទឹក « ដោយនូវព្រះនាមនៃព្រះរាជបុត្រាបង្កើតតែមួយរបស់យើង ដែល ពោរពេញទៅដោយព្រះគុណ និងសេចក្ដីពិត ដែលជាព្រះយេស៊ូវគ្រីស្ទ ជាព្រះនាមតែមួយគត់ដែលនឹងបានប្រទានមកក្រោមមេឃ ដែលនឹងមានសេចក្ដីសង្គ្រោះមកដល់កូនចៅមនុស្ស » (ម៉ូសេ ៦:៥២) ។
អេសាយ ជាព្យាការីដ៏អស្ចារ្យម្នាក់នៅក្នុងព្រះគម្ពីរសញ្ញាចាស់ បានប្រកាសពីការប្រសូតនាពេលខាងមុខរបស់ព្រះមេស៊ី ។ លោកបានប្រកាសថា « ព្រះអម្ចាស់ទ្រង់នឹងប្រទានទីសំគាល់១មកអ្នករាល់គ្នា » « មើល នាងព្រហ្មចារីនឹងមានគភ៌ប្រសូតបានបុត្រាមួយ ហើយនឹងឲ្យព្រះនាមថា អេម៉ាញូអែល » (អេសាយ ៧:១៤)។
អេសាយក៏បានប្រកាសផងដែរថា
« ដ្បិតមានបុត្រ១កើតដល់យើង ព្រះទ្រង់ប្រទានបុត្រា១មកយើងហើយ ឯការគ្រប់គ្រងនឹងនៅលើស្មារបស់បុត្រនោះ ហើយគេនឹងហៅព្រះនាមទ្រង់ថា ព្រះដ៏ជួយគំនិតយ៉ាងអស្ចារ្យ ព្រះដ៏មានព្រះចេស្តា ព្រះវបិតាដ៏គង់នៅអស់កល្ប និងជាម្ចាស់នៃមេត្រីភាព
« ឯសេចក្តីចំរើននៃរដ្ឋបាលទ្រង់ និងសេចក្តីសុខសាន្តរបស់ទ្រង់ នោះនឹងមិនចេះផុតពីបល្ល័ង្ករបស់ដាវីឌ និងនគរនៃទ្រង់ឡើយ ដើម្បីនឹងតាំងឡើង ហើយទប់ទល់ ដោយសេចក្តីយុត្តិធម៌ និងសេចក្តីសុចរិត ចាប់តាំងពីឥឡូវនេះ ជារៀងរាបដរាបទៅ » (អេសាយ ៩:៦–៧) ។
ការប្រសូតរបស់ព្រះគ្រីស្ទក៏ត្រូវបានបើកសម្ដែងដល់ពួកព្យាការីក្នុងព្រះគម្ពីរមរមនដែរ ។ ប្រាំមួយរយឆ្នាំពីមុនការប្រសូតរបស់ព្រះអង្គសង្គ្រោះ លីហៃបានបង្រៀនថា ព្រះនឹងគង់នៅក្នុងចំណោមពួកយូដា « គឺព្រះមែស៊ី ឬពាក្យម្យ៉ាងទៀតថា ព្រះអង្គសង្គ្រោះនៃពិភពលោក » (នីហ្វៃ ទី ២ ១០:៤) ។
ព្យាការី អ័ប៊ីណាដៃ បានប្រកាសថា
« តើមិនមែនលោកម៉ូសេបានព្យាករប្រាប់ពួកគេ អំពីការយាងមកនៃព្រះមែស៊ីទេឬអី ហើយថា ព្រះទ្រង់នឹងប្រោសលោះរាស្ត្រទ្រង់? មែនហើយ ហើយសូម្បីតែពួកព្យាការីទាំងអស់ដែលបានព្យាករចាប់តាំងពីកំណើតលោកិយមកម្ល៉េះ — តើពួកគេពុំបាននិយាយតិចឬច្រើន អំពីការណ៍អស់ទាំងនេះទេឬអី?
« តើពួកគេពុំបាននិយាយថា ព្រះអង្គទ្រង់ផ្ទាល់នឹងយាងចុះមកក្នុងចំណោមកូនចៅមនុស្ស ហើយមានរូបរាងជាមនុស្ស ហើយចេញមកលើផ្ទៃផែនដីនេះដោយព្រះចេស្ដាដ៏ខ្លាំងក្លាទេឬអី? » (ម៉ូសាយ ១៣:៣៣-៣៤) ។
ព្យាការីនីហ្វៃបានកត់ត្រាពីរបៀបដែលទេវតាមួយអង្គបានបង្ហាញលោកពីស្ត្រីព្រហ្មចារីម្នាក់នៅក្នុងទីក្រុងណាសារ៉ែត ដោយប្រកាសថា « មើលចុះ នាងព្រហ្មចារីដែលអ្នកឃើញនោះគឺជាមាតានៃព្រះរាជបុត្រានៃព្រះ ស្របតាមខាងឯសាច់ឈាម » (នីហ្វៃ ទី ១ ១១:១៨) ។
ហើយហេតុការណ៍បានកើតឡើងថា [ នីហ្វៃបានសរសេរ ] ខ្ញុំបានឃើញថា នាងត្រូវបាននាំទៅដោយព្រះវិញ្ញាណ ហើយបន្ទាប់ពីនាងត្រូវបាននាំទៅដោយព្រះវិញ្ញាណអស់មួយរយៈហើយ នោះទេវតាក៏មានបន្ទូលមកខ្ញុំថា ៖ មើលន៏!
« ហើយខ្ញុំក៏មើល ហើយបានឃើញនាងព្រហ្មចារីម្ដងទៀត នាងកំពុងតែបីព្រះឱរសក្នុងដៃរបស់នាង ។
« ហើយទេវតាមានបន្ទូលមកខ្ញុំថា ៖ មើលន៏ កូនចៀមនៃព្រះ មែនហើយ គឺជាព្រះរាជបុត្រានៃព្រះវរបិតាដ៏នៅអស់កល្បជានិច្ច ! » (នីហ្វៃទី ១ ១១:១៩–២១;សូមមើលផងដែរ អាលម៉ា ៧:៩–១០) ។
យើងទាំងអស់គ្នាស្គាល់នូវការប្រកាសទីមួយ បន្ទាប់ ការប្រសូតរបស់ព្រះយេស៊ូវ ។ មានផ្នែកដ៏សំខាន់យ៉ាងខ្លាំងដែលការប្រកាសមកពីសួគ៌ានេះត្រូវបានធ្វើឡើងដល់មនុស្សមួយក្រុម ដែលយើងត្រូវបានប្រាប់ថា គឺជាជនដែលរាបសាបំផុតនៅក្នុងសង្គមនាជំនាន់នោះ ។
«រីឯនៅស្រុកនោះឯង មានពួកអ្នកគង្វាលដែលចាំយាមរក្សាហ្វូងចៀមរបស់ខ្លួននៅឯវាលក្នុងវេលាយប់ ។
«នោះមើល មានទេវតានៃព្រះអម្ចាស់មកឈរជិតគេ ឯសិរីល្អរបស់ទ្រង់ក៏ភ្លឺឆ្វាត់ជុំវិញ ហើយគេមានសេចក្តីភ័យខ្លាចជាខ្លាំង ។
«តែទេវតាប្រាប់ថា កុំខ្លាចអី មើល ខ្ញុំមកប្រាប់ដំណឹងល្អដល់អ្នករាល់គ្នា ពីសេចក្តីអំណរយ៉ាងអស្ចារ្យ ដែលសម្រាប់បណ្តាជនទាំងអស់គ្នា ។
« ដ្បិតនៅថ្ងៃនេះ មានព្រះអង្គសង្គ្រោះ១អង្គ ប្រសូតដល់អ្នករាល់គ្នានៅក្រុងហ្លួងដាវីឌ គឺជាព្រះគ្រីស្ទដ៏ជាព្រះអម្ចាស់ » ។ …
«នោះស្រាប់តែមានពួកពលបរិវារកកកុញស្ថានសួគ៌មកនៅជាមួយនឹងទេវតានោះ ក៏ពោលសរសើរដល់ព្រះថា
« សួស្ដីដល់ព្រះនៅស្ថានដ៏ខ្ពស់បំផុត ហើយសេចក្ដីសុខសាន្តនៅផែនដី នៅកណ្ដាលមនុស្ស ដែលជាទីគាត់ព្រះហឫទ័យដល់ទ្រង់ » (លូកា ២:៨-១១, ១៣–១៤) ។
ក្រោយពីការប្រសូតរបស់ព្រះអង្គសង្គ្រោះពីរបីថ្ងៃ មាននូវការប្រកាសផ្សេងទៀតដល់បុគ្គលដ៏បរិសុទ្ធពីររូប—សព្វថ្ងៃនេះ យើងហៅពួកគេថា ជាអ្នកធ្វើការនៅ ព្រះវិហារបរិសុទ្ធ ៖
« នោះមើល នៅក្រុងយេរូសាឡិម មានមនុស្សម្នាក់ឈ្មោះស៊ីម្មាន ជាអ្នកសុចរិត ដែលកោតខ្លាចដល់ព្រះ គាត់រង់ចាំសេចក្តីដោះទុក្ខ របស់សាសន៍អ៊ីស្រាអែល ហើយព្រះវិញ្ញាណបរិសុទ្ធក៏សណ្ឋិតលើគាត់ ។
« ព្រះវិញ្ញាណបរិសុទ្ធបានសំដែងឲ្យគាត់ដឹងថា គាត់មិនស្លាប់ឡើយទាល់តែបានឃើញព្រះគ្រីស្ទនៃព្រះអម្ចាស់ ។
« គាត់ចូលមកក្នុងព្រះវិហារដោយនូវព្រះវិញ្ញាណ រួចកាលមាតាបិតានាំយកព្រះយេស៊ូវ ជាឱរសចូលមក ដើម្បីធ្វើតាមទំលាប់ក្រឹត្យវិន័យដល់ទ្រង់
« នោះគាត់ក៏ទទួលមកបី ហើយសរសើរដល់ព្រះ ដោយពាក្យថា
« ឥឡូវនេះ ឱព្រះដ៏ជាម្ចាស់អើយ សូមបើកឲ្យបាវបំរើទ្រង់ទៅដោយសុខសាន្ត តាមព្រះបន្ទូលទ្រង់ចុះ
« ដ្បិតភ្នែកទូលបង្គំបានឃើញសេចក្តីសង្គ្រោះរបស់ផងទ្រង់ » (លូកា ២:២៥–៣០)។
ការប្រកាសទីពីរគឺទៅកាន់ស្ត្រីបរិសុទ្ធម្នាក់ ដែលនៅក្នុងព្រះវិហារបរិសុទ្ធដែរ ។ អាណ ដែលព្រះគម្ពីរហៅថា « ហោរាស្រីម្នាក់ …គាត់ចាស់ណាស់ហើយ
« នៅជាមេម៉ាយប្រហែលជា៨៤ឆ្នាំ ក៏នៅតែក្នុងព្រះវិហារ មិនដែលចេញឡើយ គាត់គោរពទាំងយប់ទាំងថ្ងៃ ដោយការតម ហើយអធិស្ឋាន
« គាត់បានឡើងមកនៅវេលានោះឯង ក៏អរព្រះគុណដល់ព្រះ ព្រមទាំងប្រកាសប្រាប់ពីព្រះឱរស ដល់អស់អ្នកដែលនៅរង់ចាំសេចក្តីប្រោសលោះនៅក្រុងយេរូសាឡិម » (លូកា ២:៣៦–៣៨) ។
ការព្យាករ និងការប្រកាសនានាគ្រាន់តែជាការនិទានប្រាប់អំពី ការយាងមករបស់ព្រះអង្គសង្គ្រោះ ជាលើកទីមួយដែលបានដកស្រង់ប៉ុណ្ណោះ ។ ឥឡូវនេះ យើងកំពុងត្រៀមខ្លួនសម្រាប់ការយាងមកជាលើកទីពីររបស់ព្រះអម្ចាស់ ជាគ្រាមួយដែលពួកអ្នកជឿបានរង់ចាំដោយអន្ទៈសារ រីឯពួកអ្នកឥតជំនឿបានភ័យខ្លាច ឬបដិសេធ ។ យើងត្រូវបានបង្គាប់ឲ្យ « ឈរ … ក្នុងទីបរិសុទ្ធទាំងឡាយ ហើយចូរកុំរើឡើយ រហូតដល់ថ្ងៃនៃព្រះអម្ចាស់មកដល់ ដ្បិតមើលចុះ ថ្ងៃនោះនឹងមកដល់យ៉ាងឆាប់រហ័ស » (គ និង ស ៨៧:៨) ។ ប្រាកដណាស់ « ទីបរិសុទ្ធ »ទាំងនោះរួមមានព្រះវិហារបរិសុទ្ធ និងការរក្សាសេចក្ដីសញ្ញារបស់វាដោយស្មោះត្រង់ គេហដ្ឋានមួយដែលកូនៗត្រូវបានថែរក្សា ហើយបង្រៀន និងទីតាំងនៃកាតព្វកិច្ចរបស់យើង ដែលត្រូវបានចាត់តាំងដោយអ្នកមានសិទ្ធិអំណាចបព្វជិតភាព រួមមាន បេសកកម្ម ព្រះវិហារបរិសុទ្ធ និងការបម្រើដែលបានបំពេញដោយស្មោះត្រង់នៅក្នុងសាខា វួដ និងស្ដេកទាំងឡាយផងដែរ ។
កាលយើងត្រៀមខ្លួនសម្រាប់ការយាងមកជាលើកទីពីររបស់ទ្រង់ ហើយកាលយើងឈរនៅក្នុងទីបរិសុទ្ធ យើងខិតខំប្រតិបត្តិតាមបុណ្យគ្រីស្ទម៉ាសពុំមែនគ្រាន់តែជារដូវកាលនៃ « ការគោរព » ឬ« ថ្ងៃបុណ្យដ៏រីករាយ »មួយនោះទេ ប៉ុន្តែជាការសាទរមួយនៃការប្រសូតរបស់ព្រះរាជបុត្រានៃព្រះ និងជាគ្រាមួយដើម្បីចងចាំការបង្រៀនរបស់ទ្រង់ ព្រមទាំងផ្នែកសំខាន់ដ៏អស់កល្បនៃដង្វាយធួនរបស់ទ្រង់ ។ ខ្ញុំសូមអធិស្ឋានថា យើងនឹងមានភាពស្មោះត្រង់នៅក្នុងការធ្វើកិច្ចការនេះ ។
ខ្ញុំសូមថ្លែងនូវសេចក្ដីពិតពីកិច្ចការទាំងនេះ នៅក្នុងព្រះនាមនៃអង្គដែលយើងសាទរចំពោះការប្រសូតរបស់ទ្រង់ ជាព្រះនាមនៃព្រះយេស៊ូវគ្រីស្ទ អាម៉ែន ។