10:57

អំណោយទាននៃព្រះវិញ្ញាណបរិសុទ្ធ

ដោយ ដូក្លាស ឌី ហូមស៍

ទីប្រឹក្សាទីមួយនៅក្នុងគណៈប្រធានយុវជនទូទៅ

បងប្អូនប្រុសស្រី វាគឺជាពរជ័យដ៏ធំមួយដែលខ្ញុំបានមកជួបជុំនឹងបងប្អូននារាត្រីនេះ ។

នៅបីសប្ដាហ៍ទៀត រាប់ពីថ្ងៃនេះទៅ វាគឺជាថ្ងៃបុណ្យគ្រីស្ទម៉ាស់ ។ នៅព្រឹកនោះ ក្មេងតូចៗរាប់លាននាក់នឹងក្រោកឡើងពីព្រលឹមខុសពីធម្មតា ហើយជាអ្នកទៅដាស់ឪពុកម្ដាយរបស់ខ្លួនឲ្យក្រោកពីដំណេកវិញ ។ ដោយមានក្ដីសង្ឃឹមនៅក្នុងចិត្ត ពួកគេបានប្រជុំគ្នានៅជុំវិញអំណោយជាច្រើនដែលពួកគេបានសម្លឹងមើលអស់រយៈពេលជាច្រើនថ្ងៃ ។

ឪពុករបស់ខ្ញុំស្រឡាញ់បុណ្យគ្រីស្ទម៉ាស់ ។ ការឲ្យនូវអំណោយនានានាំឲ្យគាត់មានអំណរក្រៃលែង ហើយគាត់ និងអ្នកម្ដាយរបស់ខ្ញុំជំនាញខាងកិច្ចការនេះណាស់ ។ ខ្ញុំ និងបងប្អូនរបស់ខ្ញុំ ក៏ដូចជាមនុស្សជាច្រើនផ្សេងទៀតដែរ គឺជាអ្នកទទួលផលមកពីទេពកោសល្យរបស់ពួកគាត់ ។ អំណោយដ៏ល្អបំផុតមួយចំនួនរបស់ពួកគាត់គឺជាវត្ថុអរូបិយ—វាគឺជាបទពិសោធន៍ដែលបានបង្កើតចំណងនៃសេចក្ដីស្រឡាញ់ ហើយបន្សល់ទុកនូវការចងចាំជាច្រើន ។ ការចងចាំទាំងនោះនៅតែនាំអំណរដល់ខ្ញុំសព្វថ្ងៃនេះ ។

វាទំនងដូចជារឿងមួយដ៏សមរម្យដែលការផ្ដល់ និងការទទួលអំណោយគឺជាផ្នែកដ៏សំខាន់នៃបុណ្យគ្រីស្ទម៉ាស់ ។ តែលើសអ្វីៗទាំងអស់ យើងសាទរចំពោះអំណោយដ៏គ្មានពីរនៃព្រះរាជបុត្រារបស់ព្រះ គឺព្រះយេស៊ូវគ្រីស្ទ ។ ពិតណាស់ អំណោយរបស់យើងចំពោះគ្នានឹងប្រៀបពុំបាននឹងអំណោយនេះទេ ប៉ុន្តែខ្ញុំជឿថា អំណរនៃការផ្ដល់ឲ្យ និងការទទួលអំណោយអាចបង្វែរដួងចិត្តយើងទៅរក « អំណោយទានទាំងឡាយនៃព្រះ » ។¹

អំណោយដ៏មានតម្លៃនៃព្រះរាជបុត្រារបស់ព្រះអញ្ជើញយើងម្នាក់ៗឲ្យស្វែងរក « សេចក្ដីសុខសាន្តនៅនាលោកិយនេះ និងជីវិតដ៏នៅអស់កល្បជានិច្ចនៅបរលោក » ។² សេចក្ដីសុខសាន្តនៅក្នុងពិភពលោកមួយដែលចេះតែមានវិបត្តិ និងការបែកបាក់កាន់តែច្រើនឡើងៗអាចទំនងជាពិបាកនឹងរក ។ ប៉ុន្តែសេចក្ដីសុខសាន្តនោះគឺជាអ្វីដែលព្រះវរបិតាយើង និងព្រះរាជបុត្រាទ្រង់ប្រទានដល់យើងម្នាក់ៗ លើកលែងតែយើងព្រមទទួលវាប៉ុណ្ណោះ ។

សូមនឹកស្រមៃថា វានឹងមានភាពចំឡែកយ៉ាងណានៅព្រឹកបុណ្យគ្រីស្ទម៉ាស់ ប្រសិនបើយើងអង្គុយជុំវិញដើមគ្រីស្ទម៉ាស់ ស្ងប់ស្ងែងពីអំណោយដែលបានរុំយ៉ាងស្រស់ស្អាត និយាយពីវត្ថុដែលនៅក្នុងនោះ រួចដើរចេញទៅហើយទុកអំណោយនោះចោល ដោយពុំបានបើកវាសោះ !

ជាអកុសល ពេលខ្លះយើងធ្វើរឿងបែបនេះជាមួយនឹងអំណោយរបស់ព្រះសម្រាប់យើង ។ សូមគិតពីព្រះបន្ទូលទាំងនេះរបស់ព្រះអង្គសង្គ្រោះ ៖ « ដ្បិតតើមានប្រយោជន៍អ្វីដល់មនុស្ស បើសិនជាបានប្រទានអំណោយទានមកលើគេ ហើយគេពុំទទួលយកអំណោយទានសោះនោះ ? មើលចុះ អ្នកនោះពុំត្រេកអរចំពោះអ្វីដែលបានប្រទានដល់គេ ឬក៏ត្រេកអរចំពោះម្ចាស់ដែលប្រទានអំណោយទាននោះដែរ » ។³

នៅរាត្រីនេះ ខ្ញុំចង់អញ្ជើញយើងគ្រប់គ្នាឲ្យសញ្ជឹងគិតពីរបៀបដែលយើងអាចទទួលយ៉ាងពិតប្រាកដនូវអំណោយដែលព្រះបានប្រទានដល់យើង ។ ជាពិសេស ខ្ញុំចង់ផ្ដោតលើអំណោយទានដ៏គ្មានព្រំដែននៃព្រះវិញ្ញាណបរិសុទ្ធ ។ កាលខ្ញុំចាប់ផ្ដើម ខ្ញុំសូមអធិស្ឋានថា ព្រះវិញ្ញាណបរិសុទ្ធនឹងជួយយើងឲ្យយល់ពីសារៈសំខាន់នៃអំណោយនេះ បង្រៀនថា យើងអាចធ្វើអ្វីខ្លះដើម្បីទទួលវាកាន់តែពេញលេញ ហើយប្រទានព្រះគុណដល់យើងដើម្បីធ្វើតាមអារម្មណ៍ដែលយើងមាន ។

ហេតុអ្វីព្រះវិញ្ញាណបរិសុទ្ធគឺជាអំណោយមួយដែលគួរឲ្យប្រាថ្នាចង់បានបែបនេះ ?

ព្រះវិញ្ញាណបរិសុទ្ធគឺជាសមាជិកទីបីនៃក្រុមព្រះ ។ ទ្រង់គឺជាព្រះដ៏ជាជំនួយ⁴ ជាផ្លូវ⁵ ជាគ្រូបង្រៀន⁶ អង្គធ្វើឲ្យបរិសុទ្ធ⁷ ដោយហេតុនេះហើយទើបទ្រង់គឺជាអង្គផ្លាស់ប្ដូរដួងចិត្តមនុស្ស ។⁸ តាមរយៈទ្រង់ យើងអាចទទួលបាន ព្រះចេស្តា និងលក្ខណៈនៃព្រះនៅក្នុងជីវិតរបស់យើង ។

បងប្អូននៅចាំពីលក្ខណៈទាំងនេះមួយចំនួន ៖ « សេចក្ដីស្រឡាញ់…អំណរអរ មេត្រីភាព អត់ធ្មត់ សុភាព សប្បុរស ស្មោះត្រង់ ស្លូតបូត [ និង ]ដឹងខ្នាត » ។⁹ ចំពោះឃ្លានេះប្រៀបបាននឹងការពិពណ៌នាមួយដ៏ល្អអំពីអ្វីដែលគេហៅជារឿយៗថា « ន័យសំខាន់នៃបុណ្យគ្រីស្ទម៉ាស់ » ។ ការសន្យារបស់ទេវតាអំពី « ដំណឹងល្អ...ពីសេចក្ដីអំណរដ៏អស្ចារ្យ » និង « សេចក្ដីសុខសាន្តនៅផែនដី នៅកណ្ដាលមនុស្ស »¹⁰នៅយប់ដំបូងនៃបុណ្យគ្រីស្ទម៉ាស់នោះត្រូវបានបំពេញតែមួយផ្នែកប៉ុណ្ណោះ ដរាបយើងទទួលបានព្រះវិញ្ញាណបរិសុទ្ធ ។

ជារឿយៗ យើងនិយាយអំពីការព្យាយាមរក្សាន័យសំខាន់នៃបុណ្យគ្រីស្ទម៉ាស់ពេញមួយឆ្នាំ ។ តាមធម្មជាតិ យើងចង់ឲ្យលក្ខណៈដ៏ទេវភាពទាំងនេះមកឃុំគ្រងព្រលឹងយើងយ៉ាងពិតប្រាកដជារៀងដរាបទៅ ។ ហើយព្រះវរបិតាដ៏ឥតខ្មោះរបស់យើងសព្វព្រះទ័យឲ្យយើង ដែលជាកូនចៅទ្រង់ ទទួលបានអំណោយទាំងនេះ ។ នេះគឺជាការសន្យាដ៏ធំក្នុងដំណឹងល្អនៃព្រះយេស៊ូវគ្រីស្ទ—ដើម្បីផ្លាស់ប្ដូរដួងចិត្តយើង ដើម្បី « ពុំមានបំណងនឹងប្រព្រឹត្តអំពើទុច្ចរិតទៀតឡើយ ប៉ុន្តែចង់ប្រព្រឹត្តអំពើល្អជានិច្ចវិញ »¹¹ ដើម្បីពោរពេញដោយ« សេចក្ដីសង្ឃឹម និងសេចក្ដីស្រឡាញ់ដ៏ឥតខ្ចោះ » ។¹² វាគឺជានៅក្នុងការទទួលព្រះវិញ្ញាណបរិសុទ្ធដោយពិតប្រាកដនោះហើយ ទើបអំណោយទានដ៏មានតម្លៃទាំងនោះនឹងបានបើកឲ្យយើងឃើញ ។

ជាពិសេស អំណោយទានព្រះវិញ្ញាណបរិសុទ្ធត្រូវបានប្រទានឲ្យយើងជាមួយនឹងជាមួយនឹងពាក្យទាំងនេះថា « ចូរទទួលព្រះវិញ្ញាណបរិសុទ្ធចុះ » ។¹³ ខ្ញុំសូមណែនាំនូវគន្លឹះបីយ៉ាងដែលនឹងជួយយើងឲ្យទទួលអំណោយទានដ៏មានតម្លៃនេះដោយពិតប្រាកដ ។ ដើម្បីធ្វើកិច្ចការនេះ ខ្ញុំសូមណែនាំពីទិដ្ឋភាពដ៏អស្ចារ្យមួយនៅក្នុងព្រះគម្ពីរមរមន ។ ព្រះគ្រីស្ទដែលមានព្រះជន្មរស់ឡើងវិញបានចំណាយមួយថ្ងៃដើម្បីធ្វើការងារបម្រើនៅក្នុងចំណោះប្រជាជននោះ ដោយសន្យាថា ទ្រង់នឹងយាងមកវិញនៅថ្ងៃស្អែក ។ ពាក្យនេះត្រូវបានផ្សព្វផ្សាយ ហើយដោយមានចិត្តរភើបយ៉ាងអស្ចារ្យ ប្រជាជនមកពីគ្រប់ទិសទីនៃដែនដីនោះបានមកប្រជុំគ្នា មានអ្នកខ្លះខំធ្វើការពេញមួយយប់ ដើម្បីព្រឹកឡើង ពួកគេអាចនៅកន្លែងដែលព្រះយេស៊ូវនឹងបង្ហាញព្រះកាយម្ដងទៀត ។

1. បំណងប្រាថ្នាខាងវិញ្ញាណដ៏ចម្បង

កាលពួកគេបានរង់ចាំព្រះអង្គសង្គ្រោះយាងត្រឡប់មកវិញ ពួកសិស្សបានបង្រៀនដល់បណ្ដាជននូវអ្វីដែលព្រះយេស៊ូវបានបង្រៀនកាលពីថ្ងៃមុន ។¹⁴ បន្ទាប់មកទៀត កំណត់ត្រានេះបានចែងថា ពួកគេបានលុតជង្គង់អធិស្ឋាន « សូមនូវអ្វីៗ ដែលគេចង់បានបំផុត ហើយពួកគេមានប្រាថ្នាសូមឲ្យព្រះវិញ្ញាណបរិសុទ្ធ[ នឹង ]បានប្រទានដល់ពួកគេ » ។¹⁵ សូមគិតមួយភ្លែតសិននូវព្រឹត្តិការណ៍ដ៏សំខាន់នោះ—ពួកគេមានចិត្តរំភើបយ៉ាងខ្លាំងចំពោះការយាងត្រឡប់មកវិញរបស់ព្រះអង្គសង្គ្រោះ ប៉ុន្តែពួកគេពុំបានអធិស្ឋានសូមការណ៍នោះឡើយ ។ ដោយបានទទួលការបង្រៀនមកពីគ្រូបង្រៀនដ៏ល្អឥតខ្ចោះមួយអង្គ រួចហើយមកពីពួកសិស្សជម្រើសរបស់ទ្រង់ អ្វីដែលពួកគេប្រាថ្នាចង់បានបំផុតគឺអំណោយទាននៃព្រះវិញ្ញាណបរិសុទ្ធ ។ បំណងនេះដែលជាបំណងប្រាថ្នាខាងវិញ្ញាណដ៏ចម្បងគឺជាគន្លឹះមួយដ៏សំខាន់ចំពោះការទទួលបានអំណោយទាននេះ ។

ប្រធាន ហិនរី ប៊ី អាវរិង បានបង្រៀនថា « យើងភាគច្រើន…មានសេចក្ដីជំនឿគ្រប់គ្រាន់ដើម្បីបានព្រះវិញ្ញាណបរិសុទ្ធនៅពេលខ្លះ ។ បំណងប្រាថ្នានោះប្រហែលជាទន់ខ្សោយ ហើយមានចន្លោះ ប៉ុន្តែជាធម្មតាបំណងនោះនឹងកើតមាននៅពេលយើងជួបឧបសគ្គ ។ [ ប៉ុន្តែ ] ដើម្បីឲ្យយើងត្រូវបានដឹកនាំឡើងទៅរកសុវត្ថិភាពនាពេលអនាគត វាត្រូវតែមានភាពរឹងមាំ ហើយខ្លាំងក្លា » ។¹⁶ បងប្អូនប្រុសស្រី ដើម្បីឲ្យយើងទទួលបានអំណោយទាននេះយើងចាំបាច់ត្រូវមានបំណងចង់បានវាដោយអស់ពីដួងចិត្តរបស់យើង ។

2. ការចូលរួមដោយសុចរិតនៅក្នុងពិធីបរិសុទ្ធនានា

ដោយត្រឡប់ទៅរកទិដ្ឋភាពនោះនៅក្នុងព្រះគម្ពីរមរមនវិញ យើងរកឃើញគន្លឹះមួយទៀត ។ បន្ទាប់ពីអធិស្ឋានទូលអង្វរសូមអំណោយទានដែលពួកគេប្រាថ្នាចង់បានបំផុត គឺព្រះវិញ្ញាណបរិសុទ្ធ នោះពួកសិស្សបានចុះទៅឯមាត់ទឹក ហើយបានទទួលជ្រមុជទឹក ។ « ហើយហេតុការណ៍បានកើតឡើងថា កាលពួកគេទាំងអស់គ្នាបានទទួលបុណ្យជ្រមុជទឹក … នោះព្រះវិញ្ញាណបរិសុទ្ធបានយាងចុះមកសណ្ឋិតលើគេ ហើយពួកគេបានពោរពេញទៅដោយព្រះវិញ្ញាណបរិសុទ្ធ និងដោយភ្លើង » ។¹⁷ពិធីបរិសុទ្ធនៃបុណ្យជ្រមុជទឹកដើរតួជាសាក្សីពិតមួយនៃការតាំងចិត្តរបស់យើងដើម្បីចងចាំ ហើយគោរពតាម ឆនៈរបស់យើងដើម្បីយកព្រះនាមព្រះគ្រីស្ទមកដាក់លើខ្លួនយើង និងបំណងប្រាថ្នារបស់យើងដើម្បីទទួលបានព្រះវិញ្ញាណបរិសុទ្ធ ។¹⁸

រាល់សប្ដាហ៍យើងមានឱកាសរំឭកចាំសាក្សីនោះដោយទទួលទានសាក្រាម៉ង់ « ប្រយោជន៍ឲ្យ[ យើង ]អាចបានព្រះវិញ្ញាណរបស់ទ្រង់ គង់នៅជាមួយនឹង[ យើង ]ជាដរាប » ។¹⁹ ពិធីបរិសុទ្ធជាដៃគូនឹងគ្នារវាងបុណ្យជ្រមុជទឹក និងសាក្រាម៉ង់ជួយនាំ « អំណាចនៃព្រះ »មកក្នុងជីវិតរបស់យើង ។²⁰ តាមរបៀបមួយ វាតំណាងទាំងគោលដៅ និងដំណើរការនៃការក្លាយជាព្រះ ។ ការក្លាយជាមនុស្សថ្មីនៅក្នុងព្រះគ្រីស្ទ ជា« បុត្រារបស់ទ្រង់ និងបុត្រីរបស់ទ្រង់ » ។²¹ គឺជាគោលដៅដែលយើងប្រាថ្នាចង់បាន ។ គោលដៅនោះអាចសម្រេចបានពីមួយសប្ដាហ៍ទៅមួយសប្ដាហ៍ កាលយើងខិតខំចងចាំ ហើយគោរពតាម ។ ខ្ញុំសូមអញ្ជើញបងប្អូនឲ្យមកពិធីសាក្រាម៉ង់របស់ព្រះអម្ចាស់ជារៀងរាល់សប្ដាហ៍ដោយមានសេចក្ដីជំនឿលើការសន្យារបស់ទ្រង់ថា កាលណាយើងរក្សាសេចក្ដីសញ្ញារបស់យើង នោះយើងនឹងពោរពេញដោយព្រះវិញ្ញាណ មួយកម្រិតម្ដងៗ « រហូតដល់ថ្ងៃបានល្អឥតខ្ចោះ » ។²²

នៅឆ្នាំនេះ បុណ្យគ្រីស្ទម៉ាស់ត្រូវចំនឹងថ្ងៃអាទិត្យ ។ ការសាទរការប្រសូតរបស់ព្រះគ្រីស្ទ និងដង្វាយធួនដ៏ល្អឥតខ្ចោះរបស់ទ្រង់ កាលយើងទទួលសាក្រាម៉ង់នៅថ្ងៃនោះ គឺជាពរអ្វីម្ល៉េះ ។

3. ការបង្កើនសេចក្ដីជំនឿ

គន្លឹះចុងក្រោយ ហើយសំខាន់បំផុតដែលខ្ញុំនឹងលើកឡើងគឺសេចក្ដីជំនឿលើព្រះយេស៊ូវគ្រីស្ទ ។ បន្ទាប់ពីព្រះវិញ្ញាណបរិសុទ្ធបានមកគ្រប់ដណ្ដប់លើពួកសិស្សដោយព្រះចេស្ដាដ៏អស្ចារ្យ នោះព្រះគ្រីស្ទបានបង្ហាញព្រះកាយ ហើយបានអធិស្ឋាន ដោយថ្លែងអំណរគុណព្រះវរបិតាទ្រង់សម្រាប់ការប្រទានអំណោយទានដ៏មានតម្លៃនេះដល់ពួកគេ ។ រួចទ្រង់បានមានបន្ទូលដ៏សំខាន់ទាំងនេះថា « ព្រះអង្គបានប្រទានព្រះវិញ្ញាណបរិសុទ្ធដល់ពួកគេ ពីព្រោះពួកគេបានជឿដល់ទូលបង្គំ » ។²³ សេចក្ដីជំនឿលើព្រះអង្គសង្គ្រោះ និងដង្វាយធួនដ៏ល្អឥតខ្ចោះរបស់ទ្រង់គឺជាប្រភពនៃគ្រប់អំណោយទានល្អៗ ។²⁴

សេចក្ដីជំនឿដែលកើនឡើងនាំមកនូវការទទួលបានព្រះវិញ្ញាណបន្ថែមទៀតចូលមកក្នុងជីវិតរបស់យើង ។ ចុះតើយើងបង្កើនសេចក្ដីជំនឿរបស់យើងលើព្រះគ្រីស្ទតាមរបៀបណា ? យើងទទួលទាន ហើយគោរពតាមបន្ទូលរបស់ទ្រង់ ។ អែលឌើរ ឌី ថត គ្រីស្តូហ្វឺសិន បានបង្រៀនថា « គោលបំណងដ៏សំខាន់នៃបទគម្ពីរទាំងអស់គឺដើម្បីបំពេញព្រលឹងរបស់យើងជាមួយនឹងសេចក្ដីជំនឿលើព្រះជាព្រះវរបិតា និងព្រះរាជបុត្រាទ្រង់គឺព្រះយេស៊ូវគ្រីស្ទ » ។²⁵ សេចក្ដីពិតនេះត្រូវបានបង្រៀនជាញឹកញាប់នៅក្នុងព្រះគម្ពីរមរមន ។ ឧទាហរណ៍ ស្ដេចបេនយ៉ាមីន បានបង្រៀនដល់រាស្ត្ររបស់ទ្រង់នូវពាក្យពេចន៍ដែលទ្រង់បានទទួលមកពីទេវតាមួយអង្គ ដែលវាបានជួយពួកគេឲ្យ « សេចក្ដីជំនឿដ៏លើសលប់ »លើព្រះយេស៊ូវគ្រីស្ទ ហើយដោយសារតែសេចក្ដីជំនឿនោះ ទើបព្រះវិញ្ញាណបាននាំឲ្យមានការផ្លាស់ប្ដូរដ៏ធំនៅក្នុងដួងចិត្តរបស់ពួកគេ ។²⁶

ប្រសិនបើយើងចង់បានព្រះវិញ្ញាណបរិសុទ្ធធ្វើជាដៃគូប្រចាំថ្ងៃរបស់យើង យើងនឹងទទួលទាន គោរពតាមបន្ទូលរបស់ព្រះគ្រីស្ទនៅក្នុងបទគម្ពីរ ពួកព្យាការីនៅរស់ និងការខ្សឹបប្រាប់ពីព្រះវិញ្ញាណ ។ ការស្វែងរកពន្លឺ និង សេចក្ដីពិតនឹងបង្កើនសេចក្ដីជំនឿរបស់យើងលើព្រះគ្រីស្ទ បំណងប្រាថ្នារបស់យើងដើម្បីក្លាយដូចជាទ្រង់ និងសមត្ថភាពរបស់យើងដើម្បីទទួលបានសមាជិកទីបីនៃក្រុមព្រះជាដៃគូរបស់យើងជានិច្ច ។

បងប្អូនប្រុសស្រី ព្រះប្រទានអំណោយដែលមិនអាចកាត់ថ្លៃបានរបស់ទ្រង់ដល់យើង ដោយឥតបង់ថ្លៃ នៅបុណ្យគ្រីស្ទម៉ាស់ និងពេញមួយឆ្នាំ ។ ខ្ញុំសូមអធិស្ឋានថា យើងនឹងពុំទុកអំណោយនោះចោលឡើយ ប៉ុន្តែទទួលវាដោយប្រើគន្លឹះទាំងនេះ ។ ខ្ញុំសូមថ្លែងទីបន្ទាល់ថា កាលយើងធ្វើដូច្នេះ យើងនឹងត្រូវបានបំពេញមួយជំហានម្ដងៗ ហើយមួយកម្រិតម្ដងៗ ដោយសេចក្ដីស្រឡាញ់ អំណរ ភាពសុខសាន្ត ភាពបរិសុទ្ធ និងព្រះចេស្ដា ។ យើងនឹងបាន « ចំណែកជានិស្ស័យនៃព្រះ » ។²⁷ យើងនឹងរីករាយនៅក្នុងអំណោយនៃអំណោយទាននោះ ។ ហើយកាលទ្រង់យាងមកម្ដងទៀត យើងនឹងបានត្រៀមខ្លួនដើម្បី « ទទួលស្ដេច[ របស់យើង ] » ។²⁸ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។