Na Kaukauwa i Jisu Karisito kei na iVunau Savasava
Na Kaukauwa i Jisu Karisito kei na iVunau Dina vakatakei Elder Neil L. Andersen
Sigatabu, 11 ni June, 2023
Elder Neil L. Andersen: Vinaka vakalevu, Elder Gilbert. Vinaka, Baraca Webb Rau noqu itokani ka wekaqu talei sara. Au lomani rau vakalevu.
Totoka dina na matasere se vavei? Ka rokovi dina! Oni totoka dina. Vinaka vakalevu sara!!
Au vakasamataka na veivosa ena nomuni sa lagata na ika tolu ni qaqana, “Noqu rarama; vuni kaukauwa. Au kila ni nona kaukauwa au na qaqa tikoga.”1 Kevaka e rawa nira vakila o ira era vakavulica na titobu ni veivosa oqori kina nodra suitu, ena taqomaka e dua.
Sa ka talei meda tiko ena Tabernacle, se vavei? Eda na sega ni lesu vakawasoma tale mai eke. Ia, eso se bera mada ni gole mai ke vakadua, oni se gone sara. E vuqa vei keda e nanuma vinaka tu eso na veigauna guilecavi dredre ena Vale vakalaca makawa oqo. Ena vica beka li era tiko oqo se vinaka tu nodra nanuma tu na veigauna dredre era sotava eliu? (Laveta na ligamuni.)
Tolusagavulu na yabaki sa oti, au kacivi vata kei Elder Christofferson ena koniferedi ni Epereli. Keitou a dabe vata tiko, me vaka au nanuma, eliu ekea ni se bera ni keitou toso mai kina dabedabe damudamu. Dua na iApositolo, o Elder Marvin Ashton, a tauvimate ena koniferedi o ya, keirau qai soli na ivakadinadina malumalumu kei Elder Christofferson. E sega soti ni balavu na gauna ka soli vei keirau me vakavakarau.
E tiko tale e dua na gauna guilecavi dredre vakaoqori au na wasea kei kemuni.
Au se sega tale ni vosa ena Valetabalaca ena gauna au solia kina na ivakadinadina oya ena 1993. Keitou a lakova tiko mai na iotioti ni koniferedi ka na yaco ena Valetabalaca; ena Okotova 1999.
Qai yaco e dua na ka e veivakurabuitaki vei au. Oya na mataka ni Vakaraubuka se bera na koniferedi—ena 7:30 na mataka. Au tiko ena noqu vale ni volavola ni taqiri na talevoni. E kaya mai na domo ena yasa kadua ni talevoni, “Brother Andersen, oqo o Peresitedi Hinckley.” Au se Vakaitutu Raraba tiko, ia e lailai noqu gauna vata kei Peresitedi Hinckley. Sa qai kaya mai o koya—oqo na ka dina—a kaya, “Na mataqali isosomi vakacava o iko?” Sega sara ga niu kila meu na sauma vakacava, au sa qai vosa ga yani. A qai kaya mai: “O Elder Robert D. Hales e tauvimate. Ena sele tiko ena siga Moniti, ka na sega ni rawa ni vosa tiko ena mataka. Keitou vinakati iko mo sosomitaki koya ena mataka ni Vakarauwai. DONU? Moce mada!” Ia a kauta mai na veiauwa ni nuiqawaqawa. Ia oqo ga na ka au a sotava niu vosa ena koniferedi raraba eke ena Valetabalaca.
Kevaka tiko na gauna eda na rogoca kece na veika oni sa sotava.
Meu tekivu mada ena noqu wasea na noqu loloma kei na nodra loloma na Mataveiliutaki Taumada kei na Kuoramu ni Le Tinikarua baleti kemuni yadua. Keimami doka ka goroya sara na nomuni vakabauta kei na dina vua na noda iVakabula o Jisu Karisito kei na Nona cakacaka tabu. Oqo na veisiga ni veigauna sa rui bibi sara. Na nodra bula e drau vakaudolu na noda Yalododonu Edaidai sa umani tu ena nomuni veivakauqeti. O kacivi beka mo qasenivuli ni semineri se inisitute ena nomu tabanalevu se iteki se digitaki mo qasenivuli ena dua na noda 638 na inisitute e vuravura se ena semineri vakatikitiki—au tarogi Baraca Webb na levu ni noda kalasi e tiko, e kaya ni volekata tiko na 80,000 na kalasi ni semineri. Vakakina na semineri vakatikitiki, era sa tu oqo ena ra kei Amerika, Kenada, kei na koronivuli eso ni Lotu. Se ena nomu veiqaravi cava ga ena cakacaka ni Semineri kei na Inisitute, vinaka vakalevu sara vei kemuni ena vukudratou na Mataveiliutaki Taumada kei na Kuoramu ni Le Tinikarua. Keimami lomani kemuni ka masulaki kemuni. Oni sa okati meda sa tisaipeli vata i Jisu Karisito nida vakarautaki ira na tamata savasava ena veimatanitu, itovo, kei na veivosa e vuravura, mera vakarautaki kina lesu lagilagi mai ni Vakabula e vuravura.
Ena nomuni dokai yadua kei ira na qasenivuli rokovi era a liu mada ena cakacaka cecere oqo, keirau a veitalanoa oti kei Peresitedi Andy Diaz, e peresitedi ni iteki eke e Salt Lake City. Keirau a veivosakitaka na nona a qasenivuli semineri vakamataka ni se itabagone kina. Oqo na ka a talei dina sara ena isema oqo. Ni sa lewena na Lotu ni se yabaki 13 ena siti o Tampa, Florida, a tekivu me lewena o Peresitedi Diaz na semineri ena yabaki e tarava ena kalasi vakamataka ni semineri vata kei watiqu totoka o Kathy. Ia oqo oni raica nisa qase sara toka mai vei Kathy. E duidui na veidraki ni bula eda sotava. Na qasenivuli o tinai Kathy, a qai noqu nei e muri, o Sister Martha Williams. Rogoca mada oqo na neirau a veivosaki vata kei Peresitedi Diaz.
[tekivu na vidio]
Elder Andersen: au tiko oqo kei Peresitedi Andy Diaz, na peresitedi ni iTeki o Salt Lake Riverside. Keirau duavata kei Peresitedi Diaz ena veika bibi, oya nio watiqu o Kathy, a tiko ena nona kalasi ni semineri ena 50 na yabaki sa oti, ka sega walega oya, a nodrau qasenivuli o tinai Kathy, o Sister Martha Williams. A marama totoka dina sara. Io au kilai koya vinaka. Ka sa mai takali yani o koya. Ia au vinakata eke eso na vakanananu, ena 50 na yabaki sa oti, mai vua e dua sa peresitedi ni iteki nikua, a lewena na Lotu ni se qai yabaki 13 ka gole i semineri ena yabaki tarava, me baleti Sister Martha Williams. Ni solia ga mai vakararaba, Peresitedi Diaz, me baleta na marama oqo a nomu qasenivuli ni semineri.
Peresitedi Andy Diaz: O koya a dua beka na tolu na marama oqo a vakauqeta na noqu bula—o tinaqu, watiqu, kei Sister Williams.
Elder Andersen: Sega beka ni sa sivia o ya?
Peresitedi Diaz: E sega sara ni sivia o ya.
Elder Andersen: A rawa vakacava me bibi vei iko o koya?
Peresitedi Diaz: A vukei au meu tubu ka vulica na kosipeli, baleta niu se qai lewena vou na Lotu niu se yabaki 13 ia niu sa yabaki 14 au sa tekivu ena semineri. O koya sara ga vakabibi a vukei au dina meu vulica na kosipeli. Niu se qai tekivu ena koronivuli torocake au a taura e dua na cakacaka meu tekivu ena rua ena mataka, kau gole ni oti na cakacaka mai na rua kina semineri vakamataka ena ono baleta niu sega ni via calata; ni sa ka bibi sara vei au. Sa tuva oti tu na marama oqo, iko kila, na yalo “Me sa noda e dua na ka vakayalo,” kau sa gadreva na veika vakayalo oqori.
Elder Andersen: A tiko beka o koya ena savasava ni kosipeli kei na rawarawa ni kosipeli, se—au nanuma na 50 na yabaki sa oti ena so na noqu kalasi, keimami a vakadikeva na veika a sega e dua e kila.
Peresitedi Diaz: A vakatavulica o koya vei au na vunau savasava i Karisito. A tukuna na veika ni vakabauta kei na veivutuni kei na ka e gadrevi meda cakava meda lesu kina vua na Tamada Vakalomalagi, ka vosota tikoga.
Elder Andersen: A vukei iko beka mo saumaki vua na iVakabula o Jisu Karisito, ka yaco ena nomu bula taucoko?
Peresitedi Diaz: Io, a cakava. Baleta ni vukea meu veikilai kina kei na Tamada Vakalomalagi kei na iVakabula au vulica mai vua. Au a vulica baleta na iVakabula mai vua. Kei na veika kece era tu ena ivolanikalou ka dolava rawa o koya, ena kena kilai vinaka na veivunau oqori sa vakavulica na iVakabula. A tiko nona ivakadinadina, ka dau—niu nanuma rawa ni dau tinia na nona kalasi ena nona ivakadinadina ni kosipeli ni iVakabula kei na veika a vakavulica o koya ena siga oya, ni sa ka bibi sara. Ni sa dua na marama totoka sara, ni na dau solegi iko ena loloma ni kosipeli ka sa dau tu vua. Niu dau wanonovi koya, au sa qai saga meu dau vakatotomuri koya.
Elder Andersen: Ia, nio railesu, ke o tukuna e dua na ka vei ira na qasenivuli ni semineri kei na inisitute—me vakataki iko, a ka vou ena Lotu, se curuvou mai—cava o na uqeta vei ira mera cakava, Peresitedi Diaz?
Peresitedi Diaz: Lomani ira nomu gonevuli. Mera na kila nio lomana na Tamada Vakalomalagi ka sa lomani ira o Koya. Ni iVakabula sa lomani ira. Ni gauna ona muria kina na Kalou kei ira Nona parofita, ka rawa mo lesu tale mai ka bula vata tale kei Tamada Vakalomalagi.
Elder Andersen: Ia, au kila nirau na taleitaki iko na nomu itubutubu. Au kila nio Sister Williams, kau kila ni sa tauri vola mai na vuravura oqo ena 25 na yabaki sa oti, ena taleitaki iko talega.
Peresitedi Diaz: Ia, au sa na qai marau.
Elder Andersen: Ia, vinaka sara vakalevu. Vinaka vakalevu na wasea na veika oqo vei keimami.
Peresitedi Diaz: Sega na leqa.
[cava na vidio]
Elder Andersen: O Baraca kei Sister Diaz e rau tiko oqo. Drau rawa ni tucake, Brother kei Sister Diaz, me rawa ni keimami vakavinavinakataki kemudrau? Vinaka vakalevu sara.
O Peresitedi Diaz e ivakaraitaki ka veiuqeti me tomani tiko vei ira na tabatamata sa tarava mai baleta na nomuni vakabauta na Dauveivueti kei na nomuni laveti Koya tiko me sa rarama ni veika o tukuna ka cakava .
Ena veiqaravi o sa vakaraitaka tiko, au masu nikua meu wasea e dua se rua na rarama mena veiuqeti vakayalo vei iko ka yaco ena sala lailai duadua, me vukea me qaqaco na veiqaravi dodonu o sa solia tiko.
Sa rawa mo raica mada e liu oqo: Meda sa vakavulica ka vakadinadinataka vakalevu ka vakaukauwa baleti Jisu Karisito.
Vakasamataka na vosa oqo nei Peresitedi Russell M. Nelson ena koniferedi raraba ni Epereli ni sa veidonui vei ira na gonevuli o vakavulica: “Se cava ga nomu taro se leqa o sotava, na kena isau sa kunei ga ena bula kei na ivakavuvuli i Jisu Karisito, Vulica vakalevu na Nona Veisorovaki, Nona loloma, loloma soliwale, ivunau, kei na Nona kosipeli vakalesui mai ni veivakabulai kei na tubu. Mo gole Vua! Muri Koya!”2
Niu sa kacivi meu Vakaitutu Raraba ena 30 na yabaki sa oti ena itekivu ni 1990, e ciwa ena tini na kai Amerika qase era sa Lotu Vakarisito. E kaya na Pew Research Center, na lotu Vakarisito sa 64 na pasede ni lewenivanua ka rawa ni lutu kina 50 na pasede ena veiyabaki mai oqo. Ena matanitu eso sa sotava tiko talega na veibolebole vakaoqo ni vakabauta.
E dina, sega ni kemuni kece e tiko oqo sa mai na matanitu e liu tiko ena lotu Vakarisito, ka vuqa vei kemuni sa mai na veivanua sa kaukauwa sara kina na vakabauti Jisu Karisito. Se vanua cava ga eda tiko kina, eda raica ni sala ni bula tawamudu e tekivu ena saumaki titobu ka tudei ena noda iVakabula e rokovi kina Nona bula vakalou kei na ilesilesi.
“O Tomasi sa kaya vua, Turaga, … keimami kila vakacava na sala? “Sa kaya vua ko Jisu, Oi au na sala, kei na dina, kei na bula, sa sega ni torovi Tamaqu e dua, ena vukuqu ga.”5
Na isevu ni itukutuku ena Me iSakisaki ni iTabagone, na Mataveiliutaki Taumada e vola: “Ko ni sa yalo digitaki ni Tamada Vakalomalagi, vakau mai ki vuravura mo ni cakava na veika bibi. … Gole vua na iVakabula. Sai Koya na ‘kaukauwa ni itabagone.’”4
Au tiko ena vale ni semineri nei makubuqu. Au qoroya ni ra tu ena lalaga na veiiyaloyalo ni iVakabula kei na Nona vosa kei na ivolanikalou eso era tukuni Koya tiko.
A vakavulica o Baraca Chad Webb na ivakavuvuli oqo: “Na sala bibi duadua meda vukea na tubu ni nodra vakabauta na tabatamata e tarava o ya me usutu o Jisu Karisito ena yavu ni noda veivakavulici kei na vuli. ”5
A sega beka ni da vaqaqacotaki ena koniferedi raraba ni a cavuta o Peresitedi Dallin H. Oaks na vosa nei Nifai, “Mo kana magiti ena vosa i Karisito ni vosa i Karisito ena tukuna vei iko na ka kece mo na cakava,”6 ka qai taura na vo ni nona itukutuku kaukauwa me wasea “e dua na itukutuku digitaki ni noda iVakabula—na ka e kaya” ena Veiyalayalati Vou kei na iVola i Momani. A tinia o Peresitedi Oaks ena ivakadinadina vakaparofita oqo: “Sa ka dina na na ivakavuvuli oqo ena yaca i Jisu Karisito, emeni.”7
E tiko e dua na kaukauwa cecere ena vosa i Jisu Karisito.
“Dou kerekere, ka na soli vei kemudou; vakasaqara ka dou na kunea.”8
“Oi au na vu ni tucake tale, kei na vu ni bula, ko koya sa vakabauti au kevaka sa mate, ena bula ga:”9
Raica, koi au ko Jisu Karisito na Luve ni Kalou. Koi au na rarama kei na vu-ni-bula kei vuravura.”10
Ke o vakananuma na ka mo kaya, tukuna na vosa ni iVakabula. Tukuna na ka a sotava, cavuta na Nona vosa vakatautauvata; tukuna na ivolanikalou kei na nodra ivakadinadina na profita baleti Koya.
Ni da vakavulica ka tukuni Jisu Karisito, na Yalo Tabu ena vakadeitaka e yalodra na tisaipeli gone na dina ni Nona bula kei na ivakavuvuli ena kaukauwa e cecere cake mai na noda kaukauwa ni veivakavulici.
Ena yalomalua ke da sa cakava kece tiko beka noda veivakavulici kei na ivakadinadina me vaka a kerea o Peresitedi Nelson, ni Nona Veisorovaki, loloma, loloma veivueti, ivunau, Nona kosipeli vakalesuimai kei na tubu.
Baleta noda ivakarau ni veivakavulici e liu ena sega toka ni veirauti nikua kei na veika mai na veimataka, meda sa vakatetea noda kila vinaka me vaka a kaya o Peresitedi Nelson, meda “vulica vakalevu” ka vakayaloqaqataki ira na itabagone kei na qase cake ena Lotu mera “vulica vakalevu” na “bula kei na ivakavuvuli i Jisu Karisito.”11
Io na ikarua ni noqu rai: Meda maroroya na vunau me savasava ka rawarawa.
Na ka dina eda kila baleta na Tamada Vakalomalagi, noda iVakabula o Jisu Karisito; noda bula taumada; na ituvatuva ni bula marau nei Tamada me noda; noda madigi ni vakabauta, veivutuni, kei na cakacaka vakalotu—eda kila kece oqo—gadrevi ni ivakaro, veiyalayalati, talairawarawa, kei na gumatua; noda kalougata yalataki ni oti o vuravura—ka kece oqo sa makare totoka sara, me da kakua ni gadreva “na raibaleta na maka”12 sa tukuna tiko na ivolanikalou.
Sa usutu ni noda veivakavulici na Tamada Vakalomalagi, o Jisu Karisito, kei na nodrau vunau sa vakatakilai me vukea nodra vakabauti Rau na itabagone, mera saumaki vei Rau, ka ciqoma na Nodrau kalougata yalataki.
Na vunau i Karisito sa kunei ena ivolanikalou kei na nodra ivakavuvuli na parofita, e nodra ilesilesi mera tukuna mai na lewa ni Turaga.
Na vunau ena ivolanikalou era sa vakavulica na parofita e oka kina na nodra ivakavuvuli e vica na ivakadinadina, na ivakavuvuli sa rogoci wasoma ena koniferedi raraba ka dua au a wasea ena 10 na yabaki sa oti: “A vakatarogi na nodra vakabauta eso ni sa raici nona itukutuku dua na iliuliu ni Lotu ena veiyabaki sa oti e veicalati kei na noda vunau. E dua na ivakavuvuli bibi e liutaki kina na ivunau ni Lotu. Na ivunau era vakavuvulitaka o ira taucoko na lewe 15 ena Mataveiliutaki Taumada kei na Kuoramu ni Le Tinikarua. E sega ni vunitaki tu ena dua na parakaravu ni dua na vosa. Na ivakavuvuli dina e dau vakavulici wasoma mai vei ira e vuqa. Na noda vunau e sega ni dredre me kunei.”13
Rawa beka mo raica na bibi me tiko wasoma na ivakavuvuli ni parofita kei na iapositolo ena veivosaki ena kalasi? Na veidusimaki ni Turaga baleta na taro kei na kauwai ni vuravura oqo sa maivei ira sa tabaki oti ena kaukauwa vakaparofita. Kevaka na nuidei vei ira na parofita sa luluqa mai, veivakataotaki, veicalati, ka veimedreyakitaka mai o vuravura sa rawa ni solia mai e dua na nona qaqaco vakayalo. Na gutaki ena marau na koniferedi raraba kei na veivosakitaki ni bibi ni veivakavulici e muri mai. Kilai vakamatata na nodra ilesilesi tabu na lumuti ni Turaga. Ni toso ko vuravura vakayawa mai na ivakaro ni Kalou, na nodra itavi na iApositolo ena bibi cake sara.
Ni maroroi tiko na vunau ni Turaga me savasava ka kilai vinaka, qarauna mo tiko ga ena bai ni Kalou sa tauyavutaki, tarova na cala e yaco mai ena vakatitiqa kei na vakasama ni vunau vakatamata. Na vakasama oqo ena veisiwati ki na so ia ka sega na kaukauwa ni dina e vaqaqacotaka na vakabauta.
Au taleitaka na lesoni nei Peresitedi Dallin H. Oaks vei luvena ni a taroga e dua na taro a sega ni vakamatatataki tiko ena vunau i Karisito. A sauma: “Luvequ, au sega ni kila na isau ni taro oqori, ia meu sauma mada ena kena au kila.” A qai kaya na nona ivakadinadina baleti Parofita Josefa Simici kei na Matai ni Raivotu. Meda guta meda kaya, “Au sega ni kila oqori, ia oqo ga au kila.”
Raica mada na taro oqo kei na kedra isau:
“Baraca Jones, e rau sema vakacava na Big Bang kei Atama kei Ivi?” “Au sega ni kila na isau ni taro oqori, ia meu tukuna ga eke na ka keimami kila baleti Atama kei Ivi.”
“Sister Gonzalez, e rawa meda kila cake mada na Tinada mai Lomalagi?” “Au sega ni kila na isau ni taro oqori, ia au kila ga ni ko sa luvena yalewa lomani na noda iTubutubu Vakalomalagi, ena ituvaki vakalou kei na icavacava tawamudu.’14”
Vakasama nomu rawa ni moica na veitaro vinaka, kua ga ni taro e temaka na vakasama cala, me kena isau ena tara na vakabauta na noda iVakabula o Jisu Karisito Oqo e dua na ibolebole vei iko. Vukea mera vakauqeti na nomu gonevuli ena rarama ni taro kece era sega ni buli vakatautauvata. Na kila vinaka vakayalo kei na yalomatua e vukea me wasei na taro bibi mai na taro taleitaki toka.
Ena dodonu, matata, kei na rawarawa, eda sureta kina na veivakadeitaki ni Yalo Tabu. “Ni sa lako mai na Dauveivakacegui, … na Yalotabu ni ka dina, … ena tukuni au o koya.”15
A tukuna o Brigham Young na ivakavuvuli i Josefa Simici ena sala oqo: “A taura na lomalagi, vakaibalebaletaki, ka tukuca mai ki na vuravura; ka taura na vuravura, ka kauta cake, ka dolava, ena matata kei na rawarawa, na veika ni Kalou.”16
Qarauna na itukutuku kei na italanoa sa tukuni vei kemuni sa sega ni ukutaki. Tovolea mo raica na ivolanikalou se itukutuku o cavuta tiko sa ka dina ena kedra inaki taumada.
Sa ka rawarawa me da kuitaki ki na veika vou se e veivakauqeti sara e uabaleta noda kila. Tiko ga ena loma ni veitaqomaki ni vunau savasava ka rawarawa.
Qarauna na itukutuku raraba, nomu italanoa, kei na lesoni ivakaraitaki. Ni vakayagataki vakavinaka, ena yaco me taleitaki ka titobu. Ke vakalevutaki, era na mua tani mai na nomu veivakavulici. Na iwalewale ena rawa ni ubia na itukutuku.
Na parofita Alama a tukuna ni gauna marautaki ni kosipeli era “sa vakatakilai vei keda ena sala rawarawa, meda kila vinaka, ka kua ni cala kina.”17
“Ia kevaka ena rorogo na davui sa sega ni kilai, o cei ena vakarautaki koya me laki valu? ”18
Vakasama na ivolanikalou oqo ni ra sa matata sara:
“Dou lako mai vei au.”19
“Kevaka e dua sa via muri au, me kakua ni muria na lomana, ia me colata ga na nona kauveilatai, ka muri au.”20
“Ia kevaka dou sa vosota nodra ca na tamata, ena vosoti kemudou talega na Tamamudou vakalomalagi:”21
“Ia me da vakatovolei ira mada, era na muria se sega na veika kece sa vakarota vei ira na Turaga na nodra Kalou.”22
“Sa noqu vunau oqo, Mo dou veilomani, me vaka kau sa lomani kemudou.”23
Ena nona vunau kaukauwa “Rogoci Koya,” a kaya o Peresitedi Nelson, “[Na Tamada Vakalomalagi] sa vosa mai ena kena rawarawa, rogo malua, totoka na kena matata eda sega ni lecavi Koya kina.”24
Matata, dodonu, ka rawarawa sa sala vakalou ni veivakavulici.
Mo vuku sara ni ko tuva matau na vunau o vakavulica. Solia na dodonu veirauti ni dua na vunau ena loma ni itukutuku ni dina eso veisemati. Nanuma na ivakasala ni iVakabula baleta na vakavulici ni vunau: “Oqo sa kilikili mo dou kitka, me kakua talega ni biu laivi ko ya”25
E vakamacalataka o Elder Neal A. Maxwell, “Na ivakavuvuli ni kosipeli sa tali vata ena kena wa sa turi ira mera duavata ka veivakarautaki vata.”26
Vakasamataka: Na loloma kei na lawa ni Kalou, na veivosoti kei na veivutuni, na loloma ni Kalou, kei ira na tani, na galala kei na tukutukutaki vakadodonu.
Me vaka sa tukuni tiko vakavuqa, veivakavulici mo kua ga ni kilai vinaka, ia mo kua ni lecavi.
iOtioti, ni da sa kila kece tiko, na veidina oqo me na wasei yani ena kena draki e sureta ka vakayaloqaqataka na Yalo. E sega ni rawa me vakasaurarataki na Yalo. Eda sa masuta kina ka sureta na Yalo, ia eda sega ni saga vakailasu ni da sa yavalati vakayalo.
Ena 30 na yabaki sa oti, a kaya vei au o Peresitedi Dallin H. Oaks baleti luvena yalewa, o Jenny, ni se goneyalewa lailai tiko kina. A kaya vei au: “O Jeremy sa dau gole tiko ki na kalasi ni Goneyalewa se itaviqaravi ni se goneyalewa lailai kina. Ni sa lesu mai vale, keirau a tarogi koya kei watiqu a vakacava na soqoni, ni sa itavi ni itubutubu. A kaya o Jenny. ‘Io, a kaya o qasenivuli, nikua eda na sotava na ka vakayalo. Mo ni veitauri liga ka wavoki meda na sotava na ka vakayalo.’”
Au tomana na vosa nei Peresitedi Oaks:“Au a tarogi Jenny, ‘Cava o vakila?’ A qai kaya, ‘Au a masamasa!’” (E nikua beka, ni oti e 30 na yabaki, eda kaya beka, “E masamasa vei au.” Sega ni matata na vosa dodonu me tau.) A kaya o Peresitedi Oaks, “Au a kaya, ‘Au marau baleta niu rogoca oqo, e masamasa talega vei au.’” A qai kaya o Peresitedi Oaks, “Au a vakavulica vua ni sotavi na veika vakayalo e sega ni lokuci, ia era yaco ga ni da vakasaqara na veiuqeti ni Yalo ni Turaga.”
Nanuma tiko na loloma a vakila o Peresitedi Diaz maivei nona qasenivuli ni semineri, o Sister Williams? Eda sureta na Yalo ni da veivakavulici ena loloma, vakacegu, yalovinaka, yalomalua kei na vakabauta.
O ni kila kece na ivolanikalou oqo: “O koya sa ciqoma na vosa ena Yalo ni ka dina sa ciqoma ni sa vunautaki ena Yalo ni ka dina. … Ia, ko koya sa vunau kei koya sa ciqoma erau sa veivakatataki ka marau vata.”27
Sa qai sega ni nomu itavi ga oqo ia o ira talega era tiko ena nomu kalasi. Era na vulica na gonevuli mai vei iko ni ena talairawarawa ga ka dau nanumi Koya tikoga ena dau tiko vata ga kei ira na Yalona.
Qo na ka e tukuna o Peresitedi Eyring:
“Ena mana cake na ivunau ni vakadinadinataka na Yalo Tabu ni sa dina. Eda vakarautaki ira eda vakavulica, ena kena vinaka duadua, mera ciqoma na veivakauqeti ni domo lailai, malua. Ena gadrevi kina na vakabauti Jisu Karisito. E gadrevi kina na yalomalua, kei na gadreva me yaco ga vei keda na lewa ni iVakabula. Ena ituvaki ca beka o koya mo laki vukea, ia sa rawa mo vakauqeta me vakabauta ga. Kena ikuri, mo vaqaqacotaki iko mai na dua tale na kaukauwa ni vunau. Na dina e rawa ni vakarautaka ga nona sala. Ni rogoci na vosa ni vunau ena teivaki ena lomada na sorenikau ni vakabauta. Na sorenikau lailai ni vakabauti Jisu Karisito ena sureta na Yalo.”28
Era vosa totoka. Ia o ni sa vakarorogo matua sara. Vinaka vakalevu nomuni vakatara meu tiko kei kemuni ena gauna oqo. Keimami lomani kemuni, ka vinaka vakalevu nomuni cakacaka kece me qaqaco kina na nodra vakabauti Jisu Karisito na itabagone kei na qase cake.
Niu sa italai ni Turaga, kei na noqu lewa vakaiapositolo, mo ni kalougata me sinai na nomuni vakasama kei na yalomuni ena loloma, na loloma veivueti, na ivakavuvuli, kei na veidokai titobu ki na solibula veisorovaki tawavakatauvatani ni Turaga o Jisu Karisito. Moni kalougata, ke ko ni gadreva, ena gumatua mo ni vakavulica na vunau i Karisito ena savasava kei na kaukauwa me tubu ka mo raica ka vakila na veivakadeitaki ni Yalo Tabu vei ira nomuni gonevuli vinaka.
Au solia vei kemuni na noqu ivakadinadina tudei ni o Jisu na Karisito. Au vakadinadinataka na Nona yalayala ni a kaya, “O koya yadua ena tukuni au e matadra na tamata, au na tukuni koya talega ena matai Tamaqu sa tiko mai lomalagi.”29 Ena yaca i Jisu Karisito, emeni.