Faasalalauga Faaletausaga
O Le Mana o Faaaliga Faaletagata Lava Ia

O Le Mana o Faaaliga Faaletagata Lava Ia

Elder Kim B. Clark

O Le Fitugafulu

Faasalalauga o Aoaoga a le Ofisa o Aoga a le Ekalesia • Iuni 12, 2019 • Fale o Ofisa o le Ekalesia Potu Aoga Fogafale Autu

A o le’i amatalia la’u tautalaga i le asō, ou te fia faailoa atu lo’u loto faafetai ma le alofa. O se fiafiaga le auai faatasi ma outou i le galuega sili o le fesoasoani i le tupulaga fai a’e ia loloto le aoaoina o le talalelei a Iesu Keriso. Ou te alofa ia te outou, ma tatalo i faamanuiaga a le Alii ia te outou ma o outou aiga.

Ou te fia tautala i le asō e faatatau i mamanu e tolu o faaaliga faaletagata lava ia i totonu o le Tusi a Mamona:

Muamua o talafaamaumau paia o loo molimau ia Iesu Keriso ma le fuafuaga a le Tama. Lona lua, o le molimau a le Agaga Paia, lea e faamalosia le faatuatua ia Iesu Keriso ma faalolotoina le liua atu ia te Ia. Lona tolu, o perofeta soifua o e molimau ia Iesu Keriso ma tula’i e tete’e atu i le leaga.

O nei mamanu o loo manino ma malosi ona tuuina mai i totonu o le Tusi a Mamona ona e manaomia—e taua—e faatupu ai le faatuatua ia Iesu Keriso ma loloto ai le liua atu ia te Ia i o tatou aso.1

Ua tatou ola i se taimi o loo faia ai e alii ma tamaitai amio leaga ma taufaasese mea uma e latou te mafaia e faatalitonu ai le tupulaga faia’e e faapea o le lelei e leaga, ma le leaga ua lelei. E latou te faaaogaina metotia mai ituaiga tagata faapei o Serema, o Ne’oa, ma Kori’oa mai i totonu o le Tusi a Mamona—o mau faatogafiti, manatu faaviivii, ma ata ma faaigoa ua tuufaatasi ma le faaeteete—ia fausia ai mataupu faavae sese e uiga i la tatou fesootaiga i le Atua, alofa, talitalia, faaipoipoga, faasinomaga e faavavau, aiga ma le tele o isi. O le tele o nei manatu faalemafaufau ma mataupu faavae a tagata ua “foliga ua faaleatua, ae ua latou teena le mana o i ai.”2

O a tatou tamaiti aoga o loo osofaia i minute taitasi o aso uma e ia savali, ma e latou te manaomia faaaliga faaletagata lava ia e faamalosi ai lo latou faatuatua ia Iesu Keriso ma faalolotoina lo latou liua ia te Ia. Ou te faamoemoe ma tatalo o le a outou faia mea uma i lo tou malosi e fesoasoani ai i tatou tamaiti aoga ia loloto le aoaoina o ia mamanu o faaaliga faaletagata lava ia.

O faamaumauga paia o loo molimau ia Iesu Keriso

Ou te amata i talafaamaumau paia ia e molimau ia Iesu Keriso. O le autu lenei o loo i ai i le faasologa uma o le Tusi a Mamona. E amata atu i papatusi apamemea.3

O aafiaga a Nifae i le faatasi ai ma Lapana, lea na saunoa ai Sister Cordon, o se mea taua na tupu i lona olaga. Na aoao mai e Nifae le taua o na talafaamaumau mo ia ma lona aiga:”o le poto o i le Atua ua tatau ai ona tatou maua o ia talafaamaumau, ia mafai ai ona tatou faasaoina mo a tatou fanau le gagana a o tatou tama; … ma upu na tulei mai fofoga o perofeta paia uma.”4

O papatusi apamemea na i ai se aafiaga tumau i le atiina’ega faaleagaga, faaletalitonuga, ma le faaagafesootai o tagata Sā Nifaē. Na avea ia ma puna o faaaliga faaletagata lava ia ma valoaga mamalu o le o’o mai o le Alo o le Atua, Lē Paia o Isaraelu. Sa latou tuuina atu foi molimau malosi o le fuafuaga matagofie o le faaolataga a le Tama. O perofeta paia o loo ta’ua i totonu o papatusi apamemea na molimau e faapea o le Mesia o le a ia togiola mo agasala a le lalolagi, puapuaga, ma maliu, ma toetu mai manumalo ai i le agasala ma le oti.5

O papatusi apamemea o loo i ai foi feagaiga a le Tama ma Aperaamo ma le aiga uma o Isaraelu, Na maua ai e Liae o ia o sē tupuga mai ia Iosefa ma o ē e tupuga mai ia te ia o le a avea ma fanau o le feagaiga, o suli o folafolaga uma na tuuina atu e le Atua ia Aperaamo, e aofia ai le faapotopotoina o Isaraelu i aso mulimuli.

Na faaaoga e Liae papatusi apamemea e aoao ai lana fanau e uiga i le Faaola ma feagaiga na osia e le Tama ma le aiga o Isaraelu. Na faaauau e Nifae ma lona uso o Iakopo lena masani ma faaopoopo atu i ai mulimuli a laua lava talafaamaumau i lalo o le poloaiga mai le Alii.6 Na liua moni atu Nifae i le taua o le tausia o talafaamaumau tumau, aemaise lava talafaamaumau e paia.7

Mai le faavaega o na aso o po po fou i le nuu o le folafolaga, na atiina a’e ai e Sā Nifaē se aganuu masani lea na faataua ai le tausia tumau o talafaamaumau paia, faitauina, ma le aoaoina o ni tiutetauave maualuga ma paia. Faatasi ai ma le faatuatua ia Iesu Keriso ma se tautinoga e faataua ma teumalu Lana upu, na avea ai Sā Nifaē ma tagata tausi talafaamaumau paia, tagata faitau ma faiaoga.8 O talafaamaumau aloaia sa tausi lea i luga o papatusi, ae i le gasologa o taimi, na atiina a’e ai e Sā Nifaē se faatulagaga e lolomi ai ina ia mafai ona kopi ma tusia talafaamaumau paia i luga o meafaitino mama ma faasafua atu ai i le lautele.9

O le faasafua atu o talafaamaumau paia i le lautele na mafai ai e matua ona aoaoina a latou fanau i poloaiga a le Alii ma mafai ai e a latou fanau ona aoaoina a latou fanau ma faasolo ai lava i le aluga o seneturi.10 O faifeautalai e pei o atalii o Mosaea, na mafai ona latou avea talafaamaumau faatasi ma latou ma faaaoga e aoao ai Sā Lamanā lea na i ai ni taunuuga matagofie.11 A’o aoaoina e Alema ia Helamana, na tupu mai ai i talafaamaumau paia se aafiaga faafaaaliga lea na “faalauteleina le manatu o lenei nuu, ioe, ma … Aumai [le tele o afe ma afe o Sā Lamanā] i le malamalama o le Alii lo latou Atua, ma ia olioli ia Iesu Keriso lo latou Togiola.”12

O lenei olioli na o’o i le faatumutumuga ina ua faaali atu le Faaola toetu i tagata sa i le malumalu i Nuumau.13 Ua ia i tatou lenei molimau maoa’e ma malosi o le taulaga togiola ma le toetu mamalu a le Keriso soifua i totonu o le Tusi a Mamona i le asō e ala i le alofa mutimutivale ma le meaalofa ma le mana o le Atua.14 Faapei o Sā Nifaē, ma ona o i latou, ua i ai ia i tatou talafaamaumau paia ia o loo molimau ia Iesu Keriso ma le fuafuaga o le faaolataga a le Tama. E pei na vavalo atu Alema i lona atalii o Helamana i aso ua leva, o le Alii “na faasaosao[ina] nei mea mo se faamoemoega poto o ia te ia, ina ia mafai ona ia faaali atu lona mana i tupulaga o lumanai.”15

O lena lumanai, lea ua i ai nei. Ua faaali atu e le Alii Lona mana i le tupulaga faia’e i se ala matagofie. Pe a tatou aoao atu le atoatoaga o le talalelei a Iesu Keriso o loo i totonu o le Tusi a Mamona, o le a mafai e tatou tamaiti aoga ona lagonaina lena mana. A’o sailia e tatou tamaiti aoga faaaliga faaletagata lava ia e ala i le taumamafa fiafia i le Tusi a Mamona, o le a avea mo i latou faapei ona avea ai papatusi apamemea mo tagata o Nifae—o se molimau o Iesu Keriso ma le mana o Lana togiola ma o se puna o faaaliga faaletagata lava ia ma le olioli.

O le Molimau a le Agaga Paia, Lea e Faamalosia le Faatuatua ia Iesu Keriso ma Faalolotoina le Liua Atu ia te Ia

Tatou liliu atu loa i le Agaga Paia. O le malaga a Liae i le nuu o le folafolaga o se malaga o le mana faaleagaga. O se taimi lea na aoaoina ai e le Alii, taialaina ai, ma faamafanafanaina ai Liae, Sarai, ma la fanau uma i le mana o le Agaga Paia e ala mai i musumusuga, miti, ma faaaliga vaaia; O Lona lava siufofoga; ma le faaali mai o avefeau o le lagi. Na folafola mai e Nifae faapea o nei faamanuiaga o le mana faaleagaga na o’o mai i “le mana o le Agaga Paia, o le meaalofa a le Atua ia i latou uma o e sailiili ia te ia ma le filiga.”16

Na saili faamaoni Nifae i le Alii ma mauaina faaaliga sili e ala i le Agaga Paia. O lana sailiiliga ia iloa mo ia lava na faatulaga ai se mamanu o loo i ai i le faasologa uma o le Tusi a Mamona. Sa ia Nifae se “naunau tele e fia iloa mealilo a le Atua.”17 O lena naunau sa galueaiina i totonu ia te ia, ma sa ia “tagi atu ai i le Alii”18 i le tatalo ma loto i ai. I lana sailiiliga, na fetalai mai ai le Alii ia Nifae: “Amuia lava oe, Nifae, ona o lou faatuatua, ona ua e saili mai ia te aʼu ma le filiga, ma le maualalo o le loto.”19

O le mamanu lenei: o se naunauga e fia iloa, le tatalo faatauanau mai le loto, suesueina ma le maelega faatasi ai ma le lotomaualalo ma le faatuatua ia Iesu Keriso, ma le meaalofa o le Agaga Paia.20 E tatou te vaaia lenei mamanu i soifuaga o Enosa, Alema, atalii o Mosaea, le Tupu o Lamonae ma lona tama, o tagata o Amona, Helamana ma ana fitafita talavou ma le tele o isi.21 E moni lava, i taimi o le i ai o le amiotonu i Sā Nifaē ma Sā Lamanā, sa faalauaitele ia i latou le i ai o faaaliga faaletagata lava ia e ala atu i Agaga Paia.22

A’o faatino e Sā Nifaē ma Sā Lamanā faamaoni—ma tusi i lalo—mea na faailoa atu e le Agaga Paia ia i latou, sa faamanuiaina sili atu i latou e le Alii. Ona sa latou teuina23 mea na Ia tuu atu ia i latou, na faamanuiaina ai i latou i le faateleina o lo latou faatuatua ia te Ia, faalolotoina le liua, ma le agaga o faaaliga. Sa latou tuputupua’e i lo latou gafatia o le mauaina o faaaliga e ala i le mana o le Agaga Paia.

O le aafiaga na oo ia Alema o se faataitaiga matagofie lea o lenei mamanu. E te manatua, na ia vaai i agelu ma maua ni faaaliga vaaia maoa’e, ae peitai, sa faaauau ona ia saili atu i le molimau a le Agaga mai le Alii: “Faauta, ou te molimau atu ia te outou, ua ou iloa o mea ua ou tautala atu ai, ua moni. Ma o le a so outou manatu e faapefea ona ou iloa lo latou moni?

“Faauta, ou te fai atu ia te outou sa faailoa mai i latou ia te au e ala i le Agaga Paia o le Atua. Faauta, sa ou anapogi ma tatalo i aso e tele ina ia mafai ona ou iloa nei mea mo au lava ia. Ma o lenei ua ou iloa mo au lava ia ua moni nei mea; ona o le Alii le Atua na ia faailoa mai nei mea ia te au e ala mai i lona Agaga Paia; ma o le agaga lea o faaaliga ua ia te au.”24

O le molimau a le Agaga Paia na tēlē lona aafiaga i luga o tagata Sā Nifaē ma le faasinomaga lea sa latou ola ai.25 E le o i ai se faataitaiga sili atu nai lo le misiona a atalii o Mosaea i Sā Lamanā 91 tausaga a o le’i fanau mai le Faaola. E ala atu i le suesue ma le maelega o tusitusiga paia, anapogi, ma tatalo, o nei faifeautalai maoae “na i ai ia i latou le agaga o valoaga, ma le agaga o faaaliga.”26

O la latou galuega i Sā Lamanā na tupu mai ai se aafiaga tumau i le faasologa o le talafaasolopito o Sā Nifaē ma Sā Lamanā. Mo le taimi muamua i totonu o le 500 tausaga, “e afe ma afe [o Sā Lamanā] sa aumai i le malamalama o le Alii, … ma sa aoaoina i latou i talafaamaumau ma valoaga.”27 O le faamatalaina e Mamona o lenei aafiaga o se folafolaga faaperofeta o le mea e mafai ona tupu i soo se tasi o fanau a le Atua o sē mulimuli i le mamanu o faaaliga faaletagata lava ia e ala mai i le Agaga Paia: “E pei le toatele o e na aumai i le malamalama o le upumoni, e ala i le talaiga a Amona ma ona uso, e tusa ma le agaga o faaaliga ma valoaga, ma le faia e le mana o le Atua o vavega e ala atu ia te i latou … ma faaliliuina i le Alii, sa le’i pauu ese lava.”28

Uso e ma tuafafine, o le molimau lenei ma le mana o le Agaga Paia lea e faamalosia le faatuatua ia Iesu Keriso ma faalolotoina le liua atu ia te Ia.

O Perofeta o E Molimau ia Iesu Keriso ma Tula’i e Tete’e atu i le Leaga

O le mamanu lona tolu o faaaliga faaletagata lava ia o perofeta soifua o e ua faaeeina i le mana ma le pule e latou te fai atu ai, “ua faapea ona fetalai mai o le Alii,” i le taimi lava lea i tagata uma. O le mamanu sili lea faaperofeta ua tatou vaai i ai i le gasologa uma o le Tusi a Mamona: e molimau perofeta ia Iesu Keriso, aoao atu Lana talalelei, valaau atu i tagata ia salamo, ma lapatai atu ma tulai e tetee atu i le leaga i o latou aso.29 E ala mai faaaliga, aemaise mai agelu, o perofeta o le Tusi a Mamona ua latou tuuina mai ia i tatou se vaaiga sili na loloto ma matagofie e uiga ia Iesu Keriso, o Lana mataupu faavae, ma Lana Togiola.30

Sa lototetele ma faamaoni perofeta i le valaau atu i tagata ia salamo. O lea, ua tatou maua ai i totonu o le Tusi a Mamona aoaoga matagofie i le salamo a Nifae, Iakopo, le Tupu o Peniamina, Alema, Amuleka, o atalii o Mosaea, Taitai Au o Moronae, Mamona, ma Moronae.31 Sa aoao atu nei perofeta sili, ma le manino, faamaoni, alofa, ma le faamoemoe. O a latou aoaoga o loo tatagi pea i o tatou taliga e ala i le mana o le Agaga Paia:

  • “Ua fanauina ea outou faaleagaga i la le Atua?”32

  • “Afai ua outou lagona le fia pepese i le pese o le alofa togiola, e mafai ea ona outou lagonaina nei?”33

  • “Faauta, ua tafi ese ea le faamaualuga mai ia te outou?”34

  • “Ia salamo, ia salamo, ona ua fetalai mai ai le Alii le Atua! … ua ia auina mai se valaaulia i tagata uma, ona ua faaloaloa mai ia te i latou aao o le alofa mutimutivale, ma ua ia fetalai: Ia salamo, ona ou talia lea o outou.”35

O Perofeta o le Tusi a Mamona na tulai e tetee atu i tagata leaga o e na saili e toso ese tagata mai ia Iesu Keriso ma faaumatia Lana Ekalesia. O tagata e pei o Serema, Ne’oa, Amiliki, Kori’oa, Amalekia, ma le toatele o isi na taitaia e le fili ia lē mautonu ma faaseseina i tomai sili.36 Sa ia i latou se malamalamaaga taua o le gagana ma sa faaaogaina ni mailei atamai po o upu tauanau ia e foliga mai ai le lelei i le leaga, ma le leaga i le lelei.

E latou te faaviivii i tagata, vaai le tagata mo ia lava, faamaualuga, manao i le mana, ma le naunautai e faamalie o latou tuinanau. O loo faapea mai tusitusiga paia sa ia i latou “le mana tele o le tautala, e tusa ma le mana o le tiapolo”37 ma “sa tulai atu o ia ma upu leotetele.”38 E ui e sese uma nei aoaoga, finauga, ma folafolaga, ae sa sili ona tosina i ai le tagata natura, ma e toatele tagata na tetee ma o ese mai le Ekalesia ma leiloa ai lo latou ala se’ia oo ina tula’i le perofeta e aoa’i ma tete’e atu i le leaga.39

Ia, pe a le lava upu, ona liliu atu lea o tagata i le faafefe, fasioti tagata, ma le gaoi ma faatupuina ai taupulepulega faalilolilo ia natia ai a latou gaoioiga leaga.40

Na tulai perofeta e tete’e atu i nei ituaiga o mea leaga e ala i le upu faatauvaa ma faigofie a le Atua, i le tuuina atu o a latou molimau e ala i le mana o le Agaga Paia, ma e ala i vavega na faia i le aao o le Alii. E pei ona fai mai Iakopo i le la fetaiaiga ma Serema, “sa sasaa mai e le Alii le Atua … lona Agaga i totonu o loʼu agaga, sa oo ina ou faafememeaʼiina o ia i ana upu uma.”41

E saunoa mai perofeta soifua mo le Alii i o tatou aso. Pe a tatou faalogo ia latou upu e ala i le Agaga, tatou te maua tonu faaaliga faaletagata lava ia, e aofia ai le faaaliga e faamautinoa ai o le mea na saunoa mai ai le perofeta e moni lea.42 Pe a tatou aoao a tatou tamaiti aoga e saili atu i upu a perofeta soifua e tali ai a latou fesili, e tatou te taitai atu i latou i le puna malosi o upumoni ua faaalia. E aoaoina e tatou tamaiti aoga o faaaliga faaletagata lava ia e tafe mai i totonu o o tatou olaga pe a tatou mulimuli i perofeta soifua o e molimau ia Iesu Keriso ma tulai e tete’e atu i le leaga.43

Loloto o le Aoaoina o le Mataupu Faavae o Faaaliga Faaletagata Lava Ia

Ua tatou iloiloina faatasi, uso e ma tuafafine, faaaliga faaletagata lava ia e ala i talafaamaumau paia, le molimau a le Agaga Paia, ma perofeta soifua, o loo tuuina mai malosi i totonu o le Tusi a Mamona.44 Sa tatou talanoaina taitasi, ae e loloto lo latou fesootaiga. E moni, o i latou o ni vaega ia o le maoae “o le faapotopoto[ina] faatasi ai mea uma ia Keriso”45 i lenei tisipenisione.

I le tuufaatasi ai, o nei mamanu o faaaliga faaletagata lava ia o loo molimau ai, faamalosia ai le faatuatua, ma faalolotoina le liua atu ia Iesu Keriso. E manaomia e a tatou tagata aoga ona aoaoina loloto le mataupu faavae o faaaliga faaletagata lava ia ma malamalama i ai i o latou mafaufau ma loto. Latou te manaomia ona iloa le ala aoga amiotonu e galueaiina ina ia maua ai, ma e latou te manaomia ona ola a’e i totonu o le mataupu faavae o faaaliga faaletagata lava ia ma avea atili ai faapei o lo latou Faaola, o Iesu Keriso.

Ia, e mafai ona ou fautua atu ni nai mea ou te faamoemoe o le a e aoao atu ia tatou tagata aoga a o latou saili ia loloto lo latou aoaoina o le mataupu faavae e faavavau o faaaliga faaletagata lava ia?

Muamua, o faaaliga faaletagata lava ia, e patino i le tagata lava ia.

Afai o le a taulai atu loto ma mafaufau o a tatou tamaiti aoga ia Iesu Keriso ma Lana talalelei toefuataiina, o le a latou lagonaina Lona alofa, fiafia i totonu o Lana Talalelei, ma atili latalata atu ai ia te Ia. O se naunautaiga e faalogo atu i Lona siufofoga ma maua Lona malamalama o le a tuputupu ae i totonu o i latou.O faaaliga faaletagata lava ia e patino. E silafia lelei ma taitoatasi e le Alii a tatou tamaiti aoga. O le a Ia fetalai atu ia i latou taitoatasi faatasi ma se alofa atoatoa, agaalofa, ma malamalama i mea latou te manaomia. E oo mai faaaliga e ala i le Agaga Paia, ae o le afioga lava a le Alii. E alofa o Ia. E fetalai mai o Ia. E taiala mai o Ia. E puipui mai o Ia. E patino lava.

Lua, o tatou tamaiti aoga uma e i ai le gafatia e tali ai faaaliga faaletagata lava ia.

O faaaliga faaletagata lava ia e mai le Agaga i le agaga; o le fesootaiga paia mai le Agaga Paia i agaga e faavavau a tatou tamaiti aoga.46 O loo i ai i totonu o a tatou tamaiti aoga taitoatasi se gafatia e maua ai faaaliga faaletagata lava ia mai le Atua. E gaoioi lea e tusa ma le tulafono paia. E moomia le galue—saili ma le maelega i faaaliga i le tatalo, anapogi, suesue, faalogo, tusitusi, ma faatino lea e ala i le faatuatua ia Iesu Keriso. O le galuega lenei—ma le amiotonu faaletagata lava ia—lea e tatalaina le ala o faaaliga faaletagata lava ia, o loo latou mauaina uma.

Tolu, o le gafatia a a tatou tamaiti aoga e tali ai faaaliga e mafai ma e tatau ona tuputupua’e.

O le gafatia a a tatou tamaiti aoga e tali ai faaaliga faaletagata lava ia e mafai ona tuputupua’e. E moni, e tatau ona tuputupua’e pe a fai e faasaoina mai latou faaleagaga ma maua le ola faavavau. E moni foi lena mea mo i tatou. O le mafuaaga lea na uunaia ai latou ma aioi mai ai Peresitene Nelson ia i latou (ma tatou) ina ia “faateleina lo outou “gafatia faaleagaga e maua ai faaaliga.”47 Na aoao mai le Perofeta o Iosefa Samita, “O le aoaoina o le Agaga o le Atua ma malamalama i ai, [o tatou tamaiti aoga] o le a outou ola ai i le mataupu faavae o faaaliga, seia [latou] oo ina faaatoatoaina outou ia Keriso Iesu.”48

Mulimuli lava, aua lava nei tuuitiitia le mana o faaaliga o le mulimuli i le perofeta.

O tatou tamaiti aoga o loo ola i se taimi matagofie a ua i ai foi ma luitau. O le a puipuia ma faamanuiaina i latou ma o le a tafe atu faaaliga i totonu o o latou olaga pe a latou mulimuli i fautuaga ma valaaulia a le perofeta a le Alii. O le perofeta e saunoa mo le Alii. I le lauga atu i a tatou tamaiti aoga, na tusia ai e Peresitene Russell M. Nelson le mea lenei, “O lou gafatia e mafai ai ona aafia le lalolagi ia te oe nai lo se isi tupulaga na muamua atu e matua faalagolago lea i luga o lou tuuto atu ia Iesu Keriso. O outou taitoatasi o loo i ai le tiutetauave e fesoasoani e aoao atu le talalelei i totonu o lou aiga ia i latou o e o loo outou nonofo faatasi. O le Seminare ma le Inisitituti o le a fesoasoani ia te oe e toe faafou lou fale ina ia avea ma sulufaiga o le faatuatua—o se nofoaga e aoaoina ai le talalelei a Iesu Keriso, aoao mai ai, ola ai, ma alofagia ai.”49

Uso e ma tuafafine, faamolemole fesoasoani ia tatou tagata aoga e mulimuli i le perofeta. Aoao i latou ia lagolago o latou matua ia faia o latou fale ma totonugalemu o le aoaoina o le talalelei. Aoao i latou ia faasoa atu lo latou alofa i le Alii ma Lana talalelei i a latou aiga ma a latou uo. A o latou faia lena, o le a latou maua “lea faaaliga e faaopoopo i luga o lea faaaliga … o mea ia e maua ai le olioli, o mea ia e maua ai le ola e faavavau.”50 O le a pei latou o au tau a Helamana, o se musumusuga ia i latou uma o e iloaina i latou aemaise lava ia i latou o loo i totonu o latou lava fale.

Molimau

Ou uso e ma tuafaine, ou te molimau atu i lo tatou Tama Faalelagi alofa. O loo soifua o Ia. O Iesu o le Keriso, o lo tatou Faaola ma le Togiola. Ou te iloa o loo soifua o Ia. E galue le Agaga Paia i totonu o o tatou olaga. Ua matala le lagi. O le aso lenei o vavega, se aso o faaaliga e ala i le mana o le “Agaga … Na auina mai i le finagalo o le Tama, e ala mai ia Iesu Keriso, lona Alo.”51 Ou te iloa e moni lena mea. Tau ina ia tatou saili atu i faaaliga mai le Alii e fesoasoani ia tatou tamaiti aoga taitoatasi, tagata uma, ia loloto lo latou aoaoina o lenei mataupu mamalu ma maua faaaliga faaletagata lava ia, i totonu o o latou olaga i le taimi nei ma le faavavau.

I le suafa paia o Iesu Keriso, amene.

© 2019 Puletaofia e le Intellectual Reserve, Inc. Ua taofia aia tatau uma. Lomiga: 5/19. Faaliliuga o le “The Power of Personal Revelation.” Samoan. PD60006021 890

Faamatalaga

  1. O nei mamanu e tolu, sa faavaeina i totonu o le Aiga o Liae i le taimi o la latou malaga i le nuu o le folafolaga. O Liae o se perofeta ma sa vavalo atu i lona aiga: na ia molimau ia Iesu Keriso, ma valaau atu ia i latou ia salamo, ma tau ma le leaga o loo i ai faatasi ma latou; Sa saili atu Nifae i faaaliga faaletagata lava ia faapei ona faia e lona tama ma maua e ala i miti ma faaaliga vaaia, musumusuga a le Agaga, siufofoga o le Alii, ma i auaunaga a agelu. Ma sa ia i latou talafaamaumau paia i luga o papatusi apamemea lea na molimau ia Iesu Keriso.

  2. Tagai Iosefa Samita—Talafaasolopito 1:19.

  3. Na faamanino mai e Nifae faapea o lona tama o Liae o se tagata o le aoaoina ma le gagana. I le amataga lava o lana talafaamaumau na faapea mai ai Nifae, “O A’u, o Nifae, na fanaua e matua lelei, o lea na aoaoina ai a’u teisi i le poto uma o lo’u tama; … ou te faia se talafaamaumau i le gagana a lo’u tama, ua faia i le poto o tagata Iutaia ma le gagana a tagata Aikupito. … O aʼu, o Nifae, ou te lē faia se tala atoa o mea ua tusia e loʼu tamā” (1 Nifae 1:1–2, 16).

    O Liae o se tagata aoaoina o se sa tusia ana lava tala o ana miti ma faaaliga vaaia ma ana valoaga. Peitai, na poloaiina e le Alii Liae e toe auina atu ona atalii i Ierusalema ina ia maua mai talafaamaumau o tagata Iutaia sa tausia e Lapana.

  4. 1 Nifae 3:19--20.

  5. Tagai 1 Nifae 19:10 mo se faataitaiga o tusitusiga a perofeta o loo i papatusi apamemea ia e le o maua ia i tatou i totonu o le Tusi Paia.

  6. Tagai 1 Nifae 6:4; 19:1, 21. O papatusi apamemea ua faaauauina pea ona avea ma puna o manatu ma faaaliga i le gasologa o le talafaasolopito a Sā Nifaē. Na tusia i le mavae ai o le 1,000 tausaga talu Liae, na sii mai ai e Moronae upu mai ia Isaia e uiga i feagaiga a le Tama ma faaaoga le mana o le togiola a Iesu Keriso: “Ala mai, ma tulai mai nai lo le efuefu … Ierusalemu e; ioe, ma ofu ou ofu matagofie, le afafine o Siona; … ia mafai ona faataunuuina o feagaiga a le Tama Faavavau na faia e ia ia te oe, le aiga e o Isaraelu o le a faataunuuina.

    “Ioe, o mai ia Keriso, ma faaatoatoaina ia te ia, ma faafiti outou lava mai mea uma e le faaleatua” (Moronae 10:31--32).

  7. Tagai 1 Nifae 6:4; 19:21

  8. O le taua o gagana ma le aoaoina—le gafatia ona faitau ma tusitusi ma tausia o talafaamaumau—sa loloto le faamauina i le siosiomaga Sā Nifaē lea na oo lava i e le talitonu na atiina a’e lena gafatia. Mo se faataitaiga, o Amulona, o se tasi o ositaulaga amio leaga a le tupu o Noa, na avea ma faiaoga o Sā Lamanā ma sa aoaoina i latou e faitau ma tusitusi ma tausia talafaamaumau. E oo lava i le au gaoi a Katianetone sa faitau ma tusia tusi. E le gata i lena, o le faavaeina o se siosiomaga o tausi talafaamaumau, faitau ma faiaoga e taua i le atiinaeina o le tulafono i tagata Sā Nifaē i le taimi o le nofoaiga a faamasino. O talafaamaumau ma le tausia o talafaamaumau faapea foi ma le faitau ma le aoao atu o ni auala taua na faamanuiaina ai e le Alii tagata Sā Nifaē i le faaletino faapea ma le faaleagaga. O loo i ai i lena aafiaga se mamanu mo i tatou i o tatou taimi.

  9. Ua tatou vaaia le tino mai o na talafaamaumau o loo i le lauga a le Tupu o Peniamina lea na tusia ai i lalo ana upu ma faasafua atu i ona tagata o e na le mafai ona lagona mai o ia. Ua tatou vaai ina ua faitau mai Apinati mai papatusi apamemea ia poloaiga a le Alii i ositaulaga amioleaga a le Tupu o Noa. Ua tatou vaaia ia i latou sa i Amonaea o e na talitonu ia Alema ma Amuleka ma o e na “amata ona salamo, ma suesue i tusitusiga paia” (Alema 14:1). O fafine ma fanau a e talitonu, faatasi ai ma “a latou talafaamaumau sa i ai i totonu o tusitusiga paia” (Alema 14:8) sa lafoina i totonu o le afi ma faaumatia ai.

  10. Tagai Mosaea 1:2–5.

  11. Tagai Alema 18:36 lea na “na fola atu ai i ona luma talafaamaumau ma tusitusiga Paia.”

  12. Tagai Alema 37:8–9.

  13. Tagai i le 3 Nifae 11:8–17. Na oo mai i tagata le olioli ma tuuina atu a latou molimau ia Iesu Keriso i lena lava po faapea augatupulaga uma mulimuli ane ai. O Nifae, o le atalii o le atalii o Alema le Itiiti, na faamaumauina na mea paia na tutupu, ma o loo tuufaatasia ai se molimau ofoofogia o le toetu ma le taulaga togiola a le Alo o le Atua.

  14. Na ta’u atu e le Alii ia Iosefa ua tuuina atu ia te ia le mana e faaliliu ai le Tusi a Mamona e ala i le “alofa mutimutivale o le Atua” (Mataupu Faavae ma Feagaiga 1:29). I le iuga o lona ola, na tuuina atu ai e Nifae se valaau manino ina ia teuina le upu a Keriso ia i latou uma o e ulu atu i le ala o feagaiga. O lena valaau na faalogoina i le gasologa o seneturi o talafaasolopito o aiga Sā Nifaē, i totonu o nofoaga saogalemu ma i totonu o aoaoga a perofeta. E ati mai i o tatou loto i nei aso i ana folafolaga musuia: “O le mea lea, e tatau ai ona outou fetaomi atu i luma ma le tumau ia Kersio, ma se susulu atoatoa o le faamoemoe, ma le alofa i le Atua ma tagata uma. O le mea lea, afai o le a outou fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai le Tama: o le a outou maua le ola e faavavau” (2 Nifae 31: 20; faaopoopo le faamamafa).

  15. Alema 37:18; tagai foi Alema 37:14–19. O papatusi apamemea ua faasaosaoina ma o loo i le tausiga ma le faaeteete a Moronae. Na molimau Tavita Uitimera e sa’o lena i se faatalanoa faatasi ma Iosefa F. Samita ma Orson Pratt i le 1878 i Richmond Missouri: “O Iosefa, Oliva, ma a’u nei, e le gata ina matou vaai i papatusi o le [Tusi a Mamona] a e sa matou vaai foi i papatusi apamemea, o Papatusi o le Tusi o Eteru, …ma le tele o isi papatusi. O le mea moni, ua pei lava o Iosefa, Oliva ma a’u nei o nonofo i luga o se laau a e oo mai i o matou luga se malamalama faapei o le la … A ua sili atu lona mamalu ma matagofie. … Na iloa atu se laulau faatasi … ma le tele o talafaamaumau po o papatusi o i ai i luga ese mai ai i papatusi o le Tusi a Mamona, faapea foi ma le pelu a Lapana, le Faatonu, o le Polo lea sa ia Liae, ma mea faaliliu. Na ou iloa atu na mea ma le manino e pei ona ou vaai atu i lea moega … ma sa ou faalogoina le leo o le Alii i le manino e pei na ou faalogoina le ta’u mai o Papatusi o le Tusi a Mamona sa faaliliuina e ala i le meaalofa ma le mana o le Atua” (Tavita Uitimera, i totonu o le tusi a Iosefa F. Samita ia Ioane Teila, Set. 17, 1878, pepa a Iosefa F. Samita, 1854–1918, Faletusi o Talafaasolopito o le Ekalesia, Aai o Sate Leki, 8–9).

  16. 1 Nifae 10:17. I le 2 Nifae, na faamatalaina ai e Nifae le ala e mafai ai e se tasi na agavaa mo le meaalofa o le Agaga Paia ma a o le a le mea a le Agaga Paia e fai. “Aua o le faitotoa e tatau ona outou ulu atu ai o le salamo ma le papatisoga i le vai; ona oo mai ai lea o se faamagaloga o a outou agasala i le afi ma i le Agaga Paia.… Ona outou i ai lea i le ala vaapiapi ma lauitiiti lea e tau atu i le ola e faavavau; … ma ua outou maua le Agaga Paia, o lē e molimau i le Tamā ma le Alo, i le faataunuuina o le folafolaga na ia faia, e faapea afai tou te ui atu i le ala o le a outou maua” (2 Nifae 17–18).

    “Afai tou te ulu atu i le ala, ma maua le Agaga Paia, o le a faaali mai e ia ia te outou mea uma e tatau ona outou faia” (2 Nifae 32:5).

  17. 1 Nifae 2:16.

  18. 1 Nifae 2:16.

  19. 1 Nifae 2:19.

  20. O lenei mamanu o loo faamaonia lea i le tele o aafiaga o faaaliga faaletagata lava ia o loo i totonu o le Tusi a Mamona. Mafaufau i tulaga nei:

    Naunau ina ia Iloa mo i Tatou Lava

    O le naunautai ia iloa le upumoni, ia maua ni tali, ia maua le taitaiga po o faamafanafanaga po o le faamagaloina, e tele ina faaosofia e le upu a le Atua, e uunaia le sailiili mo faaaliga faaletagata lava ia. Sa ia Nifae le “manao e tele e iloa mea lilo a le Atua” (1Nifae 2:16). Sa “matelaina le agaga” o Enosa mo le faamagaloina (Enosa 1:14). Na alaga atu Alema i lona loto, “E, Iesu e, oe le Alo o le Atua, ia e alofa mutimutivale mai ia te au” (Alema 36:18). O le naunautaiga moni lea ia maua faaaliga mai le Atua.

    Tatalo ma le Manatu Moni i ai

    O le naunautaiga moni e taitai atu ai le tatalo, e tele lava i se nofoaga filemu. E tatou te saili atu i faaaliga ma lo tatou Tama Faalelagi, ma e tatou te faia lena e ala i le tatalo mai le loto, e fanau mai i le naunau ia iloa. O se tatalo o naunautaiga moni e faatino e tusa ma lo tatou iloa ua maua mai. Na faapena tatalo sa tataloina e Nifae, Enosa, Alena, o atalii o Mosaea, ma Helamana ma ana fitafita talavou (tagai 1 Nifae 2:16; Enosa 1:4; Alema 17:3; Alema 58:10--12).

    Maelega i le Sailiiliga

    O le saili atu i faaaliga e manaomia le maelega i le sailiiliga. Mafaufau ia Alema o le na “anapogi ma tatalo i aso e tele ina ia mafai ona [ia] iloa nei mea mo [ia lava].”(Alema 5:46). O le maelega i le sailiiliga i faaaliga, o lona uiga o le suesueina lea o tusitusiga paia, mafaufau loloto, tatalo, ma le anapogi e uiga i mea ua tatou faitau i ai ma aoao mai. O lona uiga o le alu soo lea i le Tama Faalelagi, ma faatuatuaina Lana taimi.

  21. E pei na aoao mai Iakopo, o le meaalofa o faaaliga faaletagata lava ia e ala mai le Agaga Paia e aumai ai foi meaalofa faaleagaga, faatupuina o le faatuatua ia Iesu Keriso, ma faalolotoina le liua atu i le Alii: “O le mea lea na matou suesueina ai le au perofeta ma ua matou maua faaaliga e tele, ma le Agaga o le valoaga; ina ua ia te i matou molimau uma nei matou te maua ai le faamoemoe, e mausali lo matou faatuatua, e moni, e iu ina mafai i matou ona poloai atu i le suafa o Iesu, ona usiusitai ai lea ia te i matou o laau lava, po o mauga, po o peau o le sami.

    “A e ui i lea, ua faailoa mai ia te i matou e le Alii le Atua lo matou vaivai, ina ia matou iloa o lona alofa tunoa ma lona faamaulalo tele i le fanauga a tagata ua matou maua ai le mana e fai ai nei mea.” (Iakopo 4:6–7}.

  22. E moni lava lena mo auala uma e fesootai mai le Atua i Ona tagata. Mo se faataitaiga, o le auaunaga a Agelu sa taatele ma tupu soo i e amiotonu. Na folafola mai e Alema, “Aua faauta, o loo alaga atu e agelu [le salamo] lenei mea i le toatele i le taimi nei i lo tatou laueleele” (Alema 13:24). A’o toe itiiti ona fanau mai lea o le Faaola, “Ma sa oo mai agelu i tagata, o tagata popoto, ma sa talai mai ia te i latou tala fiafia o le olioli tele” (Helamana 16:14).

  23. Tagai Mataupu Faavae ma Feagaiga 84:85.

  24. Alema 5:45–46.

  25. A ‘o ia aoaoina tagata o Amonaea, na fai ai e Alema le aotelega o faamanuiaga iloga na faamanuiaina ai Sā Nifaē ma le natura o feagaiga o le lotoifale na faavaeina e le Alii ia i latou. Alema 9:20–22 o loo faapea mai o i latou ua “avea ma tagata sili on faapitoa o le Alii”, “faaali mai o mea uma ia te i latou, e tusa ai ma o latou manao, ma o latou faatuatua, ma tatalo, e uiga i mea sa i ai, ma mea o i ai, ma mea o le a o’o mai”; ma “asia o i latou e le Agaga o le Atua; ma fetautalatalaai ma agelu, ma fetalai mai i ai le siufofoga o le Alii”; ma “ua latou maua le agaga o valoaga, ma le agaga o faaaliga, ma meaalofa foi e tele.”

  26. Alema 17:3; tagai foi Alema 17:1–3.

  27. Alema 23:5; tagai foi Alema 23:5–7.

  28. Alema 23:6

  29. E tatou te taulai atu iinei i le matafaioi a perofeta a e tatou te iloa o perofeta o tagata vaai ma tali faaaliga foi. E pei ona aoao mai Amona “O se tagata vaai o se talifaaaliga ma o se perofeta foi; … Ae o se tagatavāai e mafai ona iloa e ia mea ua mavae, ma mea foi o le a oo mai, ma o le a ala mai ia te i latou ona faaali mai o mea uma lava, po o, lona uiga, o le a faaali mai ai mealilo, ma o le a faamalamalama mai ai mea ua natia, ma o mea ua lē iloa o le a faailoa mai e i latou, ma o le a faailoa mai foi e i latou mea semanu e lē mafai ona faailoa mai” (Mosaea 8:16–17).

  30. Sa latou faia lea ma se mana sili faaleagaga lea na ati atu ai le savali i loto o tagata o e na saunia e faalogo ai. I le gasologa o le 1,000 tausaga o le talafaasolopito, ua tatou faitau ai i tagata o e sa “faatumulia i le olioli” (1 Nifae 5:1; Mosaea 4:3), ma “sa faapupulaina o latou agaga i le malamalama o le afioga tumau-faavavau” (Alema 5:7), ma “ua togiolaina a’u e le Alii; … ua fanauina a’u e le Agaga” (Mosaea 27:24). I le tele o taimi “e afe ma afe o e na faaauai i latou lava i le Ekalesia ma sa papatisoina i le salamo” (Helamana 3:24). Mo se faataitaiga o le matafaioi a agelu i faaaliga i perofeta lea e faalolotoina ai lo tatou malamalama i le mataupu a Keriso, tagai Mosaea 3.

  31. Tagai i le 2 Nifae 31; Iakopo 2; Mosaea 3; Alema 5; Alema 18, Alema 34; Alema 46; Moronae 7; Moronae 8; Moronae 10.

  32. Alema 5:14.

  33. Alema 5:26.

  34. Alema 5:28.

  35. Alema 5:32–33.

  36. Tagai Iakopo 7:1–20 (Serema); Alema 1:3–15 (Ne’oa); Alema 2:1–31 (Amiliki); Alema 30:3–59 (Kori’oa); Alema 46:3–11 (Amelikia).

  37. Tagai Iakopo 7:4.

  38. Tagai Alema 30:31.

  39. Ina ua latalata i le taimi e soifua mai ai le Faaola, na saili atili ai tagata leaga i mea loloto leaga—faatuina taupulepulega lilo (tagai Helamana 1:9–12; Helamana 2:4--5). I se faatulaga o aso anamua e foi atu i le taimi o Atamu ma Eva, o nei tagata leaga na faatuina se faatasiga ia maua mai ai le pule, lava le tamaoaiga ua faaputu ma faaumatia le Ekalesia ma le malo e ala i le faasioti tagata ma gaoi faalilolilo. O a latou mea faigaluega e le o o upu a o pate, pelu na sapelu. Na puipuia i latou e feagaiga ma tautoga na latou faia i va o i latou taitoatasi e tausia le lilo o a latou faatinoga ma e sala oti se tasi e sola ese mai ai (tagai Helamana 6:20–33; 3 Nifae 1:27–30).

  40. Tagai Helamana 1:9--12; Helamana 2:4--5; Helamana 6:20--33; 3 Nifae 1:27--30.

  41. Tagai Iakopo 7:8.

  42. Mo se faatalatalanoaga o lenei mataupu faavae, tagai i le Henry B. Eyring, “Faaaliga Faifai Pea,” Ensign po o le Liahona, Nov. 2014, 70-73.

  43. O le uiga lenei o le savali a le Alii i le Perofeta o Iosefa Samita:“O le mea e mai i le Atua o le malamalama lea; ma o ia o le mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai” (MFF 50:24). E ui e lei amiotonu pea Sā Nifaē, ma e ui lava na i ai le au tetee ma o ese ai mai le Ekalesia, sa tausi pea e perofeta le mumu malosi o le afi o le faatuatua. Faatasi ma le lototele ma mana o faaaliga, sa latou faamaopoopo tagata faatuatua o e sa faaloto vaivaia ma sauaina. Sa latou fesoasoani i le toatele e taula o latou olaga i le Faaola ma maua faaaliga faaletagata lava ia lea na aumai ai latou pe na toefuatai ai i latou ia Iesu Keriso ma Lana talalelei.

  44. E mafai e a tatou tamaiti aoga ona faitau faatatau i ai ma vaai po o le a le ala na faamanuiaina ai Sā Nifaē ma Sā Lamanā, i talafaamaumau paia, faaaliga faaletagata lava ia, ma perofeta soifua. I le taimi lava o faitau ai a tatou tamaiti aoga e uiga i nei faamanuiaga matagofie, e mafai ona latou maua ia aafiaga mo i latou lava pe a fai latou te opoina mai. I le suesue ai ma le sailiili i le Tusi a Mamona ma le tatalo ai mo le taitaiga faaleagaga, o le a mafai e tatou tamaiti aoga ona maua le poto ma le malamalama o le talalelei a Iesu Keriso ma le fuafuaga a le Tama, e mafai ona latou aoao le ala e ola ai i le talalelei, ma latou maua se molimau faapea o mea ua latou faitauina e moni ia—e ala lea i le mana o le Agaga Paia.

  45. Tagai Efeso 1:10.

  46. Na aoao mai Iosefa Samita faapea e ui o loo tatou i ai i le olaga faaletino, e oo mai faaaliga faaletagata lava ia “i o tatou agaga e pei lava e le o i ai ni o tatou tino” (Aoaoga a Peresitene o le Ekalesia: Iosefa Samita [2007], 475).

  47. Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 96.

  48. Aoaoga a Peresitene o le Ekalesia: Iosefa Samita (2007),132.

  49. O le itulau instagram a Peresitene Russell M. Nelson, na ave i luga mai ia Mat. 22, 2019. O lenei ave i luga na faalauiloa atu ai suiga i le kalena o mataupu aoaoina mo le seminare e amatalia ia Ianuari 2020.

  50. Mataupu Faavae ma Feagaiga 42:61.

  51. Mataupu Faavae ma Feagaiga 50:27.

Lolomi