“Silisili i Luga o Mea Uma”
Faasalalauga o Aoaoga a le Ofisa o Aoga a le Ekalesia • 12 Iuni, 2019 • Faletele Fogafale Autu o le Maota o Ofisa o le Ekalesia
Ou te fia muai faafetai atu ia te outou taitoatasi aemaise mo o outou taumafaiga e taulai atu i le Faaola o se totonugalemu o a’u suesuega ma le aoaoina o le talalelei. A o o’u matauina vasega ma vaavaai atu ia te outou ma tou tagata aoga o faailoa mai Ona faalagiga ma matafaioi, suesue Ona uiga patino ma aoao mai i Lana faataitaiga atoatoa1, na ou lagonaina le faafetai a le Tama Faalelagi o loo e molimau i Lona Alo Pele. A’o outou mulimuli ai i le fautuaga a Elder Clark ia fesoasoani atu ia outou tagata aoga e aoao ia iloa o Ia ma aoao mai ia te Ia,2 ua ou vaaia se faaopoopoga o le Agaga Paia i a outou aoaoga ma valaaulia. E pei na ta’u mai e se tasi faiaoga talu ai nei ia te a’u, “O le faatotonugalemu o Iesu i la’u aoao atu ua toe aumai ai le fiafia i lo’u potuaoga. Ou te uunaia outou ia faauau pea ona saili atu i musumusuga i le ala sili ona aoga e faia ai lea tulaga i aso taitasi.
I le asō, ou te fia valaauliaina outou e fausia i luga o a outou taumafaiga e fesoasoani ai ia outou tagata aoga e vaai atu i le Faaola ia le na’o ia latou suesuega o tusitusiga paia, a e ia faapea foi mai ia te oe---a o e taumafai e mulimuli i Lana faataitaiga ma Lona alofa. Atonu tou te manatuaina le manatu lenei mai ia Peresitene Boyd K. Packer, lea ou te iloa le faaosofia ai ma maofa ai i ona taunuuga.
“O uiga ua faamanuiaina ai a’u i le aluga o tausaga e vaaia ia te outou uso ma tuafafine ua pei o foliga o le Faiaoga Sili. Ou te talitonu ua outou faia, e tusa ai ma luitau ma suiga lea ua ia te outou, ua togitogia foliga o Keriso i o outou foliga. Ma e mo faamoemoega faatino moni uma, i totonu o lena potuaoga i lena taimi ma i lena talanoaga faatasi ai ma lena uunaiga, o outou o Ia ma o Ia o outou.”3
Mai le tele o uiga patino o le Faaola, o le tasi o uiga e foliga e aumaia ai le faaosofia ma le faavaeina mo isi uma, o le atoatoa o Lona alofa---Lona alofa mo Lona Tama i le Lagi, ma Lona alofa mo i tatou taitoatasi.
Na tusia e le Aposetolo o Paulo, “Afai foi o ia te au ona perofeta ane, ma le iloa o mea lilo uma, ma le poto uma lava; afai foi o ia te au le faatuatua uma e aveese ai mauga, … a e leai so’u alofa, ou te le aoga lava.”4 Mo se vaega o faiaoga o seminare ma le inisitituti, atonu sa ono faapea mai Paulo, “Afai foi o ia te a’u le meaalofa o le faatosinaga ma le malamalama i faavae o le aoao atu ma le aoaoina ma aoaoga uma, ma e ui foi e i ai ni a’u lesona faitino maoae a e leai so’u alofa, ou te le aoga lava.” Ia faamolemole aua le faaaogaina lena faamatalaga o se alofaga e aua ai nei galue malosi o se faiaoga e tumu i tomai. A e ia manatua, a o tatou tatalo mo le malamalama, atamai, faapea ma le faatuatua, afai tatou te le faaopoopo i ai le alofa, o le a pei tatou o se “apamemea ta’alili po o se sumepalo tagitagi.”5
“E Onosai le Alofa, E Agamalu”
Sa tusia foi e e le Aposetolo o Paulo, “E onosai le alofa, e agamalu”6
O se tasi o faataitaiga o le agamalu o le Faaola o loo faamauina i totonu o le Luka 19. O Sakaio, o se telona, na mauoa i lana auaunaga i Roma ae sa itagia o ia e tagata Iutaia o e na lagona le faalataina o i latou e ala i lona aoina o lafoga. I le tasi aso, na saili ai Sakaio e fia vaai ia Iesu a e sa le mafai ona o lona fuaitino itiiti ma sa le mafai ai ona sao atu i le motu o tagata, ia sa le fia fesoasoani ia te ia. O lea na tamoe atu ai i luma Sakaio, i le mea na afio ane ai Iesu ma a’e ai i le sukamolo e vaai ia Iesu a o afio ane o ia.
O loo fai mai tusitusiga paia, “Ua oo atu Iesu i lea mea, ona tepa ae lea o ia, ua silafia o ia, ona fetalai atu lea ia te ia, Sakaio e, ia e vave ifoifo ia i lalo, aua e tatau ona ou nofo i lou fale i le aso nei.
“Ona vave alu ifo ai lea o ia, ua tali mai ia te ia ma le fiafia.”7
E mafai ona e vaai faalemafaufau i le uiga ia Sakaio o le iloa atu o ia, ma le mea na tupu mai i le valaaulia a le Faaola mo se tasi ua masani i le faaesea? Atonu e mautinoa lava sa faia e lenei faatinoga itiiti o le agalelei se eseesega tele.
E manaomia e a tatou tagata aoga le loa ona tatou talitiga ma le agalelei. O le amio lepulea, faalavefau, ma uiga patino lē lelei, e mafai i ni isi taimi ona faafaigataina le aoao atu. Ae i taimi faapena, ou te uunaia outou ia sopo atu lau vaai i luga a’e o lena amioga ma vaai atu i le tagata. Faamolemole malōlō teisi ia lava le taimi e fesili ai, “O le a se isi mea o mafua ai ona tupu lenei amioga po o lenei uiga?”
E pei ona aoao mai Elder Jeffrey R. Holland, “Afai e le naunau mai na tamaiti, atonu e le o mafai ona e aoao atu i latou, ae e mafai ona e alofa i ai. Afai foi e te alofa ia i latou i le asō, atonu e mafai ona e aoao atu i latou a taeao.
“… E le faalgolago ia i latou lena mea. E mafai ona tatou alolofa ia i latou mai lava i le amataga seia oo i le iuga, ma o le a tutupu vavega.”8
A e faapefea ona e faia lena mea, aemaise pe a fai o ni isi e faigata ona alofa atu i ai? Na fesoasoani mai foi Elder Holland ia i tatou i lena mea ina ua ia saunoa mai, “E mafai ona e amata i le alofa atu i le Atua. Ona mafai lea ona e ole atu ia te Ia e fesoasoani ia te oe e faaoo atu lou alofa mo Ia i isi o e manaomia lou alofa.”9 E mafai ona e “tatalo i le Tamā ma le malosi atoa o le loto, ina ia faatumulia oe i lenei alofa.”10 E mafai ona e tatalo ia e vaai atu ia i latou faapei ona Ia silasila mai ia i latou. E mafai ona e faalogo ma taumafai ia malamalama ia i latou. Ma e pei ona faaopoopo mai Peresitene Henry B. Eyring, “Auauna atu ia i latou; saili ni mea itiiti e faia mo i latou. Totogi le tau o le auauna atu, ma o le a faamamaluina e le Atua. O le a ou tuuina atu ia te outou lena folafolaga. Aua le popole pe afai e le alofagia au tagata aoga i ni isi o taimi. Tau lava o le fai o se mea mo i latou, ma o le a latou foliga mai ia te oe ua sili atu lo latou alofagia. O se meaalofa mai le Atua.”11
Ia te outou uma o loo auai atu i polokalama faamusika ma taaloga a a outou tagata aoga pe o saili foi ni ala toafimalie e auauna atu ai ia i latou, faafetai tele lava. Tusa lava pe latou te le iloa maia outou, o le a latou lagonaina le faatupulaia o lou alofa mo i latou ona o le a faamanuiaina outou e le Alii i le alofa mama ona ua outou auauna atu ia i latou.12
O se tasi o faataitaiga o le agalelei o le Faaola o loo faamauina i totonu o le Mareko mataupu e 5.
Mafaufau mo sina taimi i le mea na faia e Iesu mo le fafine na maua i le puna toto. E tele atu mea na ia faia mo ia nai lo le faamaloloina faaletino. Atonu sa vaivai o ia i tiga, teenaina e e sa siomia ai, ma popolega tau tupe. O lea ina ua silafia e Iesu ua alu atu le mana nai ia te Ia, sa ”silasila solo o ia ia silafia lē ua faia lea mea.”13 O le faamaloloina faaletino ua mae’a ona tupu. Sa agai atu Iesu i Lona ala e feagai ma se tasi manaoga sili a e sa ia Tu ai iina. Na Ia faailoa lona faatuatua, ma ta’ua o ia o se “afafine.”14 Sa vaai atu le Faaola ia te ia, a e le o lona gasegase. Sa Ia silasila atu i se tagata o se sa manaomia ona alofagiaina ma siitia, a e le o se faafitauli e manaomia ona faaleleia po o se galuega e tatau ona faamae’a.15
O le a lava se galuega e manaomia ona e faataunuuina, o le a lava se lesona e te manaomia ona saunia pe aoaoina, o le a lava se faafitauli tau amio pulea e feagai ma oe, o se avanoa e le aunoa lea e siitia ai tagata.
Ma ou te faamoemoe o le a faalautele atu lo tatou alofa ia i latou o e le o lesitala pe o auai i le taimi nei. E toatele i latou e pei o Sakaio ma lenei fafine o e o loo faatali i tua mai o le motu o tagata. O lea ia mulimuli i le faataitaiga a le Faaola ma ō e saili i latou.16 Faamolemole ia fefautuaai faatasi ma le loto tatalo ao tou saili i uunaiga i le ala atonu tou te fesoasoani ai i le toatele o tagata talavou ina ia aoao i le Faaola ma Ana Aoaoga. E tatau ona avea taumafaiga o le lesitalaga ma le faamae’aina ma faamuamua ma se uunaiga alofa i la tatou galuega ina ia toatele atu fanau a Tama Faalelagi e faamanuiaina.
“Silisili i Luga o Mea Uma, ia outou Faaoofu outou lava i le Fusi o le Alofa Mama e pei o se Ofutalaloa.”
Sa fetalai mai le Alii i le perofeta o Iosefa Samita, “Silisili i mea uma, ia outou faaoofu outou lava i le fusi o le alofa mama, e pei o se ofutalaloa, o le fusi lea o le atoatoa ma le filemu.”17 Faamata e faape’i le faaoofuina i le fusi o le alofa mama?
I le Ioane 8 ua tatou faitau ai i le fafine o le na aumai i le malumalu ma tuuina atu ia Iesu e le Au Faresaio. Ua latou faapea mai i le Faaola:
Le Aoao e, na maua lenei fafine o mulilua, ua mautinoa lava.
“Ua poloai mai Mose i le tulafono, ia fetogi i maa o e faapea: ae o le a sau fetalaiga?”
Ua punou Iesu i lalo ma tusi i luga o le eleele, e peiseai e na te lei lagona atu i latou. I le tali atu o Iesu i le tuu fesili mai pea, na iu ai na Ia tulai ma fetalai atu, “O so outou e leai sana agasala, ia lua’i togi se maa ia te ia.” Ona toe punou lea o ia, ma tusi i le eleele.
Ina ua amata ona lagona e le Au Faresaio a latou agasala i o latou loto fuatia ifo, ona tai tasi lea ma alu ese atu. Ina ua na’o Iesu ma le fafine, ona Ia fetalai atu lea ma le filemu, “Funa e, o ifea ea i latou na molia oe? ua le faasala mai ea se tasi ia te oe?
“Ua fai mai o ia, Le Alii e, e Leai lava se tasi. Ona fetalai atu lea o Iesu ia te ia, Ou te le faasala foi ia te oe; alu ia oe, aua e te toe agasala.”18
A o e mafaufau i lenei mea na tupu, e mafai ona e manatunatu i le tolu mai le tele o lesona e mafai ona tatou aoao mai faataitaiga atoatoa a le Faaola?
Muamua, o le Togiola a Iesu Keriso tatou te mafai ai ona aoao mai a tatou mea sese ma e ala mai i le salamo, o le a lē ta’usalaina ai i tatou. I totonu o tatou vasega o loo i ai ni tagata aoga o e sa faia ni mea sese. A o tatou aoao atu ma le alofa le naunautai o lo tatou Tama i le Lagi e faamagalo atu ma le olioli i le salamo,19 tatou te fesoasoani i tagata aoga (ma tatou fanau) ia talitonu o le Togiola a le Faaola e mo i latou—aua e tonu lea.
Ma ia manatua, o lenei fautuaga e faatatau foi mo i tatou. Tatou te manaomia foi le Togiola a le Faaola ia fesoasoani ia i tatou ina ia faamagaloina ma ia faamaloloina. A o tatou lagonaina patino le olioli o le salamo, o le a mafai ona tatou uunaia a tatou tagata aoga e liliu atu i le Faaola aua o lena valaaulia o le a oo mai mai o tatou lava loto ua suia.
Lona lua, o le alofa o se uunaiga sili lea e fesoasoani ia i tatou ia mana’o e faia le mea sa’o. Na saunoa Elder Dale G. Renlund, “E mautinoa lava, sa lei faatagaina e le Faaola le mulilua. Ae sa Ia le’i faasalaina foi le fafine. Sa Ia faamalosiau ia te ia e toe faafouina lona olaga. Sa faaosofia o ia [le fafine] e sui ona o le agaalofa ma le alofa mutimutivale [o Iesu]. O le Faaliliuga a Iosefa Samita o le Tusi Paia o loo faamaonia ai lona avea mulimuli ane ma soo: “Ma sa vivii atu le fafine i le Atua mai lena itula, ma sa talitonu i lona suafa’ [Ioane 8:11, vaefaamatalaga c].”20
I le avea ai ma faiaoga, po o matua, e ono faaosoosoina i tatou e taofiofia faalauiloaga o le alofa ona tatou te popole ina nei aveseseina o se alofaga o le agasala, po o le taliaina o se amioga lē lelei. E tele ina iloa e a tatou tagata aoga ma fanau o tatou lagona e uiga i le Alii ma Ana poloaiga. O le mea e tele ina latou manaomia o se faamautinoaga o loo alofagiaina ma faatauaina i latou. O le alofa ma le faamoemoe sa lagonaina e lenei fafine a o faamanuiaina o ia e “fusi o le alofa mama” a le Faaola, o se mea lea o loo tatou faamoemoe o le a lagonaina e a tatou tagata aoga a o latou aoao e uiga ia te Ia ma Lana talalelei.
Lona tolu, sa alofa le Faaola i aoaoga faavae a le Tama a e na te lei faaaogaina lava o se mea e sasa ai. Sa iloa lelei e le Au Faresaio ma latou ta’ua le tulafono a Mose, i le faamanatu mai o le tulafono ma ona taunuuga. A e o Lē na Tuuina mai le tulafono, o lē o lana misiona o le “fusifusi i e loto nutimomomo [ma] tala’i le saolotoga i le tafeaga”21 na filifili e faalautele atu le alofa mutimutivale. Sa ia puipuia le fafine mai le faasinosino lima ma loto o le Au Faresaio a o tuuina atu mo i latou le manaomia o se iloiloga faaletagata lava ia ma le iloa o lo latou manaomia o le suia.
I ni si taimi e i ai a tatou tagata aoga ma faiaoga o e ua faaaogaina mataupu faavae i se ala e valaaulia ai le agaga o le moliaina ma le tausalaina. Nai lo le uunaia ma le aoaoina ina ia faamanuiaina ai, o lenei ala e ulagia ai ma e mafai ona faatamaia ai. O le mulimuli i le faataitaiga a le Matai Sili o le aoao atu lea i se ala e aumaia ai le faamoemoe ma faamalolo ai loto ua nutimomoia.
E faaopoopo atu i le agasala, o loto ua nutimomoia e mai ni aafiaga eseese. E toatele tagata aoga e o mai mai tulaga faigata, e oo lava i tulaga e faapopoleina ai lea e tuua ai i latou i le lē mautonu pe alofagiaina ma faatauaina. O ni isi o loo tauivi ma lu’itau, ma atugaluga, po o manatu e faapea ia atoatoa lea e mafua ai ona latou faalogo i le tausalaga nai lo le faamoemoe. O isi e lagonaina le lē manaomia o i latou ona o latou feagai ma faaosoosoga po o luitau e faatatau i tulaga tau itupa ma lagona ai ua maileiina i latou ma popole faapea ua leai so latou nofoaga po o se lumanai i le Ekalesia toefuataiina a Iesu Keriso.
I le avea ai ma faiaoga, e tatou te manaomia le saili ia malamalama po o a ia aafiaga ma pe faape’i foi mo a tatou tagata aoga. Sei o faasoa atu ia te outou se tasi o faataitaiga mai le vaaiga a se tagata aoga muamua na i ai o faamatala ai lona aafiaga i le seminare. Na faapea mai o ia, “O le poloaiga o le alofa atu i lou tuaoi, a e foliga mai e manatu tagata o le alofa lea i lou tuaoi vagana ai o oe e i ai ni ou lagona i le itupa lava e tasi. O le sāvali laualuga o le o se mea sili na leaga lena ma e tupu mai ai lou fesiligia pe mafai faapefea la ona ou maua le faatauaina o a’u ma pe mafai ona alofaina a’u e le Tama Faalelagi.”
Pe o a lava luitau patino o feagai ma tagata aoga, e tatau ona tatou faalogo ina ia malamalama ma fesootai faamaoni atu ai le tigaalofa ma le alofa. E manaomia ona tatou fausia potuaoga e valaaulia ai fesili ma mataupu ia talanoaina i le faaaloalo ma le manatu i isi. E manaomia ona manino le tatou aoao atu o upumoni ma fesoasoani i taimaiti aoga taitoatasi ina ia iloa lona faasinomaga e faavavau o ni fanau a ni matua faalelagi alofa.22 Ma e manaomia ona tatou fesoasoani i tamaiti aoga ia iloa e le o tuua toatasi i latou. O le faailoa atu o le alofa faaopoopo ma le malamalama o le a valaaulia ai le Agaga Paia, faatupuina le aoaoina, ma faamaloloina loto ua nutimomoia.23
Na aoao mai Peresitene Dallin H. Oaks, “O loo ia i tatou le tiute o le ‘tauave avega a le tasi, ina ia māmā’ [Mosaea 18:8]. E ui e le mafai ona tatou suia le mataupu faavae a le Alii, tatou te mananao i a tatou tagata o le Ekalesia ma a tatou aiaiga faavae ina ia manatu ia i latou o e o loo tauivi ma luitau o le olaga faaletino.” Na ia faaopoopo mai foi faapea “O taumafaiga a o tatou tagata o le Ekalesia ia faaali tele atu le malamalama, agaalofa ma le alofa e tatau ona faatupuina ai le faaaloalo ma le malamalama … [ma] faaitiitia ai le ita ma finauga o loo taatele i nei aso. … O le tatou naunautai moni lena, ma e tatou te saili le fesoasoani a o tatou tagata o le Ekalesia ma isi ina ia ausia lea.”24
E taua tele le malamalama o faiaoga uma i mataupu faavae, iloa mea o loo saunoa mai ai perofeta a le Alii i le taimi nei e uiga i ia mataupu, ma iloa le ala e tali atu ai i ni auala sili ona aoga ma agaalofa.25 Ua matou matua tuuto atu i le fausia o le alualu i luma i nei vaega ma o le a saunia ni aoaoga ma punaoa faaopoopo e fesoasoani atu ai ia te outou.
Afai e i ai ni taimi e te faia ai po o ni tagata aoga ni faamatalaga e ono mafua ai se lagona o le lē taliaina e se tasi, se’i e tatalo mo le malosi ma le malamalama pe faapefea ona e fesoasoani ina ia tuu i lalo lima o le moliaina o isi? Fesoasoani i au tagata aoga ia manatua o tatou uma taitoatasi o loo tuputupu a’e pea ma e manaomia le alofa mutimutivale o le Faaola. O Lusifelo lea na igoa i lē Molia, o lē na “molia i [tatou] i luma o lo tatou Atua i le ao ma le po.”26 I se faatusatusaga, o loo faaloaloa mai pea aao, ogalima, ma le alofa o le Alii.
O se isi uiga patino o le alofa paia o le naunautaiga lea a lo tatou Tama i le Lagi mo i tatou ia avea faapei o Ia ma ia maua uma faamanuiaga ua Ia saunia mo Lana fanau.
O lo tatou Tama Faalelagi o se Atua o ni faamoemoega maualuluga.
Na saunoa mai Elder D. Todd Christofferson: “O lo tatou Tama Faalelagi o se Atua o ni faamoemoega maualuluga.”27 E Na te le fiu lava ia i tatou. E faapalepale mai ia i tatou pe a tatou vaivai, faamoemoe mo tatou a o tatou alualu i luma, ma tumau ma le onosai a o tatou tuputupu a’e. O se faiaoga e alofa i ana tagata aoga e ia te ia foi faamoemoega maualuluga ma o le a popole atili mo lo latou alualu i luma e faavavau nai lo le pe na faapefea mai le vasega i lenei aso po o le pe e alofagia o ia e tagata aoga.
Na matua manatu alofa lava Iesu i le alualu i luma o Ona so’o.
Mo se faataitaiga, na vaaia e Iesu i totonu o Peteru se mea e le mafai ona ia vaaia ia te ia lava. Sa ia valaauliaina Peteru e galue i le faatuatua ma ina ua vaivai Peteru, sa sii a’e o ia i luga e le Faaola, ma taulai atu pea i le tagata o le a avea ai o ia mulimuli ane.
O le i ai o faamoemoega maualuluga o le a musuia ai tagata aoga ia galulue i le faatuatua, ma faatagaina i latou ia latou maua aafiaga o faamanuiaga folafolaina a le Alii. Na aoao mai Elder Neil L. Andersen e faapea, pe a tatou aoao atu ma taitai e aunoa ma le alofa, ma i ai ni faamoemoega maualalo, ua tatou uunaia le i ai o le fouvale. O faamoemoega maualuluga e aunoa ma le alofa e fausia uiga le talafeagai. A maualuga le alofa a e maualalo faamoemoega ona fausia lea o lagona o le fevaevaeai a e itiiti le alualu i luma. Peitai, a maualuga le alofa ma maualuga faamoemoega ona fausia lea o vavega.28 O le ituaiga alofa lena o loo i le Faaola, ma o le ituaiga alofa e tatau ona ia i tatou pe afai tatou te faia se eseesega i olaga o a tatou tagata aoga.
Ina ua ou fesili atu i tagata aoga o le seminare ma le inisitituti pe na faapefea ona faamanuiaina i latou e le alofa a lo latou faiaoga, na vave ona o’o mai a latou tali ma sa faatumulia i le loto faafetai. O nisi nei o nai faataitaiga lata mai:
Na faapea mai se tamaitai talavou, “Ou te fiafia e savali atu i le seminare ma vaaia lo’u faiaoga o loo fiafia ma ataata. Ou te le iloa pe faapefea ona faaupuina le tele o lona alofa mo a’u. I se taimi e lei leva talu ai, na ia faailoa mai ai se faaupuga lelei mo a’u, ma sa ou alu ese atu mai le fale ma taumafai e aua ou te tagi, sa ou maua ai le fiafia. O lena faaupuga faigofie na taua tele ia te a’u. Ou te fiafia ou te alu i le seminare i aso uma. O se mea silisili lea o lo’u aso. O le alofa a lo’u faiaoga mo a’u na aoaoina ai a’u ia ou alofa i tagata uma o se atalii po o se afafine o le Atua.”
I le otootoina atu o se isi mea, “O le matou vasega i le asō na suia ai a’u. Na ou maua le lototele e fesili ai i se fesili faigata, ma sa matua faalogo lo’u faiaoga ma taumafai e malamalama i le mea o loo ou fai atu ai. Ona ia faaaogaina lea o le taimi e tali ai la’u fesili. O le mea na ia fai mai ai sa tatalaina ai o’u mata i ni isi o mea ou te le’i mafaufauina muamua.”
Ma le mulimuli, na tusia e se alii talavou e faapea: “Na ou amataina lenei semesa ma se lagona le lelei. Ou te lei popole i le talalelei po o a’u, ma sa ou mamao ese mai le fiafia. Sa ou ta’u atu i o’u matua ou te mana’o e tipi le seminare. Ona ou alu lea i le vasega. Ma sa iloa e lo’u faiaoga lo’u igoa e ui ou te le’i alu muamua iina. O le agaga i totonu o le matou vasega na seki ai le tulaga mo lo’u aso atoa, ma ua amata ona sologa lelei le olaga. Na ou suia a’u mausa, amata ona auai atili i le lotu, faitau a’u tusitusiga paia, ma amata ona ou mafaufau i mea. Ona o lona alofa mo i matou ma mo le talalelei, ma le malamalama o Keriso na ou vaaia ia te ia, sa ou taumafai ai mo lena malamalama ma lena alofa. O le a ou faauu mai le seminare, faia se misiona, ma i se aso o le a ou faaipoipo ai i totonu o le malumalu ona sa valaaulia e lo’u faiaoga le Agaga ma aoao faatasi ma Ia o sana soa i aso uma.”
I le faaiu ai, ou te fia faaleoina lou agaga faafetai mo le Alii ma mo outou. Ou te faafetai mo le alofa o’oo’o o le Alii ma i le taimi lava lea. Ou te faafetai mo Lona onosai a o o’u taumafai e aoao lesona ia sa tatou talanoa faatatau i ai i le asō. O Lona alofa ma le agaalofa ua ou mana’o ai ia ou lelei sili atu. Ma ou te manao ina ia outou iloa lo matou alolofa tele ia te outou. Matou te iloa tou lē faavaivai i lo outou auauna atu ia i latou o loo outou aoaoina ma fesoasoani i ai. Matou te iloa le tele o lo tou tatalo mo i latou, ma lo tou tiga pe a latou feagai ma tauiviga, ma lo tou olioli pe a faamanuiaina i latou. Matou te iloa e tou te tauaveina a outou lava avega ma faalagolago i le Alii i aso taitasi mo Lona malosi mo outou ma o outou aiga. Matou te faamoemoe tou te iloa matou te tatalo mo outou ma e matou te alolofa ia te outou.
Tau ina ia outou fesoasoani i tagata aoga taitasi ia iloa ma alolofa i le Faaola e ala i le fesoasoani ia i latou ia iloa o Ia, e ala ia outou suesuega o tusitusiga paia----ma mai ia te outou. O la’u tatalo ia faapea lava ona tatou agalelei, vaai atu i tagata ae lē o faafitauli; ia tatou aapa atu e faamanuia atili le toatele o fanau a le Tama Faalelagi; ma o le a tatou tuu i lalo lima o tuuaiga ma fesoasoani i tagata uma ia lagona o loo i ai so latou nofoaga ma le lumanai i le Ekalesia a le Alii; ma o le a tatou uunaia a tatou tagata aoga e mulimuli i aoaoga a le Faaola o ni soo e faavavau o Iesu Keriso, pipiimau i le ala o feagaiga ina ia latou maua faamanuiaga uma a lo tatou Tama Faalelagi mo i latou. Ia tatou fesoasoani atu ia i latou ia lagona ma faalagolago i le alofa o lo tatou Tama Faalelagi ma Lona Alo o Iesu Keriso. Ma ia aua nei galo ia te oe “o le faatusa o Keriso [e mafai] ona togitogia i luga o outou foliga. Ma mo faamoemoega uma, i totonu o lena potuaoga i lena taimi ma i lena talanoaga faatasi ai ma lena musumusuga, o outou o Ia ma o Ia o outou.”29
I le suafa, o Iesu Keriso, amene.
© 2019 Puletaofia e le Intellectual Reserve, Inc. Ua taofia aia tatau uma. Lomiga: 5/19. Faaliliuga o le “Above All Things.” Samoan. PD60009021 890