20618:55

Nona Vakailesilesi

Vuli Kaburaki Vakayabaki ni S&I ni 2022 vata kei Peresitedi Ballard

Brother Chad H Webb

Dauveiliutaki ni Seminari kei na Inisitute ni Lotu

Vakaraubuka, 21 ni Janueri, 2022

Ena dua na gauna au a tu ena laini ena dua na raraniwaqavuka ena dakuna e dua na rapai vaka‑Jiu. Na tamata ka tu e matana a dua na turaga e vaka‑pasipote ni Mexico, ka rau sala vata tiko kei na luvena yalewa lailai. E matadrau a tu kina e dua na kai Merika ka daramaka tiko e dua na siqeleti ni qito kei na isala ka matataka tiko nona timi ni qito taleitaki. Au a tekivu veinanuyaka, se o cei vei iratou na lewetolu yadua oqo au via tautauvata kaya vakalevu duadua? Au a nanuma taumada de rairai na kai Merika. E via tautauvata sara beka ga na veika keirau sotava ena neirau tubu cake tiko mai, ka keirau dau vakayagataka tu beka e levu na gauna me keirau vakanananutaka tu na neirau timi taleitaki. Au mani qai vakasamataka na ikarua ni turaga ena laini. Baleta na noqu dau taleitaki Mexico, e sega ni dredre meu vakananuma ni keirau na rairai taleitaka na kakana kei na veimatabani vaka‑mariachi vata ga. Ia, e uasivita cake, au a vakila e dua na isema vei koya ni’u vakaraica na nona veimaliwai kei luvena yalewa ka vakananuma noqu itutu vaka‑tama vei iratou na luvequ yalewa e ono. Kena iotioti, au qai vakasamataka na rapai. E levu na tamata era raici keirau tu ena laini era sega beka ni vakasamataka ni sa vuqa na ka keirau sa tautauvata kina. Ia o koya kei au keirau wasea vata e dua na ivau matau ena neirau gagadre me cabora neirau bula ki na qaravi Kalou, me vulica ka vakavulica Nona vosa, ka segata me keirau talairawarawa ki na Nona ivakaro.

Ni’u vakasamataka tikoga na noqu taro ni’u vodo yani ena waqavuka, au a dreta mai e dua na tiki ni pepa ka tekivu volavola sara. Au a tekivu ena vosa rawarawa “Oi au …” Au qai vola na ka kecega e votu mai noqu vakasama. Oi au e dua na luve ni Kalou, e dua na tisaipeli i Jisu Karisito, e dua na tagane vakawati. Au a vola na itovodei, veimaliwai, veikacivi ena Lotu, kei na ilesilesi vakacakacaka eso. Au a okata na veika namaki eso me vaka na “Oi au e dua na dautaleitaka na sereivakatagi vaka‑Motown kei na jisi vaka‑raclette.” Ni bera ni’u vakacavara, au a vola rawa e voleka ni 300 na sala ni saumi ni taro “Ocei koi au?” Au sa qai biuta vakamatau na noqu isaunitaro me vaka na kena e bibi duadua ena kena vakadeitaki na vakanamata kei na veika vakaliuci eso ena noqu bula. Me ivakaraitaki, ni’u dua ruarua na tukanigone kei na dua na dauqito qolofo vakararawataki, na noqu biuta na noqu dua na tukanigone ki na ulu ni noqu lisi kei na noqu dautaleitaka na qolofo ki na botona e dau vakananuma vei au na vanua au gadreva meu vakayagataka kina noqu gauna kei na igu kei na cava meu digia ke mani yaco me rau veisaqasaqa na itavi e rua oqori.

Ena dua na gauna emuri, au sa qai mai kila vinaka cake na vuna a vakaibalebale kina vei au na ka sotavi oqo ni’u wilika ni a kaya o Peresitedi Henry B. Eyring, “Na sala o sauma kina na taro se o cei o iko ena vakadeitaka voleka ni veika kecega.” ¹

Wale tikoga oqo au a vakananuma tiko vakatitobu na taro oqo ka vakasamataki ira tiko noda gonevuli. Au a dreta mai e dua tale na tiki ni pepa ka tekivu volavola yani—tekivu ena gauna oqo ena vosa rawarawa, “O ira noda gonevuli era …”

Au vakabauta ni o ira noda gonevuli era sai ira era vakatoka na parofita me o ira. Era sa luve daulomani ni itubutubu vakalomalagi, era a digitaka me muria na ituvatuva ni Tamada ka rawai koya na meca ena nodra vakabauta na Lami ni Kalou kei na kaukauwa ni nodra ivakadinadina. ² Na Turaga a maroroi ira tu, me vaka a kaya o Peresitedi Russell M. Nelson, mera lako mai ki vuravura “ena gauna donu oqo, na gauna bibi ni itukutuku kei vuravura.” ³ O Koya a digitaki ira mera “vukea me vakarautaki na vuravura me baleta na … veiliutaki vaka-mileniumi [ni iVakabula].” ⁴ “[Sai ira] na inuinui kei Isireli, ‘gone ni siga sa yalataki tu’ [”Hope of Israel, Serenilotu, no. 259.”! ⁵

Era sa “viakana ena veika ni Yalotabu; … guta mera vulica na kosipeli, ka ra vinakata vakadodonu, tawa vakawaicalataki. … Era sa sega oqo ni dauvakatitiqa ia sa dauvaqaqa, dauvakasaqara ga yani na dina. …

[Era] gaganotaka … na vakabauta … [ka] vinakata mera rawa ni kaciva mai vakai ira me cakacaka.” ⁶

E sa dina talega ni so era sa guilecava nodra kilai vaka luve ni Kalou se ra sa yaco mera vakanamata sivia ena ivakarau vagauna se sega ni bibi sara eso. O Setani sa ikoya na daubutako levu ni noda kilai. Na nona veiveretaki sa vakavuna vei ira eso mera veilecayaki se vakasesei mai na dua na vuravura voravora ka veivukiyaki e vakalialia na vakabauta kei na itovo savasava ka tu kina vakarawarawa na itukutuku ia ka kunei dredre sara na vuku—na siga a parofisaitaki ni ra “sa dauvakatavulici tiko, ka sega ni rawata me ra kila na ka dina” ⁷ e dua na vuravura e vakatoka “na ca me vinaka, kei na vinaka me ca,” ⁸ ka vuqa era “lako voli ga ena rarama ni [nodra] bukawaqa kei na lidi ni bukawaqa [era] sa tutuvaka” ⁹ ni ra cata tiko na Rarama kei vuravura. ¹⁰

Ia, eda sa kila e dua tale na ka me baleti ira noda itabagone kei na itabagone qasecake. Na iVakabula e a kaya:

“Ko ni sa nodra kawa na parofita; ka ko ni sa mataqali i Isireli; … ena vuku ni nomu kawa ena kalougata kina na veimataqali kecega e vuravura.

“Sa vakaturi au cake ko Tamada ka talai au e liu vei kemuni me’u vakalougatataki kemuni, ena noqu vagolei kemuni tani mai na nomuni caka ca; ena vuku ni ko ni sa gone ni veiyalayalati.” ¹¹

Na Turaga e sa yalataka ni na dolele yani o Koya vei ira ka sega ni vakabulai ira ena nodra ivalavala ca ia me vakabulai ira mai na nodra ivalavala ca. ¹² Sa ikoya oqori na vuna e sa bibi kina ni da vukei ira noda gonevuli me yaco mera kilai Tamada Vakalomalagi kei Jisu Karisito ka taukena e dua na kila dodonu ni ituvatuva tawamudu i Tamada kei na ivakavuvuli dina ni IVakabula. Era gadreva me kila se o cei o ira kei na cava e vinakata na Turaga mera cakava ¹³ —kei na sala mera cakava kina.

Au vakabauta ni nodra vukei na noda gonevuli mera kila na veika oqo ena vakatau vakalevu ena noda kila se o cei o keda vaka tamata eda veivakavulici, veiqaravi, ka soli veitokoni ena seminari kei na inisitute. Na vakasama oqo a muataki au meu cakava e dua nai ka tolu ni lisi. Au a taura mai e dua tale na tiki ni pepa ka vola ena taba ni pepa veitaravi na ivakarau kei na itovodei eso ka’u dau vakavinavinakataka ka qoroya vei kemuni kece sara. Ni’u volavola tiko, au a raica ni’u lesu tikoga ki na dua na vakasama bibi. Au vakabauta ni isau bibi duadua ki na taro se o cei o keda sa ikoya ni da sa kerei me da ivakalesilesi i Jisu Karisito. ¹⁴

Na iusutu ni noda sasaga oya me da vukei ira na itabagone kei na itabagone qasecake me ra kila ka vakararavi vei Jisu Karisito kei na Nona solibula veisorovaki. Eda rai ki Vua vaka noda dauniivakarau ka vakararavi ena Nona loloma soliwale me da cakava na Lomana. Ena dela ni noda bolebole kei na malumalu yadudua, eda bula tu ena inuinui kei na nanamaki. Baleta ni da dau veivutuni vawasoma, eda sa vakila kina Nona yalovinaka kei na yalololoma, ka da dulaka yani na yalololoma oqori vei ira na tani ni da veivakavulici mai na yalo e sa veisau ka vakavinavinaka. Eda veivosakitaki Karisito wasoma, eda vakadinadinataki Koya, rekitaka Nona vinaka kei na cecere, ka vukei ira na tani me ra kila “na ivurevure me ra rai kina me bokoci kina na nodra ivalavala ca.” ¹⁵ Eda segata e veisiga yadua me da Nona ivakalesilesi.

Au a vulica na bibi ni vakasama oqo vaka dua na daukaulotu gone ni keirau a tuki katuba voli kei na noqu itokani. Ena dua na vale au a tekivu kaya yani, “Bula, oi keirau na vakailesilesi i Jisu Karisito.” Ni bera ni’u qai toso tale, a takosovi au na turaga oya ni kaya mai, “Sega, o kemudrau sega. O drau sega mada ga ni kila na kena ibalebale oqori.” A vakamacalataka o koya ni dua na vakailesilesi sa ikoya e dua e dau tu ena vukuna e dua tale, e dau kaya ka cakava na ka ena kaya ka cakava na tamata oya kevaka me a tu sara ga e kea o koya vakaikoya. A tinia o koya ena nona kaya, “Kevaka o drau Nona ivakalesilesi, ia drau sa na vakarau tukuna mai vei au na ka ena kaya vei au o Koya kevaka me a tu sara ga eke o Koya.” Au a vakarorogo matua sara ka qai mai duavata yani kei na turaga oqo ni nona kila me baleta e dua na vakailesilesi sa donu vakavinaka. Au mani vakavinavinakataki koya ka kerea ke rawa, ena kilamatata oqo, meu tekivu tale. Au sa qai kaya yani, “Sa yadra vinaka. Oqo ko Elder Aranda ka sai au ko Elder Webb. Oi keirau na vakailesilesi i Jisu Karisito, ka keirau sa lako mai me wasea vei iko e dua na itukutuku mai Vua.”

E sa soli yadua vei keda e dua na veivakabauti tabu. Ni da dau masu se tinia noda veivakavulici kei na ivakadinadina ena Yacana, eda sa cavuta tiko ni veika sa tukuni e matataka Nona nanuma kei na Lomana. Me da dina ki na veivakabauti oya, e dodonu me tu vei keda e dua na loloma titobu kei na kilamatata me baleta Nona kosipeli ka lomasoli tu me da sauma na kena isau me da kila dina na ivolanikalou kei na ivunau era vakatavulica. Baleta ni da kila ni vosa ni Kalou “sa kaukauwa sara” mai na dua ga na ka tale ¹⁶ ka ni sa tu dina kina na isau ni veitaro ni bula, na ivolanikalou e sa ivurevure taumada ni noda veika sotavi kei ira noda gonevuli. Ni da tomana tiko me da vakataucokotaka noda ivakarau ni veivakavulici me da sema kina kei ira e so tale na gonevuli, me da kakua sara ni vakataucokotaki ira tani mai na nodra yavutaki vakatitobu ena ivolanikalou.

E sa ka bibi vakakina me da vakota na lomada kei na yaloda vei ira na italai digitaki ni Turaga—vakatabakidua vei ira na lewe ni Mataveiliutaki Taumada kei na Kuoramu ni iApositolo Le Tinikarua —ka kakua sara ni kere veivosoti ena vuku ni nodra ivakavuvuli, me da vakamacalataka yani, se saqati ira ena noda “vuku ga, se vakacava sara na vuna se na kena taleitaki se kena donu … me ciqomi.” ¹⁷ Ena dua na vuravura e vuqa sara kina na domo veitemaki kei na inaki vakaveimaliwai eso, e sa dua na veivakalougatataki vakasakiti me da kila na loma ni Kalou ena vuku ni Nona parofita bula. Ni da vakataudonutaka noda veivakavulici, noda dinata, kei na noda vakaliuca na Turaga kei na Nona parofita, eda na tu ena dua na yavu dei, ka me vaka na taba ni vaini dina, ena tu vei keda na kaukauwa me da vua vakalevu sara. ¹⁸

Ena so na gauna, na vakavulici ni dina kei na vakaraitaki ni loloma e dau vaka me veisaqasaqa . Oqori baleta ni ra tu na isa‑veidabui vei rau ruarua, ka rawa ni vakasesei keda. O na vakila beka ni o tu ena iyatu eliu ka saga voli mo sauma na taro dredre ka verevereya eso ka kevaka o tukuna na ka dina, ena rairai rarawa se vakacudrui kina e dua. Me rawa ni saumi kina ena dua na sala ni loloma ka veivukei, e dodonu me da cakacakataka noda vakabauti Jisu Karisito ni dusimaka tiko o Koya na Nona Lotu mai vei ira e sa qisia o Koya me ra liutaka. Me da masuta na veivuke ka vakauqeti ira noda gonevuli me ra dau vuki vei Tamada Vakalomalagi ena nodra vakatataro kei na vakatitiqa. Sai Jisu Karisito na rarama ki vei ira era dabe voli ena veilecayaki kei na butobuto. Sai Koya na ivakaraitaki uasivi ni kena vakavulici vakamatata na talairawarawa, ia sai Koya na ibotani i Kiliati ki vei ira era rarawa voli mai na isau ni nodra cakacala ga. Sai Koya na ivakaraitaki uasivi ni veika eda segata voli meda yacova vaka qasenivuli eda vakavulica na dina ena loloma.

E dua na vuna e rui bibi kina ni da vakaraitaka na loloma ni iVakabula ¹⁹ oya na veisaqasaqa era dau sotava noda gonevuli. E dua na vakadidike vakarabailevu wale tikoga qo ni itabagone ni Yalododonu Edaidai a vakaraitaka ni o ira era sasaga tiko me ra kubeta dei na vakabauta ka bulabula tikoga ena Lotu era dau sotava vakararaba e dua se sivia na tolu na bolebole vakatabakidua:

Era vakila ni ra vakalewai ena vuku ni veisau eso ena nodra ituvaki, me vaka na veisere ni nodra itubutubu se e dua na lewe ni matavuvale sa biuta na Lotu.
Era vakila na yaloluvuci kei na yalolailai baleta na cala eso era sa cakava.
Se era sega ni vakabauta ni ra sa vakila oti na veika sotavi vakayalo. ²⁰

Ni da segata me da dauloloma me vaka na iVakabula, eda na rawa ni vukei ira noda gonevuli me ra levea yadua na ituvaki eso oqo.

O na vukea beka vakacava e dua na tamata gone me kua ni vakila ni sa vakalewai? ²¹ Ena rawa ni tekivu ena kilaimatata ni veiveisau lelevu ni veimaliwai kei na ituvaki eso e rawa ni vakavuna e dua na leqa ni nodra kilai, ka ra vakataroga kina na noda gonevuli se o cei o ira kei na sala era ciqomi kina. Ena veigauna vakaoqo, e rawa ni o vukei ira mera nanuma tiko nodra veiwekani tawaveisau rawa kei na Tamadra mai Lomalagi. Au kila e dua na goneyalewa ka a yavutaka nona yaga-vakaikoya ena nona ituvaki eso kei na veika era a nanuma baleti koya na tani. A vakila o koya ni sa lako sese ka sega ni kila se o cei o koya. A tekivu me masu o koya me kerea na veivuke. Ena dua na siga, a vakila vakamatata o koya ni kevaka e vinakata me kila se o cei o koya, ena gadreva taumada o koya me kila na Tamada Vakalomalagi kei na iVakabula. Na vakasama oqo a muataki koya ena dua na vakasaqaqara. A tekivu vulica o koya na ivolanikalou, ka masumasu ka veiqaravi, ena nanamaki me yaco me kila na Kalou. Ena toso ni gauna, na Turaga a tekivu me vakatakilai Koya ki vua. A vakila o koya na Nona loloma, vakacegu, kei na veikauwaitaki. Ni yaco me kilai Tamada Vakalomalagi, sa yaco vakakina me kilai koya vakaikoya kei na nona veiwekani vata kei Koya. A vulica o koya na nona kilai vakalou kei na nona yaga vaka dua na luve ni Kalou. Na kilamatata oqo e sa vakasinaiti koya ena rarama kei na reki.

O na rawa ni vukei ira nomu gonevuli era sotava tu na bolebole eso ena nomu vukei ira mera kila ni ra sa lomani mai vei Tamada Vakalomalagi. Ko sa rawa ni vakaraitaka nomu lomani ira ena nomu gauna, nomu veikauwaitaki, kei na nomu lomasoli mo vakarorogo. O na kerea beka na Tamada Vakalomalagi me vukei iko mo raici ira vaka tamata yadua ka mo kila rawa na nodra bolebole duatani, madigi, kei na gagadre eso. Ni ra lomatarotaro se sasaga dredre kei na nodra ivakadinadina, o na rawa ni vukei ira me vakila ni ra sa maroroi ka kila ni rawa ni ra vuki mai vei iko kei na Turaga.

Eda na vukei ira vakacava o ira era sasaga dredre ena yaloluvuci kei na yalolailai baleta na nodra cakacala? Me vaka na iVakabula, eda sega ni soro wale ena vukudra. Eda doka nodra sasaga mera tovolea tikoga me cakava na ka dodonu ena dua na vuravura dredre. Eda vakavulica vei ira ni bula kilikili e sega ni sega kina na cala. ²² Eda vukei ira me tikoga ena salatu ni veiyalayalati mai na vakadinadinataki ni reki ni veivutuni, ka vukei ira voli me kila ni oqori sa usutu ki na ituvatuva i Tamada Vakalomalagi. Eda vukei ira me kila ni se lomani ira tikoga o Koya ka sa tu vakarau me vukei ira.

Au taleitaka na lesoni e vakavulici ena Mosese 4, ka da a vulica kece ena macawa ga sa oti. Ni rau a talaidredre oti o Atama kei Ivi, a sa qai yadra na matadrau, ka rau kila ni rau sa luvawale. Na imatai ni nodrau sasaga me ubia nodrau luvawale oya me rau cula vata na drau ni lolo. Ni rau a rogoca na domo ni Turaga ena were erau a lewa me “vunitaki rau e loma ni veikau ni were, ko Atama kei na watina mai na matana na Turaga na Kalou (Mosese 4:14).” E lasa ni da raica se o cei a tukuna vei rau me rau vuni mai vua na Kalou. Ia oqo, au sega ni via vakararamataka, ia ena mana beka vakacava oya? E rawa beka ni o raitayalotaka na Tamada Vakalomalagi, ni lako curuma mai na veika buli tawawili rawa, ni mai kunea na ituvatuva ni veikalokalo, na vuravura oqo, kei na were oqori, ka sega ni kunei rau rawa ko Atama kei Ivi ena veivunikau? Ena gauna oqori a tarogi rau na Turaga ena dua na taro: “Ko sa lako kivei?” Mosese 4:15 Se mai na Veiyalayalati Makawa, “Ko sa tiko evei?” (Na i Vakatekivu 39:9). O nanuma beka ni rawa ni sega dina ni kila o Koya? Ia qai cava beka ga e taroga tiko o Koya? E rairai dua beka na ka me vaka, ia oqo ni drau sa talaidredre, drau sa na lako beka ki vei? Drau na vuni beka mai vei au, se drau na lako mai vei au ka laivi au me ubi kemudrau? Na vosa na veisorovaki ena kena vaka‑Iperiu taumada oya na kippur, ka kena ibalebale “me ubia.” ²³ Na Tamada mai Lomalagi e sa vakarautaka e dua na sala vinaka cake mai na drau ni lolo kei na veikau me ubia noda ivalavala ca. Ia na meca sa vakasolokakanataka na lasu me cakava me da via vuni mai vua na Kalou. E saga o koya meda vakabauta ni sega ni lomani keda na Kalou ka na sega ni na vosoti keda o Koya baleta ni dodonu meda sa kila vakavinaka cake, se baleta ni sa rui uasivi na noda ivalavala ca.

Ena dua na gauna au a sureta e dua na goneyalewa me lako ki na valetabu kei na dua na ilawalawa itabagone. Na kena isau mai vua ni o koya e sega ni bula kilikili kaya me lako ki loma ni valetabu. Au a tukuna vua ni keimami na taubale wavoki tu ga ena lomanibai ka’u na taleitaka me gole mai o koya kei keirau. Na kena isau mai vua, “Se tei kua mada. Au sega ni vinakata me raici au na Kalou ena gauna saraga oqo.” Ni da caka cala, e vakavuqa eda sega ni dau via masu, wili ivolanikalou, se lako i lotu. Eda rairai nuitaka voli me da kua ni raici mai vua na Kalou.

Yalovinaka vukei ira nomu gonevuli me kila ni gauna era cakacala kina, era rawa ni kunea na veivosoti kei na vakacegu ena nodra lako ki na liga loloma veisureti ni dua na Tamada Vakalomalagi sa vakarautaka tu e dua na sala me ubi keda. Sa vakarautaka o koya na sala meda vueti kina.

O na vukea beka vakacava e dua na gonevuli yalewa e nanuma ni se sega ni vakila o koya na veika sotavi vakayalo? Ena so na gauna era dau rogoca noda itabagone na italanoa eso e vaka me veivakurabuitaki ka sega ni raica rawa ni Yalo Tabu e dau vosa talega vei ira ena so na sala rawarawa, me vaka ni dua na nodra taro vakauqeti se ni da nanuma kina meda makataka na ivolanikalou. Me da vukei ira me vulica na sala e dau vosa kina vei ira vakayadua na Turaga ka me da kua ni vakatura ni sala e dau vosa kina na Turaga vei keda e sa sala duadua ga e rawa ni vosa kina o Koya vei ira. Me da qarauna me da kua ni tukuna vei ira noda gonevuli ni ra sa vakila tiko na Yalo Tabu. Baleta ga ni da vakila tiko beka na Yalotabu vaka qasenivuli e sega ni kena ibalebale sara ni ra vakila tiko na gonevuli kece na ka vata oqori ena gauna vata oqori. E vinaka talega me da kila ni o ira era nuiqawaqawa ka yalobibi tu era na vakila beka ni dredre me sotava na veika oqo. Ia na Turaga e sega ni yalani mai na tauvimate vakamona. O Koya e kilai ka kauwaitaki ira ka rawa ni raica na sala me vakatakila kina Nona loloma kei na veituberi. E vica wale saraga na ka e rawa ni da cakava ka na vukei ira vakalevu cake mai na nodra vulica me ra ciqoma ka cakacakataka nodra ivakatakila yadua.

Au a rogoca wale tikoga qo na italanoa me baleta e dua na cauravou e vuli tiko ena dua na univesiti dokai ena tokalau kei Amerika. E a curu o koya ena dua na kalasi ni vakasama‑matau dredre sara. Baleta ni a vinakata o koya me rawata vinaka, a mani lewa me sauma e dua na qasenivuli. A mani sauma rawa e dua na tamata ka a ivukevuke tu kivua na parofesa ka a vakavulica sara madaga na kalasi vata oya ena univesiti oya. A veivukei sara vakalevu na qasenivuli, ia na cauravou a taqayataka tiko na iotioti ni veitarogi. A tukuna na parofesa vei ira na gonevuli ni na rui dredre sara na veitarogi ka na vakatarai ira kina o koya mera kauta mai e dua na tiki ni pepa ka biuta kina na cava ga era nanuma era na gadreva. Era a tekivu volavola na gonevuli ena kena matailalai duadua era rawata, ni ra vakayagataka voli na iloilo ni vakalevutaki‑ka me vola kina ka wilika na veika era na gadreva ena iotioti ni veitarogi. A yaco mai na siga ni veitarogi, ka mai curu sara yani na cauravou ki na rumu ni kalasi. A toka e yasana o nona qasenivuli. E taroga yani o parofesa se cava eratou cakava tiko, ka dreta mai na cauravou e dua na tiki ni pepa lala ka biuta ena fuloa. Sa qai mai tucake tu o qasenivuli ena tiki ni pepa. A vakamacala sara na cauravou, “Ko ni a kaya ni’u rawa ni biuta na cava ga au vinakata ena tiki ni pepa oqo. Ia, au vinakata noqu qasenivuli.” A vakatarai na cauravou me dabeca na veitarogi ni toka tikivi koya nona qasenivuli, ka vakasolokakanataka tiko na isaunitaro e daligana.

Vaka lewe ni Lotu i Jisu Karisito ka sa soli vei keda na isolisoli ni Yalo Tabu, na cava me da lako curuma kina e dua ga na veitarogi ni bula ka sega na veivuke e tu vakarawarawa vei keda? Vinaka vakalevu na nomuni segata voli mo ni bula kilikili kaya na Yalo Tabu ena veitiki kece sara ni nomuni bula ka vakasaqara Nona veivakayarayarataki ena veika kece o ni cakava.

Sa noqu masu ni ra na yaco na noda itabagone kei na itabagone qasecake mera kilai Tamada mai Lomalagi ka ena nodra kilai Koya, era na kila se o cei dina sara o ira. Baleta na Nona kaukauwa mana ni veivosoti, era na savai. Baleta na Nona kaukauwa mana ni veivakabulai, era rawa ni vakataucokotaki. Ka baleta na Nona kaukauwa mana ni veisavai, era rawa ni vakataki Koya. Me vaka na ivakailesilesi i Jisu Karisito—o ni vakavulica Nona ivunau ka wasea Nona loloma—o ni na rawa ni vukei ira me kila rawa nodra kilai tawamudu. Oqori e sega ni kena ibalebale ni ko ni na dau uasivi tu ga. E sega ni gadrevi mo ni vakakina. Ni o segata mo vakavulica na kosipeli vakalesui mai—vakadeitaki vei Jisu Karisito, vakanamata vei ira nomuni gonevuli, ka yavutaki ena vosa ni Kalou—na Yalo Tabu ena solia kina na bula kei na kena yaga ka vakadinadinataka na kena dina. Au vakadinadinataka ni o kemuni, nomuni matavuvale, kei ira nomuni gonevuli o ni sa luve ni veiyalayalati, na inuinui kei Isireli, ka daulomani ni Kalou. Ena yacai Jisu Karisito, emeni.