Veivosaki Vakailawalawa

Vuli Kaburaki Vakayabaki ni S&I ni 2022 vata kei Peresitedi Ballard

Vakaraubuka, 21 ni Janueri, 2022

Sister Becky Scott: O ni sa kidavaki mai ki na noda soqoni ni Semineri kei na Inisitute ena taunaolo oqo. Me vaka o ni na raica, eda sa veiyawaki me vaka na kena ivakarau gadrevi, sa rawa kina ni da luvata na noda iubi ni ucu kei na gusu. Sa ka talei me‘u raici kemuni nikua, ka keitou marautaka vakalevu na nomuni vakaitavi. Au gadreva talega me‘u cavuta ni ena vuku ni tekenolaji, eda soqoni rawa nikua kei ira kece na vakaitavi tiko mai na veiwasewase kece e kovuti ena S&I e vuravura raraba. Ni matavinaka mai vei kemuni kece, vinaka vakalevu na vakaitavi tiko kei keitou nikua. Adam, e rawa ni o vakamatatataka na veika me baleta na noda veitalanoa nikua?

Brother Adam Smith: Io, e ka ni marau vei au. Taumada me‘u vakaraitaka mada na neitou vakavinavinaka ni rawa ni keitou mai tiko vata kei kemuni yadua nikua. Keitou lomana ka taleitaka na qasenivuli yadua ni semineri kei na inisitute, kodineita, ivukevuke vakaveiliutaki, daukaulotu kei na iliuliu dauveiqaravi e vuravura raraba. Sa vakaitamera na vinaka ko ni dau vakayacora, ka ko ni sa vakalougatataka e levu sara na tamata. Vinaka. Keitou kila ni caudre tu vei kemuni yadua na yalo e lomana na inaki ni semineri kei na inisitute—ko ni vinakata mo ni vukea na itabagone kei na itabagone qase cake yadua me ra kila ka vakararavi ki vua na Tamadra Vakalomalagi kei Jisu Karisito, ka yaco me kilai rau ka lomani rau vakavinaka ka muri rau vakatitobu cake. O taleitaka na kena inaki baleta ni ko lomani ira na nomu gonevuli ka vakabibi ni ko lomana na nomu iVakabula. Ena vuqa na yabaki, na S&I sa mai rawata vakavinaka na nodra vukei na gonevuli yadua me ra kilai Jisu Karisito vakalevu cake. Ia eda raica ena noda vuravura nikua e dua na gagadre levu meda kumuni ira mai na itabagone kei na itabagone qase cake kivei Jisu Karisito, ka eda vinakata meda bucina mera sotava na madigi ni saumaki, kila na kedra yaga, kei na nodra wili kina. Eda kila ena yaco na veimadigi ni vuli oqo ena noda vakanamata vakatabakidua ena nodra gagadre na gonevuli ena vei madigi ni vuli yadua eda vakataudonutaka vei Jisu Karisito, Nona kosipeli vakalesui mai, na Nona inaki ni veisorovaki—ni vakanamataka na noda veivakavulici ena ivolanikalou kei na nodra vosa na parofita bula ena noda vakatavulica na ivunau i Karisito. Eda kila ni da vakayacora na veika oqo, eda sureta na Yalo Tabu me cava na itavi e rawa ni cakava duadua ga o Koya: me vukei ira na itabagone mera saumaki mai vua na Turaga, tikoga ena Nona salatu ni veiyalayalati, veidutaitaka na dina mai na cala, ka dusimaki ki vua na noda iVakabula o Jisu Karisito ka lesu tale vua na Tamadra Vakalomalagi.

Na inaki ni ivurevure eso keitou na vakamacalataka nikua vei iko sai koya me vakamacalataka na iwalewale ni nodra vukei na gonevuli mera vakila na saumaki, na kedra yaga, kei na nodra wili vata—me vakamacalataka ena sala matau vakaivakavuvuli eso na kila matai kei na iwalewale e rawa ni vakayagataka na qasenivuli me vukei gonevuli. Keitou sa bucina talega eso na iwalewale ni veituberi kei na ivurevure eso kei na veisureti me vakatovotovotaki ka vakayagataki. Ka keitou vinakata talega me da na vinaka cake ena noda vakayaco-ka ena nodra bula na gonevuli, me rawa ni da kunea na vanua eda sa caka vinaka tiko kina, ka me rawa ni da tomana tiko na noda vakatorocake taka, ka me kunei talega na madigi me da sotava vakavinaka cake kina na nodra gagadre na gonevuli. Keitou sa nuitaka ni oti na noda gauna vata nikua, o ni sa na kila matata na ivurevure eso oqo ka o ni na vakila na veivakauqeti kei na inuinui serau mo ni na toso kina ki liu ena kena veicurumaki taki kei na kena vakayagataki ka vakatabakidua ki na noda takete e duabau: me vukei na gonevuli yadua me yaco me kilai Jisu Karisito. Oqori na vuna eda tiko vata kina nikua eke. Vinaka, Sister Scott.

Sister Becky Scott: Vinaka. Keitou marautaki kemuni taucoko ena nomuni tiko rawa nikua. Me da sa tekivu sara ena noda imatai ni taro. E dua na taro nei Sister Jessica Brandon mai na noda iWasewase ena Vualiku kei Amerika ena Ra, vei keda nikua. Sister Brandon, yalo vinaka ni taro mai.

Sister Jessica Brandon: Vinaka. Ni railesuvi tiko, na itukutuku eso ena veituberi oqo, oqo na taro: E tiko beka e dua na ituvatuva me da vakanamata kina ena vei ivakarau oqo ka vakakina ena kena iwasewase eso? Era veitaravi beka?

Sister Lori Newbold: Vinaka vakalevu na taro oya Jessica. Au nanuma na kena isau na sega. Ia ena kena vakasamataki tiko na kena veitaravi, au na kaya na imatai ni ka—kau nanuma ni imatai ni ka—ni ko tekivu ena vakabauta na iVakabula o Jisu Karisito, me rawa nio kila ni rawa ni vukei iko o Koya mo cakava na ivakavuvuli se vakatovotovo cava ga o digitaka. Ko na digia oqori mai na iyaya ni veitarogi e vakarautaki ka sa yaga sara me vukei iko mo raica na cava soti era sotava tiko na nomu gonevuli.

Sister Brandon: Uasivi. Vinaka.

Brother Chad Wilkinson: E dua na ka au via kuria. Vinaka vakalevu, Sister Brandon. Kakua ni vakadredretaka vakasivia; kakua ni dikeva vakasivia. Oqo na iyaya ni cakacaka me vukei iko; oqo na kila-ka eso me na vukei iko. Ena noqu vakasama e dua na vakanananu me baleta na nomu taro, ena Alama 48, e tiko kina e dua na tiki ni ivolanikalou eda kila taucoko. Natikina e 17 e kaya—oqo o Momani ni vosa cake mai me baleta e dua na ka. E kaya o koya, “Io e dina, e dina au sa kaya vei kemudou, kevaka era sa tautauvata kei Moronai ko ira kece na tamata era sa mate yani, kei ira era bula tiko edaidai, kei ira era na qai bula e muri, raica sa na kuretaki me sega ni mudu na kaukauwa kei eli; io sa na sega tale ga ni rawata na lomadra na luve ni tamata ko koya na tevoro.”

Na cava beka, e baleti koya ka vakavuna me tukuna mai kina o Momani na ka oqo? Au vakasamataka e dua na ivakavuvuli mai na vuqa na ivakavuvuli e rawa ni da veitalanoataka sa ikoya ni a solia o koya na gauna me vakaukauwataka kina eso na koro malumalumu. A mani vakanamata o koya ki na vei vanua malumalumu, ka vakarauta me ra kaukauwa. Ena vakadikevi iko vakataki iko, ena nodra vakadidike na supavaisa se o ira ko sa via vukea—icaba, vakakina na nomu veitarogi kei gonevuli—sa rawa ni tekivu me raica na cava eso na vanua malumalumu ka qai tekivu ekea.

Sister Jessica Brandon: Dua ga na vakasama au via vakuria ki na ka e tukuna o Sisita Newbold. Au vakabauta ni rawa ni vakarerevaki na veisau, ka‘u nanuma ni rerevaki me soli na vakadidike ki na dua na ilala itabagone kei na itabagone qase cake ka o na vakataroga se na cava e na lesu mai. Ka‘u vakabauta ni dua vei ira na ka sa veivuke vei au ena veiyabaki sa ikoya me‘u kila ni o ira yadua na itabagone kei na itabagone qase cake oqo era luvena vakamareqeti na Tamada Vakalomalagi. Ka kevaka eda vakanamata ena ka oqori, ka sega ena rere vaka tamata “Se Vakacava na Kequ iRairai, ka vakanamata ki na dina ni lomani ira yadua na Tamada Vakalomalagi?” vakalevu sara, oqori na tiki ni noda veikacivi se noda cakacaka, me vukei ira me ra yaco me ra kila na iVakabula vakataki ira. Ka‘u vinakata ga me‘u tukuna na levu ni noqu vakavinavinakataka na vakanamata ena kena tarai cake na noda veiwekani yadua kei ira na noda gonevuli, me rawa ni da vukei ira me ra rawata na inaki oya.

Brother Adam Smith: Vinaka, Jessica. Au nanuma ena veivurevure kece oqo, eda sa tovolea me da vakanamata ka vakarawarawataka ka vakaduavatataka ka tara cake ena veika kece eda sa vulica ena vei yabaki. Ka‘u vakabauta ena vei ivurevure oqori eda na raica na vei tiki ni yavu taumada ni Veivakavulici kei na Vuli Kosipeli. O na raica na vei tiki ni “Vuli Vakatitobu.” O na raica na veivakauqeti mai vei ira era liutaki keda me baleta na vakanamata vua na iVakabula, vakarorogo, vakadikeva, vakaduiduitaka, waqara na buka e yalodra na noda gonevuli. Eda sa tovolea vakaidina me da vakarawarawataka ka vakanamatataka. E dina ga ni ra sa wasei vaka iwasewase na vei ivurevure eso oqo, keitou nuitaka ni ko ni na raica me dua ga na ka. Na dua na ka oqori sa ikoya na noda cakacaka me da vukea e dua na gonevuli me kila vakavinaka cake na iVakabula. Eda na sega ni rawa ni cakava oqo ke sega na veivuke ni Yalo Tabu.

Na sala naba dua me sureti kina na Yalo Tabu sa ikoya me da lomani ira na noda gonevuli, vakanamata vei Jisu Karisito, ka vakararavi ki na kaukauwa ni vosa ni Kalou. Ka daru kila ni sa nanamaki ka tu vakarau na Tamada Vakalomalagi me vukei keda, ena noda tovolea me da vukei Koya, me vukei ira. Ka da kila ni da vakasaqara na Tamada Vakalomalagi ena masu ena noda dikevi keda, ni da tarogi ira na noda gonevuli ena veika era gadreva ena vakadidike oya, vakakina ni da kerea e dua na iliuliu vakacakacaka se itabavata me lako mai ka solia eso na itukutuku, na veika kece oqori e kena inaki me sureta na ivakatakila, me rawa ni da vukea e dua na itabagone me kilai Jisu Karisito.

Sister Scott: Sister Sara Bradley, mai na Salt Lake Area, e Utah, sa rawa beka mo ni wasea kei keda na veika o sotava?

Sisita Sara Bradley: Io, e ka ni marau vei au. Ni oti na noqu vakayagataka na ivurevure oqo ena imatai ni gauna, au sa tarai ena rawarawa ni kena tuvai, kei na kena vakasamataki vakavinaka. Na kena icakacaka vei au a rawarawa. Au a tekivu ena iyaya ni vakadidike. Au a vakayagataka na dikevi iko kei na dikevi gonevuli, ka ratou veivuke mai na noqu iliuliu vakacakacaka. Ka keimami dikeva na vanua au sa tu kina. Oti au qai vakatulewataka vata kei na noqu iliuliu vakacakacaka na vanua au vinakata me‘u vakanamata kina ka yavutaki mai na noqu vakadidike kei na nona vakadidike na noqu gonevuli me baleta na vanua au sa toka kina. Ka‘u qai toso yani ki liu. Au curu yani ki na ivoladusidusi ni Vulici ni iVakavuvuli ni Kosipeli vou. Au curu sa ki na ivurevure ni “Teacher Development Skills”. Ka kauti au saraga ki na vanua au vinakata me‘u vakanamata kina. Au wilika ka vulica na veika oqori, oti au qai lesu tale ki na noqu valenivuli, ka‘u tovolea vagumatua me‘u vakayagataka na vakatovotovo ena vuqa na sala, se vakacava? Ka‘u vakanuinui ni‘u sa vakalevutaka cake tiko na nona rawata na noqu gonevuli me vakila na saumaki mai, na kena veiganiti kaya, kei na vakaitaukei taki. Kei na ka cecere sa ikoya ni‘u a lesu mai ka vakayagataka tale na vakadidike me‘u dikeva kina noqu toso me‘u raica ke dua na ka sa veisau. O koya mo na tekivu vakayagataka tale na ivurevure ni vakadidike oya mo kila na vanua mo goleva ni oti oya. Oti qai lako tale ki na ivurevure me vukea mo vinaka cake tikoga ka toso ki liu.

Brother Gary Lowell: Na cava ko na vakatura vua e dua e sega soti ni vinakata me vakayagataka na gagaca ni cakacaka eso oqo, vakauasivi ena gauna e ka dredre toka kina vei keda me da raica ka walia na vei malumalumu eso? Ka salavata kaya, ena dua beka na itavi vakenadau se vakaveiliutaki ena kena vakayacori e vei gauna na vakatataro oqo?

Sister Lori Newbold: E rawa—e rawa beka ni‘u tukuna kina e dua na ka? Ka‘u vinakata me‘u tukuna vakamaqosa na ka oqo, sa dau vakatalega kina na veika au vakila, ni so na gauna eda rere vakalevu ni tiko e dua ena noda valenivuli, kevaka e cala na ka eda cakava. O koya gona oya ena so na gauna sa dau uabaleti keda na vakanananu ni tamata vakayago oqo ena noda dau rere ni dua e veivakalewai. Baleta ni sa rui lako vakalevu na yaloqu kei na lomaqu vei ira na cauravou kei na goneyalewa, au dau lomana vakalevu oqo. O koya e dredre kina me da curu mai ka kaya, “Lori, sa dodonu mo vakavinakataka cake na yalomu.”

Ka‘u sega ni vakabauta ni sa ikoya oqori na veika eda dau cavuta wasoma ena ivakarau. Au vakabauta ni ka dina eda tukuna tiko sa ikoya me da, tomana tikoga na noda tara cake e dua na itovo tudei ni vakabauta na iVakabula ko Jisu Karisito, ni rawa ni da veisau, ka rawa ni da tubu. Sa ikoya oqori na ka au na tukuna vua e dua. Na veiyaya ni cakacaka oqo e baleta na tubu. Na tubu e yaco mai ena veivutuni. Na veivutuni esa baleta na veisau. Ka rawa duadua ga ena vukuna na iVakabula. O koya, au vakabauta ni oqori… kevaka eda rawa ni raica, kila, na siga au kaya kina… na qasenivuli kece e tukuna tiko vua e dua, “E rawa beka ni o lako mai ka saravi au? E dodonu me‘u solia vei ira na gonevuli oqo na noqu vinaka duadua au rawa ni solia, ka‘u kila ni‘u sega ni yacova tiko eso vei ira. E rawa beka ni drau vukei au?”

Brother Bert Whimpey: E rawa beka niu kaya talega oqo? Baleta na ituvaki oqo—baleta talega na qasenivuli ni iteki, o ira na lewe vuqa era vakavulici ira na itabagone talei—na iyaya ni veitarogi oqo era ivurevure. Vei ira na noda qasenivuli tudei ka cakacaka saumi, e namaki oya. Eda na vulica na sala me da vakayagataka kina vakavinaka cake, ka da na tovolea me da tauyavutaka na itovo tudei oya. Me baleti ira na noda qasenivuli era kacivi ena iteki, oqo sa dua na ivurevure e rawa ni o vakayagataka me vaka na veika o vinakata kei na gagadre ni yalomu. Na cava ga o nanuma ni na vukei iko.

Brother Wilikinson: Gary, e dua na taro cecere oqori, ka keimami taleitaka na veika kece o sa vakayacora tiko ena nomu ilesilesi. Vinaka. Ka o taroga tiko na taro era vinakata na tamata kecega me ra taroga. E dua na iwase ni ivakarau—ena ivolanikalou, e vuqa na taro veivakauqeti, ia e tolu e ratou sa vakalougatataki au sara vakalevu. Ka o ni na raica na tiki oqo ni ivakarau. Na iliuliu cauravou, “Na cava tale sa vo vei au?” ¹ Na taro oya, na ivakarau oya e kauta mai na ivakatakila mai vua na iVakabula. E nona na digidigi me muria se segai. O Paula, se o Saula, ena gaunisala ki Tamasiko, “Turaga, na cava o ni vinakata me‘u cakava?” ² Dua tale, na ivakarau oya. Kena ikatolu o Josefa Simici ni sa bera na imatai ni nona veisiko mai o Moronai a taroga tiko—a gadreva tiko me vosoti na nona ivalavala ca. Ia na taro talega “Na vanua cava au sa tu kina e mata ni Turaga?” ³ Au vakabauta na mataqali taro ni dikevi koya vaqo ka da vakarautaki keda tiko kina—e sega ni baleta e dua e dikevi au tiko ia vakalevu cake ni laivi au “Me‘u lako vei Tamada Vakalomalagi kei na iVakabula, me Rau tukuna vei au na vanua au tu kina. Ni da dolavi keda kina, au vakabauta ni drodro mai na ivakatakila ka yaco ni da na vinaka cake sara mai na noda tu ga vakataki keda.

Brother Jack Menez: au vakavinavinaka, ni‘u rogoca tiko na vakasama eso, na kena tarai cake e dua na itovo tudei ni veivakatorocaketaki, kei na vakararavi vua na iVakabula, kei na so sara mada ga na lomaleqa ni so na gauna eda na vakadrukai me vaka ni da qasenivuli. Ni ena gauna oqo—ena noqu ilesilesi au vukei ira eso tale na qasenivuli me ra vinaka cake. Ka dua vei ira na ka au sa mai vakavinavinakataka sa ikoya na mana ni iVakabula me vukei keda me da vukei ira na qasenivuli era tu wavoliti keda, o ira na noda itokani. Oqori e vukei ira na noda gonevuli. Ni ra vakararavi na noda qasenivuli vei Jisu Karisito, sa rawa ni ra wasea e levu cake na ivakadinadina ni Nona loloma soliwale.

Me vaka sa tukuni, na caurovou vutuniyau. Au taleitaka na nona ivakaraitaka na iVakabula, ni a kaya o Koya, “Oqo eso na ka mo cakava, ko sa cakava tiko veika oqori. Totoka oqori,” ka qai solia e dua tale na ka e rawa ni cakacakataka. Eso na gauna na veika eda rawa ni cakava, au nanuma, me vaka ni da vakailesilesi meda kaya, “Totoka. Au kila ko sa vakamarautaka tiko na Turaga. Au nanuma ni sa marautaka tiko na Turaga na veika vinaka eda cakava tiko, ka sa rawa beka ni da sema vata ena noda vakabauti Jisu Karisito meda cakava e dua tale na ka?” Oqori ena veivuke ena so na gauna—ni da vakatorocaketaka na itovo tudei vou oya ni veivakavinakataki, e rawa ni veivuke me levei eso na vakanananu ni sega ni veiganiti se na vakanananu ni sega ni veirauti na ka eda sa cakava tiko, ni na sega ni da vinaka sara. Ia e rawa ni da cokota vata na loloma soliwale i Jisu Karisito kei na vei sasaga oya ena dua na ivakarau ka na vakavurea e dua na ka e yaga sara vakalevu. Oqori ena qai drodro yani ki na loma ni valenivuli, ka rawa ni da wasea na ivakadinadina cecere cake vei ira na noda gonevuli me baleta na mana e tu vei Jisu Karisito me vaqaqacotaki keda me da vakayacora vakataki keda na veika dredre.

Sister Scott: Sister Sorenson, E rawa beka ni‘u sureti iko mo wasea vata kei keimami na nomu taro?

Sister Jamie Sorenson: Donu vinaka. Sa tu vei keda na inaki, na 3 na vua ni vuli e veiganiti kaya, vakaitaukei taki, kei na saumaki mai, 5 na sala me vukei au ni qarava o qasenivuli na vuanivuli oqori, kei na 25 na iwalewale e rawa ni vukei au me‘u qarava kina na noqu itavi vaqasenivuli. Kena ikuri, e dodonu me noqu itakele na Karisito, yavutaki ena ivolanikalou, ka vakanamata ki vua e vuli. Ka‘u vakayagataka e tolu na vakadidike duidui me vukea na noqu vakadavora e dua na takete ni tubu. E viavia dredre toka vakalailai. E levu sara. Na cava e dodonu me vakanamatataki?

Brother Whimpey: Na takete sa ikoya me ra vukei na itabagone kei na itabagone qase cake me ra kila-ka vakararavi ena ivakavuvuli kei na veisorovaki i Jisu Karisito, rawata na veivakalougatataki ni valetabu ka vakavakarau ki na bula tawamudu. Sa ikoya oqori na ka eda tovolea tiko me da cakava. Ena inaki oqori, sa noda itavi me da veivuke. E rawa vakacava me‘u veivuke? Au rawa ni raica vakabibi vei ira na noda qasenivuli ni iteki—era raica na ivurevure kece oqo ka kaya, “Sa rui sivia qo.” Sa rawa ni kaya e dua na qasenivuli, “Oqori na kena inaki. Meu na cakava vakacava?” Au marau ni o taroga. Na sala vinaka duadua me caka kina oya sa ikoya mo vukei ira na nomu gonevuli me ra sotava na vei gauna ni saumaki mai, na kena veiganiti kaya, kei na nona vakaitaukei taki. “Sa donu vinaka vakalevu, ia me‘u vakavurea vakacava na vei gauna vaka o ya? Au marau ni o taroga. Na sala mo cakava kina sa ikoya au vinakata mo lomani ira o vakavulica, ka veivakavulici ena Yalo, ka vakanamata vei Jisu Karisito, ka vakavulica na ivunau, ka sureta na vuli vagumatua. “Sa donu, me‘u cakava vakacava oya? Au marau ni o taroga. Baleta oqo ni sa tu na vei cakacaka oqo na vei kila-ka oqo ka na vukei iko. Ia era dusi lesu ga ki na inaki.

NI sa dabe e dua na qasenivuli ka dolava na ivolanikalou ka vakasamataki ira na nona gonevuli, au nuitaka ni ra sega ni vakasamataka na veika e rawa ni veivakadrukai; era vakasamataka, “Ena rawa niu vukei ira vakacava na gonevuli oqo, au lomana? Sa rawa vakacava meu vukei ira na itabagone kei na itabagone qase cake me ra kila-ka vakararavi ena ivakavuvuli kei na Veisorovaki i Jisu Karisito ka rawata na veivakalougatataki ni valetabu ka vakavakarau ki na bula tawamudu?” Ia, ni o vakasamataka, eda tukuna tiko na salatu ni veiyalayalati ka kerea vei keda o Peresitedi Nelson me da vakaitavitaki keda kina ena vakasoqoni vata kei Isireli. O koya kevaka e rairai veivakadrukai, kevaka o nanuma, “Au sega ni kila kevaka au rawa ni cakava taucoko oqo” vakanamata ga ena inaki.

Brother Jason Willard: Kei Jamie, de rawa beka ni‘u vakuria ena dua na ivolanikalou mai vua na noqu qasenivuli talei ena iVola i Momani, oqo mai vei Baraca Nifai. Oqo mai vei Tacida o Nifai. E kaya ga vaqo oqo ena 1 Nifai 6:4: “Ni sa inaki taucoko ni lomaqu me’u vakamasuti ira [noqu gonevuli] me ra lako mai vua na Kalou i Eparaama, kei na Kalou i Aisake, kei na Kalou i Jekope, me ra vakabulai.” Na veika kece a vakayacora o Nifai sa ikoya me vukei ira na tacina kei na ganena me ra vakabulai, me ra vakabauti Jisu Karisito ena dua na sala me vukei ira me ra qai ciqoma na bula tawamudu.

Vinaka Jamie ena nomu taroga na taro donu. Baleta na ka e yaco ni o sa guilecava na vitu na ka bibi, na 16 na veituberi e muri, kei na vei tikina Cavuqaqataki e dodonu me ra rawata ni ra toso tiko. Mai muri ni da taroga na taro oqo, o ni na okata kina na veika kece, na veika kece sa kerei vei kemuni. Sa levu na veika e kerei vei kemuni mo ni vakayacora, ia na ka dina sara, ni dua ga na kedra iusutu. Au taleitaka na iVakabula ni vosa tiko vei Meri kei Marica, ka vaka o iko o vaka na veivakauqeti oya nei Meri, Jamie, ena nona kaya ko Jisu, “E dua na ka sa gadrevi sa digitaka o Meri nai votavota vinaka.” ⁴ Jamie, keimami vakavinavinaka ena nomu sa digitaka na ivotavota vinaka—kei kemuni na qasenivuli yadua e vuravura taucoko, ena nomuni sa digitaka na ivotavota vinaka, mo ni dabe ena yavana na iVakabula, ka me ra itakele ni veika kece sara o ni cakava o Koya. Mo ni kalougata kina ena sasaga oya.

Brother Adam Smith: Jamie, au vinakata me‘u taroga vei iko e dua na taro veitokoni kevaka e rawa. Totoka vakaoti na nodrau se qai vakavulici keda o Baraca Whimpey kei Baraca Willard me baleta na vakanamata ki na veika e bibi duadua, sa ikoya na inaki ni semineri kei na inisitute. Ia Jamie, me vaka e dua na qasenivuli, o na kila vakacava kevaka sa rawati na inaki ena nodra bula na nomu gonevuli?

Sister Sorenson: Sa ikoya. Au sega ni kila kevaka ena yaga na isau ni taro oqo, ia e votu ga mai vei au ni ra vakamacala tiko na tamata. E yaco ga mai ni veiganiti kaya, vakaitaukei taki, kei na saumaki mai eda raica ena nodra bula, se vakacava? Me vaka na tolu na ka oqori era dusimaki keda ki na inaki. Au sa raica ni yaco tiko ena veitalanoa era vakayacora. Au raica ena taudaku ni semineri. Au raica ni ra tiko voli ena semineri ka volavola tiko, ka vola tiko na veika era vakila. Sa ikoya na tolu na ka oqori. Me vaka ni ra dusi keda vakaidina ki na inaki.

Brother Adam Smith: Vinaka vakalevu. Jamie, o nanuma beka ni na yaga mo tarogi ira na nomu gonevuli ke vakadodonu sara mada ga, kevaka sa veimuataki tiko ki na saumaki mai, na kena veiganiti kaya, kei na nodra vakaitaukei taki na veika era sotava tiko ena Semineri se Inisitute?

Sister Jamie Sorenson: Io sara ga. Kei na vakadidike eda solia vei ira, kevaka mada ga e sega ni vakaivolataki ni kena ilakolako, se na sala sa cakacaka tiko kina? E rawa vakacava oqo? Au vakabauta ni dua na ivakarau cecere ni sala sa cakacaka tiko kina na inaki.

Brother Webb: Vinaka vakalevu. Au vinakata oqo mo ni raitayaloyalotaka ni o sa tarogi ira na nomu gonevuli ena taro oqo—ka ra sa cavuta e dua na ka era nanuma ni rawa ni vakavinakataka cake vakalailai na semineri—taura mada ena iyalava ni vakaitaukei taki, e tukuni kina “Keimami taleitaki Sister Sorenson; ka taleitaka nona kalasi; sa rui talei o koya.” Ia eda raica na veika matailalai oqo ena nodra isaunitaro ka da raica kina na madigi me levu cake na yalo ni vakaitaukei taki. Na cava beka ena veivuke vei iko me vaka e dua na qasenivuli mai na nomu rawa ni tauyavutaka e levu cake na yalo ni okati kina ena nomu valenivuli?

Sister Sorenson: Au nanuma vakaqasenivuli e veivuke meda veitalanoataka, meu lako vei supavaisa ka kaya, “Oqo eso na nanuma. Vukei au mada meu kila na veika oqo.” Ka veitalanoa kei ira keimami cakacaka vata, “vukei au me‘u kila vinaka. Na cava beka oqo? Ena rawa vakacava ni‘u cakava vakavinaka cake na ka oqo?” Au nanuma ni na yaga sara na veika oqori.

Baraca Webb: Daumaka. Na ivuna au via tarogi kemuni na taro eso oqo ni oqori na vakanananu e muria tiko mai ni sega walega ni baleta na veitarogi ka baleta talega na Vulici ni Vakavuvuli ni Kosipeli vakavoui kei na ivurevure ni veituberi: me rawa ni qai kaya e dua na qasenivuli, “Au vinakata me rawata na noqu gonevuli na inaki oqo ena nodra bula. Au raica ni ra kaya tiko ni ra gadreva na veika oqo. Meu kila beka vakacava oqo? Ni o veivakasalataki vata kei ira tale eso na qasenivuli kei na nomu iliuliu vakacakacaka, ka veitalanoa vata kei ira na nomu gonevuli, sa rawa ni o na kunea e dua na ka e rawa ni o vakavinakataka cake. E vakarautaki ena ivoladusidusi e dua na kena ivakamacala, e vakarautaka na ivurevure ni vuli e dua na kena ivakatakarakara. Sa dua oqo na kila-ka e rawa mo ni vakatovotovotaka ka vakayagataka, ka vakanuinui mo ni vakavinakataka cake me rawa kina, ki na inaki sara ga e rau sa qai cavuta oti o Baraca Willard kei Baraca Whimpey, ena bula ni gonevuli oya, me rawati na inaki, sa ikoya me vukei ira me ra lako mai vua na iVakabula.

Sister Wendy Parker: Ia au nanuma ni veika kece oqo e lesu tale ki na inaki. Na noda inaki e tekivu vei Jisu Karisito. O Jisu Karisito sa ikoya na sala ena kauti keda ki na valetabu, kei ira na noda gonevuli, ka na kauti keda sara ki na bula vata kei na Tamada mai Lomalagi. Na vei tiki yadua… ni parokaramu vou oqo au wilika, e vakanamatataki au vei Karisito. Na vei kila-ka yadua… e vakayavutaki vei Karisito. Vei au oqori e kaukauwa dina. Ia ni‘u veitaratara kei ira tale eso na qasenivuli ka‘u vukei ira me ra vakatorocaketaka na veika vata oqo, na iyaya oqo ena… vakayaco veisau ki na noda parokaramu ena dua na sala vinaka, kei ira na gonevuli kau vakavinavinaka kina. Ka‘u vinakata ga me‘u vakavinavinaka kina vakalevu.

Brother Whimpey: Au kina ni o Shadrack—mai na wasewase ena Ra kei Aferika. Sa sotava oti o Shadrack e dua na gauna ena nona vukea e dua na gonevuli me sotava na veika vata oqori e valenivuli. Au vakabauta o Shadrack, ni o wasea qori, e rawa beka ni o wasea vata kei keimami kece?

Baraca Shadrack Bentum: Io, Baraca Bert, vinaka. E dua na gone ena noqu kalasi dau mamadua sara ka sega ni rawa ni dau wilivola ena kalasi, taro, se saumi taro. E yaco tiko qo me yacova noqu qai vakayagataka na ivakavuvuli ena “Know Each Learner’s Name, Circumstances, and Learning Needs,” ni vakabibitaki tiko na kila matai ni “Observe and Ask about Students’ Interests” ena iulutaga na “Teacher Development Skills.” Au dikeva ni dua na gonevuli e dau lako ga mai ki koronivuli me mai vuli me baleta na kilakila mada kei na veitarogi ni koronivuli. Au mani kauwaitaka na lesoni eso e vulica tiko, ka keirau veitalanoa kaya ena so na gauna me baleta na nona vuli. Au qai mani kila ni tiko e dua na nona itokani vinaka ena noqu kalasi. Au mani dau biuti koya e veigauna ena ilawalawa vata e tiko kina o nona itokani ena itaviqaravi vakailawalawa, ka‘u dau vakayagataka vakavuqa me baleti koya. Sa mani tekivu vakamalua mai na nona dau wiliwili ena kalasi, sauma na taro, ka wasea na veika e sotava. Ena dua na nona vosa a kaya kina, a wasea ni a dau mamadua sara ena kalasi, ia qo sa tekivu me dei mai na yalona. Ena gauna oqo sa dau vakaitavi ena kena vakaraitaki na itavilesi ki na kalasi ena vuku ni nona ilawalawa, ka dau dua vei ira na liu yani ki na nona kalasi. Sa yaco me vinaka cake vua na gauna ni vuli.

Sister Scott: Au vakabauta oqori sa kauti keda vakavinaka sara ki na dua na taro e tiko vei Baraca Douglas Franco. O koya e cavutu mai na yasayasa ena Vuaira ni Ceva kei Amerika, ka da na sureti Baraca Franco me taroga mai na nona taro.

Baraca Douglas Franco: Vinaka. Ni sa bula kece. Io, na noqu taro e semati ki na itavi ni qasenivuli, kei na veika e sotava o koya e vuli. Eda na kila vinaka vakacava ka vakadeitaka ni veika eda vakayacora tiko ena kalasi sa vukei ira tiko na gonevuli me ra vakila na saumaki mai, e veiganiti kaya, kei na nodra vakaitaukei taki? Me kena ivakaraitaki, e dua na kalasi yavutaki vei Karisito eda vakavulica tiko e rawa ni veivuke ena saumaki mai, ia ena gauna vata talega oya, na veivakavulici ena yalo e rawa ni veivuke talega ena saumaki mai. Me da vakadeitaka vakacava oqo me rawa ni da vukei ira kina na noda qasenivuli, ni tu vei ira na taro oqo, se ni ra vinakata me ra vakavinakataka cake na veivakavuvuli oqo?

Borther Willard: Brother Franco, tukuna mada vei keitou na vanua o veivakavulici kina. Na vanua cava o vakasaqara tiko?

Brother Douglas Franco: Vinaka. Au veivakavulici tiko ena Institute of Bolivia, Cochabamba, Bolivia.

Brother Jason Willard: Totoka Baraca Franco. Sa dua na ka vinaka ni drau rawa ni tiko kei keimami nikua. Baraca Franco, au vakabauta ni o sa toso vinaka tiko ena kena kilai ni sa yaco tiko ena nomu kalasi na saumaki mai va qo. E rawa beka ni o vakasamataka e dua na gauna o vakila kina ni vakavulici iko tiko na Yalo Tabu ni vei gauna ni saumaki mai vaqori sa yaco tiko ena nomu kalasi?

Brother Douglas Franco: Io. Au kila ni so na gauna era tukuna na veika oqo na gonevuli—so na gauna ena kalasi se ni oti na kalasi. So na gauna era volavola mai vei au, ena WhatsApp, me kena ivakaraitaki, ka ra kaya, “Baraca Franco, vinaka vakalevu na veivakavulici, au vakauqeti me‘u kitaka oqo.” Au vakauqeti meu cakava na veika oqo.” Eso tale ena kalasi, au raica ni ra volavola tiko, ena gauna mada ga au sega kina ni solia vei ira na idusidusi me ra vola e dua na ka ena ivolaniveisiga, na ivolaniveisiga ni vuli. Era sa volavola ga. Na nodra ivukivuki e vakaraitaka ni ra vakila tiko na ka oqo. Au nanuma ni oqo e dua na ka au rawa ni tukuna.

Brother Jason Willard: Totoka sara oya. E vakananuma lesu vei au na tolu na vosa oya a vakavulica vei keimami ena vuqa na yabaki sa oti o Elder Bednar me baleta na kila-ka vinaka na vakadidike kei na vakarorogo ni da veivakavulici tiko. ⁵ Vei au oya sara ga na ibalebale ni veika o se qai wasea vei keimami. O a raica eso na ka se dikeva eso na ka a yaco ena gauna ni kalasi se ni oti na kalasi. Ia ena vuku ni vakadidike oqori, e vaka ni vakavulica tiko vei iko na Yalo Tabu e dua na ka a yaco nikua ka bibi sara. Baraca Franco, na cava me na vakayacori me vakarabailevutaki tikoga kina? Na cava e rawa ni o cakava me (alametar?) vosota, au sega ni kila na vosa oya. (Dredre malua)Na cava mo cakava mo vakatubura kina na madigi me yaco oya vakalevu cake ena nomu kalasi?

Brother Douglas Franco: Au sa vakasamataka tiko, io, e levu tu na ka. Au vakasamataka tiko na iyaya ni cakacaka ni vakadidike. Au vakabauta ena veivuke oya, me‘u dikevi mai vua e dua tale, na itokani se dua tale, noqu liuliu vakacakacaka, me rawa ni‘u vakila ka… kunea na veika me‘u cakacaka taka. Ia ena gauna vata talega oya, na iyaya ni cakacaka oqo ka soli vei ira na gonevuli esa veivuke talega… keimami sa vakayagataka tiko. E vakasakiti ni da raica na veika era vakila, na ka era tukuna, ena kalasi, na nodra nanuma me baleta na qasenivuli, na kalasi, kei na noda itavi. E vakasakiti. Eda raica na vuana ka da kaya, “Oilei, oqo na ka e dodonu me‘u cakava.” Se qo beka na ka au sa cakava vinaka tiko. Au vakabauta ni rawa ni veivuke oqo, ia ena gauna vata oqori, ni‘u tukuni au tiko, rairai ni‘u solia tiko beka na noqu vinaka duadua me vaka o ni sa cavuta oti taucoko, me‘u liutaki mai na yalo. Malele kina na veika era cakava tiko kei na nodra gagadre kevaka ena veivuke na veika au cakava tiko mera vukei kina.

Brother Jason Willard: Brother Franco, vinaka vakalevu sara. Ni o wasea na ivakadinadina oya, na gagadre mo vinaka cake, au vakila ni vakadinadinataka vei au na Yalo Tabu na levu ni nona lomani iko na Tamada Vakalomalagi, kei ira na qasenivuli vakataki iko e vuravura taucoko. Ni da solia na noda vinaka duadua me da lomana na Kalou, ka lomani ira na Luvena, ena vakalougatataki keda o Koya, ka na vakavotuya mai o Koya se da sa vakaevei tiko ena kalasi oya, ka na solia o Koya me da kila kevaka sa yaco tiko na veigauna oya ni saumaki mai, na veika e veiganiti kaya, na nodra vakaitaukei taki, me vukei ira kece na itabagone kei na itabagone qase cake me ra toro voleka mai vei Jisu Karisito. Baraca Franco, kei kemuni kece, vinaka vakalevu ena vukudra kece na itabagone o ni sa vakalougatataka tiko. Au taleitaka na nomuni wasea tiko na veika o ni sa sotava.

Brother Douglas Franco: Vinaka.

Sister Newbold: Brother Willard, au lomana— Vinaka. Na veitalanoa oya vata kei iko, vakakina o Brother Franco, ka‘u vakavoqataka na vakavinavinaka kei na loloma vei iko kei ira kece na noda qasenivuli. Au a vakasamataka tale tikoga e vica na ka me baleta na saumaki mai, na kena veiganiti kaya, kei na kena vakaitaukei taki. Au nanuma ni sa ka bibi sara. Era levu vuqa na kerea tiko na veituberi ena veika vata oqori ka me da nanuma tiko ni saumaki vua na iVakabula ko Jisu Karisito kei na Tamada mai Lomalagi, na kena veiganiti kaya, kei na kena vakaitaukei taki era vua ni veika eda a cakava tiko me baleta na veivakavulici. Ia kevaka era sega ni raica rawa na kena yaga ki na nodra bula, ena dredre sara me ra rawata na kila era gadreva. Na Yalo Tabu sa ikoya ena vakayacora na veika oqori.

Sister Scott: totoka na italanoa e wasea o Jamie Scott. Sisita Scott, e rawa beka ni o wasea talega vata kei keda nikua?

Sisita Jamie Scott: Au na taleitaka sara. Ni‘u vakanamata tiko vei ira na qasenivuli Vakarisito, au sega ni vakatabakidua ki na dua ga na iwalewale se ivakarau, ka me tarai cake na vakabauti Jisu Karisito ka yaco me vakataki Koya vakalevu cake. Ena dua na siga ni‘u veivakavulici tiko, au a vakauqeti me‘u tarogi ira na noqu gonevuli, “Na mataqali lesoni vakacava ena vukei iko mo voleka cake vua na iVakabula?” Mai vei iratou kece na va na noqu kalasi, a cavuti na sereivakatagi. Keimami sa mani duavata me na dua na siga me keimami na vulica kina na veika me baleta na iVakabula ena sereivakatagi. Ka ra rawa ni wasea na gonevuli e dua na serenilotu se sere, kei na dua ga na ka ena rawa ni vukea na nodra toro voleka vei Jisu Karisito. Ka so vei ira era vakatagitaka e dua na iyaya ni ivakatagi. Eso vei ira era kerea me‘u vakatagitaka e dua na sere ena sipika kabi e lalaga. Eso vei ira era lagasere. E a levu na veimataqali serenilotu kei na sere. Ia ni bera se ni sa oti na nodra wasea na sereivakatagi, era vosa ka wase ivakadinadina me baleta na noda Turaga ka iVakabula. Sa dua dina na siga era vakila kece kina na Yalo. Eso tale era wasea na veika era vakila sara tikoga e kea ena gauna oya. Ka so e a vakananumi ira na yalo me baleta na dina era a kila tu ena vei gauna sa oti. Ka vakadinadinataka tale vei ira na yalo na dina oqori.

Ka tiko e dua na cauravou e dau tiko ena semineri, ia e sega ni via tiko ekea. A laveta na ligana ka kaya, “Au sa sega tu ni vakila na Yalo sa sivi qo e va na yabaki. Ni vakatagitaka o Ben na serenilotu oya,” sa ikoya “Au sa Kila ni Bula Tu,” ena nona viola, a kaya o koya, “Au vakila na Yalo ka sa totoka dina.” Ka‘u sa vakavinavinaka kina vakalevu ni kila sara ga vakavinaka na Turaga na ka e gadreva na Nona digitaki. Au vakavinavinaka ni ia na vakarorogo ka tarogi na ka era vinakata, me vakila kina e dua na turaga oqo na nona loloma na iVakabula ka kilai koya, ka ni lomani.

Sister Becky Scott: Vinaka na veiwasei. Baraca James, o laveta tiko na ligamu.

Brother James: Isa, vinaka. Au via vakuria na veika sa tukuni oti me yacova mai qo. Na veika sotavi oqo e vakasakiti sara vei au. Au sa tovolea me‘u vakayagataka na iyaya ni vakavakarau, iyaragi ni vakadidike, sa soli vei ira kece na gone ena gauna sa oti. Kau vakayagatak oqori ki na noqu kalasi, ka ivakatakila vei au—me vaka ga au sa vakavulici kina nikua na ivakarau ni veika oqo sai koya me vukei keda meda ciqoma vakalevu cake na ivakatakila ena veitikina oqo me rawa ni da vinaka cake.

Au vinakata me‘u wilika e dua na ka a tukuna e dua na gonevuli ena noqu kalasi ena veitarotarogi oqo me baleta na veika e veiganiti kaya ena kalasi, veika e sotavi (sega ni rogoci). Ni oti na veitarotarogi, ka‘u vakasotara vata tiko na iyaragi eso e vakasokumuni mai. Ka‘u mani sotava na iyatuvosa oqo mai na dua na taro era a sauma na gonevuli. A kaya na gonevuli, “E veiganiti dina vei au na kalasi baleta ni vukei au o qasenivuli me‘u veiwekanitaka na iulutaga vakosipeli au sa vulica, ka vakaitaukeitaki ki na noqu bula.” Kei na kena e tarava eke e tukuna na veika au rawa ni vakayacora me vukea me vinaka cake. E kaya o koya, “Au vinakata na noqu qasenivuli me vakaitavitaki au ena veitalanoa vakalasi ka taroga talega vei au na taro.”

Sa ikoya oqo na veika au na sega ni rawa ni biuta (sega ni rogoci) ka vakasotara vata na veiyaragi oqo ni‘u vakadikevi mai vei ira na noqu gonevuli, noqu iliuliu vakacakacaka, kei na noqu dikevi au vakataki au, sa dolava na mataqu ki na veika au gadreva me‘u vakavinakataka. Ka‘u rawa ni kaya ni 25 na kila-ka oqo kei na kena cakacaka era vakasakiti, ka rawarawa ni vakayagataki sara mada ga ena lesoni. Vinaka.

Brother Wilkins: Au vinakata ga me‘u wasea vakatotolo na kena cokoti vata e dua na vakanamata ena inaki, ia e dua talega na vakanamata ena kila-ka. Ena siga oya ena kalasi, keimami a vakayacora tiko e dua na veitalanoa yavutaki Vakarisito baleta na veivutuni. Ka sega ni veivutuni ga baleta na itovo, ia na ivakavuvuli oqo ni rawa ni da gole vei Karisito ka kerei Koya me vaqaqacotaka na noda malumalumu. Ka‘u sa vakasamataka tale tikoga me baleta eso na kila-ka oqo mai na iyaragi eso ni veituberi. Ka niu saravi ira tiko na gonevuli ni ra veitalanoa tiko, sa raica e dua na goneyalewa—au vakanamata tikoga vua baleta na kila matai oqo. Au saga tiko meu raici ira e matadra ka taroga na taro veisemati. Ka‘u raica ni vaka me qusia na matana. Kau vakila e dua na veivakauqeti meu taroga na taro veisemati ka kaya, “Nikki,sa rawa beka ni o wasea na veika e vakavulici iko na Yalotabu?” A dolava na yalona na goneyalewa oqo, tagi ka kaya ni sa ciqoma e dua na isau ni masumasu yabaki lima, ni sa tovolea tiko me veivutuni ia a sega ni bau kerea na Turaga me veisautaka na yalona.

Ni‘u vakanamata sara toka ga ena inaki ena gauna taucoko ni veitalanoa vakalasi yavutaki Vakarisito, totoka dina. Ia ena vuku ni vakanamata oqo ki na dua na kila-ka, au marau ni‘u vagoleya tiko na noqu vakasama ki na vei kila-ka me‘u taroga e dua tale na taro veisemati, me‘u raica vakadodonu yani na matadra na tamata. Baleta ni taura e dua na ka sotavi ka vinaka sara, ki na dua na ka sotavi ka na veisautaka na bula. Vei au, oqori e solia na veisau ena vuna e itekitekivu kina na inaki, ia na vakanamata ki na kila-ka e rawa kina vei keda me da vukea me tatara vakatitobu na inaki oya.

Sister Becky Scott: Vinaka, Baraca Wilkins. Na veisemati vakatamata ena veiraici vaka mata kei na dua na tamata ena sureti koya me sema mai vei iko, ka yaco me kilai iko. Sa dua na ivakaraitaki vakasakiti. Baraca Mark Espidita.

Brother Mark Espidia: Au a tekivu vakayagataka na iyaragi ni vuli a soli vei keimami rauta ni rua na vula sa oti me baleta na noqu ivakatakarakara vou ena Laca ni veituberi vakodineita. Ka‘u a veidutaitaka tiko na ivakarau era sotava kina na qasenivuli na veika au a tabaka ena noqu veituberi sa oti, ena kena vakayagataki na iVolavakarau makawa ni iVoaladiusidusi ni Veivakavulici kei na Vuli Vakosipeli. Ka sega soti ni levu na veitalanoa ena papa ni veitalanoa. Ia ena dua na gauna walega oqo, ni‘u tekivu vakayagataka na iulutaga eso oqo ena ivolavakarau vou, au raica ni ra vakaitavi cake vakalevu na qasenivuli, era tadolavi ira vakavinaka ena veiwasei ni veika era sotava.

Au vinakata me‘u wasea e dua na vakasama, mai vua e dua vei ira na noqu qasenivuli. Oqo e dua na veituberi au a vakayacora ena vica na macawa sa oti. Oqo ena nomu masulaki ira o vakavulica ena yacadra. Ka‘u ciqoma kina e vuqa na vei vosa talei ka vakasakiti. Kei na dua na ka e kaya e dua vei ira na qasenivuli sa ikoya, au na wilika ga na vosa cauraki mai oya. E kaya eke, “Oqo e dua na ivakananumi cecere vakaqasenivuli, ena so na gauna eda sa rui dau nanamaki me da vakavulici ira na gonevuli ka laiva me ra vakila na yalo ena kalasi ena noda vakavakarau. Ia, na ka bibi na ivakarau me moici kina na itukutuku me vaka na nodra gagadre. Era gadreva na gonevuli e dua na itukutuku e veiganiti kei ira. Oqori na vuna e rawa ni vakayaco duidui kina na veimasulaki vei ira ni da vakarautaka na lesoni me baleti ira. E solia vei keda e dua na sala ka rawa ni dusimaki keda kina na yalo me da vosa ka veivakavulici.” Au a sega dina ni raica ni na vakayacora e dua na veisau levu vei ira. Au nanuma kina ni iyaragi era tu eke era na veivuke sara vei ira na noda qasenivuli. Sa ikoya o ya.

Sister Scott: Brother Kevin Brown, o na marautaka beka mo veiwasei vei keimami?

Brother Kevin Brown: Au vakila vakaukauwa ka marautaka na iwalewale vakaivakatakila ka ologi vata koto ena veituberi kece oqo kei na iyaya kece ni cakacaka eda sa ciqoma. Kila, au vola tiko ena noqu idusidusi, ni kevaka au kunea e dua na ka, au nuitaka mai vua na Yalo Tabu, vakauasivi na ka au vulica ena Yalo Tabu, kei na ivurevure oya, e vakacava na totolo kei na vakainaki ni veika au cakava ka veisau se vakayagataka? Sa ikoya, kila, e dua a kaya e liu ni Yalo Tabu sa ikoya e tauyavutaka na veika e veiganiti kaya vei ira na noda gonevuli. Ia e lauti au nikua ni Yalo Tabu talega e tauyavutaka na veiganiti vua na qasenivuli. Na veika au vulica ena yalo me‘u cakacakataka se vakayagataka, e dodonu me‘u vakayacora vakatotolo. Ka‘u vakila vakaukauwa ni da vakayacora vakakina, ena yaco na cakacaka mana ena valenivuli. Ka ra na vakadinadinataka oqori na qasenivuli.

Sister Becky Scott: Vinaka vakalevu na nomu wasea mai na itukutuku qori vei keimami. Se vo e dua ka laveliga tiko. Brother Castro, o na marautaka beka mo veiwasei vei keimami?

Brother Castro: Io Sisita Scott, vinaka. Au vakasamataka tiko, io ena noqu vakasama a yaco mai e dua na vakanananu se dua na ivakavuvuli nei Elder David A. Bednar. E kaya o koya, “E dua na ka na noda kila ni o Jisu Karisito e a lako mai ki na vuravura me mai mate ena vukuda. Oqori e taumada ka yavu ni ivunau i Karisito. Ia sa dodonu vaka kina vei keda meda taleitaka na gagadre ni noda Turaga, mai na Nona Veisorovaki kei na kaukauwa ni Yalo Tabu, me mai bula e yaloda—sega wale ga ni mai dusimaki keda ia me vakaukauwataki keda talega.” ⁶ Oqori na ka au vakila nikua, ni gadreva dina na Turaga me vukei keda ena cakacaka cecere oqo. Ka da rawa ni vukei ira na noda itabagone, eda rawa ni da vukei ira na noda qasenivuli kacivi me tautauvata na ka era vakila.

Sister Becky Scott: Vinaka vakalevu sara Baraca Castro. Vinaka vakalevu vei kemuni kece o ni sa vakaitavi nikua. Eda sa rogoca na ivakadinadina vakasakiti ni sala me da vakayagataka kina na veika eda sa veitalanoataka tiko nikua ena dua na sala vakatamata yadua. Au vinakata ga me‘u vakuria kina na noqu ivakadinadina. Ka‘u kila ni kauwaitaka o Koya na noda dui vakatorocaketaki yadua, kei na noda rawata me da semati keda vei ira na itabagone kei na itabagone qase cake eda vakavulica. Au kila ni na veivuke o Koya vei kemuni yadua ni vakayagataki na iyaya duidui oqo eda sa veiwasei kina ena sala e baleti iko ga; ni o Karisito, kei na Yalo Tabu, ena tukuna vei iko na veika mo cakacaka kina; na veika saraga oqori e gadrevi mo ni cakacaka kina, me vaka e vakaraitaki ena noda veiwasei nikua, sai koya saraga na ka e gadreva mera rogoca. Ka ena vukumu, ena rawa kina me ra lako mai vei Karisito. Au wasea na noqu ivakadinadina ena vuku ni veika oqo, ena yaca tabu i Jisu Karisito, emeni.