21120:32

Na Kosipeli i Jisu Karisito E Veivakurabuitaki

2022 S&I Vuli Kaburaki Vakayabaki vata kei Peresitedi Ballard

Elder Clark G. Gilbert

Ena Vitusagavulu

Vakaraubuka, 21 ni Janueri, 2022

Ai Vakamacala Taumada

Me‘u tekivu ena noqu vakaraitaka na noqu vakavinavinaka ena veika ko ni vakayacora tiko me ra laveti kina na itabagone kei na tabagone qase cake ena Lotu. Era sa tiko ena nomuni kalasi o ira na i sausau vou ni Lotu, ka‘u sa vakauqeti ena sala ko ni veiqaravi ka kauwaitaki ira tiko kina na nomuni gonevuli. Kemuni na taciqu kei na ganequ, na kosipeli i Jisu Karisito e veivakurabuitaki.

Nikua au vinakata me‘u vosa ena sala eda rawa ni vakavulica vakavinaka kina na vakabauta, ivakadinadina, kei na ituvaki veivakurabuitaki ni kosipeli i Jisu Karisito.

Me tauyavutaki na noqu ulutaga, au na vakamacalataka e dua na droini kau dau qoroya ia e vaka me‘u dau vakawaletaki ena so na gauna. Ena vuqa na yabaki sa oti, au a ciqoma e dua na i vakasala mai na dua na itokani ka cakacaka tiko ena Vanua ni Maroroi iYaya Makawa e Boston. A vakatututaka ni ke o vakaliliga na droini ena nomu vale, e bibi mo veitosoyaka va gauna me levei kina na kena na rawa ni “tabogo” mai vei iko. Na watiqu kei au keirau sa dau qoroya mai vakabalavu na droini nei Caravaggio ka vakatokai na The Calling of St. Matthew.[Na Kacivi nei Maciu] Baleta ni a dau lili toka ga ena dua na vanua e vale na droini oqo me vica vata na yabaki, au a sega soti ni dau qoroya na kena totoka. Ena vula i mago oqo, au a kauta na droini ki na noqu valenivolavola ena itikotiko liu ni Lotu. Ia, ena noqu raica ena kenai tokatoka vou e sa vakavuna me‘u tu ka vakananuma tale na kena caka vakamatau kei na kena bibi vakayalo. Ena Luke eda wilika na veika me baleti Maciu ka tukuni kina, “Sa oti na veika oqo, sa lako yani ko koya, a sa raica e dua sa kumuna nai vakacavacava, ko Livai na yacana, a sa tiko ena vale ni vakacavacava, a sa kaya vua, Muri au. A sa biuta na ka kecega ko koya, ka cavutu, ka muri koya.” ¹ E matalia, ni o Caravaggio e a cakava na nona droini me vakaraitaka na gauna e a vakatetea kina o Karisito na nona kaci, ia ni berana nona tacake o Maciu me veisotari mata kei nai Vakabula. O na rawa ni raica na dodo yani ni liga i Karisito kei na rarama ka cila kosova na rumu, ki vei Maciu ena mua ni teveli ka sa toka ga na ligana ena nona ilavo. E katona vinaka o Caravaggio na gauna sara ga a vakayacora kina o Maciu na nona digidigi me sa biuta na ka kecega ka muri Jisu Karisito. Ena vei gauna taucoko au dau tu kina vakadua ka vaka raica na droini oqo au dau kurabuitaka na kena itukutuku.

Kemuni na taciqu kei na ganequ, na kosipeli i Jisu Karisito e veivakurabuitaki! Na sucu, bula, ilesilesi, Veisorovaki, kei na Tucaketale ni iVakabula ko Jisu Karisito e i talanoa vakasakiti duadua me bau talanoataki. Ia, ena gauna drakidrakita oqo, ² eda rawa ni lakosivita na itukutuku veivakurabuitaki oqo ena gauna madaga eda vakasaqaqara kina me da vukei ira na tani era leqa tu. Me vaka e qai vakavulica oti tokaga oqo o Peresitedi Nelson: “Kemuni na taciqu kei na ganequ lomani, are oqo na iotioti ni gauna. Kevaka me daru na vorata na vei ka rarawa ena veisiga ni mataka kei na oca, sa ka bibi me tiko na noda dui yavu vakayalo tudei e taracake tu ena vatu ni noda Dauveivueti, o Jisu Karisito.” ³

Saumi Taro Ni Vakabauta Nodra Na Gonevuli

E daidai, e vuqa vei ira na noda gonevuli era sotava tiko na bolebole ni vakabauta ka vakavuna me ra lomatarotaro taka na kosipeli vakalesui mai, na dina ni iVola i Momani, ka vakakina na veitokoni ni Kalou ena nodra bula. Na itukutuku tabaki ena initaneti ka veisaqasaqa kei na kosipeli e vuqa tu. Na vei ivurevure oqo era sega ni vakavuna kece na veilecayaki ni vakabauta, ia era rawa ni vakalevutaka na lomatarotaro sa tiko rawa ka vakavurea eso tale na ka vou. Me‘u wasea mada na kedratou i talanoa e tolu na tamata ka rawa ni o na raica ni ratou na kunei ena nodra bula na nomu gonevuli.

Stephanie:O Stephanie e a susu ena Lotu ia a vakila ni dau vakuwai mai na nona tabanalevu kei na nona isoqosoqo ni veitokani baleta na leqa ni vakawati ka rau sotava tiko nona itubutubu. Ni toso na gauna, sa tubu kina na yalo ca, ka beitaka kina o koya na Lotu ni vakavuna. Sa tekivu o Stephanie me vakasaqara na ivurevure eso ka veisaqasaqa kei na Lotu, ka vakanamata ki na vakadiloi nei Josefa Simici ia sega ni kauwaitaki kina na ivakadinadina ni nona itutu vaka parofita. Sa vakayagataka toka oqo o Stephanie na sala ni vakau itukutuku raraba me saqata kina, ena nona rai, na vakabauta cala ka makawa nodra na nona itokani. Oqo sa qai tosoya cake ga na nona cudru, ka vakavuna oqo me malele ka kabita na ivakavuvuli se ilawalawa ka veisaqasaqa kei na Lotu.

Tevita:Na lomatarotaro nei Tevita e vakagolei vakakina ki na itukutuku makawa ni Lotu, ia na nona ituvaki e duidui sara vakalevu. A tekivu o koya ena yalodina, ia ni oti na nona kaulotu a tekivu me vaka taroga na vei taro eso me baleta na ulutaga ka sega ni se kila vinaka ni bera na nona kaulotu. Na vei taro oqo a muataki koya ki na vei ivurevure ka veisaqasaqa kei na Lotu, ka mai veilecayaki yani kina ena nona ivakadinadina kei na ka e vakabauta dina. Dina ni a sotava o koya e vuqa na ivakadinadina ni dina ni kosipeli, a sa yaco me sa cegu na nona dau vulica na nodra vosa na parofita bula ka sa cegu talega na nona wilika na iVola i Momani o Tevita. Sa tekivu me rogoca o Tevita na domo tale eso ena nona vakasaqaqara vakayalo. A sega ni cata o koya na Lotu, ia a veilecayaki ka mai paralase yani kina, ka mai muataki koya yani ki na lutu sobu ni nona vakaitavi ena inisitute kei na lotu ena Sigatabu.

Connie:O Connie a sega ni tiko vua na yaloca i Stephanie se na paralase nei Tevita. O koya a sotava tiko na dredre ni bolebole ni bula ka semati ki na nodrau sa qai veibiu ga na nonai tubutubu kei na ivakarau ni veivakararawataki vakavosa kei na kena vakayalo ena nona itikotiko. Na rarawa oqo a mavoa kina ka tekivu me vakasaqara na kena i wali. Ia e a sega ni vakasaqara na kena i wali mai na kosipeli i Jisu Karisito, e a vuki yani ko koya ka goleva na veitokoni sega ni vakalotu me kauwaitaki ka kilai vinaka kina me vaka e a gadreva vakalevu. E a veitokoni vei ira era sotava tiko na bolebole ni leqa ni vakasama, na leqa ni LGBTQ, kei na dua ga e sotava tiko na rarawa kei na veilecayaki. E a kune vakacegu o Connie ena ilawalawa vakaoqo, ia a kunea talega kina eso na taro vou. E dau beitaka na Lotu o koya kei ira na nona itokani me baleta na veika dredre era dau sotava, ena vakanuinui ni kevaka era na vakanadakuya na lawa ni Kalou, ena qai lako tani na nodra mosi. ⁴ E sega walega ni mai oti nona vakaitavi ena Lotu kei na inisitute, ia sa tekivu talega me vakaitovo taki koya ena itovo ena nanuma o koya ni na veivuke me vakanunutaki kina na nona mosi ka rawa kina na levei na sala dredre ni veisau kei na vosoti ira na tani.

O ira yadua na gonevuli oqo era sotava tiko na veibolei ni vakabauta, ia na ituvaki ni veibolei oqori e duidui vei ira yadua. E dua e yaloca ka veisaqasaqa e matanalevu, e dua e veilecayaki ka rogoca na domo tani eso, na kena ikatolu e vesuki ena mosi ka tovolea me vuni mai na ka e nanuma ni sala dredre ena Lotu. E ratou ivakatakarakara ni tabagone ni iTabatamata Z (se iTaba Z) ena nodra sega ni vakabauta na vuli vakaivakarau, na toso sobu ni nodra dau tiko ena Lotu, ka vakauasivi, na vatulewataki ni veika dodonu ka nodra ile ni sega ni tiko e dua na ivakarau tu dei ni tovo e dodonu kei koya e cala. E dua na vakadidike mai na Barna Group e vakamacalataka, “Na vakatulewataki ni veika dodonu e sega walega ni curu mai vakailoa ki na ivakarau ni nodra rai na iTaba Z; ia sa mai ulu ni nodra ile.” ⁵

Ni da qasenivuli ni kosipeli, e dodonu me da vakaraica na sala me da vukei ira kina na gonevuli vakataki Stephanie, Tevita, kei Connie. Na nodra taro kei na kauwai e ka dina ka dodonu me kakua ni vakawaletaki. E dodonu me da sotava na nodra vakatataro ena yalololoma kei na loloma uasivi, ka vakatarai ira me ra taroga na taro ena ituvaki e taqomaki ka veituberi. E gadrevi talega me da toroya cake na noda rawa ni kila vinaka ka sotava na nodra kauwai taucoko. Na ivurevure (S&I) ni Semineri kei na Inisitute ni Lotu, na “Rawati ni Kilaka Vakayalo” e tukuna, “Ena so na gauna eda na kunea na itukutuku vou se na tiko na taro me baleta na ivunau, ivakarau, se i tukutuku makawa ni Lotu ka vaka e dredre me kilai. Na tarogi ni taro kei na vaqarai ni kena isau e tiki bibi ni noda sasaga me da vulica na dina.” ⁶ Na ivurevure oqo ni S&I e vakarautaka na vakasama eso me sotavi kina na nodra taro na noda gonevuli me baleta na vakabauta ena nodra vakavulici me ra 1) cakacaka ena vakabauta, 2) vakadikeva na veivakasama ena rai vaka tawamudu, ka 3) tautauri mai na vei ivurevure nuitaki eso. E a qai tabaka vakakina na BYU Studies e dua na ikure ni ivurevure ka vakatokai Na Vakamamasu ni Dua Na Qasenivulika vakayaloqaqataki ira kina na qasenivuli ni lotu o koya na dauvolaivola me ra vakatavulica na duidui kei na bibi ni noda ivurevure, me levei na vakawaletaki ni noda i talanoa, ka me ra loma rawarawa me ra tokona na kauwai era vakila e vuqa na tamata. ⁷ E vakakina, vei Eric kei Sarah d’Evegnée ena nodrau vakadidike wale ga oqo me baleta na “saumakitale” ka rau vakauqeti keda kina me da vukei ira na tamata me ra walia na nodra kauwai ena sala ena sega ni kauti ira tani mai na nodra veiwekani kei na Kalou. ⁸ E vakakina, na Lotu vakai koya sa vakavurea eso na iUlutaga Vakosipeli ka rawa ni vakayagataki me kilai vinaka ka wali kina na lomatarotaro me baleta na itukutuku makawa kei na ivunau ka dau basika mai vei ira e vuqa na gonevuli. Vakadinata, veitalanoataka, ia kakua ni vakaoti gauna ena ikarua ni taro

Vakadinata, Veitalanoataka, Ia Kakua Ni Vakaoti Gauna Ena iKarua Ni Taro

Au vinakata me matata vei ira kece na qasenivuli ni lotu ni levu na veika vinaka e tiko ena ivurevure e tiko me vukei ira na noda gonevuli me ra ulabaleta na leqa ni vakabauta ka wali na nodra lomatarotaro me baleta na kosipeli. Ia, au sega ni vakadeitaka ni rawa ni da qasenivuli yaga ni kosipeli ena i tuvaki ni bula ni gauna oqo vakavo ga kevaka eda kila tiko na bolebole ni vakabauta era sotava tiko e levu na gonevuli. Ena gadrevi me da tautauri mai na vei ivurevure oqo me vukei kina o ira na gonevuli ena saumi ni nodra taro.

Ia ena nodra vukei na gonevuli me sotavi na nodra kauwai, sa dodonu talega me da na qarauna me da kakua ni vakanamata ki na nodra taro vakatabakidua ni vakabauta ka calata kina na madigi me vakavulici ira ena kena rui veivakurabuitaki dina na kosipeli i Jisu Karisito. Me vaka a vakamacalataka vei au o Brother Chad H Webb: “E vaka na kena tovolei me ra vukei na tamata me ra gole tani mai na kabu butobuto ena nodra vakanamata ki na butobuto.” E sega ni dodonu vei keda me da lecava ni tiko na butobuto, se me da vakanamata vakatabakidua kina. O Elder Lawrence E. Corbridge e vakaibalebale taka o koya ena kena vakatarai na taro mamada eso me ulabaleta na vei taro bibi. Ena dua na vosa ena lotu ni BYU, e kaya o Elder Corbridge:

“Na taro tarava era sa sega ni oti rawa. E ra oka kina na taro me baleta na itukutuku makawa ni Lotu, na vakamau ni dua na tagane ka levu na watina, o ira na kawa kei Aferika kei na matabete, o ira na yalewa kei na matabete, na vakadewataki ni iVola i Momani, na Mataniciva Talei, na DNA kei na iVola i Momani, na vakamau vakamataqali vata, na itukutuku duidui eso ni iMatai ni Raivotu, kei na vuqa tale.

“Kevaka o sauma na vei taro bibi taumada, na veitaro eso ka salavata sa na saumi talega, se era na sega soti sara ni bibi, ka o na rawa ni lewa matau na veika o sa kila vinaka kei koya e sega, kei na veika o duavata kina kei koya o sega ni duavata kaya ka mo na sega ni ko na lako tani kina mai na nomu vakabauta.” ⁹

Io, mo rogoca na nodra kauwai na nomu gonevuli, bulia e dua na ituvaki taqomaki me ra taroga kina na nodra taro, ka tautauri mai na ivurevure eso e nuitaki. Ia ni vakayacori tiko oya, kakua ni calata na ituvaki veivakurabuitaki ni kosipeli i Jisu Karisito. Me vaka na noqu italanoa ni droini vakasakiti nei Caravaggio, kakua ni calata na ituvaki veivakurabuitaki ni veika ka tu sara ga e matamu. E dua tale na sala e rawa ni da vakasamataka sa ikoya e dua na mate ni mata, ka dau yalana na veika taucoko eda raica vakavo saraga na ka tiko ena tutu ni matada. O ira ka tauvi ira na mate oqo e dau yaco me ra dau “vakaisosomi taka” na veika era sega ni raica ka tu e matadra ena ivakavakadewa ni veika era raica ena tutu ni matadra. Kakua ni vakatara na nodra rai yalani nomu gonevuli me baleta na ituvaki veivakidacalataki ni kosipeli, me vakacala na veika e tiko saraga e matadra. Me vaka e vakavulica o Peresitedi Oaks, “Vakavoga kevaka eda yavutaki ki na vei dina oqo me [uto] ni noda vakatutu kei na veika eda nanuma ni dina, eda na sega ni rawa ni vakadeitaka ni veika eda nanuma e dina.” ¹⁰ Me ivakaraitaki, na noda sasaga veivakauqeti mada ga me da “buli vakasama vou ni inisitute” ena druka kevaka eda calata na uto ni vakanamata oqo. Keitou sa vakauqeti kemuni mo ni vakalevutaka na veiwekani, na kena rawati, kei na kena taukeni ena nomuni veivakatavulici. Ia na veisasaga vakaturaga oqo ena yaco me i karua ni taro kevaka e sega ni okati kina na ivakavuvuli ka itakele ni saumaki vei Jisu Karisito. Na yavu vakayalo ka yavutaki vua na i Vakabula sa ikoya na sala duadua ga era na ulabaleta kina na veika vakarerevaki kei na oca ena i otioti ni siga. ¹¹

Na Kosipeli i Jisu Karisito E Veivakurabuitaki

Au sa vakaraitaka oti vakavica ni kosipeli i Jisu Karisito e veivakurabuitaki Au rogoca taumada na kena cavuti na vakasama oqo mai vei Elder Jeffrey R. Holland ena nona a vosa tiko ki na dua na ilawalawa qasenivuli ni lotu ena nodra i tavi tabu me ra vakavulica na kosipeli i Jisu Karisito. Na ituvaki veivakurabuitaki ni kosipeli a cavuti vua na iVakabula Vaka iKoya ni a veivakavulici ena valenisoro ki vei ira na tawa vakabauta: “Ia ni sa yaco na siga ni vakacecegu, sa tekivu ko koya me vakatavuvuli e vale ni lotu: a ra lewe vuqa ni ra sa rogoca era sa kurabuika kaya, Sa rawata mai vei ko koya oqo na veika oqo?” ¹² Ena i tinitini ni i Vunau ena Ulunivanua, eda vulica kina ni “a sa yaco ni sa tinia na vosa oqo ko Jisu, era sa kurabuisara na lewevuqa ena nonai vakavuvuli.” ¹³ O Lamonai ena iVola i Momani e a “kurabui vakalevu” ena yalodina i Amoni. ¹⁴ Ena ivakaraitaki eso oqo kei na vuqa tale, na vosa kurabui e vakayagataki vei ira na tamata era sotavi dredre ena vuku ni vakabauta ia e muri era a qai kila na kaukauwa kei na mana ni kosipeli. Eda raica na veika oqo ena iVola i Ilamani, era sa kurabui vakalevuka lutu ki na qele; ni ra sega ni vakabauta na vosa sa tukuna ko Nifai.” ¹⁵ E lako mai na ka veivakurabuitaki ni sa sota na sega ni vakabauta kei na ituvaki mana ni ivakavuvuli ni kosipeli i Jisu Karisito. Oqo e dina vei ira kece era veimulomulo tiko kei na vakatitiqa, ka na dina vei Stephanie, Tevita, kei Connie, me vaka sa tukuni taumada. Era na ulabeleta walega na yaloca, veilecayaki kei na mosi era vakila ni ra sa kau mai ki na i tuvaki veivakurabuitaki i Karisito Vaka iKoya.

Kemuni na taciqu kei na ganequ, yalovinaka ni rogoca ka lomana ka kauwaitaki ira era veimulomulo tiko kei na taro eso me baleta na vakabauta. Vakayacora ena yalo ni loloma ka vakavurea e dua na ituvaki taqomaki vei ira kece na vuli, ka dusimaki ira ki na ivurevure nuitaki ka veivuke me wali na nodra kauwai. Ia me da kakua ni lecava na isau ni taro veivakurabuitaki ki na taro bibi taumada ni kosipeli i Jisu Karisito.

Me da qai “veitosoyaka na droini” ena noda bula ena sala ena vukei ira kina na noda gonevuli me ra tu ka vakananuma na ituvaki veivakurabuitaki dina ni iVakabula ka tu sara ga e matadra. Sa dina sara, ni na tu na bolebole–oqori e tiki ni noda ilakolako ena bula vakayago. Ia me da vukei ira na noda itabagone me ra raica na sala eso ka veisautaka kina o Jisu Karisito na gaunisala ena nodra bula na luve ni Kalou.

Me ivakaraitaki, au kurabuitaka na sala era a kubeta kina na kosipeli i Jisu Karisito o ira na itabagone ena loma ni siti o Boston kei na sala e kauti ira kina ena kaulotu, muataki ira ki na koliji, ki na vakamau ena valetabu, kei na itavi vakai tubutubu kei na veiliutaki ena Lotu. E via dredre sara na vakasamataki ni veika a yaco ki na nodra bula ni raici lesu na vanua era a tekivu mai kina. Au kurabui niu vakasamataka e dua na tama ni gone e San Antonio keirau a sotava kei Sister Gilbert. E rerevaka o koya ni na sega ni rawa ni tautauvata mai kei na veika e namaki ena kosipeli. Ka mai kilai talega, ni sega ni dua vei keda e uasivi sara, oqori e yaco ga ena vuku i Jisu Karisito ni rawa ni yaco meda vinaka cake vaka tamata yadua. Oqo ko brother Luis Vargas kei watina, ko Andrea, kei luvedrau yalewa, ko Sofia, ena bogi ka yalataka kina me sa papitaiso ni oti e lima na yabaki na nona sota tiko kei iratou na kaulotu. Au kurabui ena noqu vakaraica na nona veisau kei na vakabauti Karisito. Au a kurabui ni‘u sotavi noqui tokani o John Raass ka a tiko e taudaku ni Lotu me 30 na yabaki dina ga ni a ivakaraitaki yalodina tiko o watina kei ira na luvena. Ena dua na gauna ni yalomalumalumu, donuya e dua na leqa vakavuvale, o Baraca Raass a kerea e dua na veivakalougatataki ka yalataka me na sota kei iratou na sisita daukaulotu. Na digidigi o ya a tuberi koya me papitaiso, vata kei na dua na luvena tagane kei na luvena yalewa ka vakatikori iratou ena salatu ni veiyalayalati. Ena noqu bula vakataki au, au a kurabui ni‘u rogoca na Turaga ni vosa vei au, ka vakadeitaka na noqu ivakadinadina, ka sauma na noqu masu ena vukudra o ira au qarava ena noqu itavi kei na noqu qarava talega na nodra gagadre na luvequ.

Kemuni na taciqu kei na ganequ, na kosipeli i Jisu Karisito e veivakurabuitaki! Na iVakabula e veisautaka na nodra bula na luve ni Kalou ena vei sala e mana ka kaukauwa. E sureti keda o Koya me da veisau ka yaco me vinaka cake, me da qaravi ira na tani, ka yaco me da uasivi cake mai na ka eda rawata vakai keda. Me da qai veivakavulici ena sala eso e vakaraitaki kina vei ira na noda gonevuli na veivakurabuitaki vakaidina ni kosipeli i Jisu Karisito! Au sa vakadinadinataka oqo ena yaca i Jisu Karisito, emeni.