Na Semineri e sa Vakalougatataka na Noqu Bula
2022 S&I Vuli Kaburaki Vakayabaki vata kei Peresitedi Ballard
Vakaraubuka, 21 ni Janueri, 2022
Yadra vinaka. Ko sa vakavulici sara vakavinaka na mataka nikua, kau sa vakadonuya na veika kece ko sa rogoca kau masu ni na vukei au na Turaga meu vakaikuritaka na veika totoka sa yaco ena soqoni kei kemuni ka sa levu dina na nomuni itavi. E marautaki dina me‘u mai tiko kei kemuni. Au via vakaraitaka vei kemuni yadua na noqu iloloma ka nuitaka ni ko na vakaraitaka na loloma vata oqo vei ira na nomu lewenivuvale. Au kauta mai na nodratou iloloma na Mataveiliutaki Taumada kei na Kuoramu ni iApositolo Le Tinikarua. Keitou vakavinavinakataka na nomuni igu vakasakiti kei na lomadina mo ni vakatavulica na kosipeli i Jisu Karisito, na ka ena vakalougatataka na bula ka vakaqaqacotaka na nodra ivakadinadina na noda lewenilotu itabagone ena Lotu.
Au vinakata me‘u tekivu ena noqu tukuna vei kemuni na gaunisala e sa vakalougata taka kina na noqu bula na semineri. A tea na sore ni ivakadinadina ni kosipeli ka vukea me‘u vakavakarau ki na noqu kaulotu kei na madigi eso ni veiliutaki.
Me vaka o ni sa kila beka, oi au na makubui Hyrum Smith vakatolu, o koya ka tuakai Joseph Smith Lailai. Na tinaqu e dua na Simici, ka‘u makubui Peresitedi Joseph F. Smith, na ika ono ni Peresitedi ni Lotu. Au makubudrau talega e rua na iApositolo—o Elder Hyrum Mack Smith, na tamai tinaqu kei Melvin J. Ballard, na tamai tamaqu.
Ni ra sa noqu qase o iratou na turaga oqo, o ni na nanuma beka ni na tu e utoqu na kosipeli ena gauna au a se yabaki tini vakacaca kina. Ia, a sega ni vakakina. Me‘u wasea mada vakalekaleka vei kemuni na veika me baleti rau na noqu itubutubu kei na noqu bula ena kena mua tiko ki na noqu qai la‘i veiqaravi vakaulotu.
E taukena ko tamaqu e dua na kabani ni volitaki motoka. Ena 1929, ni‘u a se qai vula 10, a yaco na Leqa Vakailavo Levu. Na dredre vakailavo ka vu mai na leqa vakailavo e a veimuataki ki na dua na tavuki kalouca vei rau na noqu itubutubu kei na neitou matavuvale, ka vakabibi vei tamaqu. Baleta ni sa vakaogaogataki vakalevu ko tamaqu ena igu me qarava rawa e dua na matavuvale ena gauna dredre oqo ka dretaki koya tani mai na qaravi ni Lotu.
E muri, ni‘u a sa qase cake ka sa dei na neitou ituvaki vakailavo, a volia ko tamaqu e dua na qele ena veiulunivanua ena tokalau kei Salt Lake City. A vakayagataka na Sigatabu me tara kina e dua na valekau lailai, ka keitou cakacaka vata kaya. Keitou sega ni lakova na soqoni ni Lotu vakavuvale.
Na nodrau vakasuka mai na veiqaravi ena Lotu na noqu itubutubu e a sega ni tarovi au mai na noqu lakova na soqoni ni sokalau kei ira na noqu itokani vinaka, na ka au dau cakava ni ratou tiko mai vale na noqu matavuvale, se na noqu dau masu vata kei tinaqu lomani. Ia, au a sega ni lakova tiko na semineri.
Ni‘u sa tiko ena sekenideri ena vuli, na noqu itokani ko Nedra Mortensen a tarogi au na cava na vuna au sega ni tiko kina semineri ena vei mataka. Na siga ka tarava au sa dau lako tu ga kina, tekivu mai na siga oya me lako yani. E tekivu na semineri ena 6:30 ena mataka. Sa rui totolo oya ena gauna ni vuli torocake—e vatukina oya vei au. Au vakasamataka na noqu la‘i vakaitavi ena mataka liliwa ni vulai batabata, lutu tu na ucacevata. Ka yacova na gauna au qai tekivu kina ena yabaki ni qasecake, au sa digitaki sara me‘u peresitedi ni semineri ni East High School.
Na noqu dau lakova na semineri e dua vei ira na ka e a muataki au ena ilakolako dodonu ni noqu bula. E a tarai na lomaqu ena semineri ka tei na sore ni ivakadinadina e loma ni yaloqu. Au sega ni nanuma na veika kece e a vakatavulici, ia au nanuma na ka au a vakila ni‘u tiko e kea. Au nanuma talega na noqu vakila ni‘u sa wili e kea.
Au vakavinavinaka vakalevu vei ira na noqu qasenivuli ni semineri, o ira, me vakai kemuni yadudua, ko ni solivaka na gauna levu mo ni vakarautaka kina na lesoni vakaibalebale ena sureta na Yalo.
Au vakavinavinaka vakalevu talega vei ira na qasenivuli yadua ka ra vakatavulici iratou na luvequ ni ratou tubu cake tiko. Keitou dau vulica na kosipeli vakamatavuvale, ia na ikuri ni ivakaro e ratou a ciqoma ena semineri a vakalougatataka na nodratou bula ena gauna oya—ka sa vakalougatataka tikoga na nodratou bula. Ni‘u tukadra ka tukadra vakarua—keirau se qai ciqoma na ika 100 ni makubui keirau vakarua—au vakavinavinaka taki kemuni na qasenivuli ko ni veivakatavulici kei kemuni o ni vakatavuli ira tiko oqo na makubuqu. Ena vukudra na itubutubu kei na tubudra ena Lotu taucoko, au vakavinavinakataki kemuni ena lomasoli ko ni cakava mo ni veivakarautaki, veivakavulici, ka lomani, ka sureti ira yadua na luvena na Tamada Vakalomalagi me ra lako mai vua na Luvena, ko Jisu Karisito.
Kemuni na taciqu kei na ganequ, ko ni sa bibi vua na Turaga kei na Nona ituvatuva. Oi kemuni yadudua e tiko na nomuni tikina ena kena tarai na yalodra na gone talei oqo. Na nomuni cakacaka kei na veisasaga e bibi vakaidina ena vaqaqacotaki ni itabatamata tubu mai kei ne kena tarai cake na Matanitu ni Kalou. Ni yalovinaka ka kila na neitou vakavinavinaka cecekia ena nomuni yalorawarawa mo ni veiqaravi kei na nomuni igu lomadina mo ni veivakavulici ka veiliutaki ena cicivaki ni parokaramu ni Semineri kei na Inisitute e veiyasai vuravura.
Au vakavinavinaka vei Elder Holland kei na komiti liu, vei Elder Clark Gilbert na komisina, kei Brother Chad Webb na ivakalesilesi liu. Kei kemuni kece na iliuliu ni veitabana, tamata cakacaka, kei na qasenivuli yadua, keitou lomani kemuni, keitou vakavinavinakataki kemuni, ka keitou vakavinavinakataka na sasaga gumatua ni tamata yadua ki na vuli ni lotu.
Me vaka au a tukuna e liu, na noqu lakova na semineri e a vukea me‘u rawata e dua na ivakadinadina ka me‘u toso ki liu ena salatu ni veiyalayalati. Ena vuku ni ka oqo, au a rawa kina ni vukei rau na noqu itubutubu me rau kaukauwa. Au a kaulotu, ke a sega beka ni yaco oqori kevaka a sega ni itokani vinaka au kila ka qai kauti au ki na semineri ka ra qai vakatura meu kaulotu talega.
Ni‘u a vosa ena sakaramede ni bera na noqu kaulotu, e a tiko kina o tamaqu me rogoca na noqu vosa. Oya na imatai ni gauna ena noqu bula au nanuma rawa me la‘i lotu kina vata kei au o tamaqu. Ni‘u suka mai ki vale mai na noqu kaulotu, au a vosa vei rau na noqu itubutubu me baleta na bibi ni kena lakovi na soqoni ni Lotu. E rau a digia na noqu itubutubu me rau lesu ki na qaravi ni Lotu, ka rau ciqoma na veikacivi eso kei na ilesilesi ena nodrau bula taucoko.
Wale tikoga qo, e a vakayacora na Lotu eso na vakadidike me baleti ira na itabagone e Utah. E dua vei ira na kumukumuni ni ivakaraitaki ka na rawa saraga kina ni ra na vakaitavi na itabagone ena Lotu ena lima na yabaki yani ki liu sa ikoya me ra vakaitavi ena semineri ka tiko na nodra ivolatara ni valetabu. 1
E a vakadikeva talega na Tabana ni Vakadidike ni Veisoli iTukutuku ni Lotu na vakayaco-ka ni semineri, inisitute, kei na koronivuli ni Lotu. Na nodratou vakadidike e vakaraitaka ni semineri e idre levu duadua ki na veiqaravi ena Lotu, ivakadinadina, na yalo ni vaka itaukei, na vakilai ni Yalo, yalodina, na lotu vakai iko kei na lotu vaka matavuvale. 2
Kemuni na taciqu kei na ganequ, o ni sa vakayacoka tiko. E dua na yalo ni lomasoli e caudre mai vei kemuni ni ko ni tisaepeli ni Turaga o Jisu Karisito. Au vakavinavinakataka na nomuni kauta voli na yalo oqori ena nomuni bula taucoko kei na nomuni kauta na yalo o ya ki na nomuni kalasi. Au vakavinavinakataka na nomuni tara tiko na yalodra na noda itabagone kei ira na itabagone qase cake.
Ni‘u vakasamataka na noda itavi meda veivakavulici ka tara na yalodra, au nanuma e dua na ka au a sotava ena Valetabu e Salt Lake ena vica na yabaki sa oti. Ena dua na soqoni ni soli ivakadinadina ena ikava ni itabavale ni Valetabu e Salt Lake, a vakadinadinataka kina o Peresitedi Gordon B. Hinckley na bibi ni nodra biuta ki vu ni yalodra na tamata na kosipeli ka tudei tikoga kina. E a kaya me ra biuta sara ki lomadra, ni ra sega walega ni gadreva e dua na saumaki ni vakasama—era gadreva saraga e dua na saumaki vakayalo. E kaya o koya ni sa gadrevi me da tokia sobu na taleitaki ni kosipeli mai na noda vakasama ki na lomada. Vinaka vakalevu na nomuni vukea na kena yaco oya vei ira na nomuni gonevuli.
Ena ika 25 ni June, 2015, ni vo toka e vica na macawa me yaco me Peresitedi ni Kuoramu ni iApositolo Le Tinikarua ka veiqaravi voli vaka-jeameni ni Matabose e Cake ni Kaulotu, a vosa o Peresitedi Russell M. Nelson ena semina ni veiliutaki ni kaulotu ena 2015. A vakavulica na veika me baleti ira na daukaulotu me ra yaco me ra ivola ni Turaga. E a kaya o koya, “Oi keda, ni da matataka na Turaga, eda kalougata ni da vunautaka tiko na Nona kosipeli. A vakavulica o Paula na iApositolo e dua na ivakavuvuli veivakurabuitaki. A vakaraitaka ni mata yadua, tisaepeli yadua, io, na daukaulotu yadua, sa rawa ni yaco me dua na ‘ivola bula i Karisito, volai sega ena iqi, ia ena Yalo ni Kalou bula [umani] ena teveli buli ni uto’ [2 Koronica 3:3].” 3 Au vakadinadinataka ni gonevuli yadua e rawa ni tarai ira na kosipeli ni ra tiko ena semineri; sa rawa me volai tu na kosipeli ena teveli vakayago ni lomadra.
Vinaka vakalevu na nomuni vakavakarau yadua mo ni cakava na veika e vinaka duadua: na vakavuvulitaka na kosipeli i Jisu Karisito me rawa ni tara na Yalotabu na yalodra na luvena na Tamada Vakalomalagi.
Ena vuravura veisaqasaqa nikua, era na gadreva na itabagone oqo na reki kei na vakacegu e solia na iVakabula o Jisu Karisito mai na Nona kosipeli. E dodonu me ra vakila e lomadra na loloma ni noda iVakabula me baleti ira yadua.
Me‘u tukuna mada me baleta na nodra tarai cake na iliuliu ni mataka. O ni kila ni o ira na itabagone kei na itabagone qase cake nikua era noda iliuliu ni veisiga ni mataka. Era na veiliutaki—se ra sa veiliutaki tiko—ena nodra matavuvale. Era na vakayarayarataki ira na wekadra kei na itikotiko raraba. Era na iliuliu taucoko ni ra veivakavulici—ena Lotu, ena itikotiko, koronivuli, se itikotiko raraba. Eso era na veiqaravi ena Lalai, Goneyalewa, se Soqosoqo ni Veivukei—kei na mataveiliutaki saraga. Eso era na veiqaravi ena matabisopi, peresitedi ni iteki, se iliuliu ni kaulotu. Eso era na liutaka na Lotu e vuravura raraba ena 20-30 na yabaki mai oqo. Ko ni sa vakavulici ira tiko na tamata gone ka tiko na nodra icavacava ni mataka ka ko sega ni kila se rawa ni vakasamataka rawa ena gauna oqo. E rawa saraga, ena dua na nomu kalasi, e dua na lewe ni Kuoramu ni iApositolo Le Tinikarua. Ko sega beka ni kila na veika oqori, ia me vakalougatataki iko na Turaga me vaka ga o kila tiko na ka oqori.
Me ra iliuliu vinaka ni Lotu, o ira na noda tabagone e dodonu me ra liutaka vakavinaka na nodra dui itikotiko. Vakavulici ira, vakabibi na cauravou, ni “sa sega sara ni kilikili me vakayacori na cakacaka vakabete ena ivakarau kaukauwa se vakasaqaqara, ia me vakayacori ga ena veivakauqeti, na vosota vakadede, na yalomalua kei na yalomalumalumu, kei na loloma e sega ni veivakaisini” kei na “yalovinaka, kei na kila ka savasava, raica ena vakalevulevui sara kina na yalo ni tamata, ka sega vua na veivakaisini, ia ena sega ni veivakaisini, io ena sega ni veivakaisini.” 4
Ni ko qasenivuli, yalovinaka raica matua ka veivuke ena nodra bula o ira o vakavulica. O ni sega walega ni vakarautaki ira ki na veiqaravi vakadaukaulotu se gole ki na koliji. Ko sa vakarautaki ira tiko mera tubutubu vinaka. Ko sa vakarautaki ira tiko mera lewe ni Lotu ka iliuliu vinaka. Ko sa vakarautaki ira tiko mera rawaka vinaka sara ena nodra veisasaga ni mataka. Ni o raici ira yadua na nomu gonevuli, raitayaloyalotaka na veika era na cakava ena 5, 10, se 20 na yabaki, ka qai vakasaqara na veivakauqeti mai lomalagi mo kila na sala mo vukei ira kina me ra vakavakarau ki na gauna o ya.
Solia vei ira na madigi me ra veiliutaki. Me vaka au a tukuna taumada, au a peresitedi ni semineri ni East High School ena noqu yabaki ni qasecake. Era taura na sala ririko na noqu qasenivuli ena nodra vakatara me‘u peresitedi. Au a sega ni lakova na semineri me yacova na noqu yabaki ni vuli lailai. Au a sega ni gonevuli ni semineri ka vakadinadinataki ni‘u a dau tiko ena semineri vakawasoma ena vei yabaki Au nuitaka ni ko ni na vakaraici ira na goneyalewa se cauravou era gu me ra rawaka ka solia e dua na gauna vei ira. Vukei ira yadua na gonevuli me ra vakadre vakalailai. Kakua ni vagalalataka ira ka namaka me ra na veiliutaki. Ia, vakavulica vei ira na iwalewale ni veiliutaki, ka qai solia vei ira na gauna me ra qai veiliutaki, ka tomana tikoga na vakavulici ira mera cakava vakavinaka sara.
Me kena ivakaraitaki, ena gauna era kacivi kina na Vitusagavulu Vakaitutu Raraba vou, eda na vakarautaka na madigi ni veivakavulici kei na veidusimaki ni bera ni da vakauti ira yani ki na nodra dui ilesilesi ena vuravura. Keimami dau kauti ira vata kei keimami ena vei ilesilesi eso. Oqo o ira na turaga e bibi na nodra kila vakaveiliutaki ena Lotu; ia, eda tomana tikoga na noda vakavulici ira ni bera ni ra biu yani. Ena vica na gauna ena loma ni yabaki, era dau tiko na lewe ni Kuoramu ni iApositolo Le Tinikarua ena bose ni Vitusagavulu me ratou vakarautaka na idusidusi me vukei ira ena kena vaqaqacotaki na nodra ivakadinadina ka me ra iliuliu gugumatua cake. Au na tomana talega ni keitou dau taura vakagauna na veivakavulici vakataki keitou ena Kuoramu ni iApositolo Le Tinikarua, me keimami veilakoyaki vata tu, ka vuli mai kina. Ko nanuma beka na balavu ni gauna keimami sa taura tu na ilesilesi oqo, keimami sa na kila kece. E sega, e veisau na vuravura ka sa duidui talega na nodra gagadre na tamata—vakabibi ena veivanua duidui e vuravura. Sa vakakina, ni keimami lewe ni Kuoramu ni iApositolo Le Tinikarua, keitou nanamaki me keitou na veivakavulici vakataki keitou ena sala me rawa ni keitou vinaka cake ena itavi vaka iApositolo ni Turaga o Jisu Karisito.
Au kerei kemuni mo ni vukei ira na iliuliu ni mataka me ra vuli mai na veika ko sotava vaka iliuliu. Na nomuni gauna vata kei ira e lekaleka sara, ia vakaraica na vei gauna o ni na rawa ni veivakauqeti kina vakai kemuni.
Me‘u tukuna mada na kena gadrevi me saumi vakadodonu na taro. Eda kila taucoko ni taroogi ni taro e sala uasivi me ra vuli kina na gonevuli. E vuqa na taro e vakaraitaka na gagadre ni vuli-ka. Yalovinaka vakauqeti ira na gonevuli me ra taroga na taro ka qai vukei ira me ra vulica na sala me ra kunea kina na isau ni taro ena vuli kei na masumasu. Na kosipeli e vakarautaka na isau ni taro ki na vuqa na taro ni bula. Ia, eso era na sega ni rawa ni saumi baleta ni sega vei keda na itukutuku e gadrevi me baleta na kena isau donu. Ena vei gauna vakaoqori, kakua ni dau vatavatairalago. E vinaka mo kaya “Au sega ni kila” se “eda sega ni kila.” Eda na dau taqomaki tikoga ka maroroi kevaka eda vakatavulica na dina, ni da vakatavulica na veika eda kila. Kakua ni lako tani mai na dina ka vatavatairalago me baleta na veika eda sa bera ni kila. Ena levu na gauna, sa rawa mo solia na ivakadewa dodonu ni ivolanikalou, na ivunau ni kosipeli, itukutuku makawa ni Lotu, se so tale na ulutaga era sa kilaimatata. Au vakauqeti kemuni mo ni vakavuvuli taka na vei lesoni ni vuli se o koya e volekata ka sa vakarautaki tu vei kemuni ka taurivaka na ivurevure dodonu.
Me rawarawa toka ga. Au sa vakayagataka vakawasoma ena noqu bula na malanivosa oqori, ka ratou sa vola ena uluvatu ni bulubulu nei watiqu lomani o iratou na luvequ, ka dua na siga au na mai vakadavori talega kina o au e yasana. Ena uluvatu oya e toqai kina “me rawarawa tiko ga.” Niu sa na takali yani, au nuitaka ni ra na kila na tamata kecega ni oqori e dua na ka au nanuma ni bibi. Me rawarawa toka ga na kosipeli. E sa rui talei ka rawarawa, ka matata, ka totoka. Ni ko vakavulica na kosipeli, vakarawarawataka ka vakadinadinataka vakawasoma na cakacaka vakalotu vakalou ni noda iVakabula, na Turaga o Jisu Karisito.
Nanuma ni a vakalagilagia o Nifai na veika matata. 5 E vakavuvulitaka o koya ni “da sa tukuni Karisito, ka rekitaki Karisito, ka vunautaki Karisito, ka parofisaitaki Karisito, ka da vola na ka sa vakatakilai vei keda, me ra kila kina na noda kawa na sala me bokoci kina na nodra ivalavala ca.” 6 Au vakadinadinataka ni o veivakavulici, vunautaka, ka vakadinadinataki Karisito, era na vakila na nomu gonevuli na nomu ivakadinadina ka ra na reki ena vinaka i Jisu Karisito kei na Nona kosipeli.
Sai au na makubuna o Elder Melvin J. Ballard. A veiqaravi vakai Apositolo o koya me 20 na yabaki. Au a yabaki 11 ena gauna e a takali kina. Ia era lewe vuqa—niu sa vakayalo mai kina meu kila—ni sa veiqaravi vaka iApositolo na tubuqu, era rogoci koya me vunau, ka rogoca nona veivakavulici. Au vakatarogi au vakawasoma—na duidui ni tamata ena veivanua duidui e vuravura era a rogoci koya ni vakatavulica ka vunautaka na kosipeli. Ka voleka ni dau tautauvata na kena isau: “Au sega ni kila se cava sara mada e tukuna o koya,” era dau kaya mai vei au, “Ia, au na sega ni guilecava, rawa na veika au a vakila.” Me vakakina vei ira eda sa vakavulica—era na sega beka ni nanuma na noda vosa, ia me kakua, sara vakadua ni guilecava na veika era a vakila ena noda vakatavulica na rawarawa kei na totoka ni ivunau i Jisu Karisito.
Au a tukuna tiko na kena bibi na nomuni itavi ni o ni qasenivuli ka vakailesilesi. Sa ka bibi ka gadrevi na itavi oqori. Ia, na nomu itavi ena nomu matavuvale e cecere cake sara. Eda tiko ena vuravura oqo me da tiki ni isema ni vei matavuvale kei na kena rawati na noda bulia na noda dui tikina ena matavuvale oqori. Na ituvaki ni bula ni noda matavuvale yadua e duidui na kena ituvaki. Se cava ga na ituvaki ni nomu bula, yalovinaka susuga ka taracake na veimaliwai vakamatavuvale. Ki vei ira era sa vakamau, vakayagataka na gauna vata kei watimu. Vakasaqara na ivakasala nei watimu ka muria. Au a tama vinaka cake, tagane vakawati, ka iliuliu ni Lotu ena vuku ni ivakasala ni loloma nei watiqu lomani talei, o Barbara. Ki vei ira era sega ni vakawati, vakasaqara na ivakasala mai vei rau na nomu itubutubu, nomu lewe ni matavuvale tale eso, se dua o nuitaka. Sa dodonu me da taracake kece na noda veimaliwai vakamatavuvale baleta ni ra na yacova yani na bula ka tarava. Na nomu itavi se ilesilesi vakaqasenivuli ena parokaramu oqo ena cava, ia sa tawamudu na nomu veimaliwai vakamatavuvale.
Ni‘u mai tinia na noqu vosa ena loloma vei iko, au vakasamataka na noqu reki ni‘u mai lewe ni cakacaka bibi ka lagilagi oqo vata kei kemuni. Au vakila na reki vata ga a vakila o Amoni ena nona kaya vei iratou nona veitacini kei ira na vakailesilesi:
“Sa kilikili me datou marau …?
“Eda sa iyaya ni cakacaka ena liga ni Kalou me vakayacori kina na cakacaka cecere oqo. …
Ia me vakalougatataki ga na yaca ni noda Kalou; me da ia vua na sere ni veivakacaucautaki, io, me da vakavinavinakataka na yacana tabu, ni sa dau caka dodonu me sega ni mudu ko koya. …
“Sa vuabale na noqu marau, ka sa reki vakalevu na yaloqu, ia au na vakacaucautaka tikoga na noqu Kalou.” 7
Oi kemuni na taciqu lomani kei kemuni na itokani vakaqasenivuli—au kaya na itokani qasenivuli baleta na itavi taumada ni lewe ni Kuoramu ni iApositolo Le Tinikarua sai koya me veivakavulici. Au vakadinadinataka ni da luvena na Tamada Vakalomalagi, e rawa ni da vakila na reki kei na vakacegu ni kosipeli ni da bulataka ka vakavulica, ni da talairawarawa ki na ivakaro ni Turaga, kei na noda lako voli ena dina.
Na nona bula, cakacaka vakalotu, kei na kosipeli o Jisu Karisito e vakarautaka na reki o ya. Ena Veiyalayalati Vou, a kaya kina o Jisu vei iratou na Nona tisaipeli, “Au sa tukuna vei kemudou na veika oqo, me tiko ga vei kemudou na noqu marau, me taucoko kina na nomudou marau.” 8
A sotava na parofita o Liai na reki ka vua ni kosipeli ka gadreva me ratou kania talega na nona matavuvale. A kaya: “Ia ni‘u sa kania tiko na vuanikau … a vakasinaita na yaloqu ena marau levu; ia mai kea, sa tekivu me‘u gadreva me ratou vakaivotavota talega kina na noqu matavuvale; ni‘u kila ni sa gadrevi vakalevu cake mai vei ira na vuanikau kecega.” 9
Au vakabauta ni o keda yadua eda vakila me vakataki Joni ena nona kaya, “Sa sega vei au na reki e levu cake me vaka na noqu rogoca ni ra sa lako voli na luvequ ena dina.” 10
Na vuravura nikua e sa sega ni vakacegu mai na yalo rarawa, veiba, sega ni vakaceguui, veivakaduiduitaki, veibeci, yalolailai, kei na lomaleqa. Na kosipeli i Jisu Karisito e rawa ni vueti keda ena vei gauna dredre oqo. A vakavulica na parofita o Liai e dua na ivakavuvuli rawarawa ka vakatakilai mai vua na Turaga. A kaya, “Sa sucu na [tagane kei na yalewa], me rawata na marau.” 11
Ena yaca ni Turaga kei na dodonu vaka iApositolo, au vakatikora ka kerea na Turaga me vakalougatataki kemuni yadua mo ni vakila na reki ena nomuni vuvale, reki ena kosipeli, kei na reki ena itavi vaka qasenivuli se vakailesilesi ena parokaramu ni semineri kei na inisitute ni Lotu. Au na vakaraitaka tale na noqu loloma vei kemuni vakayadua sara kei ira na nomuni gonevuli.
Au wasea na noqu ivakadinadina ni bula tiko o Jisu Karisito—sai koya oqo na Nona Lotu, kei na Nona kosipeli. Me vakalougatataki kemuni na Turaga, noqu itokani lomani vaka qasenivuli, me rawa ni da dolele yani ena kaukauwa kece ni utoda me tara na nodra vakasama kei na utodra e levu cake tale na luvena na Tamada, era gadreva tu mera kila ni sai Jisu na Karisito, ni sa vakatura e dua na parofita, o Josefa, ka vakalesuya mai na taucoko ni kosipeli kei na ka kece e gadrevi me kunea kina na marau kei na vakacegu ena bula oqo me vaka ni sa vakaraitaki oti ka kunei ena Na Lotu i Jisu Karisito ni Yalo-Dodonu e Daidai. Au vakatikora e dua na veivakalougatataki ena vukudratou na Mataveiliutaki Taumada kei na Kuoramu ni iApositolo Le Tinikarua vei kemuni kei na nomuni matavuvale. Au vakayacora vakaina ena yalomalumalumu ena yaca tabu ni Turaga o Jisu Karisito, emeni.