O Ona Sui
Faasalalauga o Aoaoga Faaletausaga a le S&I faatasi ma Peresitene Ballard mo le 2022
Aso Faraile, 21 Ianuari, 2022
Sa ou tu i le laina i se malae vaalele i tua o se A’oa’o Iutaia. O le tagata sa i ona luma atu o se alii sa uuina se tusifolau Mekisiko, na malaga faatasi ma lona afafine laitiiti. Ma o luma atu o ia sa i ai se tagata Amerika sa ofuina se ofumafiafia ma se pulou e fai ma sui o ana au taaalo e sili ona fiafia i ai. Sa amata ona ou taumanatunatu, O le fea o tagata nei e toatolu e tele ni mea ma te tutusa ai? Sa ou mafaufau muamua, masalo o le Amerika. Atonu na faapena foi o ma aafiaga na tuputupu ae ai, ma atonu sa ma faaaluina uma le tele o le taimi e mafaufau ai e uiga i a ma‘ua ’au e fiafia i ai. Ona ou mafaufau lea i le tamaloa lona lua i le laina. Ona o lo’u alofa mo Mekisiko, e le faigata ona ou mafaufau atonu e tutusa meaai ma tutusa faaili mariati ma te fiafia i ai. E sili atu i loo lena, sa ou lagonaina so ma sootaga a’o ou vaavaai atu i a la fegalegaleaiga ma lona afafine ma ou mafaufau ai i le avea o se tamā i o’u afafine e toaono. Ma le mulimuli, sa ou mafaufau e uiga i le a’oa’o. O le toatele o tagata e vaai ia i ma’ua i le laina atonu e faapea e le tele ni mea ma te tutusa ai. Ae o ia ma a’u e i ai se sootaga e laugatasia ai i lo ma mananao e tuuto atu o ma olaga i le galuega a le Atua, ia aoaoina ma aoao atu Lana upu, ma ia taumafai malosi e usitai i Ana poloaiga.
O le mafaufau pea i la’u fesili a’o o’u ulufale atu i le vaalele, sa ou aumaia ai se fasipepa ma amata ona ou tusitusi. Sa ou amata i upu faigofie, “O a’u … ” Ona ou tusia lea o mea uma na oo mai i lo’u mafaufau. O a’u o se atalii o le Atua, se soo o Iesu Keriso, se tane. Sa ou tusia uiga faaalia, sootaga, valaauga i le Ekalesia, ma tofiga o le galuega. Sa ou tuu i ai mea e fiafia ai, “O a’u o se tagata e fiafia tele i musika a le Motown ma sisi faavaivai.” A’o le’i uma, sa ou tusia le toeitiiti 300 auala e tali ai le fesili, “O ai a’u?” Ona ou faavasegaina lea o a’u tali i le faasologa po o le fea e sili ona taua i le filimaotiina o le taulaiga ma faamuamua i lo’u olaga. Faataitaiga, i le avea ai o a’u o se tamamatua ma se tapolo lē fiafia, o le mea moni o le tuu o le avea ma se tamamatua i le tumutumu o la’u lisi ma lo’u naunau e tapolo i le pito i lalo, e faamanatu mai ai le mea e tatau ona faaalu ai lo’u taimi ma le malosi ma mea e filifili pe afai e i ai se taimi e feteenai ai na matafaioi.
O se taimi mulimuli ane, sa ou malamalama lelei ai i le pogai sa matuai anoa ai lenei aafiaga ia te a’u ina ua ou faitau sa saunoa mai Peresitene Henry B. Eyring, “O le ala e te tali ai i le fesili po o ai oe, o le a filimaoti ai toetoe o mea uma.” 1
Lata mai nei, na ou mafaufau ai i lenei fesili ma mafaufau ai i o tatou tamaiti aoga. Sa ou aumaia se tasi pepa ma amata ona tusitusi—o le taimi lenei na amata i upu faigofie, “O tatou tamaiti aoga o … ”
Ou te talitonu o tatou tamaiti aoga o i latou lava ia na saunoa ai perofeta. O i latou o fanau faapelepele a matua faalelagi, o e na filifili e mulimuli i le fuafuaga a le Tama ma faatoilalo le fili e ala i lo latou faatuatua i le Tamai Mamoe a le Atua ma le mana o la latou molimau. 2 Na faapolopolo i latou e le Alii, e pei ona saunoa ai Peresitene Russell M. Nelson, e o mai i le lalolagi “i lenei taimi patino, lenei taimi aupito taua i le talafaasolopito o le lalolagi.” 3 Sa Ia filifilia i latou e “fesoasoani e saunia tagata o lenei lalolagi mo le … nofotupu i le meleniuma [o le Faaola].” 4 “[O i latou] o le faamoemoe o Isaraelu, ‘fanau o aso valoia’ [”Faamoemoe o Isaraelu, Viiga, nu. 161].”! 5
Ua latou “fiaaai i mea a le Agaga; … naunau e aoao le talalelei, ma latou mananao e tuusa’o i ai, e aunoa ma le suia. … E le o latou o ni tagata faalotoloto lua ae o ni tagata fia iloa, o e saili i le upumoni. …
[Latou] te faamemelo … i le faatuatua … [ma] mananao ia mafai e i latou ona valaau e e galulue.” 6
E moni foi o nisi ua galo ia i latou lo latou faasinomaga o ni fanau a le Atua pe ua matele foi i le taulai atu i tu ma aga e le tumau pe itiiti le taua. O Satani o le gaoi silisili o le faasinomaga. O ana taufaasese ua mafua ai ona fenumia’i pe faasalaveia nisi e se lalolagi fesouaiina ma le femoumouai ua faalumaluma i le faatuatua ma le amio lelei ma o faamatalaga ua maua i soo se mea ae ua tau le maua le atamai—o le aso na valoia o tagata o le a “aoao pea, ae le mafai lava ona iloa le malamalama o le upumoni” 7 se lalolagi ua ta’u “le leaga o le lelei, ma le lelei o le leaga,” 8 lea e toatele ua “savavali i le malamalama o lo [latou lava] afi ma i aloiafi ua [latou] tutuina” 9 ae ua teena le Malamalama o le Lalolagi.” 10
Ae peitai, ua tatou iloa se isi mea e uiga i o tatou talavou laiti ma talavou matutua. Sa fetalai mai le Faaola:
“O outou o fanau a perofeta; ma o outou o lo le aiga o Isaraelu; … o lau fanau o le a manuia ai aiga uma o le lalolagi.
“Ua faatu mai a’u e le Tamā e muamua ia te outou, ma auina mai a’u e faamanuia ia te outou i le liliu ese o outou taitoatasi mai i ana amioletonu; ma o le pogai ona o outou o fanau o le feagaiga.” 11
Na folafola mai le Alii o le a Ia aapa atu ia i latou e le ina ia laveai i latou i a latou agasala ae ia laveai i latou mai a latou agasala. 12 O le pogai lena e taua ai ona tatou fesoasoani i o tatou tamaiti aoga ia iloa le Tama Faalelagi ma Iesu Keriso ma i ai se malamalamaaga sa’o i le fuafuaga e faavavau a le Tama ma le aoaoga faavae moni a le Faaola. E manaomia ona latou iloa pe o ai i latou ma le mea e finagalo le Alii latou te faia 13 —ma le ala e fai ai.
Ou te talitonu o le fesoasoani i o tatou tamaiti aoga ia iloa nei mea e faalagolago tele lea ia i tatou ia iloa pe o ai i tatou o ni tagata o e aoao atu, auauna atu, ma tuu atu le lagolago i seminare ma inisitituti. O lenei manatu na oo atu ai i lo’u faia o se lisi lona tolu ma le mulimuli. Sa ou aumai se isi pepa ma tusi ai mai lea itulau i lea itulau ia uiga faaalia ma uiga auaumama ou te talisapaia ma faamemelo i ai ia te outou uma. A’o ou tusitusi, sa oo ina ou toe foi i se manatu taua e tasi. Ou te talitonu o le tele o tali taua i le fesili po o ai i tatou o le talosagaina o i tatou ia avea ma sui o Iesu Keriso. 14
O le taulaiga o a tatou taumafaiga o le fesoasoani lea i le autalavou ma talavou matutua ia iloa Iesu Keriso ma faalagolago ia te Ia ma Lana taulaga togiola. Tatou te vaai atu ia te Ia o lo tatou faataitaiga ma faalagolago i Lona alofa tunoa e fai ai Lona finagalo. E ui lava i luitau ma mea faalavefau faaletagata lava ia, ua tatou ola ma le faamoemoe ma le talitonu o le a lelei mea uma. Ona tatou te salamo i taimi uma, ua tatou tofo ai i Lona alofa ma le alofa mutimutivale, ma tatou te faasafua atu lena alofa i isi ao tatou aoao mai loto ua suia ma loto faafetai. Tatou te tautatala soo ia te Ia, molimau ia te Ia, fiafia i Lona agalelei ma le maoae, ma fesoasoani i isi ia iloa “le puna e mafai ona latou tepa taulai i ai mo se faamagaloga o a latou agasala.” 15 Tatou te taumafai malosi i aso taitasi ia fai ma Ona sui.
I le avea ai ma se faifeautalai talavou, sa ou aoaoina ai le taua o lenei manatu ao ma tu’itu’i ma la’u soa i faitotoa. I se tasi o fale, sa amata ona ou faapea atu, “Talofa lava, o i ma’ua o sui o Iesu Keriso.” Ae ou te le’i toe faaauau, sa faasalaveia a’u e le tamaloa i le faapea mai, “E leai a. E te le iloa le uiga o lena mea.” Sa ia faamatala mai o se sui o se tasi e tu e sui tulaga i se isi tagata, o lē e tautala ma faia mea e tautala ma faia e lena tagata pe ana i ai lava o ia iina. Sa ia faaiu i le fai mai, “Afai o oulua o Ona sui, o le a oulua ta’u mai la ia te a’u le mea e fetalai mai ai o Ia ia te a’u pe ana faapea e i ai o Ia lava iinei.” Sa ou faalogologo ma le toto’a ona ou ioe ai lea ma lea alii na sa’o lona malamalama e uiga i le sui. Ona ou faafetai atu lea ia te ia ma fesili atu, e tusa ai ma lenei malamalama, e mafai ona toe amata. Ona ou faapea atu lea, “Taeao manuia. O Elder Aranda lea ae o a’u o Elder Webb. O i ma’ua o sui o Iesu Keriso, ma ua ma o mai e faasoa atu ia te oe se savali mai ia te Ia.”
Ua tuuina mai ia i tatou taitoatasi se faatuatuaga paia. A tatou tatalo pe faaiu a tatou aoaoga ma molimau i Lona suafa, ua tatou tautino atu o mea na tautalagia ua fai ma sui o Lona mafaufau ma le finagalo. Ina ia faamaoni i lena faatuatuaga, e tatau ona i ai so tatou alofa loloto ma se malamalama i Lana talalelei ma naunau e totogi le tau ina ia iloa moni ai tusitusiga paia ma le aoaoga faavae latou te aoao mai. Ona ua tatou malamalama o le upu e i ai se “aafiaga mamana tele atu” nai lo se isi lava mea 16 ma e i ai moni lava tali i fesili o le olaga, o tusitusiga paia o le punavai autu lea o o tatou aafiaga ma a tatou tamaiti aoga. A o tatou faaauau ona taulamua i metotia faafaiaoga e fesootai ai ma le tele o tamaiti aoga, e le tatau ona tatou taulamua e o ese mai le faamauaaina loloto i tusitusiga paia.
E tutusa foi le taua o le taulai atu o tatou mafaufau ma loto i auauna filifilia a le Alii—aemaise lava uso o i ai nei o le Au Peresitene Sili ma le Korama a Aposetolo e Toasefululua—ia le faatoese mo a latou aoaoga, faamalamalama atu, pe teena i latou i o tatou lava “filosofia, e tusa po o le a le faapogai, pe o le a foi le manaia po o le talafeagai … e foliga mai ai.” 17 I se lalolagi ua tele naua leo faatosina ma faiga faaagafesootai, o se matuai faamanuiaga le iloa o le mafaufau o le Atua e ala mai i Ana perofeta soifua. A o tatou faaogatasia a tatou aoaoga, o tatou tuutooga, ma a tatou mea e ave i ai le faamuamua i le Alii ma Lana perofeta, o le a tatou i ai i se faavae mautinoa, ma e pei o lala o se vine moni, o le a tatou maua le mana e aumai ai ni fua faateleina. 18
O nisi taimi, o le aoao atu o upumoni ma le faaali atu o le alofa e mafai ona foliga mai e feteenai. O le mafuaaga ona e i ai mea pepelo i na mea e lua, lea e mafai ona faafenumia’ia i tatou. Atonu e te lagona o loo e i laina pito i luma i le taumafai e fesoasoani e tali fesili faigata ma lavelave ma afai e te tautala i le sa’o, e ono faamanu’alia pe tiga ai se tagata. Ina ia tali atu i se auala agalelei ma le aoga, e tatau ona faaali lo tatou faatuatua ia Iesu Keriso o loo Ia taitaia Lana Ekalesia e ala mai ia i latou ua Ia faauuina e taitaia. E tatau ona tatou tatalo mo le fesoasoani ma faamalosiau i tamaiti aoga ia liliu atu i le Tama Faalelagi ma a latou fesili ma masalosaloga. O Iesu Keriso, o le malamalama ia i latou o e saofafai i le le mautonu ma le pogisa. O Ia o le faataitaiga atoatoa o le aoao atu o le usiusitai ma le manino, ae o Ia foi o le pulu pasama o Kiliata ia i latou o e o loo mafatia mai taunuuga o a latou lava mea sese. O Ia o le faataitaiga atoatoa o le mea o loo tatou taumafai malosi ia avea ai i tatou o ni faiaoga o e aoao atu upumoni i le alofa.
O le tasi o mafuaaga e matuai taua ai lo tatou tomanatu i le alofa o le Faaola 19 o le faafeagai lava e fetaiai ma o tatou tamaiti aoga. Na faaalia i se suesuega lata mai nei na matauina ai e le aunoa le autalavou o le Au Paia o Aso e Gata Ai e faapea, o i latou o e na tauivi e uumau i le faatuatua ma tumau le malolosi i le Ekalesia e masani ona fetaiai ma ni luitau fitoitonu se tasi pe sili atu:
-
Latou te lagona le faamasinoina ona o suiga i o latou tulaga, e pei o le tete’a o o latou matua po o le tuua e se tagata o le aiga le Ekalesia.
-
Latou te lagona le ta’usalaina ma le faanoanoa ona o measese na latou faia.
-
Pe latou te le talitonu foi na latou maua ni aafiaga faaleagaga. 20
A o tatou taumafai malosi e alofa e pei ona alofa ai le Faaola, o le a mafai ona tatou fesoasoani atu i o tatou tamaiti aoga e faatautaia nei tulaga taitasi.
E faapefea ona e fesoasoani atu i se tagata talavou ia le lagonaina le faamasinoina? 21 Atonu e amata e ala i le malamalama o suiga tetele i se mafutaga ma tulaga e mafai ona mafua ai se faalavelave tau i le faasinomaga, ma tuufesili ai o tatou tamaiti aoga po o ai i latou ma pe faapefea ona latou aofia ai. I nei taimi, e mafai ona e fesoasoani ia latou manatua a latou mafutaga e lemasuia ma lo latou Tama oi le Lagi. Ou te iloa se tamaitai talavou o lē sa faavaeina lona taua faaletagata lava ia i ona tulaga ma mea na manatu ai isi e uiga ia te ia. Sa ia lagona le le mautonu i le le iloaina po o ai o ia. Na manao o ia e tatalo mo au. I se tasi aso, sa ia maua ai se uunaiga manino lava afai na te fia iloa po o ai o ia, o le a tatau ona ia iloa muamua le Tama Faalelagi ma le Faaola. O le manatu lenei na amatalia ai lana sailiga. Sa amata ona ia suesue i tusitusiga paia, tatalo, ma auauna atu, faatasi ma se taulaiga ia ona iloa le Atua. I le aluga o le taimi, sa amata ona faaali mai i ai e le Alii o Ia lava ia te ia. Sa ia lagonaina Lona alofa, mafanafana, ma le malamalama. A’o faasolo ina ona iloa le Tama Faalelagi, sa oo foi ina ona iloa o ia lava ma malamalama i le la sootaga ma Ia. Sa ia aoao e uiga i lona faasinomaga ma le taua e faavavau o se afafine o le Atua. O lenei malamalama ua faatumulia ai o ia i le malamalama ma le olioli.
E mafai ona e fesoasoani i au tamaiti aoga o loo feagai ma luitau e ala i le fesoasoani ia latou iloa ua alofaina i latou e le Tama Faalelagi. Ma e mafai ona faaali atu lou alofa mo i latou i lou taimi, lou loto malamalama, ma lou naunau e faalogo. Atonu e te ole atu i le Tama Faalelagi e fesoasoani ia te oe ia e vaai atu ia i latou o ni tagata taitoatasi ma ia iloa o latou luitau, avanoa, ma manaoga tulaga ese. Pe a i ai ni a latou fesili po o tauiviga ma a latou molimau, e mafai ona e fesoasoani ia i latou ia lagona le saogalemu ma iloa e mafai ona latou liliu atu ia te oe ma i le Alii.
E faapefea ona tatou fesoasoani ia i latou o e tauivi ma le ta’usalaina ma le faanoanoa ona a latou measese? E pei o le Faaola, tatou te le fiu ia i latou. Latou te faamamalu o latou tauiviga ia taumafai pea lava pea e fai le mea sa’o i se lalolagi faigata. Tatou te aoao i latou, o le agavaa e le o le atoatoa. 22 Tatou te fesoasoani ia i latou ia tumau i le ala o feagaiga e ala i le molimau atu e uiga i le olioli o le salamo, fesoasoani ia latou iloa e totonugalemu lea i le fuafuaga a le Tama Faalelagi. Tatou te fesoasoani ia latou iloa e alofa pea o Ia ia i latou ma o loo saunia o ia e fesoasoani ia i latou.
Ou te fiafia i le lesona o loo aoaoina i le Mose 4, lea sa tatou suesueina i le vaiaso ua te’a. Ina ua uma ona solitulafono Atamu ma Eva, na pupula o la mata, ma la iloaina ua la le lavalavā. O le la taumafaiga muamua lava e ufiufi lo laua le lavalavā, o le su’i o lau o le mati. Ina ua la faalogo i le siufofoga o le Alii i le faatoaga, sa tonu ia i latou e “faalalafi i laua lava mai luma o le Alii le Atua i totonu o laau (Mose 4:14).” E malie ona matau po o ai lea sa ta’uina atu ia i laua e lalafi mai le Atua. Ia, ou te le manao e manatu mama i le mea lenei, ae o le a faapefea ona fai lena mea? E mafai ona tou vaai faalemafaufau i lo tatou Tama oi le Lagi, o ui mai i le anoanoai o foafoaga, maua lenei vanimonimo, lenei paneta, ma lena faatoaga, ma o le a la lalafi mai ia te Ia i tua o se laau? I le taimi lea, na fesili atu ai le Alii ia i laua se fesili: “O fea ua e alu i ai?” Mose 6:31 Pe mai le Feagaiga Tuai, “O fea oe?” Kenese 6:9 E te manatu e mafai le faapea Na Te le’i silafiaina moni? O le a la le mea ua Ia fesili ai? Atonu sa o se mea e pei o le, o lea la ua lua solitulafono, o fea o le a lua o i ai? Pe o le a lua lalafi ia te a’u, pe o le a oulua o mai ia te au se’i ou ufiufia oulua? O le upu togiola i lona uluai faauigaga faaEperu o le kippure faauigaina “e ufiufi.” 23 Na i ai i lo tatou Tama Faalelagi se auala e sili atu le lelei nai lo o lau o le mati ma laau e ufiufi a’i a tatou agasala. Peitai e musumusu mai e le fili ni pepelo, ina ia tatou mananao ai e lalafi mai le Atua. E taumafai o Ia e faatalitonu i tatou e le alofa le Atua ia i tatou ma o le a Ia le faamagaloina i tatou ona sa tatau ona tatou iloa lelei atu, pe ona o agasala e matuia tele.
Sa ou valaauina se tamaitai talavou i se tasi taimi e o i le malumalu faatasi ma se vaega o le autalavou. O lana tali o le, sa le agavaa o ia e alu i totonu o le malumalu. Sa ou ta’u atu ia te ia, sa na ona matou savalivali faataamilo i lotoa ma laufanua ma o le a matuai ou fiafia lava pe a sau o ia. O lana tali o le, “E le’i oo i le taimi. Ou te le manao e matau mai a’u e le Atua i le taimi lenei.” A tatou faia ni mea sese, e masani ona tatou le mananao e tatalo, faitau tusitusiga paia, pe o i le lotu. Atonu ua tatou faamoemoe ia aua ne’i iloa mai i tatou e le Atua.
Faamolemole, fesoasoani i au tamaiti aoga ia iloa a latou faia ni mea sese, e mafai ona latou maua le faamagaloga ma le filemu e ala i le o atu i aao agalelei ma le mafola o se Tama Faalelagi alofa mutimutivale o lē ua saunia se auala mo lo latou togiolaina. Ua Ia saunia se ala mo lo tatou togiolaina.
E faapefea ona e fesoasoani i se tamaitiiti aoga o le ua lagona na te le’i maua ni aafiaga faaleagaga? O nisi taimi e faalogo ai o tatou tagata talavou i tala ia e foliga faavavega ma toilalo ai e iloa o le Agaga Paia e talanoa atu foi ia i latou i ni auala faigofie eseese, e pei o le taimi na i ai ni a latou fesili musuia pe i le taimi na latou faitau ai i tusitusiga paia ma mafaufau ai e faailoga se mea. Tatou fesoasoani ia latou iloa le ala e fesootai mai ai le Alii ia i latou taitoatasi ae aua le fautua atu faapea, o le ala e talanoa mai ai le Alii ia i tatou ua na’o le pau lea o le ala e mafai ona Ia talanoa atu ai ia i latou. Faaeteete aua le ta’u atu i o tatou tamaiti aoga le taimi latou te lagonaina ai le Agaga Paia. E le faapea ona ua tatou lagona le Agaga e pei o le faiaoga ona faapea ai lea ua lagona uma foi e tamaiti aoga lea lava mea i le taimi lava foi lea. E lelei foi le malamalama o i latou o e aafia i le popolevale ma le atuatuvale e ono lagona e faigata ona maua nei lava aafiaga. Peitai e le faatapulaaina le Alii i gasegase faalemafaufau. Ua Ia silafia ma malamalama ia i latou ma e mafai ona maua auala e fesootai mai ai Lona alofa ma le taitaiga. E laiti lava ni mea e mafai ona tatou faia o le a fesoasoani tele ai ia i latou nai lo le aoao ia maua ma faatino faaaliga faaletagata lava ia?
Sa ou faalogo talu ai nei i se tala e uiga i se alii talavou na auai i se iunivesite iloga i le itu i sasae o le Iunaite Setete. Sa lesitala o ia i se vasega sili ona faigata o faaaliga manatu. Sa manao o ia ia manuia ana taumafaiga, o lea sa tonu ai e totogi sona faiaoga patino. Sa mafai ona ia faafaigaluegaina se tagata sa avea ma se fesoasoani i le polofesa ma sa faiaoga foi i le vasega i le taimi lava lea i le iunivesite. Sa matuai aoga lava le faiaoga patino, ae sa popole lava pea le alii talavou e uiga i lana suega faaiu. Sa ta’u atu e le polofesa i tamaiti aoga, o le suega o le a matuai faigata lava, o lea o le a ia faataga ai i latou e aumai se fasipepa se tasi ma tuu ai i luga soo se mea na latou manatu o le a fesoasoani ia i latou. Sa amata e tamaiti aoga ona tusitusi i le ninii na mafai ai, e faaaoga ai tioata faatetele e tusi ai i lalo ma faitau mea atonu latou te manaomia i le suega. Ina ua oo i le aso o le suega faaiu, na ulu atu le alii talavou i totonu o le potuaoga. Sa i ona autafa lona faiaoga patino. Sa fesili atu le polofesa po o le a le mea sa latou faia, ma sa toso mai i fafo e le alii talavou se fasi pepa avanoa ma tuu i luga o le fola. Ona tu ai lea i luga le faiaoga faufautua. Sa faamalamalama mai e le alii talavou, “Na e saunoa mai e mafai ona ou tuu soo se mea ou te manao i ai i luga o lenei fasi pepa. Ia, ou te manao i lo’u faiaoga faufautua.” Sa faataga le alii talavou e fai le suega faatasi ma lona faiaoga faufautua i ona autafa, na musumusu atu tali i lona taliga.
I le avea ai ma tagata o le Ekalesia a Iesu Keriso o e ua tuuina mai i ai le meaalofa o le Agaga Paia, aisea o le a tatou o atu ai i soo se suega i le olaga e aunoa ma le fesoasoani o loo avanoa mo i tatou? Faafetai mo le taumafai ia agavaa mo le Agaga Paia i tulaga uma o o outou soifuaga ma ia saili Ana faatosinaga i mea uma tou te faia.
O la’u tatalo ia faapea ona iloa e o tatou talavou ma talavou matutua lo tatou Tama oi le Lagi ma o le iloaina pe o ai o Ia o le a latou malamalama ai pe o ai moni i latou. Ona o Lona mana e faamagalo atu ai, e mafai ai ona latou mama. Ona o Lona mana e faamalolo ai, e mafai ai ona latou atoatoa. Ma ona o Lona mana e faaatoatoa ai, e mafai ai ona avea i latou e faapei o Ia. I le avea ai ma sui o Iesu Keriso, o e aoao atu Ana aoaoga faavae ma faasoa atu Lona alofa—o le a mafai ona e fesoasoani atu ia i latou ia iloa o latou faasinomaga e faavavau. E le faapea ai la o le a e atoatoa ai i taimi uma. E le tau faapea e tatau ona e atoatoa. Ao e taumafai malosi e aoao atu le talalelei toefuataiina—e faatotonugalemu ia Iesu Keriso, taulai atu i au tamaiti aoga, ma faamauaa i le afioga a le Atua—o le a tuuina i ai e le Agaga Paia le ola ma le talafeagai tonu ma molimau i lona moni. Ou te molimau atu o oe, ou aiga, ma au tamaiti aoga o fanau o le folafolaga, o le faamoemoe o Isaraelu, ma o pele a le Atua. I le suafa o Iesu Keriso, amene.