Talanoaga Faalaulauafono

Faasalalauga o Aoaoga Faaletausaga a le S&I faatasi ma Peresitene Ballard mo le 2022

Aso Faraile, 21 Ianuari , 2022

Sister Becky Scott: Maliu maia i la tatou fonotaga a le seminare ma le inisitituti i le apitaga i le taulaga. E pei ona outou silasila mai, ua tatou taumamao faaagafesootai uma i le asō, ia se’i aveese a tatou ufifofoga. E matagofie le vaai atu ia te outou i le aso, ma e talisapaia le auai mai o tagata uma. Ou te fia ta’ua faapea e ala i tekinolosi, o loo tatou fono i le asō ma sui auai mai eria uma i totonu o le S&I i le lalolagi atoa. E faafeiloai ma faafetai atu mo lo outou auai faatasi ma i matou i le asō. Adam, se’i e aumaia nisi faamatalaga o la tatou talanoaga?

Brother Adam Smith: Te fiafia e faia. Muamua, faafetai ua tatou mafuta i le asō. Matou te alolofa ma talisapaia faiaoga taitasi o Seminare ma Inisitituti, taitai faamaopoopo, taitai lagolago, faifeautalai, ma taitai i le lalolagi atoa. Anoanoai mea lelei ua tou faia ma ua manuia ai le toatele. Faafetai. Matou te iloa ua mumū i o outou loto se alofa mo le faamoemoega o Seminare ma Inisitituti—tou te fia fesoasoani i talavou taitasi ma talavou matutua ia malamalama ma faalagolago i lo latou Tama Faalelagi ma Iesu Keriso, ia iloa ma sili le alolofa ma mulimuli ia i La’ua. E te fiafia i le faamoemoega aua e te alofa i au tamaiti aoga aemaise lava ona e te alofa i lou Faaola. Mo le tele o tausaga, sa manuia le fesoasoani atu a le S&I i tamaiti aoga ia iloa atili Iesu Keriso. Ae ua tatou iloaina i lo tatou lalolagi i aso nei se manaoga faanatinati e faapotopoto mai nisi talavou ma talavou matutua ia Iesu Keriso, ma tatou te mananao e faia i le fatuina o aafiaga e aoao ai i le liuaina, talafeagai, ma le auai. Ua tatou iloa o nei aafiaga e aoao ai o le a tutupu pe a taulai i manaoga o a tatou tamaiti aoga e pei o aafiaga taitasi e aoao ai tatou te faatotonugalemu ia Iesu Keriso, Lana talalelei toefuataiina, ma Lana misiona togiola—ma a o taulai atu a tatou aoaoga i tusitusiga paia ma upu a perofeta soifua a o tatou aoao atu le aoaoga faavae a Keriso. Ua tatou iloa a tatou faia nei mea o le a tatou valaaulia le Agaga Paia e faatino le matafaioi e na o Ia e mafai ona faatinoina: ia fesoasoani i nei talavou ia liua i le Alii, tumau i luga o Lana ala o feagaiga, iloatino le upumoni mai mea sese, ma faapotopoto saogalemu i lo latou Faaola o Iesu Keriso ma toe foi atu i lo latou Tama oi le Lagi.

O le faamoemoega o punaoa o le a matou faailoa atu ia te outou i le asō o le faamatalaina lea o le uiga o le fesoasoani i tamaiti aoga ia oo i le liua, talafeagai, ma le auai—e faamatala i se auala e faavae i mataupu faavae nisi o tomai ma faiga e mafai e se faiaoga ona faaaofia e fesoasoani ai i tamaiti aoga. Ua matou fatuina foi ni punaoa faaleaoaoga faatasi ai ma faataitaiga ma valaaulia e faataitai ma faaaoga. Tatou te mananao foi ia sili atu le lelei i le fuaina o o tatou aafiaga i olaga o tamaiti aoga ina ia mafai ai ona tatou iloa le mea o loo tatou lelei ai—ina ia mafai ona tatou faaauau pea ona fausia i luga o lena—ma faailoa mai foi avanoa e taulima ai manaoga o tamaiti ia sili atu ona lelei. Faamoemoe e uma lenei aso, ua tou malamalama i nei punaoa ma sagisagi ai ma se faamoemoega pupula e agai i luma e faaaoga ma toe faatatau i la tatou sini tupito, ia fesoasoani i tamaiti a’oga ia iloa Iesu Keriso. O le mea lena ua tatou i ai iinei. Faafetai Sister Scott.

Sister Scott: Tai lava. Talisapaia le tatou mafuta ai i le asō. Ia amata loa le tatou fesili muamua. E i ai le fesili a Sister Jessica Brandon mai le Eria o Amerika Matu Sisifo. Sister Brandon, saunoa mai.

Sister Jessica Brandon: Tai lava. A o tatou iloiloa nei pepa o aoaoga, o la’u fesili: E i ai se faasologa patino e tatau ona taulai i ai i nei tomai ma nei eria o le taula’iga? Pe o faasolo lelei?

Sister Lori Newbold: Jessica, faafetai tele mo le fesili. Te manatu o le tali puupuu o le leai. Ae i le mafaufau ai pe faapefea ona filifili le faasologa e alu ai, te fai atu o le mea muamua—ma ou te manatu o le mea muamua lava—o le faatuatua i le Faaola o Iesu Keriso ia iloa ai e mafai ona Ia fesoasoani ia te oe i soo se mataupu faavae po o se faatinoga e te filifilia. Ma o le a e filifili o meafaigaluega o le faavasegaga ua tatou maua o le nofoaga sili lea e fesoasoani ia te oe e faailoa mai ai po o a aafiaga o loo maua e au tamaiti aoga.

Sister Brandon: Lelei. Fa’afetai.

Brother Chad Wilkinson: Tasi se mea e fia faaopoopo. Faafetai tele lava, Sister Brandon. Aua le soona faafaigataina, pe soona auauina. O meafaigaluega nei e fesoasoani; o tomai nei e fesoasoani ia te oe. I lo’u mafaufau—o se manatu i lau fesili—i le Alema 48, e i ai se mau ua tou masani uma i ai. Fai mai le fuaiupu 17 O Mamona lenei o loo tautala. Fai mai a ia, “Ioe, e moni, e moni, ou te fai atu ia te outou, a na pei tagata uma sa i ai, ma o i ai, ma o le a i ai, o Moronae, faauta, po ua luluina i lalo e faavavau mana o seoli; ioe, po ua le maua e le tiapolo se mana i luga o loto o le fanauga a tagata.”

Ia, o le a se mea e uiga ia te ia na afua ai ona faauilavea Mamona? Ou te masalo o le mataupu faavae e tasi e mafai ona tatou talanoaina o le na ia faaalu se taimi e faamalosi ai aai na vaivai. O lea na ia taulai ai i nofoaga vaivai, ma avea i latou ma malosiaga. O lea la, e ala i lau iloiloga faaletagata lava ia, e ala i le matauina o supavaisa po o i latou na e talosagaina e fesoasoani—tupulaga, faapea foi au suesuega a tamaiti aoga—e mafai ona e amata faailoa mai po o a ni nofoaga vaivai ma atonu e amata ai iina.

Sister Brandon: Na o le tasi lava se manatu—e faapoopo i le saunoaga a Sister Newbold. E mafai ona taufaafefe le suiga, e taufaafefe foi le tufaina o iloiloga i se vaega o talavou ma talavou matutua ma taumafaufau po o le a le mea o le a e maua mai. O se tasi o mea sa fesoasoani moni ia te a’u i le tele o tausaga, o le faailoa lea o nei talavou ma talavou matutua o se tasi o fanau faapelepele a le Tama Faalelagi. A tatou taulai i lena mea, nai lo le fefe ma le vaega a le tagata natura o le “E faapefea ona vaai mai tagata ia te a’u?” ma taulai i le mea moni e alofa tele lo tatou Tama Faalelagi ia i latou taitasi ma o se vaega lena o lo tatou valaauga po o la tatou galuega, o le fesoasoani ia latou iloa lo latou Faaola mo i latou lava, ou te iloa e fesoasoani tele lena mea. Ma na o lou fia faapea atu, ou te matuā talisapaia le taulai i le fausia o a tatou sootaga taitasi ma a tatou tamaiti aoga, ia mafai ai ona tatou fesoasoani ia latou ausia lena faamoemoega.

Brother Smith: Faafetai, Jessica. Ou te manatu o nei punaoa uma, ua tatou matuai taumafai lava e taulai atu i ai ma faafaigofie ma soofaatasi ma fausia i luga o mea sa tatou aoaoina i le tele o tausaga. Ma ou te manatu foi o le a outou vaai i elemene i nei punaoa o faavae o le Aoao Atu ma le Aoao Mai o le Talalelei. O le a outou vaai i elemene o le “Aoaoina Loloto.” O le a outou vaai i tosinaga mai ia i latou e taitaia i tatou i le taulai i le Faaola, faalogo, matau, iloatino, faamumu se afi i loto o tamaiti aoga. Ma sa matou taumafai moni lava e faafaigofie, ma taulai i ai. E ui la ua tuueseese nei punaoa i pepa eseese o faamatalaga, ae faamoemoe tatou te vaai i ai o se mea e tasi. O lena la mea e tasi o la tatou galuega e fesoasoani i se tamaitiiti aoga ia iloa atili le Faaola. E le mafai ona tatou faia lena mea e aunoa ma le Agaga Paia.

O le auala numera tasi e valaaulia ai le Agaga Paia o le alolofa ia tatou tamaiti aoga, taulai ia Iesu Keriso, ma faalagolago i le mana o le upu a le Atua. Ua tatou iloa foi ua finagalo ma naunau le Tama Faalelagi e fesoasoani ia i tatou, a o tatou taumafai e fesoasoani ia te Ia, e fesoasoani ia i latou. Ua tatou iloa foi a o tatou sailia le Tama Faalelagi i le tatalo e ala i sau lava iloiloga, a o tatou fesili i a tatou tamaiti aoga i le mea latou te moomia, ma a o tatou talosaga atu i se supavaisa po o se tasi e tupulaga e sau ma aumai nisi faamatalaga, o na mea uma e valaaulia ai faaaliga, ina ia mafai ona tatou fesoasoani i se talavou ia iloa Iesu Keriso.

Sister Scott: Sister Sara Bradley, o loo tatou faatasi ai mai le Eria o Sate Leki Iuta, se’i e faasoa maia lou aafiaga?

Sister Sara Bradley: Ioe, ou te fiafia e faia. I le mae’a ai lava ona muai faaaogaina o nei punaoa, sa ou matua faagaeetia i le faigofie o le faataatiaga, ma le maioio o le fauga. Sa matua faigofie ia te a’u lona faagasologa. Na ou amata i meafaigaluega o le iloiloga. Na’u faaaogaina le iloiloga o a’u lava ma le iloiloga a le tamaitiiti aoga, ma sa fesoasoani lo’u supavaisa. Ma sa ma iloiloa le mea sa ou i ai. O le isi, sa’u naunau ma lo’u supavaisa i le mea sa’u manao e taulai i ai e fua i la’u iloiloga ma iloiloga o a’u tamaiti aoga i le mea sa ou i ai. Ona ou agai lea i luma. Sa ou alu i le tusitaulima fou o le Aoaoina o le Aoao Atu o le Talalelei . Sa ou alu i le punaoa o “Tomai o le Atinaega o Faiaoga.” Ma sa aveina tonu a’u i le mea sa’u manao e taulai i ai. Sa’u faitau ma suesue na mea, ona ou toe alu lea i lo’u potuaoga, ma sa na ona ou taumafai e faatino le faiga i ni ala se tele, sa’o? Faamoemoe la ua ou faateleina le tomai o a’u tamaiti a’oga ia o’o i lena liuga, talafeagai, ma le auai. O le mea maoae, sa’u toe foi mai ma toe faaaoga le iloiloga e iloilo ai lo’u agai i luma, e vaai pe i ai se mea na sui. O le mea moni e na ona e toe amata faaaoga o lena iloiloga e iloa ai le isi mea e sosoo. Ona toe foi lea i punaoa e fesoasoani e saga faaleleia ma alualu ai i luma.

Brother Gary Lowell: Se a sau fautuaga i se tasi e musu e faaaoga nei meafaigaluega, aemaise pe a faigata ona tatou fetaiai ma le faailoaina ma le talanoaina o vaivaiga? Ona o lena, mata e i ai se tiutetauave faapolofesa po o le faaletaitaiga e faatautaia soo ai nei suesuega?

Sister Newbold: E mafai sa’u tala i le mea lena? Ma ou te fia fai atu ma le faaeteete, ae o nisi taimi tatou te lagonaina le tele o le atuatuvale i le i ai o se tasi i lo tatou potuaoga, pe a sese ni mea tatou te fai. O nisi la taimi o le aafiaga o le tagata natura lea e oo mai ia i tatou le fefe, i se tasi e faitio. Ona ua ou tuuina atu lo’u loto ma le agaga i nei alii ma tamaitai talavou ua ou alofa tele i ai. E faigata la ona sau ma fai atu, “Lori, e tatau ona faaleleia lou loto.”

Ou te masalo e le o le mea lena tatou te fai atu soo ai i le fuaina. Ou te manatu o loo tatou fai moni atu, sei o tatou galulue pea e fatu se aganuu o le faatuatua i le Faaola o Iesu Keriso, ia mafai ona tatou sui, ma tatou tuputupu ae. O la’u tala lena e fai atu i se tasi. O nei meafaigaluega e mo le tuputupu a’e. E tuputupu a’e e ala i le salamo. O le uiga o le salamo o le suia. E na o le Faaola e mafai ai. O lea, ou te manatu ai—a mafai ona tatou vaai, te iloa—o le aso ua ou fai atu ai pe a ua fai atu faiaoga i se tasi, “E mafai ona e sau e matau a’u? Ua alagatatau mo nei tamaiti aoga le mea sili e tatau ona ou tuu atu, ou te iloa ou te le’o oo atu i nisi. Pe mafai ona e fesoasoani mai ia te au?”

Brother Bert Whimpey: E mafai ona ou ta‘ua foi lenei mea? Ona o lenei faatulagaga—ona o o tatou faiaoga matagofie o le siteki, o i latou o loo aoaoina le toatele o nei talavou lelei—o nei meafaigaluega o le faavasegaga o se punaoa. Mo faiaoga faapolofesa, o se mea ua faamoemoeina. O le a tatou aoaoina le ala e faaaoga lelei ai, ma taumafai e faavae lena aganuu. Mo tatou faiaoga tofia a siteki, o se punaoa e mafai ona tou faaaoga e tusa ai ma o tou manaoga ma naunauga. Soo se mea e te manatu e mafai ona fesoaoani.

Brother Wilkinson: Gary, o se fesili manaia tele, e talisapaia mea uma o e faia i lou tofiga. Fa’afetai. Ua e faia le fesili e mananao i ai tagata uma. O se vaega e tasi o le fuataga—i tusitusiga paia, e tele ni fesili musuia, ae e tolu ua matua faamanuiaina ai a’u. Ma o le a outou vaai i lenei elemene o le fua. Le taulealea mauoa, “O le a se mea ou te lei faia?” ¹ O lena fesili, lena fua ua aumaia ai faaaliga mai le Faaola. Na i ai lana filifiliga pe mulimuli ai pe leai. O Paulo, po o Saulo, i le ala i Tamaseko, “Le Alii e, se a le mea e te finagalo i ai ou te faia?” ² Ioe, o se fua lena. Ma le lona tolu o Iosefa Samita a’o lei oo mai le asiasiga muamua a Moronae na fesili—sa ia sailia se faamagaloga o ana agasala. Ae faapea foi le fesili “O le a lo’u tulaga i luma o le Alii?” ³ Ou te manatu o na ituaiga o fesili o’oo’o lea e fua ai i tatou—e le faapea o se tasi e iloiloina a’u e pei o le “Tuu a’u so’u alu i le Tama Faalelagi ma le Faaola, ma ia La ta’u mai ai le mea o o’u i ai.” Ma a o tatou lotomatala i lena mea, ou te manatu e tafe mai faaaliga ma tatou lelei atili ai nai lo le mea tatou te i ai.

Brother Jack Menez: Na o lo’u talisapaia, e pei ona ou faalogoina le tele o manatu, le aitia o le fauina o se aganuu o le atina’ega, ma le faalagolago i le Faaola, e oo i nisi o popolega tatou te lofituina ai i nisi taimi o ni faiaoga. O lea—i le taimi nei i lo’u tofiga ou te fesoasoani i isi faiaoga e faaleleia. O se tasi la o mea ua ou talisapaia o le mana o le Faaola e fesoasoani ai ia tatou fesoasoani i isi faiaoga ma paaga o siomia ai i tatou. E fesoasoani ai ia tatou tamaiti aoga. A o faalagolago faiaoga ia Iesu Keriso, e mafai ona saga molimau i Lona alofatunoa.

Ma o lea, e pei ona ta‘ua, o le taitai mauoa, talavou. Ou te fiafia i le faataitaiga a le Faaola, na Ia fetalai ai, “O nisi nei o mea e tatau ona e faia, ma ua uma ona e faia na mea. E matagofie lena mea,” ona tuu atu lea o le mea e tasi e mafai ona ia galue ai. O nisi taimi, o se tasi o mea e mafai ona tatou faia, i le avea ai ma taitai o le faapea atu, “Malo lava. Ou te manatu ua e faafiafia i le Alii. Te manatu o le a fiafia le Alii i mea lelei uma o loo tou faia, ma e mafai ona tatou auai faatasi i lo tatou faatuatua ia Iesu Keriso e faia lena mea e tasi?” O nisi taimi e fesoasoani ai lena mea, a o tatou atia’e lena aganuu fou o le atina’ega, e taumamao ai i soo se lagona o le lē agavaa po o lagona e le o lava mea o tatou faia, po o le, o le a le lava lo tatou lelei. Ae, e mafai ona tatou utua le alofatunoa o Iesu Keriso i na taumafaiga i se ala e fua mai ai se mea e sili ona aoga. Ona tafe atu ai lea i potuaoga, ma mafai ona tuu atu ni molimau sili atu ia tatou tamaiti aoga i le mana o Iesu Keriso e faamalolosia ai i tatou e faia mea e faigata tele ona faia na o i tatou.

Sister Scott: Sister Sorenson, e mafai ona faasoa mai lau fesili?

Sister Jamie Sorenson: Oi ioe. Ua ia i tatou faamoemoega, o taunuuga e 3 o le talafeagai a le tagata aoao, auai, liua, o auala e 5 e fesoasoani ia te a’u le faiaoga e ausia ai na taunuuga, ma faiga e 25 e mafai ona fesoasoani ou te faataunuuina ai la’u matafaioi o se faiaoga. Ma le isi, ia tutotonu Keriso, faavae i mau, ma taulai i le tagata aoao. Sa ou faaaoga ni iloiloga eseese se tolu e seti ai sa’u sini tuputupu ae faapolofesa. Foliga e fai si lofituina. Tele naua. O le a la le taulaiga e tatau ona i ai?

Brother Whimpey: O le sini o le fesoasoani i talavou ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma saunia mo le ola e faavavau. O le mea lena ua tatou taumafai e fai. O la tatou matafaioi la, o le fesoasoani. E faapefea la ona ou fesoasoani? Ua mafai la ona ou vaai atu i o tatou faiaoga i siteki--latou te vaai i nei punaoa uma ma fai mai, “E foliga ua tele naua.” E mafai la e se faiaoga ona faapea atu, “O le faamoemoega lena. E faapefea ona ou faia lena mea?” Ua ou fiafia ua e fesili. O le ala sili e fai ai o le fesoasoani i au tamaiti aoga ia maua aafiaga o le liua, talafeagai, ma le avea ma ni ō. “Ua lelei, faafetai mo lena mea, ae e faapefea ona ou fatuina na aafiaga?” Ua ou fiafia ua e fesili. O le faiga, ou te manao ia e alofa ia i latou e te faiaoga ai, ma aoao atu i le agaga, ma taulai ia Iesu Keriso, ma aoao atu le aoaoga faavae, ma valaaulia e aoao ma le filiga. “Ae faapefea ona ou faia lena mea?” Ua ou fiafia ua e fesili. Ona ua i ai nei faatinoga, o le a fesoasoani nei tomai ia te oe. Ae toe foi uma lava i le faamoemoega.

O lea a o nofo i lalo se faiaoga ma tatala a latou tusitusiga paia ma mafaufau ia latou tamaiti aoga, faamoemoe latou te le o mafaufau i nei mea e lofituina; ae e mafaufau, “E faapefea ona ou fesoasoani i nei tamaiti aoga ua ou alofa i ai? E faapefea ona ou fesoasoani ia latou malamalama ma faalagolago i aoaoga ma le Togiola a Iesu Keriso, ma agavaa mo faamanuiaga o le malumalu ma saunia mo le ola e faavavau?” Ma pe a e manatu moni lava i ai, ua tatou talanoa i le ala o feagaiga lea na aioi mai Peresitene Nelson ia tatou auai i lenei faapotopotoina o Isaraelu. Afai la e te manatu e lofituina, “Ou te le iloa pe mafai ona ou faia,” tau ina taulai i le faamoemoega.

Brother Jason Willard: Jamie, se’i ou faaopoopo atu se tasi o mau mai lo’u faiaoga tausaafia i le Tusi a Mamona: E mai ia Uso Nifae. Na ia faaupuina faapea i le 1 Nifae 6:4: “Ona o le atoatoa o loʼu faamoemoe ia mafai ona ou faatauanauina tagata ia o mai i le Atua o Aperaamo, ma le Atua o Isaako, ma le Atua o Iakopo, ma faaolaina.” O mea uma na fai e Nifae o le fesoasoani i ona uso ma tuafafine ia faaolaina, ia talitonu ia Iesu Keriso i se ala e fesoasoani ai ia i latou… ma maua le ola faavavau.

Jamie, faafetai i le fai mai o le fesili tonu. Aua o le mea moni ua galo ia oe faavae taua e 7, o aoaoga e 16 i le faaiuga, ma aafiaga uma o le atamai i aoaoga faavae ia e tatau ona o faatasi. O le isi la taimi e fai ai le fesili lea, ia tuu i ai mea uma na faatonuina ai oe. O le tele o lenei mea o loʻo talosagaina oe e fai, ae o le mea moni, e oʻo mai i lalo i le mea e tasi. Ou te alofa i le Faaola ina ua Ia talanoa ma Maria ma Mareta, ma e foliga mai na e te i ai i le faatauanau a Maria, a Jamie, ina ua fetalai Iesu, “E tasi le mea e manaomia, ma ua filifili e Maria le mea lelei.” ⁴ Jamie, faafetai i lou filifilia o lena mea lelei--ma faiaoga taitasi uma i le lalolagi, ua outou filifilia lena mea lelei, o le nofo i aao o le Faaola, ma avea o Ia ma totonugalemu o mea uma tou te fai. O lea la, ia faamanuia outou i lena taumafaiga.

Brother Smith: Jamie, ou te fia fai atu se fesili tulitatao, pe a mafai. Manaia le aoao mai o Brother Whimpey ma Brother Williard e uiga i le taulai atu i le mea e sili ona manaomia, o le faamoemoega lea o seminare ma inisitituti. Ae, Jamie, i le avea ai o se faiaoga, faapefea ona e iloa pe o ausia le faamoemoega i olaga o au tamaiti aoga?

Sister Sorenson: Lelei. Ou te le iloa po o le tali lea o le a aoga, ae na oo mai ia te a’u a o faamalamalama e tagata. O le talafeagai, avea ma ni ō, ma le liua ou te vaaia i o latou olaga, e sa’o? Pei o na mea e tolu e faasino tonu ai i tatou i le faamoemoega. Ou te vaaia la o tupu i lo latou liua. Ua ou vaai i ai i fafo atu o le seminare. Ou te vaai ai i le seminare a o tusi o latou manatu ma o latou aafiaga. O mea na e tolu. E pei, e faasinoa tonu i tatou i le faamoemoega.

Brother Smith: Faafetai tele. Mata e aoga, Jamie, lou fesili sa’o i au tamaiti aoga pe o taitai e o latou aafiaga i le seminare po o le inisitituti i latou e liua ai, talafeagai, ma auai?

Sister Sorenson: Oi, ioe. Ma o iloiloga tatou te avatua ia i latou, ma tusa lava pe le aloaia, “Pe o faapefea mai, ae pe o aoga foi? O aoga lenei mea?” Ou te manatu o se fua tele lea pe o aoga faapefea le faamoemoega.

Brother Smith: Faafetai lava. Ia ou te manao ia e mafaufau faapea ua e fesili atu i au tamaiti aoga i lenei fesili ma latou faailoa mai se mea latou te lagona e mafai ona lelei teisi atu ai le seminare—sei o tatou faapea la i le vaega o le auai—latou te faapea mai, “E matuai lelei lava Sister Sorenson; matou te fiafia i lana vasega; e ofoofogia tele o ia. Ae ua e vaai i si faamatalaga itiiti ia latou tali lea ua e iloa ai se avanoa e fatufatu atili ai le auai. O le a se mea e aoga ia te oe o se faiaoga, ia mafai ai ona fatufatu atili le auai i tou potu aoga?

Sister Sorenson: Ou te manatu mo au o se faiaoga e aoga tele le talanoa i ai, alu i lou supavaisa ma faapea atu, “Ei, o nisi nei o manatu faaalia o loo ou mauaina. Fesoasoani mai ia ou malamalama ai. Talanoa foi ma isi tagata faigaluega, “fesoasoani mai ia ou malamalama. Mata o le a lenei mea? E faapefea ona ou faia ia lelei teisi atu? Te manatu o le a aoga na mea.

Brother Smith: Matagofie. Ma o le mafuaaga na ou manao ai e fesili atu ia te outou nei fesili o le manatu tonu lava lena e le gata o le faavasegaga ae faapea foi punaoa fou o le Aoao Atu ma le Aoaoina Mai o le Talalelei ona sosoo ai lea ma punaoa faaleaoaoga: ina ia mafai e se faiaoga ona faapea atu, “Ou te manao i au tamaiti aoga ia ausia le faamoemoega i o latou olaga. Ua ou matauina le latou fai mai e manaomia lenei mea. Ou te faaleleia faapefea lena mea? A outou fefautuaai la ma isi faiaoga ma lou supavaisa, ma talanoa ma au tamaiti aoga, ua mafai ona e faailoa se mea e mafai ona e faaleleia. O loo i ai i le tusitaulima se faamatalaga o lena mea, o loo i ai i le punaoa mo aoaoga se faataitaiga. Ua i ai nei sou tomai ua mafai ona e faata’ita’ia ma faatino, ma le faamoemoe e faaleleia--pei ona faatoa ta’ua e Brother Willard ma Brother Whimpey--i le olaga o lena tamaitiiti, ua ausia le faamoemoe, o le fesoasoani ia o mai i le Faaola.

Sister Wendy Parker: E toe foi uma lava i le faamoemoega. E amata lo tatou faamoemoega ia Iesu Keriso. O Iesu Keriso o le alasa’o e avatu ai i tatou i le malumalu—o tatou tamaiti aoga—ma le ola faatasi ma lo tatou Tama i le Lagi. O vaega uma o lenei polokalama fou sa ou faitauina, na taulai atu ai au ia Keriso. O tomai uma e totonugalemu ia Keriso. Ma sa ese le mamana ia te a’u lava ia. A o ou faamaopoopoa isi faiaoga ma fesoasoani ia i latou e atiae na lava mea, o le a suia e lenei meafaigaluega la tatou polokalama i se ala lelei, ma tamaiti aoga ou te faafetai ai tele. Na ona ou fia faafetai tele atu foi.

Brother Whimpey: Ou te iloa o Shadrack—o loo i ai o ia i le Eria o Aferika i Sisifo. E i ai le aafiaga o Shadrack i le fesoasoani i se tagata a’oga ia maua lena aafiaga i le potuaoga. Shadrack, pei na e faasoa mai, e te manao e faasoa mai lena mea ia i matou uma?

Brother Shadrack Bentum: Ioe, Brother Bert, tai lava. E tasi le tamaitiiti i la’u vasega e ese le matamuli, ma e le faitau i le vasega, fesili, pe tali i fesili. Sa faaauau pea lenei mea mo sina taimi seia oo ina ou faaaogaina nisi o mataupu faavae i le “Iloa Manaoga o Tagata Aoao Taitoatasi, Tulaga, ma Manaoga e Aoao ai,” faatasi ai ma le faamamafa i le tomai “Matau ma Fesili e uiga i Mea e Fiafia i ai Tamaiti Aoga” i lalo o le “Tomai o le Atinaega o Faiaoga.” Sa ou mataua e masani ona sau le tamaitiiti aoga i le inisitituti e suesue mo suega iti ma suega tetele o le aoga. O lea sa ou fiailoa ai le kosi sa ia suesu’ea, ma talanoa ia te ia i nisi taimi e uiga i ana galuega o le aoga. Ona ou iloa lea e i ai foi sana uo lelei i la’u vasega. Ou te tuua lava o ia i le vaega e tasi ma lana uo i taimi o gaoioiga faavaega, lea e tele ina ou faaaogaina ona o ia. Na iu ina amata ona ia faitau i le vasega, tali i fesili, ma faasoa aafiaga. Fai mai se tasi o ona manatu faasoa—sa ia faasoa atu sa masani ona ia matamuli i le vasega, ae ua ia lagona nei le toafimalie. Taimi nei foi o ia ua fai ma sui o lana vaega e faaleo so latou sao, o ia foi e muamua i taimi uma i le vasega. Ua sili atu le aafiaga mo ia e aoao ai.

Sister Scott: E talitonu ua tau atu ai i se fesili a Brother Douglas Franco. E sau mai le itulagi o Amerika Saute Matusisifo, ma e valaaulia Brother Franco e fai mai loa lana fesili.

Brother Douglas Franco: Faafetai. Talofa tagata uma. Ioe, e faiā la’u fesili i le matafaioi a le faiaoga, ma le aafiaga o le tagata aoao. E mafai faapefea ona tatou iloa atili ma mautinoa o mea o tatou faia i le vasega e fesoasoani i le tamaitiiti aoga ia maua aafiaga o le liua, talafeagai, ma le auai? Mo se faataitaiga, o se vasega e totonugalemu ia Keriso o tatou aoao atu, e ono fesoasoani i le liuaina, i lea taimi, o le aoao atu i le agaga e fesoasoani foi i le liuga. E faapefea ona tatou mautinoa i lea mea ia fesoasoani ai i faiaoga, pe a ia i latou nei fesili, pe mananao foi e faaleleia nisi o nei mataupu faavae?

Brother Willard: Brother Franco, ta’u mai po o fea e te faiaoga ai. O fea e te alu i ai?

Brother Franco: Faafetai. Ou te faiaoga i le inisitituti o Bolivia—Cochabamba, Bolivia.

Brother Willard: Lelei tele Brother Franco. Manaia ua tatou faatasi i le asō. Brother Franco, te masalo na faamanuiaina oe i le iloa ai o loo tutupu na aafiaga o le liua i lau vasega. Ou te manatua se taimi na e lagona ai le Agaga Paia o aoao atu oe faapea o na aafiaga o le liua na tutupu moni i lau vasega?

Brother Franco: Ioe. Ou te manatu o nisi taimi e ta‘ua ai e tamaiti aoga lenei mea—o nisi taimi i le vasega po o le uma foi o le vasega. Nisi taimi e tusi mai i le WhatsAppp, mo se faataitaiga latou te fai mai, “Brother Franco, faafetai mo le aoaoga. Sa musuia a’u e fai.” O isi i le vasega, ou te vaaia o tusitusi, tusa lava pe ou te le faatonua e tusi se mea i apitalaaga, apitalaaga mo suesuega. O la lava e tusitusi. O o latou uiga e faaalia ai lo latou lagonaina o le mea lea. O se mea lea e mafai ona ou ta’ua.

Brother Willard: Ese le manaia. Ou te manatua ai upu e tolu na aoao mai i tausaga ua alu e Elder Bednar e uiga i le iloatino, mataitu ma le faalogo ao tatou aoao atu. ⁵ O le ute lea o le mea sa faatoa e faasoa mai. Na e iloatino pe mataituina ni mea na tutupu i le vasega po o le uma o le vasega. Talu ai na matauga, e tai pei o aoao atu e le Agaga Paia oe sa tupu se mea nei sa maoae. Brother Franco, se a se mea e mafai ona e fai e faalautele ai? Se a se mea e mafai ona e faia—malie, te le iloa le upu. Se a se mea e te faia e faatupu ai le avanoa mo lena mea ia tupu soo i lau vasega?

Brother Franco: Na ou mafaufau—ua tele le mau mea. Na ou mafaufau i meafaigaluega e iloilo ai. Te manatu e aoga na mea, ia mataituina e se isi tagata, e se uo po o se tasi, lo’u supavaisa, ia mafai ona ou lagona ma sue mea e tatau ona ou galue ai. O le meafaigaluega foi o iloiloga na tuu ai i tamaiti aoga le fesoasoani—sa matou faaaogaina foi. E maoae le vaaia o o latou lagona, o a latou tala, i le vasega—o latou lagona i le faiaoga, le vasega, ma la matou matafaioi. E maoae. Matou te vaaia taunuuga ma fai atu, “Oi leai, e manaomia lo’u galue i le mea lea.” Po o le mea lea o loo lelei ona fai. E fesoasoani le faaaoga o le mea lea, ae o le talanoa foi e uiga ia te a’u, atonu o lo’u faia o le mea sili pei ona tou ta’ua, taiala e le agaga. Ia gauai atu i mea latou te manaomia ma afai o le faia o le mea o loo ou faia o le a fesoasoani ia i latou e taulima ai na manaoga.

Brother Willard: Brother Franco, faafetai tele lava. A o e faasoa mai lena molimau, lena manao ia lelei atili, sa ou lagonaina le Agaga Paia o molimau mai i le tele o le alofa o le Tama Faalelagi ia te oe ma faiaoga pei o oe i le lalolagi atoa. A o tatou faia le mea sili e alolofa i le Atua, ma alolofa i Ana fanau, o le a Ia faamanuia i tatou, ma faaali mai pe o a mai i tatou i le vasega, ma o le a Ia ta’u mai pe o tutupu na aafiaga o le liua, talafeagai, ma le avea ma ni o, e fesoasoani i nei talavou uma ma talavou matutua ia latalata atili ia Iesu Keriso. O lea Brother Franco, ma outou uma, faafetai tele mo talavou uma ua tou faamanuiaina. Faafetai mo le faasoa mai o ou aafiaga.

Brother Franco: Faafetai.

Sister Newbold: Brother Willard, ou te alofa— Faafetai lava. O lena fegalegaleaiga ma oe, Brother Franco, ma ou te toe ta‘ua foi le lotofaafetai ma le alofa mo oe ma o tatou faiaoga uma. Sa’u mafaufau foi i ni nai mea e uiga i le liua, talafeagai, ma le auai. Te manatu e taua tele. E toatele tagata na fesili mai mo ni aoaoga faamasani e siomia ai na mea patino ma ia manatua o le liua i le Faaola o Iesu Keriso ma lo tatou Tama oi le Lagi, taua, ma le auai, o taunuuga ia o mea o loo tatou faia i le aoao atu. Ae a latou le iloa le faatatauga i o latou olaga, ona sili lea ona faigata ona latou maua se aafiaga latou te moomia. Ma o le Agaga Paia e faia le mea lena.

Sister Scott: Sa ta’u mai e Jamie Scott se tala matagofie. Sister Scott, e mafai ona e faasoa maia lena tala?

Sister Jamie Scott: Ua lelei. A o o’u taulai atu la i faiaoga e pei o Keriso, ou te lei tuuto i se faiga faapitoa po o se metotia, ma ia fausia le faatuatua ia Iesu Keriso ma avea atili e pei o ia. I se tasi la aso, a o ou faiaoga, sa ou maua se uunaiga e fesili i a’u tamaiti aoga, “O le a se ituaiga lesona o le a fesoasoani ia te outou ia latalatai atili ai i le Faaola?” O a’u vasega uma la e fa, sa ta’ua ai le musika. Sa tonu ai e fai se aso matou te aoao ai e uiga i le Faaola e ala i musika. E mafai e tamaiti ona faasoa mai se viiga po o se pese, soo se mea e fesoasoani latou te omai atili ai ia Iesu Keriso. O nisi o i latou sa taina se mea faimusika. O nisi sa fai mai ou te taina i luga se pese. Sa pepese nisi. Sa i ai ni viiga ma ni pese eseese. A o lei amata po o le uma ona latou faasoa le musika, sa latou talanoa ai ma tuuina mai molimau i lo tatou Alii ma le Faaola. Ma o se aso moni sa lagonaina ai e tagata uma le agaga. O isi sa faasoaina ni aafiaga na latou maua i lena lava taimi. Ma o nisi, na faamanatu ai e le Agaga ma moni sa latou maua i le tuanai. Ma sa toe molimauina e le Agaga ia i latou lena mea moni.

Ma sa i ai se alii talavou e toatasi faapitoa e auai i le seminare, ae sa sili ia te ia lona le i ai iina. Sa sii lona lima ma fai mai, “Ua fa tausaga ou te le’i lagonaina lava le Agaga. Ma ina ua ta e Ben lena viiga,”—o le “Ua Ou Iloa Lo’u Faaola,” i lana vaiolini, na ia fai mai, “Sa ou lagona le Agaga ma sa manaia.” Ma e ese lo’u faafetai ona e silafia lelei e le Alii manaoga o Ana au filifilia. Faafetai i lo’u faalogo ma fesili mo mea latou te mananao ai, ia mafai ai e lenei alii faapitoa ona lagona le alofa o le Faaola ma iloa ia lava, ma e alofagia.

Sister Scott: Faafetai mo le faasoa. Brother James, na e sii mai lou aao.

Brother James: Ia, faafetai lava. Fia faaopoopo atu i mea ua ta’ua. Matagofie tele mo a’u lava nei aafiaga. Sa ou taumafai e faaaoga meafaigaluega e fua ai, anomea o matauga, na avatu i tamaiti aoga talu ai. Ma ou te faaaogaina na mea i la‘u vasega, ma o se faaaliga ia te a’u—e pei lava ona sa aoaoina ai a‘u iinei i le asō e faapea, o le ute o lenei fua faatatau o le fesoasoani lea ia i tatou ia maua nisi faaaliga i vaega e mafai ona tatou faaleleia atili.

Ou te fia faitau atu se mea se tasi o mea i lenei sailiga na ta’ua e se tasi o la’u vasega e uiga i le talafeagai i aafiaga i le vasega. I le maea ai o le sailiga—sa ou vaevaeina anomea na aoina. Ma sa ou tau ai i se faamatalaga mai se tasi o fesili na tali e se tamaititi aoga. Ma sa fai mai le tamaitiiti aoga, “Sa matuai talafeagai le vasega mo a’u ona sa fesoasoani le faiaoga ia te a’u e faafesootai ia autu o mataupu faavae o le talalelei sa ou aoaoina, ia e patino i lo’u olaga.” Sa talanoa foi le isi tagata i mea e mafai ona ou faia e fesoasoani ai ia te ia e faaleleia. Fai mai, “Ou te manao i lo’u faiaoga e faaaofia a’u i talanoaga a le vasega ma fai mai fesili ia te a’u.”

O mea la ia e masani lava ona le mafai ona ou tuu i ai—ma o le faavasegaina o nei mea ao matauina ma iloiloina aʻu e aʻu tamaiti aoga, o loʻu supavaisa, ma aʻu lava iloiloga faaletagata lava ia, na tatalaina ou mata i vaega e tatau ona ou faaleleia. E mafai ona ou fai atu o nei tomai e 25 ma faiga e matagofie tele, faigofie ona faaaoga i le taimi o lesona. Fa’afetai.

Brother Wilkins: Na o lo’u fia faasoa atu o se aafiaga vave na aoao ai a’u i le mana o le tuufaatasi o se taulai i le faamoemoega, ae o se taulai foi i tomai. O le isi aso i le vasega, sa fai se matou talanoaga e totonugalemu ia Keriso e uiga i le salamo. Sa le na o le salamo i le amio, ae o le mataupu faavae lea e mafai ona tatou ole atu ia Keriso e faamalosia o matou vaivaiga. Sa ou mafaufau foi i nisi o nei tomai mai anomea mo aoaoga. Ma a o ou vaavaai atu i tamaiti aoga o talanoa, sa ou vaai i se tasi o tamaitai talavou—sa na ona ou taulai atu ia te ia ona o lenei tomai. Sa ou taumafai e tilotilo atu i tagata ma fai atu ni fesili tulitatao. Ma sa ou vaaia pei o la e soloi ona mata. Ma o lea na ou lagonaina ai lena uunaiga e fai se fesili tulitatao ma fai atu, “Nikki, e te faasoa maia mea na aoao atu e le Agaga ia te oe?” Sa tatala mai e lenei tamaitai talavou lona loto ma na o le tagi ma fai mai ua ia maua se tali mo se tatalo ua lima tausaga, sa taumafai e salamo ae e lei ole lava i le Alii e suia lona loto.

Ma pei lava ona sa ou taulai i le faamoemoega i le vasega atoa, sa matuai totonugalemu le talanoaga ia Keriso, sa lelei. Ae ona o lenei taulai i se tomai, sa ou fiafia ona sa ou tatalo mo se gauai i tomai ia tau ina fai se fesili tulitatao, ma tilotilo i mata o tagata. Ona sa alu ai se aafiaga lelei tele, e faamoemoe o se aafiaga e suia ai le olaga atoa. Mo a’u la, sa faia le eseesega uma i le mafuaaga e avea ai le faamoemoega ma mea e amata ai, ae o le taulai i tomai e mafai ai ona oo lena faamoemoega i mea loloto atu.

Sister Scott: Faafetai, Brother Wilkins. O le sootaga o le na o le pupula sa’o i mata o se tasi, e valaaulia ai ia mafuta atu ma maua se aafiaga patino ma oe. Se ata ina matagofie. Brother Mark Espidita.

Brother Mark Espidita: Sa amata ona ou faaaogaina anomea na aumai pe tusa o le lua masina talu ai mo a’u aoaoga fou faaa’oa’o o se taitai faamaopoopo i Canvas. Sa na ona ou faatusatusa le ala sa tali ai faiaoga i mea sa ou tuuina i luga i a’u aoaoga ua mavae, na faaaoga ai le Tusitaulima o le Aoao Atu ma le Aoao Mai o le Talalelei. Sa le’i tele ni fetufaaiga i la matou laupapa o talanoaga. Ae talu ai nei, ina ua amata ona ou faaaogaina autu i le tusitaulima fou, na ou iloa ai sa sili ona gauai mai faiaoga, ma sa matuai tatala mai i le faasoa mai o o latou aafiaga.

Na ona ou fia faasoa atua o se tasi o manatu faaalia—mai se tasi o o’u faiaoga. O se aoaoga lea sa ou faia i nai vaiaso ua mavae. E faatatau i le tatalo i igoa o i latou e te faiaoga ai. Maeu ma ofoofogia manatu sa faaalia. O se tasi o mea na ta’ua e se tasi o faiaoga e faapea—se’i ou faitauina atu. Fai mai, “O se faamanatu lelei lea i faiaoga, e i ai taimi tatou te matuai naunau ai lava e aoao atu tamaiti, ma tuu ia latou lagonaina le agaga i le vasega e ala ia tatou tapenaga. Peitai, o le mea e sili ona taua o le ala e mafai ona fetuunai ai le savali e tusa ma o latou manaoga. E manaomia e tamaiti aoga se savali e talafeagai ma latou. O le ala lea e faia moni ai se eseesega pe a tatalo mo i latou taitasi pe a tapena lesona mo i latou. E aumaia ai se itu e taitaia ai e le Agaga i tatou e tautala ma aoao atu.” Sa ou le iloa moni o le a faia ai se aafiaga tele ia i latou. O lea, ou te manatu o anomea ua i ai iinei e aoga tele i o tatou faiaoga. Pau lena.

Sister Scott: Brother Kevin Brown, e te fia faasoa mai?

Brother Kevin Brown: Lagona lava le malosi ma talisapaia tele le faagasologa faafaaaliga na i ai i lenei aoaoga atoa ma nei meafaigaluega uma ua aumai. E te iloa, na ou tusia i a’u tusigamanatu, afai ou te maua se mea, e faamoemoe e ala i le Agaga Paia, aemaise mea sa ou aoaoina mai le Agaga Paia, ma e ala mai i lena punavai, o le a le vave ma le maua’i ou te faatino ai ma sui pe faaaoga? Fai mai se tasi ao lei oo iina, o le Agaga Paia e faavaeina le talafeagai mo o tatou tamaiti aoga. Ae ua taia foi a’u i le asō e faapea, o le Agaga Paia foi e faavaeina le talafeagai mo le faiaoga. O mea la ou te aoaoina i le agaga e fai pe faaaoga, e ao ona ou faia vave. E malosi foi lo’u lagona a o tatou faia, o le a tutupu vavega i le potuaoga. Ma o le a molimau faiaoga i lena mea.

Sister Scott: Faafetai tele mo le faasoaina mai o lena savali ia i matou. Ua toe tasi lava le isi o tatou lima. Brother Castro, e te manao e faasoa mai?

Brother Castro: Ioe Sister Scott, faafetai. Sa ou mafaufau i se aoaoga a Elder David A. Bednar. Fai mai, “O le tasi o mea e ao ona iloa, sa afio mai Iesu Keriso i le lalolagi e maliu mo i tatou. E taua ma o se faavae i le aoaoga faavae a Keriso. Peitai, e tatau foi ona tatou iloa talisapaia le finagalo o le Alii, e ala i Lana Togiola ma le mana o le Agaga Paia, ia ola i totonu ia i tatou—e le gata ia taitaiina ai i tatou ae ia faamamanaina ai foi i tatou.” ⁶ O lo’u lagona lena i le asō, e finagalo moni le Alii e fesoasoani mai i lenei galuega tele. E mafai ona tatou fesoasoani i o tatou talavou; ma faiaoga tofia ia faapena foi lagona.

Sister Scott: Faafetai tele Brother Castro. Faafetai atu ia i latou uma na faasoa mai i le asō. Ua tatou faalogo i ni molimau matagofie i le ala e faaaoga ai mea sa tatou talanoaina i le asō i se ala patino. Na ona ou fia faaopoopo atu la’u molimau maua’i. Ou te iloa o le galuega lenei a le Alii, ou te iloa foi e naunau mai o Ia i lo tatou atina’ega patino, ma lo tatou tomai e fesootai ai ma talavou ma talavou matutua o tatou a’oa’oina. Ou te iloa o le a Ia fesoasoani ia te outou taitoatasi a o outou faaaogaina nei meafaigaluega eseese uma sa tatou talanoaina i se auala e patino mo oe; o Keriso, ma e ala i le Agaga Paia, o le a tau atu ia te oe le mea e galue ai; ma o le mea tonu lava lena e tatau ona e galue ai, e pei ona faapupula mai e a tatou tala uma i aso nei, o le mea tonu lava lena e tatau ona faalogo i ai lena tagata. Ma e ala mai ia te oe, o le a mafai ai ona o mai ia Keriso. Ou te molimau atu ai i nei mea i le suafa o Iesu Keriso, amene.