O Le Talalelei a Iesu Keriso e Ofo Ai
Faasalalauga o Aoaoga Faaletausaga a le S&I mo le 2022 faatasi ma Peresitene Ballard
Aso Faraile, 21 Ianuari, 2022
Faatomuaga
Ou te fia amata i le faailoa atu o lo’u loto faafetai mo mea uma o loo outou faia e siitia ai le autalavou ma talavou matutua i le lalolagi atoa. Ua i ai ia te outou le lumanai moni o le Ekalesia i a outou vasega, ma e musuia a’u i le ala o loo outou auauna ma tausia ai au tagata aoga. Uso e ma tuafafine, o le talalelei a Iesu Keriso e ofo ai.
O le asō, ou te fia talanoa atu ai e uiga i le auala e sili atu ona aoga e tatou te aoao atu ai e uiga i le faatuatua, molimau, ma le natura e ofo ai o le talalelei a Iesu Keriso.
Ina ia folasia atu la’u autu, o le a ou faamatala se ata tusi ua loa ona ou fiafia i ai a e tele ina ou le manatu mamafa i ai. I tausaga ua tuanai, sa ou maua ai se fautuaga mai se uo o se e vaaia le Falemataaga o Faatufugaga. Sa ia fautua mai e faapea a e tautaua se ata i lou fale e taua le sui o le mea e tautau ai mai lea taimi i lea taimi ina ia aua nei “leiloa atu” lona i ai. Ua leva ona ma fiafia ma lo’u toalua i le atavali a Caravaggio e ta’ua O Le Valaauina o Sagato Mataio. Ona sa tautau a lenei atavali i le mea e tasi i lo ma fale mo nai tausaga, e seasea lava o’u tu ma manatunatu i lona matagofie. I lenei tautoulu, na ou tuua ai le atavali i lo’u ofisa i le laumua o le Ekalesia. E i ai se ala, o le vaai atu i ai i se isi nofoaga fou, ua aumai ai ia te a’u se toe tomanatu i lona faatulagaga e ofo ai ma le taua faaleagaga. I le Luka ua tatou faitau ai ia Mataio lea e faapea mai: “Ua mavae ia mea, ona ulufale ai lea o ia, ua silafia e ia le telona e igoa ia Levi, ua nofo i le fale e tali ai lafoga; ona faapea atu lea ia te ia, Ina mulimuli mai ia ia te au. Ona tuua lea e ia o mea uma, ua tulai ma mulimuli ia te ia.” 1 O le mea e malie ai, o loo faaalia e Caravaggio le taimi a o tuuina atu e Keriso le valaau, ae a o le’i vaai a’e Mataio i le pulato’a atu a le Faaola. E mafai ona e vaai i le aao o Keriso o loo faaloaloa mai ma le malamalama o loo susulu atu i le potu, o loo agai i lalo ia Mataio i le faatausiusiuga o le laulau ma lona lima o loo i ai lava i luga o ana tupe. O loo maua i le atavali a Caravaggio ia Mataio i lea lava taimi o lana faaiuga ia tuua mea uma a e mulimuli ia Iesu Keriso. I taimi uma ou te tu ai e vaai i lenei ata vali, ou te maofa i lana sāvali.
Uso e ma tuafafine, o le talalelei a Iesu Keriso e ofoofoogia! O le soifua mai, soifuaga, auaunaga, Togiola, ma le Toetu o le Faaola o Iesu Keriso o le tala sili ona ofoofogia ua faamatalaina. Ma e o’o mai, i nei taimi o aso faigata, 2 e mafai lava ona tatou pasia lenei savali ofoofogia e tusa lava pe o tatou saili e fesoasoani i isi o e o loo tauvi ma faigata. E pei ona aoao lata mai nei Peresitene Nelson: “O’u uso e ma tuafafine pele, o aso nei e gata ai. Afai e ao ia te oe ma a’u ona tetee atu i mea lamatia ma faatosinaga o loo agai mai, e taua tele le tofu maua e i tatou o se faavae faaleagaga mausali ua atia’e i luga o le papa o lo tatou Togiola, o Iesu Keriso.” 3
Taulimaina o Fesili o le Faatuatuaga a Tagata Aoga
O aso nei, e toatele a tatou tagata aoga o loo feagai ma luitau o le faatuatuaga ia e mafua ai ona latou fesiligia le talalelei toefuataiina, le moni o le Tusi a Mamona, ma e oo lava i le i ai o le Atua i o latou soifuaga. Ua tele faamatalaga faatekinolosi e osofaia le talalelei. O nei punavai e le o mafuaaga o tauiviga uma o le faatuatuaga, a e e mafai ona latou faateleina fesili o loo i ai ma aumaia ai ni fesili fou. Se’i o’u faasoa atua ni tala i tagata e toatolu ia atonu e te ono vaaia i soifuaga o au tagata aoga.
Stephanie: Na ola a’e Stephanie i le Ekalesia a e na lagonaina pea le faaesea mai le mafutaga faaleuarota ma faaleuo ona o tauiviga faalefaaipoipoga a ona matua. I le aluga o taimi, na taitai atu ai i le ita, lea i se ala na ia faafesootai atua i le lotu le mafuaaga. Na amata ona sailia e Stephanie ma le naunau i ai ni punavai e osofaia le lotu, taulai atu i le faitioina o Iosefa Samita ma le teenaina o soo se faamaoniga o lana mafataioi faaperofeta. Ua auai nei Stephanie i le faaaogaina o ala o faasalalauga faaagafesootai e osofaia ai mea na te vaaia o ni talitonuga sese ma le le mautonu o ana uo. Ua faatupulaia e lenei tulaga lona ita, ma ua faigofie ia te ia i lea taimi ona opogi soo se mafuaaga po o se vaega o i ai lagona tetee i le Ekalesia.
Tavita: O fesili a Tavita e talitutusa e agai ma faatatau i le talafaasolopito o le Ekalesia, a e o le tulaga o loo i ai o ia ua ese lava. Na amata o ia o se tagata faatuatua, ae i le maea ai o lana misiona na amata ona ia fesili e uiga i autu sa le atoa i ai sona iloa a o lei faia lana misiona. O nei fesili na taitai atu ai o ia i punavai ia e tetee i le Ekalesia, ma sa oo ina le mautonu o ia e uiga i lana molimau ma mea ua ia talitonu moni i ai. E ui i le tele o aafiaga muamua lea na ia maua ai se molimau i le talalelei, sa lē toe suesue Tavita i upu a perofeta soifua ma sa lē toe faitauina le Tusi a Mamona. Sa amata ona filifilia e isi leo ia suesuega faaleagaga a Tavita. E le’i tetee o ia i le Ekalesia, peitai sa le mautonu o ia ma oo ai lava ina gapelu, ma taitai atu ai i le faaitiitia o le auai i le inisitituti ma tapuaiga i le Aso Sa.
Connie: E le’i i ai ia Connie le tetee a Stephanie e le’i i ai foi le gapelu a Tavita. Sa ia tauivi ma ni vaega o luitau o le soifuaga ia e o faatasi ma le teteaga lata mai nei a ona matua ma se mamanu o le sauaina i upu ma faalelagona i lona aiga. O lenei mafatiaga na tuua ai se manu’a ma ia sailia ai se faamama avega. Ae nai lo le sailia o le faamalologa e ala i le talalelei a Iesu Keriso, na liliu atu Connie i mafutaga faalelalolagi mo se malamalama ma le taliaina o ia lea o loo ia matuā manaomia lava. Sa ia aufaatasi ma isi o e o loo tauivi ma luitau faalesoifua maloloina faale-mafaufau, faafitauli tau i le LGBTQ, ma soo se tasi o loo feagai ma le toilalo ma le lē mautonu. Na maua e Connie le lagolagoina i nei mafutaga, a e na ia maua ai foi ma ni fesili fou. Sa masani ona tuuaia e ia ma ana uo le Ekalesia ona o a latou lava tauiviga, ma le faamoemoe afai latou te le amanaiaina tulafono a le Atua, o le a mou ese atu o latou tiga. 4 E le gata ina sa le toe auai o ia i le Lotu ma le inisitituti, ae sa amata foi ona ia tulitulimatagauina se vaega o amioga sa ia faamoemoe o le a aveesea ai lona tiga ma mafua ai ona ia aloese mai le ala faigata o le suia ma le faamagaloina o isi.
Ua feagai nei tamaiti aoga taitasi ma se faafitauli o le faatuatua, ae o le natura o lena faafitauli e matuai eseese lava mo i latou taitoatasi. O le tasi e ita ma tetee lautele, o le isi ua na o le lē mautonu ma ua valaaulia e leo mai fafo, ma le lona tolu ua utia i tiga ma o loo taumafai e lafi mai le mea ua ia iloa o se ala faigata i totonu o le Ekalesia. O loo atagia mai ai foi se vaega o Augatupulaga Z (po o le Gen Z) o tagata aoga i lo latou le faatuatuaina o faatulagaga aloaia, faaitiitia le auai i le lotu, ma i mea uma, o se lagona le atoatoa o le amio sa’o o talitonuga lea e finau mai e le o i ai se faatulagaga aloaia mo le amio sa’o ma le amio sese. O se suesuega talu ai nei a le Vaega a le Barna na faamatalaina, “O le leai o se tulaga atoatoa o le Amio Sa’o ua le na ona tolotolo malie atu i le vaaiga a le lalolagi o le Gen Z; a e ua avea nei ma manatu taliaina e le toatele.” 5
I le avea ai ma faiaoga o le talalelei, e tatau ona tatou saili ala o le aapa atu i tagata aoga e pei o Stephanie, Tavita, ma Connie. O a latou fesili ma atugaluga e moni lava ma e le tatau ona le manatu i ai. E ao ona tatou taulimaina o latou atugaluga ma le lagona alofa ma le alofa, ma tuu atu ia i latou e fai fesili i se siosiomaga saogalemu ma faafaileleina. E manaomia foi ona tatou atiina a’e lo tatou gafatia ia malamalama ma tali atu i o latou atugaluga. O le punaoa o Mataupu Faalelotu a le Seminare ma le Inisitituti [S&I] o le, “Mauaina o le Malamalama Faaleagaga, o loo faapea mai, “O nisi taimi atonu tatou te mauaina ai ni faamatalaga fou po o le iai o ni fesili e faatatau i le aoaoga faavae, faiga masani, po o le talafaasolopito o le Ekalesia e foliga e faigata ona malamalama i ai. O le faia o fesili ma sailiili mo tali o se vaega taua o la tatou taumafaiga e aoao le upumoni.” 6 O lenei punaoa a le S&I o loo tuuina mai ai manatu i le ala e taulimaina ai fesili o le faatuatuaga a o tatou tagata aoga e ala i le aoaoina lea o i latou ia (1) faatino i le faatuatua, (2) iloilo mataupu faatasi ma se vaaiga e faavavau, ma le (3) faaaoga punaoa e talitonuina. I le talitutusa ai, na lomia lata mai nei e Suesuega a le BYU se punaoa faaopoopo ua faaautuina “O Le Augani A Se Faiaoga,” lea e uunaia ai e lē na tusia ia faiaoga o mataupu faalelotu ina ia aoao atu le eseesega ma le taua o a tatou punavai, ia aloese mai le sili atu o le faafaigofieina i a tatou tala, ma ia naunautai e faamaonia atugaluga o loo lagonaina e loto o le toatele. 7 I le talitutusa ai, o se suesuega lata mai nei a Eric ma Sarah d’Evegnees i le “toeliua” o loo uunaia ai tatou ina ia fesoasoani i tagata ia fetuunai atugaluga faalelotu i ni auala ia e le aveesea ai i latou mai lo latou sootaga ma le Atua. 8 Ma ioe ua fatuina e le Ekalesia lava ia se seti o Autu o le Talalelei lea e mafai ona faaaoga o se punaoa e malamalama atili ai ma foia ai fesili faaletalafaasolopito ma faaleaoaoga faavae lea e o‘o mai faatasi ma le toatele o tamaiti aoga. Faailoa, taulima, ae aua le tulitulia fesili lona lua nei.
Faailoa, Taulima, ae Aua le Tulitulia Fesili Lona Lua
Ou te manao ina ia manino ia tatou faiaoga uma o mataupu faalelotu e tele mea e ao ona faafetaia o loo i punaoa ia ua fausia e fesoasoani ai i o tatou tagata aoga ia faatoilaloina faafitauli o le faatuatuaga ma foia a latou fesili o le talalelei. O le mea moni, ou te le o mautinoa pe mafai ona avea i tatou ma ni faiaoga mataalia o le talalelei i le siosiomaga o le aso sei vagana ua tatou iloa luitau o le faatuatua o feagai ma le toatele o tamaiti aoga. O le a manaomia ona faateleina lo tatou utuvai mai i nei punaoa e fesoasoani ai i tamaiti aoga e faatautaia a latou fesili.
Peitai i le fesoasoani ai i tagata aoga e foia o latou atugaluga, e tatau foi ona tatou faaeteete ina ia aua nei tau lava o le taulai i a latou fesili patino o le faatuatuaga a e tatou misi ai le avanoa e aoao i latou i le maoae moni o le talalelei a Iesu Keriso. I le faamalamalama mai e Brother Chad H Webb ia te a’u: “E pei o le taumafai e fesoasoani i tagata ia o ese mai le puao pogisa e ala i le taulai atu i le pogisa.” E ao ia i tatou ona le gata ina aua nei faagaloina le i ai o le pogisa, ae ia le avea foi ma a tatou taulaiga tupito. O le mataupu lea sa ta’ua e Elder Lawrence E. Corbridge faapea o le tuu atu o fesili lona lua e suitulaga i uluai fesili patino. I se saunoaga i le faigalotu a le BYU, na saunoa ai Elder Corbridge:
“O fesili lona lua e le uma. E aofia ai fesili e uiga i le talafaasolopito o le Ekalesia, o autaunonofo, o le tupuaga mai o tagata Aferika ma le perisitua, o tamaitai ma le perisitua, o le ala na faaliliu ai le Tusi a Mamona, o le Penina Tau Tele, DNA ma le Tusi a Mamona, faaipoipoga i itupa e tasi, o tala eseese o le Uluai Faaaliga, ma isi mea.
“Afai e te taliina uluai fesili, ona maua foi lea o tali o fesili lona lua, pe itiiti lona taua, ma mafai ona e taulimaina mea e te malamalama ai ma mea e te le malamalama ai, faapea ma mea e te ioeina ma mea e te le ioeina e aunoa ma le oso atoa ese mai le va’a.” 9
O lea, ioe, faalogo i atugaluga a au tamaiti aoga, fatu se siosiomaga saogalemu mo i latou e fai mai ai ni fesili, ma faaaoga punaoa faatuatuaina. A e i le faagasologa, aua nei misi le natura maoae o le talalelei a Iesu Keriso. E pei o la’u tala i le ata matagofie a Caravaggio, aua nei misi le natura e ofo ai o loo i ou luma tonu. O se isi ala e mafaufau ai i lea mea o le manatunatu i le faaletonu o le vaai ua ta’ua o le mou atu o le vaaiga, lea e poloka atoa ai le iloa o se mea a e na’o le ataata o le vaaiga. I tagata o e aafia i lenei faama’i e i’u i le “faatumu” o mea e le mafai ona latou iloa atu i o latou luma tonu i faaliliuga mai mea o loo mafai ona latou vaaia mai ataata o mea. Aua nei faatagaina le vaaiga a au tamaiti aoga e faauiga sese ai la latou vaaiga i le natura ofoofogia o le talalelei, lea e mafai ma e tatau ona i ai i o latou luma. E pei ona aoao mai Peresitene Oaks, “Vagana ai ua tatou taula i nei upumoni o ni o tatou faavae ma talitonuga [tutotonu], e le mafai ona tatou mautinoa ua moni a tatou faaiuga.” 10 Mo se faataitaiga, e oo lava i a tatou taumafaiga musuia e “faaleleia inisitituti” o le a lē manuia pe afai tatou te misia le taulaiga tutotonu lea. Ua matou uunaia outou e faateleina le talafeagai, mauaina ma le auai i a outou aoaoga. Ae o nei taumafaiga tamalii e lamatia i le avea ma fesili lona lua pe afai latou te le faaaofia ai mataupu faavae autu o le liua ia Iesu Keriso. O se faavae faaleagaga e fausia i luga o le Faaola ua na o le pau lea o le ala o le a manumalo ai a tatou tamaiti aoga i faigata ma uunaiga o nei aso e gata ai. 11
O Le Talalelei a Iesu Keriso e Ofo Ai
Ua ou tautino atu i le asō i le tele o taimi o le talalelei a Iesu Keriso e ofo ai. Na ou faalogo muamua i se faamatalaga i lenei manatu mai ia Elder Jeffrey R. Holland a o ia saunoa atu i se vaega o faiaoga faalelotu i o latou tiutetauave paia o le aoao atu o le talalelei a Iesu Keriso. O le natura ofoofogia o le talalelei na faatatau atu i le Faaola Lava Ia a o Ia aoao atu i totonu o sunako ia i latou o e na le talitonu: “Ua oo i le sapati, ona a’oa’o atu lea o ia i le sunako, e toatele o e na faalogo ai, ua ofo, i latou, ua faapea atu, Maifea na maua ai e lenei tagata ia mea?” 12 I le faaiuga o le Lauga i luga o le Mauga, ua tatou aoao mai ai e faapea ina “ua faaiu e Iesu o nei upu, ona matua taufaiofo ai lea o le motu o tagata i lana mataupu.” 13 O Lamonae i le Tusi a Mamona na matua “ofo tele” i le faamaoni o Amona. 14 I nei faataitaiga ma le tele o isi, o le upu ofo o loo faaaoga e faatatau i tagata o e tauivi ma le talitonuga ae mulimuli ane iloa le mana ma le vavega o le talalelei. Ua tatou vaai i lenei mea i le tusi a Helamana, ina ua “ofo tele tagata, sa oo ina latou pauu i le eleele; ona sa latou le talitonu i upu na tautalaina e Nifae.” 15 E foliga mai o lenei maofa e oo mai pe a feagai le le talitonu ma le natura faavavega ma aoaoga o le talalelei a Iesu Keriso. E moni lea mo i latou uma o e tauivi ma le le mautonu, ma o le a moni mo Stephanie, Tavita, ma Connie, lea sa ou ta’ua muamua. Faato’a mafai ona latou faatoilaloina le ita, le mautonu, ma le tiga pe a aumaia i latou i le natura e ofo ai o Iesu Keriso lava Ia.
Uso e ma tuafafine, faamolemole faalogo ma alofa ma malamalama ia i latou o e o loo tauivi ma fesili o le faatuatuaga. Ia faia i se ala alofa lea e fatuina ai se siosiomaga saogalemu mo latou uma o aoaoina, faasino latou i punaoa faatuatuaina ma fesoasoani ia foia o latou atugaluga. A e aua nei aveese atu ma la tatou vaaiga tali e ofo ai i uluai fesili patino o le talalelei a Iesu Keriso.
Ia tatou “faasolo mea e tuu ai ata vali” i o tatou olaga i auala ia e mafai ona fesoasoni ai i a tatou tamaiti aoga e tutu ma manatunatu i le natura ofo moni o le Faaola o loo i o latou luma tonu lava. E moni e i ai luitau—o se vaega o la tatou faigamalaga faaletino. Ae ia tatou fesoasoani i a tatou tagata talavou ia ala mai ia iloa le tele o ala ia e suia patino ai e Iesu Keriso auala i soifuaga o fanau a le Atua.
Mo se faataitaiga, ou te ofo i le ala na maua ai e a’u talavou o le aai tutotonu mai Boston le talalelei a Iesu Keriso ma le ala na avatu ai latou i misiona, taitai latou i kolisi, i faaipoipoga i le malumalu, ma i le taimi nei i matafaioi o ni matua ma taitai i le Ekalesia. E toetoe lava a le mafai ona malamalama i le mea ua tupu i o latou olaga pe a manatunatu i le mea na latou amata ai. Ou te nofo ma le ofo pe a ou mafaufau i se tamā talavou i San Antonio lea na ma feiloai talu ai nei ma Sister Gilbert. Sa fefe o ia e le mafai lava ona ia fuaina i faamoemoega o le talalelei. Ma i le iu ai ina iloaina, mulimuli ane, e leai se tasi o i tatou e atoatoa ma e na o Iesu Keriso lava e mafai ai ona avea atili i tatou o ni tagata taitoatasi. O Brother Luis Vargas lea ma lona faletua o Andrea, ma lo la afafine o Sofia, i le po na ia tautino atu ai o le a papatiso i le mavae ai o le lima tausaga o feiloai ma faifeautalai. Sa ou ofo i le vaai atu i lona suiga ma lona talitonuga ia Keriso. Sa ou ofo foi ina ua ma feiloai ma la’u uo o John Raass, lea sa i ai i fafo o le Ekalesia mo le 30 tausaga e ui i taumafaiga faamaoni a lona toalua ma le fanau. I se taimi o le lotomaualalo na noatai ai i se faafitauli faaleaiga, na talosagaina ai e Uso Raass se faamanuiaga ma ta’utino ai e feiloai ma tamaitai faifeautalai. O lena faaiuga na taitai atu ai i lona papatisoga, faatasi ai ma se tasi o ona atalii ma se tasi o ona afafine, ma tuuina ai i latou i luga o ala o feagaiga. I lo’u lava olaga, ou te nofo ma le ofo a o o’u faalogo i le Alii o talanoa mai ia te a’u, faamautuina la’u molimau, taliina a’u tatalo mo i latou ou te galue ai i o’u tofiga ma i latou ou te auauna atu i ai, e aofia ai ia manaoga o la’u lava fanau.
Uso e ma tuafafine, o le talalelei a Iesu Keriso e ofo ai! E suia e le Faaola soifuaga o fanau a le Atua i ala mamana ma tumau. E Na te valaaulia i tatou ia sui ma avea ia sili atu, ia auauna atu i isi, ma avea ma ē e sili atu nai lo mea e mafai ona tatou faia na o i tatou. Ia tatou aoao atu i ala lea e faaali atu ai i a tatou tagata aoga le ofoofogia moni o le talalelei a Iesu Keriso! Ou te molimau atu ai i le suafa o Iesu Keriso, amene.