O Le Seminare na Manuia ai Lo’u Olaga
Faasalalauga o Aoaoga Faaletausaga a le S&I ma Peresitene Ballard mo le 2022
Aso Faraile, 21 Ianuari, 2022
Talofa lava Ua aoaoina lelei oe i lenei taeao, ma ou te faamaonia moni lava mea uma na e faalogo i ai ma tatalo ina ia fesoasoani mai le Alii ia te au e faaopoopo atu i le fonotaga matagofie o loo tatou mauaina faatasi ma outou o loo i ai se tiutetauave tele faapea. O se fiafiaga le faatasi ai ma outou. Ou te fia faailoa atu lo‘u alofa mo outou taitoatasi ma faamoemoe o le a outou tuuina atu lena alofa i tagata o lou aiga. Ua ou aumaia alofaaga le Au Peresitene Sili ma le Korama a Aposetolo e Toasefululua. Matou te faafetai tele i a outou taumafaiga lelaumaua faamaoni e aoao atu le talalelei a Iesu Keriso, lea o le a faamanuiaina ai olaga ma faamalolosia ai molimau a o tatou tagata talavou o le Ekalesia.
Ou te fia amata i le faamatala atu o le ala na faamanuiaina ai e le seminare lo’u olaga. Na toto ai fatu o le molimau i le talalelei ma sa fesoasoani ou te saunia ai mo la’u misiona ma avanoa faaleta’ita’i.
Atonu ua outou silafia, o a’u o le atalii o le atalii o le atalii o Ailama Samita, le uso matua o le Perofeta o Iosefa Samita le Itiiti. O lo’u tina o se Samita, ma o a’u o le atalii o le atalii o Peresitene Iosefa F. Samita, le Peresitene lona ono o le Ekalesia. O a‘u foi o se atalii o se atalii o ni Aposetolo se toalua—Elder Ailama Maki Samita, le tama o lo’u tina, ma Melvin J. Ballard, le tama o lo‘u tama.
O le i ai o nei tamalii o ni o’u augatama, atonu tou te mafaufau ai ai se loloto o le talalelei i lo’u loto a o ou talavou. Peitai, e leai. Se’i o’u faasoa atua sina mea e uiga i o’u matua ma lo’u olaga seia oo i la’u auaunaga faafaifeautalai.
O lo’u tama e fai lana lava pisinisi e faatau atu ai taavale. I le 1929, ina ua 10 masina lo’u matua, na tulai mai ai le Pau Tele o le Tamaoaiga. O luitau faaletamaoaiga ona o le pau na oo ai i se tulaga pagatia o’u matua ma le matou aiga, ma e aemaise lava i lo’u tama. Ona sa matua alu atoa ai le taimi o lo’u tama i le tauivi e lagolago se aiga i lena vaitau faigata, sa le toe malosi ai o ia i le Ekalesia.
Mulimuli ane, ina ua ou matua atu ma ua mautu lo matou tulaga tautupe, sa faatau mai e lo’u tama se fanua i atumauga i sasae o le Aai o Sate Leki. Sa ia faaalu taimi i Aso Sa e fau ai se fale atola’au, ma sa matou galulue uma faatasi ma ia. Matou te le’i o i sauniga Lotu o se aiga.
O le le toe malolosi o o’u matua i le Ekalesia e le’i taofia ai au mai le auai i sauniga tapuai ma ni uo lelei, lea sa ou faia a o i ai lo’u aiga i le fale, pe tatalo foi faatasi ma lo’u tina pele. Ae peitai, ou te lei alu i le seminare.
A o avea a’u ma se tagata vasega amata i le aoga maualuga, sa fai mai la’u uo o Nedra Mortensen pe aisea na ou le alu atu ai i le seminare i le vaveao. O lea la, o le aso na sosoo ai sa amata ai ona ou auai i aso uma mai lena taimi agai i luma. Sa amata le seminare i le vaveao i le 6:30 i le taeao. Sa vave tele mo le aoga maualuga—ia mo a’u lava. Ou te manatua lo’u auai i le taumalulu i na taeao malulu, ma le kiona o le taumalulu. Ma e oo atu i le taimi na amata ai lo’u tausaga sinia i le aoga, sa filifilia au e avea ma peresitene o le seminare a le Aoga Maualuga i Sasae.
O lo’u auai i le seminare o se tasi o mea na faatulaga ai au i le itu sa’o mo lo’u olaga. I le seminare, sa tuia lo’u loto, ma sa totoina ai fatu o la’u molimau i totonu o lo’u agaga. Ou te le manatuaina mea uma na aoaoina, ae ou te manatua o’u lagona pe a ou i ai iina. Ou te manatuaina foi le lagona e peiseai o a’u o sō o le seminare.
Ou te faafetai i o’u faiaoga seminare, o e faapei foi o outou, sa tuuto le tele naua o taimi e saunia ai lesona ’anoa na valaaulia ai le Agaga.
Ou te matua faafetai lava i faiaoga taitasi sa aoaoina la’u fanau. A o latou tuputupu a’e, sa matou suesueina le talalelei o se aiga, ae o aoaoga faaopoopo sa latou maua i le seminare na manuia ai o latou olaga i lena taimi—ma o loo faamanuia ai pea lava i latou. I le avea ai ma se tamamatua ma se tama o tamamatua—faatoa maua le ma fanau a fanau a fanau e lona 100—faafetai atu i faiaoga na aoaoina ma o loo aoaoina fanau a fanau a la‘u fanau. Avea au ma sui o matua uma ma matua matutua i le Ekalesia atoa, ou te faafetai atu mo osigataulaga ua outou faia e tapena ai, aoao, ma alolofa, ma valaaulia fanau taitasi a le Tama Faalelagi e o mai i Lona Alo, o le Alii o Iesu Keriso.
Uso e ma tuafafine, e taua outou i le Alii ma Lana fuafuaga. E tofu outou ma se vaega e pa’i atu ai i loto o nei talavou faapelepele. O la outou galuega ma taumafaiga e matuai taua tele i le faamalolosia o le tupulaga faia’e, ma le fauina o le malo o le Atua. Faamolemole ia silafia lo matou matuai talisapaia o lo outou naunautaiga e galulue ma mo a outou taumafaiga faamaoni e aoao atu ma faatautaia mataupu o le polokalama o le seminare ma le inisitituti i le lalolagi atoa.
Ou te faailoa atu le agaga faafetai ia Elder Holland ma le komiti faapitoa, ia Elder Clark Gilbert o le komesina, ma ia Uso Chad Webb o se taitai. Ma i taitai uma o le matagaluega, tagata faigaluega, ma faiaoga uma, matou te alolofa ia te outou, matou te talisapaia outou, ma matou te faafetai mo taumafaiga tuuto a tagata uma i aoaoga faalelotu.
Pei ona ou ta’ua muamua, o lo’u auai atu i le seminare na fesoasoani ou te maua ai se molimau ma agai i luma i luga o le ala o feagaiga. Ona o lena mea, sa mafai ai ona ou fesoasoani i o’u matua ia toe toaaga mai. Sa ou auauna atu i se misiona, lea atonu semanu e le tupu pe ana leai ni uo lelei na ou iloaina ma faamasani i le seminare ma o le sa fautuaina mai e tatau foi ona ou auauna atu i se misiona.
Ina ua ou lauga i le sauniga faamanatuga a o loma alu atu i la’u misiona, sa auai lo’u tama e faalogologo i la’u lauga. O le taimi muamua lena i lo’u olaga ou te manatua na ma lolotu faatasi ai ma lo’u tama. Ina ua ou toe taliu mai i le fale mai la’u misiona, sa ou talanoa i o’u matua i le taua o le auai i sauniga Lotu. Sa filifili o’u matua e toe foi mai i le Lotu, ma sa la taliaina valaauga eseese ma tofiga i aso uma na totoe o lo la soifua.
Talu ai nei, sa faia ai e le Ekalesia ni nai auiliiliga o le autalavou i Iuta. O se tasi o tuufaatasiga o faamatalaga na “maualuga ai le foliga mai” faapea e ala ona malosi le auai o le autalavou i le Ekalesia i le isi lima tausaga agai i le lumanai, pe afai na auai i le seminare ma i ai se pepa faataga o le malumalu. 1
O le Vaega e Faamaopoopoa Suesuega a le Ekalesia sa latou suesueina foi le aafiaga o le seminare, inisitituti, ma kolisi a le Ekalesia. Na faaalia i la latou suesuega e faapea o le seminare o le tosinaga mua lea i le malolosi i le Ekalesia i le olaga atoa, molimau, lagona o le avea o ni o, lagonaina le Agaga, ma tuuto atu o le tagata lava ia ma faaleaiga. 2
Uso e ma tuafafine, ua outou faia se eseesega. O loo susulu mai ia te outou se agaga mamana o le tuuto o ni soo o le Alii o Iesu Keriso. Ou te faafetai atu mo le tauaveina o lena agaga i o outou olaga atoa ma mo le aveina atu o lena agaga i faatulagaga o o outou potuaoga. Ou te faafetai atu mo le pa’i atu i loto o o tatou talavou ma talavou matutua.
Pe a ou mafaufau i la tatou tiutetauave o le aoao ma le pa’i atu i loto, ou te manatuaina so’u aafiaga i le Malumalu o Sate Leki i le tele o tausaga ua mavae. I se sauniga molimau i le fogafale fa o le Malumalu o Sate Leki, na molimau mai ai Peresitene Gordon B. Hinckley i le taua o tagata e teufatuina le talalelei ma taula tumau ai. Na ia saunoa faapea ina ia teufatuina e tagata le talalelei, latou te manaomia se mea e sili atu i le na o le liua faalemafaufau—latou te manaomia se liuga faaleagaga. Fai mai a ia, e tatau ona mafai ona tatou maua le talisapaia mo le talalelei mai lava i o tatou mafaufau seia oo ifo i o tatou loto. Faafetai atu i lo tou fesoasoani ia tupu lena mea ia outou tamaiti a’oga.
I le aso 25 o Iuni 2015, na o ni vaiaso a o lei avea ma Peresitene o le Korama a Aposetolo e Toasefululua ma a o avea i lena taimi ma taitaifono o le Aufono Faapitoa o Faifeautalai, sa saunoa ai Peresitene Russell M. Nelson i le semina faaleautaiai o misiona i le 2015. Na ia aoao mai e uiga i le avea o faifeautalai ma soo o le Alii. Na ia saunoa: “O i tatou, o ni sui o le Alii, ua faamanuiaina e folafola Lana talalelei. Sa aoao mai e le Aposetolo o Paulo se manatu faavae ofoofogia. Na ia tautino mai e faapea o sui taitasi, o soo taitasi, ioe,o faifeautalai taitasi, e mafai ona avea ma “tusi ola a Keriso, … , e le tusia i se vaitusi, ae i le Agaga o le Atua soifua … [ua tusia] i papatusi aano o le loto’ [2 Korinito 3:3].” 3 Ou te molimau atu e mafai ona ootia tamaiti aoga taitasi e le talalelei a o latou auai atu i le seminare; e mafai ona tusia le talalelei i papamaa aano o o latou loto.
Faafetai atu mo a outou tapenaga patino e fai le mea sili e te fai: aoao atu le talalelei a Iesu Keriso ina ia mafai ona pa’i atu le Agaga i loto o fanau a lo tatou Tama Faalelagi.
I le lalolagi fevatauai i aso nei, e manaomia e nei talavou le olioli ma le filemu ua ofoina mai e le Faaola o Iesu Keriso e ala i Lana talalelei. E manaomia ona latou lagonaina i o latou loto le alofa o le Faaola mo i latou taitoatasi.
Se’i ou talanoa atu e uiga i le fausiaina o taitai o le lumanai. Ua tou silafia o talavou ma talavou matutua o le aso, o o tatou taitai ia i le lumanai. O le a latou taitai—pe o lena ua taitai—o latou aiga. O le a latou tosinaina o latou tuaoi ma nuu. O le a avea i latou uma ma taitai a o latou aoao atu—i le Ekalesia, le aiga, le aoga, po o le nuu. O nisi o le a galulue i le Peraimeri, Tamaitai Talavou, po o le Aualofa—ma e oo lava i au peresitene. O ni isi o le a galulue i au epikopo, o se peresitene o le siteki, po o ni taitai misiona. O ni isi o le a taitaia le Ekalesia i le lalolagi i le 20 i le 30 tausaga mai le asō. O loo e aoaoina le autalavou ma se taunuuga i le lumanai e te le iloa pe malamalama i ai i lenei taimi. Atonu e i ai se mea lelei, i se tasi o au vasega, o se uso i le lumanai o le Korama a Aposetolo e Toasefululua. E te le iloa lena mea, ae talosia ia faamanuia oe e le Alii e aoao atu e pei o e faia.
Ina ia avea ma taitai e lelei o le Ekalesia, e tatau ia tatou talavou ona muai taitai lelei i o latou lava aiga. Aoao i latou, aemaise o alii talavou, e faapea “e le tatau ona faatumauina se mana po o le uunaiina e le pule o le perisitua, tau lava i le tauanau atu, i le faapalepale, le agalelei, ma le agamalu, ma le alofa faamaoni; i le agalelei, ma le malamalama mamā, e matua faalauteleina ai le agaga e aunoa ma le pepelo, e aunoa ma le faaoleole.” 4
I le avea ai o ni faiaoga, faamolemole ia taulai atu ma fesoasoani i olaga o i latou e te faiaoga ai. E te le na ona tapeinaina i latou mo le galuega faafaifeautalai pe o i le kolisi. O loo e sauniaina i latou e avea ma ni matua lelei. O loo e sauniaina i latou ia avea ma ni tagata ma ni taitai lelei o le Ekalesia. O loo e sauniaina i latou ina ia faamanuiaina i taumafaiga uma i le lumanai. A o vaavaai atu i au tamaiti a’oga taitasi, vaai mamao i mea o le a latou faia i le isi 5, 10, po o le 20 tausaga, ona saili lea o musumusuga mai le lagi ia iloa ai pe mafai faapefea ona e fesoasoani e tapena i latou mo lena taimi.
Tuu atu ia i latou avanoa e taitai ai. Pei ona sa ou taua muamua, sa ou peresitene i le seminare a le Aoga Maualuga a Sasae i lo’u tausaga sinia. O se tulaga matautia na tuu mai e o’u faiaoga ia te a’u i le faatagaina lea o a’u e avea ma peresitene. Faatoa amata ona ou auai i le seminare i lo’u tausaga amata i le aoga maualuga. E le o a’u o se tagata aoga o le seminare ua faamaonia le lelei i tausaga na auai. Ou te faamoemoe o le a e mataituina le tamaitai talavou po o le alii talavou e i ai agavaa ma tuu i ai le avanoa. Fesoasoani i tamaiti aoga taitasi e falō teisi. Aua le na ona tuufauina i latou ae faamoemoe ia latou taitai. Ae, aoao i latou pe faapefea ona taitai, ona tuu lea i ai e taitai, ma faaauau pea ona aoao i latou ia lelei atili.
Mo se faataitaiga, pe a tofia Fitugafulu Pulega Aoao fou, matou te saunia ma tuuina atu avanoa faafaiaoga ma faatonuga ae matou te lei auina atu i o latou tofiga taitasi i le lalolagi. Matou te o ma ave i latou i o matou tofiga. O tamaalii nei ua i ai le poto masani maoae faaletaitaiga i le Ekalesia; ae peitai, e faaauau lava ona matou aoao i latou a o lei tuufaasaolotoina i latou. E faatele i le gasologa o le tausaga, ona auai ia sui auai o le Korama a Aposetolo e Toasefululua i fonotaga a Fitugafulu e tuuina atu aoaoga po o faatonuga e fesoasoani ai e faamalolosia a latou molimau ma avea atili ma ni taitai mataalia. Ou te faaopoopo atu foi tatou te faaaluina se avanoa e aoao ai e le tasi le isi i le Korama a le Toasefululua, e malaga faatasi le tasi ma le isi, ma aoao mai le tasi ma le isi. E te mafaufau pe a uma ona tatou i ai i o matou tofiga mo se taimi umi lava, o le a tatou iloaina uma lava. Leai, e suia le lalolagi ma e eseese manaoga o tagata—aemaise lava i nofoaga eseese i le lalolagi. O lea la, i le avea ai ma uso o le Korama a le Toasefululua, matou te tulimatai atu ma faamoemoe e aoao e le tasi le isi i le auala e sili atu ai ona faataunuu lo matou tiutetauave o ni Aposetolo i le Alii o Iesu Keriso.
Ou te aioi atu ia te outou e fesoasoani i o tatou taitai mo le lumanai; e toatele ua naunau e aoao mai o outou poto masani faaletaitaiga. E puupuu lo outou taimi ma i latou o ni tagata aoga seminare ma le inisitituti, ae mataitu na taimi e mafai ai ona e tosinaina i latou taitoatasi.
Se’i ou ta’ua le manaomia ona tali sa’o atu i fesili. Ua tatou iloa uma o le faia o fesili o se ala matagofie mo tamaiti aoga e aoao ai. O le tele o fesili e faaalia ai se manao e fia aoao. Faamolemole fautuaina tamaiti aoga e fai fesili ona fesoasoani lea ia latou aoao pe faapefea ona sue tali e ala i le suesue ma le tatalo. Ua saunia e le talalelei ia tali i le tele o fesili o le olaga. Peitai, o le a i ai ni fesili e le mafai ona tali ona e le o lava ni faamatalaga moomia mo se tali e tatau ai. O tulaga na, aua le taumatemate. E le afaina le fai atu, “Ou te le iloa” po o le “matou te le iloa.” O le a tatou saogalemu i taimi uma ma puipuia pe a tatou aoao atu le upumoni, pe a tatou aoao atu mea ua tatou iloa. Aua le alu ese mai le mea moni ae taumatemate mea tatou te le’i malamalama ai. I le tele o tulaga, e mafai ona e tuuina atu faaliliuga faamaoni, faautauta, ma le sa’o lelei o tusitusiga paia, ma aoaoga faavae o le talalelei, talafaasolopito o le Ekalesia, po o isi autu ua tatou malamalama i ai. Ou te fautuaina outou ia faalatalata i mataupu aoaoina ua tuuina atu ia te outou ma ia faaaoga punavai talitonuina.
Ia faafaigofie. Ua ou faaaogaina tele lena fasifuaitau i lo‘u olaga atoa lea na tuu ai e la’u fanau lena faamatalaga i luga o le maa faamanatu lea o loo taoto ai lo‘u toalua pele, ma o le a i ai se aso o le a ou taoto ai i ona autafa. Ma i luga o lena maatulimanu ia “Faafaigofie.” Pe a ou oti, ou te faamoemoe o le a malamalama tagata uma o se mea lena sa ou manatu e taua. Ia faafaigofie le talalelei. E matagofie ma manino ma ofoofogia. A o e aoao atu le talalelei, ia faafaigofie ma molimau soo atu i le auaunaga ma le misiona paia a lo tatou Faaola o Iesu Keriso.
Manatua na olioli Nifae i le manino. 5 Sa ia aoao mai e faapea “ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala.” 6 Ou te molimau atu a outou aoao atu, folafola atu, ma molimau atu ia Keriso, o le a lagona e a outou tamaiti aoga lau molimau ma o le a olioli i le agalelei o Iesu Keriso ma Lana talalelei.
O a’u o le atalii o le atalii o Elder Melvin J. Ballard. Sa ia auauna o se Aposetolo mo le 20 tausaga. Sa 11 o’u tausaga ina ua maliu o ia. Ae sa toatele—ina ua lava lo‘u matua e iloa ai—sa auauna atu lo’u tamamatua o se Aposetolo, lea na faalogo ia te ia o talai atu, sa faalogo o ia o aoao atu. Sa oo ina ou fesili pea lava pea—i tagata eseese i nofoaga eseese i le lalolagi atoa o e na faalogo ia te ia o aoao atu ma talai atu le talalelei. Ma e toetoe lava o taimi uma ou te maua ai le tali: “Ou te le manatua lelei le mea na ia fai mai ai,” na fai mai tagata ia te a’u, “ae o le a le galo lava ia te a’u, le lagona na ou lagonaina.” Talosia ia le manatua e i latou tatou te aoaoina a tatou upu—ae talosia ia le galo ia i latou o latou lagona a o tatou aoao atu aoaoga faavae faigofie ma matagofie a Iesu Keriso.
Sa ou talanoa atu ia te outou e uiga i le taua o o outou tiutetauave o ni faiaoga ma ni taitai. E taua na tiutetauave ma e manaomia. Peitai, o o outou tiutetauave i o outou lava aiga e sili atu. Ua tatou i ai i lenei lalolagi ia avea o se vaega o ni aiga lautele ua i ai le tomai e fatufatu ai ma faatulaga a tatou lava vaega o na aiga. E esese tulaga o o tatou aiga taitasi. Po o le a lava lou tulaga, faamolemole ia faafailele ma fau na sootaga faaleaiga. Mo i latou ua faaipoipo, faaalu se taimi ma lou toalua. Saili atu i fautuaga a lou toalua ma mulimuli ai. Sa avea a’u o se tama, tane, ma se taitai sili atu o le Ekalesia ona o fautuaga agalelei, ma le alofa o lo’u toalua alofa ma pele o Barbara. Mo i latou e lei faaipoipo, saili fautuaga mai ou matua, isi tagata o lou aiga, po o se tasi e te talitonuina. E ao ia i tatou uma ona fausia a tatou sootaga faaleaiga aua e oo i talaatu o lenei olaga. O ou tiutetauave po o valaauga o se faiaoga i lenei polokalama o le a muta, ae o au sootaga faaleaiga e faavavau.
A o faaiu atu la’u tautalaga alofa ia te outou, ou te mafaufau i le olioli i le avea ai ma se vaega o le taua ma le mamana o lenei galulue faatasi ma outou. Ou te lagonaina le olioli lava lea na lagonaina e Amona ina ua ia fai atu i ona uso ma uo:
“Ua tele se pogai tatou te olioli ai … ?
“…Ua avea i tatou o ni mea faigaluega i aao o le Atua e faataunuu ai lenei galuega tele. …
“Ia faamanuina lava le suafa o lo tatou Atua; ia tatou pepese i lona viiga, ioe, ia tatou avatu le faafetai i lona suafa paia, ona ua faia e ia le amiotonu e faavavau. …
“…Ua atoatoa lo’u olioli, ioe, ua tumu lo’u loto i le olioli, ma o le a ou olioli i lo’u Atua.” 7
O‘u uso e ma tuafafine ma faiaoga pele—ma ou te fai atu i uso a faiaoga ona o le tiutetauave autu o uso o le Korama a Aposetolo e Toasefululua o le aoao atu lea. Ou te molimau atu o le avea ai o ni fanau a le Tama Faalelagi, e mafai ona tatou iloa le olioli ma le filemu o le talalelei a o tatou ola ai ma aoao atu, a o tatou usitai i poloaiga a le Alii, ma a o tatou savavali i le upumoni.
Ua aumaia lenei olioli i le soifuaga, misiona, ma le talalelei a Iesu Keriso. I le Feagaiga Fou, na fetalai atu Iesu i Ona soo, “Ua ou fai atu nei mea ia te outou ina ia tumau ai lo’u olioli ia te outou, ia atoatoa foi lo outou olioli.” 8
Na iloa e le perofeta o Liae le olioli i le fua o le talalelei ma sa manao ai ia aai foi lona aiga. Na ia fai atu, “Ma aʼo ou ʼai le fua o le laau, sa faatumulia loʼu agaga i le olioli tele; o le mea lea, sa amata ai ona ou manao ia aai ai foi loʼu aiga; ona ua ou iloa ua sili atu ona manaomia nai lo isi fua uma.” 9
Ua ou mautinoa e tofu lagonaina e i tatou taitoatasi e pei ona fai mai Ioane, “E leai so’u fiafia e sili i lenei pe a ou faalogo o savavali la’u fanau i le upumoni.” 10
Ua le mautonu le lalolagi i nei ona po ona o faagaulemalie, feeseeseaiga, le faamalieina, faailogalanu, le faaaloalo, faalotovaivai, ma faanoanoaga. E mafai e le talalelei a Iesu Keriso ona tauave i tatou i nei taimi faigata. Sa aoao mai e le perofeta o Liae se mataupu faavae faigofie na faaalia mai e le Alii. Na ia saunoa, “Ua i ai [alii ma tamaitai], ina ia latou maua le olioli.” 11
I le suafa o le Alii ma e ala mai i le tofi paia faaaposetolo, ou te talosagaina faamanuiaga a le Alii ia te outou taitoatasi ia maua le olioli i o outou aiga, olioli i le talalelei, ma le olioli i o outou tiutetauave o se faiaoga po o se taitai i le polokalama maoae o le seminare ma le inisitituti a le Ekalesia. Ou te toe fia ta’u atu lo’u alofa mo outou taitoatasi ma a outou tamaiti aoga.
Ou te tuuina atu la‘u molimau o loo soifua Iesu Keriso—ma o Lana Ekalesia lenei, ma o Lana talalelei lenei. Tau ina ia faamanuia outou e le Alii, o‘u uso a faiaoga pele, ina ia mafai ona tatou aapa atu ma le malosi atoa o o tatou loto ia le na o le mafaufau ae o loto o le toatele o fanau a lo tatou Tama, o e e manaomia ona iloa o Iesu o le Keriso, ua Ia faatuina mai se perofeta, o Iosefa lava, ma toefuatai mai le atoatoaga o le talalelei e faavavau, ma o mea uma e manaomia e maua ai le filemu ma le olioli i lenei olaga ua toe faaalia mai ma o loo maua i Le Ekalesia a Iesu Keriso o le Au Paia o Aso e Gata Ai. Ou te talosagaina se faamanuiaga i le avea ai ma sui o le Au Peresitene Sili ma le Korama a le Toasefululua i o outou luga ma o outou aiga. Ma ou te faia ai ma le lotomaualalo i le suafa paia o le Alii o Iesu Keriso, amene.