ការជ្រើសរើសបំណងប្រាថ្នាសុចរិត
ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ
ថ្ងៃ អាទិត្យ ទី ៣ ខែ ឧសភា ឆ្នាំ ២០២០
បងប្អូនប្រុស ស្រីជាទីស្រឡាញ់ជាដំបូងខ្ញុំចង់អរគុណដល់ភរិយាដ៏ឧត្តមរបស់ខ្ញុំចំពោះការប្រឹក្សានិងដំបូន្មានដ៏អស្ចារ្យនោះ ។ លីណែតអរគុណអូន ។
វាគឺជាពរជ័យនិងឱកាសដ៏ធំធេងក្នុងការចូលរួមជាមួយបងប្អូននាល្ងាចនេះ ។ យើងពិតជាកំពុងរស់នៅក្នុងពេលមិនធម្មតា ហើយខ្ញុំជឿជាក់ថា បងប្អូនត្រូវបានចិញ្ចឹមបីបាច់សម្រាប់គ្រាទាំងនេះ ។ មិនយូរប៉ុន្មានកន្លងទៅ ប្រធាន អិម រ័សុល បាឡឺដ បានថ្លែងថា « ខ្ញុំជឿថា នេះគឺជាជំនាន់យុវមជ្ឈិមវ័យដ៏អស្ចារ្យបំផុតនៅក្នុងប្រវត្តិសាសនាចក្រ ។ ខ្ញុំមានអារម្មណ៍យ៉ាងច្បាស់ថា នោះគឺជាការពិត » ។១ បងប្អូនជាជំនាន់ដ៏ពិសេសដែលបានចិញ្ចឹមបីបាច់ឲ្យដឹងពីគ្រាដ៏ចលាចលនិង ដើម្បីជួយរៀបចំពិភពលោកនេះសម្រាប់ការយាងមកជាលើកទីពីររបស់់ព្រះយេស៊ូវគ្រីស្ទ ។ ទ្រង់ស្គាល់បងប្អូនយ៉ាងច្បាស់ ហើយស្រឡាញ់បងប្អូន ។
ជំនាន់របស់យើង
រាត្រីនេះដូចដែលយើងបានមកទីនេះដើម្បីចាក់ផ្សាយនេះយើងត្រូវបានប្រាប់ថាយើងបានទទួលសំនួរជាច្រើនដែលទាក់ទងនឹងព្រះវិញ្ញាណនិងអំពីវិវរណៈផ្ទាល់ខ្លួន ។ ខ្ញុំ សង្ឃឹម ថា នៅ រាត្រី នេះ នៅពេលដែលបងប្អូនស្តាប់ភរិយាខ្ញុំនិងខ្ញុំ យើងអាចឆ្លើយសំណួរទាំងនោះបាន ។ ខ្ញុំអធិស្ឋានថាព្រះវិញ្ញាណបរិសុទ្ធដែលជាគ្រូបង្រៀននឹងអាចឆ្លើយតបចំពោះមនុស្សម្នាក់ក៏ដូចជាមនុស្សជាច្រើនបានដែរ ។
នៅប៉ុន្មានថ្ងៃ ប៉ុន្មានខែថ្មីៗនេះ ក្នុងនាមជាសហគមន៍ពិភពលោកមួយ យើងបានជួបប្រទះនូវការរងទុក្ខមិនធម្មតាមួយ ការមិនប្រាកដប្រជា ភាពចលាចល និងឧបសគ្គ ។ រឿងទាំងនេះគឺជាពេលវេលាដែលបានព្យាករជាយូរមកហើយ ហើយវានឹងឡើងដល់កម្រិតខ្ពស់ក្នុងពេលយាងមកជាលើកទីពីរដ៏រុងរឿងរបស់ព្រះអង្គសង្គ្រោះរបស់យើង ។ ព្រះយេស៊ូវផ្ទាល់បានព្យាករពីថ្ងៃទាំងនេះ ។ ទ្រង់មានបន្ទូលថា« អ្នករាល់គ្នាក៏នឹងឮអំពីសង្គ្រាម និងពាក្យចចាមអារាមអំពីសង្គ្រាមទាំងឡាយ ចូរមើលឲ្យឃើញថាអ្នករាល់គ្នាកុំខ្វល់ឡើយ ត្បិតគ្រប់អ្វីៗទាំងអស់ដែលខ្ញុំ និយាយប្រាប់អ្នករាល់គ្នា នោះច្បាស់ជានឹងបានសម្រេច ។ … ខ្ញុំនិយាយដោយយល់ដល់ពួករើសតាំងរបស់ខ្ញុំ ពីព្រោះសាសន៍មួយនឹងលើកគ្នាទាស់នឹងសាសន៍មួយ …នឹងមានអំណត់ និងជំងឺអាសន្នរោគ និងផែនដីកក្រើកនៅកន្លែងផ្សេងៗ ។… សេចក្ដីស្រឡាញ់នៃមនុស្សនឹងរសាយអស់ទៅ ។… [ គ្រប់ ] ទាំងអស់នឹងបានសម្រេច » ។២ ខ្ញុំចង់ចែករំលែកទស្សនៈតែមួយគត់អំពីរឿងទាំងអស់នេះ ។ វាជាមេរៀនមកពីប្រវត្តិសាស្ត្រសាសនាចក្ររបស់យើង ។
អាមេនដា បាណេស ស្ម៊ីធ ស្វាមីរបស់នាង ឈ្មោះវ៉ារិន និងកូនប្រាំនាក់របស់គេជាអ្នកប្រែចិត្តជឿថ្មីក្នុងសាសនាចក្រ ពេលពួកគេធ្វើដំណើរទៅរដ្ឋមិសសួរី ។ ពួកគេបានចូលរួមនឹងពួកបរិសុទ្ធនៅហោនស៍ មីល តែពីរបីថ្ងៃមុនក្រុមមនុស្សកំណាចបានមក ហើយសម្លាប់បុរស និងក្មេងប្រុសជាច្រើននៅទីនោះ ។ ស្វាមី និងកូនប្រុសអាយុ ១០ ឆ្នាំរបស់អាមេនដាត្រូវបានពួកវាសម្លាប់ដែរ ។ កូនប្រុសវ័យក្មេងម្នាក់ទៀតរបស់នាងបានរងរបួសយ៉ាងដំណំ ។ អាមេនដាបានទទួលវិវរណៈដ៏មានអានុភាពមួយស្ដីពីរបៀបសង្គ្រោះកូនប្រុសរងរបួសរបស់នាង ។ អំឡុងពេលដ៏តានតឹងខ្លាំងនោះ នាងបានសរសេរដូចតទៅនេះ ៖
« ក្នុងភាពវិនាសហិនហោចដ៏ខ្លាំងរបស់យើង តើយើងជាស្ដ្រីអាចធ្វើអ្វីបាន ក្រៅពីអធិស្ឋាននោះ ? ការអធិស្ឋានជាប្រភពនៃការលួងលោមតែមួយគត់របស់យើង ព្រះវរបិតាសួគ៌យើងជាព្រះជំនួយតែមួយគត់របស់យើង ។ គ្មាននរណាក្រៅពីទ្រង់ឡើយ ដែលអាចសង្គ្រោះ និងដោះលែងយើងបាន ។
« ថ្ងៃមួយ មនុស្សកំណាចម្នាក់បានមកពីរោងចក្រដោយមានបញ្ជារបស់មេកង ។ [ ទាំងជេរប្រទេច វាស្រែកគំហកថា ] ៖ ‹ មេកងនិយាយថា បើពួកនាងមិនឈប់ … ការអធិស្ឋានរបស់នាងទេ គាត់នឹងបញ្ជូនកងកម្លាំងឲ្យមកសម្លាប់ … ពួកនាងគ្រប់គ្នាហើយ ! ›
« ហើយវាអាចនឹងសម្លាប់យើងមែន ដើម្បីបញ្ឈប់ពួកយើងជាស្ដ្រីដ៏កំសត់ កុំឲ្យអធិស្ឋានក្នុងគ្រាដ៏វឹកវរខ្លាំងរបស់យើង ។
« ការអធិស្ឋានរបស់យើងត្រូវបានបំបិទដោយភាពភ័យខ្លាចខ្លាំង ។ យើងមិនហ៊ានបញ្ចេញសំឡេងអង្វរករយើងឲ្យគេឮក្នុងផ្ទះឡើយ ។ ខ្ញុំអាចអធិស្ឋាននៅលើគ្រែ ឬដោយស្ងៀមស្ងាត់ ប៉ុន្ដែខ្ញុំមិនអាចរស់នៅអញ្ចឹងបានយូរទេ ។ ភាពស្ងាត់ស្ងៀមដោយគ្មានព្រះមិនមានការសណ្ដោសខ្លាំងជាងយប់នៃការសម្លាប់រង្គាលនោះទៅទៀត ។
« ខ្ញុំមិនអាចទ្រាំបានទៀតឡើយ ។ ខ្ញុំប្រាថ្នាចង់ឮសំឡេងខ្លួនឯងម្ដងទៀតក្នុងការអង្វរករដល់ព្រះវរបិតាសួគ៌របស់ខ្ញុំ ។
« ខ្ញុំបានចេញទៅចម្ការពោត ហើយបានវារចូលក្នុង [ គំនរ ] ពោត ។ គំនរពោតនេះគឺដូចជាព្រះវិហារបរិសុទ្ធរបស់ព្រះអម្ចាស់់ចំពោះខ្ញុំនៅគ្រានោះ ។ ខ្ញុំបានអធិស្ឋានឮៗ ហើយយ៉ាងក្លៀវក្លាបំផុត ។
« ពេលខ្ញុំដើរចេញពីចម្ការពោត នោះមានសំឡេងមួយថ្លែងមកខ្ញុំ ។ វាជាសំឡេងដ៏ស្រទន់ ដែលខ្ញុំមិនធ្លាប់បានឮ ។ វាមិនស្ងប់ស្ងាត់ទេ ជាចំណាប់អារម្មណ៍ដ៏ខ្លាំងនៃវិញ្ញាណ ប៉ុន្ដែសំឡេងមួយ ជាវគ្គបទទំនុកតម្កើង [ របស់យើង ] ដែលបន្ទរឥតដាច់ ៖
ព្រលឹងណាដែលពឹងផ្អែកទៅលើព្រះយេស៊ូវ
យើងមិនព្រមយើងមិនអាចបោះចោលឲ្យសត្រូវ
សូម្បីតែ ពួកនរកចង់បានព្រលឹងអ្នក
យើងនឹងគ្មានថ្ងៃបោះបង់យើងនឹងគ្មានថ្ងៃបោះបង់ ! ៣
« តាំងពីគ្រានោះ ខ្ញុំលែងភ័យខ្លាចទៀតហើយ ។ ខ្ញុំមានអារម្មណ៍ថា គ្មានអ្វីអាចធ្វើឲ្យខ្ញុំឈឺចាប់បានទេ » ។៤
ក្នុងពេលទាំងនេះ វាអាចមិនទៀង ប៉ុន្ដែសូមដឹងថាអ្វីដែលពិតចំពោះអាមេនដា បាណេស ស្ម៊ីធ គឺពិតចំពោះបងប្អូន ។ មិនថាមានហេតុការណ៍អ្វីជុំវិញបងប្អូន មិនថាបងប្អូនអាចត្រូវរងការសាកល្បងយ៉ាងណា នោះព្រះជាដៃចង្កូតនាវា ។ ទ្រង់នឹងមិនបោះបង់បងប្អូនឡើយ ហើយបងប្អូនមិនត្រូវភ័យខ្លាចទេ បើបងប្អូនស្មោះត្រង់ និងបញ្ចេញសំឡេងបងប្អូនទៅកាន់ទ្រង់នោះ ។ នេះជាអ្វីទាំងអស់ដែលខ្ញុំចង់ថ្លែងទៅកាន់បងប្អូននារាត្រីនេះ ។
វ៉ែនតារបស់ភរិយាខ្ញុំ
ដូចដែលខ្ញុំបាននិយាយខ្ញុំមានអំណរដែលមានភរិយាខ្ញុំ លីណេត នៅទីនេះជាមួយខ្ញុំក្នុងរាត្រីនេះ ។ គាត់ជាអ្វីៗគ្រប់យ៉ាងរបស់ខ្ញុំ ។ យើងជួបគ្នាកាលរៀននៅវិទ្យាល័យច្រើនឆ្នាំកន្លងទៅ ។ ក្រោយពីរៀនចប់វិទ្យាល័យ គាត់បានទៅមហាវិទ្យាល័យរីកស៍ នៅទីក្រុងរ៉េកបឺក រដ្ឋអាយដាហូ ហើយខ្ញុំបានទៅ ប៊ីវ៉ាយយូ នៅទីក្រុងប្រូវ៉ូ រដ្ឋយូថាហ៍ ។ នៅឆ្នាំទីមួយនៃមហាវិទ្យាល័យរបស់យើង ខ្ញុំសម្រេចចិត្តនៅចុងសប្ដាហ៍មួយដើម្បីបើកឡានទៅរ៉េកបឺកទៅលេងគាត់ ។ នៅទីនោះ គាត់បានបង្រៀនខ្ញុំពីមេរៀនដ៏សំខាន់មួយ ។
គាត់មិនមានឡានទេ ហើយគាត់អាចបើកឡានបានមួយរយៈដែរហើយ ។ កាលយើងចាកចេញពីផ្ទះរបស់គាត់ គាត់បានសួរខ្ញុំថា តើគាត់អាចបើកឡានខ្ញុំបានទេ ។ ខ្ញុំបានឆ្លើយថា « ប្រាកដណាស់ » ។ ភ្លាមនោះ យើងបានបើកចុះពីទួលមួយនៅក្បែរកន្លែងគាត់រស់នៅ ។ ដល់ប្រហែលពាក់កណ្ដាលទួល គាត់បានសួរខ្ញុំថា « តើមានសញ្ញាឈប់មួយនៅចុងផ្លូវទេ ? » ស្លាកសញ្ញាឈប់អាចមើលឃើញច្បាស់ណាស់ ហើយខ្ញុំបានឆ្លើយភ្លាមថា « បាទ មានសញ្ញាឈប់មួយ » ។ គាត់និយាយថា « ច៎ា អូនក៏គិតអញ្ចឹងដែរ ។ អូនគ្រាន់តែមិនអាចមើលឃើញវា ។ ខ្ញុំបានសួរថា « ហេតុអ្វីអូនមិនអាចមើលឃើញវា ? » គាត់បានឆ្លើយថា « ដោយសារអូនមិនបានពាក់វ៉ែនតា ហើយអូនមិនអាចមើលឃើញច្បាស់បើគ្មានវ៉ែនតា ។ រួចហើយខ្ញុំបាននិយាយអ្វីមួយដូច្នេះ « ហើយហេតុអ្វីបានជាអូនមិនពាក់វ៉ែនតា ? » « ដោយសារអូនពាក់ទៅវាមិនស្អាត ប៉ុន្ដែអូនភ្លេចថា អូនមិនអាចមើលឃើញអ្វីៗច្បាស់បើគ្មានវ៉ែនតា » ។ ខ្ញុំនិយាយថា « ល្អជាងបើឲ្យបងបើកឡានវិញ » ។ មេរៀននោះគឺសាមញ្ញ ៖ លុះត្រាតែបងប្អូនអាចមើលឃើញច្បាស់សិន បើមិនចឹងទេ បងប្អូននឹងស្ថិតក្នុងគ្រោះថ្នាក់ជានិច្ច ។
ឥឡូវ ខ្ញុំសូមសួរបងប្អូន « តើបងប្អូនដឹកនាំជីវិតបងប្អូនទៅមុខដោយរបៀបណា ? » តើបងប្អូនដឹកនាំជីវិតខ្លួនដោយពាក់វ៉ែនតាដែលចាំបាច់ដើម្បីមើលឃើញភាពពិតនៃជីវិតឲ្យច្បាស់ទេ ? នៅទីក្រុងបុរាណឡោឌីសៀ ពួកបរិសុទ្ធមិនមានអំពើបាបជាក់ស្ដែង ឬច្បាស់នោះទេ ប៉ុន្ដែព្រះអម្ចាស់បានស្ដីបន្ទោសពួកគេដែលមិនសូវស្វាហាប់ក្នុងភាពជាសិស្សរបស់ពួកគេ ។ ដោយមានអំនួតនឹងការសម្រេចបាន និងចំណេះដឹងខាងលោកិយរបស់ខ្លួន នោះពួកគេបានពេញចិត្តនឹងខ្លួនឯងកាន់តែខ្លាំង ហើយលែងពឹងព្រះ ។ ទោះជាទីក្រុងនេះល្បីល្បាញខាងជំនាញថែទាំភ្នែកក្ដី ក៏ព្រះអម្ចាស់មានបន្ទូលទៅពួកគេថា « ទិញថ្នាំលាបភ្នែកផង ឲ្យឯងបានមើលឃើញវិញ » ។៥ វាហាក់ថា សំណួរសំខាន់មួយសម្រាប់យើងម្នាក់ៗគឺថា ៖ « តើខ្ញុំមើលឃើញជីវិតខ្ញុំតាមរយៈភ្នែកនៃសេចក្ដីពិត បទបញ្ញត្តិ និងសេចក្ដីសញ្ញារបស់ព្រះ ឬតាមរយៈភ្នែករបស់ខ្ញុំផ្ទាល់ ? តើខ្ញុំកំពុងស្ដាប់សំឡេងរបស់ទ្រង់ដែលបានទទួលតាមរយៈការអធិស្ឋាន និងវិវរណៈផ្ទាល់ខ្លួននៃព្រះវិញ្ញាណរាល់ថ្ងៃឬទេ ឬខ្ញុំស្ដាប់តាមសំឡេងខ្លួនឯង ឬតាមសំឡេងរបស់អ្នកប្រាជ្ញនៃពិភពលោកនេះដែលស្រែកថា របៀបរបស់ព្រះ ហើយសូម្បីតែព្យាការីរបស់ទ្រង់គឺខុសឆ្គង ធុញទ្រាន់ មិនចាំបាច់ ចម្លែក មិនគួរឲ្យចាប់អារម្មណ៍ មិនខ្វល់ខ្វាយ ឬក៏បោកបញ្ឆោត និងគួរឲ្យស្អប់ស្របតាមវោហាសព្ទនៃពិភពលោកនេះ ? »
យ៉ូសែប ស្ម៊ីធធ្លាប់បានពោលថា « អារក្សនឹងប្រើការខំប្រឹងដ៏ខ្លាំងបំផុតរបស់វាដើម្បីដាក់អន្ទាក់ពួកបរិសុទ្ធ ។ … វានឹងផ្លាស់ប្ដូរការណ៍ទាំងឡាយ ដើម្បីធ្វើឲ្យមនុស្សម្នាសំឡក់សំឡឹងទៅអស់អ្នកដែលធ្វើតាមព្រះទ័យរបស់ព្រះ » ។ បើគ្មានជំនួយរបស់ព្រះ និងវិរណៈទេ បងប្អូនពិតជាមិនអាចមើលឃើញ « រឿងទាំងឡាយតាមដែលមាននៅពេលនេះ ហើយ … តាមដែលនឹងមាននៅពេលខាងមុខ » ឡើយ ។៦ មារសត្រូវមានបំណងធ្វើឲ្យបងប្អូនសំឡក់សំឡឹងអស់អ្នកដែលធ្វើតាមព្រះទ័យរបស់ព្រះ ។ វាមានបំណងរារាំងបងប្អូនមិនឲ្យមើលឃើញនិងស្វែងយល់ពីការពិតនិងរារាំងមិនឲ្យបងប្អូនមើលឃើញថា បងប្អូនជាបុត្រា ឬបុត្រីសំណព្វចិត្តរបស់ព្រះឡើយ ។ បំណងវាគឺធ្វើឲ្យត្រូវតាមច្បាប់ពិភពលោកនេះ ឲ្យបងប្អូនបដិសេធ ឬបែរទៅព្រះដោយមិនអស់ពីចិត្ត ហើយជាពិសេស ឲ្យបងប្អូនផ្ដល់និយមន័យឲ្យខ្លួនឯង និងដំណើរជីវិតរបស់បងប្អូនតាមរយៈការធ្វើតាមនយោបាយ វប្បធម៌ ខាងលោកិយមួយចំនួនផ្សេងទៀត ឬការខុសគ្នាដាច់តែម្ដង ។
ជារឿយៗ ខ្ញុំសួរខ្លួនឯងសំណួរនេះ ៖ « តើអ្វីទៅដែលបានធ្វើឲ្យនីហ្វៃជាអ្នកជឿ ហើយមិនមែនជាលេមិន ឬលេមយួល ? » បងប្អូនប្រុសទាំងបីនាក់នេះបានកើតពីឪពុកម្ដាយល្អដូចគ្នា ។ នាយប់មួយ ខ្ញុំបានឮចម្លើយចំពោះសំណួរខ្ញុំ ។ ខ្ញុំបាននៅទីក្រុងបាងកក ប្រទេសថៃ ធ្វើកិច្ចការចាត់តាំងមួយជាមួយប្រធាន អិម រ័សុល បាឡឺដ ពេលលោកបានចែកចាយបទគម្ពីរនេះ ៖
« ហើយហេតុការណ៍បានកើតឡើងថា ខ្ញុំ នីហ្វៃ …មានចិត្តមោះមុត ចង់ដឹងនូវសេចក្ដីអាថ៌កំបាំងទាំងឡាយនៃព្រះ ហេតុដូច្នោះហើយ ខ្ញុំបានអំពាវនាវដល់ព្រះអម្ចាស់ ហើយមើលចុះ ទ្រង់បានយាងមកជួបនឹងខ្ញុំ ហើយបន្ទន់ចិត្តខ្ញុំ បណ្ដាលឲ្យខ្ញុំជឿអស់ទាំងពាក្យដែលបានពោលមកដោយឪពុកខ្ញុំ ហេតុដូច្នោះហើយ ខ្ញុំមិនបានបះបោរទាស់នឹងលោក ដូចជាបងៗខ្ញុំនោះទេ » ។៧
នេះជាចម្លើយរបស់ខ្ញុំ ។ ព្រះបើកបង្ហាញព្រះអង្គទ្រង់ដល់យើងស្របតាមចិត្តប្រាថ្នារបស់យើង ។ នីហ្វៃបានចង់ដឹងសេចក្ដីពិត និងសេចក្ដីអាថ៌កំបាំងនៃព្រះលើសអ្វីទៀតទាំងអស់ ហើយបានទទួលពរនឹងវត្តមាន អំណរ ព្រះចេស្ដា និងសេចក្ដីពិតរបស់ព្រះ ។ លេមិន និងលេមយួលមានចិត្តចង់ជាប់អន្ទាក់លោកិយ ហើយបានទទួលរង្វាន់នោះ ។ បើបងប្អូនចង់នៅជាមួយព្រះ នោះបងប្អូនត្រូវតែសម្របចិត្តប្រាថ្នារបស់បងប្អូនតាមព្រះទ័យទ្រង់ ។
កន្លែង និងអ្វីមួយដែលបងប្អូនដាក់ចិត្តប្រាថ្នាខ្លួនលើ នឹងសម្រេចពីរបៀបដែលបងប្អូននឹងទទួលបានកម្លាំងដើម្បីឆ្លងកាត់ និងយកឈ្នះជីវិតនេះ ។ ហេតុដូច្នេះហើយ រាត្រីនេះខ្ញុំសូមអញ្ជើញបងប្អូនឲ្យជ្រើសរើសព្រាងជីវិតបងប្អូន តាមរយៈចិត្តប្រាថ្នាដ៏ខ្លាំងក្លាដើម្បីបានប្រែចិត្តជឿ និងចម្រើនដល់មនុស្សដទៃ ។ បងប្អូនអាចចាំថា នេះជាអ្វីដែលព្រះអង្គសង្គ្រោះបានសួរសាវកច្បងរបស់ទ្រង់ ពេត្រុស ពេលទ្រង់មានបន្ទូលថា « ស៊ីម៉ូនៗអើយ … សាតាំងបានសូមចង់បានអ្នករាល់គ្នា ប្រយោជន៍នឹងរែងអ្នករាល់គ្នា ដូចជារែងអង្ករ ប៉ុន្តែ ខ្ញុំបានអធិស្ឋានឲ្យអ្នក ដើម្បីមិនឲ្យសេចក្តីជំនឿរបស់អ្នកវិនាសបាត់ឡើយ កាលណាអ្នកបានប្រែចិត្តវិលមកវិញ នោះចូរចម្រើនឲ្យបងប្អូនអ្នកបានខ្ជាប់ខ្ជួនឡើង » ។៨
បំណងប្រាថ្នាដើម្បីប្រែចិត្តជឿ និងចម្រើនដល់មនុស្សដទៃ
ខ្ញុំនឹងមិនដែលភ្លេចពេលដែលភរិយាខ្ញុំ និងខ្ញុំត្រូវបានសម្ភាសដោយសមាជិកជាន់ខ្ពស់មួយរូបនៃកូរ៉ុមនៃពួកសាវកដប់ពីរនាក់ អំពីឆន្ទៈខ្ញុំដើម្បីបម្រើជាប្រធានបេសកកម្ម ។ ភរិយាខ្ញុំ និងខ្ញុំបានជួបរឿងជាច្រើនក្នុងជីវិតយើង ។ នៅពេលសម្ភាស យើងបានជាប់ក្នុងចំណងទាក់ទងគ្រួសារដ៏ពិបាកខ្លាំងមួយចំនួន យើងបានប្រឡូកក្នុងកិច្ចការសប្បុសធម៌ដ៏ធំមួយទូទាំងពិភពលោកដែលត្រូវការការយកចិត្តទុកដាក់ និងធនធានរបស់យើងជាច្រើន ហើយខ្ញុំជាដៃគូគ្រប់គ្រងជាន់ខ្ពស់នៃពាណិជ្ជកម្មវិនិយោគខា្នតអន្តរជាតិមួយ ដែលមិនរៀបរាប់ពីការហៅបម្រើទាំងអស់របស់សាសនាចក្រដែលយើងកំពុងបម្រើផង ។ ខ្ញុំគិតថា យើងបានធ្វើអ្វីៗដែលយើងអាចធ្វើបានរួចហើយ ។ កាលយើងអង្គុយនៅទីនោះនាថ្ងៃនោះជាមួយសាវកជាទីស្រឡាញ់រូបនេះ ហើយគិតពីអ្វីៗទាំងអស់ដែលយើងបានឆ្លងកាត់ នោះយើងទាំងពីរបាននិយាយដោយគួរសមថា នេះប្រហែលមិនមែនជាពេលដ៏ល្អបំផុតឲ្យយើងបម្រើបេសកកម្មទេ ។ ដោយគ្មានការស្ទាក់ស្ទើរ សមាជិកដប់ពីរនាក់រូបនេះបានបែរទៅរកភរិយាខ្ញុំ ហើយនិយាយថា « លីណេត អ្នកនឹងធ្វើជាអ្នកផ្សព្វផ្សាយសាសនា និងជាដៃគូដ៏អស្ចារ្យម្នាក់ដល់ស្វាមីរបស់អ្នក » ។ រួចលោកងាកមកខ្ញុំ ហើយពោលថា « លោកដឹងទេ លោកពុំទាន់យល់ច្បាស់ទេ ។ ព្រះអម្ចាស់កំពុងហៅលោកឲ្យសង្គ្រោះជីវិតរបស់លោក ។ លោកនឹងរស់នៅជីវិតរបស់លោកតាមសេចក្ដីសញ្ញាឬតាមភាពសុខស្រួល វាមិនដែលមានពេលងាយស្រួលដើម្បីបម្រើឡើយ ។ នេះជាបញ្ហានៃសេចក្ដីជំនឿ ។ លោកអាចជឿថា ព្រះអម្ចាស់នឹងប្រទានពរដល់ជីវិតលោកជាមួយនឹងពរជ័យដែលលោកត្រូវការ កាលលោកធ្វើតាមអាទិភាពរបស់ទ្រង់ ឬលោកមិនជឿសោះ » ។
ខ្ញុំអង្គុយនៅទីនោះដោយស្ងៀមស្ងាត់យ៉ាងអស្ចារ្យ ។ ខ្ញុំទើបតែត្រូវបានប្រាប់ថា ព្រះអម្ចាស់កំពុងព្យាយាមសង្គ្រោះជីវិតខ្ញុំ ។ ពេលនោះខ្ញុំបានរស់នៅជីវិតមួយដ៏ល្អ ប៉ុន្ដែគ្មានតុល្យភាពជីវិតសោះឡើយ ។ នារសៀលនោះ កាលលីណេត និងខ្ញុំបានចាកចេញពីការិយាល័យរបស់សាវក យើងបានទៅផ្ទះដើម្បីពិចារណាប្រកបដោយការអធិស្ឋាន ពីរបៀបដែលយើងនឹងរស់នៅជីវិតនេះ ។ យើងបានធ្វើការជ្រើសរើសយ៉ាងលឿនដើម្បីបម្រើ និងរស់នៅតាមសេចក្ដីសញ្ញា ដោយធ្វើអ្វីក៏ដោយដែលព្រះអម្ចាស់បានសុំឲ្យយើងធ្វើ ។ ជីវិតក្នុងសេចក្ដីសញ្ញាគឺជាជីវិតដ៏មានតុល្យភាពល្អមួយ ដែលរស់នៅតាមអាទិភាពរបស់ព្រះ មិនមែនតាមរបៀបរបស់យើងផ្ទាល់ទេ ។ ជីវិតយើងលែងដូចមុនហើយតាំងពីនោះមក ។ យើងមានពរយ៉ាងពេញលេញ តាមរយៈសេចក្ដីស្រឡាញ់ និងចិញ្ចឹមបីបាច់របស់ទ្រង់ ។ បើខ្ញុំដឹងអ្វីមួយ នោះខ្ញុំដឹងថា ពរជ័យដូចគ្នានេះនឹងជារបស់បងប្អូន បើបងប្អូនបន្ដដើរលើផ្លូវសេចក្ដីសញ្ញារបស់ទ្រង់ដោយស្មោះត្រង់ ។ ព្រះសព្វព្រះទ័យសង្គ្រោះជីវិតបងប្អូន ។
តើការប្រែចិត្តជឿ និងការរស់នៅតាមសេចក្ដីសញ្ញា មិនមែនតាមភាពសុខស្រួលមានន័យដូចម្ដេច ? ព្រះយេស៊ូវមានបន្ទូលថា « ចូរមើលមកឯយើងដោយនូវគ្រប់ទាំងគំនិត » ។៩ ដូចគ្រូបង្រៀនដ៏ឈ្លាសវៃម្នាក់ធ្លាប់ប្រាប់ខ្ញុំថា « ទ្រង់មិនបានមានបន្ទូលថា ‹ សូមគិតដល់យើងម្ដងម្កាល ហើយព្រះវិញ្ញាណយើងនឹងគង់ជាមួយអ្នក › នោះទេ ។ ទ្រង់មានបន្ទូលថា ‹ ហើយបើសិនជាអ្នករាល់គ្នាចងចាំដល់យើងជានិច្ច នោះអ្នករាល់គ្នានឹងមានព្រះវិញ្ញាណរបស់យើងនៅនឹងអ្នក › » ។១០ នេះមានន័យថា កាលបងប្អូនចងចាំដល់ទ្រង់ នោះបងប្អូននឹងមានអំណាចនៃស្ថានសួគ៌នៅជាមួយបងប្អូនជានិច្ច ដើម្បីជួយជាប្រចាំក្នុងឧបសគ្គតូចធំដែលបងប្អូនប្រឈម—មិនថាវាអាចមានឥទ្ធិពលលើបងប្អូនយ៉ាងណាទេ ។ ការណ៍នេះរួមទាំងការភ័យខ្លាច ការញៀនភាពអសន្ដិសុខណាមួយ ឬជញ្ជាំងខ្ពស់យ៉ាងណានៅចំពោះមុខបងប្អូនផងដែរ ។ ដូច្នេះ សូមសញ្ជឹងគិតនាពេលនេះពីអ្វីដែលអាចជារឿងដ៏សំខាន់បំផុត ដែលបងប្អូនត្រូវធ្វើដើម្បីចងចាំដល់ទ្រង់ឲ្យកាន់តែពេញលេញ និងធ្វើសកម្មភាពតាមនោះ ។
មិត្តភក្តិស្និទ្ធស្នាលរបស់ខ្ញុំកាលនៅតូចបានណែនាំខ្ញុំឲ្យស្គាល់ភរិយាខ្ញុំ ។ កាលនៅរៀនវិទ្យាល័យ ខ្ញុំបានជ្រមុជទឹកឲ្យគាត់ក្លាយជាសមាជិកនៃសាសនាចក្រ ប៉ុន្ដែគាត់តែងពិបាកតាំងចិត្តឲ្យពេញលេញដើម្បីរស់នៅតាមដំណឹងល្អ—តែងដោះសាខ្លួនគាត់ដោយការនិយាយថា គាត់មិនដែលធ្វើអ្វីមួយអាក្រក់ខ្លាំងទេ—ដែលវាពិតមែន ។ រួចហើយនាយប់មួយនៅពិធីជប់លៀងមួយ គាត់បានផឹកយ៉ាងច្រើន ហើយបានធ្លាក់ច្រាំងថ្មចោតមួយដោយចៃដន្យ ហើយបានស្លាប់ ។ កាលនោះ គាត់មានអាយុតំណាលប្អូនៗ ។ សោកនាដកម្មនេះមិនគួរកើតឡើងទេ ហើយនឹងមិនកើតឡើងឡើយ បើសេចក្ដីសញ្ញាបានដឹកនាំជីវិតរបស់មិត្តខ្ញុំ ជំនួសឲ្យភាពងាយស្រួលនោះ ។
តើបងប្អូនគូរបន្ទាត់ក្នុងជីវិតបងប្អូនពាក់ព័ន្ធនឹងបទបញ្ញត្តិរបស់ព្រះនៅកន្លែងណា ? ប្រហែលបងប្អូនមួយចំនួនមើលទៅជីវិតខ្លួន ដូចពួកយើងភាគច្រើនឃើញថាជាការគោរពតាមល្បឿនដែលបានកំណត់លើមហាវិថី ។ តើមាននរណាម្នាក់ធ្លាប់គិតចង់បើកតាមល្បឿនដែលបានកំណត់ពិតប្រាកដទេ ? ទេ ។ ផ្ទុយទៅវិញ យើងចង់ដឹងថា តើយើងអាចបើកបានប៉ុន្មានគីឡូម៉ែត្រលើសល្បឿនដែលបានកំណត់ដោយមិនទទួលសំបុត្រផាកពិន័យនោះ ។ នោះជារបៀបដែលមិត្តភក្តិស្និទ្ធស្នាលរបស់ខ្ញុំបានរស់នៅជីវិតគាត់ ។ ក្នុងដំណឹងល្អ យើងមិនគួរគិតថា តើយើងអាចទទួលយកពីពិភពលោកនេះបានច្រើនប៉ុណ្ណាដោយមិនឆ្លងបន្ទាត់ដែលបានកំណត់នោះឡើយ ។ យើងត្រូវបោះបង់ពិភពលោកនេះ ។
ទាល់តែពេលបងប្អូនលើកដាក់សេចក្ដីសញ្ញារបស់ព្រះលើខ្លួនបងប្អូន ទើបបងប្អូនមានភ្នែកដែលអនុញ្ញាតឲ្យបងប្អូនមើលឃើញពិភពលោកនេះកាត់ភាពរាយប៉ាយបានច្បាស់ល្អ ។ ព្រះគម្ពីរប៊ីបបង្រៀនថា « ដ្បិតនេះហើយជាសេចក្តីស្រឡាញ់ដល់ព្រះ គឺឲ្យយើងកាន់តាមអស់ទាំងបញ្ញត្តរបស់ទ្រង់ » ។១១ អ្នកដែលរស់នៅតាមសេចក្ដីសញ្ញាមិនមែនមានន័យថាមានជីវិតឥតខ្ចោះនោះទេ ប៉ុន្ដែសម្រាំងជីវិតគេតាមរយៈការប្រែចិត្តរាល់ថ្ងៃ ។ ការសម្រាំងបែបនោះនាំពួកគេទៅរកពរជ័យដ៏ច្រើនរបស់ព្រះ និងព្រះចេស្តាដ៏ខ្លាំងនៃស្ថានសួគ៌ ។ ក្នុងគ្រាដ៏ចលាចលទាំងនេះ តើមានបងប្អូនណាម្នាក់កំពុងស្តាប់នារាត្រីនេះដែលមិនត្រូវការការដឹកនាំ និងព្រះចេស្តារបស់ព្រះដែរឬទេ ?
ច្រើនឆ្នាំកន្លងទៅ ដៃគូពាណិជ្ជកម្មម្នាក់របស់ខ្ញុំដែលបានឈឺបានប្រាប់ខ្ញុំថា ប្រធាន ប៊យដ៍ ខេ ផាកកឺ បានទៅផ្ទះគាត់ដើម្បីប្រសិទ្ធពរឲ្យគាត់ ។ គាត់បានថ្លែងថា « កាលខ្ញុំជូនគាត់ទៅឡានលោកវិញ ប្រធានផាកកឺបាននិយាយថា ‹ កុំប្រញាប់ត្រឡប់ពីគែតសេម៉ានីពេកអី ។ រៀនមេរៀននៅទីនោះសិន › » ។ រួចមិត្តខ្ញុំបានសួរខ្ញុំថា « តើឯងគិតថា លោកមានន័យដូចម្ដេច ? » ពីមុនខ្ញុំអាចឆ្លើយបាន គាត់បានបន្ថែមយ៉ាងសាមញ្ញថា « ខ្ញុំជឿថា លោកមានន័យថា យើងគ្រាន់តែត្រូវធ្វើតាមព្រះទ័យរបស់ព្រះប៉ុណ្ណោះ ហើយនោះជាអ្វីដែលខ្ញុំចង់ធ្វើ » ។
ពេលសហការីខ្ញុំនិយាយពាក្យទាំងនោះ ខ្ញុំដឹងថា គាត់និយាយត្រូវ ។ ការសាកល្បងដ៏ធំនៃជីវិតយើងគឺថា តើយើងនឹងចុះចូលតាមឆន្ទៈរបស់ព្រះ ឬធ្វើតាមចិត្តយើងផ្ទាល់ ។ អែលឌើរ នែល អេ ម៉ាក់ស្វែល បានបង្រៀនជាយូរហើយថា « ការចុះចូលតាមឆន្ទៈរបស់មនុស្សម្នាក់ គឺពិតជារឿងផ្ទាល់ខ្លួនជាពិសេស ដែលយើងត្រូវដាក់នៅលើអាសនារបស់ព្រះ » ។១២
ប៉ុន្ដែ តើការមានឆន្ទៈធ្វើតាមព្រះទ័យរបស់ព្រះមានន័យដូចម្ដេច ? ចេញពីបទពិសោធន៍របស់ព្រះអង្គសង្គ្រោះយើងនៅសួនគែតសេម៉ានី ខ្ញុំជឿថា ជាផ្នែកមួយ យើងត្រូវយល់ថា ការចុះចូលតាមព្រះទ័យរបស់ព្រះមានន័យថា បងប្អូន និងខ្ញុំត្រូវមានឆន្ទៈរងទុក្ខ និងស៊ូទ្រាំដល់ទីបំផុត មិនថាព្រះសុំឲ្យយើងធ្វើអ្វីទេ ទោះជាអ្វីដែលយើងត្រូវស៊ូទ្រាំនោះមិនកើតពីកំហុសរបស់យើងក្ដី ។ ការណ៍នេះអាចរួមមានរឿងដូចជា ការខូច ឬការអន់ថយរូបកាយ ការចោទប្រកាន់ខុសឆ្គង ការកាត់សេចក្ដី ឬការធ្វើឲ្យប៉ះពាល់ពីមិត្តភក្តិ ថ្នាក់ដឹកនាំ ឬក៏សមាជិកគ្រួសារ ។
នៅសួនគែតសេម៉ានី ព្រះវរបិតាសួគ៌បានសុំឲ្យព្រះអង្គសង្គ្រោះរបស់យើងផឹកពែងល្វីងនៃអំពើបាប និងការរងទុក្ខដែលមិនមែនមកពីទ្រង់ ។ ក្នុងដំណើរការនោះ ព្រះយេស៊ូវបានមាន « ព្រះហឫទ័យភាំងជាខ្លាំង » ដោយអ្វីដែលនៅចំពោះព្រះភ័ក្រ្ដទ្រង់ ។ ទ្រង់មានព្រះទ័យ « ព្រួយជាខ្លាំងសឹងតែនឹងស្លាប់ » ហើយបានអធិស្ឋាន « បើសិនជាបាន »ថា« សូមឲ្យពេលវេលានេះបានកន្លងហួសពីទ្រង់ទៅ » ដោយពោលទៅកាន់ព្រះវរបិតាថា « ទ្រង់អាចនឹងធ្វើការទាំងអស់កើត សូមយកពែងនេះចេញពីទូលបង្គំផង » ។ ប៉ុន្តែទ្រង់បានបន្ថែមថា « ប៉ុន្តែកុំតាមចិត្តទូលបង្គំឡើយ សូមសម្រេចតាមព្រះហឫទ័យទ្រង់វិញ » ។១៣ នៅជំនាន់របស់យើង ក្នុងវិវរណៈមួយដែលបានផ្ដល់ឲ្យយ៉ូសែប ស្ម៊ីធ ព្រះអង្គសង្គ្រោះបានមានបន្ទូលថា « ហើយដើម្បីកុំឲ្យយើងត្រូវផឹកពែងល្វីង ហើយរួញខ្លាច—ទោះជាយ៉ាងណាក៏ដោយ សូមព្រះវរបិតាបានសិរីល្អ ហើយយើងបានទទួលទាន និងសម្រេចការរៀបចំរបស់យើងចំពោះកូនចៅមនុស្ស » ។១៤
ការទទួលទាន និងសម្រេចបានការរៀបចំរបស់ព្រះវរបិតាសម្រាប់យើង មិនថាល្វីងយ៉ាងណាទេ វាជាផ្នែកនៃផែនការរបស់ព្រះវរបិតាដើម្បីនាំមកនូវអំណរដ៏អស់កល្បដល់យើង ។ តើបងប្អូនគិតឬ ជឿថា ព្រះវរបិតាសួគ៌នឹងការពារបងប្អូនពីគ្រានៃការឈឺចាប់ និងវេទនាដែលចាំបាច់ដើម្បីជួយបងប្អូនឲ្យក្លាយដូចជាទ្រង់ទេ ? ប្រធាន យ៉ូហាន ថេលើរ បាននិយាយថា ព្យាការី យ៉ូសែប ស្ម៊ីធបានប្រាប់លោកថា « អ្នកនឹងឆ្លងកាត់ការសាកល្បងគ្រប់ប្រភេទ ។ … ព្រះនឹងជ្រាបពីអ្នក ហើយទ្រង់នឹងចាប់អ្នក ហើយមួលខ្សែបេះដូងរបស់អ្នក » ។ ការធ្វើជាសិស្សរបស់ព្រះយ៉េស៊ូគ្រីស្ទមានន័យថា យើងត្រូវ « ងាយប្រដៅ ស្លូតបូត ទាបរាបសា អត់ឱន ពោរពេញទៅដោយសេចក្ដីស្រឡាញ់ ព្រមទទួលនូវអ្វីៗទាំងអស់ដែលព្រះអម្ចាស់ទ្រង់ទតឃើញថាល្អសម្រាប់ [ យើង ] » ។១៥
ប្រធាន ណិលសុនជាទីស្រឡាញ់របស់យើង បានថ្លែងថ្មីៗថា « ថ្ងៃដ៏ពិបាកនៅខាងមុខ ។ វាកម្រនៅក្នុងពេលអនាគត ថាវានឹងងាយស្រួល ឬ មានប្រជាប្រិយភាពក្នុងការធ្វើជាពួកបរិសុទ្ធថ្ងៃចុងក្រោយដ៏ស្មោះត្រង់ម្នាក់ ។ យើងម្នាក់ៗនឹងត្រូវបានសាកល្បង ។ … អ្នកដែលធ្វើតាមព្រះអម្ចាស់ដោយឧស្សាហ៍ ‹ នឹងត្រូវមានសេចក្តីបៀតបៀន › ។១៦ ការធ្វើទុក្ខបុកម្នេញនោះអាចសង្កត់អ្នកទៅក្នុងភាពខ្សោយដោយស្ងៀមស្ងាត់ ឬក៏អាចជម្រុញអ្នកឲ្យក្លាយជាគំរូ និងមានកម្លាំងនៅក្នុងជីវិតប្រចាំថ្ងៃរបស់អ្នក ។របៀបដែលអ្នកដោះស្រាយឧបសគ្គនៅក្នុងជីវិត គឺជាផ្នែកនៃការអភិវឌ្ឍសេចក្ដីជំនឿរបស់អ្នក » ។១៧
សាវកប៉ុលបានសួរសំណួរនេះ ៖ « តើអ្នកណានឹងពង្រាត់យើងចេញពីសេចក្តីស្រឡាញ់របស់ផងព្រះគ្រីស្ទបាន តើសេចក្តីទុក្ខលំបាក ឬសេចក្តីវេទនា សេចក្តីបៀតបៀន សេចក្តីអត់ឃ្លាន សេចក្តីអាក្រាត សេចក្តីអន្តរាយ ឬដាវឬអី ? »១៨ ជាភាសាសព្វថ្ងៃ យើងអាចនិយាយតាមរបៀបនេះ ៖ « តើខ្ញុំនឹងអនុញ្ញាតឲ្យការពិបាកក្នុងការស្វែងរកគូស្រកររៀបការ ឬបំណងដើម្បីរស់នៅក្នុងទំនាក់ទំនងដែលឥតដាក់ទោស ឬព្រឹត្តិការណ៍មួយពីប្រវត្តិសាសនាចក្រ ឬសកម្មភាពខុសឆ្គងរបស់អ្នកដឹកនាំ ឬគ្រូបង្រៀនខ្លះ ឬបំណងប្រាថ្នាលោកិយរបស់ខ្ញុំ ឬការបាត់បង់ការងារ ឬជំងឺដ៏ធ្ងន់ធ្ងរមួយ ឬភាពតានតឹងដ៏ខ្លាំងមួយ រារាំងខ្ញុំពីការធ្វើតាមព្រះអង្គសង្គ្រោះដោយឧស្សាហ៍ និងចូលរួមក្នុងសាសនាចក្ររបស់ទ្រង់យ៉ាងពេញលេញឬទេ ? »
អំពើបាបរបស់បងប្អូនទាំងអស់ ការឈឺចាប់ ជំងឺ និងទុក្ខវេទនារបស់បងប្អូនទាំងអស់គឺជាផ្នែកមួយនៃអ្វីដែលអែលឌើរម៉ាកស្វែលហៅថា « គណិតវិទ្យាដ៏លំបាក » នៃដង្វាយធួន [ របស់ព្រះយេស៊ូវគ្រីស្ទ ]១៩ជាគណិតវិទ្យាដែលលោកនិយាយថា អាចគណនាបានតែជា « ភាពសម្បើមអស្ចារ្យគុណនឹងភាពនិរន្ដរ៍ » ២០ ភាពមិនសុខស្រួលឬឧបសគ្គរបស់បងប្អូនពីការសាកល្បងក្នុងជីវិតនឹងមិនធ្លាក់ចុះមកក្រោមទ្រង់ឡើយ ។ ហេតុដូច្នេះ សំណួរពីស្ថានសួគ៌ចំពោះបងប្អូនគឺថា តើបងប្អូននឹងធ្វើតាមគំរូរបស់ព្រះអង្គសង្គ្រោះដែរឬទេ ហើយថ្លែងជាមួយទ្រង់ថា ៖ « ប៉ុន្តែកុំតាមចិត្តទូលបង្គំឡើយ សូមសម្រេចតាមព្រះហឫទ័យទ្រង់វិញ » ។២១
របៀបមួយទៀតដើម្បីថ្លែងការណ៍នេះអាចត្រូវសួរថា « តើខ្ញុំនឹងទុកចិត្តព្រះ ហើយទុកចិត្តលើផែនការរបស់ទ្រង់សម្រាប់ជីវិតខ្ញុំដែរឬទេ ? »
កាលបងប្អូនប្រឈមនឹងឧបសគ្គ និងការសាកល្បង សូមដឹងថា ព្រះមានព្រះចេស្ដាទាំងអស់ដើម្បីគាំទ្របងប្អូន—ទោះជាពេលស្ថានភាពជុំវិញបងប្អូនមិនផ្លាស់ប្ដូរក្ដី ។ ទោះនៅកណ្ដាលទុក្ខវេទនានៃការសាកល្បងដ៏ឈឺចាប់ ក៏ទ្រង់សន្យាថាទ្រង់ « … នឹងសម្រាលបន្ទុកទាំងឡាយដែលដាក់នៅលើស្មាអ្នកផង ហើយសូម្បីតែរូបអ្នកក៏មិនអាចចាប់អារម្មណ៍ថាមានបន្ទុកទាំងនោះនៅលើខ្នងអ្នកឡើយ … ដើម្បីឲ្យអ្នករាល់គ្នាអាចដឹងជាពិតប្រាកដថា យើងជាព្រះអម្ចាស់ដ៏ជាព្រះ មករករាស្ត្រយើងក្នុងពេលគេស្ថិតក្នុងសេចក្ដីវេទនា » ។២២ សូមកុំសង្ស័យថា ព្រះអម្ចាស់អាចបើកគ្រប់ទ្វារដ៏ស័ក្ដិសិទ្ធិឡើយ សូមអះអាងនឹងខ្លួនបងប្អូនតាមរយៈសំណួរនៃសេចក្ដីជំនឿ ហើយជួយខ្លួនបងប្អូនឲ្យរក្សាបានការងារ ការអប់រំ និងកម្លាំងដើម្បីរស់នៅដោយសុចរិត ឬអ្វីផ្សេងទៀតក៏ដោយដែលបងប្អូនអាចត្រូវការដើម្បីឈានដល់សក្ដានុពលដ៏ពេញលេញរបស់បងប្អូន ។ ព្រះអង្គសង្គ្រោះបានសន្យាថាទ្រង់ នឹងរៀបចំ ផ្លូវមួយ ។២៣ តើមាននរណាម្នាក់ ឬអ្វីមួយផ្សេងទៀតអាចផ្ដល់ការសន្យាដូចគ្នានោះដែរទេ ? សូមទុកចិត្តទ្រង់ដើម្បីបង្រៀន និងគាំទ្របងប្អូន កាលបងប្អូនចុះចូលតាមព្រះទ័យទ្រង់ដោយរាបសា ។
ច្រើនឆ្នាំកន្លងទៅ ប្រធាន ហិនរី ប៊ី អាវរិង បានធ្វើការអង្កេតដែលឆាប់យល់បាននេះ ៖ « បើគ្រឹះនៃសេចក្ដីជំនឿពុំមានចំណែកនៅក្នុងដួងចិត្តយើងទេ នោះអំណាចដើម្បីប្រកាន់ខ្ជាប់នឹងគ្មានឡើយ » ។២៤ សេចក្តីជំនឿគឺជាគោលការណ៍នៃសកម្មភាព ហើយសេចក្ដីជំនឿជាជម្រើសមួយ ។ សេចក្ដីជំនឿមិនត្រូវបានវាស់វែងដោយចំនួនការប្រជុំដែលយើងចូលរួម ឬទម្លាប់ដែលយើងរក្សាបាននោះទេ ។ សេចក្ដីជំនឿមិនមែនទាំងជាការទទួលស្គាល់ថា ព្រះ និងព្រះយេស៊ូវគ្រីស្ទមានព្រះជន្មរស់នោះទេ ។ សេចក្ដីជំនឿរបស់បងប្អូនគឺជាកម្រិតនៃការទុកចិត្តរបស់បងប្អូន និងការពឹងផ្អែកទាំងស្រុងលើព្រះ និងព្រះអង្គសង្គ្រោះរបស់បងប្អូន គឺព្រះយេស៊ូវគ្រីស្ទ ។ យើងទាំងអស់គ្នាស៊ូទ្រាំ ឬវិនាសស្របតាមកម្រិតនៃការទុកចិត្ត និងការពឹងផ្អែកផ្ទាល់ខ្លួនរបស់យើងលើទ្រង់ទាំងពីរអង្គ ។
ដើម្បីកសាងសេចក្ដីជំនឿលើទ្រង់ទាំងពីរ បងប្អូននឹងត្រូវលុបចេញអាកប្បកិរិយាដោះសាខ្លួនណាមួយចេញពីជីវិតរបស់បងប្អូន ។ បងប្អូនត្រូវធ្វើជាម្ចាស់នៃជីវិតរបស់បងប្អូន ហើយកុំអនុញ្ញាតឲ្យមនុស្សដទៃដឹកសកម្មភាព និងជម្រើសរបស់បងប្អូនឡើយ ។ ទស្សនវិស័យ ឥរិយាបថ ប្រតិកម្មតប អារម្មណ៍ គំនិត និងជំនឿរបស់បងប្អូនគឺជាអ្វីៗទាំងអស់ដែលបងប្អូនអាចគ្រប់គ្រងបាន ។ ការអាក់អន់ចិត្ត និងការដើរចេញមិនមែនមកពីព្រះទេ ។ សំឡេងរបស់ទ្រង់អញ្ជើញយើងឲ្យ « ដើរតាមទ្រង់ » ជានិច្ច ! ព្រះត្រៀមព្រះកាយជាស្រេចដើម្បីឆ្លើយនឹងសំណួរនានា លួងលោមការពុះពារនឹងការពិបាកណាមួយ ហើយប្រោសលោះបុគ្គលគ្រប់រូបទាំងអស់ ។ គ្មានកំហុស ឬការពិបាកណាដែលមិនអាចព្យាបាលបានដោយទ្រង់ឡើយ ។ ការស្វែងរកតាមអ៊ិនធើរណិតទាំងអស់ក្នុងពិភពលោកនេះតាមរយៈទំព័រវិបសាយជិតមួយប៊ីលានកន្លះ មិនអាចប្រាប់បងប្អូនថា តើសាសនាចក្រនេះពិតឬអត់ ឬថាតើព្រះយេស៊ូវគ្រីស្ទមានព្រះជន្មរស់ឬអត់នោះទេ គឺមានតែព្រះទេដែលអាចបើកបង្ហាញការណ៍នេះដល់បងប្អូនបាន ។ ហើយចុងបញ្ចប់នៃការណ៍នេះគឺ ៖ ព្រះនឹងមិនប្រាប់បងប្អូនពីសេចក្ដីពិតមួយ ហើយប្រាប់ខ្ញុំសេចក្ដីពិតផ្សេងទៀតនោះទេ ។ យើងទាំងអស់គ្នានឹងទទួលបានចម្លើយដូចគ្នា ពេលយើងសួរ ហើយទូលសូមពីទ្រង់ដោយអស់ពីចិត្ត សេចក្ដីជំនឿ និងបំណងប្រាថ្នាដ៏ពិត ។ បងប្អូនធ្វើការណ៍នេះខ្លះហើយ ពេលបងប្អូនលែងមានរឿងដោះសាខ្លួនទាំងអស់ ។
ច្រើនឆ្នាំកន្លងទៅ ខណៈបំពេញការចាត់តាំងនៅអាហ្វ្រិក ខ្ញុំបានឮការរាយការណ៍អំពីបុរសម្នាក់ ដែលដឹកសត្វក-វែងពីរក្នុងឡានរបស់គាត់ សត្វមួយខ្ពស់ជាងមួយទៀត ។ កាលគាត់ធ្វើដំណើរតាមមហាវិថី គាត់បានបើកក្រោមស្ពានមួយដែលកាត់លើមហាវិថីនោះ ប៉ុន្ដែស្ពាននោះមិនខ្ពស់ល្មមសម្រាប់សត្វក-វែងដ៏ធំមួយក្បាលនោះឡើយ ។ ពេលឡានបើកក្រោមស្ពាន ក្បាលសត្វក-វែងដែលខ្ពស់ជាងនោះបានបុកនឹងស្ពាន ហើយងាប់មួយរំពេច ។ ក្រោយមក អ្នកបើកឡានរូបនោះត្រូវគេសួរថា ហេតុអ្វីគាត់មិនប្រយ័ត្នជាងនេះបន្តិចដើម្បីចៀសវាងកុំឲ្យសត្វក-វែងនេះងាប់ ។ គាត់និយាយថា « វាមិនមែនជាកំហុសខ្ញុំទេ ។ គេសង់ស្ពាននោះទាបពេក » ។
ការដោះសារបស់បុរសនេះអាចស្ដាប់ទៅគួរឲ្យអស់សំណើច ប៉ុន្ដែតើបងប្អូនធ្លាប់បានដោះសាដោយមិនសមហេតុផលចំពោះជម្រើសមិនល្អរបស់បងប្អូនផ្ទាល់ទេ ? សូមកុំបន្ទោសស្ពានទាប ដោយសារវាទាបដូច្នោះ ។ ប៉ុន្ដែ សូមព្យាយាមរះឲ្យដល់សក្ដានុពលដ៏ពេញលេញរបស់បងប្អូន តាមរយៈការស័ក្ដិសមនឹងអំណាច ពរជ័យ និងអព្ភូតហេតុនៃស្ថានសួគ៌ដ៏ចាំបាច់ទាំងអស់ដែលបានសន្យាមក ដោយការបង្កើនសេចក្ដីជំនឿ ឬការទុកចិត្តលើទ្រង់ឥតដាច់ ។ ព្រះអម្ចាស់មានបន្ទូលទៅ យ៉ូសែប ស្ម៊ីធ ៖ « …បានទៅតាមការបញ្ចុះបញ្ចូលទាំងឡាយនៃមនុស្សលោក [ ប៉ុន្មានដង ] ។… អ្នកមិនត្រូវខ្លាចមនុស្សជាងព្រះឡើយ ។ ទោះជាមនុស្សលោកចាត់ដំបូន្មានទាំងឡាយនៃព្រះទុកជាគ្មានតម្លៃ ហើយមើលងាយព្រះបន្ទូលទាំងឡាយរបស់ទ្រង់ក៏ដោយ—ប៉ុន្តែអ្នកគួរតែមានចិត្តស្មោះត្រង់ នោះទ្រង់ក៏នឹងសន្ធឹងព្រះពាហុរបស់ទ្រង់ ហើយទ្រទ្រង់អ្នកពីអស់ទាំងព្រួញភ្លើងរបស់មារសត្រូវ ហើយទ្រង់ក៏នឹងគង់នៅជាមួយអ្នកគ្រប់ពេលវេលាមានការខ្វល់ខ្វាយដែរ » ។២៥
ឥឡូវនេះ ខ្ញុំចង់ពង្រីកហួសពីការពិនិត្យមើលខ្លួនឯង ហើយបន្សល់ទុកនឹងបងប្អូននូវសាក្សីខ្ញុំថា ផ្នែកនៃការរស់នៅតាមសេចក្ដីសញ្ញា និងការចុះចូលតាមព្រះទ័យរបស់ព្រះក៏ជាការស្ម័គ្រចិត្តចេញពីខ្លួនបងប្អូន ហើយធ្វើដូចដែលព្រះអម្ចាស់មានបន្ទូលទៅពេត្រុសឲ្យ « ចម្រើនឲ្យបងប្អូនអ្នកបានខ្ជាប់ខ្ជួនឡើង » ។ ប្រធានណិលសុនមានប្រសាសន៍កន្លងទៅថ្មីៗថា « យើងត្រូវធ្វើជាអ្នកកសាងនៃ…សេចក្ដីជំនឿទៅលើព្រះអម្ចាស់ ព្រះយេស៊ូវគ្រីស្ទ និងសេចក្ដីជំនឿលើសាសនាចក្ររបស់ទ្រង់ ។ … យើងត្រូវស្ថាបនាសាសនាចក្រ និងនគរនៃព្រះនៅលើផែនដីនេះ » ។២៦ លោកក៏បានថ្លែងទីបន្ទាល់ថា « គ្មានអ្វីកើតឡើងនៅលើផែនដីនេះក្នុងពេលនេះ ដែលសំខាន់ជាង [ ការប្រមូលផ្ដុំអ៊ីស្រាអែល ] នេះទេ ។ គ្មានអ្វី ដែលមានសារៈសំខាន់ខ្លាំងជាងនោះទេ ។ គ្មានទាល់តែសោះ ។ ការប្រមូលផ្ដុំនេះ គួរតែមានអត្ថន័យទាំងស្រុងចំពោះប្អូនៗ ។ នេះគឺជាបេសកកម្មដែលប្អូនៗត្រូវបានបញ្ជូនមកផែនដី » ។២៧ ដូចគ្នាដែរ ព្រះអង្គសង្គ្រោះបានសួរពេត្រុសថា « តើពេញចិត្តនឹងខ្ញុំមែនឬអី ? » រួចហើយមានបន្ទូលថា « ចូរឲ្យចំណីដល់ហ្វូងចៀមខ្ញុំស៊ីផង » ។២៨
ក្នុងដំណឹងល្អរបស់យ៉ូហាន យើងអានត្រង់ម៉ារា និងម៉ាថាបានឲ្យគេទៅហៅព្រះអង្គសង្គ្រោះ ពេលប្អូនប្រុសរបស់ពួកនាង ឡាសារ ធ្លាក់ខ្លួនឈឺយ៉ាងខ្លាំង ។ សិស្សរបស់ទ្រង់បានអង្វរទ្រង់កុំឲ្យទៅ ដោយសារពួកសាសន៍យូដាព្យាយាមផ្ដាច់ព្រះជន្មទ្រង់ ប៉ុន្ដែព្រះយេស៊ូវនៅតែទៅផ្នូររបស់ឡាសារ ។ នៅទីនោះព្រះអង្គសង្គ្រោះរបស់យើងបានព្រះកន្សែង ហើយខូចព្រះទ័យដូចមិត្តទ្រង់ដែរ ។ រួចហើយដោយព្រះចេស្ដានៃព្រះ ទ្រង់បានបញ្ជាឲ្យឡាសាររស់ឡើងវិញពីសា្លប់ ដោយមានបន្ទូល ៖ « ឡាសារអើយ ចូរចេញមក » ។ បទគម្ពីរកត់ត្រាបន្ដទៀតថា « នោះអ្នកដែលបានស្លាប់ ក៏ចេញមក មានទាំងសំពត់ស្នបរុំជាប់នៅជើងដៃផង ។ … [ ហើយ ] ព្រះយេស៊ូវមានព្រះបន្ទូលទៅគេថា ចូរស្រាយគាត់ឲ្យទៅចុះ » ។២៩
មិត្តជាទីស្រឡាញ់ខ្ញុំអើយ គ្មានអ្វីផ្ដល់ជីវិតជាងការចែកចាយពន្លឺនៃព្រះគ្រីស្ទ និងពន្លឺនៃដំណឹងល្អរបស់ទ្រង់ទេ ។ គ្មានអ្វីក្រៅពីដំណឹងល្អនៃព្រះគ្រីស្ទទេ ដែលអាចនាំសេចក្ដីសុខសាន្ដដល់គ្រប់ជាតិសាសន៍ សង្គ្រោះពិភពលោកនេះចេញពីភាពក្រីក្រ ឬលើកស្ទួយមនុស្សដទៃឲ្យមានសុភមង្គលជានិរន្ដរ៍ ។ អង្គការដែលប្រតិបត្តិតាមគោលការណ៍ផ្សេងៗទៀតអាចធ្លាក់ចុះ ។ មានតែដំណឹងល្អទេដែលអាចដោះ « សំពត់ស្នបរុំ » របស់អ្នកនៅជុំវិញបងប្អូនបាន ។ សូមអញ្ជើញមនុស្សដទៃឲ្យមករកពន្លឺរបស់ទ្រង់ ។ កាលបងប្អូនធ្វើដូច្នោះ ព្រះសន្យាថា បងប្អូននឹងនាំមកនូវ « សេចក្ដីសង្គ្រោះមកដល់ព្រលឹង [របស់បងប្អូន ] »៣០ថាអំពើបាបរបស់បងប្អូននឹងត្រូវបានអភ័យទោស៣១ហើយថាទ្រង់នឹងបញ្ជូន « ពួកទេវតារបស់ទ្រង់នៅព័ទ្ធជុំវិញអ្នកដើម្បីទ្រអ្នកឡើង » ។៣២
សេចក្តីសង្ឃឹម
ឥឡូវ ខ្ញុំដឹងយ៉ាងមោះមុតថា ត្បិតបើមានបំណងល្អរបស់បងប្អូន របស់ខ្ញុំឬរបស់នរណាផ្សេងទៀតក្ដី ក៏សម្ពាធដើម្បីប្រឈមនឹងទស្សនៈពិភពលោក ដែលមិនមែនជាបទបញ្ញត្តិរបស់ព្រះអម្ចាស់អាចធំមហិមា ។ ដោយការប្ដេជ្ញាចិត្តដ៏មុតមាំ ពេត្រុសបានពោលទៅកាន់ព្រះយេស៊ូវថា « ទោះបើមនុស្សទាំងអស់នឹងរវាតចិត្ត ដោយព្រោះទ្រង់ក៏ដោយ គង់តែទូលបង្គំមិនដូច្នោះទេ ។ … ទោះបើទូលបង្គំត្រូវស្លាប់ជាមួយនឹងទ្រង់ក៏ដោយ គង់តែមិនព្រមថា មិនស្គាល់ទ្រង់ឡើយ » ។៣៣ ប៉ុន្ដែភ្លាមៗបន្ទាប់ពីនោះ ពេត្រុសបានស្ទាក់ស្ទើរដោយបដិសេធព្រះអង្គសង្គ្រោះបីដង ។ តើបងប្អូនត្រូវរៀនអ្វីខ្លះពីរឿងនេះ ?
ខ្ញុំជឿថា នៅក្នុងចំណែកនៃព្រះអម្ចាស់ទ្រង់សព្វព្រះទ័យឲ្យបងប្អូនដឹងថា ទ្រង់ជ្រាបថា ការចុះចូលតាមព្រះទ័យទ្រង់—ការរស់នៅតាមសេចក្ដីសញ្ញា ឬការប្រែចិត្តជឿពេញលេញ—គឺជាដំណើរការមួយ មិនមែនជាព្រឹត្តិការណ៍មួយទេ ។ ព្រះយេស៊ូវបានប្រទានព្រះជន្មរបស់ទ្រង់ ដើម្បីកុំឲ្យយើងវាស់វែងជីវិតយើងដោយភាពទន់ខ្សោយ ឬភាពមិនឥតខ្ចោះរបស់យើង ប៉ុន្ដែដើម្បីយើងអាចប្រែចិត្តរាល់ថ្ងៃ ហើយមានកម្លាំងឡើងតាមរយៈការប្រែចិត្តទៅជាសេចក្ដីជំនឿដែលមិនរង្គោះរង្គើរ ។ បងប្អូនអាចឆ្លាក់ក្នុងចិត្តបងប្អូននូវការណែនាំដ៏ជ្រៅជ្រះនេះមកពីអែលឌើរ ជែហ្វ្រី អ័រ ហូឡិន នៅសន្និសីទទូទៅ ខែ មេសា ឆ្នាំ ២០១៦ ៖
« យើងមានការលួងលោមចិត្តខ្លះៗដោយសារតែភាពពិតថា ប្រសិនបើព្រះប្រទានរង្វាន់ចំពោះតែអ្នកដែលស្មោះត្រង់ឥតខ្ចោះ នោះទ្រង់នឹងពុំមានឈ្មោះច្រើនក្នុងបញ្ជី ដើម្បីប្រទានរង្វាន់ឲ្យនោះទេ ។ សូមចងចាំនៅថ្ងៃស្អែក និងថ្ងៃខាងមុខថា ព្រះអម្ចាស់ប្រទានពរដល់អ្នកទាំងឡាយណាដែលចង់កែលម្អ ដែលទទួលស្គាល់ថា គេត្រូវការបទបញ្ញត្តិហើយព្យាយាមរក្សាវា ដែលរីករាយនឹងគុណធម៌ដូចព្រះគ្រីស្ទ ហើយខិតខំអស់ពីសមត្ថភាពដើម្បីទទួលបានវា ។ ប្រសិនបើអ្នកជំពប់ដួលពេលកំពុងព្យាយាមនោះ កាលមនុស្សគ្រប់រូបជំពប់ដួលដែរ នោះព្រះអង្គសង្គ្រោះគង់នៅចាំជួយអ្នកឲ្យបន្ដដើរទៅមុខទៀត ។ ប្រសិនបើអ្នកដួល ចូរសូមឲ្យទ្រង់ជួយ » ។៣៤
លីណេត និងខ្ញុំបានអង្គុយជាមួយអែលឌើរហូឡិននៅទីក្រុងយ៉ូហានណេសបឺក ពេលប្អូនស្រីយុវមជ្ឈិមវ័យនៅលីវម្នាក់ដែលជាអ្នកត្រឡប់មកពីការផ្សព្វផ្សាយសាសនាវិញបានក្រោកឈរ ហើយថ្លែងទីបន្ទាល់ថា « ខ្ញុំមិនបានមកចម្ងាយនេះ ដើម្បីមកដល់ត្រឹមនេះទេ » ។ សូមចាំថា « មិនថាបងប្អូនកំពុងប្រឈមនឹងឧបសគ្គអ្វី… [ ដែលត្រូវ ] បន្ដទៅមុខទេ ។ ចូរបន្ដខិតខំ ។ ចូរបន្ដទុកចិត្ត ។ ចូរបន្ដជឿ ។ ចូរបន្ដរីកចម្រើន ។… ស្ថានសួគ៌កំពុងលើកទឹកចិត្តបងប្អូននៅថ្ងៃនេះ ថ្ងៃស្អែក និងជារៀងរហូតតទៅ » ។៣៥ បងប្អូននៅក្នុងបាតព្រះហស្ដនៃព្រះហស្ដរបស់ព្រះ ហើយទ្រង់អាចដោះលែងបងប្អូនកាត់ភ្លើងដ៏សន្ធោសន្ធៅណាមួយបាន ។
អែលឌើរហូឡិនក៏បានថ្លែងពីសេចក្ដីមេត្តា និងការធានាដ៏ស្រទន់បន្ថែមទៀតពីព្រះអម្ចាស់ ដែលបងប្អូនអាចចង់ទន្ទេញវាចាំក្នុងចិត្ត ៖
« ព្រះវិញ្ញាណមិនត្រូវបានរាំងស្ទះដោយវីរុស ឬដោយព្រំដែនជាតិ ឬដោយការព្យាករខាងវេជ្ជសាស្ដ្រឡើយ ។ [ មាន ] អំណោយទានមកពីស្ថានសួគ៌ដែលមិនបានកម្រិតដោយបញ្ហាក្នុងដែនដី ឬជំងឺក្នុងអាកាស ។ … ទ្រង់ដែលបានបង្កើតពិភពលោកដ៏អស្ចារ្យដែលយើងរស់នៅនេះ អាចមានបន្ទូលទៅធាតុណាមួយក្នុងនោះ ៖ ‹ ឆ្ងាយត្រឹមនេះ ហើយកុំទៅឆ្ងាយទៀត › ។ នោះជាអ្វីដែលទ្រង់នឹងមានបន្ទូលទៅការបំផ្លាញ ដែលយើងកំពុងប្រឈមនេះ ។ នៅក្នុងវត្តមាននៃព្រះដ៏មានមហិទ្ធិឬទ្ធិ សូម្បីភាវៈទំហំល្អិតជាងអាតូមត្រូវតែឱនចុះ—បើក្នុងន័យប្រៀបធៀបមែន—ហើយម្នាក់ៗតាមរបៀបរបស់ខ្លួនផ្ទាល់ ‹ ទទួលស្គាល់ › ថាព្រះយេស៊ូវគឺជាព្រះគ្រីស្ទ ជាព្រះរាជបុត្រានៃព្រះ ព្រះប្រោសលោះដ៏អស្ចារ្យនៃអ្វីទាំងអស់ ។ នៅក្រោមការដឹកនាំរបស់ព្រះវរបិតាទ្រង់ នោះព្រះអង្គសង្គ្រោះទទួលខុសត្រូវលើជោគវាសនានៃពិភពលោកនេះ ។ យើងស្ថិតក្នុងព្រះហស្ដដែលមានសុវត្ថិភាព និងពេញដោយក្ដីស្រឡាញ់ » ។៣៦
សេចក្ដីបញ្ចប់
ខ្ញុំចង់បញ្ចប់ត្រង់កន្លែងដែលខ្ញុំបានចាប់ផ្ដើម ។ ខ្ញុំជឿថា បងប្អូនគឺជាជំនាន់យុវមជ្ឈិមវ័យដ៏អស្ចារ្យបំផុតនៅក្នុងប្រវត្តិសាសនាចក្រនេះ ។ បងប្អូនក៏អាចជាជំនាន់ដែលប្រឈមនឹងឧបសគ្គដ៏ខ្លាំងបំផុតដែរ ។ កាលបងប្អូនគិតដល់ឧបសគ្គដែលហ៊ុមព័ទ្ធបងប្អូន សូមចាំថា ព្រះមានបន្ទូលថា « ដ្បិតយើងជាព្រះអម្ចាស់នឹងជំនុំជម្រះមនុស្សលោកទាំងអស់ ស្របតាមកិច្ចការរបស់ពួកគេ គឺស្របតាមសេចក្ដីប៉ងប្រាថ្នានៃដួងចិត្តរបស់ពួកគេ » ។៣៧ ព្រះវិញ្ញាណអាចជួយបងប្អូនឲ្យបណ្ដុះបំណងប្រាថ្នារបស់បងប្អូន ប៉ុន្ដែខ្លួនបងប្អូនតែម្នាក់គត់ដែលត្រូវជ្រើសរើសអ្វីដែលបងប្អូនប្រាថ្នា ហើយមានតែខ្លួនបងប្អូនតែម្នាក់គត់ដែលទទួលខុសត្រូវចំពោះមុខព្រះសម្រាប់ជម្រើសនោះ ។ ទ្រង់ក៏បានប្រកាសផងដែរថា « ស្របតាមសេចក្ដីប៉ងប្រាថ្នារបស់អ្នក … ការណ៍នោះនឹងបានសម្រេចដល់អ្នក » ។៣៨ ការណ៍នេះមានន័យថា « [ បងប្អូន ] គួរតែចង់បានលទ្ធផលនៃអ្វីដែល [ បងប្អូន ] ចង់បាន ! »៣៩
ខ្ញុំបញ្ចប់ដោយបទពិសោធន៍ និងទីបន្ទាល់ផ្ទាល់ខ្លួននេះមកពីជីវិតខ្ញុំ ។ ច្រើនឆ្នាំកន្លងទៅ កាលជានិស្សិតឆ្នាំទីពីរនៅមហាវិទ្យាល័យ ខ្ញុំបានរៀនដើម្បីត្រៀមប្រឡងបញ្ចប់ដោយខ្លួនឯងនៅផ្ទះ ។ វាជាថ្ងៃដ៏កក់ក្ដៅមួយ ហើយកាលខ្ញុំរំឭកវិញ្ញាសារមេរៀនខ្ញុំ មានសត្វសុចមួយចាប់ផ្ដើមសូរង៉ឺងៗពីមុខខ្ញុំ ។ ការនៅរឹងទទឹងរបស់សត្វសុចនេះចាប់ផ្ដើមធ្វើឲ្យខ្ញុំធុញយ៉ាងខ្លាំង ។ ទីបំផុត ខ្ញុំទ្រាំលែងបាន ។ ខ្ញុំបានលើកដៃទះសត្វសុចនោះងាប់ទៅ ។ រហូតដល់ថ្ងៃនេះ ខ្ញុំមិនអាចពន្យល់ពីអ្វីដែលបានកើតឡើងបន្ទាប់ឡើយ ៖ ខ្ញុំមើលទៅសត្វសុចដែលងាប់នោះក្នុងបាតដៃខ្ញុំ ហើយមានអារម្មណ៍អាណិតខ្លាំងណាស់ ។ ខ្ញុំនិយាយប្រាប់ខ្លួនឯងថា « សត្វសុចនោះមិនត្រូវងាប់ឡើយ ។ វាងាប់ដោយសារតែការអន្ទះសា និងការគ្មានអំណត់របស់ខ្ញុំប៉ុណ្ណោះ ។ រួចហើយខ្ញុំបានលុតជង្គង់ចុះអធិស្ឋានទៅព្រះ ដើម្បីអភ័យទោសឲ្យខ្ញុំ ហើយថាសត្វសុចនោះរស់ម្ដងទៀត ។ កាលខ្ញុំបានបញ្ចប់ការអធិស្ឋាននោះ សត្វសុចបានហើរចេញពីដៃខ្ញុំ ។
ខ្ញុំបានសួរខ្លួនឯងច្រើនឆ្នាំមកថា ហេតុអ្វីព្រះធ្វើការណ៍សម្រាប់ខ្ញុំ ? ចម្លើយជាច្រើនបានផ្តល់ឲ្យ ប៉ុន្ដែគ្មានអ្វីសំខាន់ជាងចម្លើយនេះទេ ៖ ទ្រង់សព្វព្រះទ័យឲ្យខ្ញុំយល់ដោយខ្លួនឯងយ៉ាងច្បាស់ថា ទ្រង់មានព្រះចេសា្ដទាំងអស់ដើម្បីលើកស្ទួយខ្ញុំ ឬនរណាផ្សេងទៀត សូម្បីតែអ្នកតូចបំផុតក្ដី ។ ទ្រង់សព្វព្រះទ័យឲ្យខ្ញុំដឹងថា ទ្រង់មានសេចក្ដីមេត្តាករុណាយ៉ាងធំក្រៃលែងចំពោះភាពទន់ខ្សោយរបស់យើង ហើយថាទ្រង់រាប់គ្រប់សរសៃសក់នៅលើក្បាលយើង ។ ឥឡូវ បើទ្រង់បានស្ដារសត្វសុចនេះឡើងវិញ នោះទ្រង់នឹងមិនដែលបោះបង់បងប្អូនចោលឡើយ—មិនថាបងប្អូនឈរនៅទីណានោះទេ ។
កុំធ្វើដូចពួកឡោឌីសៀ ហើយអនុញ្ញាតឲ្យភាពរីករាយគ្រប់គ្រងបងប្អូនឡើយ ។ នេះជាទីបន្ទាល់របស់ខ្ញុំចំពោះបងប្អូន ។ កាលបងប្អូនដាក់ការដោះសាខ្លួន និងអំនួតទុកមួយអន្លើរ កាលបងប្អូនសួរ ហើយស្ដាប់តាមសំឡេងរបស់ទ្រង់ មិនមែនស្ដាប់តាមខ្លួនឯង កាលបងប្អូនធ្វើតាមរបៀបរបស់ទ្រង់ នោះបងប្អូននឹងឃើញការណ៍ទាំងឡាយតាមដែលមាននៅពេលនេះ ។ កាលបងប្អូនខិតខំព្យាយាមដោយស្មោះសដើម្បីបានប្រែចិត្តជឿ រស់នៅតាមសេចក្ដីសញ្ញា ហើយមិនមែនតាមភាពសុខស្រួល និងចុះចូលតាមព្រះទ័យរបស់ព្រះ ខណៈចម្រើនដល់មនុស្សដទៃ នោះបងប្អូននឹងរកឃើញពរជ័យ និងអព្ភូតហេតុទាំងអស់ដែលបងប្អូនត្រូវការ ដើម្បីទទួលបានជោគជ័យក្នុងជីវិតនេះ ហើយអាចត្រឡប់ទៅផ្ទះវិញ ទៅរកព្រះវរបិតារបស់បងប្អូនដែលគង់នៅស្ថានសួគ៌ ហើយទទួលបានអំណរដ៏អស់កល្ប ។
ព្រះយេស៊ូវគ្រីស្ទគឺជាព្រះអង្គសង្រ្គោះរបស់យើង ។ ទ្រង់មានព្រះជន្មរស់ ។ នេះគឺជាសាសនាចក្ររបស់ទ្រង់ ហើយនេះជាសាសនាចក្រដែលទទួលដោយព្រះអង្គសង្គ្រោះនៅឯការយាងមកជាលើកទីពីររបស់ទ្រង់ ។ ព្រះវរបិតាសួគ៌របស់យើងមិនមែនជាព្រះបិតាដែលអវត្តមានឡើយ ។ ផែនការរបស់ទ្រង់គឺជាផែនការនៃសុភមង្គលតែមួយគត់ ។ តាមរយៈព្រះវិញ្ញាណបរិសុទ្ធ បងប្អូនអាចដឹងពីសេចក្ដីពិតនៃគ្រប់ការណ៍ទាំងអស់ និងអ្វីៗទាំងអស់ដែលបងប្អូនត្រូវតែធ្វើ ។ ការអធិស្ឋានរបស់ខ្ញុំគឺថា បងប្អូននឹងមានទឹកចិត្តដើម្បីប្រែចិត្តពីបំណងមិនសុចរិតណាមួយ ហើយជំនួសវាដោយបំណងដ៏ល្អពីព្រះដើម្បីរស់នៅតាមសេចក្ដីសញ្ញា ហើយចុះចូល និងតស៊ូតាមព្រះហស្ដបន្សុទ្ធរបស់ទ្រង់ក្នុងជីវិតរបស់បងប្អូន ។ ខ្ញុំសូមថ្លែងទីបន្ទាល់ដល់បងប្អូនក្នុងយុវវ័យរបស់បងប្អូន ដូចជាអាលម៉ាបានថ្លែងទីបន្ទាល់ទៅកាន់កូនប្រុសលោក ហេលេមិនក្នុងយុវវ័យរបស់គាត់ថា« ឪពុកដឹងថា នរណាដែលដាក់ទីទុកចិត្តរបស់ខ្លួនទៅលើព្រះ អ្នកនោះហើយ ដែលនឹងបានគាំទ្រនៅក្នុងការពិសោធន៍របស់គេ និងវិបត្តិរបស់គេ និងសេចក្ដីទុក្ខវេទនារបស់គេ ហើយនឹងត្រូវបានលើកឡើងនៅថ្ងៃចុងក្រោយបង្អស់ » ។៤០
នៅក្នុងការអធិស្ឋានរបស់ខ្ញុំ សុំឲ្យព្រះប្រទានពរដល់បងប្អូនទាំងអស់គ្នា នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕