Braden Ej Tōl Iaļ Eo
Rijeje eo ej jokwe ilo California, USA.
Bwebwenato in ekar bōk jikin ilo Louisiana, USA.
Mour ilo juon jikin alikita ekar lukkun em̧m̧an. Ak juon men ekar jako.
“A kwon juon jon̄ak n̄an ro rej tōmak” (1 Timote 4:12).
Braden im Baba rekar kotaki bōkaj ko reddo kōn m̧ōn̄ā ko kijen alikita ko ļo̧k n̄an o̧o̧b in jikin naajdik alikita ko. Bōran alikita ko rej emmō ilo tōrerein ijo im kepaakļo̧k erro. Ke Braden im Baba rekar tōpar jikin naajdik alikita ko, jet iaan alikita ko rekar wōlan̄i.
Ak Braden ekar jab mijak. Jerbal ippān Baba ilo jikin alikita ko ekar juon men em̧m̧antata.
“Iien Naajdik!” Braden ekar ba. Ekar bōk juon jikup in m̧ōn̄ā ko kijen alikita im joļo̧k n̄an dān eo.
Meme. Meme. Ejeripitpit dān.
Jet iaan alikita ko rekar bauri im kan̄n̄i m̧ōn̄ā ko kijeer ilo mejatoto. Ro jet rej tupari n̄e rej jok ilo dān eo. Braden im Baba rekar ejjoļo̧k m̧ōn̄ā m̧ae bakōj ko aer rekar maat kobbaer.
“Kom̧m̧ol kōn am̧ jipan̄ eō,” Baba ekar ba. “Jemoot. Mottan jidik mijenede ko renaaj itok.”
Braden im baam̧le eo an rekar jino bwebwenato ippān mijinede ro jejjo allōn̄ remootļo̧k. Ekar em̧m̧an ippān mijinede ro! Im ekar kōņaan ekkatak kōn Kabun̄ in. Baba ekar juon membōr in Kabun̄ in, ak ejjan̄in kar bar etal im jar. Mama im Braden rejjanin kar peptaij.
“Wiik eo ļo̧k kwar kōm̧m̧an juon kōttōpar n̄an riit Mosaia 18,” Sister Cox ekar ba joteen eo. “Ejet am̧ kar kōm̧m̧ane?”
Mama im Baba rekar kalimjōk doon im kar ilbōk jidik ke e reilo̧k ilo juon iien ekadu kitien. “Kōm kar lukkuun boub ilo wiik in,” Mama ekar ba.
“Ikar riiti!” Braden ekar ba.
“Jerbal em̧man!” Sister Blood ekar ba, kepaake n̄an high five. “Ewi am̧ kar en̄jake ālkin am̧ kar riiti?”
Braden ekar lukkuun mejān ettōn̄ dikdik n̄an e. “Elukkuun em̧m̧an. Im ikar jar kōn ao peptaij. Ilukkuun kōņaan.”
“Elukkun em̧m̧an! Ijeļā bwe ej kōm̧m̧an an Jemedwōj Ilan̄ lukkuun m̧ōņōņō,” Sister Cox ekar ba. Ekar reiļo̧k n̄an jinen Braden. “Ewi am en̄jake kōn menin?”
“Ijjab lukkuun jeļā. Ij ļōmņak ij aikuj jidik bar iien,” Mama ekar ba.
Braden ekar en̄jake jidik burum̧ōj ilo aolepen iien katak eo. Ekar kōņaan bwe jim̧or jinen im jemān ren membōr in Kabun̄ in. Im ekar kōņaan bwe en erom̧ juon membōr in Kabun̄ in barāinwōt!
Ke mijinede ro rekar etal, ekar ba n̄an ro jinen im jemān bwe ekar ba ta eo me ekar ba m̧oktaļo̧k. Ilukkuun kōņaan peptaij. Im …” Braden ekar bōk kūtuōn. “Ilukkuun kōņaan bwe Baba en peptaiji eō.”
Ālkin juon iien, Baba ekar kajju kwaļo̧k buruōn. “Ilukkuun bar kōņaan.”
Mama ekar ikōn̄ “Jen jar kake.”
Braden ekar bukwelōlō ippān baam̧le eo an im ekar kajjitōk ippān Jemedwōj Ilan̄ eļan̄n̄e e im Jinen rej aikuj kar peptaij. Ekar en̄jake okmeenān im iakwe.
Jejjo wiik tokālik, Braden ej riiti jeje ko rekwojarjar im jar aolep raan. Kar jinoin, e eo ekkā an kajoor kajjitōk ippān ro jinen im jemān eļan̄n̄e renaaj jar im riit ippān. Ak ejjab to, rekar jino kajjitōkin e. N̄e e im Baba rekar naajdik alikita ko, rej kajoor kōnono kōn jeje ko rekwojarjar ak ta eo rekar ekkatak ilo m̧ōn jar eo. E im mama rej kajoor kōnono kōn katak ko an mijinede ro. Aolep raan, Mama im Baba rekar m̧ōņōņō.
Juon raan ilo iien an katak ippān mijinede ro, Mama ekar ba naan ko me eto an Braden kar kōttari: “Ikōņaan peptaij.
N̄an wiik ko tok jet rej pedotok, Braden ekar en̄jake an epāpe ioon kōdo̧ ko.
Āliktata, ekar juon raan in peptaij an Mama im Braden. Ke Braden ekar waļo̧k tok jān dān eo, ekar en̄jake iakwe eo an Jemedwōj Ilan̄ n̄an e im baam̧le eo an. Ekar atbokwoje Baba kōn juon atbokwoje eļap.
Baba ekar jiburlepe tok Braden im unoojdikdik n̄ane, “Komol kōn am̧ juon waanjon̄o̧k em̧m̧an im am̧ jipan̄ kōm. Ij iakwe eok.”