Paineer ro ilo Aolep Āne
Julia Mavimbela
Ritōl an Jukjukin Pād eo ilo South Africa
“Iakwe ej itok wōt ilo ad Jeorļo̧k bōd an ro jet.”
Julia ej iri ātin. Innem ekar bōk jabōļ eo im kar jino an kūb. Kiiō, bwidej eo ej pād ie ekar bwidej ot. Ak ejjab to enaaj kar erom̧ juon jikin kallip aibojooj.
Iien ko rekar pen n̄an Rikilmeej ro ilo South Africa. Kien ko ijeņ rekar kōm̧m̧an bwe Rikilmeej im Ripelle ren jeņoļo̧k. Elōn̄ rikilmeej rekar kam̧akūt er jān m̧ōko m̧ōer im joke ilo jet jikin ko rettoļo̧k jān Ripelle ro, im rekar jab maron̄ bout. Ekar lōn̄ jorreen ko ilo bukwon eo ijo Julia ekar jokwe ie, im jikuuļ ko rekar kilōk kōn ta in ekar waļo̧k. Jet iien ekar kauwōtata n̄an pād nabōj.
Bōtaab eaar jab kabōjrak Julia. Ekar kōņaan kōm̧m̧ani jet men n̄an bōktok aeņōm̧m̧an n̄an jukjukin pād eo an. Unin an kar jino kōm̧m̧ane juon jikin kallip.
Jet ajri rekar lo an Julia jerbal. “Jemaron̄ ke jipan̄?” rekar kajjitōk.
“Aeet,” Julia ekar uwaak. Ekar kajjoļo̧k aer jabōļ. Ekar kwaļo̧k n̄an er wāween n̄an kapidodoik bwidej eo im tūm̧ wūjooj ko.
“Jen kubwij bwidej in emeo̧, joļo̧k juon ine in iakwe, im lale ta le ko emaron̄ letok n̄an kōj,” ekar ba. “Iakwe ej itok wōt ilo ad jeorļo̧k bōd an ro jet.”
Ekar mootļo̧k wiik ko, im elōn̄ļo̧k menin eddōk ko rekar eddōkļo̧k. Armej ro jet rekar itok im jerbal ilo jikin kallip eo. Rekar ittūm̧ wūjooj aeitotok. Rekar katōki elōn̄ ine ko. Rekar wūtdikdiki elōn̄ menin eddōk ko. Ekar kōm̧m̧an an Julia m̧ōņōņō ilo an lo elōn̄ armej ro rej jipan̄.
Juon raan Julia ekar ioon ruo likao. Julia ekar bwilōn̄ kōnke Ripelle ro ejeja aer itok n̄an ijo kōm ej jokwe ie. Rekar ba bwe er rej mijinede. Ekar karuwaineneik er n̄an kwaļo̧k juon ennaan ilo m̧weo im̧ōn.
Ke ļaddik eo nejin Julia ekar ron̄ ke rej itok, ekar ilbōk. “Etke kwar karuwaineneik er?” ekar ba. “Er Ripelle. Ekauwōtata.”
Ak Julia ekar lōke mijenede ro. “Em̧m̧aan rein roktak,” Julia ekar ba. “Rej kajedeed aeņōm̧m̧an.”
Ke mijenede ro rekar itok, Julia ekar karuwaineneik er. Juon iaer ekar kile juon pija in juon kopā. Kar jān iien m̧are eo an Julia.
“Wōn en?” mijenede eo ekar kajjitōk, jitōn̄ļo̧k pija eo.
“Ļeo Ippa, etan in Jon.” Julia ekar reilaļļo̧k. “Ekar mej ilo juon itaak in wa.”
Mijenede eo ekar emajidjid. “Jej tōmak bwe baam̧le remaron̄ bar mour ippān doon n̄an indeeo, men̄e im jekdo̧o̧n ālkin aer mej.”
Juon en̄jake in aeņōm̧m̧an ekar kalibubuik Julia. Ekar en̄jake m̧ōņōņō n̄an ekkatak kōn karōk eo an Anij im kōm̧m̧ane iien katak ko an ippān mijenede ro. Iakwe gospel eo ekar ļapļo̧k ilo buruwōn Julia, āinwōt menin eddōk ilo jikin kallip eo an. Ejjab to ekar kālet bwe en peptaij.
Ilo m̧ōn jar eo, Julia ekar ioon elōn̄ armej ro me ej kab ioon er. Jet rekar Rikilmeej. Jet rekar Ripelle. Ak er aolep rekar jipan̄ im ekkatak ippān doon.
Julia ekar kwaļo̧k n̄an ajri ro ilo m̧ōn jar eo kilen jipan̄ ilo jikin kallip eo an. “Jej aikuj kapidodoik buruōd, āinwōt bwidej in,” ekar ba. “Jej aikuj kōm̧m̧ane juon jikin gospel ilo kōj. Jej aikuj kōm̧m̧an juon jikin iakwe.”
Jon̄oul jilu iiō ko rem̧ootļo̧k ālkin an Julia kar peptaij, kien eo me ej kōjeņoļo̧k Rikilmeej jān Ripelle ilo South Africa ekar jem̧ļo̧k.
Epaake tarin 70,000 membōr in Kabun̄ in ilo South Africa rainin.
South Africa ewōr 11 kajin ko ie.
Julia ekar jino jipan̄ Kōrā n̄an Aeņōm̧m̧an, juon kurup n̄an kōļapļo̧k bōro kuk im aeņōm̧m̧an ilo South Africa.
Ekar juon iaan rijerbal ro an tampeļ jinoin tata ilo Johannesburg South Africa Tampeļ.
Julia ekar juon rūkaki. Ekar katakin ajri ro riit n̄e rej jerbal ilo jikin kallip eo.