Ol Niu Amigo (Fren)
Hem we i raet i stap long Yuta, YSA.
Brijit i no toktok lanwis Spein. ?Olsem wanem nao bae hem i mitim ol man?
“Taem we mi mi strenja, yufala i tekem mi mi go long haos blong yufala” (Matiu 25:35).
Brijit i lukluk i go aotsaed long windo blong trak, taem we famli blong hem i stap draev tru long ol smol rod blong Karsak, Venesuela. I gat ol haos we kala blong olgeta i laet wetem ol bigfala grin hil. I wan naesfala ples. Mama mo Papa, tufala i talem se, blong stap laef long ples ia, bae hem i wan niu longfala wokbaot.
Be, Brijit i stap wari yet. Tedei bae hem i fas taem blong olgeta, blong go long jos long niufala kantri blong olgeta ia.
Mama i tanem hem i go long Brijit. Mama i askem: “?Yu Oraet, gel blong mi?” “I luk olsem se yu no glad?
Brijit i tantanem han blong hem. “Mi mi fraet. Mi no save toktok lanwis Spein. ?Olsem wanem nao mi save gat ol fren?
Mama i pusum han i go blong holem han blong Brijit. “Mi save se yu stap wari. Be, bae evri samting i oraet. Pulum gud win blong yu.”
Brijit i lukluk daon long ol han blong hem. Oli kolkol, iven we ples i hot aotsaed. Hat blong hem i pam kwik, mo hem i filim se bel blong hem i tantanem insaed, taem trak i kam stop long ples blong pak long jos. ?Bae jos i olsem wanem? ?Bae hem i save andastanem wan samting?
Oli stap wokbaot i go insaed long japel, Brijit i filim olsem se hem wan strenja. Hem i lukluk raon i go long ol narafala famli, evriwan i stap toktok lanwis Spein nomo. Afta hem i luk tu gel we oli gat semmak yia olsem hem.
Taem tufala ia i luk Brijit, tufala i ron hariap blong go luk hem. Tufala i toktok hariap, wetem ol voes blong glad, wetem ol bigfala smael.
Be hem i no save andastanem wan samting we tufala i talem. Hem i stap tingting se, ?Bae tufala i ronwe taem oli faenemaot se, mi no save toktok lanwis Spein?
Brijit i pulum gud win blong hem. Hem i saksakem hed blong hem, mo talem: “No hablo español,. “Mi no toktok lanwis Spein.” Wota blong ae blong hem i fulap.
Tufala gel i muvum solda blong tufala go antap wetem bigfala smael. Wan gel i poenem hemwan mo talem: “Dayana.” Afta hem i poenem narafala wan mo talem, “Andrea.”
Wari blong Brijit i stat blong lus. Hem i smael long tufala gel ia mo i poenem hemwan. “Brijit.”
Dayana mo Andrea i sidaon long saed blong Brijit. Oli tijim hem olsem wanem blong talem, “Ol skripja” long lanwis Spein mo sam narafala toktok. Taem sakramen miting i stat, hat blong Brijit i wom mo i gat pis.
Afta Praemeri klas i finis, Brijit mo ol niu fren blong hem, oli sidaon long gras aotsaed long jos, taem mama mo papa blong olgeta oli stap stori. Dayana mo Andrea i tijim Brijit sam moa toktok long lanwis Spein. Afta Dayana i poenem wan stamba blong tri mo askem, “¿Inglés?”
Brijit i smael mo poenem stamba blong tri. Hem i talem: “Tri”. Hem i glad mo poenem ol narafala samting, mo stap talem Inglis toktok blong ol samitng ia. Dayana mo Andrea i ripitim ol Inglis toktok ia. Afta oli tijim Brijit, olsem wanem blong talem ol toktok ia long lanwis Spein. Brijit i lanem ol kaen toktok we bae i save help, olsem libro (buk), casa (haos), mo coche (trak). Wan samting we i moa gud, i we oli tijim hem olsem wanem blong talem amigos (ol fren).
Kolosap hem i taem blong gobak long haos. Brijit i talem tata long Dayana mo Andrea.
“?Fas dei blong yu long jos long Venesuela i olsem wanem?” Papa i askem.
Brijit i smael. “!Hem i gud tumas! Mi mekem sam fren. !Mo tufala i stap tijim mi lanwis Spein!”
“!Hemia i gud tumas! Mi glad tumas we yu bin gat wan gud dei.”
Brijit i tingbaot olsem wanem Dayana mo Andrea i welkamem hem. Hem i nomo filim se hem i wan strenja. Hem i save Papa long Heven i stap helpem hem blong stap mekem ol niu fren. !Mo hem i no save wet blong luk wanem bae i hapen yet taem oli stap long Karsak!
Pikja i kam long Julia Castaño