Wan Impoten Ges
Man we i raet i stap long Dar Es Salaam, Tansania mo Yuta, YSA.
?Olsem wanem nao Ammon i save helpem famli blong hem i welkamem wan impoten ges?
”Stanemap wan haos … wan haos blong oda, wan haos blong God” (Doktrin mo Ol Kavenan 88:119).
Hem i wan Satedei aftenun. Ammon i wantem blong gat wan gud taem.
Hem i talem, “Mama,” “?mi save go aotsaed mo pleplei?
“Fastaem yu mas klinim rum blong yu,” Mama i talem.
“Be, Mama,” Ammon i talem, “?be rum blong mi, i save stap fastaem?”
“Yumi wantem blong invaetem wan man we i impoten, blong stap olsem ges blong yumi. Mekem se, yumi wantem blong haos i klin mo stap long oda.
“?Wan impoten ges?” Ammon i talem. “?Insaed long hom blong yumi?”
“Yes, mo yu save help blong invaetem hem i kam,” Mama i talem. “Mekem se, yu mas go mo klinim rum blong yu.
Ammon i glad tumas. Hem glad blong gat ol ges. Hem i stap tingting se bae ges ia, hem i huia. ?Mea? ?Hedmasta blong skul? !Mi ting se, bae hem i bisop!
Ammon i go long rum blong hem. Faswan hem i faenem ol toti soks blong hem long floa. Hem i putum long basket blong toti klos. Afta Ammon i putum gud ol skul buk blong hem long tebol. Hem i wantem tumas blong ges ia, i save se, hem i wantem blong lanem niu samting.
Bigfala sista blong Ammon, Angel, i kam long rum blong hem. “?Yu stap mekem wanem?”, hem i askem.
“Mama i talem se bae yumi gat wan impotem ges,” Ammon i talem. “Mekem se hem i askem mi blong help, blong rere from hem.”
Tufala i lukluk i go antap, blong luk mama, we i stanap long doa i stap.
?Wanem nao yumi save mekem blong stap rere? Ammon i talem. Yumi wantem impoten ges blong yumi i filim se hem i welkam long haos blong yumi.”
“?Wanem aedia nao yu gat?” Mama i askem.
“Yumi save talem karibu,” Ammoni talem. Long Sawali hemia, i minim, “Yu welkam long haos blong mifala. Yu welkam blong yu toktok.”
“Mifala i save lisin,” Angel i talem. “Hem i impoten blong lisin.”
“Hemia i ol gudfala tingting,” Mama i talem “Bae yumi luk wanem Baba (Papa) i talem taem hem i kam long haos.”
Long wan aoa taem, Baba (papa) i kam.
Ammon i stap wet. “Mama i talem se bae yumi invaetem wan spesel ges long haos blong yumi. Mifala i stap rere from.”
Baba i smael. “Mi mi glad. Kam selebret. Sidaon. Yumi toktok Angel, plis kam.”
Taem oli sidaon tugeta, Baba i talem, “Mama mo mi i stap tokbaot spesel ges blong yumi ia mo olsem wanem yumi save mekem blong mekem se hem i filim se hem i welkam. Faswan bae mi talem aot huia nao i spesel ges blong yumi. Hem i Tabu Spirit. Hem i wan long ol impoten ges.”
Ammon mo Angel, tufala i lukluk tufala. !I no hemia we mi tingting long hem!
“Mo hem i wan ges, we yumi save invaetem hem blong stap wetem yumi oltaem,” Mama i talem. “Angel, afta we yu baptaes, yu bin kasem konfemesen. Mo oli givim long yu wan presen. “?Yu tingbaot wanem we Baba i talem long blesing?”
“Hem i talem long mi, Kasem Tabu Spirit.
“Hemia i tru,” Mama i talem. “Oli invaetem yu, blong kasem Tabu Spirit. Mekem se, taem mi talem yu save helpem mi blong invaetem Hem, “?wanem nao mi minim?”
Ammon i tingting. Hem i plan blong mekem wan kad blong invaetem ges blong olgeta. ?Be, olsem wanem nao bae hem i save invaetem Tabu Spirit? “Mi ting se blong mekem ol samting we i mekem se hem i fil welkam, mi stap invaetem hem ia,” Ammon i talem.
“Yes. !Hemia nao!” Baba i talem. “Wan wei blong invaetem hem, blong kam long haos blong yumi, hem i blong mekem haos i stret mo i klin.
“?Hemia nao, from wanem mama i wantem mifala blong klinim rum blong mifala?” Ammon i askem.
“!Yes!” Mama i talem. “?Wanem nao yumi save mekem blong invaetem hem blong i stap wetem yumi?”
“Yumi save prea,” Ammon i talem. “Stap ridim ol skripja.”
“Yumi save lisin long gudfala miusik, i,” Angel i talem. “Yumi save singsing sam singsing tugeta.”
“Yumi save stap kaen mo no rao,” Ammon i talem.
“Hemia i tru,” Baba i talem. “Taem we traem blong mekem wanem Jisas Kraes i tijim, yumi invaetem Tabu Spirit blong i stap wetem yumi. Mo bae Hem i helpem hom blong yumi i kam wan ples we yumi save filim lav mo pis.”
Ammon i tingting smol taem. “Yes, i tru, Baba. Tabu Spirit i wan long ol impoten ges!”
Ol pikja i kam long Mark Jarman