Ol Paeonia long Evri Ples
Olga Šnederfler
Fas Tempol Metron long Tsekoslovakia
Olga i bin save se bae hem i go insaed long tempol wan dei.
Olga i lukluk pikja blong tempol we i hang long wol blong hem. Hem i pulum win blong hem. !Sapos nomo, famli blong hem i save go long tempol! Be i no gat ol tempol kolosap long, mo i had tumas blong lego kantri blong hem.
Olga i bin kasem baptaes sam yia i pas. Be afta, oli fosem ol misinari blong lego kantri. Ol memba blong Jos oli nomo letem olgeta blong go long jos. Oli no save tokbaot nomo, abaot fet blong olgeta long ol narafala wan.
Olga i gohed blog laef folem gospel. Man blong hem tu, Jiri. Tufala i prea mo ridim ol skripja tugeta. Oli gat famli haos naet mo tijim ol pikinini blog tufala. Long ol Sandei, oli gat sakramen miting long smol apatmen blong olgeta. Oli hangem fulap pikja blong tempol.
Taem we Olga mo famli blong hem, oli filim se oli stap olgetawan, oli tingbaot se oli plante taosen memba blong Jos raon long wol.
Wan dei wan samting we i gud tumas i hapen. Presiden Russell M. Nelson, Sandei Skul Jeneral Presiden, i kam blong visitim kantri blong olgeta. Olga i smael, taem hem i sekhan wetem Presiden Nelson. Afta, hem i mekem wan spesel promes long Olga. “Sista, wan dei bae yu kam long tempol.
Hat blong Olga i glad. “Tangkyu”, hem i talem.
Ol manis i pas. Afta yia i pas. Olga i lukluk pikja blong tempol we i hang long wol blong hem. !Blong go long tempol bae i no save hapen nomo!
Afta fo yia, Olga mo Jirí, oli invaetem tufala i go long jeneral konfrens long Sol Lek Siti, Yuta, YSA. Olga i wari tumas se bae tufala no save go. Ol samting long kantri blong tufala i had tumas yet. Bae i gat fulap pepawok blong travel. Be i hapen nomo, se evri samting i wokaot. Olga i filim se i gat ol naesfala filing insaed long bel blong hem, taem plen i stap rere blong i flae, i go long Yunaeted Stet. I bin wan merikel!
Olga mo Jirí i go long konfrens blong lisin long profet. Tufala i gat janis ia blong luk tempol mo go long visita senta. !Be bes pat blong hem, i blong go insaed long tempol!
Werem waet klos, Olga i filim se hem i stap long heven taem hem i mekem wan spesel promes wetem God. Hem i iven sil wetem Jirí. !Promes blong Presiden Nelson i kam tru!
Olga mo Jirí i gobak long haos. Taem i pas, ol samting long kantri blong olgeta i kam gud. Afta, naoia oli save go long jos, mo ol misinari oli save tij bakegen.
Wan dei, fon i ring. Hem i Presiden Thomas S. Monson. Hem i singaotem Olga, blong stap olsem metron blong Friberg Jemani Tempol. Jirí bae hem i tempol presiden.
Olga i smael taem hem i stanap long waet dres blong hem, insaed long Friberg Tempol. Tempol long wan taem, i bin longwe. !Be naoia hem i glad blong save stap go long hem evri dei! Hemia i wan gudfala drim we i kamtru.
Eria we Olga i stap long hem, i kam wan pat blong Tsek Ripablik.
I gat plante handred blong ol kasel long Tsek Ripablik.
Wan tempol metron i wan woman lida insaed long tempol.
Olga i gat bitim 20 pikja blong tempol long apatmen blong hem.
Hem mo Jirí i gat wan pikinini boe mo pikinini gel.
Hem i kipim wan foto buk wetem ol pikja blong ol misinari we oli tijim hem.
Ol pikja i kam long Shawna J. C. Tenney