Taian Bwaeoniia ni Katoai Aba
Olga Šnederfler
Te moan tia Mwakuri ae te Aine n te Tembora mai Czechoslovakia
E ataia Olga bwa n te taina ao e na reke nakona nakon te tembora.
Olga e katurua taraakin tamnein te tembora ae e tine iaon ana oo. E katinakoa angina. Ti ngkana a kona n nako ana utu nakon te tembora! Ma bon akea te tembora ae e uakaan, ao e rangi ni kangaanga kitanan abana.
E a tia ni bwabetitoaki Olga n ririki aika nako. Ma a waekoa mitinare ni kairoroaki bwa a na kitana te aba. Kaain te Ekaretia aikoa manga kariaiakaki bwa a na nako n taromauri. Aki kona naba n taetae nakon temanna ibukin aia onimaki.
E teimatoa Olga ni maiuakina te euangkerio. Ai aron naba kainabana, Jiri. A tatataro ao a wawareware ni booki aika tabu. A bobotaki n te tairiki ao a reireiniia natiia. Ni katoa Tabati, a karaoa te botaki n te toa inanon aia auti ae uarereke. A katinei tamnein tembora aika a mwaiti.
Ao ngkana Olga ao ana utu a namakina te maroaa, a uringnga ae iai tengaa tabun mwaitiia kaain te Ekaretia ni katobibia te aonaaba.
Te bong teuana e riki te bwai ae moan te kakukurei. Beretitenti Russell M. Nelson, te Beretitenti ni Kabuta n te Reirei n Tabati, e roko ni kawara abaia. E wingare Olga ngke e iobai ma Beretitenti Nelson. Ngkanne e tuanga te berita ae e onoti. “Titita, n te bong teuana ao ko na nakon te tembora.”
Olga e namakina te aabue inanona. “Ko rabwa,” e taetae ni karaurau.
E a nako te namakaina. Ao ririki. Olga e miitara tamnein te tembora ae e tine iaon ana oo. Te nako n te tembora e taraa ni kangaanga!
Imwiin aua te ririki, Olga ao Jiri a kaoaki bwa a na nako n te maungatabu ni kabuta i Salt Lake City, Utah, USA. E raraoma Olga bwa tao e na aki reke mwanangaia. Bwaai aika riki n abaia a tiku n rangi ni kangaanga. E na anaa te tai kanoaan taian beeba ibukin te mwananga. Ma n tokin te tai a bane n nakoraoi bwaai ni kabane. E namakina te nakonnano Olga ngke e a tabe ni kiba nako aia wanikiba nakon te United States. Bon te kakai!
Olga ao Jiri a nako n te maungatabu ao n ongoraa iroun te burabeti. A roko n te Tembora Tikueea ao a nakon te tienta are aia tabo iruwa. Ma te mwakoro ae te kabanea n tamaroa bon te rin inanon te tembora!
Ma bwaina te mainaina, e namakina Olga bwa kanga e a mena i karawa ngkai e a karaoi berita aika onoti ma te Atua. E reke naba kabaeakina nakon Jiri. E a koro bukin ana berita Beretitenti Nelson!
A okira mweengaia Olga ao Jiri. Inanon waakin te tai, e a moana n reke te rau i abaia. N tokina a kona n nako n taromauri, ao mitinare a kona ni manga anga reirei.
Te bong teuana e tang aia tareboon. Bon Beretitenti Thomas S. Monson. E wetea Olga bwa e na riki bwa te mataniwi n aine n te mwakuri n te tembora i Freiberg Tiaman Tembora. Jiri e na riki bwa te beretitenti n te tembora.
E wingare Olga ngkai e tei ma kunikaina te mainaina, ae mwarairai inanon te Freiberg Tembora. Te tembora e a tia ngkoa n rangi n taraa n raroanako. Ma ngkai e a kona ni kawakinna ni katoa bong! Bon te kanoa ni mii ae tamaroa ae e a koro bukina.
Te mwakoro are e maeka iai Olga e a riki imwiina bwa mwakoron te Czech Republic.
Iai tebubua tabun taian katio (castles) i Czech Republic.
Te matron n te tembora bon te tia kairiiri te aine n te tembora.
Iai tamnein tembora ae e raka iaon 20 mwaitina n ana auti Olga.
Iai natina ma Jiri temana te mwaane ao te aine.
E kawakina te boki n tamnei n tamneia mitinare ake a reireina.
Kamataa n te tamnei iroun Shawna J. C. Tenney