Te Iruwa ae Kakawaki
Te tia kororongorongo e maeka i Dar Es Salaam, Tanzania, ao Utah, USA.
E na kanga Ammon ni buoka ana utu ni butimwaea te iruwa ae kakawaki?
”Katea te auti … ae baireaki raoi, ana auti te Atua” (Reirei ao Berita aika Tabu 88:119).
Bon bwakantaain te Kaonobong. E tangiria Ammon ni karekea te kukurei.
“Mamma,” e taku, “I kona n nako tinaniku ao n takakaro?”
“Te moan ko riai ni kaitiaka am ruu,” e taku Mamma.
“Ma, Mamma,” e taku Ammon, “e aki kona n tataninga au ruu?”
“Ti tangiria ni kaoa te aomata ae kakawaki bwa ara iruwa. Ngaia are ti tangira ara auti bwa e na itiaki man barongaaki.”
“Te iruwa ae kakawaki?” E taku Ammon. “N ara auti?”
“Eng, ao ko kona ni ibuobuoki ni kaoa,” e taku Mamma. “Ngaia are naako kaitiaka am ruu.”
E rangi ni kukurei Ammon. E tangiria bwa e na iai aia iruwa. E iango bwa ai antai te iruwa. Te meeia? Te mataniwi man te reirei? Ke tao te bitiobi!
E nako n ana ruu Ammon. E kunei moa ana tiaokiti aika a bareka iaon tano. E booti inanon te bwaene ni bareka. Ngkanne Ammon e bairei ana boki n reirei iaon te taibora. E tangiria bwa e na ataia te iruwa ae e tatangira reiakinan bwaai aika boou.
E roko mwanen Ammon ae e ikawai, nakon ana ruu. “Tera ae ko karaoia?” e titiraki mwanena.
“E taku Mamma bwa e na iai ara iruwa ae kakawaki,” e taku Ammon. “E tuangai bwa na ibuobuoki ni katauraoi imwaina.”
A uaia n tararake n taraa Mamma imatan te mataroa.
“Tera riki ae ti na karaoia bwa ti aonga n tauraoi?” E taku Ammon. “Ti tangira ara iruwa ae kakawaki bwa e na namakina te butimwaeaki raoi.”
“Tera am iango ae ko iangoia?” E titiraki Mamma.
“Ti kona ni kangai karibu,” e taku Ammon. N te taetae n Swahili nanona, “Ko butimwaeaki n ara auti. Ko butimwaeaki bwa ko na taetae.”
“Ti kona n ongoraa,” e taku Angel. “E rangi ni kakawaki te ongoraa.”
“Aikanne iango aika a tamaroa,” e taku Mamma. “Tia noria bwa teraa Baba (Tamaia) ae e na taekina ngkana e okira te auti.”
Imwiin teuana te aoa, e a roko Baba.
E tataninga Ammon. “E taku Mamma bwa ti na butimwaea te iruwa ae raka nakon ara Auti. Ti a tia ni katauraoi.”
E ngare Baba. “I rang kukurei. Nakomai. Tekateka. Ti na marooro. Angel, taiaoka nakomai naba.”
Ngke a bane ni ikotaki, e taku Baba, “Mamma ao ngai ti a tia ni marooro iaon ara iruwa ae raka ao teraa ae ti kona ni karaoia bwa e na namakina ae e butimwaeaki raoi. Te moan, N a tuangii ngkamii bwa antai ara iruwa. Bon te Tamnei ae Raoiroi. Bon ngaia te kabanea ni kakawaki n iruwa iaoia iruwa nako.”
A itaramata Ammon ao Angel. Anne bon tiaki ae e kantaningaia Ammon!
“Ao bon Ngaia te iruwa ae ti kona ni kaoa bwa e na raoniira ni katoa tai,” e taku Mamma. “Angel, imwiin are ko bwabetitoaki, ao ko kamatoaaki. Ao ko anganaki te bwai n tutuaraoi. Ko uringnga bwa tera ae taekina Baba inanon te tataro?”
“E tuangai bwa n a karekea te Tamnei ae Raoiroi.”
“Eti anne,” e taku Mamma. “Ko kaoaki bwa ko na karekea te Tamnei ae Raoiroi. Ngaia are, Ammon, ngke I taekinna bwa ko na ibuobuoki ni Kaoa, teraa ae I nanonna?”
E iango Ammon. E a tia ni iangoia bwa e na karaoa te kaati ni kaoa aia iruwa. Ma e na kanga ni kaoa te Tamnei ae Raoiroi? “Au reke bwa man karaoan bwaai ake E na namakinna bwa e butimwaeaki, I a kaoa naba iai,” e taku Ammon.
“Eti anne!” E taku Baba. “Teuana te kawai ae ti kona ni kaoa te Tamnei ae Raoiroi nakon mweengara bon man te kaitiaki ao te baaronga”
“Anne bukina ae Mamma e tangiriira bwa ti na kaitiaka ara ruu?” E titiraki Ammon.
“Eng!” E taku Mamma. “Teraa riki ae ti kona ni karaoia ni kaoa bwa E na mena i buakora?”
“Ti kona n tataro,” e taku Ammon. “Ao ni warekii booki aika tabu.”
“Ti kona n ongoraa ni katangitang aika tamaroa,” e taku Angel. “Ti kona ni bane n anenei anene n taromauri.”
“Ti kona ni kakaraoa ae e raoiroi ao n aki unuun,” e taku Ammon.
“Eti anne,” e taku Baba. “Ngkana ti kataia ni kakaraoa te bwai are e reirei iai Iesu Kristo, ti kaoa te Tamnei ae Raoiroi bwa e na raoniira. Ao E na buoka mweengara bwa te tabo ae ti na namakina iai te tangira ao te rau.”
E iango Ammon tabeua te miniti. “Eti anne, Baba. Te Tamnei ae Raoiroi bon temanna te iruwa ae moan te kakawaki iaoia iruwa nako!”
Kamataata n te korotamnei iroun Mark Jarman