Tauraoi nakon te Tembora
E riki te karaki aei i Jamaica.
“N na kanga ni karekea au rekomente?” E titiraki Ajan.
“Taraia bwa kam na karaoi bwaai ni kabane n te itiaki” (Moomon 9:29).
Ajan e bubura moangarena ngke e ongo te karebwerebwe iaon te mataroa. Madda (Mom) e kaoia taari n ibuobuoki bwa a na ibuobuoki ibukin te katairiki ae onoti.
E kauka te mataroa. “Wah gwaan, Tari Williams!” (“Tera ae iangoaki?”)
“Bwaai ni kabane a nakoraoi!” E taku te Tari Williams. (“A nakoraoi bwaai ni kabane!”) E angan Ajan te baeki ni mwangkoo man arokana.
Tari Williams e tekateka iaon te kaintekateka. Madda e tuanga mwanen Ajan ae uarereke, Dana, bwa e na tataro.
Ngke e tia, te Tari Williams e taku, “Te ririki aei, Ajan e a koro 12 ana ririki. Iai ae e ataia bwa bukin tera e onoti te ririki aei ibukina?”
Tarin Ajan ae uarereke, Tejaun, e ioioia ma te kukurei. “Ibukina ae e a kona ni karekea te nakoanibonga ao ni kabuta te toa!”
“Eti anne!’ E taku te Tari Williams. “Ma iai riki bukina teuana.”
E kauka ana bwauti ni mwane ao e kaotinakoa te beeba ae uarereke. “Aio te beeba ni kariaia nakon te tembora.”
E angan Ajan.
“Eti raoi!” Ajan e kabuta baina iaon tamnein te tembora ae koora iaon te kaati. “Tera ae ko kakaraoia ma ngaia?”
“I kaotia nakon te aomata are e tekateka i moa n te tetike n te tembora. E kaotia nakoia bwa I tau n rin inanona.”
“I kan nooria!” Dana e kuriia mairoun Ajan ao e karaua n taraia raoi.
“Tera n am iango ngkana ko karekea ae bon oin am rekomente?” E titiraki te Tari Williams.
“N na namakinna ae onoti!” Ajan e taratarake maiaon te kaati. “Ma I aki ataia ngkana I kona n nakon te tembora. E rang bobuaka karekean te tiketi n te wanikiba n nako ikekei.”
“I aki kona n nanako n te tembora n tainako,” e taku te Tari Williams. “Ma au rekomente e kauringai bwa N a tatauraoi n rin n tainako.”
E iango Ajan tabeua te miniti. “I tangiria n tauraoi naba,” e taku. “N na kanga ni karekea au rekomente?”
“Kona kawara te bitiobi,” e taku te Tari Williams. “E na anganiko tabeua titiraki n nooria ngkana koa tauraoi.”
“Nanona kaanga te ukeuke?” Ajan e titiraki, ma teutana te nakonnano.
“Kaanga ai aron riki te maroroo,” e taku te Tari Williams. “Te bitiobi bon raoraom, ao e tangiria ni buokiko bwa kona tauraoi.”
E katoutoua atuuna Ajan. E tatangira te bitiobi.
“Ko kan noori taian titiraki?” Tari Williams e angan Ajan te mwakoro ni beeba ma titiraki iaona. Dana ao Tejaun a nako rarikina n nooria naba.
“Nambwa teuana,” Ajan e warekia. “‘Iai am onimaki ao am koaua iroun te Atua te Tama ae akea Tokina; Natina, Iesu Kristo; ao te Tamnei ae Raoiroi?’”
E a ota. E rang beebete anne. “Eng!”
E reitinako ni wareki titiraki, teuana imwiin teuana. Madda ao te Tari Williams a kabwarabwarai bwaai aika a nanonaki ni bwaai ake tabeua.
Imwiina Ajan e wareka teuana te titiraki: “‘Ko matata ao n ongotaeka nanon Tuan te Mauri?’” E mata n un. “Teuana te tai D’andre e anganai teutana te mooi ae te rum ngke I mena n ana auti,” e taku. “Ma I bon aki kan manga nimma riki. Nanona ngkanne I aki kona ni karekea te beeba ni kariaia nakon te tembora?”
“Kawakinan Tuan te Mauri naona kona aki mooi n te arekooro, ao te rum iai te arokooro iai,” e taku te Tari Williams. “Ma ko kona n rairananom ao n tau n nakon te tembora.”
“Ibukin Iesu!” e taku Tejaun.
“Bon ngaia raoi anne!” E taku te Tari Williams. “Ngkanne am beeba ni kariaia nakon te tembora e kona ni kauringko bwa kona kawakina Tuan te Mauri. Ao n tauraoi n tainako n nakon te tembora.”
E wiingare Ajan. E a nanoraoi riki.
“Tao I kona n nakon te tembora n te tai ae uakaan,” e taku Ajan. “Ao ngkana e roko te tai anne, N na tauraoi!”
Kamataata n te tamnei iroun Shawna J. C. Tenney