Niu ’Āueue ’ore

E patu nō te ta’uma

Fa’ahōho’ara’a na Alyssa Petersen

’Ua ti’a mai e piti ’ahuru feiā ’āpī tamāhine i pīha’i iho iā’u, ma te hi’o i te hō’ē patu rā’au, 16 ’āvae te teitei. Tā mātou ’airoara’a o te tauturura’a ïa i te mau tamāhine ato’a ’ia tae rātou i ni’a. Nō te mau tamāhine e rave rahi, teie tā rātou matahiti mātāmua i roto i te pūhapara’a a te feiā ’āpī tamāhine. Te mau tamāhine pa’ari e ’o vau nei, e fa’atere ïa nō te feiā ’āpī, ’aitā rā mātou i ’āmui a’e nei i roto i te hō’ē pūhapara’a mai teie te huru. ’Ua fa’aro’o pā’āto’a mātou i te mau ture ma te rū.

E ti’a i te tamāhine ’āpī tāta’itahi ’ia fa’aitoito ’ia tāpae i ni’a i te patu. ’Ia tāpae āna’e te hō’ē o rātou i ni’a i te patu, e ti’a ïa ’oia ’ia tauturu atu ma te huti i te toē’a ’ia pa’i’uma i ni’a i te pa’epa’e. Teie rā, mai te mea ē, e fa’ati’a’ia mai ’oia i te repo, ’e’ita ’oia e nehenehe e tauturu fa’ahou i te toē’a o te mau tamāhine.

I te ha’amatara’a ’ua fifi mātou, teie rā, ’aita i maoro, ’ua ’imi mātou i te rāve’a nō te rave ’āmui ’e ’ua ha’amata i te huti atu i te mau tamāhine i ni’a. ’Ua ri’ari’a te tahi pae i te hutira’ahia rātou i ni’a, noa atu te mauha’a pārurura’a ia rātou. Tē vai ra te tahi pae e hinaaro ’oi’oi, nā roto i tō rātou iho pūai, ’ia tae rātou i ni’a. ’Ua tītauhia ia mātou ’ia ha’apūai i tō mātou ti’aturira’a ’e te pāturura’a i te tahi ’e te tahi. I te hōpe’ara’a, ’ua manuia roa mātou i roto i teie ’airoara’a [défis].

I te taime ā pou mai ai te tamāhine ’āpī hōpe’a, ’ua putuputu mātou nō te ’āparaura’a i te mau ha’api’ira’a e rave rahi nō roto mai i teie fa’a’oa’oara’a.

’Ua fa’aruru pā’āto’a mātou i te mau mea ato’a tei mana’o hia e mātou, e ’ore roa e nehenehe ia mātou ’ia upo’oti’a atu. Teie rā, ’aita mātou i vai ’ōtahi noa. ’Ua ’āua hā’atihia mātou e te ta’ata ato’a nō te tauturu ’ia fa’ateitei ’e ’ia pāturu ato’a mai. Tei reira ato’a te Metua i te ao ra ’e ’o Iesu Mesia nō te tauturu mai ’e nō te ha’apūai ’ia fāriu ana’e mātou i ni’a ia rāua.

Megan B., Ohio, fenua Marite

E mau vahine ’e e mau tāne ha’apaʻo i te fafaura’a, tē tītauhia ra ia tātou ’ia fa’ateitei ’e ’ia tauturu te tahi ’e te tahi ’ia riro ’ei mau ta’ata mai tā te Fatu e hina’aro ’ia riro tātou.

Tuahine Linda K. Burton, peresideni rahi tahito nō te Sotaiete Tauturu, nō te ’āmuira’a rahi nō ’Ēperēra 2015 (Ensign ’aore rā Liahona, Mē 2015, 29).

Nāhea i te fa’ateitei ia vetahi ē

1. ’A pure nō te ’utuāfare ’e ’aore rā, te mau hoa ’o tei hina’aro i te tauturu.

2. ’Ata’ata ! E fa’atupu te reira i te mahana nō te hō’ē ta’ata.

3. ’A fa’a’ohipa i te mau parau maita’i mai te mea ē, e paraparau ’outou ia vetahi ’ē ’e ’aore rā, nō vetahi ’ē.

4. ’A parau, « māuruuru ! »  Te ’ā’au mehara e rave’a rahi te reira nō te fa’ateitei ia vetahi ē i ni’a.

5. ’A fa’aro’o i tō ’outou mau hoa tei māuiui.

« ’Ua fafau vau, e haere atu vau »

’Ua hina’aro noa vau i te ’ōhopa [partager] i te ’evanelia ia vetahi ē, teie rā, e rave rahi mau matahiti, ’aita vau i manuia. E tae noa atu i te taime ’a riro ai au ’ei hoa nō te tahi tamaiti o Tiago tōna i’oa. ’Ua fātata tō māua fa’aeara’a, nō reira, o māua ihoā tei ho’i nei i te fare i muri mai i tā māua ha’api’ira’a i te mau mahana tāta’itahi.

I te hō’ē mahana, ’ua e’a ē atu māua nō te ho’i i te fare, ’e nā te fare purera’a tō maua haerera’a, i reira ho’i tō’u haerera’a i te purera’a. ’Ua parau atu vau iāna ē, e mea maoro tō’u rirora’a mai ’ei melo nō te ’Ēkālesia. ’Ua parau vau iāna i te mea tā mātou i ti’aturi ’e te rahira’a ha’amaita’ira’a tā tō’u ūtuāfare i fāri’i nā roto i te reira. ’Ua tītau manihini au ia Tiago ’ia haere māua i te purera’a i taua Sābati ra, ’e ’ua pāhono mai ’oia ē, e haere mai ’oia.

’Ua tae mai taua Sābati ra, ’e ’ua tia’i noa vau iāna i te fare purera’a, ’aita rā ’oia i haere mai. I muri a’e i taua hepetoma ra, ’ua ani fa’ahou ā vau iāna. ’Ua tupu te reira e piti ’aore rā e toru ’āva’e i te maoro, terā rā, te vai noa ra te hō’ē tumu i ’ore ai ’oia e tae mai. ’Aita rā vau i fa’aea i te ani iāna.

I te hō’ē po’ipo’i sābati, tei roto vau i te purera’a ’ōro’a ’e ’ua hi’o vau ’e ’ite atura vau ia Tiago i te ti’a noara’a i reira. ’Ua māere au i te ’itera’a atu iāna, terā rā, ’ua haere mai ’oia ’e ’ua pārahi i pīha’i iho iā’u ’e ’ua parau mai, « ’Ua fafau atu vau e haere mai au ! » 

’Ua fa’a’ite atu vau iāna i te mau misiōnare, ’e ’ua ha’amata rāua i te ha’api’i iāna. I muri iho, ’ua bāpetizohia ’oia. I teienei, tē fa’aineine nei māua to’opiti nō te haere i te misiōni. ’Ua ’oa’oa roa vau i te mea ē, ’aita vau i fa’arue iāna !

Meiry R., Peresiria

’A ti’aturi i te taime a te Atua

’Ua fa’ata’a tō’u metua-vahine-feti’i i te taime i bāpetizohia ai tāna tamaiti matahiapo. Nō te tāpe’a māite i te hau i pīha’i iho i te metua tāne o tāna mau tamari’i, ’ua hina’aro ’oia ’ia hōro’a mai ’oia i tāna parau fa’ati’a ’ia bāpetizohia te toē’a ō tā rāua mau tamari’i. ’Aita rā tōna hina’aro i ti’a, e rave rahi matahiti tō taua ta’ata ra i te tāpe’ara’a i tāna parau fa’ati’a.

’Ua fa’aoti rā tō’u metua-vahine-feti’i i tōna iho hina’aro e ’ia bāpetizo ihoā tāna mau tamari’i noa atu ē, ’aita te metua tāne i hōro’a i tāna parau fa’ati’a. Teie rā, i muri noa mai i te ha’apaera’a mā’a ’e te pure ā tō’u metua-vahine-feti’i ’e te mau taea’e-feti’i nō ni’a i te fa’aotira’a e mana’ohia ra, ’ua fāri’i pā’āto’a rātou i te fa’a’itera’a ē, ’ia tīa’i noa ā rātou.

I taua ihoa hepetoma ra, ’ua parau atu te metua-tane-feti’i i tō’u metua-vahine-feti’i ē, tē hina’aro nei ’oia i tā rāua mau tamari’i ’ia fārerei i te mau misiōnare ’e ’ia bāpetizohia rātou. Tē ha’amana’o noa nei au i te ’oa’oa tā’u i fāri’i i te taime a parau mai ai tō’u mama iā’u, i taua parau ’āpī ra. ’Ua ’ite au ē, ’ua ha’amaita’i te Metua i te ao ra i tō’u mau taea’e-feti’i i muri mai e rave rahi matahiti te tīa’i-fa’a’oroma’i-ra’a.

E’ita ihoa tātou e ’ite i te taime e pāhono mai ai te Fatu i tā tātou mau pure, ’ua ’ite ra vau ē, e pāhono mai ’oia. ’Aita vau i ’ite ē, nō te aha te Metua i te ao ra i hina’aro ai i tō’u mau feti’i ’ia tīa’i i tō rātou bāpetizo-ra’a, ’ua ’ite rā vau ē, ’ua ha’amaita’i ’oia ia rātou nō tō rātou ha’apa’o maita’i.

Bre J., Florida, Hau ’āmui nō Marite