“Faitoʻo ki he Ngaahi Meʻa ʻIkai Lelei ʻi he Vā Fetuʻutakí,” Ki Hono Fakamālohia ʻo e Toʻu Tupú, ʻEpeleli 2024.
Faitoʻo ki he Ngaahi Meʻa ʻIkai Lelei ʻi he Vā Fetuʻutakí
Ko e meʻa ʻeni ke fakaʻaongaʻi ke fakafepakiʻi ʻaki ʻa e ngaahi meʻa ʻokú ne fakakonahi hotau vā fetuʻutakí.
Ko e faitoʻó ko ha meʻa ia ʻokú ne fakafepakiʻi ha kona. Ko hono fakalea ʻe tahá, ko e faitoʻó ko ha meʻa ia ʻokú ne “faitoʻo ke sai” ha ongo pe tūkunga ʻoku kovi. Hangē ko ʻení, naʻe pehē ʻe Palesiteni Lāsolo M. Nalesoni, “Ko e ʻofa faka-Kalaisí ko e faitoʻo ia ki he fakakikihí.”1
ʻOku ʻikai ke ʻi ai ha faitoʻo ki he ngaahi kona fakatuʻasino kotoa pē. Ka ʻoku fakafou ʻi he Fakamoʻuí ʻa ʻetau lava ke maʻu ha ngaahi faitoʻo ki heʻetau ngaahi meʻa kona fakatāutahá—kau ai ʻa e ngaahi meʻa ʻokú ne fakakonahi hotau vā fetuʻutaki mo e niʻihi kehé.
ʻOua Naʻá Ke Hoko ko ha Meʻa Fakakona!
ʻOku ʻikai ha taha ia ‘e haohaoa. ʻOku tau foua kotoa pē ha ngaahi momeniti (pe houa, pe ʻaho … ) ʻoku ʻikai ke tau anga faka-Kalaisi ai ʻo hangē ko ia ʻoku tau ʻiloʻi ʻoku totonu ke tau faí. ʻOku fiemaʻu ke tau ʻiloʻi hotau tūkunga fakatāutahá pea fakapapauʻi ʻoku ʻikai ke tau fakakonahi ʻa e kakai ʻoku tau feohí.
Ko ha ngaahi faitoʻo ʻeni ki ha ngaahi meʻa kona angamaheni:
Meʻa Kona: Meheká
Ko e hā ʻoku ngali fiefia ange ai ʻa e niʻihi kehé/lahi ange ʻa e koloa ʻoku nau maʻú/mohu tāpuekina lahi ange ʻiate aú?
ʻŪ tā fakatātā ʻa Corey Egbert
Ko e faitoʻó: Loto-houngaʻia.
Houngaʻia ʻi he meʻa kuo foaki atu ʻe he ʻEikí. ʻAhiʻahi muimui ki he faleʻi ʻa ha himi motuʻa ʻoku ʻiloa: lau moʻoni ho ngaahi tāpuakí! Tānaki pea lau takitaha kinautolu. Te ke ʻohovale ʻi he lahi ʻo e meʻa kuo fai ʻe he ʻEikí maʻaú.2
Meʻa Kona: ʻItá.
Kuo ʻosi fakaʻitaʻi au ʻe ha taha, ʻo tatau ai pē pe naʻá ne fai ia ʻi he ʻiloʻilo pau pe ʻikai
Ko e faitoʻó: Faʻa Fakamolemole.
Ko e fefakamolemoleʻakí ko ha fekau moʻoni ia (vakai, Tokāteline mo e Ngaahi Fuakava 64:10). Ko e fakalahi ki aí, ko e taimi ʻoku tau fakamolemoleʻi ai ʻa e niʻihi kehé, ʻoku fakamolemoleʻi kitautolu ʻe he ʻOtuá (vakai, Tokāteline mo e Ngaahi Fuakava 82:1). ʻIkai ngata aí, ʻoku tau faʻa ongoʻi ʻoku siʻisiʻi ange ʻetau ʻitá ʻi he hili ʻetau fakamolemoleʻi ʻa e niʻihi kehé.
Meʻa Kona: Hīkisiá.
ʻOku ʻikai ke u loto ke fakahā naʻá ku fehalaaki. ʻOku ʻikai ke u fie fai ha ngāue koeʻuhí ʻoku ou tui ʻoku ou fuʻu lelei ke fai ʻa e ngāue ko iá. ʻOku ʻikai ke u fie feohi mo e fānau ko eé he ʻoku ʻikai ke nau ʻi heʻeku kulupu fakasōsialé.
Ko e faitoʻó: Loto-fakatōkilalo.
Ko hono moʻoní: tuku ʻa e siokitá. Ko e fānau kitautolu ʻa e ʻOtuá, pea ʻokú Ne ʻofa ʻiate kitautolu—ka ʻi he taimi tatau, ko e kakai matelie taʻe-haohaoa kotoa pē kitautolu ʻoku ʻikai ke tau “mahuʻinga tatau mo e efu ʻo e māmaní” (Mōsaia 2:25). ʻOku foaki mai ʻe he ʻEikí kiate kitautolu—ʻa kitautolu kotoa pē—ʻa e vaivaí koeʻuhí ke tau loto-fakatōkilalo (vakai, ʻEta 12:27). Pea ʻoku lelei ange maʻu pē ke fili ʻa e loto-fakatōkilaló ʻiate koe pē ʻi haʻo tatali kae ʻoua kuo fakamālohiʻi koe ʻe he ʻOtuá ke ke loto-fakatōkilalo (vakai, ʻAlamā 32:15–16).
Fēfē Kapau ko ha Taha Kehe Ia ʻoku Hoko ko ha Meʻa Koná?
Ko e manavaʻofá ʻa e faitoʻo ki ha ngaahi meʻa lahi, kae ʻikai ko e fakakikihí pē. “ʻOku kātaki fuoloa ʻa e manavaʻofá, pea ʻoku ʻofa ia, pea ʻoku ʻikai meheka, pea ʻoku ʻikai fakafuofuolahi, ʻoku ʻikai kumi ʻene meʻa ʻaʻana, ʻoku ʻikai ʻitangofua, ʻoku ʻikai fakakaukau kovi” (Molonai 7:45). ʻOku totonu ke tau lotua ha manavaʻofa (vakai, Molonai 7:48) ke tokoni ke tau fakamolemoleʻi ʻa e ngaahi vaivai ʻa e kakai kehé—ʻo hangē pē ko ʻetau ʻamanaki te nau lotua ha manavaʻofa kae lava ke nau fakamolemoleʻi haʻatautolú. ʻOku totonu foki ke ʻoua naʻa tau manavasiʻi ke fokotuʻu ha ngaahi fakangatangata. ʻOku ʻikai ʻuhinga ʻa e fakamolemolé ke nofo ʻi ha vā fetuʻutaki ʻoku koví pe ʻi ha tūkunga fakatuʻutāmaki.3