ʻAi Hangatonu

Ko e hā ʻa e “tangata fakakakanó”?

Naʻe akoʻi ʻe he Tuʻi ko Penisimaní ʻi he Tohi ʻa Molomoná ʻo pehē, “Ko e tangata fakakakanó ko e fili ia ki he ʻOtuá” (Mōsaia 3:19). ʻOku fakamatalaʻi ʻe he foʻi lea tangata fakakakanó ha “tokotaha ʻoku fili ke puleʻi ia ʻe he ngaahi holi, uʻa, mo e ngaahi ongo ʻo e kakanó kae ʻikai ko e ngaahi fakahinohino ʻa e Laumālie Māʻoniʻoní” (Fakahinohino ki he Ngaahi Folofolá, “Tangata Fakakakanó,” Gospel Library).

Koeʻuhí ko e Hinga ʻa ʻĀtama mo ʻIví, ʻoku fanauʻi mai ai kitautolu ki he māmaní mo ha sino ʻoku ʻi ai ʻene ngaahi holi mo e fiemaʻu. ʻOku tau maʻu ha holi fakanatula ke fafanga hotau uʻá pea fekumi ki he ngaahi meʻa fakafiemālie mo fakafiefia kehekehe kotoa pē. Ka ʻoku ʻikai ke ʻuhinga maʻu pē ʻa e “fakakakanó” ki he “lelei.” Kapau he ʻikai ke tau mapuleʻi ʻetau ngaahi holi fakakakanó—kapau te tau tokanga pē ki he ngaahi meʻa fakakakanó kae tukunoaʻi ʻa e ngaahi meʻa fakalaumālié—te tau hoko ʻo siokita, faiangahala, anga-taʻeʻofa, mo loto-fefeka.

Ke ikunaʻi ʻa e tangata fakakakanó, kuo pau ke toe fanauʻi foʻou fakalaumālie kitautolu ʻia Sīsū Kalaisi mo ʻEne feilaulau fakaleleí. Kuo pau ke tau fakafanongo ki he Laumālie Māʻoniʻoní mo tauhi ʻa e ngaahi fekau ʻa e ʻEikí. Kuo pau ke tau “anga tatau mo ha tamasiʻi siʻi, angavaivai, angamalū, loto-fakatōkilalo, faʻa kātaki, fonu ʻi he ʻofa, pea loto-fiemālie ke fakavaivai” ki he finangalo ʻo e ʻEikí (Mōsaia 3:19).