E Dua na iVakadinadina Bula
Mai vei Peresitedi Henry B. Eyring
iMatai ni Daunivakasala ena Mataveiliutaki Taumada
Na ivakadinadina e gadreva me vakabulabulataki ena masu ni vakabauta, ena viakania na vosa ni Kalou mai na ivolanikalou, kei na talairawarawa ki na dina eda sa ciqoma.
O ikemuni na ganequ gone lomani, sa ikemuni na inuinui rarama ni nona Lotu na Turaga. Na noqu inaki ena bogi nikua meu vukei kemuni mo ni vakabauta ni vaka dina kina. Kevaka e rawa ni yaco na vakabauta oqori me ivakadinadina titobu mai vua na Kalou, ena bulia na nomuni digidigi e veisiga kei na veiauwa. Ia ena veika o ni nanuma ni digidigi lalai, ena tuberi kemuni na Turaga ki na marau ko ni vinakata. E rawa vei Koya me na vakalougatataki ira e vuqa na tamata mai na nomuni digidigi.
Sa ivakaraitaki ni digidigi bibi na nomuni digitaka mo ni tiko eke ena bogi nikua. Era a sureti e sivia ni dua na milioni na goneyalewa, tina, kei ira na veiliutaki. Mai na vuqa na ka a rawa mo ni digitaka, o ni qai digitaka mo ni tiko eke. O ni vakayacora oqori ena vuku ni nomuni vakabauta.
O ikemuni o ni vakabauta na kosipeli i Jisu Karisito. Ena nomuni vakabauta o ni lako mai kina eke mo ni rogoci ira na Nona italai ka vakakina na nomuni vakabauta ni dua na ka o ni na rogoca se vakila ena kauti kemuni yani ki na dua na bula vinaka cake. O ni vakila e yalomuni ni sala ki na marau cecere na muri Jisu Karisito.
Ena gauna oqo, o ni sega beka ni raica oqori ni dua na digidigi o ni cakava e dua na kena yaga.bibi sara. O ni a nanuma beka mo ni tiko vata kei keimami mai vei ira na nomuni itokani se matavuvale. E vu ni nomuni lako beka mai na nomuni rokova na nona veisureti e dua na tamata dau yalovinaka vei kemuni. Ia kevaka mada ga o ni a sega ni vakila, o ni a rogoca beka na voqa rogolailai ni nona veisureti na iVakabula: “Lako mai ka muri au.”1
Sa vakatitobutaka na Turaga na nomuni vakabauti Koya ka vaqaqacotaka na nomuniivakadinadina ena auwa eda tiko vata kina oqo. Sa levu cake na ka o ni rogoca mai na vosa kei na ivakatagi. O ni sa vakila na ivakadinadina bula ni Yalotabu ki yalomuni ni ra tu e vuravura na parofita bula ena nona Lotu dina na Turaga ka ni koto ga ena loma ni Nona matanitu na sala ki na mamarau. Sa tubu na nomuni ivakadinadina ni sa ikoya duadua ga oqo na Lotu dina ka bula e vuravura nikua.
Ena gauna oqo, e sega ni tautauvata vinaka sara na veika eda vakila. Vei ira eso na ivakadinadina bula ni Yalotabu sa ikoya na parofita ni Kalou o Thomas S. Monson.Vei ira tale eso, sa ikoya na nona ivakarau tudei na iVakabula na dina, na ivalavala dodonu, kei na caka vinaka vei ira kecega na tamata. Ia oqori e sala vata mai kei na gagadre cecere meda vakataki Koya.
Sa dui tu vei kemuni kece na gagadre me vaqaqacotaki na nomuni ivakadinadina ni kosipeli i Jisu Karisito. A raica rawa o Peresitedi Brigham Young ena nona rai vakaparofita ena 142 na yabaki sa oti, na veika e dodonu me tu vei kemuni kei na nomuni gagadre. E dua o koya na tama dau loloma ka parofita bula.
A raica na kena sa lutuki iratou tiko mai na luvena yalewa na veivakauqeti vakavuravura. A raica ni sa dreti iratou tani tiko mai na nona sala ni bulamarau na Turaga na veivakayarayarataki vakavuravura. Ena nona gauna na veivakayarayarataki oqori a kauta mai vakatikina na sala ni sitimanivanua vou ka cici kosova na vanua ka semati ira na Yalododonu era a tu ga vakataki ira ka taqomaki ira tu mai vuravura.
A sega beka ni raica o koya na vakasakiti ni kila ka vakalivaliva nikua ka rawa kina mo ni digia mo ni yacova yani na veivakasama e sega ni wili rawa kei ira na tamata e vuravura raraba ena nomuni taura toka ga e ligamuni e dua na iyaya lailai vakalivaliva. Ia a raica o koya na kena yaga vei ira na luvena yalewa—ka vakakina vei kemuni—mo ni vakayacora na nomuni digidigi mai na dua na ivakadinadina kaukauwa me baleta e dua na Kalou bula kei na Nona ituvatuva ni marau.
Oqo na nona ivakasala vakauqeti vakaparofita me baleti iratou na luvena yalewa kei kemuni ena veigauna kece.
E uto ni noqu itukutuku ena bogi nikua. A kaya ena dua na rumu ni nona vale ka lailai mai na dua na maile mai na vanua sa kaburaki yani kina na itukutuku oqo vei ira na luvena yalewa na Kalou ena veimatanitu e vuravura raraba: “Sa gadrevi vei irana luvedra yalewa gone na Isireli me ra rawata e dua na ivakadinadina bula ni dina.”2
A qai tauyavutaka e dua na isoqosoqo ni goneyalewa sa yaco meda vakatoka ena gauna oqo ena Lotu ni Turaga me, “Goneyalewa.” O ni sa vakila ena bogi nikua eso na revurevu vakasakiti ni nona digidigi ena soqoni ni bogi ni Sigatabu ko ya ena rumu ni vakacegu ni nona vale.
Ni sa sivia e 100 na yabaki sa oti, era sa gadreva na goneyalewa ni Isireli e vuravura raraba me ra rawata me nodra e dua na ivakadinadina bula ni dina. Ena gauna oqo kei na vo ni nomuni gauna ni bula, o ni na gadreva na ivakadinadina bula ka tubu o ya me vaqaqacotaki kemuni ka liutaka na nomuni sala ki na bula tawamudu. Mo ni idewadewa kina ni Rarama i Karisito kivei ira na ganemuni kei ira na tacimuni e vuravura raraba kei na veitabatamata.
O ni kila mai na veika o ni sa sotava se cava na ivakadinadina. E vakavuvulitaka o Elder Joseph Fielding Smith na ivakadinadina “sa ikoya e dua na kila veivakadeitaki ka vakatakilai vua [e dua na tamata] e vakasaqara ena yalomalumalumu na dina.” E tukuna na ivakadinadina kei na Yalo Tabu, ka kauta mai na ivakatakila o ya, “Sa rui cecere na kena kaukauwa veivakadeitaki ena sega kina ni lomalomarua na vakasama ni sa vosa oti na Yalotabu. Sa ikoya duadua ga na sala me na kila dina kina e dua ni Karisito ko Jisu ka ni dina na nona kosipeli.”3
O ni sa vakila oti vakataki kemuni na veivakauqeti oqori. A vakadeitaka beka e dua na iwase ni kosipeli, me vakataki au ena bogi nikua. Niu rogoca na malanivosa ena ika tinikatolu ni yavu ni vakabauta me baleta “na noda yalododonu, yalodina, talairawarawa, lomasoli, ivalavala savasava, [kei na] caka vinaka,” e vaka vei au ni cavuta sara ga na Turaga. Au a vakila tale ni oqori na ivakarau tudei ni Nona bula. Au vakila ni o Josefa Simici na Nona parofita. Vei au era sega ni vosa walega oqori.
Au raica ena noqu vakasama na veigaunisala kuvu mai Jutia kei na Were o Kecisemani. Au vakila e yaloqu e dua sara ga na ka, se vakacava beka kevaka meu tekiduru me vaka a kitaka o Josefa ena mata ni Tamada kei na Luvena ena dua na veikau mai Niu Ioka. Au sega ni rawa ni raica ena noqu vakasama e dua na rarama ka sivia cake na rarama ni matanisiga ena yakavi me vakataki koya, ia au vakila na katakata kei na talei ni ivakadinadina.
Ena yacoyaco mai vakatikina kivei kemuni na ivakadinadina ni sa vakadeitaki na veitikina eso ena dina taucoko ni kosipeli i Jisu Karisito. Taura mada, ni o ni wilika ka vakananuma vakatitobu na iVola i Momani, ena vou ka kauta mai na veivakasama vovou na veitikina eso o ni sa wilika oti. Ena tubu me rabailevu ka titobu na nomuni ivakadinadina ni sa vakadinadinataki ni dina mai na Yalo Tabu. Ena rabailevu na nomuni ivakadinadina bula ni o ni vulica, masulaka, ka vakasamataka vakatitobu na ivolanikalou.
Na ivakamacala uasivi duadua vei au na noda rawata vakacava kei na kena maroroi ni ivakadinadina bula oqo ka sa vakaraitaki oti tu. E tiko ena ika 32 ni iwase ni Alama ena iVola i Momani. O ni sa na wilika beka vakalevu. Au dau raica na rarama vou ena veigauna kece au wilika kina. Meda railesuva tale mada vakadua ena bogi nikua na lesoni e vakavuvulitaki kina.
Eda vakavulici ena veimalanivosa vakauqeti oqori meda tekivuna kina noda segata na ivakadinadina ena noda “vakabauta e dua na tikina” kei na gagadre me rawa ni tubu.4 Ena bogi nikua o ni sa vakila na vakabauta kei na gagadre o ya ena nomuni vakarorogo tiko ena vosa veivakayavalati eso ni nona yalovinaka na iVakabula, Nona yalodina, kei na savasava eda rawatamai na Nona ivakaro kei na Nona Veisorovaki.
Sa teivaki oti tu e yalomuni e dua na sore ni vakabauta. E sa rawa mo ni vakila eso na veivakarabailevutaki e yalomuni ka yalataki ena Alama. Au sa vakila.
Ia, me vaka e dua na kau e tubu tiko, sa dodonu me vakabulabulataki de na malai. Sa ka bibi sara na masu yalodina ni vakabauta kei na veika bulabula e gadrevi. Na talairawarawa ki na dina o ni sa ciqoma ena vakabula ka vaqaqacotaka tiko na ivakadinadina. E tiki ni kena vakabulabulataki na nomuni ivakadinadina e dodonu mo ni talairawarawa ki na ivakaro.
O ni nanuma tiko na nona yalayala na iVakabula: “Kevaka e dua na tamata sa via cakava na lomai koya, ena kila se sa ka mai vua na Kalou na ivakavuvuli, seu vosa vakai au ga.”5
E dina vei au oqori, ka na vakakina vei kemuni. E dua na ivunau ni kosipeli au a vakavuvulitaki kina niu se gone sa ikoya ni isolisoli cecere duadua vei ira kecega na isolisoli ni Kalou na bula tawamudu.6 Au vulica ni tiki ni bula tawamudu sa ikoya na bula vata ena veilomani vakamatavuvale me tawamudu.
Ena imatai ni gauna au rogoca kina na dina oqori ka vakadeitaka ki yaloqu, au vakila ni sa dodonu meu na digia na veika kecega meu levea kina na veiqati ka segata na bula sautu ena noqu matavuvale kei na noqu itikotiko.
Ena gauna oqo, e rawa walega niu marautaka na taucoko ni veivakalougatataki cecere duadua oqori ena bula tawamudu, ni sa oti na bula oqo. Ia ena maliwa ni veidredre ni bula oqo, sa soli vei au meu bau raica vakalalai se na vakacava na ituvaki ni noqu matavuvale mai lomalagi. Ena veigauna oqori, sa tubu ka vaqaqacotaki kina na noqu ivakadinadina me baleta na dina ni kaukauwa ni veivauci e dau vakayacori ena valetabu.
Ena noqu vakaraici rau toka na luvequ yalewa ni rau papitaiso ena valetabu ena vukudra na tubudrau sa kauta na yaloqu vei rau kei ira na qase keitou a raica na yacadra. Sa vakatarai kina vei keitou na yalayala nei Ilaija ni na vagolei na yalo ena loma ni veimatavuvale vei ira vakataki ira.7 Sa yaco kina vei au na vakabauta me kila ka, me vaka a yalataki vei keda ena ivola i Alama.
Au sa vakila kina vakalailai eso na reki era a vakila na noqu qase ena nona lako yani ki na vuravura ni yalo na iVakabula ena Nona gauna ni veiqaravi e vuravura. Oqo na kena ivakamacala ena Vunau kei na Veiyalayalati:
“Raica era sa rekitaka sara na nodra vakabulai ko ira na yalododonu, era sa tekiduru sobu ka tusanaka ni sa nodra iVakabula na Luve ni Kalou io sa i Koya sa sereki ira mai na ivesu ni mate kei na ibulubulu.
“A sa serau na matadra ni sa cilavi ira na iserau ni Turaga, io era sa vakacaucautaka tikoga na yacana tabu.”8
Na noqu vakila na nodrau reki a yaco mai ena noqu cakacakataka na noqu ivakadinadina ni nona yalayala na Turaga ni bula tawamudu e dina. A vaqaqacotaki na ivakadinadina oqori mai na noqu digidigi meu cakacakataka, me vaka a yalataka na iVakabula ni na vakakina.
Sa vakavulica talega vei keda o Koya, me ikuri ni noda digia meda talairawarawa, sa dodonu medakerea ena masu na ivakadinadina ni dina. A vakavuvulitaka oqori vei keda na Turaga ena Nona ivakaro meda masulaka na iVola i Momani. A kaya o Koya mai vua na Nona parofita o Moronai:
“Raica au sa kaya vei kemudou, kevaka sa loma ni Kalou mo dou wilika na itukutuku oqo, dou na wilika ka kila kina na nona loloma na Turaga vei ira na luve ni tamata, me tekivu mai vei Atama ka yacova ni dou sa taura na itukutuku oqo, ia ni dou sa taura mo dou vakananuma sara e yalomudou.
“Ia ni dou sa wilika na itukutuku oqo mo dou kerea vua na Kalou na Tamada Tawamudu ena yaca i Karisito, me vakatakila vei kemudou se dina se sega, ia kevaka dou sa kerea ena yalodina ena lomamudou taucoko ka vakabauta na Karisito, ena vakatakila vei kemudou ko koya ena kaukauwa ni Yalo Tabu ni sa dina.
“Ia na kaukauwa ni Yalo Tabu ena vakatakila vei kemudou na dina ni veika kecega.”9
Au nuitaka ni ko ni sa dui vakadinadinataka kece vei kemuni na yalayala oqori se o ni na vakayacora ena dua na gauna wale ga oqo. Ena sega beka ni yaco mai na kena isau ena dua ga na veivakauqeti kaukauwa vakayalo. Vei au a yaco taumada mai vakamalua. Ia sa qai dau yaco mai vakaukauwa ena veigauna kece au wilika ka masulaka kina na iVola i Momani.
Au sega ni dau vakararavi ena veika sa yaco oti. Au dau taura vakavuqa me noqu na yalayala nei Moronai me rawa niu maroroya dei toka kina na noqu ivakadinadina bula ni iVola i Momani. Au sega ni dau taura na veivakalougatataki ni ivakadinadina oqori me dua na isolisoli ena cawiri ga mai.
Na ivakadinadina e gadreva me vakabulabulataki ena masu ni vakabauta, ena viakania na vosa ni Kalou mai na veivolanikalou, kei na talairawarawa ki na dina eda sa ciqoma. E rerevaki ni vakaweleweletaki na masu. E rerevaki ki na noda ivakadinadina na kena vulici ka wiliki tu ga me rawa na ivolanikalou. Oqori na veika bulabula e vinakata na noda ivakadinadina.
O nanuma tiko na ivakasala ni qaqarauni nei Alama:
“Ia kevaka dou sa vakaweleweletaka ka sega ni qarava, ena sega ni ti na wakana; ia ni sa cilava na siga sa malai, ia ni sa sega na wakana, sa raqosa sara, dou na qai cavuta ka biuta laivi.
“Raica sa vinaka na sorenikau ka kana vinaka na vuana; ia sa mate ga ni sa dravuisiga na nomudou qele, ka dou sa sega ni qarava vinaka na vunikau; raica dou sa sega ni rawata e dua na vuana.”10
Sa dodonu me na vakayacori vakatautauvata ena veigauna na kanamagiti mai na vosa ni Kalou, na masu ena yalodina, kei na talairawarawa ki na ivakaro ni Turaga me rawa ni tubu ka vuavuai vinaka kina na nomu ivakadinadina. Ena so na gauna e dau yaco mai vei keda kece eso na ka eda sega ni rawa ni levea ka vakataotaka na ivakarau ni noda vulica na ivolanikalou. Eso beka na gauna eda digitaka mai eso na iulubale meda kua ni masu.Eso na ivakaro eda digitaka ena so na gauna meda vakawalena.
Ia ena sega ni vakatarai na nomu gadreva mo rawata na ivakadinadina bula kevaka o guilecava na ivakasala kei na yalayala ena Alama:
“Ia kevaka dou sa sega ni muria na vunau, ka namaka tiko na vuana ena yalo vakabauta, dou na sega sara ni betia na vuanikau ni bula.
“Ia mo dou muria na vunau ka qarava vinaka na vunikau ni sa tubu mai, ia me dei tikoga na nomudou vakabauta kei na nomudou vosota ni dou sa namaka tiko na vuana, raica kevaka sa vakakina sa na bula, ka dou na rawata kina na bula tawamudu.
“Ia mo dou gumatua ka vakabauta na vunau, dou qarava vakavinaka me bula kina e lomamudou; ia dou na tauca vakaidina na vuana sa talei sara, raica sa kamikamica sara mai na veika kamikamica kecega, io sa vulavula sara mai na veika vulavula kecega, ka savasava sara mai na veika savasava kecega; ia dou na kania na vuanikau mo dou mamau kina, raica dou na sega tale ni viakana se viagunu.
“… dou na tauca vakadina na vua ni nomudou vakabauta, na nomudou gugumatua kei na nomudou vosota vakadede.”11
Na vosa ena ivolanikalou o ya, “namaka tiko na vuana ena yalo vakabauta,” e dusia na ivakavuvuli vinaka o ni ciqoma ena yakavi nikua. Oqori na vuna a dusimaki kina na matamuni ki na dua na gauna mai muri ena rumu ni veivauci ni dua na valetabu. Oqori na vuna o ni vukei kina ena bogi nikua mo ni raitayaloyalotaka na rarama sega ni oti rawa eda raica ena iloilo ena lalaga ni rumu ni veivauci ka na rawa mo ni vakamau kina ena dua na valetabu ni Kalou.
Kevaka e rawa mo ni raica e dua na siga vakaoqori ena gagadre veirauti ka basika mai kina na ivakadinadina, o ni na vaqaqacotaki mo ni vorata na veivakatovolei ni vuravura. Ena vaqaqacotaki na nomuni ivakadinadina ena veigauna kece o ni tovolea kina mo ni bula me vaka na iVakabula. Ena yaco na gauna mo ni kila kina vakataki kemuni ni o Koya na Rarama ni Vuravura.
Ena yaco mo ni vakila na rarama ni tubu tiko ena nomuni bula. Ena sega ni yaco mai ke sega ni sasagataki. Ia ena qai yaco mai ni sa tubu na nomuni ivakadinadina ka digitaka mo ni vakabulabulataka. Oqo na yalayala mai na Vunau kei na Veiyalayalati: “Raica sa vu ni rarama na Kalou; ia ko koya sa kunea na rarama ka tudei tikoga vua na Kalou, ena vakararamataki vakalevu; ia ena tubu cake tikoga na nona rarama me yacova na siga lagilagi ko ya.”12
Ena yaco mo ni rarama kei vuravura ena nomuni wasea na nomuni ivakadinadina vei ira na tani. O ni na vakacilava yani vei ira na tani na rarama i Karisito mai na nomuni bula. Ena raica na Turaga na sala me tarai ira kina o ni dau lomana na rarama oqori. Ia mai na nodra vakabauta cokovata kei na ivakadinadina na Luvena yalewa, ena tara kina na Kalou na nodra bula e milioni ena Nona matanitu ka vakakina e vuravura taucoko ena Nona rarama.
Sa davo koto na vakanuinui ni Lotu kei na veitabatamata era na muria na nomuni ivakaraitaki ena nomuni ivakadinadina kei na nomuni digidigi mo ni rogoca ka ciqoma na veisureti ni Turaga: “Lako mai, ka muri au.” E kila ka lomani kemuni na Turaga.
Au laiva vei kemuni na noqu iloloma kei na noqu ivakadinadina. O ni luvena yalewa e dua na Tamada mai Lomalagi e bula tiko ka dau loloma. Au kila ni iVakabula ka Rarama kei Vuravura na Luvena sa tucake tale, o Jisu Karisito. Kau vakadinadinataka ni sa vakauta yani na Yalo Tabu ki yalomuni ena bogi nikua na itukutuku me vakadinadinataka kina na dina. O Peresitedi Thomas S. Monson e parofita bula ni Kalou. Au vakadinadinataka, ena yaca i Jisu Karisito, emeni.