Qarava na Veisiga ni Mataka ena Vakabauta
Russell M. Nelson
Ena Kuoramu ni iApositolo Le Tinikarua
Na Nona dina, veiyalayalati, kei na cakacaka vakalotu ena rawa kina vei keda meda lakosivita na rere ka sotava na veisiga ni mataka ena vakabauta!
Kemuni na taciqu kei na ganequ lomani, vinaka vakalevu na yalo ni veitokoni, sega walega ena laveliga, ia na nomuni veiqaravi veivueti mai vale, ena Lotu, kei na nomuni veitikotiko. E talei vei keimami na tiko vata kei kemuni ka raica ni o ni maliwai ira na nomuni matavuvale kei na itokani. Ena veivanua cava ga o ni tiko kina, keimami sarava tiko na nomuni sasaga mo ni vakavinakataka na vuravura oqo. Keimami tokoni kemuni! Keimami lomani kemuni! Ni ko ni masulaki keimami, keimami sa masulaki kemuni talega!
Keimami rawa ni raica na nomuni matavuvale ni ko ni wavokita na retioyaloyalo se ena initaneti mo ni sarava na koniferedi raraba mai vale. Erau vakauta mai vei au e dua na tina kei na tama qaqa na ilavelave ni dua na iyaloyalo erau tabaka ena gauna ni koniferedi. Erau dikeva na ka a cakava na luvedrau tagane vula 18 ni kila na kena irairai kei na domona o koya e vosa tiko. A tekivu me yalovaka na nona iregu ki na TIVI. E vinakata me toro volekata yani. A mani laveti koya cake ki domona na ganena dauloloma qase ka toroi koya voleka yani. Oqo na itaba o ya.
Io, na iyaloyalo ena TIVI na noqu, kei iratou na gone oqori na makubui keirau. Ena vica na yabaki mai qo sa na italatala qase na gonetagane oqo, taura nona edaumeni ena valetabu, ka vakarau me laki kaulotu. E muri sa na vauci vua e dua na nona itokani tawamudu ena digitaka. E rawa beka ni o ni raici koya ena siga sa na tagane vakawati kina ka tama, kei ira na luvena? Ena dua na siga ena vakamoce kina vei ira na tukana, ni dei tu vua ni mate e tiki ni bula.
E dina. Eda bula meda mate, ka da mate meda bula tale. Ena rai me baleta na tawamudu, na mate walega e sega ni vakarautaki sai koya na nona mate o koya e se bera tu ni vakarau me sota vata kei na Kalou.
Me vaka ni keimami iapositolo ka parofita keimami sega ni leqataki ira walega na luvei keimami kei na makubui keimami, ia o ira talega na nomuni, kei ira yadua na luvena na Kalou. Na veika kece ena yaco mai muri vei ira yadua na luvena na Kalou ena vakatau vei rau na nona itubutubu, matavuvale, itokani, kei na qasenivuli. Io, na noda vakabautaoqoena yaco me tiki ni nodra vakabauta na noda kawa mai muri.
Na tamata yadua ena vaqara na nona sala ena dua na vuravura dau veiveisau wasoma—na vuravura ni veisisivi vakasama. Ena dau veisaqasaqa tikoga na veika ca kei na veika vinaka. Sa dau segata tiko e veigauna ko Setani me vakauqeti keda meda muria na nona sala ka me vakararawataki keda, me vakataki koya.1 Ena sega sara ni oti na veika dredre ni bula me vaka na tauvimate, na mavoa, kei na vakacala ka.
Eda bula donumaka e dua na gauna ni bula leqaleqa. E veivakarusai na uneune kei na ualoka, e kasura na veimatanitu, sa toso cake tikoga na dredre ni bula vakailavo, e bololaki na matavuvale, ka tubu cake na levu ni veisere. Sa dodonu meda lomaleqa. Ia da kua ni laiva me vakaisosomitaki na noda vakabauta ena rere. E rawa ni da valuta na rere ena noda vaqaqacotaka na noda vakabauta.
Tekivu vei ira na luvemuni. Sa nomuni itavi taumada na itubutubu na vaqaqacotaki ni nodra vakabauta. Laiva me ra vakila na nomuni vakabauta, kevaka sara mada ga o ni sotava tiko na veivakatovolei mosimosi. Me vakanamata tiko na nomu vakabauta vua na Tamada Vakalomalagi dau loloma kei na Luvena Daulomani o Jisu Karisito. Vakatavulica na vakabauta oqori ena yalodina e titobu. Vakavulica vei ira yadua na gonetagane kei na goneyalewa talei ni o koya na luvena na Kalou, e buli ena Kena ivatuka, ena dua na inaki kei na icavacava tabu. Era dui sucu mai kei na bolebole me vakamalumalumutaki kei na vakabauta me tarai cake.2
Vakavuvulitaka na vakabauta ena nona yavu ni veivakabulai na Kalou. Vakavuvulitaka ni noda ilakolako ena bula oqo e gauna vakawawa, e gauna ni vakatovotovo kei na veivakatovolei me laurai se da na cakava na veika kece e vakarota vei keda na Turaga.3
Vakavuvulitaka na vakabauta mo muria na nona ivakaro kecesara na Kalou, ni da kila ni ra soli mai me ra vakalougatataki kina na Luvena ka solia vei ira na marau. 4 Vakasalataki ira me ra qarauna ni ra na sotava eso na tamata era dau digia ga na ivakaro me ra muria ka vakawalena na kena vo era digitaka me ra voroka. Au vakatoka oqo me rai vakavalenikana ki na talairawarawa. Na iwalewale oqo ni digidigi ena sega ni mana. Ena vakavuna na bula rarawa. Me vakarautaki koya e dua me sota vata kei na Kalou, sa dodonu me muria na Nona ivakaro kece sara. E ka ni vakabauta meda talairawarawa kina, ia ena vaqaqacotaki na vakabauta oqori ni da muria na Nona ivakaro.
Na talairawarawa ena rawa kina ni taladrodro na veivakalougatataki ni Kalou ka sega ni tao. Ena vakalougatataki ira na luvena talairawarawa o Koya ena nodra vagalalataki mai na veivakabobulataki kei na rarawa. Ka na vakalougatataki ira vakalevu cake ko Koya ena rarama. Me vaka oqo, ena rokova e dua na Vosa ni Vuku ni kila tiko ni nona talairawarawa ena sega walega ni vagalalataki mai na veivakabobulataki, ia ena vakaikuritaka ena yalomatua ka veivakavutuniyautaki ena vuku.5
Vakavuvulitaka na vakabauta me kilai ni talairawarawa ki na ivakaro ni Kalou ena rawa kina na veitaqomaki vakayago ka vakayalo. Ka nanuma tiko, era sa tu vakarau tu na nona agilosi savasava na Kalou me ra vukei keda. Sa tukuna kina na Turaga: “Niu sa lako vata kei kemudou. Au na tiko e yasamudou imatau ka tiko talega ena yasamudou imawi, io na noqu Yalo Tabu ena tiko e yalomudou, era na vakavolivoliti kemudou na noqu agilosi ka laveti kemudou cake.”6 Cecere dina na yalayala oqo! Ni da sa yalodina, ena vukei keda o Koya kei na Nona agilosi.
Na vakabauta kaukauwa ena vakaukauwataki ena masu. Sa ka bibi sara Vua na nomu vakatakekere mai vu ni yalomu. Vakasamataka mada na nona masu kaukauwa ka vakaciriloloma na Parofita o Josefa Simici ena gauna ni nona tiko vakavesu ena Valeniveivesu mai Liberty. A sauma na Turaga ena nona veisautaka na ivakarau ni nona rai na Parofita. E kaya kina, “Mo kila sara na luvequ ni ko na kalougata vakalevu ni ko sa vosota rawa na veika oqo.”7
Kevaka eda masu ena rai vakatawamudu, e sega ni yaga meda na vakataroga kevaka sa rogoci na noda masu ni luluvu mai vuniyaloda. Na nona yalayala oqo na Turaga e volai tu ena wase 98 ni Vunau kei na Veiyalayalati:
“Raica sa rogoca na Turaga ni Lewevuqa na nomudou masu … a sa volai ka dregati ena itukutuku oqo—ia sa lewa ka yalataka na Turaga me vakayacora.
“A sa yalataka vei kemudou ko Koya ena veiyalayalati sa tudei sara ni na vakayacora; ia na veika rarawa kecega dou sa sota kaya, dou na vinaka kina ka na vakarokorokotaki kina na yacaqu, sa kaya na Turaga.”8
E digitaka na Turaga na Nona vosa kaukauwa duadua me vakadeitaka vei keda! Dregata! Yalayala! Yalataka! Lewa! Veiyalayalati sa tudei sara! Kemuni na taciqu kei na ganequ, vakabauti Koya! Ena rogoca na Kalou na nomu masu ena yalodina mai vuniyalomu, ka na vaqaqacotaki na nomu vakabauta.
Ena gadrevi na noda yalayala tudei ni saumi ikatini vakadodonu me tarai cake kina na vakabauta tudei. Taumada ni ka ni vakabauta na saumi ikatini. Ena qai tara cake o dausaumi ikatini na ikuri ni vakabauta me yacova ni sa dokai ka talei vua na saumi ikatini. Na ikatini e lawa makawa ni Kalou.9 A yalataka vei ira na Luvena ni na dolava na “katuba ni lomalagi, ka sovaraka vei kemudou na ka ni veivakalougatataki me na sautu dina sara.”10 E sega ni o koya walega oqori, na ikatini ena volai tikoga kina na yacamu ena kedra maliwa na tamata ni Kalou ka taqomaki iko ena “gauna ni cudru kei na bukawaqa.”11
Na cava eda gadreva kina na vakabauta sega ni yavalati rawa vakaoqo? Baleta ni tu mai liu na veisiga dredre. Ena veigauna mai muri ena tu yadua sara me na rawarawa ka takalevu tu na Yalododonu Edaidai yalodina. Eda na vakatovolei yadua. Sa veivakasalataki kina o Paula na iApositolo ni veisiga mai muri “era na vakacacataki” o ira era na muria vagumatua na Turaga.”12 Na veivakacacataki sara ga oqori ena rawa ni qaqi iko mo malumalumu ka galu, se vakauqeti iko mo ivakaraitaki ka yaloqaqa ena nomu bula ni veisiga.
E tiki ni kena tarai cake na vakabauta na ivakarau o sotava kina na veivakatovolei ni bula. Na igu ena yaco mai ena nomu nanuma ni tiko na kemu ituvaki vakalou, e dua na isolisoli tawayalani na kena yaga. Sa vakananuma tiko na Turaga vei iko, vei ira na luvemu kei na makubumu, ni sai kemuni na kena itaukei dina, ni ko ni a maroroi tu mai lomalagi me baleta na nomuni gauna kei na vanua mo ni mai sucu kina, mo ni tubu ka yaco mo ni Nona tamata tudei ni veiyalayalati. Ni o ni lakova na nona sala ni buladodonu na Turaga, o ni na vakalougatataki mo ni lako tikoga ena Nona vinaka ka yaco me rarama ka ivakabula vei ira na Nona tamata.13
Sa vakarautaki tu vei kemuni na taciqu kei na ganequ na veivakalougatataki e dau rawati ena kaukauwa ni Matabete savasava i Melikiseteki. Na veivakalougatataki oqori e rawa ni veisautaka na ituvaki ni nomu bula, ena veika me vaka na tiko bulabula, na veitokani ni Yalo Tabu, na isema vakaveiwekani yadua, kei na veimadigi ni veigauna mai muri. Na kaukauwa kei na lewa ni matabete e tu kina na idola ni veivakalougatataki vakayalo kece sara ni Lotu.14 Ka vakasakiti duadua, ni sa tukuna oti na Turaga ni na tokona tiko na veivakalougatataki oqori, me vaka na Nona lewa.15
Na veivakalougatataki cecere duadua ni matabete e dau soli ena nona valetabu na Turaga. Na noda yalodina ki na veiyalayalati e vakayacori mai kea ena rawa kina vei iko kei na nomu matavuvale mo dou rawata na veivakalougatataki ni bula tawamudu.16
Na kemu isau e sega ni qai lako ga mai ni sa oti eke. E levu na veivakalougatataki me na nomu ena bula oqo, ena kedra maliwa na luvemu kei na makubumu. O ni na sega ni vala duadua ena ivalu ni bula o kemuni na Yalododonu yalodina. Vakasamataka mada o ya! E kaya na Turaga, “Kau na vala kei ira era veivala kei iko, ka vakabulai ira na luvemu.”17 E muri qai yaco mai na yalayala oqo vei ira na Nona tamata yalodina: “Ia koi au na Turaga au na vala ena nodra ivalu, na nodra ivalu na luvedra kei na makubudra … me yacova na ikatolu kei na ikava ni itabatamata.”18
Sa solia vei keda na noda Peresitedi lomani o Thomas S. Monson na nona ivakadinadina vakaparofita. E kaya o koya, “Au vakadinadinataka vei kemuni ni noda veivakalougatataki sa yalataki tu sa sega ni vakarautaki rawa. E dina ni na kumukumuni mai na o ni cava, ka tau mai na uca, na noda kila na kosipeli kei na noda lomana na Tamada Vakalomalagi kei na noda iVakabula ena vakacegui keda ka tokoni keda ka kauta mai na reki ni lomada ni da tudei tu ka muria na ivunau.”
E tomana o Peresitedi Monson, “Kemuni na taciqu kei na ganequ lomani, ni kakua ni rere. Dou vakacegu. Na veisiga ni mataka sa ramase sara me vaka na nomudou vakabauta.”19
Au vakuria na noqu ki na nona itukutuku qaqa o Peresitedi Monson. Au vakadinadinataka ni Tamada na Kalou. Na Karisito ko Jisu. Sa vakalesui mai ki vuravura na Nona Lotu. Na Nona dina, veiyalayalati, kei na cakacaka vakalotu ena rawa kina vei keda meda lakosivita na rere ka sotava na veisiga ni mataka ena vakabauta! Au vakadinadinataka ena yaca tabu i Jisu Karisito, emeni.