Vakatokai me Yalododonu

Benjamín De Hoyos

Ena Vitusagavulu

Eda sa vakalougatataki vakalevu ena noda curuma mai na veitokani oqo ni Yalododonu Edaidai!

Kemuni na taciqu kei na ganequ lomani, sa noqu masu ni na vukei au na Yalo Tabu meu vakasavuya rawa na noqu itukutuku.

Niu dau vakayacora na noqu veisiko ka tiko ena koniferedi ni iteki, tabanalevu, kei na tabana, e dau tuburi au na yalo marau niu sotavi ira kina na lewe ni Lotu, o ira ena gauna oqo ka vakakina ena taucoko ni gauna era sa vakatokai me ra Yalododonu. Na yalo ni vakacegu kei na loloma au dau vakila niu dau maliwai ira e dau vukei au, meu kila rawa niu sa tiko ena dua vei ira na iteki kei Saioni.

E dina ga ni vuqa vei ira era tadu mai ena veimatavuvale era sa lewe ni Lotu tu mai ena rua se sivia na itabatamata, ia e levu tale vei ira era se qai saumaki vou ga mai. Vei ira oqo eda sa tokaruataka kina na vosa ni veikidavaki nei Paula na iApositolo vei ira na kai Efeso:

“O koya oqo dou sa qai sega tiko ni vulagi kina se kai tani, dou sa koro vata ga kei ira sa lotu, ka dou sa lewe ni vale ni Kalou;

“Ka dou sa tara cake ena nodra yavu nai apositolo kei ira na parofita, ia sai koya ko Jisu Karisito sa kena ivakadei ena tutu ni vale” (Efeso 2:19–20 ).

Ena vica na yabaki sa oti, niu a se cakacaka tiko ena valenivolavola ni veika raraba ni Lotu e Mexico, keitou a sureti me keitou laki vakaitavi ena dua na mataveivosaki ena retio. Na inaki ni mataveivosaki oqo me vakamacalataki ka veivosakitaki kina na duidui matalotu sa tu e vuravura. E rua vei keitou a lesi me rau matataka na Lotu me laki sauma na vakatataro ena rawa ni tarogi mai ena mataqaliparokaramu vakaoqo. Ni sa “vakacagau na veivosaki,” me vaka e dau tukuni tu ena ivosavosa ni retio, a kaya sara mai o dairekita ni parokaramu: “Ena yakavi nikua rau tiko talega kei keda e rua na italatala qase mai na Lotu i Jisu Karisito ni Yalododonu Edaidai.” A cegu vakalailai ka taroga sara, “Na cava na vuna sa rui balavu kina na yaca ni Lotu? Na cava na vuna dou sega kina ni vakalekalekataka se vakayagataka e dua na yaca vakabisinisi?”

Keirau a veidredrevakiena vuku ni taro totoka o ya ka tekivu sara me keirau vakamacalataka ni yaca ni Lotu a sega ni digitaka na tamata. A solia mai na iVakabula vua e dua na parofita ena iotioti ni gauna oqo. “Raica ena yaca ni noqu lotu na Lotu i Jisu Karisito me Baleti Ira na Yalododonu ena Gauna Oqo” (V&V 115:4). A sauma sara mai ena veidokai o dairekita ni parokaramu, “Keimami na marautaka vakalevu me keimami cavuta vakakina.” Au sa sega tale ni nanuma rawa oqo na levu ni gauna e cavuta kina na yaca bibi ni Lotu, ia au se nanuma tikoga nakena sobu tiko na yalo veivakacegui ena neirau a sega walega ni vakamacalataka na yaca ni Lotu, ia na kena ibalebale talega vei ira na lewe ni Lotu—na Yalododonu Edaidai.

Eda wilika kina ena Veiyalayalati Vou ena nodra a vakatokai taumada na lewe ni Lotu i Jisu Karisito me ra sa Vakarisito mai Anitioki (raica na Cakacaka 11:26), ia era veikacivi ka vakatokai ira me ra Yalododonu. Sa qai dua dina na veivakauqeti levu vei ira me ra rogoca ni sa vakatokai ira o Paula ni ra “sa koro vata ga kei ira sa lotu, ka dou sa lewe ni vale ni Kalou” (Efeso 2:19), ka vakakina “sa kacivi meyalosavasava” ( Roma 1:7; vakaikuritaki).

Ki na ivakatagedegede ni nodra bulataka tiko na lewe ni Lotu na kosipeli ka muria na nodra ivakasala na parofita, ena yaco, me vakayacori tiko vakalalai eke ka vakalalai e kea ka ra na sega mada ga ni vakila, ni sa yaco me ra bula vakalou. O ira na lewe ni Lotu yalomalumalumu era dau vakayacora e veisiga na nodra masu vakamatavuvale kei na wili ivolanikalou, ka cakava na vola kawa, ka vakatabuya na nodra gauna me ra laki sokalou vakawasoma ena valetabu, era sa yaco me ra Yalododonu. Sai ira oqo era sa yalodina ki na kena tauyavutaki na matavuvale tawamudu, ka yaco vakakina, me vaqaqacotaki na matanitu ni Kalou. Sai ira talega oqo era sa vakatikitikitaka e dua na nodra gauna mai na nodra osooso ni bula oqo me ra laki vueti ira mai era sa vakayawaki ira mai na Lotu ka vakayaloqaqataki ira me ra lesu mai ka laki dabe ena teveli ni Turaga. Sai ira oqo na cauravou kei na goneyalewa daukaulotu, kei ira na veiwatini qase era sa ciqoma na veikacivi me ra daukaulotu ni Turaga. Io, kemuni na taciqu kei na ganequ, era sa yaco me ra Yalododonu ki na kena ivakatagedegede era sa kunea rawa kina na yalo veivakatakatari ka totoka e vakatokai na loloma, se na loloma uasivi i Karisito (raica na Moronai 7:42–48).

Era sa kila talega vakakina na iVakabula o ira na Yalododonu, se o ira na lewe ni Lotu ni ra sotava na rarawa kei na vakatovolei. Meda kakua ni guilecava ni a sotava sara mada ga o Koya na ka kecega. “Ena soli koya me mate me sereka kina na ivesu ni mate sa vesuki ira tu na nona tamata; ia sa mai bula vakatamata ko koya me kila kina na nodra malumalumu na nona tamata ka vakabulai ira ena nona yalololoma” (Alama 7:12).

Ena vica na yabaki sa oti au a raica kina na nodra vakararawataki e vuqa na tamata, era oka kina e vuqa vei ira na noda Yalododonu. Keimami sa qai masulaki ira tiko, ka kerea na veisotavi ni Turaga me kakua ni malumalumu na nodra vakabauta ka me ra toso yani ki liu ena vosota. Ena ka oqo eda na tokaruataka kina na vosa veivakacegui nei Jekope na parofita mai na iVola i Momani:

“Oi kemudou na wekaqu lomani, dou lako mai vua na Turaga na Yalosavasava. Mo dou kila ni sa dodonu na nona sala. Raica sa qiqo na matamata ni koro me ra curu kina na tamata ka sa dodonu na sala me ra muria, ia na ivakatawa ni matamata ni koro sai Koya na Yalosavasava ni Isireli; ka sa sega ni lesia kina e dua tale na tamata, ia sa sega e dua tale na katuba me ra curu kina, ena matamata ga, ia sa sega ni rawa me vakaisini ko Koya, ni sai Koya na Turaga na Kalou.

“Ia ko koya yadua sa tukituki, ena dolava vua” (2 Nifai 9:41–42).

Se cava ga na ituvaki, veivakatovolei se bolebole eda sa solegi kina; sa na yaco me noda ivurevure ni kaukauwa kei na vakacegu na noda kila vakavinaka na ivunau nei Karisito kei na nona veisorovaki. E dina, kemuni na taciqu kei na ganequ, o ya na veivakacegui e lomada sa sucu ena Yalotabu ka sa solia yani na Turaga vei ira na nona yalododonu era yalodina. E vakabulai keda ena Nona kaya: “Au sa laiva vei kemudou na vakacegu.… Me kakua ni rarawa na yalomudou, se rere” (Joni 14:27).

Sa vuqa mai na yabaki na noqu vakadinadinataka tiko na nodra yalodina tikoga na lewe ni Lotu, o ira na Yalododonu edaidai, ena nodra vakabauta tiko na ituvatuva ni Tamada Vakalomalagi kei na Veisorovaki ni noda iVakabula, o Jisu Karisito, sa yaco kina me ra valuta rawa na veika dredre kei na ka rarawa ena yaloqaqa kei na yalo gugumatua, ka ra kakavaki ka mua tikoga ena salatu rabalailai ka qiqo ni bula vakalou. E sega vei au na vosa meu vakamacalataka rawa kina na noqu marautaka ka qoroi ira na Yalododonu yalodina au sa mai kilai ira rawa!

E dina ga ni sega sara ni titobu na noda kila vakavinaka na kosipeli me vakataka na noda ivakadinadina ni ka dina, ia kevaka meda nuitaka tikoga na Turaga, eda na tokoni ena veika dredre, noda vakatovolei kei na rarawa eda sotava (raica na Alama 36:3). Na yalayala ni Turaga oqo vei ira na Nona Yalododonu e sega ni kena ibalebale ni da na vakuwai mai na sotavi ni rarawa se na veivakatovolei ia eda na tokoni ni da na sotava tiko ka da na kila ni sai koya ga na Turaga e tokoni keda tiko.

Kemuni na taciqu kei na ganequ lomani, eda sa kalougata vakalevu dina ena noda curuma mai veitokani oqo ni Yalododonu Edaidai! Eda sakalougata ni sa mai muavata kei ira na parofita makawa kei ira ena gauna oqo na noda vakadinadinataka na noda iVakabula!

Au vakadinadinataka ni sa bula tiko na noda Turaga, na Yalosavasava nei Isireli, ka sa dusimaka tiko na Nona Lotu, Na Lotu i Jisu Karisito ni Yalododonu Edaidai, vua na noda parofita lomani, o Thomas S. Monson. Ena yaca ni noda Turaga, o Jisu Karisito, emeni.