Aaronic Priesthood: Sak’iy mag Murwel ko Gelngin Somoel

Rok Adrián Ochoa

Bin L’agruw e Counselor u lane Young Men General Presidency

Fare preisthood e ba tu’uf ni nge gay rogon ni nge rrin e n’en nib mangil. Kan piningem ni ngam sak’iy mag mang e kanawo’,” gathi ngam mithaeg e tamilang rom u fithik e lumor.

Dani n’uw napan mug mada’ nigew Thabiso reb ea tabinaew u South Africa, ir e bin somm’on ea ulung ko priest u lane Ward rok Kagiso. Thabiso nge bisof rok, ir e ma koel ea pi key ko ulung, kea meybil ko fan ea pi ulung ni yad ba mo’owar, yow bea sap nag ko urogon ni ngar ayuweg ned rad. Miyow thamiy ni ngar mada’ nigew ea tabinaew ku Tebello, mar pingegnew gag ni ngug un ngorow.

Napan ni gu thimur gaed ko fare kus nib domomow, mag mad pateg i Tebello u na’un rok, bea’ niba guman’ nike taleg ea wub ko misa ni bachan ea ba magawon nag boch banen ko Madnom. Kea rus machane ba falfaen’ ni gomow bay rok miki pining ea tabinaew rok ngan un’ ngomad ko sabal. Fare bisof ea yog ngak ni ba’adag ni nge ayuweg ea tabinaew rok ngar chiyliy gad u lane temple. Kar falfalen’ gad, miyad thamiy ea Kan ni Thothup nib gel u lan gubin fapi thin.

Thin ku Thabiso ea ir ea thilyeg ea mada’ romad. Go napan ni re priest nem ea bea thin ni woed ea pi angel—thin rok ea gu ninged fan mea midmid nag ea fagar rok. “Guba’adag ni guma non ngom u galasia,” kea ga’ar. “Gama yog ea thin nib mangil ngog, ma fare soccer team ea dakuriy ea chiney ni dakamur ma yib. Rigab cheg riy.”

Me ga’ar Tebello, “Siro’.” “Baygu sul ngomed.”

Me fulweg Thabiso, “Rib mangil.” “Ma ka ga manang rogon ni gadow ma murwel ngay ni ngad fal’eg rogdow ni ngad mangew e tamachib? Rayog ni ngad tabab gow biyay?”

Mea ga’ar Tebello, “Rayog,” “Guba’adag ni ngug sul.”

Napan ni guma counselor mug falfelan’ ko Young Men general presidency ni kar guyed ea Aaronic Priesthood u lane fayleng ni yad bea mithmith niged ea gelngin fare Aaronic Priesthood rorad. Machane bochi ngiyal’ ma guma paat, ko urngin e pagal ni yad bea kirban’, ni bachane da’anra ninged fane fel gelngin ea nen’ ni yabe koel.

Fare priesthood ea gelngin nge mat’won rok Somoel ni ir ea ngan mithmith u daken nag ngak ea bitir Rok. Ma, rib fel’ ni gubin ea pagal, gubin ea Aaronic Priesthood, ea thangari nangfan ea mat’aw ko fapi thapthap ko angel. Rib tu’uf ni ngar ninged fan nibay mat’won rad ni ngar yiroriyed ea fagar roraed ngak fare Tathapeg. Rib mangil fa’anra yaed manang ni Chitamangiy nu Tharmiy ea ra pi gelngin rad ngar weliyed fare gospel u fithik ea guman’ nge yul’yul’ ko picha’an ni dar mich u wun’rad fapi thin ku Kristus.

Fapi pagal ko Galasia, soen ngug fith ea duwer ngomed ni gube athapeg ni gamed ra fek nga lane yafas rom. Mang reb ea gelngin u fayleng ni gamed ra paat ngay ni woed ea priesthood ku Got? Mang boch ban’en nib ga’ ko ayuw rok ea Chitamangdad nu Tharmiy ni rayog ninge thileyeg ea yafas ko gidii’, ni nge yiroriy rad ngar bi’ech ko fapi denen mea powi’iy rad ko fare kanawo’ ko falfalen’ ni manechubog?

Boed boch ea gelngin, priesthood ea ba tu’uf ni ngan mithmitheg nge muduguliy ea mangil. “Somoel ea kea piningem ni ngam sak’iy mag mang e yaen nga mo’on (muguy ko D&C 115:5), gathi ngam mithag ea magal rom u lamar. Yigo’ picha’an ni madangdang ea ran mel’eg rad. Napan ni gara mithmitheg ea gelngin ko fare priesthood ni machmach, ma gelngim nge ma’nay rom ea ra mo’nog. Pi pagal, gamnang ni rib fel’ ngim ni fa’anra gara pigpig ngak Somoel. Gamnang ni gara falfelan ni fa’anra ra’um un ko fapi murwel nib mangil. Mu dag gelngin fare priesthood ni gab paer nigab bi’ech ma gab mangil.

Mug sul biyay u daken fare thin ni Elder Jeffery R. Holland ea yog ngomed u lan nel’ ea pul ko re pulpit ney. “I gag ea gube sap,” ni ga’ar, “ko pagal nge pumo’on ni mani’ ea nge non nib ga’ lungun ko re cham ney u thalin ea mangil nge kireb. Gad ba’ ko mal.” Me ululuy ni ga’ar, “… Gube fith ko e laman nib gel nge gel bugwaen, gathi yigo e laman nira togopluw ko kireb  … , machane e lungun ko fel’, e lungun ko fare gospel, e lungun Got” (“We Are All Enlisted,” Liahona nge Ensign, Nov. 2011, 44, 47).

Arogon, Aaronic Priesthood, gad ba’ ko mal. Mare mal ney, ragon ni gadra gel ngak mo’oniyan ea ngad mo’nog niged ea pi mat’aw rodad. Dab motoyil ko thin nib kireb mag susun nag ni da’an mu rung’ag. Dam mu sap ko sasing nib kireb ko boch ea gidii’ mag susun nag ni da’an muguy. Dab maath ko tin tagan mag susun nag ni dariy fan. Dam pagem napan ni ra gay rogon Satan ni nge kireb nag e tin nib mangil. Mu, sak’iy ngam par ni gab gel to tin gamanang nib riyul’! Napan ni gara rungag fam gu’ ea tin nike kireb nag ea murwel ku somoel, mu lamnag ko gur mini’—gur ea salthaw rok Got ni ba gel gelngin fare priesthood rok. Dariy reb gelngin nib ta’aborogon ko fare, chitamngin ni taban, ni woed ea tin riyul’—tin riyul’ ni ra yib u langam nga buut ea ra mithmitheg gelngin ea priesthood rom. Urngin ea fagar rom ea ra ta’fam ko bachan ea mich nge murwel rom. Boch ea dabi ta’fam. Machane dariy fan. Ra yog ea tayfan ngom nge pagan’um ngak e Chitamangiy nu Tharmiy bachan ni kam murwel nag gelngin ke yog ea tin nib mangil.

Gube pinning gubin ea tiyugang’ ko Aaronic Priesthood Quorum Presidency ni ngam puged ngalang biyay fare pow ko puf mat’awon mad mudugliyed man powi’iy naged e ulung i salthaw rom. Mu mon’og nag gelngin ea priesthood rom ngam pining ea gidii’ ngak Yesus ngar kalngaen’ mar tawfe gad. Ba’ mat’wom nge gelngin rok Somoel rom ni rayog ni ngam rin’ ea pinn’ey.

L’agruw ea duw kafram, mug wan nga Santiago, Chile, mari gin owcheg ngak Daniel Olate, ban’ pagal nima un ko pi tamachib. Mu goeg ngak ninge yol ngog, ba’ aray ea nen’ ni nike yog ngog u lane email rok. “Kafin gi gaman ragag nge nel’ ea duw rog min pi’eg ko ofis ko priest. Karofan nem mug tawfe nag reb ea fagar; fithingan ea Carolina. Kug fil ea thin ku Got ngak, me un ko misa mea yog fare Personal Progress award ngak, labthir rok ea dar pagan’row ngog machane ra pagew gag ngug tawfe nag nipan ra ningew ko gag mani.Badag ni gag ea ngu tawfe nag, ere gu son gow ko bin magid ea pul ko Sunday, napan ni ragag nge nel’ ea duw rog. Karug falfalen’ ni kagu ayuweg kug tawfe nag bea, kug falfalen’ nigag ea ku tawfe nag.”

Daniel are ira pagal u fathik ea pum’on u lane fayleng nibe ta’ fan fapi gelngin ea machmach rok Got. Reb ea Luis Fernando, bea u Honduras, nike guy reb ea fagar rok nibe yan u lan reb kanawo’ nib kireb, me ayuweg me weliy ea mich rok ngak, me ayuweg nge fal’ ea yafas rok. (mugu’ u “A Change of Heart,” lds.org/youth/video). Olavo, u Brazil, ea ir reb ea wo’. Ma yul’yul’ u tabinaew rok (muguy ko D&C 84:111, Olavo ea ayuweg ea nina’ rok nge sul ko galasia (muguy ko “Reunited by Faith,” lds.org/youth/video). Bo’or ea pi yat ney ko youth ni gimed ra pat ngay u lan fare website ko Galasia, youth.lds.org. Rayog ni ngam google nag. Internet, social medio nge pii technology ea tal ne murwel ku somoel nike pi’ nga pa’am ni ngam ayuweg ngam mithmitheg gelngin ea priesthood rom ko tin riyul’ nge tin nib mangil.

Pi pagal, fa’an gara mithmitheg ea Aaronic Priesthood u rogon ni kug weliy, ma areme gabe yarmiyem ko tin gabul nge langlaeth ea magawon. Ra um rin’ boech ban’en nib ga’ fan. Woed John nima Tawfe, mangil ea wo’ ko Aaronic Priesthood rok, gabe yarmeg rogom ngak Somoel ninge n’uw nag ea kanawo’ Rok. Napan ni gara dag ea gospel ni mornga’agen ea kalngan’uy nge tawfe, woed ni kea rrin’ John, ma arame gabe yarmiy rogon fapi gidii’ ko ran nra yib Somoel (Muguy ko Matthew 3:3; D&C 65:1–3; 84:26–28). Ra un nog salpen nib mangil. Ere, ka chingiyal’ ney ea ngam rin’ed ea tin mangil, mu muruliyew ea tin kea pi’ Got nga pa’ mew ni ngam taw’ath nigeth boech ea gidii’, pow’iy rad u fathik ea lamar ngeb nga tamilang, mu yarmiyew ea kanawo’ ku Somoel.

Galasia ea kiki pi’ reb ea babyor ni Murwel ngak Got ni nge ayuweg nem ngam rin’ ea pi murwel rom.

Nggu yog fapi thin ku President Thomas S. Monson: “Dam um sap nga buut ko mich rom. … Bay gelngim ni ngam gu’ ea tin ni danur gu”. Fa’anra bay owchem ni ngam gu’, telim ni ngam rung’ag, nge gumircha’em ni ngam thamiy, ma rayog ni ngam ayuweg ea yafas ko boech ea gidii’.” (“Be Thou an Example,” Liahona nge Ensign, May 2005, 115).

Gube micheg ngomed ni gelngin fare priesthood ea rib riyul. Kug nang rog ni bachan ea ku muruwliy kug nang. Kug guy bo’or ban’en nib mangil nike buch u lane yafos ko girdii’ ni bachan fare gelngin ea Aaronic Priesthood. Kug guy fare gelngin ea murwel ko engal ko mich rok ea Aaronic Priesthood nib sug nag ea thin ko Kan Thothup ko athamgil, nike bing gumircha’en bea’ ko tamilang nge adag. U dakean fithngan Yesus Kristus, ni Somoel rodad, pilung rodad, nge Tathapeg rodad, amen.