Fare Mangfan ko Muruwel ko Priesthood

Rok President Dieter F. Uchtdorf

Bin L’agruw e Counselor ko First Presidency

Fa’an gadad ra nangfan fare mangfan ko fare gospel nge fare mangfan ko priesthood mara ayuwegdad ngayog ni ngad guyed fan ni gubin nib thothup.

Gu tay fan re ngiyal’ ney nggu mo’olung gad ko pi pum’on ko priesthood min faflaen’ ngomed ko re fla’ab ko gospel ku Yesus Kristus. Gube fal’falaen ngomed ni bachan e mich, murwel nib fel’ nge paer romed nib mat’aw.

Gadad be t’ab rogon ni kug athapeged re gelingin e priesthood ku Got rok ko picha’ nikan pagan’uy ngorad ko priesthood nge matawon nge gelngin nib thothup. Ren’ey e taw’ath nrib ga’. Be muruwel nib thothup. Gu og e magaer ngomed ko michaen’ med, pi ngongol romed, nge yul’yul’ romed.

Re Gelingin ko Mang Fan

Fin chiney e ku lemnag marunga’agen l’agruw e calling ni kug athapaged u napan e muruwel rog ko priesthood u lane Galasia.

Bin Somm’on e calling ke yib ngog u napan gag reb e deacon. Gag nge tabinaw rog e ku waroed nga branch romad ko Galasia u Frankfurt, Germany. Kan taw’athnog mad ko yo’or e gidii’ ko branch romad nib achig’chig. Reb i’ir e branch president rodad, Brother Landshulz. Kug liyor nag nib yo’or, mus ni bingyal’ be gel laniyaen’ boech, tolang, me gubin ngiyal ni ke chuw ko mad nib talimar. Gu pugerran ni napan gag e pagael, kug gosgos ko pi fagaer rog marunga’agen ni ke fram ya’an e branch president romad.

Ma chiney gu minmin riy’ ni bachan gu lemnag ni riyul’ ni bitir ku galasia e daba’ e yad ma sap ngog nib ta’aborogon.

Reb e Madnom, ke fitheg President Landshulz fa’an rayog ni nge non ngog. Som’on e lem rog e, “Mange kug rin’ nib kireb?” Ku lemnag ko bo’or e tin ni sana ke rungag ni kug rin’ nra pag ni nge pinningeg nggu non gow ni ir nib president nge gag nib deacon.

President Landshulz ke pinningeg nga langin e classroom nib achi’chig—galasia romad e dariy e office ko branch president—ma ba’aram nike pinningeg nggu mang e president ko deacon quorum.

“Ba’aray e lung nib ga’fan,” ke yog, ma ke weliy fan ngog nib tamilang mang fan. Ke weliy ngog pin’en ni ir nge Somoel kan duwgily gow ngog nge urrogon ran ayuweg nigeg.

Kug pagtalin bo’or e tin ni ke yoeg, machane ke magach u wun’ug rogon e pi thamthaem rog. Kug thamiy e Kan Thothup nib gel mab thothup fini ke yog ngog. Kug nang ni ba’aray e Galasia ku Somoel, ma kug nang ni re calling nike pii’ ngog e ke duwgliy e Kan Thothup riy’. Gu pugerran napan kug waen u wuru’ e classroom nem, ma kug thamiy nigub n’uw boech ko kafram.

Be chugor ko 60 e duw nike thimur ko re rran nem, ma guba chariy’ e pi thamtham nem ko pagan’ nge adag e chiney.

Napan kug lemnag boech ngadakaen e pin’ey, kug gay rogon nggu sulaen’ug ko ina deacon ni kebay ko branch romad e chirofen nem. U polo’ e rayog rog, gu lemnag ni bay l’agruw. Machane, sana kemus ni ta’reb.

Machane dariy’ fan ni dem turug fa’anra ba’ tareb a deacon fa ragag nge l’agruw. Kug thamiy nib fel’, ma kug ba’adag nggu pigpig ngay nib yul’yul’ rogon ni dabgu kireb nag laniyaen’ e branch president fa Somoel rog.

Kug nang e chiney ni fare branch president e sana ke pii’ ngog e calling ni bachane dariy’ bee’ fini ke mel’eggeg. Ke rayog ni nge yoeg ngog u hallway fa nga langin fare mo’olung ko priesthood romow ni gura mang e bin bi’ech e president ko deacon’s quorum.

Machane, ke tal’ me ayuweg neg nggu nang fan gathi kemus e mang ko muruwel rog, machane nib ga’ fan riy’, fare mang fan.

Iraram ban’en ni ri dabug pagtilin.

Fan e raney e gathi kemus ni ngan yog ya’an ni ngan pi’ e calling u lan fare Galasia (machane bineye reb ea llowaen nib mangil u rogon ni ngan rrin). I ir reb e pow ngog ko fare gelngin e priesthood nima wawliy nima pug fare kan thothup mma pining’eay ni ngan mithmith.

Thingarda sulaen’dad nib yo’or e yay ko mang fan e pin’en nikan motochiyel nag ngodad. Fare kengin tabolngin e gospel e ngari mang reb e kenginn e yafos, mus ni fa’anra be t’uf ni ngad filed rogon bayay ngo bayay. Gathi be yip fan ni nira monog ney ea susun ni ngad chachalban riy’. Ma ere, fini gad be sensey nag e pi kengin tabolngin e gospel u tabinaw fa galasia rodad, aygi pag re falflan’ ko gospel nge nifiy ko michaen’ e ma fekey ko magael, gowal, nge falflan’ ko picha’ ni gadbe fil ngak.

Ko pi deacon nib bi’ech ko high priest nibay nike n’uw napan, gadad gubin bay yo’or e thin nma weliy mange thingarda rin’ ko pi muruwel u priesthood. Pi mang e baga’fan u fithik e murwel rodad, ma be t’uf ni ngad ngongoliyed ngay. Machane ni bay ko pi mang fan ko murwel ko priesthood ni gadad ra pat ko falfalaen riy’ ni ngan pigpig, adag, nge gelingin fare priesthood..

Fare mang ko murwel ko priesthood nibe fil ngodad ko mang e ngad rrin’ed. Fare mang fan ea be ayuweg e tafney rodad me yibley ea murwel rodad.

Fare mang e be yoeg, ma fare mongfan e ma thil.

Bay Yo’or e tin nib “Fel” ni Ngad Rin’ed

Reb e calling ko priesthood ni kug lemnag marunga’agaen riy’ ke yib ngog bo’or e duw nga m’on napan bay e tabinaw rog. Kug suloed nga Frankfurt, Germany, ma kug athapeg e muruwel nib fel ko murwel rog ni ke t’uf bo’or e time nge muruwel rog. U napan fare bingyal’ ney ko yafos rog, Elder Joseph B. Wirthlin ke pii’ e calling ni nggu pigpig nigag stake president.

U napan kug mada’gow, kug lemnag bo’or e tafney, ma kug rus buchuw ni sana dariy’ e time rog nggu mugu’uliy e muruwel ney ni kan duwgliy ngog. Mus ni kug sob’taen’ nge gin’ ni bachan fare calling, kug lemnag ma de nang fa’anra mangil nggu athapeg riy’. Machane, ke yaen re tafney nem ni bachan kug nang ni Elder Wirthlin kan duwgliy rok Got ma ke rin’ e muruwel ku Somoel. Mangge ngu rin mus nggu athapeg riy’?

Bay boech ngiyal’ u yafos rodad napan be t’uf ni ngad laked e mich rodad, nib pagan’uy ni Got e ra pii’ ngodad fapi fulweg ko duwer rodad ma ayuwegdad. Ma ere kug athapeg nib falflan’, kug nang ni Got era ayuweg neg.

Ko som’on ko rran ko re muruwel ney, kan taw’ath nag e stake romad nggu fil rogon rok boech e sensey nge tapowiy’ nib th’abi fel’ ko Galasia—pi pum’on boed e Elder Russel M. Nelson nge President Thomas S. Monson kar baed nga binaw romad. Pi machib rorad e boed e taw’ath ku tharmiy ni ke pii’ e athamgil u wun’mad. Chiney e ka bay e pi note nikug yoloey ko pi ngiyal’ nem. Pi Pum’on ney e kar bingedowechmad nggu nanged fan ko mange be yip fan ni nggu toey gil’ilingun Got ko ngiyal ni gidad be falag e mich rodad ma yibe gelnag e tabinaw. Kan aywegdad kad guyed nib tamilang uragon rayog nggu fol gad ko pi riyul’ ko gospel nge pi kenggin e yilen min gelnag tafen mad ko Galasia chirofen nem rodad. Ya pi tapowiy’ nib thothup e ke ayweg mad ngug guyed komang fan ko fare gospel, make kug tininged e kinggin romad ngalang mug murwel gad.

De’ n’uw napan ma kug nanged fan ni bay yo’or e tinni rayog nge rrin e stake presidency—ka yo’or, ma ere, kug nang fan ni fa’anra dab gu duwgliy rogon, sana dabi buch t’areb e n’en nib fel’. Kab yo’or e n’en ke ning e ayuw romad, ma ku muruwliy rogon min pag talin boech e n’en ni kan duwgliy ko pi Apostle romad. Bay yo’or e tin nib “fel” ni ngan rrin, machane gathi gubin be ga’fan.

Kud filed ban’en nib ga’fan: Mus ni bay boech e n’en nib fel’ rayog nggu rin, gathi be fel’ rogon gubin ngiyal’ nggu tal’ reb e n’en nib th’abi ga’fan nggu muruwliy ngay. Pi ngognol, nge mo’lung romad e ngari yaeni dugliy ko pi mang fan ko priesthood ma fa’an gathi banen nib mangil niybe finey nag e chiney. Ya ra danga’, ma rayog ni nge feek dad ko tin ni gdad ba cheg riy, me mo’waer nag dad, me feek dad nga fithik e pin’en ni baga’ ni gadad ma rrin’, thothup nge yafas, e dani bay u lukngun e tafagar.

Puwlageg ni pum’on, gadad manang nib t’uf e an’uy nib yul’yul’ ko pin’en ni gad ra muruwel ngay ngad gel niged e adag ku Got nge pi gidii’, ayweg e mabgol, gelnag e tabinaw, man toy fare gil’ilungun Got u fayleng. Boed e millay ni bay yo’or pa’pa’ngin nge yuwan, pi yafos rodad be t’uf ni ngad th’eth’aeb papa’ngin ni nge yog ni ngad mugu’uliyed e tin ni bay rodad ngad rined e tin kan duwgliy ngodad ni fa’dad—ni.ngan fek boch wa’amngin nib mangil”!¹

Gathi Go’ Gur Nga Biyang

Ere uragon nggu nang e tin nggu meleg? Kan duwgliy romad nggu mel’eged riy’. Machane, kan noeg ngodaed ni ngad filed fapi chep nib thothup nib fal’ rogon, man motoyil ko pi thin ko pi profet, man n’anggin ni nge mang e meybil nib rib michmich.

Puwalageg ni pumo’on, ma Got e ra yul’yul’ ngodad. Udakaen e Kan Thothup, Ra non ko tafney rodad nge gum’ircha’aendad e marunga’agen e tin ngad rin’ed ko gubin yang u lane yafos rodad.

Fa’anra bi’ech gum’iracha’ dad—fa’anra gad be gay e fla’ab rok Got nib gel gathi fla’ab rodad, fa’anra gad be rin’ e motochiyel Rok, fa’an gadad ra ar’ar’ ni ngad tawa’ath niged e yafos rok e tabinaw rodad nge kaboch e gidii’—De siyeg nagdad. Boed ke yoeg President Monson nib yo’or e yay, “Napan gad be muruwliy e n’en ke duwgliy Somoel, rayog ni ngad ninged e ayuw Rok.”²

Chitimangdad nu Tharmiy e ra “yaen u’mon p’owchem. [Ra] paer u ba’an ni pa’am nib mataw nge pa’am nib gilaey’, ma Kan Thothup [Rok] e ra paer u gum’ircha’med, ma pi angel [Rok] e ran upnguyem, ni ngar ayuwegem.”³

Gelngin ni Ngan Rrin’

Pi walageg, pi taw’ath u tharmiy nira yib ni bachan e murwel ko priesthood e ra buch u dakaen e yul’yul’ rodad, rogon ni gadad ma maligach, nge rogon e adag rodad ni ngan rrin e tin nib mataw banen. Gadad e ngad ngongoliyed ban’en, gathi ngan soen. Mangil ni ngan machib, machane pi thin ni darma fekey ko ngongol e boed e nifiy ni dariy’ e gowael riy’ fa raen ni darma n’ag e balel.

Ka bay napan gad be ngongoliy e pi machib ni ran ga’ nag e nifiy nib thothup ko gospel nira tugul nge fare gelngin fare priesthood nira pug e ya’el rodad.

Thomas Edison, cha’ ni ke fal’eg e bin som’on e lightbulb ni nge gael’, ke yoeg ni “dariy fan e tafney ku bee’ fa’anra dar ngongoliy fare tafney.” ⁴ Boed rogon, fapi machib ko gospel e be mangil napan gad be ngongoliy.

Dani fel’ fa’anra gad be tay e machib ko priesthood nga lan gum’ircha’dad ma dab da rin’ed. Fa’anra bay reb e mabgol fa reb e tabinaw nib t’uf ni ngan thapeg—sana bi rodad—dabda paged ni ngad son gad man sap boch. Arragon, de pinninged e magaer ngak Got ko fare tunom nifan e falfalaen nib mu’un e mich, kal’ngaen, n’agfaen, nge boch tabolngin nib biech. Ran murwel ko fapi machib ko priesthood ma gadad ra gaman ni ngad manged boch lengin, chitamngin, papa, nge pagal nifakey ni manang fan fare mangfan ko fare priesthood nge gelngin ni nge kol me chariy fal’ngin nge thothup ko tabinaw nib manemus.

General conference e be mangil ngiyal’ ni ngam motoyil min ngongoliy ban’en. “Dab mbanniged gimed ni kemus ni ngu’um motoyilgad ko thin; ya ngam muruwelgad ngay.” ⁵ Puwlageg, gube piningmed ni ngam lemnag e thin rok e pi tapigpig rok Got ko pi mo’lung ney min ragbug nga but’mag fith Got, ni chitmangdad nu Tharmiy ni nge bing wun’um me murnguy gum’ircha’em. Wenig Ngak Got ni nge powiy’ e yafos romed nge muruwel rom ko Galasia, ma ko magawon rom u biney e ningyal’. Mu fol ko pi kathkath ko Kan Thothup—dabmu pag ni dabmu rrin. Fa’anre gara rin’ e piney ni gubin, ma nggu micheg ni Somoel e dabi siyegem ni ngam paer ni yogo gur rom.

Athamgil ufithik e Gumaen’

Gadad manang ni dem turug e tafney rodad, re buch pi n’en kad duwgliyed e gathi gubin ngiyal nira buch ni amrogon. Gadad ma oloboech u lane yafos rodad nge muruwel rodad ko priesthood. Boch ngiyal’e gadad ra dol’ ma kagdad ma mul.

Napan Somoel e be fonow nagdad ni ngad “athamgil ufithik e gumaen’ mada ko ngiyal [kad] machalbog gad,” ⁶ Be yoeg ngodad nib t’uf boech e time nge muruwel rodad. Fa’anra gad ra nang fan e mang fan ko gospel nge mang fan ko priesthood ra yib ngodad e ayuw ni ngad guyed e bin nu tharmiy fan ni gubin. Me ir e ra pi e athamgil u laninuy nge gelingindad ni ngad rined e tin nib mataw banen, dariy’ fan nib mo’maw. Napan gad be tay u wun’dad e kengin e gospel, ran taw’ath nagdad ko tomilang, gonop mara pi kananwo ngodad min powiy’ e yafos rodad.

Gathi ngad muruwliyed e pi muruwel ney nib th’abi ga’?” ⁷ Arragon, gadad ra rin!

Kan Thothup e ra pow’iydad, ma gadad ra fil ko oloboch rodad. Fa’anra gadra dol’ gadad ra sak’iy ngalang. Fa’anra gadad ra mul, gadad ra athamgil bayay. Dabda waer gad; ma dabda tal’gad.

Gadad e pi pum’on ni walag nib gel ko priesthood rok Got, gadad ra sak’iy u ta’abang, poen u to’oben poen, ma gadad ra tay u wun’dad e pi tabolngin e gospel ku Yesus Kristus nikan sulweg min pigpig u fithik e magaer ngak Got nge pi gidii’ rodad niyib yul’yul’ mayib sug ko adag.

Ba Fas Got!

Pi walageg, gube micheg ngomed e di’ir ni Got ni Chitimangdad nge Fak, Yesus Kristus, e be fas. Yow be riyul’! Yow ba’!

Gathi kemus ni yigo gur. Chitimangdad nu Tharimy e ba’adag em ma ba’adag ni nge taw’ath nigem min tayem ngalang nib mataw.

Mu michaen’med ni Got e be non ngak e pi pum’on e daba’. Ra non ngomed!

Fare Profet Joseph Smith ke guy e tin ni ke yoeg nike gu’. Ni Fare Galasia Rok Yesus Kristus ni fan ko Gidii’ Rok ko Tin Tomur e Rran e kan sulweg nga fayleng udakaen gelingin nge matawon Got ni Gubin ma Rayog Rok.

Meybil rog e gadad e picha’ ni bay e priesthood rodad, gadad ra tay u wundad e tin nib mang fan ko muruwel ko priesthood man fanay e kenggin ko gospel nikan sulweg ni nge thiliyeg e yafos rodad nge yafos go picha’ ni gadad be pigpig ngay.

U napan gadad be ngongoliy e pin’ey, fare gelingin ko fare Bayul rok Yesus e ran thothup nag, bi’ech nag, min thiliyeg e pi ya’el nge pangiydad mra fal’egdad e gidii’ nike duwgliy Got. Gube micheg e pin’ey u dakean fithingan thothup Yesus Kristus nib thothup, amen.