Ayaw Pagbalhin!

Ni Elaine S. Dalton

Kinatibuk-ang Presidente sa Young Women

Barug nga lig-on. Magmakanunayon. “Pagbarug alang sa kamatuoran ug pagkamatarung.” Magbarug ingon nga saksi. Magmahimo nga sumbanan sa kalibutan. Barug sa balaan nga mga dapit.

Karong gabhiona nagbarug ko sa pulpito niining balaang dapit, sa presensya sa mga propeta, manalagna, ug tigpadayag ug sa halangdong mga anak nga babaye sa Dios. Usa ka talagsaong panahon nga maania sa yuta ug mahimong usa ka batan-ong babaye. Pinili kamo nga mga anak nga babaye sa atong Amahan sa Langit. Hinaut nga nabatyagan ninyo ang inyong pagkalahi ug unsa kamo ka mahal sa atong Amahan sa Langit. Nagmahal Siya sa matag usa kaninyo, ug ako usab.

Sa lamesa sa akong opisina, duna koy kinulit nga bronze nga replika sa usa ka batan-ong babaye nga ang ngalan si Kristina. Ang sama sa tawo nga gidak-ong kinulit nga si Kristina nagbarug sa pantalan sa Copenhagen, Denmark, gipahimutang nga nag-atubang sa dagat padulong sa Zion. Ang iyang desisyon nga magpasakop sa Simbahan ug mobiya sa iyang panimalay dili sayon, ug inyong makita ang hangin nga naghuros ngadto kaniya. Nagbarug siya nga lig-on, mihimo og lisud kaayo apan butang nga nahibaloan niya nga husto. Gibutang kini sa iyang mga kaliwatan didto sa pantalan isip pasidungog kang Kristina, kay ang iyang desisyon nianang adlawa dunay mahangturong kahulugan sa daghang henerasyon.

Alang nako ang kinulit nga si Kristina nagrepresentar sa matag usa kaninyo. Sama ni Kristina, nagbarug kamo sa ngilit sa daghang importanting desisyon ug paghimog inadlaw nga pagpili, ang uban niini lisud, nga naghulma dili lang sa inyong kaugmaon apan sa kapalaran sa mga henerasyon. Kamo usab gisugat og mga hangin sa oposisyon, kalisud, pagpamugos, ug moral nga kahugaw. Ug sa gihapon nagbarug kamong dili matarug ug nagsunod sa ebanghelyo bisan sa kusog nga bagyo sa atong katilingban. Sama ni Kristina, gigiyahan kamo sa Espiritu Santo. Naghimo kamo og hustong mga desisyon. Kamo maunungon, ug kamo halangdon.

Wala koy mahunahunaang tambag gikan sa mapinanggaong Langitnong Amahan kay sa Iyang pag-awhag sa matag usa kaninyo sa “pagbarug … sa balaan nga mga dapit ug ayaw pagbalhin.”¹ Siya nagaingon: Barug nga lig-on. Magmakanunayon.² “Pagbarug alang sa kamatuoran ug pagkamatarung.”³ Magbarug ingon nga saksi.⁴ Magmahimo nga sumbanan sa kalibutan. Barug sa balaan nga mga dapit. Ug busa ang akong mensahe kaninyo yano ra: Ayaw pagbalhin.

Una, ayaw pagbalhin sa pagpili og husto. Niining ulahing mga adlaw, walay gagmay nga desisyon. Ang mga pagpili nga inyong gipanghimo karon importante kaayo. Ang kabubut-on, o katakus sa pagpili, usa sa talagsaong mga gasa sa Dios sa Iyang mga anak. Kabahin kini sa plano sa kalipay nga gipili ninyo ug nako ug gipanalipdan sa atong premortal nga kinabuhi. Pagpakabuhi kamo sa paagi nga inyong mabatian ug madungog ang Espiritu Santo, ug motabang Siya kaninyo sa paghimo sa hustong mga desisyon. Gani, Siya “magtug-an kaninyo sa tanan nga mga butang nga inyong buhaton.”⁵

Mga semana nang milabay mibalik ko sa eskwelahan nako sa high school sa unang higayon. Mitambong ko og komperensya sa stake nga gipahigayon didto sa auditorium sa eskwelahan. Samtang naglakaw ko sa pasilyo sa eskwelahan, daghan ang mibalik sa akong panumduman. Akong gibati ang sama gayud nga pagbati dihang mieskwela ko sa batan-on pa—walay salig, walay siguro sa kaugalingon, maulawon, ug ganahan kaayong madawat sa uban. Miadto ko sa auditorium. Daghan na usab ang mibalik sa akong panumduman. Pamilyar nako ang tanan sa mao nga auditorium. Usa ra ang nausab—ako.

Nianang adlawa may oportunidad ko nga mobarug sa stage sama sa mga higayon kaniadto sa high school isip student officer. Gani nakita nako ang uban nakong klasmeyt diha sa nanambong—ang uban akong naka-date! Apan niining higayuna, imbis magpahigayon og assembly, pribilehiyo nako—didto sa auditorium—ang “pagbarug nga saksi”⁶ ug mopamatuod bahin sa atong Manluluwas, si Jesukristo.

Batan-ong mga babaye, siguroa nga ang inyong pakigrelasyon sa uban maingon nga 40 ka tuig gikan karon, dili kamo maulaw. Walay pagpamugos sa kaedad, walay pagdawat, walay popularidad ang makapaubos niini. Ang inyong impluwensya sa batan-ong mga lalaki makatabang nga sila magpabiling takus sa ilang priesthood, sa mga pakigsaad sa templo, ug pagmisyon. Ug kinsay nasayud? Kwarenta ka tuig gikan karon, dunay usa kanila ang moduol kaninyo, sa auditorium sa high school, ug magpasalamat sa inyong tabang nga nagpabilin silang takus sa pagtuman sa ilang katungdanan sa priesthood sa pagserbisyo og dungganong misyon. Ug kinsay nasayud? Basin makadawat mo og sulat gikan sa asawa sa usa nianang mga batan-on, magpasalamat kaninyo sa inyong impluwensya sa iyang bana ug sa umaabut nilang pamilya atol sa inyong mga adlaw sa high school. Ang inyong mga pagpili importante. Ang inyong mga pagpili karon dili lamang makaapekto ninyo, apan sa uban usab. Duna kini mahangturong kahulugan. Ayaw pagbalhin!

Ikaduha, ayaw pagbalhin sa inyong tinguha ug pasalig nga magpabiling mahiyason ug may sekswal nga kaputli. Pagmahiyason. Ang inyong personal nga kaputli usa sa inyong pinakatalagsaong tinubdan sa gahum. Sa pag-anhi ninyo sa yuta, gihatagan kamo og bililhong gasa nga lawas. Ang inyong lawas maoy instrumento sa inyong hunahuna ug balaang gasa diin magamit ang inyong kabubut-on. Kini ang gasa nga wala ni Satanas, ug mao nga iyang itumong ang tanan niyang pag-atake diha sa inyong lawas. Gusto niyang ibaliwala, dulaan, ug abusohan ang inyong lawas. Ang dili tarung nga sininaan, pornograpiya, imoralidad, tattoo ug pagpatusok, pag-abuso sa drugas, ug ang pagkaadik sa tanang matang maoy mga paningkamot aron maangkon kining bililhong gasa—ang inyong lawas—aron maglisud na mo sa paggamit sa inyong kabubut-on. Si Pablo nangutana, “Wala ba kamo masayud nga kamo templo sa Dios, ug ang Espiritu sa Dios nagapuyo diha sa sulod ninyo?”⁷

Ang inyong lawas usa ka templo. Ngano? Kay kini dunay katakus nga papuy-on dili lang ang mahangturon ninyong espiritu apan ang mahangturong espiritu usab sa uban nga moanhi sa yuta nga kabahin sa inyong mahangturong pamilya. Si Elder Dallin H. Oaks mitudlo, “Ang gahum sa paghimo og kinabuhi [usa ka] mahimayaon nga gahum.”⁸ Ang inyong tahas usa ka mahimayaon nga tahas. Gisaligan kamo sa Dios og sagradong tahas! Nangandam kamo nga mahimong mga inahan sa umaabut nga henerasyon. Ipabilin ang pagkaputli ug pagkatakus sa kaugalingon, ug ampingi ang “labing mahal ug bililhon labaw sa tanan”—ang inyong hiyas ug kaputli.⁹ Ang maalamong tambag sa Langitnong Amahan kaninyo, Iyang pinili nga mga anak nga babaye, mao ang “paglakaw … sa mga agianan nga maligdong.”¹⁰

Ang hiyas mao ang bulawanong yawe sa templo. Busa, ang ikatulo, ayaw pagbalhin sa pagkatakus sa paghimo ug pagtuman sa sagradong mga pakigsaad. Ang pakigsaad nga inyong gihimo sa bunyag mogiya kaninyo sa dalan sa hiyas ug kalipay samtang bag-uhon ninyo kini matag semana sa pag-ambit sa sakrament. Sa pagtuman ninyo sa inyong pakigsaad sa bunyag, makita nga lahi kamo, lahi og sininaan, ug lahi og linihukan kay sa kalibutan. Sa pagtuman niini nga pakigsaad magiyahan kamo sa Espiritu Santo. Barug sa balaan nga mga dapit, ug ayaw pagpaduol niadto nga palibut o musika, media, o asosasyon nga makawagtang sa pakig-uban sa Espiritu Santo.¹¹ Ug sa pagtuman ninyo sa inyong mga pakigsaad, magpabilin kamong takus ug maandam sa pagsulod sa balaang mga templo sa Ginoo.

Katapusan, ayaw pagbalhin sa inyong pag-ila sa Pag-ula sa Manluluwas. Ang Pag-ula para kaninyo ug kanako. Gahum kini nga makapalihok ug makatubos. Kon gibati ninyong dili takus sa pagbarug sa balaan nga mga dapit, ayaw na dugangi og laing adlaw ang pagpas-an niini. Sa mortalidad, kitang tanan masayop. Hunahunaa nga ang Manluluwas nahigugma kaninyo nga gihimo Niyang posible nga kamo mag-usab ug maghinulsol kon kamo masayop. Si Satanas dili gustong motuo mo nga mahimo kamong mag-usab.¹² Mangumbinser siya nga kamo wala nay mahimo. Usa kana ka bakak. Makabalik kamo. Makahinulsol kamo. Mahimo kamong putli ug balaan tungod sa mahangturong Pag-ula sa Manluluwas.

Karon tapuson ko kini uban sa labing talagsaong sugilanon sa gugma nga nasaysay sukad. Tingali mangutana mo, “Unsay labut sa sugilanon sa gugma sa pagbarug sa balaan nga mga dapit?” Duna kini labut sa pagbarug sa balaan nga mga dapit. Sugilanon kini sa usa ka batan-ong babaye nga si Rebeca.¹³

Sa sugilanon, gisangunan ni Abraham ang iyang sulugoon sa pagpangita og takus nga batan-ong babaye aron maasawa ni Isaac. Usa ka babaye nga angayan sa kaminyoon sa pakigsaad—mahiyason ug putli ug takus. Busa iyang gipadala ang iyang sulugoon sa layo ug kuyaw nga biyahe ngadto sa Haran. Ang rason sa pag-adto klaro—ang balaang mga lalaki nagkinahanglan og balaang mga babaye nga ilang ikapares. Dihang miabut ang sulugoon sa siyudad sa Nachor, mihunong siya sa may atabay sa pagpainom sa iyang mga camello ug nag-ampo nga giyahan siya sa hustong batan-ong babaye ug mailhan niya kini pinaagi sa pagtanyag og tubig para niya ug sa iyang 10 ka camello. Nakasakay na ko og camello, ug nahibalo ko—ang camello moinom og daghan nga tubig!

Sa Genesis atong mabasa nga si Rebeca wala lang moadto sa atabay sa pagkuha og tubig, apan siya “nagdali,”¹⁴ sa pagbuhat niini. Gibutangan dayon sa sulugoon og mga pulseras ug alahas si Rebeca ug nangutana kon duna bay kwarto sa balay sa iyang amahan nga iyang kapahulayan. Sigurado kong nakatabang ang alahas! Mabasa sa kasulatan, “Ug ang dalaga midalagan ug nagpahibalo kanila sa balay sa iyang inahan sumala niining mga pulonga.”¹⁵ Runner tingali ni si Rebeca!

Ang sulugoon misulti sa pamilya ni Rebeca sa tuyo sa taas niyang panaw, ug si Rebeca miuyon nga maasawa ni Isaac. Ang sulugoon gustong mobiya pagka-ugma kuyog ni Rebeca, apan mihangyo ang iyang pamilya nga magpabilin siya og bisan 10 lang ka adlaw. Dayon gipangutana nila si Rebeca unsay iyang gusto, ug yano ang iyang tubag “mouban ako.”¹⁶ Pamilyar ba kadto nga tubag niadtong liboan nga determinadong mitubag og, “ako moadto; ako mobuhat”¹⁷ dihang ang atong propeta, si Presidente Thomas S. Monson, mipahibalo nga ang batan-ong mga lalaki ug babaye makamisyon na sa mas bata nga edad?

Karon ang moral ug katapusan niining sugilanon sa gugma: Si Rebeca andam ug takus sa paghimo ug pagtuman sa sagradong mga pakigsaad ug maasawa sa pakigsaad ni Isaac. Wala siya maghulat ug nangamdam sa kaugalingon. Sa wala pa siya mobiya sa iyang pamilya, gihatagan siya og panalangin, ug ang mga pulong makapadasig kanako, kay gisaaran siya nga “mainahan sa linibolibo.”¹⁸ Apan ang pinakanindot nga bahin niining sugilanon sa gugma mao ang unang panagkita ni Rebeca ug Isaac. Wala kini hisguti sa Biblia, apan nagtuo ko nga kadto gugma sa unang panagkita! Kay “ang hiyas mohigugma sa hiyas; [ug] ang kahayag mounong ngadto sa kahayag.”¹⁹ Dihang miadto si Isaac aron sa pagpakigkita sa nangabut, si Rebeca “mikanaug sa [iyang] camello.”²⁰ Ug dayon nag-ingon kini, “Ug siya [Rebeca] gihigugma niya.”²¹ Nakatuaw ko niini!

Alang kang Rebeca ug kang Kristina, ang pagbarug sa balaan nga mga dapit dili sayon. Ang dili pagbalhin dili sayon. Kusog ang huros sa hangin, ang tubig sa atabay bug-at, ug ang pagbiya gikan sa ilang panimalay ug kanhi kinabuhi siguradong lisud. Apan mihimo sila og hustong mga pagpili. Gigiyahan sila sa Espiritu Santo. Sila mga mahiyason, ug giandam ang ilang kaugalingon sa paghimo ug pagtuman sa sagradong mga pakigsaad. Ang Manluluwas nagagikan sa kaliwatan ni Rebeca. Nahibalo kaha siya niadtong higayuna nga mahitabo kini? Wala! Ang inyo bang mga pagpili karon importante? Oo!

Mga batan-ong babaye, ang mga henerasyon mag-agad sa inyong mga pagpili, kaputli, ug katakus sa kinabuhi. Ayaw pagbalhin. May talagsaon kamong kapalaran. Kini ang inyong panahon! Motuo gyud ko nga ang mahiyasong batan-ong babaye, giniyahan sa Espiritu, makausab sa kalibutan!

Mopamatuod ko nga ang Manluluwas buhi! Siya inyong ikauban. Siya motabang kaninyo. Ug sa lisud nga panahon, ang Iyang “mga anghel [ma]anaa libut kaninyo, aron sa pagtabang kaninyo.”²² Sa pangalan ni Jesukristo, amen.