Ang Inyong Talagsaong Biyahe sa Pagpauli

Abril 2013

2:3

Ang Inyong Talagsaong Biyahe sa Pagpauli

Ni Presidente Dieter F. Uchtdorf

Ikaduhang Magtatambag sa Unang Kapangulohan

Samtang malipayon kamong mogamit sa mapa nga gihatag sa inyong mapinanggaong Amahan alang sa inyong biyahe, mogiya kini kaninyo sa balaan nga mga dapit ug inyong makab-ot ang inyong langitnong potensyal.

Atong dungog karong gabhiona nga makauban si Presidente Thomas S. Monson, ang atong minahal nga propeta. President, kanunay kaming nag-ampo alang nimo.

Minahal kong mga sister, salamat sa musika ug sa pulong nga gipamulong. Ang tanan makapadasig ug haum para sa Pasko sa Pagkabanhaw, ang sagradong panahon nga atong gisaulog karong semanaha.

Malipayon ko nga makauban kamo batan-ong mga sister, uban sa inyong mga inahan ug sa inyong talagsaong mga lider. Masanagon ang inyong espiritu ug makatakud nga pahiyom. Sa tinuod ang Ginoo mahunahunaon ug mapinanggaong nagtan-aw kaninyo gikan sa langit.

Nagtubo ko sa Zwickau, kanhiay East Germany. Sa nag-edad ko og 11, gipaubos ang akong papa sa grabeng pagsukit-sukit sa pagsupak sa politika, ug gibati sa akong mga ginikanan nga ang pag-ikyas ra ngadto sa West Germany ang pinakaluwas nga paagi alang sa among pamilya. Nahukman nga ang pinakaluwas nga paagi mao ang pagbiya nga dili magdungan ug moagi sa managlahing rota ngadto sa West, biyaan ang tanan namong kabtangan.

Kay si papa ang namiligro kaayo, mibiyahe dayon siya, agi sa Berlin. Ang akong mga magulang nga lalaki miagi sa north, ug ang tanan nakaabut ra sa west. Ang akong igsoong babaye—nga susama ninyo og pangidaron karon—kauban ni Helga Fassmann, iyang magtutudlo sa Young Women, ug ang uban pa misakay og train nga miagi og kadiyot sa teritoryo sa West Germany. Nagbayad sila og usa ka porter aron mopakanaog kanila, ug dihang milatas ang train sa utlanan sa West Germany, nanglayat sila sa nagdagan nga train ngadto sa kagawasan. Gidayeg nako ang akong igsoong babaye sa iyang kaisug.

Ako ang kinamanghuran, ug mihukom ang akong mama nga among baktason ang kabungturan nga nag-uwang sa duha ka nasud. Nahinumdom ko nga nagputos siya og paniudto nga daw paingon mi og hiking o piknik ngadto sa kabungturan.

Nanakay mi og train ngadto sa pinakalayo ug dayon naglakaw sulod sa daghang oras, mas napaduol sa utlanan sa West Germany. Hugot ang pagbantay didto sa mga utlanan, apan duna mi mapa ug nahibalo sa oras ug dapit diin luwas kaming makatabok. Akong nakita ang kabalaka sa akong mama. Hilabihan ang iyang pagbantay sa palibut nga walay nagsunod kanamo. Sa matag lakang, ang iyang mga tiil ug tuhod ingon og nagkaluya. Gitabangan nako siya pagpas-an sa bag nga may pagkaon, importanting mga dokumento, litrato sa pamilya samtang nagtungas sa katapusang taas nga bungtod. Sa iyang hunahuna, siguradong nakatabok na mi sa utlanan. Dihang gibati niya nga luwas na mi, namungko mi ug nangaon sa among pang-piknik nga paniudto. Sa unang higayon nianang adlawa, sigurado ko, nakaginhawa siya og luag.

Apan may nakita ming timailhan sa utlanan. Layo pa diay kaayo! Nagpiknik mi sa sayop nga bahin sa utlanan. Naa pa gihapon mi sa East Germany!

Ang mga gwardya posibling mangabut bisan kanus-a!

Mabalak-ong giputos ni mama ang among pagkaon, ug nagdali mi sa pagtungas sa kilid sa bungtod kutob sa mahimo. Ning higayuna naningkamot mi nga dili mohunong hangtud makasiguro nga miabut na mi sa pikas bahin sa utlanan.

Bisan og managlahi ang giagian sa among pamilya ug nakasinati ug managlahi kaayong kalisdanan sa among biyahe, sa katapusan kaming tanan nakaabut nga luwas. Sa katapusan nagkapundok ra mi og balik isip pamilya. Pagkanindot niana nga adlaw!

Mga Sugilanon sa Pagbiyahe

Ang akong gipakigbahin kaninyo usa ka kasinatian sa kinabuhi nga para nako bililhon kaayo nga biyahe. Karon makahinumdom ko sa akong kinabuhi ug nahibalo sa pipila niana nga “mga biyahe” nga akong naagian. Dili tanang biyahe maglakip sa pagtabok sa kabungturan o mga utlanang politikal; ang uban kabahin sa pagbuntog sa mga pagsulay o sa espirituhanong paglambo. Apan tanan kini mga biyahe. Nagtuo ako nga ang kinabuhi usa ka indibidwal nga “mga sugilanon sa pagbiyahe.”

Sigurado ko nga nahibalo mo nga tanang tradisyong kultural buhong sa mga sugilanon sa pagbiyahe. Sama pananglit, tingali pamilyar mo sa biyahe ni Dorothy ug sa iyang iro, si Toto, sa The Wizard of Oz. Si Dorothy ug Toto gipadpad sa kusog nga alimpulos ug mihagsa sa Yuta sa Oz. Didto, si Dorothy nakakita og dalan nga yellow-brick nga nagtimaan sa biyahe nga sa katapusan naghatud kaniya nga makapauli.

Dayon sa Charles Dickens’s Ebenezer Scrooge, kansang biyahe wala maghatud kaniya sa mga dapit apan gikan sa panahon ngadto sa laing panahon. Biyahe kini gikan sa kaugalingon niyang kasingkasing nga naghatag kaniya og panabut nganong naingon siya niini ug unsay mahitabo kaniya kon magpadayon siya iyang dalan sa kahakog ug ka-ingrato.¹

Usa sa bantugang klasikal nga mga nobela sa Chinese literature mao ang Journey to the West. Gisulat sa ika-16 nga siglo, nindot kini nga sugilanon sa relihiyusong biyahe sa pari kinsa, sa tabang sa upat ka mahigalaong tawo, mibiyahe hangtud nalamdagan.

Ug siyempre anaa si Bilbo Baggins, ang gamay, mapaubsanong hobbit nga mas gipalabi pa niyang magpuyo ra sa balay ug mokaon sa iyang sabaw. Apan human sa tuktok sa iyang pultahan, mituman siya sa tawag nga adtoon ang mga dapit nga wala pa niya maadto ug migawas sa kalibutan, uban sa usa ka wizard ug sa pundok sa mga duwende, aron pagtuman sa kuyaw apan importante kaayong misyon.²

Universal nga Sugilanon

Dili ba kita ganahan niining mga sugilanon sa pagbiyahe kay atong makita ang atong kaugalingon diha sa mga tigbiyahe? Ang ilang kalampusan ug kapakyasan makatabang sa atong pagpadayon sa kinabuhi. Ang video nga atong nakita ganiha lang kabahin sa sugilanon sa nindot nga biyahe. Tingali nagpahinumdom sab ni kanato sa sugilanon sa biyahe nga pamilyar natong tanan—diin tanan kita dunay importanting papel.

Nagsugod kining sugilanon dugay na kaayo, kaniadto sa wala pa ang yuta magsugod sa pagtuyok subay sa orbit, ang adlaw wala pa magsugod sa pagdapat sa iyang kainit ngadto sa bugnaw nga kawanangan, ang mga nilalang nga gagmay ug dagko wala pa maanhi sa atong planeta. Sa sinugdanan niining sugilanon, nagpuyo kamo sa layo, nindot nga dapit.

Wala kita masayud sa daghang detalye sa kinabuhi didto sa premortal nga kahimtang, apan may diyutay kitang nahibaloan. Ang atong Langitnong Amahan mipadayag nato kon si kinsa Siya, kinsa kita, ug unsa ang atong makab-ot.

Sa premortal nga kinabuhi, nahibalo mo nga tinuod gayud nga dunay Dios kay kamo nakakita ug nakadungog Kaniya. Nakaila kamo ni Jesukristo, kinsa mamahimong Kordero sa Dios. Kamo dunay hugot nga pagtuo Kaniya. Apan nahibalo mo nga ang inyong kapalaran mao nga dili mopuyo sa seguridad sa inyong premortal nga panimalay. Bisan ganahan kaayo mo sa maong dapit, kahibalo mo nga kinahanglan mo nga moapil sa pagbiyahe. Mobiya kamo sa presensya sa inyong Amahan, moagi sa tabil sa kalimot, makadawat og mortal nga lawas, ug magkat-on ug magsinati og mga butang nga makatabang kaninyong molambo aron mahisama sa inyong Amahan sa Langit ug makabalik sa Iyang presensya.

Nianang sagradong dapit, nga gilibutan sa inyong mga kaila ug hinigugma, tingali ang dakong pangutana sa inyong ba-ba ug kasingkasing mao “Luwas ba kong makabalik sa akong langitnong panimalay?”

Daghan kaayong butang nga dili ninyo makontrolar. Lisud ang mortal nga kinabuhi, puno sa wala dahumang mga liko-liko nga dalan: sakit, kasubo, aksidente, kasungian.

Bisan wala ang inyong panumduman sa miaging kinabuhi—bisan dili mahinumdom nga kaniadto kauban ninyo ang Amahan sa Langit—makaila ba gihapon mo sa Iyang tingog bisan sa kaalingugngog ug mga pagbalda sa mortal nga kinabuhi?

Ang biyahe sa unahan ingon og taas kaayo ug walay kasiguroan—puno sa risgo.

Dili kini sayon, apan nasayud mo nga angay kini sa tanang paningkamot.

Busa, naa mo nagbarug sa ngilit sa kahangturan, naglantaw uban sa dili matukib nga kadasig ug paglaum—apan, naghunahuna ko, uban usab sa kasubo ug kahadlok.

Sa katapusan, nahibalo mo nga makiangayon ang Dios—nga magmadaugon ang Iyang kamaayo. Nakaapil kamo sa dakong konseho sa langit ug nahibalo nga ang inyong Manluluwas ug Manunubos, si Jesukristo, mohatag og paagi nga kamo malimpyohan sa sala ug maluwas gikan sa pisikal nga kamatayon. May hugot kamong pagtuo, nga sa katapusan, magmalipayon mo ug mosinggit uban sa langitnong chorus sa pagdayeg sa Iyang balaang ngalan.

Busa, miginhawa mo og lawom …

Ug gitas-an ang inyong lakang …

Ug nia na kamo!

Kamo, matag usa kaninyo, mihimo sa kaugalingon ninyong biyahe balik sa inyong langitnong panimalay!

Ang Inyong Mapa

Karon nga nia na mo sa yuta, tingali mas maayo nga mangutana sa kaugalingon kon kumusta na ang inyong biyahe. Naa pa ba mo sa hustong dalan? Naglambo ba mo sa pagkahimong tawo nga giplano nga kamo mamahimo ug maoy gustong mahimo? Naghimo ba mo og mga pagpili nga makatabang kaninyo nga makabalik sa Amahan sa Langit?

Wala kamo Niya ipadala niini nga biyahe alang sa walay tumong nga panaw sa kaugalingon. Gusto Niya nga makapauli mo ngadto Kaniya. Siya mihatag ninyo og mapinanggaong ginikanan ug matinud-anong mga lider sa Simbahan, uban sa mapa nga naghulagway sa dalan ug pag-ila sa mga peligro; nagtultol asa makit-i ang kalinaw ug kalipay ug motabang sa inyong paningkamot sa pagpauli.

Karon, asa man ninyo makita kini nga mapa?

Diha sa sagradong mga kasulatan.
Diha sa mga pulong sa mga propeta ug mga apostoles.
Ug pinaagi sa personal nga pagpadayag gikan sa Espiritu Santo.

Kini nga mapa mao ang ebanghelyo ni Jesukristo, ang maayong balita, makalipay nga dalan sa disipulo ni Kristo. Mga sugo kini ug ehemplo nga gihatag kanato sa atong Manlalaban ug Tiggiya, kinsa nahibalo sa dalan tungod kay Siya mao ang dalan.³

Dayag lang, ang pagbaton og mapa walay ikatabang kaninyo gawas kon tun-an ninyo kini—gawas kon gamiton ninyo kini sa inyong panaw sa kinabuhi. Dapiton ko kamo nga himoong prayoridad ang pagtuon ug paggamit sa pulong sa Dios. Ablihi ang inyong kasingkasing ngadto sa Espiritu Santo aron Siya makagiya sa inyong biyahe sa kinabuhi.

Ang inyong mapa puno sa makapadasig ug mapuslanong mensahe gikan sa inyong Langitnong Amahan ug sa Iyang Anak nga si Jesukristo. Karon gusto kong mopakigbahin kaninyo sa tulo niana nga mensahe nga makatabang ninyong molampus sa biyahe pauli sa inyong langitnong panimalay.

Ang unang mensahe: “Ayaw kahadlok, kay Ako ang Ginoo anaa uban kaninyo.”⁴

Wala kamo mag-inusara niini nga biyahe. Ang inyong Langitnong Amahan nakaila kaninyo. Bisan kon walay nakabati kaninyo, Siya nakabati kaninyo. Kon nagmaya kamo sa pagkamatarung, Siya nagmaya uban kaninyo. Kon nabug-atan kamo sa pagsulay, Siya nagsubo uban kaninyo.

Ang interes sa Langitnong Amahan wala mag-agad unsa mo ka kwartahan o katahum o kahimsog o kamaalamon. Nagtan-aw Siya ninyo dili sama sa pagtan-aw sa kalibutan kaninyo; nagtan-aw Siya kon si kinsa gayud kamo. Siya nagatan-aw sa kasingkasing.⁵ Ug nahigugma Siya kaninyo⁶ kay kamo Iyang anak.

Minahal nga mga sister, pangitaa Siya, ug Siya inyong hingkaplagan.⁷

Mosaad ko kaninyo, wala mo mag-inusara.

Gahini og panahon karon dayon ug tan-awa ang mga tawo sa inyong palibut. Ang uban tingali inyong mga lider, mga higala, o mga sakop sa pamilya. Ang uban tingali karon pa ninyo mahimamat. Bisan pa man niana, ang tanan nga inyong nakita sa palibut—dinhi sa miting o bisan sa laing dapit, karon o sa bisan unsang panahon—mga maisugon didto sa premortal nga kinabuhi. Kanang mapaubsanon ug ordinaryong tan-awon nga tawo sa inyong tapad tingali usa sa talagsaong tawo nga inyong gimahal ug gidayeg didto sa kalibutan sa espiritu. Tingali kamo mismo mga maayong ehemplo!

Usa ka butang nga inyong masiguro: ang matag tawo nga inyong nakita—bisan unsay kaliwatan, relihiyon, gituohang politikal, pamarug, o panagway—kapamilya. Ang batan-ong babaye nga inyong gitan-aw pareho ra og Langitnong Amahan sama kaninyo, ug siya mibiya sa mapinanggaon Niyang presensya sama ninyo, mahinamong mianhi aron ugma damlag makabalik Kaniya.

Hinoon, tingali bation niya nga nag-inusara, sama ninyo usahay. Gani usahay tingali makalimot siya sa katuyoan sa iyang biyahe. Palihug pahinumdumi siya pinaagi sa inyong mga pulong ug mga lihok nga siya wala mag-inusara. Ania kita dinhi aron magtinabangay.

Malisud ang kinabuhi, ug makagahi kini sa kasingkasing sa punto nga ang mga tawo lisud nang tabangan. Ang uban tingali puno sa kayugot. Ang uban mobiay-biay niadtong nagtuo sa mapinanggaong Dios. Apan hunahunaa kini: bisan og sila wala kahinumdom, sila usab kaniadto nangandoy nga makabalik sa ilang Amahan sa Langit.

Dili inyong responsibilidad ang pagkabig ni bisan kinsa. Trabaho kana sa Espiritu Santo. Ang inyong buluhaton mao ang pagpakigbahin sa inyong gituohan ug dili mahadlok. Higalaa ang tanan, apan ayaw ipaubos ang inyong sumbanan. Barugi ang inyong mga konbiksyon ug pagtuo. Barug nga mapasigarbuhon, kay kamo anak sa Dios, ug Siya nagbarug uban kaninyo.

Ang ikaduhang mensahe: “Maghigugmaay kamo ang usa sa usa, sama sa akong paghigugma kaninyo.”⁸

Nakahunahuna ba mo unsa ang atong pinulongan dihang nagpuyo kita sa presensya sa Dios? Lig-on ang akong suspetsa nga German, bisan nagtuo kong walay usa nga nahibalo. Apan nahibalo ko nga sa premortal natong kinabuhi nakahibalo kita, gikan sa Amahan sa atong mga espiritu, sa universal nga pinulongan—usa nga may gahum sa pagbuntog sa emosyonal, pisikal, ug espirituhanong mga babag.

Kana nga pinulongan mao ang tiunay nga gugma ni Jesukristo.

Mao kana ang pinakagamhanang pinulongan sa kalibutan.

Ang gugma ni Kristo dili pakaaron-ingnon nga gugma. Dili kini gugma diha sa greeting-card. Dili kini matang sa gugma nga gidayeg diha sa popular nga musika ug sa mga salida.

Kini nga gugma makahimo og tinuod nga kausaban sa kinaiya. Makawagtang kini sa kasuko ug kasina. Makaayo kini sa kapungot ug makapalong sa kayugot. Makahimo kini og mga milagro.

Atong nadawat ang atong “unang mga leksyon”⁹ niini nga pinulongan sa gugma isip mga espiritu didto sa presensya sa Dios, ug dinhi may mga oportunidad kita sa pagpraktis ug pagkahimong batid niini. Mahibalo kamo kon kamo nakakat-on niining pinulongan sa gugma pinaagi sa pagtimbang-timbang kon unsay nagdasig sa inyong hunahuna ug buhat.

Kon ang inyong hunahuna naka-focus kon sa unsang paagi nga ang mga butang makaayo ninyo, hinakog ug mabaw ra ang inyong mga pagdasig. Dili kana ang pinulongan nga angay ninyong makat-unan.

Apan kon ang inyong hunahuna ug kinaiya naka-focus sa pagserbisyo sa Dios ug sa uban—kon tinuoray mong nagtinguha sa pagpanalangin ug pagbayaw niadtong naglibut ninyo—nan ang gahum sa tiunay nga gugma ni Kristo magalihok sa inyong kasingkasing ug kinabuhi. Kana ang pinulongan nga angay ninyong makat-unan.

Kon mahanas na kamo niini nga pinulongan ug gamiton kini ngadto sa uban, makamatikod sila nga adunay lahi kaninyo nga makapahigmata kanila sa dugay nang natago nga pagbati sa pagpangita sa hustong dalan sa biyahe pauli sa ilang langitnong panimalay. Total, ang pinulongan sa gugma mao usab ang ilang tinuod nga pinulongan.

Kining lawom ug nagauban nga impluwensya usa ka pinulongan nga modulot gayud sa kalag. Pinulongan kini sa panabut, pinulongan sa pagserbisyo, pinulongan sa pagbayaw ug pagmaya ug paghupay.

Kat-uni ang paggamit sa universal nga pinulongan sa gugma ni Kristo.

Ug ang ikatulong mensahe: “Paglipay.”¹⁰

Usahay mahutdan kita sa pailub kon asa na kita sa atong biyahe, dili ba? Kon kamo 12 anyos, mangandoy mo nga unta 14 na. Pagka-14, mangandoy mo nga unta 18 na. Ug pagka-18, usahay mangandoy mo nga unta 12 na usab ug makasugod og balik.

Kanunay nga dunay butang nga ikareklamo—mga butang nga ingon og dili husto. Makagahin kamo sa inyong mga adlaw nga mobati sa kasubo, pag-inusara, wala masabti, o gisalikway. Apan dili kana ang biyahe nga inyong gipangandoy, ug dili kana ang biyahe nga gusto sa Langitnong Amahan nga inyong masinati. Hinumdumi, kamo mga anak gayud sa Dios!

Tungod niini, dapiton ko kamo sa paglakaw nga masaligon ug malipayon. Oo, ang dalan may mga sagabal ug liko-liko ug gani mga peligro. Apan ayaw kini tan-awa. Pangitaa ang kalipay nga giandam sa inyong Amahan sa Langit para ninyo sa matag lakang sa inyong biyahe. Ang kalipay mao ang destinasyon, apan kini usab ang dalan. Ang “kalinaw niini nga kalibutan, ug kinabuhi nga dayon diha sa kalibutan nga umaabut” maoy Iyang gisaad.¹¹ Mao nga misugo Siya kanato sa “paglipay.”

Minahal nga mga sister, batan-ong mga babaye sa Simbahan, batan-ong mga higala, isip Apostol sa Ginoo akong ibilin kaninyo ang panalangin nga kamo makakaplag sa dalan niini nga biyahe sa pagpauli ug kamo mahimong inspirasyon sa inyong isigka tigbiyahe. Ako usab kining saad ug pag-ampo nga kon motahud ug magmatinuoron kamo sa mga pakigsaad, mga baruganan, ug mga mithi sa ebanghelyo ni Jesukristo, sa katapusan sa inyong biyahe tua ang Langitnong Amahan. Mogakus Siya kaninyo, ug mahibalo kamo nga inyong nahimo ang luwas nga pagbiyahe pauli. Sa pangalan ni Jesukristo, amen.