19:19

Anineg e Tagil’

Rok President Dieter F. Uchtdorf

Bin L’agruw i Counselor ko Somm’on e Presidency

Gube adag ninge pii’ anigeg e tagil’ … nira ayuwegdad ningad nanged e muruwel rodad ulane e kanawo’ nib manemus rok Got ma rayog rodad ko e priesthood.

Pi walageg nge fagaer rog nib t’uf, be sug gumircha’eg ko magaer nge falfaen’ nggu un ngomed. Gu liyor nag gimed pi chitamangiy nge tuwtuw ni kam feked pi fak rom nge fak e bitir romed ngara’. Gu falflaen’ug ko pi pagal ni kar mel’egned ni ngar un ngomad daba’. Ireray e tafen nib fel ni ngam baed ngay’. Gu athapeg ni ram thamiy e fel’ yathin ni be m’ag dad, ma gu meybil ni ara’, nu fithik pi walagem, ram pirieg e ayuw, gelingin, nge fagaer.

Boech ngiyal’ gadad ni pum’on be pii’ bee’ e tagil’. Ma boech i dad bay yo’or e tagil’, ma yaed be weliy fan ban’en marunga’agmaed. Sasun, boech e tagil’ me weliy fan e muruwel rodad ko tabinaw, boed pagael, walagen, figirngey, nge chitamang. Ma yug boech e weliy fan e muruwel rodad ko fayleng, boed e togta, salthaw, fa cha’ ni fal’eg. Ma boech be weliy fan e muruwel rodad u Galasia.

Gu ba’adag di’ir nggu gog tafney rog ko aningeg e tagil’ gu lemnag ma yaen ko gubin e cha’ nibe koel e priesthood ulongob e fayleng—tagil’ ni ran ayuwegdad nggu nangfan muruwliydad u tunom rok Got nge gin rodad u Fare Galasia ku Yesus Kristus ni fan Gidii’en Got Rok’ ko Tin Tomur e Rran.

Fak Chitimangiy nu Tharmiy

Reb e tagil’ ni me weliy fan dad nib ga’ fan riy’’ e fak Chitimangiy nu Tharimy. Dem turug ko yug tin gad be rin’ fa tafedad yad be paer riy’, dabda pag talin ni riy’ul’ gadad nge ya’el rodad e pifak’ Got. Gad pifak Rok u’mon kug uthmed riy’ nga fayleng, ma amrogon gadad pifak Rok nu manechubog. Re tin riy’ul’ ney ma thiliyeg ke uragon ngad lemniged marnga’agdad, pi walegdad nib mo’on nge ppin, nge yafos.

Machane, dabda mugu’uliyed urngin e muruwel kan duwgliy riy’’, “ya ke denen urngin e girdi’ nike mich Kristus u wun’rad.”¹

Ma bingyal’ ma yib e kirebaen’ ni ngan nang mang e be yip fan ni gur e fak Got me dam mugu’uliy riy’’. Fare mo’oniyaen’ be ba’adag pi thaemthaem ney. Mo’oniyaen’ ba’adag ni ngam weliy fan yafos rom udakaen pi denen rom ma gathi dakaen e tamilang ni bay rom. Dam motoyil ngak.

Gadad gubin kug guyed e bitir fil rogon e maen nga but. Be maen buchuw nge waer. Be mul nga but’. Gad be tolul ngak? Dangay. Ya kam di’in ni papa’ ke gechig nag e bitir ni bachan ke dol’? Gadad be ayuweg, oeg e falflan’, nge cheag nag, ni bachan rok urngin e yay, fa bitir be mang boed e gallabthir rok.

Ma ere chiney, pi walageg, fa’anre gad be ta’areb nagdaed ngak Got, ram gu’ ni gadad be ta’abrogon ko titi’ ni ke dol’. Machane Chitimangdad nu Tharimy ba’adag ni ngad manged boed Ir, ma pi walageg, ku amrogon pi athap rodad. Ma nang fan Got ni dani taw gad ngay chiney nib papay, machane udakaen tin ba’chig’chig reb e yay ngo reb e yay.

De mich’ u wun’ug ni Got ke fal’eg pi motochiyel mus ni nge sap ngodad nge soen ko ngiyal’’ gad be’ mul ni nge gechig nagdad. Be michu wun’ug ni Chitimangdad nu Tharmiy e bee’ nib bugol nibe wurengaen’ ngodad ma be falflan’ nap’an gad be gay rogon nggu baed ngak. Me nap’an gad be dol’, be yoeg dabda kirebaen’—dabda yoer fa miil rok yafos rodad—machane nggu gelbugwaen, pirieg e michaen’, min gay rogon bayay.

Chitimangdad nu Tharimy be matangiy pifak Rok ma bayo’or e yay ma l’oeg e ayuw nu tharimy ni dani guy bee’ ngak picha’ min fol ngak Somoel.

Gachalpen ku Yesus Kristus

Ren’ey be powi’iydad nga bin magid e tagil’ ni bay rodad gubin: gubin ni gay rogon nib yul’yul’ ni ngar fol Kristus e fapi gachalpen Rok. Mus ni gadad be nang dari bee’ ufithik dad nib machalbog, dabda sap ko ren’ey min lich nag e motochiyel rodad, ni ngad pired u tangin e pi taw’ath rodad, ni ngad sasagal e kalngan’ dad, fa ni ngad siyeg e mon’og ni ngad manged gidii’ nib yul’yul’ ko Somoel rodad.

Mu tiyan’um ni Fare Galasia ku Yesus Kristus ni fan ko Gidii’en Got Rok ko Tin Tomur e Rran ney e kan fal’eg, gathi ni fan ko pum’on nge ppin— ni machalbog dariy’ e lumel ko fayleng—machane kan fal’eg ni fan gidii’ boed e gur nge gag. Kan toey nga dakaen e malang ku Tabayul rodad, ni Somoel Yesus Kristus,² ni udakaen e Bayul rok ra maluk e denen rodad ma gad ra manged “girdi’en e tabinaw rok Got.”³

Fa’anre dariy’ e Bayul ku Yesus Kristus, dariy’ fan e yafos rodad, ya dariy’ e athap fa n’en ni ngam sap nga m’on ngay’. Bachan ba’ fare Atonement, be ga’ fan e yafos, ya I’ir e milikag rodad ni ngad mon’og nge fal’eg rogdad ni fan e yafos rok Chitimangdad.

Ma ere bachan fare Bayul e kan duwgliy ni ngan ayuweg dad manged boed Kristus, e de fan ni nge tay ngodad ta’areb rogon. Boech ngiyal’’ gad be lemnag pangiy nib thil rogon e denen. Ma bingyal’ gad be lemniged fa’anre bay bee’ nib thil romad, cha’nem e dani fel’ u waen’ Got. Pangiy ney be pag boech ni ngar lemniged ni Galasia ba’adag ni nge thiliyeg gubin e gidii ni ngar mang ta’a bee’—ni gubin e gidii’ thingari mang t’ab rogon u ya’an, thamiy, tafney, nge ngongol rorad. Ren’ey e gathi amrogon yalen Got, ni’ir ke sunmiy gubin e pum’on nib thil rogon ko walagen, gubin e pagael nib thil rogon chitimang. Ma pi walagen nib twin yow be thil u tafney nge yalen nib thothup rorow.

Ma be tha’ab yalen nge fan ko fare Galasia ku Yesus Kristus, ni be liyor nag nge matangiy e puf matawon ko me’leg ku bee’—nge urngin e tin ni be yaen riy’—ko urngin e bitir ku Got. Gadad gubin ni gachalpen ku Yesus Kristus, e kan m’ag nga ta’abang u michaen’ dad ko gospel ni kan sulweg nga chilan rogon nge yul’yul’ rodad nggu fol e motochiyel ku Got. Machane gad be thil u yalen, tafagaer, nge mel’eg ko am rodad.

Fare Galasia be mon’og nap’an gadad be pag pi yalen rodad nib thil ni nge ayuweg dad muruwliyed e tin nib cheag rodad min ayuweg nge gel nag reb e gachalpen rodad.

Pi walageg, yalen e gachalpen e boed rogon e milekag ko gubin e yafos rom ni ngam lek Somoel. Nga dakaen e milikag roamed bay yo’or e lumelaen’ rodad ni ngad digey e kanawo’ rodad. Bingyal’ re mang boed i kanawo’ b’tuf bo’or e tin ni dariy’’ rodad. Machane gadad ni pi pum’on ko priesthood thingariy’ bay e pangiy nib madang’dang’ nggu fole Tabayul rodad, ma un ko pi ngiyal’ nap’an pi sikeng rodad be gel’.

Nu fithik gubin e bang ko milikag rodad ni ngu fol gad e Fak ku Got, ra sulaen’dad ni dowriy’ manged gidii’ nib machalbog. Machane aygi yul’yul’ gad. Dabda tal’eg. Aygi koel chilen pi m’ag rodad. Ayigi sap gaed nga Taayuw nge Tabayul roadad nap’an gad dared ngak, bayil’ nib achig nge bayil’ nib achig.

Tagol nag e Ya’el

Pi walag, fa’anre ngad fol gad Somoel rodad ni Yesus Kristus, thingarda athapeg reb e tagil’: tagol nag e ya’el. Gadad ni kan yibliy nag nggu koel e priesthood ku Got e kan pinning nggu “gol nag min ayuweg bee’.”⁴

Be muruwliydad nggu toey, fal’eg, gel nag, chibiy ngalang, nge ayuweg. Muruwliy rodad e ngan leked e rungin ku Somoel min ayuweg picha’ nib gafgow. Gadad be “kirbaen’med ngak’ e pi’in nibe kirbaen’ … arragon, mi gimed fal’eg laniyaen’ e pi’in nib t’uf rok’ ni ngan fal’eg laniyaen’.”⁵Gadbe taflay niged e m’ad’ad rok picha’ nib t’uf. Gad be “ayuweg picha’ nib waer, chibiy ngalang pi pa’ay ni kan mul, min gel nag pi aye nib mo’owaer.”⁶

Muruwel e home teacher e ngan gol nag. Gadad ni tapowi’iy ko priesthood e tagol nag. Pi chitimang, pagael, walagen, figirning e thingary mang e cha’ ni tagol nag nib yul’yul’. U reb e pa’ gad be fek e kahol ko oil kan yibliy nag ni ngan taw’ath nag gidii’ nib ma’er, u reb e flowa ni ngan ayuweg picha’ nib bilig; ma nga lan gumircha’dad gad be feked e thin ku Got, “ni be gol nag e ya’el ni mad’ad.”⁷

Ireray e bin ga’fan e muruwel kan duwgliy ngak picha’ nibe koel e priesthood—ma be yaen ngak picha’ ni bay Aaronic fa Melchizedek Priesthood riy’. Fare gospel ku Yesus Kristus ni kan sulweg ma taw’ath nag e yafos nap’an gad be michaen’ ngay’—ma ku amrogon nap’an gad be fol riy’’. Ni’ir nap’an gad be ngongoliy pin’en kan machib nag ku gospel ni pi tabinaw nib t’uf ran athapeg ayuw nge gelingin. Be taw’ath nge muruwel rodad nggu oge e thin min ngongoliy riy’’.

Somoel ma ngongoliy pi ma’ang’ang. I’ir e Tagol nag nib ga’. I’ir e rungidad, e tamilang rodad, ma ku nu fithik e talimar, Ma be dag ngodad e kanawo’ nib mataw.

Aygi fol gad Ir. Aygi sakiy gad ngalang min ngongoliy e muruwel kan duwgliy ngodad ngad gol nag min ayuweg Got nge gidii’.

Cha’ nibe Yib nag Yafos nu Manemus

Bin aningeg e tagil’ ni bay rodad be sulaen’dad ko bin somm’on. Ni gadad pi pagael rok Chitimangdad nu Tharimy, borran ran athapeg gubin ni bay Rok’.

“Fare Kan Nthothup rok Got e ir e be micheg nga lanin’dad ni gadad pifak Got:

“Ere f’anra kad manged pifak, mrayag ngodad e fla’ab nike tay ni fan ko girdi’ rok, ma kagdad ra un ngak Kristus ngad fanayed e tin ke tay Got ni fen; ya fa’anre gadad be un ko gafgow nit ay Kristus, ma ka gadad ra un ko fla’ab rok.”⁸

Mu lemniged riy’’, pi walageg. Gadad be un ngak Kristus ni t’ab rogon!

Ma ere, mang fan ni bo’or e gidii’ be pired u lane pi rran rorad, be lemniged riy’’, ma be pii’ e salpiy rorad, nge gelningdad ni ngar athapeg e fla’ab fa tagil’ nu fayleng, fa ni ngar gosgos nag ko bin bi’ech e electronics?

Somoel ke pii’ ngodad e micheg ni machalbog ni enra bee’ nib yul’yul’ ni nge athapeg l’agruw e priesthood ney, nge be mugu’uliy e calling rorad, ran athapeg neg, ni ga’ar Somoel; ma enra athapeg neg ran athapeg Chitimag; ere gubin ni by rok Chitimag e ran athapeg nag.⁹

Dabiyog nggu lemnag marunga’agen urngin e tin ni bay yib ko re micheg ney. Machane gu ma nang ni’ir rib ga’, nu tharmiy, ma athamgil ko manemus, ma be fel’ ko urngin e tin ko yafos rodad.

Bachan gadad ma nang e pin’ey, urrogon ni dubdad ningad faflaen’ ngad ayuweged Somoel nge gidii’ nib falflan’ rogon min mugu’uliy e muruwel rodad ufithik e priesthood rok Got?

Ireray e bin ga’ fan e muruwel ni ran sikeng nag e tin rayog rodad. Ba’adag ni ngad guy e mab nu tharimy bing ngodad min thammiy e thin ko Kan Thothup powi’iydad e kanawo’ rodad? Ma ere ngad tabab gad e muruwel—min ngongoliyed e tiney nib fel’ tiney e muruwel nib ga’ rodad!

Nap’an gadad be pigpig nag Got nge pi gidii’ rodad, ra sikeng nagdad min thiliyegdad nga cha’ nib fel’ ni de yoeg nggu lemniged ngay.

Sana gabe lemnag ni dam t’uf.Ni pi tapowi’iy rom dani sap ngom fa dani t’uf rom, ni gur de ga’fan.

Gu oge siroek nib ga’ fa’anre bay cha’ nibe koel e priesthood nibe thamiy amrogon. Ya gur ri t’uf mab ga’fan ngak Chitimangdad nu Tharimy. Ma nggu gog ngon nib riy’ul’ ni gabe t’uf rok Galasia.

Dam nang ni “Got ke mel’eg e tin nib michiyang ko re fayleng ni nge [balyangan’] e tin gonop; ma Got ke mel’eg e tin nib waer ko fayleng ni nge [gel nag] e tin ni rib gel”?¹⁰

Sana be riy’ul’ ni gad be waer. Sana dabda ri gonop fab gel. Machane nap’an Got be muruwliy u dakaen dad, dariy’ bee’ fa ban’en ni rayog ni nge gel nagdad riy’.¹¹

Aram fan gabe t’uf. Ga bay e muruwel ni de yoeg reb bee’ ni ngan rin’, ma Got ku rayog ni nge ga’ nag e muruwel rom nib fel’ rogon. Pi tin ni gabe chaeg ngay e de yib mus ni ko muruwel rom u Galasia. Ya bay yo’or e rogon ni rayog ni ngam pigpig nag. Fa’anre gabe soen ni ngam muruwliy, Gu ning em ningam un ko muruwel riy’’.

Dam soen ni fan ko chilen e muruwel nib ga’ u’mon ni ngam muruwliy nib gel ni ngam toey e gil’ilingun Got. Fa’anre ni bay e priesthood rom, kam pinning ni ngam muruwily ngay. Mu fil rogon e thin ku Got u gubin e rran, meybil ngak Chitimangdad nu Tharimy gubin e rran, min lemnag ko pi kengin e gospel kan sulweg nga chilen rogon, oge e magaer ngak Got, min ning ayuw Rok. Ma aram mu fol tin ni gabe nang riy’’, somm’on ko tabinaew rom nge nga langin gubin e bayang ko yafos rom.

Ulangin e tang ku fare Composer nib ga’, bay e bang kan duwgliy rom—bayang ni b’tuf ni ngam gon’ riy’’. Fa’anre dam gon’ e bang rom, ra ul’ul’ re tang. Machane fa’anre mu un ko re tang nem min pag fare gelingin ku Got ni nge muruwliy udakaenem, gara gu’ e “winda ku tharmiy” kam bing, ma ran “pu’og nga dakanem e taw’ath, ni dariy’ gil’ ni ngam athapeg urngin.” ¹² Mu sakiy ngalang min muruwliy e tin kan duwgliy rom ni gur fak Got, ma ku rayog ni ngam mang e gelngin mat’aw u langin e tabinaw rom, na’un, nam, am, nge ku amrogon e fayleng.

Ma ko re muruwel ney, nap’an mu “malog e yafos [rom]” ulangin e pigpig ngak bee,¹³ ram mon’og min ga’ nag ni ngam “boded mam’ ungun Kristus.”¹⁴ Finey ram fal’eg rogom ni ngam athapeg, ni t’ab rogon Kristus, urgin e tin ni bay ko Chitimam.

Gabe T’uf rok Got

Pi walageg, gimed be ga’fan. Gimed be t’uf. Gimed be t’uf nib gel’. Be riy’ul’ e muruwel ney. Fare priesthood ni taw’ath ni bay rom nriy’ul e tin ku Got.

Gu meybil ni nap’an mu lemnag ku pi tagil’ ni bay ko cha’ nibe koel e priesthood, ni ram pirieg e ayuw rok Somoel ni bay rom, ni be chibiyem ngalang ni ngam athapeg e tin kan fal’eg rom Chitimangdad nu Tharimy. Gu tay re taw’ath ney nga dakaenem ma pii’em e mich rog u fithingan ku Yesus Kristus, amen.