11:14

Fare Tathapeg e Ba’adag ni nge N’agfan

Rok Elder Craig A. Cardon

Ko fare Ulung ko Medlip I Ragag

En Somoel ba’adagdad ma ba’adag ningad nang fan e Laniyaen’ ni nge n’agfan.

Napan Somoel rodad ke machib nga dakaen e fayleng bo’or e gidii’ kar leked, ma un ngay pi scribe nge Pharisee, “nrabad u urngin e binaw ni bay u lan yu Galile ngu Judea, … nu Jerusalem.” ¹ Bay e pum’on nib m’aer nga dakaen e bet rok ni ba’adag ni nge gol ma kan fek nga ulung nib ga’, machane de yoeg ne nge chugur nga Somoel, ya pi fagaer rok kar feked ir nga dakaen e chigiy mar tayed I’r nga but’ nga chugur. Ni ke guy e michaen’rad, ma nrogon nib ga’fan ni de nang bee’ riy’, Somoel ke yoeg, “Fagaer rog, ke m’ayfan e denen rom.” ²

Gu lemnag ke gin’ riy fare pum’on—ma mus ni ga’ar pi babyor thothup marnga’agen pangin riy’, sana ke lemnag: “Mang? Denen rog ke m’ayfan? Dam gu’ ni kug nguchruy nga but’ nga dakaen e bet rog? Aram fan kug gub. Wenig, mu gol nigeg riy!” F’anre bagdad Ir, sana gu lemniged amrogon.

Ke nang Somoel ni kay yo’or e gidii’ kar leked ni bachan pi m’ang’ang nib ga’ rok. Yak e thiliyeg e raen nga wayin;³ tuluf pi ya’el nib malik;⁴ gol nag pagael rok bee’ nib gelbugwan,⁵ bee’ nib leper,⁶, nina ku ppin rok Peter,⁷ ma yug bo’or.⁸

Machane ko re pum’on ney, Somoel ke mel’eg ni nge dag ngak gachalpen nge cha’ ni iyooran ni kan duwgliy Ir ni nge mang e Tathapeg ku fayleng. Napan kar rungaged e thin ku Somoel, pi scribe nge Pharisee kar tanonon gad nga ta’abang, mar rogned e thin ni kireb nge yoeg ni mus Got e rayog ni nge m’ayfan e denen. Ke nang e lem rorad Somoel, me yoeg ngorad ni ga’ar:

“Mang fan ni wad rogon u gumircha’em?

“Fa’anra ba mom, ni ngan yog ni, Kan n’agfan e denen rom; fa ngan ga’ar, Mu sakiy ngam yan?”⁹

Dani son nag e fulweg rorad, fare Tathapeg e tabab ni ga’ar: “Machane ni fan ni ngam nanged ni fare Fak e gidii’ ea bay gelngin u daken e fayleng ni nge n’agfan e denen. [Ke chal ko fare pum’on ni de yoeg e maen] Gube yog ngom, Mu sakiy, mufek e chiya rom, ngam man nga lane naun rom.”¹⁰ Me rrin’!

Rok e bineye ma’ang’ang ko golnag e dagur, e fare Tathapeg ea beyog ngak gubin ni buch rorad nge gadad e riyul ko tin thothup banen nib gel gelngin: fare Fak e Gidii’ e ma n’agfan e denen!

Tin riyul ney ea yima tay fan rok gubin e tin nib michuwan’rad ngay, nen ni gathi rib mom ni ma yog ea bin nib gaa’fan nib riyul niyow nga tabang: fare Tathepeg ea ma n’agfan e denen “u daken e fayleng,” ma gathi kemus ni bin Thi’ibi Tomur e Yarmeg. Ir e darma dariyfan nag e thin ko pi denen rodad.¹¹ Ire darma pagdad ngad suloed ko denen rodad nike thimur.¹² Machane napan ni gadad ra kalngaen’ ma gadad fol ko pi gospel Rok, ra n’agfan rodad.¹³

U lane biney e n’agfan e gadad ra gu’ gelngin fare Bayul nima pi e kanawo’ ma bayuliyey fa’anra yibe fanay nib mangil. Niybe murwel nga daken e mich rok fare Somoel Yesus Kristus, fare gelngin fare Bayul Rok ea ma gelnagdad u napan nike t’uf rodad, ¹⁴ nge gelngin nima bayuliy dad ea ma thothupeg nagdad u napan ni gidad ra chuweg fare gidii’ u fayleng,”¹⁵ Ren’ey e ma fek ea athap ngak e gidii’, ri arragon ko picha’ niyad be thamiy ni mo’owaer nima buch ko gidii’ ea dabkiyog ea ayuw ku Tathapeg ni nge aywegrad.

Tamilangeg nag e lowan’ rodad,¹⁶ Peter ea fith biyay ko uw urngin yay ni susun ni ngad n’agfan rok walagen nge mu’ me fith, “Nga taw ko medlip yay?” Susun nira gamaen. Machane fulweg taban rok Tathapeg e bing wo’en ni ngad nanged fan gumirchaen’ Rok nib murnguy: Dagur yog ngom ni, nga taw ko medlip yay, napan e medlip ma bay medlip.” ¹⁷

Fare Somoel e gadad ba t’uf rok ma ba’adag ni ngad nanged fan ea pagaen’ Rok ni nge n’agfan. Ba pag lagruwi ragag yay u lan fare Doctrine and Covenants, niyog Somoel ngak e picha’an nibe non ngorad nike n’agfan e denen rorad,” fa boch e thin nib taborgon ngay.¹⁸ Ma napan ba balay yay ni buch ni, fapi thin rok Somoel ea bayip’fan ngak fare Profet Joseph Smith, boch ngiyal ea yibe yog ngak ni yogo’ir, boch ngiyal e yad bee’.¹⁹ Tin som’mon ko tineye kan record nag u lane 1830, bin ni tomur e lane 1843. Ere, napan bukum e duw, fare Somoel ea beyog ngak Joseph ni yugbe sul’ u daken nibe n’agfan e denen rok.

Mus ni Joseph e dariy ea denen rok nib gaa’ fa rib gel e tagan riy,”²⁰mangil ni ngad ted’u wun’dad ni rib buch’uw ni pag, fare nem ku Somoel ni “medlip ma bay medlip” ea darma taleg ea n’agfan ni bayan u rogon fana kireb fare denen.

Napan nibe non ngak e pi elder nikar mukun gad nga Kirtland, fare Somoel e yog ni ba’adag ni ngar mon’og gad u fayleng; ere ireram fan nira runguy rad.” ²¹Fare Somoel ea manang e tin ni gadad ba mo’waer riy nge tin nib kireb nrayib ko “fare faileng” nga daken ea pum’on nge bpin ni dani machalbog.²² Fare bugithin ni ireram fan u lane bineye verse ea micheg Rok ni kemus nra yib ko murnguy Rok ni rayog ni ngad mon’og gad u fayleng.” Uw rogon nibe m’ug era murnguy ney? Ma pi elders ney ea Ir e yog ngorad nike n’agfan e denen rorad.” ²³Somoel e ba’adag ni nge n’agfan.

Dariy bee’ ni nge lemnag ni ngeyib e n’agfan ni dariy e kalngaen’. Arragon, fare Somoel e keyog ni Ir, fare Somoel, e ma n’agfan e denen ko picha’en niyad ma pogofay nag e denen rorad Ngak me ninge n’agfan, me mu’ me yog banen nib t’uf fa’anra dawuri denen gad ngayan i taw ko ngiyal nike nangin bee’ ni nge gafgow ko yael rok nike yim’.²⁴ Ma napan ni fare Somoel dabiyog ni nge sap ko denen ni nge fel’ u wan’,”²⁵ machane Ir e beyog rogon nib thil’thil’ rogon boch e denen. Beyog ni dariy e n’agfan nifan e togopluw ngak fare Kan ni Thothup.”²⁶ Meyog fan fana kireb ea thang ko pogofan ku bee’²⁷ ma yog rogon ni rib kireb ea denen ko tin tagan banen niwad e darngal.²⁸ Ma fa’anra yibe sul u daken niybe rrin ea denen ko tin tagan banen ma arame ra momaw rogon ni ngayog e n’agfan Rok.²⁹ Ma keyog ni gidii’ nira denen nib togopluw ko fare magael nib tolang ea ra fek e bin nib tolang e gechig.”³⁰Machane, u fithik e murnguy Rok, Ke pag ni ngan mangil I yan ko bin ni ngeyog ni ngan machalbog ko chingiyal nam. Ka arragon nibay ba ulungi denen nike yib ko mo’waer ko yafos, ya urngin napan ni gidad ra kalngaen’uy man gay e n’agfan Rok, ma Ir era n’agfan, biyay nge biyay.³¹

Machane bachan e biney, gidad gubin, ka arragon e picha’ niyad be magawon ni ngar gel ngak e pi ngongol nike macham niwad I fana’ banen nib kireb ko dagur fa kachido ni ya’an e tin tagan nge kaboch nge picha nib tu’uf rorad, e rayog ni ngar nanged ni fare Somoel e ra poy e athamgil nib mat’aw rodad mara n’agfan rodad u fithik e t’ufeg rok u napan nikan mu’ ko kalngaen’, “Ngayan I taw ko medlipi ragag ma bay medlip.”Machane gathi fan e ren’ey ni ngad suled ko denen ni dariy e gechig riy.³²

Fare Somoel e gubin ngiyal ni ba’adag ni nge nangfan gumirchaen’dad,³³ ma tin niybe susun nag ko mich ni de riyul’ ea darma yilow’eg ea denen.³⁴ U lane bineye dispensation fare Somoel ea yog ngak reb e tapigpig rok ni nge kol ayuw ko pi susun nam ni yog ni susun ni nge tamra’ ko fare ulung ku Nicolaitane nge gubin e denen rorad nib mith.”³⁵ Fapi Nicolaitans e reb I guruy I taliw niyad mayog nibay mat’awnginrad ni ngar ngongoliyed e denen ko tin tagan banen niyib ko fare garathia rok Somoel.³⁶ Ren’ey e dani mangil ngak Somoel.³⁷ Fare murnguy rok nge garathia rok e gathi be n’ag e kireb u daken dad u napan ni dar sug gumirchaen’dad nge ngiyal ni danir fol ko tin riyul’, machane yibe falfalaen u fithik e kireb.”³⁸ Machane, napan ni gidad ra rrin u urngin ni rayog rodad,³⁹ murnguy nge garathia e kemus rogon “ni rayan I bangiyal”⁴⁰Gadad ra monog u daken e fayleng u rogon gelngin fare bayul. Ra ngam gay e tawa’ath, tin nib momaw ea ra [mom ngodad],”⁴¹ ma gelngin Rok, ea gadad be muruwliy ea tin dabiyog ni ngad rined fa’anra yogo’gidad.

Fare Somoel ea ma sap ko fare tomilang nibay rodad,⁴² fapi ar’ar’ u gumirchaen’dad,⁴³ nge ngongol rodad,⁴⁴ ma napan ni gadad ra kalngaen’ man gay e n’agfan Rok, ma Ir e ra n’agfan. Napan ni gidad ra lemnog e yafos rodad nge yafos ko piin nib t’uf rodad nge tin ni gidad be mada’nag, ma susun ni ta’ab rogon ni gadad ra n’agfan rodad nge kaboch e gidii’.⁴⁵

Machib nag e Gospel Rog e beyog rogon nib momaew in ngan gel ko pi pangiy nikan macham ngay mabe nangin e tiyugang ko priesthood nge chonggin e galasia ni ngar “gathi kemus nikan gin ngay ya ka arragon ni nge mul’aen’rad” fa’anra tabab e pi investigators fa boch chonggin ni ngar magawongad ko tineye kireb. Machane, kan fil ngodad ni ngad “daged nib michuwan’dad ni rayog rorad ma dab ’um pufthin nagrad … [rin ngak] ea banen ra paer ni gubin ngiyal niyma nangfan nibe kol rad nga tomur.”⁴⁶ Rayog ni ngad rined nib le’ech u tabang ko pifakdad nge gothon e gidii’ nikar gafgow gad ko magawon nib ta’borgon, nikar chuwgad ko kanawo ko tin mataw’ banen ni gathi gubin ngiyal nima paer? Ya arragon yabe t’uf e dugil u but’, gumaen’, nge t’ufeg rodad ni fan ngorad—ma ka arragon, e n’agfan rodad.

U lane general conference ko October ni tomur, ea fil President Monson ni:

“Susun ni ngad lemniged ni rayog ni nge thil e gidii. Rayog ni ngar digeyed ea ngongol nib kireb. Rayog ni ngar kalngaen’rad ko pi denen.…

“… Rayog ni ngad ayuwgad ko pinen niyad be mo’waer riy. Ma susun ni ngad fal’aged rogdad ni ngad guyed ni gathi wad rogon nima guy e fayleng niybe dag machane rogon nira mang.”⁴⁷

U napan reb e mo’ulung ko fare Galasia u tom’mon, e yog fare Somoel ngak chonggin:

Guyog ngomed, ni gimed bbi’ech, machane gathi gimed gubin, …

“Ya gubin e gidii ea ba kireb ngog. …

“…Ya bay bochi giyad ba tagan u pa’owcheg, machane nggu runguy ea tin nib momaew romed. ”⁴⁸

Mulwol Rok ea ku taborgon e daba’.

Fare Tathapeg e manang e tin nibe buch rom, ma gadad gubin ma denen “ni dar gaman gad ko pi rir rok Got”⁴⁹ biyay nge biyay. Ir e manang e tin nib momaew ko gidii’ nga rogon ni nge ayuweg e tin nibe lumel.⁵⁰ Mafil ni ngad meybil gad nga dabda denen gad.”⁵¹Kan yog ni ngan meybil ngak nifan e runguy, ya Ir e ba gel’ni nge ayuw.”⁵² Ke tay chilen ngodad ni ngad kalngaen’dad⁵³ ma ngan n’agfan.⁵⁴ Ma dariyfan ni dani mom e kalngaen’, ya gadad ra gay rogon u lan gumircha’dad ni ngan fol ko gospel Rok, Be pi’ e michmicheg ney: Beyog ngodad, ni dariy fan rogon e denen romed, ya basug ko murnguy nifan ngomed. Dabi n’agmed; ma napan e rran ko domomuw e ra pug’ngan ko murnguy.””⁵⁵Fare tathapeg e ba’adag ni nge n’agfan.

Gubin e week ma Fare Mormon Tabernacle Choir ea ma tabab nag ea broadcst rorad ko boch e thin nima chibiyey ngalang ko hymn rok William W. Phelps “Gently Raise the Sacred Strain.” Ma ba thil rogon ko fapi thin ko bin ni anngeg e verse:

Thothup, ba thothup fare Somoel.
Bfel’, nib bfel’ e thin rok: …
Mu Kalngaen’um mag fos;
Dariy fan nike rowrow e denen rom,
O, mu kalngaen’um, mara n’agfan rom.56

Gube pinning em ningam pug erran mag michaen’ num ngak fapi thin ke yoeg Somoel ningam ngongoliy e mich Ngak mag kalngaen’um.⁵⁷ Gab t’uf rok. Ba adag ni nge n’agfan. Gube micheg u daken fithingan nib thothup rok Yesus Kristus, amen.