Gadad Ba Ta’areb
Rok President Henry B. Eyring
Bin Somm’on e Counselor ulane Bin Somm’on e Presidency
Gube meybil ni u demturug ni bay med ma demturug e muruwel rom ulane priesthood rok Got, gadadra ta’arebgad ulane muruwel ningad feked fare gospel nga urngin e fayleng.
U somm’on ke weliy’ Somoel nap’an ke tabab e bin tomur e dispensation ney nib t’uf ningad feked’ fare gospel nga gubin e nam u fayleng. Thin ni Ke yoeg ngak boech e mo’on ko prieshood u 1831 Irba yoeg bayay e chiney. Demturug e yangrem, rayog rom, calling u Galasia, fa nam rom, kan pinningdad ningad muruwelgad mag ayuweged Ngak u togbey Rok ko ya’el mada’ ko Wub bayay. Ke yog ngak fa bin somm’on e taayuw u milay’:
Ke motochiyel ngak fapi bin somm’on e taayuw ko milay’—urngin e elder, priest, teacher, nge chongin—ningar ta’babgad u gelngin mar muruwelgad ko paa’ ninge taermedliy ma mugu’ul urngin e tin ni Ke motochiyelnog.
Ke motochiyelnograed ni e machib roraed ra mang e laman ko koel chiya’ u fithik e sobutaen’, urngin e pi’in nib bugul yoror rok.
Me Ke motochiyel nograed ningar chuwgad ko gidii’ nib kireb; ma thapraed; nge tin nib t’uf e gidii’ nima koel e tin ku Somoel thingari machaelboeg.1
Chiney, i gimed chongin fare Aaronic Priesthood ram nang fare motochiyel ku Somoel ba marunga’med. Bachan gamedba nang ni en Somoel ra bing wo’en ningam mugu’ul urngin e motochiyel Rok, rayog ningam athapeg ni Ira rin’ ta’abrogon ngom.
Pii’ mat’awag ninge weliy’ ngomed urreogon Ke rin’ ko reb e pagal nibay chiney ba koel e tagil’ ko priest u Aaronic Priesthood. Ba 16 e duw rok. Irma paer ulane nam ni ke yib fapi missionary ngak kemus ta’areb e duw kafram. Kan pii’raed nga la’agruw e donguch, machane gathi donguch nima paer fare pagal riy’.
Nap’an nikab bitir, labthir rok kar fekew nga Utah ninge matangiy. Kan fil ngak fare tabinaew mar tawfe nigew ko fapi missionary. Dawori tawfe ngak ulane fare Galasia bachane dawori ilal ko muruk e duw rok.
Kan lii’ ngar ma’ew gali labthir rok ko ba mad’ad ni buch’. Ere e titaw rok ke fek ninge sul nga tabinaew rok, nib palog ko dai, nga ta’abrogon e donguch ni ke gargalen riy’.
Ke yaen ufithik e kanawo’ u March kemus ta’areb e duw u fram nap’an ke thamiy nib t’uf ninge non ngak e ppin ni de nang. Ke non ngak u boechi thin nu Merikan ke pugerran. Irra e nurse ko fare mission president ni ke pii’ ngak e donguch rok ninge piryeg’ e na’un nge medical ayuw ko fapi missionary nira fini baed aram. Pagal nem nge ppin kar mangew fagar nap’an kar sabethingow. Nap’an ke sul nga mission headquarters, ke non ngak fapi missionary marunga’agen.
Fare gali elder nikar tawgow ko September ko 2012. Fare pagal ni dariy e labthir rok ni ke mang e bin somm’on e tawfe rorow ulane fare Galasia ku Yesus Kristus ni fan Gidii’en Got ko tin Tomur e Rran. Napan e March ko biney e duw ke mang chongin ko aningeg e pul. Kan yibliy me mang e priest ko fare Aaronic Priesthood ere rayog ninge tawfe ko bin la’agruw e chongin ko Galasia. I’ir bin somm’on e tamilekag ko priesthood ninge pinning ma kunuy boch e bitir ku Got ni Chitamangdad nu Tharmiy ngak ninge yarmiy fare Galasia ulane donguch ni bay 130,000 e gidii’ riy’.
Nap’an e Madnom ko Easter, March 31, 2013, numba e Chongin aram ke mon’og nga nel’ ulane re donguch nem. I’ir kemus e chongin nima un ko mo’olung ko Madnom. Ke dol’ ma amith bugun fabinem e rran machane, gel laniyaen’ ninge yaen aram. Ke meybil ma fith ninge yaen u but nga galasia. Ke pii’ fare sacrament ko reb i anigneg e elder ni fel’ yangraed nge e missionary couple.
Chepin ney dani ya’an ma’ang’ang richey ningam nang fan e yalen paa’ Got ninge toey e Gil’lungun Rok. Kug gu’ bo’or e yay.
Kug guy u New Mexico nap’an ba fel’ yangreg. Ko bo’or e mfen fapi profet kar noned ngodad thingari ayuweged fapi missionary ningar piriyeged mar filed ngak gidii’en nib riyul’ u gum’racha’raed ma ba’adag e gidii’ nira yib nga fare gil’lungun.
Kug guy e tin ko tiyugang’ nib michaen’ nge chongin ra rin’. U 1955 Kug mang e officer ulane fare United States Air Force. Bishop rog u tabinaew rog ke pii’ e taw’ath ngog ou’mon kug chuw nga bin somm’on e station rog, ni bay u Albuquerque, New Mexico.
U taw’ath rok ke yoeg e ngiyal’ rog ulane air force ra mang e pigpig ko missionary. Kug taw u galasia nap’an e bin somm’on e Madnom u Albuquerque First Branch. Keb e mo’on ngog, me yoeg i’ir fare district president, me yoeg irra pinningeg ningu pigpig ni reb e district missionary.
Kug fulweg ni bay Gu paer aram kemus ko boechi week ni ngug train nge mu’ bay Gu waen nga reb e nam ufayleng. Ke yoeg, “Dagunang marunga’gen e pinn’em, machane bay gu pinningem ngam pigpig. Nap’an e fil rog ko salthaw, sana kaygi buch machane, ke Pinnineg ufithik bo’or e officer ba fil aram ninge fek loen ko reb officer ke yim.
Ere, ko la’agruw e duw Kug paer aram, Kug muruwel u office rog. Nap’an e thig e yal’ ma nap’an e weekend Kug fil fare gospel ku Yesus Kristus ngak e gidii’ fapi chongin ke loeg ngodad.
Gamow i companion nge Gag ma gay 40 awa u ta’areb e pul ko pigpig ko missionary ma dabkug tugtugew ko ta’areb e maab ningu piryeg e bee’ ningad filew ngak. Fapi chongin e kar pii’ed bo’or e gidii’ ngomow ni bay la’agruw e tabinaew ngad mada’nogew urngin e thig e yal’. Kug guy fare gelngin nge taw’ath ulane fare pinning ke yoeg fapi profet ngak urngin e chongin mar manged e missionary.
U bin tomur e Madnom ou’mon kug chuw ko Albuquerqueke yarmiy fare bin somm’on e stake ulane re donguch nem. Chiney bay e temple nib thothup urom, e na’un rok en Somoel, ulane city ni kug mo’olungaed u chapel ko e Gidii’en Got ni kar feked fapi fagar rok ngodad ningar filed ma thamiyed e m’ag ku Ya’el. Kar thamiyed e tabinaew ulane fare Galasia nib riyul’ rok en Somoel.
Kug guy bin migid u New England nap’an Kug waen nga school. Ke pinningeg ningu mang counselor ko e district president ni ga’ ni kafram i’ir bee’ kireb laniyaen’ ko Galasia maki mang e mo’on nibay ga’ gel’ngin ya’el rok. Fapi home teacher rok ba’adag ngadakaen ir ma dabkar moninggow ko cigar rok makar guyew tin Got ma guy ufithik. Fare district president nge Gag kug warow u karo ufithik e burey nge dapil’ay ningu mada’nog urngin e chi branch ni bay u Massachusetts nge Rhode Island ningu toeyed mug taw’athnogew fare gil’lungun ku Got.
Nap’an pi duw Kug pigpig ko fare tapowiy’ nib fel’ nem, kug guy e gidii’ ma kar pinninged e fagar nga Galasia u dakaen e ngongol roraed ma udakaen e fithed ni fagar rok ra motoyil ko fapi missionary. U laniyaen’nug e mon’og fapi branch ney e ba sasigal ma balyaeng. Machane nap’an kug chuw ko Madnom nem, tomuren lal’ e duw, la’agruwi Apostle kar bow ningar yarmiyew e district romad me mang e stake ulane Longfellow Park chapel u Cambridge.
Tomuren boech e duw Kug sul ningu suwey ko stake conference urom. Fare stake president ke fekeg ningu guy e burey nibay bo’or e malong riy’ u Belmont. Ke yoeg ngong ni i’ir e bin fel’ e tagen ko e temple ku Got. Kan fini toey aram. Nap’an gube guy farenem, Guma pugurran urngin e chongin nib sobutaen’ kug un ulane fapi branch nib achigchig, e yoror kar pinninged, nge fapi missionary kar machibnogeg.
Bay e deacon u mo’olung ney daba’ nib bi’ech. Kug un nap’an fa binem e Madnom ko Easter ni fare priest, Kug non marunga’gen u somm’on, yaen u but nga mo’olung ni bay ta’areb e chongin riy’. Fare deacon ke faflaen’ nap’an e chitamang ke yoeg nira un ngak ko e mo’olung priesthood e daba’. Chitamang ke pigpig mission rok u ta’ab e mission ko tituw ke mang e president. Kug guy fare babyoren 1937 Missionary Handbook ko chitmangin tituw rok. E mfen rok ningan feked e gidii’ nga Galasia e ba gel’.
Kug non ngak fare bishop ko deacon nem ningu fil mang ra buch ngak nap’an ra un e muruwel ko priesthood ninge togbey e ya’el ngak en Somoel. Kug nang fare ward ke sug ko e chongin nib fel’ ma michaen’raed. Fare bishop ke faflaen’ me weliy’ urrogon e ward mission leader ke chepin e mon’og ko urngin e investigator. Irma thapeg e nang fan nem ku fapi missionary.
Fare bishop nge ward council mo’olung marunga’gen urngin e investigator. Yaedma me’leg e tin rayog ningar rin’ed ngak ma tabinaew ninge ayuwegread manged fagar ou’mon ko tawfe roraed, pinningraed ko gosgos ma chathowliyraed e gidii’ kar tawfegaed. Ke yoeg boech e ngiyal’ bay bo’or e appointment ko missionary ere ngar feked pagal ko Aaronic Priesthood ko companion.
Fare kanawo’ ko fare ward mission e ba yoloey fapi tin ni ba’adag urngin e quorum ningar pinning e gidii’ nikar mada’nog ko fapi missionary. Ya president ko deacon quorum e kan pinning ninge yarmiy ni fan e chongin quorum rok ningar ayuweg mar yoror roraed mar baed nga gil’lungun Got.
Ere, fare deacon ulane fare ward nib gel nge fare priest nib be’ech —fare convert—ulangin fare mo’olung nib achigchig de ya’an ni bay bo’or nib ta’abrogon ngoraed fa ngomed. Sana dam guyed e ta’abrogon ko muruwel rom i toey e Galasia ko e tin ma’ang’ang Kug guy u New Mexico nge u New England.
Machane bay reb e rogon ningad suwey ko priesthood rodad. Ngad tay angindad mag mugu’uliyed e muruwel rodad ko fare motochiyel ningad feked fare gospel ngak urngin e bitir ko Got ni Chitamangdad u Tharmiy.
Ngad pii’ed sasun urrogon en Somoel ma toey e gilungun Rok ngadakean e fayleng. U Galasia Rok, ni bay yo’or e talin nib ma’ang’ang nge organization ni kad thapeged, bay e likngin nib riyul’ kan fil fapi profet marung’agen urrogon ningad mu’gul’uliyed e muruwel ko priesthood nib muruwel ko missionary.
Nap’an fare 1959 April general conference, President David O. Mckay ke fil biney e kenginn, woed ke fil urngin e profet mada’ ko tinem e rran, arragon President Thomas S. Monson. President McKay ke yoeg u tomur e non rok nap’an 1923 ko fare British Mission, bay e chilen ni ke pii’ ngak urngin e chongin ko fare Galasia. Ke yoeg ngoraed ni ngad pii’ e salpiy nira yaen ma togopluw ko kireb laniyaen’ e gidii’ ngak fapi chongin e Galasia. President McKay ke yoeg marung’agen fare me’leg ni: “Yin’ed fare muruwel ngadakaen urngin chongin e Galasia ni nap’an bay yib 1923 urngin e chongin ra mang e missionary. Urngin e Chongin ba missionary! Rayog ningam fek reb nga Galasia, fa chitamam; sna fagar rom u muruwel rom. Reb e bee’ ra rung’ag fare milwol min fel’ ko tin riyul’ udakaenem.”
Nge President McKay ke yoeg: “Nge binem e milwol e daba’ Urngin chongin—ta’areb nge balay e million—e missionary!”2
Nap’an ke yoeg u 2002 ni muruwel ko mission ra mang tagil’ ko fapi bishop, keb ma’ang’ang Ngog. Kug lemnog i yaedba chibiy e tomal u rayog roraed ningar pigpig ngak e chogin roraed ma powiy’ fapi organization ko ward.
Reb e bishop ni Gumanang ke guy i’ir gathi reb e muruwel machane e rogon ninge pinning uta’abang e ward u muruwel nib ga’ ni urngin e chongin ra mang e missionary. Ke pinning e ward mission leader. Ke mo’olung ko fapi missionary urngin e Sabado ninge fil marunga’gen e muruwel roraed ma pinning fel’laniyaen’raed. Fare ward council piriyeg’ed bo’or e rogon ko fapi organizations nge quorum ningar gayed e nang fan ko pigpig ningar taermedliy ko mission. Nge i’ir e tapufthin ko Israel, ke ayuweg e gidii’ ni fel yangren ningar thamiyeg fapi taw’ath ku fare Bayul ningar paered nib machaelboeg.
Kug fini fith ngak urrogon ninge weliy’ ni bo’or e tawfe u ward rok nge mon’og e numba ko e gidii’ ni fel yangren ni ba’adgad ningar feked fare gospel ku Yesus Kristus nga fayleng. Ke yoeg i’ir e gathi fare muruwel ni ke rrin’ yigo’ bee. I’ir fare rogon ni kar faflaen’gad mar kunkunuygad uta’bang ningar pinninged reb e gidii’ u nam ko Gidii’en Got nima yoeg faflaen’ ngoraed.
Ni fan boech arragon nge reb. Woed fapi fak nib mo’on ko Mosiah, kar thamiyed e tin ni yib ko denen u yafas roraed nge fare gol nib ma’ang’ang ko fare Bayul ulangin fare Galasia ku Got. Ufithik e t’ufeg nge magaer ngak fa taw’ath nem ku en Tathapeg ngoraed, Yaedba’adag ningar ayuweged urngin e gidii’ ningar chuw ko kirebaen’en denen, thamiyed e faflaen ko nagfan, ma kunuyraed uta’abang ningar paered nib matangiy ulane gil’lungun Got.
I’ir e tu’feg ku Got nge tu’feg fapi fagar roraed ma yoror roraed nima gay ta’arebgaed ningar pigpignoged ngak e gidii’. Yaedba’adag ningar feked fare gospel nga urngin u nam roraed. Mar taermedliyraed e bitir roraed ningar manged mat’aw ningan pinning raed Somoel ningar filed, micheg, nge pigpiggad u reb gi ko milay’ Rok.
Fa’anra bay ulangin e ward nib ga’ ni bay bo’or e deacon nib be’ech ra muruweliy e muruwel rok ninge pii’ fare gospel ma toey fare gil’lungun fa ulangin e mo’olung nib achigchig nib palog ni bay be’ech e priest ma pigpig, yowba ta’areb u fan row. Fare deacon ra gay fel’ laniyaen udakean t’ufeg Got ninge kii’ pa nga fagar rok ni daworiy chongin. Irra pinning e fagar rok ko e pigpig fa gosgos u Galasia ma pinning ir nge tabinaew rok ningar fil ko fapi missionary. Ngak e gidii’ kar tawfegad, ira mang e fagar nib t’uf ngoraed.
Fare priesthood ra pinning reb gidii’ ningar uned ngak u mo’olung ni achigchig ko Gidii’en Got nike thamiy e t’ufeg ku Got nge gapas nib taw’ath ko fare Bayul riy’.
Fa’anra athamgil ufithik e michaen’ ko muruwel ko priesthood rok, ira guy fare mo’olung nira mang e branch, nge mang e stake ko zion ra yib nga donguch rok. Ra yib e ward ni bay e bishop nib gol riy’. Sana cha’nem i’ir e fak fa bitiren fak nib mo’on boron ra fek e tapigpig Got nga burey me toeg, “Aray marib fel’ e tafen ko temple.”
Gube meybil u demturug e nam ngad paered riy’ nge demturug e muruwel rodad u priesthood ku Got, gadadra ta’arebgad ulane fare muruwel ningad feked fare gospel nga urngin e fayleng mag gayed e fel’ laniyaen’ e gidii’ nib t’uf ngodad ningar manged be’ech ko denen mar uned faflaen’dad u gil’lungun Got. Udakaen en fithingan Yesus Kristus, ir aray e Galasia rok, amen.