Inyong Balaan nga mga Dapit

Ni Ann M. Dibb

Ikaduhang Magtatambag sa Kinatibuk-ang Kapangulohan sa Young Women

Ang [inyong balaan nga mga dapit] geographic man kini o mga gutlo sa panahon, pareho ra kining sagrado ug may talagsaong makalig-on nga gahum.

Ang 2013 nga tema sa Mutual nagagikan sa ika-87 nga seksyon sa Doktrina ug mga Pakigsaad. Kini makita sa tulo ka managlahi nga seksyon; klaro nga importante kini nga pahimangno. Nagpasabut kini kon unsaon nato pagkadawat og proteksyon, kalig-on, ug kalinaw sa lisud nga panahon. Ang dinasig nga instruksyon mao nga “barug kamo sa balaan nga mga dapit, ug ayaw pagbalhin.”¹

Sa akong pagpamalandong niini nga tema, naghunahuna ko, “Unsa ang ‘balaan nga mga dapit’ nga giingon sa Langitnong Amahan?” Mitambag si Presidente Ezra Taft Benson, “Ang balaan nga mga dapit naglakip sa atong templo, chapel, atong balay, ug sa mga stake sa Zion, nga … ‘alang sa panalipod, ug kadangpan.’”² Dugang niini, nagatuo ako nga makakita pa kita og daghang balaan nga dapit. Ang una natong hunahunaon mao ang pulong nga dapit isip palibut o geograpikanhong dapit. Apan, ang usa ka dapit pwede sab nga “lahi nga kondisyon, posisyon, o panghunahuna.”³ Nagpasabut kini nga ang balaan nga mga dapit maglakip usab sa mga gutlo sa panahon—mga gutlo nga ang Espiritu Santo mopamatuod kanato, mga gutlo nga mobati kita sa gugma sa Langitnong Amahan, o mga gutlo nga gitubag ang atong pag-ampo. Dugang pa, nagatuo ako nga bisan kanus-a nga may kaisug kamo sa pagbarug sa husto, ilabi na sa mga sitwasyon nga walay gustong mohimo niini, nagahimo kamo og balaan nga dapit.

Sa mubo apan talagsaong kinabuhi ni Joseph Smith, siya “[mibarug] gayud sa balaan nga mga dapit” ug wala mabalhin. Isip usa ka batan-on, naglibug siya sa relihiyusong kasamok sa iyang komunidad ug gustong mahibalo kon asa sa tanang simbahan ang tinuod. Ang kakahoyan duol sa iyang balay nahimong balaan nga dapit dihang siya miluhod didto ug mihalad sa una niyang kusog nga pag-ampo. Gitubag ang iyang pag-ampo, ug karon giisip kini sa mga miyembro nga ang Sagradong Kakahoyan.

Ang mga batan-ong babaye sa tibuok kalibutan nagbarug usab sa balaan nga mga dapit diha sa kinaiyahan sa Young Women camp. Usa ka lider misugilon nako bahin sa kasinatian sa usa ka batan-ong babaye sa kamping. Dili aktibo ang maong babaye ug nagduhaduha siya bahin sa espirituhanong kasinatian didto sa kakahoyan. Human sa unang adlaw, mireport siya sa iyang lider, “Nalingaw kaayo ko, apan mahimo bang dili kita maghisgut bahin sa Espiritu? Nia ko aron magkamping, maglipay, makauban ang akong mga higala ug maglingaw-lingaw!” Apan, sa panapos nga miting sa pagpamatuod, ang maong babaye may luha nga miingon, “Dili ko gustong mouli. Unsaon man nako nga kining gibati nako karon, kining Espiritu, maanaa kanunay kanako?” Nakadiskobre siya og balaan nga dapit.

Laing balaan nga dapit sa kinabuhi ni Joseph Smith mao ang iyang kwarto. Lisud kining tuohan kay, sama sa daghan kaninyo, kauban niya ang iyang mga igsoon sa kwarto. Apan nahimo kining balaan nga dapit dihang nag-ampo siya nga may hugot nga pagtuo, pagpaubos, ug panginahanglan. Mipasabut siya, “Human ako mopahulay sa akong higdaanan niana nga gabii, ako nag ampo ug nangamuyo sa Makagagahum nga Dios alang sa kapasayloan sa akong tanan nga mga sala ug kahilayan.”⁴ Ang tulo ka tuig human sa panan-awon ni Joseph sa Sagradong Kakahoyan lisud. Ang dise-syete anyos nga Joseph nag-antus sa pamugal-bugal, pagbiaybiay ug sa pagpanakit. Apan nianang gabhiona sa iyang kwarto, si anghel Moroni mipakita agig tubag sa iyang pangamuyo. Nakadawat si Joseph og kahibalo ug kahupayan. Nianang gabhiona, ang iyang kwarto nahimong balaan nga dapit.

Samtang nagtan-aw ko sa Mormon Message for Youth, nakasaksi ko og laing kwarto nga nahimong balaan nga dapit. Ang video kabahin ni Ingrid Delgado, usa ka batan-ong babaye sa El Salvador, nga mipakigbahin sa iyang pagbati kalabut sa templo. Miingon siya, “Kanindot nga may dapit diin makapalayo kita sa mga butang sa kalibutan ug makadawat og sagradong mga ordinansa ug motabang sa dili makadawat niini dinhing kinabuhia.” Dihang namulong siya, ang video nagpakita nga si Ingrid nagbasa sa iyang kasulatan, gilibutan sa Mormonads, mga kinutlo, Personal nga Kauswagan nga basahon, mga litrato sa iyang pamilya ug templo, ug iyang paboritong stuff toys.⁵ Tingali wala makamatikod niini, naghimo siya og balaan nga dapit diin makapalayo niya sa mga butang sa kalibutan. Ambot kon kapila na kaha nabasa ni Ingrid ang iyang kasulatan, nabati ang Espiritu, ug nakadawat og tubag sa mga pag-ampo sa iyang balaan nga dapit.

Gani laing balaan nga dapit sa kinabuhi ni Joseph Smith mao ang Liberty Jail. Si Elder Jeffrey R. Holland miingon, “Walay laing makatupong sa kalisud sa kinabuhi ni Joseph kay sa mapintas, ilegal, ug walay katarungang pagbilanggo.” Mipasabut si Elder Holland nga ang Liberty Jail sukad niadto giisip nga “templo nga prisohan” tungod sa sagradong mga kasinatian ni Propeta Joseph Smith didto.⁶

Pipila kaninyo mga batan-ong babaye ang nakasinati sa kaugalingon ninyong Liberty Jail, dapit diin kamo gipakaulawan, dapit diin wala ang kamabination, dapit diin kamo gibugal-bugalan, gipasakitan, o gani gidagmalan. Kaninyo mga batan-ong babaye akong ihalad ang mga pulong ni Elder Holland: Makabaton kamo og sagrado, madayagon, mapuslanong mga kasinatian uban sa Ginoo sa pinakamiserabling kasinatian sa inyong kinabuhi …, samtang nag-antus sa pinakasakit nga kawalay kaangayan, kon nag-atubang og mga kapait nga daw dili maagwanta.”⁷ Buot ipasabut, sama ni Propeta Joseph Smith, kaninyo makamugna ug makabarug diha sa balaan nga mga dapit bisan sa pinakalisud nga mga kahimtang.

Usa ka batan-on, si Kirsten, misulti nako bahin sa iyang sakit nga kasinatian. Ang high school mao ang iyang Liberty Jail. Maayo na lang, ang kwarto nga praktisanan og banda nakahatag og kahupayan. Miingon siya: “Dihang misulod ko niini nga kwarto, sama og misulod ko sa luwas nga dapit. Walay mopakaulaw o mobiay-biay, walay mobinastos. Hinoon, mga pulong sa pagdasig ug gugma ang madungog. Kami nagpakita og kamabination. Malipayon kadto nga dapit. Ang kwarto nga praktisanan og banda puno sa Espiritu samtang magpraktis ug magtukar kami. Ang kwarto naingon niini tungod sa impluwensya sa instructor sa banda. Maayo siya nga Kristiyano. Sa paghinumdom, ang high school pangpalunsay nga dapit. Lisud kadto, apan nakakat-on ko sa pagkamasinabtanon. Mapasalamaton ko sa akong silunganan, balaan nga dapit, ang kwarto nga praktisanan og banda.”⁸

Karong gabhiona, namalandong ba kamo sa inyong balaan nga mga dapit? Mihangyo ko sa gatusang mga batan-ong babaye nga ipakigbahin ngari nako ang ilang balaan nga mga dapit. Geographic man kini o mga gutlo sa panahon, pareho ra kining sagrado ug may talagsaong makalig-on nga gahum. Nia ang siyam sa malumo nilang tubag:

Una: “Didto ko sa ospital, nagkugos sa bag-o nakong manghud.”
Ikaduha: “Matag basa nako sa akong patriarchal blessing, bation nakong nailhan ug gihigugma sa akong Langitnong Amahan.”
Ikatulo: “Dihang nag-12 ko, ang mga batan-ong babaye sa ward miadorno og hinimo sa papel nga kasingkasing sa akong pultahan.⁹ Gibati nakong gihigugma, gidawat, ug nalipay!”
Ikaupat: “Samtang nagbasa ko sa kasulatan usa ka adlaw, may pulong nga ‘misantup.’ Gitubag ang akong pag-ampo.”
Ikalima: “Miadto ko sa party diin nanag-inom ang mga tawo ug nanaghimog dili maayong kalihokan. Misulti ang Espiritu kanako sa pagbalik ug pagpauli. Gibuhat nako, ug oo, dunay sosyal nga mga sangputanan. Apan, kadtong higayuna naghimo nakong masaligon nga ako makahimo sa pagsunod sa ebanghelyo.”
Ikaunom: Atol sa sakrament, namalandong ko kalabut sa Pag-ula. Nakaamgo ko nga kinahanglan kong mopasaylo sa tawo nga akong gikalagutan. Ang akong pagpili nga mopasaylo usa ka maayong lihok nga magdala sa Pag-ula sa inadlaw nakong pagpakabuhi.”
Ikapito: “Human motambong sa New Beginning uban ni mama, mihalok siya nako ug misulti nga iya kong gihigugma. Kini ang unang higayon nga akong nahinumduman nga gihimo niya kini.”
Ikawalo: “Uban sa pasalig sa akong bishop, nasayud ko nga ang saad nga gihatag sa kasulatan tinuod: ‘Bisan pa ang inyong mga sala mapula, sila pagapution ingon sa nieve.’¹⁰ Gibati nako ang paglaum ug nasayud nga makasugod ko sa taas nga proseso sa paghinulsol.”
Katapusan: “Usa ka gabii, nagtigum ko og kaisug sa pagpakigbahin sa suod nakong higala sa akong gibati kalabut sa ebanghelyo ug sa Basahon ni Mormon. Wala madugay, nalipay kong mitambong sa iyang bunyag. Karon magdungan na mi pagsimba.”

Pwede ba kong mosulti ninyo sa usa sa akong balaan nga mga dapit? Usa ka higayon; nabug-atan kaayo ko, nahadlok, ug hingpit nga nag-inusara. Sa hilum, nag-ampo ko: “Langitnong Amahan, wala ko kahibalo unsaon ni nako paghimo. Palihug, tabangi ko!” Dayon, usa ka tawo sa wala dahuma miduol, miagbay nako, ug misulti og sinsero, makapadasig nga mga pulong. Niadtong higayuna, gibati nako ang kalinaw. Mibati ko nga giila. Ang tanan nausab. Ang mga pulong ni Presidente Spencer W. Kimball misantup sa hunahuna: “Ang Dios makakita kanato, ug iya kita nga pagabantayan. Apan sa kasagaran ipaagi niya kini sa uban aron iyang mahatag ang atong mga panginahanglan.”¹¹ Alang nako, kanang higayuna, kana nga dapit, nahimong balaan.

Minahal nga mga batan-ong babaye, adunay daghang balaan nga mga dapit nga gusto unta nako nga atong mapakigbahin sa usag usa. Inig uli ninyo, awhagon ko kamo nga irekord sa inyong journal ang mga dapit nga inyong nailhan ug nahinumduman. Klaro ngari nako nga liboan kaninyo nanagbarug sa balaan nga mga dapit. Kini nga mga dapit maghatag ninyo og proteksyon, kalig-on, ug kalinaw sa lisud nga panahon. Nagkalig-on ang inyong pagpamatuod tungod kay nagbarug kamo alang sa kamatuoran ug pagkamatarung diha sa talagsaong pamaagi.

Kamo, ang bantugang kabatan-onan sa Simbahan, mao ang akong mga bayani. Gimahal ko kamo. Akong gibati ang talagsaong gugma sa Langitnong Amahan kaninyo, ug akong ipamatuod nga ang ebanghelyo ni Jesukristo tinuod. Siya naghulat, andam nga motuboy kaninyo samtang kamo “mobarug … sa balaan nga mga dapit, ug [dili mobalhin].” Gihigugma ug gi-sustain nako si Presidente Thomas S. Monson, ang atong tinuod ug madasigong propeta. Gisulti nako kining mga butanga sa pangalan ni Jesukristo, amen.