![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fe2%2F09%2Fe209564ecf3b64252fb86f90e0e15fac9ba757e8%2Fe209564ecf3b64252fb86f90e0e15fac9ba757e8.jpeg/full/!250,/0/default)
Kom in Kuh ac Puhlaikna
Lwelah kuht—nuhkwewa—in eis puhlaik in lain insese, puhlaik in tuyak nuh ke ip yohk uh.
Tamuhlwel sacohk wiyuck, arulacna wo in sifil wi kowos. Nga pruhe tuh in oasr kuh wolacna luhk ke nga orekmakihn pacl wowo se inge in sramsram nuh suwos.
Sahyacn lun Conference Center se inge oasr tausin fahsrweni nuh lun lohm alu ac acn pucspucs sahyac fin facluh. Oasr ma kuht oacna sie kac ma orekuhtweni nuhsie, ke srihpen kuht luhlahlfongiyuck in us pristut luhn God.
Kuht oasr inge fin facluh ke sie pacl na wolacna ke ma mahtuh la uh. Pacl wowo lasr uh apkuhran na in wacngihn sahlfah la, tuh kuht srwackna lain ma upac pucspucs, kuhtuh ma tuhfahna sikyak ke pacl se inge.
Kuht moul ke sie facl ma ohiyac wo uh yohk srihpac ke moul uh, ke ma fuhlwact emet, sruhngwacyuck, ma ma koluk uh orek arlac fihsrwacsr, ac mwe sruhf in som tuhlac liki inkacnek suwohs ac ohsrihksrihk ma rauni kuhtlac. Kuht sun ma toasr ke lwen nuh kwewa ac puhlakihnyuck kuhtasrihk ma kuhnahoslah ma wowo ac srihke in ahollah ke lutlut ac facsin suhfal luhn un mwet facluh uh.
Ke srihpen ma inge ac ma upac sahyac uh, kuht kwacna sun sulaclah ma kuh in nuhnkwaclah fuhfahsryucsr lasr uh. In kuh nuh sesr in oraclah sulaclah pwacye uh, puhlaik uh enenweyuck—puhlaik in fahk moh ke kuht enenuh uh, puhlaik in fahk ahok ke pacl fal uh, puhlaik in oruh ma pwacye uh ke srihpen pwacye.
Ke srihpen ohiyac luhn mwet uh ingena sa in eklac liki ma yohk srihpac ac ip yohk ma Leum El use nuh sesr, kuht fah apkuhran na in siyuckyuck se in lain ma kuht luhlahlfongi uh. Yac ac fah oasr puhlaik inge lasr in oruh oacna?
Prestuhn J. Reuben Clark Jr., suc ke yac puhs el sie mempucr ke Prestuhnsi Se Met, el fahk ma inge: “Oasr kuhtuh ohiyac ma mukul ma pahngonyuck muh oasr luhlahlfongi la uh … puhlakihn ma ingacn lah, e ke elos ahkkweyeye luhlahlfongi fohnlah lalos, elos kuh in pahngon me nuh faclos sifacna isrucn luhn mwet aetuhi suc suhlahlahlfongi, elos enenuh in ekuhllah kuh ahkuhtweyac luhlahlfongi lalos, ahksrihkye yohk srihpaciyac ke ahkuhtweyac nuh ke srihpac in kuhnahoslah, kuh finne srihke in lahfwekihn. Kain mwet ingacn pa mwet wosounkacs.1 Wacngihn sesr kena in pahngpahng mwet wosounkacs, tuh yac kuht tahfuh luo in fahkwack luhlahlfongi lasr ke kuhtuh ohiyac uh?
Kuht kuh in sifacna kahsrwe kuht ke kena lasr in oruh ma pwacye kuht fin eiskuhtyang sifacna nuh ke acn ac wi ke mukwikwi ma nuhnak lasr uh mokleyuck nuh ke ma wo ac acn ma Nguhn luhn Leum fah ahkkweyeyuck.
Nga esam ke nga riti ke kuhtuh pacl somlah ah kahs in kahsruh ma sie pahpah sang nuh sin wen nahtuhl ke el som nuh sahyac in wi lutlut: “Kom fin sie pacl sokwack lah kom oasr ke sie acn ma kom tiac enenuh in oasr we, som!” Nga usot nuh suwos kais sie kahs in kahsruh sepacna ingacn: “Kom fin sie pacl sokwack lah kom oasr ke sie acn ma kom tiac enenuh in oasr we, som!”
Kuht nuhkwewa enenuh in eis puhlaik pacl nuhkwewa. Lwen nuhkwewa ke moul lasr puhlaik uh enenweyuck—tiac ma nuh ke pacl yohk srihpac muhkwena tuhsruhk inkaiyacn pacl uh ke kuht orwaclah sulwaclah kuh top nuh ke ohiyac raunikuhtyak uh. Robert Louis Stevenson sie poet ac novelist fin acn Scottish fahk: “Tiacna arulacna puhkantwen mwet lohoh ke mukwikwi in puhlaik uh. Tuhsruhk puhlaik lowos uh srwackna fuhlwact finne wacngihn mwet ahkkweye kowos ac wacngihn mwet ahkfuhlwactye kowos.2
Puhlaik tuhkuh ke kain atac. Charles Swindoll sie author Kristin el suhmuhslah: “Puhlaik tiacna srihkasrakuh nuh ke mweun … kuh in puhlaik in sruokyac sie mwet pihsrapasr lun lohm sum. Srihkasrak na pwacye ke puhlaik uh mihs. Ma inge pa srihkasrak insiyac uh, oacna luhlahlfongi na ke wacngihn mwet liye kom uh, … oacna muhkwena tu ke mwet uh tiacna kahlwem sum uh.”3 In weacng pac nga luhlahlfongi lah puhlaik lun insiyac se inge el weacng in oruh ma pwacye finne ke kuht sahngweng, in tu na kuh ke luhlahlfongi finne mwet sahyac uh ahkkolukye kuht kac, ac in sruokyacna luhlahlfongi ingacn finne pacl ahkkolukyeyuck ke wacngihnlac kawuck la kuh ke kasrpacn mwet uh. El suc tu na kuh ke ma pwacye uh enenuh in sensenkihn eklac ke pacl tiac lwelahkihnyuck ac tiac eye uh.
Ke nga kuhlwacnsap ke United States Navy ke Mweun Ahkluo fin Facluh, nga lotwelah ke orekma puhlaik uh, ma oacna puhlaik fokoko, ac srihkasrak ke puhlaik. Sie ma ma nga fah tiac muhlkuhnlah pa puhlaik mihs luhn sie sipis matwac yac 18—tiac mempucr ke alu uh—suc tiacna sahngweng in pruhe. Ke mukul 250 ke u lasr an, el pa mwet sefanna ke kais sie fong sikuck muhtuhnte sisken mwe oan kiyacl an, ke kuhtuh pacl uh ahkkolukyeyuck kuh isrucnyuck sin mwet suhlahlahlfongi uh. Ke insifac suoli, el pruhe nuh sin God. El tiac wi sahngweng uh. El tiac wi tahfuh luo uh. El puhlaik.
Pacl fototo somlah ah nga lohng sie srihkasrak luhn sie mwet suc pwacyena wacngihn puhlaik insiyac se inge la. Kawuck se fahk nuh sihk ke sie miting ke kuhfa luhn Leum na nguhnnguhn ac luhlahlfongi ma el ac mukul tuhmwacl ah wi ke ward lalos ah. Mukul fuhsr se ma sruok ohfohs luhn prist ke Aaronic Pristut ah moklweack na pwacye mwet alu nuh kwewa ke el sruhmuhn ma pwacye ke wosasuc uh ac ke engan ke liyacacng masap uh. El fahkwack sie fahkwack luhlahlfongi na pwacye ac mokleyuck ke el tu emet ah, luhmahl nwacsnwacs ac fwel wes fasrfasr ac nektai se lal ah.
Tok ke lwen sac pacna, ke muhtwacn se inge ac mukul se tuhmwacl ah kahsruhsr nuh ke acn atuhlani se lalos ah, elos liye mukul fuhsr se ma moklwaclosyak ke ao na ekahsr met ah. Ingena, ke kuhtuh ohiyac, el orwaclah sie petsac siena ke el tifoklac nuh ke sisken acn fahsr an ac nukum nuknuk mah—ac sismohkkihn paip soko. Kawuck se luhk ah ac mukul tuhmwacl ah tiac puhla koluk a ahsor muhkwena, tuhsruhk elos oacyacpac fohsack ke ohiyac ma el fihsrwacsr in oacna kuh in sie mwet ke miting luhn kuhfa luhn Leum, na sana oacna in sie mwet sahyac na pwacye.
Tamuhlwel, yac kom nuh mwet sac na ke acn kom oasr we kuh ke kuhtwena ma kom oruh uh—mwet se ma Pahpah Lucng El ke kom in oacna ac mwet se kom etuh muh kom enenuh in oacna uh?
Ke sie sirape ma oreklac lun sie national mackuhsin, sie tuhlihk lutlut sritacl pahsket pwengpweng America pahngpahng Jabari Parker, sie mempucr ke Alu uh, siyuckyuck se in akacsruhi ke kahs kahsruh yohk emet el eis sin pahpah tuhmwacl ah. Jabari el topuk, “[Pahpah tuhmuhk ah] fahk, Oruh kom in oacna sie ke kom muhkwena uh ac ke kom oasr in walihl uh.”4 Kahs in kahsruh yohk srihpac se inge, tamuhlwel, ma nuh sesr nohfohn.
Ma suhmuhslah nahtuhsr uh sesseslah ke mwe srihkasrak ke atacn puhlaik enenweyuck sin kais sie sesr mihsenge. Mwet pahluh Daniel el ahkkahlwemye puhlaik yohk ke kuh in lain ma ma el etuh muh pwacye ac ahkkahlwemye puhlaik in pruhe uh, finne ahkkolukyeyuck el ke misac el fin pruhe.5
Abinadi el moulkihn sie moul puhlaik, ma ahkkahlwemyeyuck ke kena lal in acnwucki likina in lahfwekihn ma pwacye uh.6
Yac kuht tiac mokleyuck nohfohn ke moul luhn mwet mweun fuhsr 2,000 lal Helaman, suc luti ac ahkkahlwemye enenuh nuh ke puhlaik in ahkos luti luhn pahpah ninac uh, in suwohs ac nwacsnwacs?7
Sahp kais sie sin sramsram ke ma suhmuhslah inge yohk likina ke srihkasrak lal Moroni, suc oasr puhlaik la in kalweni ke ma suwohswohs nuh ke sahflah.8
Ke moul lal nohfohn, Mwet Pahluh Joseph Smith el use mwe srihkasrak puhkantwen ke puhlaik. Sie sin ma yohk emet sikyak ke el ac tamuhlwel sahyac uh kapriyucki nuh sie—nuhnkuh, kapriyucki nuh sie—ac srohuh lun sie lohm soenna sahflah sisken courthouse fin acn Richmond, Missouri. Parley P. Pratt, suc srohuh inmahsrlolos, suhmuhslah ke sie fong inge: “Kuht oan, oacna kuht in mutul nuh ke ao in tahfuhn fong uh ahluhkwelah, ac kuht kweoklac na pwacye, ke kuht porongo nuh ke ao ke ahkkoluk upac, kahskahs koluk tiac wo, kihsen ahkkoluk ac kahs suhfal luhn mwet topang ah.”
Elder Pratt el kalweni:
“Nga lohng ne ke na nga wohtwohtwack, lut, sahngwenglah, ac sesseslah ke puhla luhn kasrkuhsrak oruh upac nuh sihk in tu na ac tohrkahskahs nuh sin mwet topangah; tuhsruhk wacngihn ma [nga] fahk nuh sel Joseph, kuh mwet sahyac ah, finne nga oan siskacl ac etuh lah el ngwetngwet. Kihtin pacl ah na el tuyak ac sramsram ke sie puhsra ma oacna sasa luhn lacohn uh, fahk, apkuhran oacna ke nga esam uh, pa kahs inge:
“‘MIHSLAC. … Ke inen Jisus Kraist nga tulokihn kowos, ac sapkihn nuh suwos in tui; nga fah tiac muhta ke siepacna mihnit in lohng kain kahs ingacn. Tulokihnyac kain kahs ingacn, kuh kom kuh nga fah misac INGENA NA! ’”
Joseph el “tuyak ke kuh yohk,” ma ahkuhtweyucki sel Elder Pratt. El kapihri, sahyacn kuhfwen mwe mweun, tuh el srwackna mihs ac fuhlwact. El ngweti nuh sin mwet topang sahngweng uh suc kihlucki nuh ke insroasrihk uh kuh pihtucki ke niyaclos. Mukul ma ataclos oacna insefuhlwact uh siyuck nuhnak muhnahs lal ac muhtwacwacack in mihslac na.9
Tiac mukwikwi nuhkwewa ke puhlaik uh use kain ma sikyak usrnguck ac sa uh, tuh ma ingacn nohfohn use mihs nuh ke nuhnak uh ac sie etwacack lah ma suwohs ac pwacye uh karihngihnyuck.
Tiac fihsrwacsr in luhlahlfongi na ke ohiyac lasr uh ac mukwikwi lasr uh wiwina nuhnak ekyek ac ahkkweyeyuck lwen nuhkwewa luhn mwet sahyac uh. Kain puhlaik lal Daniel, Abinadi, Moroni, ac Joseph Smith ah pa enenweyuck kuht in muh kuh in fokoko na ac ahkostwen nuh ke ma kuht etuh muh pwacye uh. Oasr puhlaik lalos in oruh ma pwacye uh, sahyacn in oruh ma fihsrwacsr uh.
Kuht nuhkwewa fah lain sahngweng, isrucnyuck, ac sun ma lainyuck uh. Lwelah kuht—kuht nuhkwewa—in eis puhlaik in lain insese, puhlaik in tuyak nuh ke ip yohk uh. Puhlaik, tiac fuhlweack ma, ahkinsewowoye kuht ke lwelah luhn God. Puhlaik eklac sie ohiyacn moul kuh ac luhngkihnyuck ac tiac nuhnkweyuck muhkwena in oacna sie kena in misac ke ahkfuhlwact tuhsruhk oacyacpac ke nuhnak in moul suwohs. Ke kuht kapkapwack, kampare in moul suwohs, pwacyena kuht fah eis kahsruh sin Leum ac kuh in eis ahkkweye ke kahs Lal uh. Nga luhngse olwelah Lal ma sihmlac lun puk lal Joshua:
“Nga fah tia fahsr liki kom, ac nga ac fah wi kom pacl e nuhkwewa. …
“… Kom in ku ac pulaikna; nik kom sangeng ku fuhleak, tuh ... Leum God lom, ac fah wi kom yen nukewa kom fahsr we.”10
Tamuhlwel sacohk wiyuck, ke puhlaik ke ma kuht etuh uh, kuht enenuh in fahkwack, weluhl Mwet Sap Paul, “Arulana yohk yukinyen wosasu [luhn Kraist] sik.”11 Ac na, ke puhlaik sacn pacna, kuht enenuh in ukwe kahs in kahsruh lal Paul: “Kom in mwe srikasrak nu selos su lulalfongi, in kas, in ouiyen moul, in lungse, in lulalfongi ac in moul nasnas.”12
Ma fohs yohk uh tuhkuh ac som, tuhsruhk mweun ma oreklac ke nguhnihn mwet uh kalweniyuck ac tiac tui. Leum El fahk na pwacye nuh sum, nuh sihk, ac nuh sin mwet sruok pristut ke acn nuhkwewa lah mwet nuhkwewa enenuh in luti kunohkohn lal, ac in lotwelah in mukwikwi kampare in oaru ke ohfohs ma pakpucki el nuh kac uh.13 Na kuht ac fah, oacna ke Mwet Sap Peter el fahkwack, finne, “mwet tol lun Tokosra,”14 fahsrweni ke srihpac ac usot nuh fowos kuh sin suc fuhlwactlacna.15
Lwelah kais sie sesr in som ofong ke sie nuhnak ac puhlaik in fahk, weluhl Job ke pacl met ah, “Ke lusenna pacl ma God El ase momong nu sik, … Nga ac sruokyana ku in fahk mu moul luk uh nasnas.”16 Tuh ma inge in pa mwe pruhe puhsisacl luhk ke inen Jisus Kraist, Leum lasr, amen.