2010–2019
Ki ac Wal luhn Pristut
April 2014
16:21

Ki ac Wal luhn Pristut

Sel Elder Dallin H. Oaks

Ke U luhn Mwet Sap Singucul Luo

Ki luhn pristut uh kol muhtwacn ac oacyacpac mukul uh, ac akwuck luhn pristut uh ac wal ke pristut ma nuh sin muhtwacn ac oacyacpac mukul uh.

I.

Ke puhlan toeni se inge kuht liye fihlfihllac luhn kuhtuh tamuhlwel yohk luhlahlfongi la, ac kuht ahkkweyelah pahng luhn kuhtuh mwet sahyac. Ke eklac luhn pahng inge—suc ma orekma ke Alu uh—wal lasr uh tiac srihkweni ke Alu uh ke kuht fihlfihllac uh, ac tiac yohkwelihk wal lasr ke Alu uh ke kuht pahngyak uh. Wacngihn pahng yohk kuh srihk ke kuhlwacnsap luhn Leum. “Nuh met kuh nuh tok,” muhkwena pa oasr uh ac ma sielacna ingacn wiwina ke ohiyac ma kuht eis ac mukwikwi nuh ke fihlfihllac ac pahng lasr uh. Ke sie pacl ah nga karihngihn ke sie fihlfihllac luhn sie stek prestuhn fuhsr suc sang kuhlwacnsap wolacna ke yac yuc ac ingena engankihn ke fihlfihllac lal ac ke pahng sasuc el ac muhtwacn kiyacl tuhfahna eis ah. Elos pahngyak in mwet kol ke nursery ke ward lalos an. Alu se inge muhkwena pa pahng sac ahkfuhlwactyeyuck oacna pahng sahyac uh!

II.

Ke sramsram ke sie toeni luhn muhtwacn uh, prestuhn luhlahp luhn Rilif Sosaiti Linda K. Burton el fahk, “Kuht finsrak in tuhfahlah nuh in kuht kais sie kena yohk se in kahlwem wo ke pristut uh.”1 Enenuh sac kapsrweyuck nuh sesr nuh kwewa, ac nga fah ukwe in sramsram ke ki ac wal luhn pristut uh. Ke srihpen sifac inge uh oacna sie nuh sin mukul ac muhtwacn uh, nga engankihn lah ma sikyak inge suhpweyuckwelihk ac sihmlac nuh sin mempucr nuh kwewa ke Alu uh. Kuh luhn pristut ahkinsewowoye kuht nuh kwewa. Ki luhn pristut uh kol muhtwacn ac oacyacpac mukul uh, ac akwuck luhn pristut uh ac wal ke pristut ma nuh sin muhtwacn ac oacyacpac mukul uh.

III.

Prestuhn Joseph F. Smith el ahkuhtweyac pristut uh oacna “kuh luhn God ituckyang nuh sin mukul uh suc ma mukul uh kuh in oruh fin facluh nuh ke molwelah luhn sucu luhn mwet uh.”2 Mwet kol sahyac luti kuht lah pristut “pa kuh yohk se emet fin facluh se inge. Pa kuh se ma facluh oreklac kac.”3 Ma suhmuhslah uh luti lah Pristut se pacna inge, suc ma oasr ke muhtwacwacyac ah, fah oasr ke sahflahiyacn facluh uh pac (liye Moses 6:7). Ke srihpac se inge, pristut pa kuh ke ma oruh kuht fah moulyak ac kalweni nuh ke moul ma pahtpaht.

Etwacack se kuht suk uh muhtwacwacack ke sie etuh ke ki luhn pristut uh. “Ki luhn pristut uh pa wal se God El sang nuh sin [mwet sruok] pristut uh in kol, sruok, ac karihngihn orekmakihnyacn pristut Lal fin facluh.”4 Mukwikwi ac akwuck nuh kwewa oreklac ke Alu uh pa oreklac ye lwelah suwohswohs kuh sahyac sin mwet se ma sruok ki nuh ke mukwikwi sacn. Oacna ke Elder M. Russell Ballard el ahkuhtweyac ah, “Elos suc oasr ki luhn pristut … ahkfihsracsryelah nuh selos kwewa suc luhlahlfongi in kuhlwacnsap ye kolyuck lalos in ahkpahye wal luhn pristut ac eis kuh luhn pristut.”5

In sruok ahkpah uh ke wal luhn pristut uh, mukwikwi ke ki luhn pristut uh kwewana ahkyohkye ac srihkasrakuh. Ac ahkyohkye in ahkfihsracsrye wal luhn pristut ac mwe insewowo uh in oasr nuh sin tuhlihk nuh kwewa nuhtin God. Ac srihkasrakuh in kol mwet suc fah ituckyang wal luhn pristut uh, suc fah sruok ohfohs ke pristut, ac ohiyacn suwohs ac kuh luhn pristut fah orekmakihnyuck. Nuh ke mwe srihkasrak, mwet se ma sruok pristut uh tiac orekmakihn ohfohs kuh wal lal nuh sie sahyac, ne ke na lweyucklac sin sie mwet se sruok ki uh. Fin tiac ke lweyucklac sacn, akwuck sacn fah tiac orekma. Ma se inge ahkuhtweyac lah efuh sie mwet sruok pristut—sahyacn ohfohs la—tiac kuh in akmuhsrai sie mwet ke sucu lal kuh ahkfahsrye kuhfa luhn Leum ke lohm sel sifacna sahyacn ahkkweyeyucklac sin sie suc sruok ki fal uh.

Sahyacn na orekma muhtahl ma tahmtahel uh oruh lun tempuhl ke lwelah luhn ki sruokyuck sin prestuhn luhn tempuhl, suc nga fah ahkuhtweyac piacng se, mwet se muhkwena suc sruok sie ohfohs luhn pristut kuh in ahkfahsrye ke sie akwuck luhn pristut. Ac akwuck ke pristut ahkkweyeyucklac nuh kwewa uh sihmihsyucklac ke ma sihmlac luhn Alu uh.

Yohkiyac uh, ki nuh kwewa ke pristut uh sruokyuck sin Leum Jisus Kraist, suc pa la pristut uh. El pa mwet se ma sulaclah lah ki fuhkah ac ituckyang nuh sin mwet uh ac ki ingacn ac orekmakihnyuck fuhkah. Kuht pahlah in nuhnkuh lah ki nuh kwewa ke pristut uh ituckyang nuh sel Joseph Smith lun Tempuhl Kirkland, tuhsruhktuh ma suhmuhslah uh fahk lah ma nuh kwewa ituckyang insac ah pa ki uh nuh ke fihl in pacl se inge (liye D&C 110:16). Ke toeni luhlahp ke yac pucspucs somlah ah Prestuhn Spencer W. Kimball el ahkacsmakihnye kuht lah oasr pac ki luhn pristut sahyac ma soenna ituckyang nuh sin mwet uh fin facluh, weacng ki uh luhn oreklac luhn facluh ac moulyak uh.6

Ohiyac muhtahl ke luhpah ituckyang nuh ke ahkpah ke ki luhn pristut uh ahkuhtweyac sie ma siena yohk srihpac inmahsrlon sulaclah ke ma ke ohfohs luhn Alu uh ac sulaclah nuh ke pristut uh. Prestuhnsi Se Met ac Mwet in Kahsruh luhn Prestuhnsi Se Met ac U luhn Mwet Sap Singucul Luo, suc karihngihn Alu uh nohfohn, lweyucklac in oruh sulaclah puhkantwen nuh ke masap ac ohiyac luhn Alu uh—ohiyac ma oacna acn ma lohm in Alu uh oan we ac matwac in kuhlwacnsap luhn misineri. Tuhsruhk finne mwet wal karihngihn inge sruok ac orekmakihn ki nuh kwewa ma ituckyang nuh sin mukul ke fihl se inge, elos tiacna sukohsohk in ekuhllah pactuhn akwucki wolacna ma mukul uh muhkwena fah sruok ohfohs ke pristut uh.

IV.

Nga fah sramsram ingena ke sifac ke wal luhn pristut uh. Nga muhtwacwacack ke ip yohk tolu tuhfahna sramsramkihn: (1) pristut pa kuh luhn God ituckyang nuh sin mukul uh in oruh nuh ke molwelah luhn mwet uh, (2) wal luhn pristut liyeyuckyang sin mwet sruok pristut suc sruok ki uh luhn pristut, ac (3) ke ma suhmuhslah uh fahk lah wal ac ohfohs nuh kwewa sahyac ke alu uh kuhpahsr nuh ke Melchizedek pristut inge (Liye D&C 107:5), ma nuh kwewa ma oreklac ye kolyuck luhn ki in pristut ingacn oreklac ke wal luhn pristut.

Ma inge kapsrweyuck nuh sin muhtwacn uh fuhkah? Ke sie sramsram nuh sin Rilif Sosaiti, Prestuhn Joseph Fielding Smith, in pacl sac Prestuhn ke U luhn Mwet Sap Singucul Luo, el fahk ma se inge: “Ke tahmtahel uh tiacna ituckyang nuh se Pristut uh, tiacna ituckyang nuh faclos, tiac kalmeyac pa Leum El tiacna sang nuh selos wal. … Sie mwet kuh in oasr wal la sang nuh sel, kuh sie tahmtahel nuh sel, in oruh sie ma ke Alu uh ma orwacni ac enenweyuck na pwacye nuh ke molwelah lasr uh, oacna ke orekma ma tahmtahel wiyacsr uh oruh ke Lohm sin Leum uh. Oasr wal ituckyang nuh selos in oruh kuhtuh ma yohk ac wolacna, muhtahl nuh sin Leum, ac orwacni ahkwoyac oacna ke mwe insewowo ma utuckuh sin mukul ma sruok Pristut uh.”7

Ke sramsram yohk srihpac se ingacn, Prestuhn Smith el kalweni in fahk lah muhtwacn uh ituckyang wal uh nuh se. Nuh sin muhtwacn uh el fahk, “Kowos kuh in sramsram ke kuh, ke srihpen Leum El fihliyac wal uh fowos.” El fahk pac lah Rilif Sosaiti uh “ituckyang nuh se kuh ac wal in oruh ma yohk pucspucs. Orekma ma elos oruh uh oreklac ke wal muhtahllacna.” Ac, pwacyena, orekma ke Alu uh oreklac sin muhtwacn kuh mukul uh, finne lun tempuhl kuh ke ward kuh pracns uh, oreklac ye kolyuck lalos suc sruok ki ke pristut uh. Ke srihpac se inge, sramsram ke Rilif Sosaiti uh, Prestuhn Smith el ahkuhtweyac, “[Leum] El sang nuh selos u wolacna se inge ma oasr wal lalos in kuhlwacnsap ye kolyuck luhn pisap ke ward uh … , karihngihn kena luhn mwet lasr uh kwewana ke ip luhn nguhn ac mahno.”8

Ke srihpac se inge, pwacye na lah ke Rilif Sosaiti uh tiac kuhlahs se muhkwena nuh sin muhtwacn tuhsruhk oasr ma se elos wi kac—sie ma akwucki wolacna kuhpahsr nuh ke pristut.9

Kuht tiacna pahkihn in sramsram ke muhtwacn in eis wal luhn pristut ke pahng lalos ke Alu uh, tuhsruhk wal fuhkah sahyac? Ke sie muhtwacn—fuhsr kuh mahtuh—el akmuhsralah in luti wosasuc oacna sie misineri ke pacl nuh kwewa uh, ituckyang nuh sel wal luhn pristut in oruh mukwikwi luhn pristut. Ma inge pacna pwacye ke sie muhtwacn akmuhsralah in mukwikwi oacna sie mwet kol kuh sie mwet luti ke sie u ke Alu uh ye kolyuck luhn sie suc sruok ki luhn pristut uh. Tuhsruhktuh mukwikwi ke sie ohfohs kuh pahng eisyuck sin sie suc sruok ki luhn pristut uh ahkpahye wal luhn pristut in oruh kunohkohn pakpucki lalos an.

Oacna sie suc ahkpahye wal luhn pristut tiacna enenuh in nuhnkuh ke suwohs lalos ac lohacng yohkna nuh ke kunohkohn lalos. Pa ingacn ip yohk se enenweyuck yohkna ke u uh. Aleksandr Solzhenitsyn, mwet sihm pwengpweng Russia se el sruhmuhn ke fahk, “Ingena pacl la … in tiac lain upac suwohs luhn mwet oacna ma kunen mwet uh.”10 Mwet Luhlahlfongi ke Lwen-sahflah uh pwacyena akihlen lah in fal nuh ke ma pahtpaht uh tiac pa in ahkkahlwemye suwohs uh tuhsruhk ohiyac se in ahkfalye kunohkohn uh.

V.

Leum El sapkihn tuh mukul muhkwena fah in akmuhsralah nuh ke ohfohs ke pristut. Tuhsruhk, ke mwet kol pucspucs ke Alu uh ahkuhtweyac uh, mukul uh tiac pa “pristut.”11 Mukul uh sruok pristut, ke sie kunohkohn muhtahl in orekmakihn nuh ke mwe insewowo luhn tuhlihk nuh kwewa nuhtin God.

Kuh fokoko se emet God El sang nuh sin wen Nahtuhl uh tiac kuh in ahkpahyeyuck fin wacngihn wi luhn sie sin tuhlihk muhtwacn Nahtuhl uh, ke srihpen tuhlihk muhtwacn Nahtuhl muhkwena God El sang kuh in “in sie mwet orwaclah luhn mahno uh … in muh akucl ac Plwacn Luhlahp luhn God in kuh in ahkfalyeyucklac.”12 Pa ingacn kahs lal Prestuhn J. Reuben Clark uh.

El tahfwelah: “Pa inge kunohkohn luhn muhtwacn kiyacsr ac luhn ninac kiyacsr ke Plwacn Ma Pahtpaht uh. Elos tiac mwet sruok Pristut; elos tiacna ituckyang ma kunaclos in oruh kunohkohn ac mukwikwi luhn Pristut; elos tiac pacna toasrkihn kunohkohn kac uh; elos mwet muhsah ac mwet orwaclah ye kuh la uh, ac mwet ipeis ke mwe insewowo kac uh, sruok ahkkweyeyuck ke kuh luhn Pristut ac sruok sie mukwikwi oacna ke pahngyak ke muhtahl, yohk srihpac ke ma pahtpaht oacna Pristut uh sifacna.”13

Ke kahs mokleyuck ingacn, Prestuhn Clark el tuh sramsram ke sucu. Oacna ke fwackyuck ke mwet fahkwack luhn sucu, pahpah se karihngihn ke sucu uh, el ac ninac oasr kunohkohn lalos sifacna, tuhsruhk elos kuneyucki in kahsruh sie sin sie oacna lwacle fal uh.”14 Kuhtuh yac met liki mwe fahkwack luhn sucu an, Prestuhn Spencer W. Kimball el sang ahkuhtweyac mokleyuck se inge: “Ke kuht sramsram ke pahyuck oacna sie ohiyacn lwacle, lwelah kuht in sramsram ke pahyuck oacna sie ohiyacn lwacle fohnlah. Kuht tiac luhngse muhtwacn LDS lasr uh in lwacle suhkahs kuh lwacle sefuhn mwet ke kunohkohn ma pahtpaht sacn! Nuhnak muhnahs oruh in kahsruh ac lwacle in ma nuh kwewa.”15

Ke nuhnak luhn God, finne ke Alu uh kuh ke sucu uh, muhtwacn ac mukul uh oacna sie ke kunohkohn sahyac la.

Nga kaliyac ke kuhtuh ma pwacye ke mwe insewowo ke pristut uh. Tiac oacna ki luhn pristut ac akwuck luhn pristut uh, mwe insewowo ke pristut uh oasr nuh sin muhtwacn ac mukul uh ke ohiyac sefanna. Mwe sang luhn Nguhn Muhtahl ac mwe insewowo ke tempuhl uh pa srihkasrak etweyuck ke ma pwacye inge.

Ke sramsram wo kahlwem se lal ke BYU Education Week ke suhmuhr tari ah, Elder M. Russell Ballard el oruh luti inge:

“Mwe luti luhn Alu lasr uh nuhnkuh muhtwacn uh oacna sie ac tiac sielacna liki mukul uh. God El tiacna nuhnkuh kwewana mukul kuh muhtwacn in wo kuh yohk srihpac liki ma se sahyac. …

“Ke mukul ac muhtwacn uh som nuh tempuhl, elos kwewana eis mwe insewowo muhtahl ke kuh sacn pacna, suc pa kuh luhn pristut. … In eis kuh ac mwe insewowo ke pristut uh oasr nuh sin tuhlihk nuh kwewa nuhtin God uh.”16

Nga fahkwack ke kuh ac mwe insewowo ke pristut luhn God, oasr kwewana nuh sin wen ac acn Nahtuhl uh. Nga fahkwack ke wal luhn pristut, ma mukwikwi ke ohfohs nuh kwewa ac mukwikwi ke Alu luhn Jisus Kraist luhn Mwet Luhlahlfongi ke Lwen-sahflah uh. Nga fahkwack ke mukwikwi kolyuck muhtahllacna ke ki luhn pristut, ma sruokyuck ac ahkpahyeyuck ke fohnlah lalos sin mwet pahluh ac prestuhn lasr uh, Thomas S. Monson. Ma sahflah ac yohk srihpac liki nuh kwewa, nga fahkwack ke Leum ac Mwet Lahngo, Jisus Kraist, suc pa la pristut se inge ac suc la kuht mwet kuhlwacnsap uh, ke inen Jisus Kraist, amen.

Mwe kahsruh

  1. Linda K. Burton, “Priesthood: ‘A Sacred Trust to Be Used for the Benefit of Men, Women, and Children’” (Brigham Young University Women’s Conference address, Mei 3, 2013), 1; ce.byu.edu/cw/womensconference/transcripts.php.

  2. Joseph F. Smith, Gospel Doctrine, 5th ed. (1939), 139.

  3. Boyd K. Packer, “Priesthood Power in the Home” (worldwide leadership training meeting, Fepweri 2012); lds.org/broadcasts; liye pac James E. Faust, “Power of the Priesthood,” Ensign, Mei 1997, 41–43.

  4. Handbook 2: Administering the Church (2010), 2.1.1.

  5. M. Russell Ballard, “Men and Women in the Work of the Lord,” New Era, Eprel 2014, 4;Liahona, Eprel 2014, 48; liye pac Daughters in My Kingdom: The History and Work of Relief Society (2011), 138.

  6. Liye Spencer W. Kimball, “Our Great Potential,” Ensign, Mei 1977, 49.

  7. Joseph Fielding Smith, “Relief Society—an Aid to the Priesthood,” Relief Society Magazine, Jan. 1959, 4.

  8. Joseph Fielding Smith, “Relief Society—an Aid to the Priesthood,” 4, 5; see also Teachings of Presidents of the Church: Joseph Fielding Smith (2013), 302.

  9. Liye Boyd K. Packer, “The Relief Society,” Ensign, Mei 1998, 72; liye pac Daughters in My Kingdom, 138.

  10. Aleksandr Solzhenitsyn, “A World Split Apart” (commencement address sikyak ke Harvard University, Jun 8, 1978); liye pac Patricia T. Holland, “A Woman’s Perspective on the Priesthood,” Ensign, July 1980, 25; Tambuli, Jun 1982,22; Dallin H. Oaks, “Rights and Responsibilities,” Mercer Law Review, vol. 36, no. 2 (winter 1985), 427–42.

  11. Liye James E. Faust, “You Are All Heaven Sent,” Ensign kuh Liahona, Nohfuhmpuh 2002, 113; M. Russell Ballard, “This Is My Work and Glory,” Ensign kuhLiahona, Mei 2013, 19; Dallin H. Oaks, “Priesthood Authority in the Family and the Church,” Ensign kuhLiahona, Nohfuhmpuh 2005, 26. Kuhtuh pacl uh kuht fahk lah Rilif Sosaiti pa sie “lwacle nuh sin pristut.” Ac fal kuhtuh in fahk lah ke orekma luhn Leum Rilif Sosaiti ac muhtwacn ke Alu uh pa “lwacle ke mwet sruok pristut uh.”

  12. J. Reuben Clark Jr., “Our Wives and Our Mothers in the Eternal Plan,” Relief Society Magazine, Tisacmpuh 1946, 800.

  13. J. Reuben Clark Jr., “Our Wives and Our Mothers,” 801.

  14. “Sucu: Sie Mwe Fahkwack nuh fin Facluh,” Ensign kuh Liahona, Nohfuhmpuh 2010, 129.

  15. Spencer W. Kimball, “Privileges and Responsibilities of Sisters,” Ensign, Nohfuhmpuh 1978, 106.

  16. M. Russell Ballard, New Era, Eprel 2014, 4;Liahona, Eprel 2014, 48; liye pac Sheri L. Dew, Women and the Priesthood (2013), yohkna ke sapta 6, nuh ke sie ahkuhtweyac yohk srihpac ke mwe luti fwackyuck inge.