![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F87%2F57%2F875715f1e40f5523cb1bf1ad9a527a303ed9a31d%2F875715f1e40f5523cb1bf1ad9a527a303ed9a31d.jpeg/full/!250,/0/default)
Mwe Lohoh
Nga finsrak in akacsruhi yuruwos ke ma pwacye ingacn suc pa ma yohk srihpac in etuh emet.
Pacl in mweun kuh tiac arlac etuh uh orwaclah sie inkacnek in ahkwoye lohacng lasr nuh ke ma yohk srihpac uh.
Mweun Ahkluo ah pa sie pacl tikuclkucl na yohk ke nguhn nuh sihk. Nga som liki lohm sihk fin acn Brigham City, Utah, wi ip srihsrihk se na ke sie fahkwack luhlahlfongi, ac nga puhlaenenuh se nuh ke sie ma yohk liki. Tuhkuh ne kuhlahs mahtuh na fohn se lasr ah ke lusacn na wik kuht mukwilac nuh yen in mweun ah. Ke nga muhta fin tuhka luhn Ie Shima, nuh acir Okinawa, Japan, nga suhmuhngnguh ac tiac arlac etuh na pwacye. Nga kena sie fahkwack luhlahlfongi luhk sifacna ke wosasuc. Nga kena in etuh!
Ke sie fong upac in mutul luhk, nga som liki lohm nes luhk ah ac utyak nuh ke sie bunker ma oreklac ke tahk in kacluhn 50 ke tuhram in kahsling nwacnwaclah ke puhkpuhk ac fihliyucki sie fin ma sahyac ah in orwaclah sie kauli. Wacngihn fahsuc kac, ac nga orahkwacng nuh loac, ngwetwack nuh lucng ke kuhsrao nwacnwaclah ke itu, ac sikuck muhtuhnte in pruhe.
Apkuhran nuh ke infulwacn fahk se na muh sikyak. Nga tiac kuh in ahkuhtweyac nuh sum ma sikyak ah fin nga kena in oruh. Nga koflah in ahkuhtweyac, tuhsruhk arlac kahlwem mihsenge oacna ke fong se ke yac 65 somlah ah. Nga etuh lah ma se ingacn sie mwe fahkwack na lukmac, ac la sifacna na pwacye se. Sahflahiyac ah nga etuh sihk sifacna. Nga etuh na pwacye, tuh ma ingacn utuckuh nuh sihk. Tukun kuhtuh pacl, nga orahklah liki bunker sac ac fahsr, kuh fohlohk engan nuh ke mwe oan kiyuck ah. Fong na fohn sac nga puhla engan ac lut.
Sahyacn in nuhnkuh lah nga sie mwet yohk srihpac, nga nuhnkuh lah fin ma ingacn tuhkuh nuh sihk, lah kuh in tuhkuh nuh sin oacna sie. Nga srwackna luhlahlfongi ma ingacn. Ke yac tohkohyang an, nga kahlwemwack kac lah kain puhlakihnyuck se pa ke pacl se pacna kahlwem se in ukwe ac sie ma toasr in utuck.
Nga finsrak in akacsruhi nuh yuruwos ma pwacye ingacn suc pa ma yohk srihpac in etuh emet, ma ma nga lotwelah ac puhlakihn ke apkuhran in yac 90 ke moul uh ac ahluhkwelah yac 50 in oacna General Authority se. Inkaiyacn ma nga muhtwacwacack in etuh uh pa ip ke ma ma tiac kuh in lutiyuck tuhsruhk kuh in lutlutkihnyuck.
Oacna ma ma yohk molo emet uh, etwacack suc pa ma yohk srihpac ma pahtpaht tuhkuh muhkwena ke pruhe ac motko luhn kais sie mwet. Ma inge, tuhkweni wi lalo ac lutlut ke ma suhmuhslah, fah suli atac ac fwackyuck ac mokleyuck luhn Nguhn Muhtahl. Ma inge utuckuh nuh sesr ke mwe kol inkuhsrao ke kuht lutlut ke mwe luti nuh ke mwe luti.
Fwackyuck uh olwelah lah oacna sie ip yohk ke lahlkuhng kuht eis ke moul se inge fah wi kuht moulyak uh ac etwacack ac lahlkuhng ingacn kuh in eisyuck ke oaru ac ahkostwen (liye D&C 130:18–19).
Sie ma pwacye ma pahtpaht ma nga etwaclah uh pa lah God El moul. El pa Pahpah tuhmwacsr uh. Kuht pa tuhlihk Nahtuhl uh. “Kuht luhlahlfongi ke God, Pahpah ma Pahtpaht, ac ke Wen Nahtuhl, Jisus Kraist, ac ke Nguhn Muhtahl” (Ip Yohk ke Luhlahlfongi 1:1).
Ke sifac nuh kwewa sahyac ma El kuh in orekmakihn, El sulaclah in pahngpahng “Pahpah.” Mwet Lahngo El sapkihn, “Ke ma inge kowos pruhe ohinge: Pahpah tuhmasr suc inkuhsrao” (Liye 3 Nephi 13:9; liye pa Matthew 6:9). Orekmakihnyacn ine “Pahpah” pa sie lesin nuh sesr nohfohn ke kuht muhtwacwacack in kahlwem ke ma ma yohk srihpac emet ke moul se inge uh.
Ohiyacn ninac pahpah pa sie suwohs muhtahl, ac wiwina luhlahlfongi, ma se ingacn kuh in sie mwe insewowo ma pahtpaht. Srihpac wo emet se ke mukwikwi nuh kwewa ke Alu uh pa lah sie mukul ac muhtwacn kiyacl ac tuhlihk nahtuhlos kuh in engan in lohm uh.
Mwet suc tiac pahyuck kuh mwet suc koflah orek tuhlihk uh tiacna itucklac liki mwe insewowo ma pahtpaht elos suk tuhsruhk ma, nuh ingena, elos koflah in eis na. Kuht tiac etuh pacl nuh kwewa fuhkah kuh ngac mwe insewowo uh fah sifacna tuhkuh uh, tuhsruhk yohkwelihk luhn olwelah ke ma pahtpaht fah tiac tulokihn kuhtwena luhlahlfongi luhn kais sie mwet ma orwaclah ac liyacacng olwelah muhtahl uh.
Kena lukmac ac siyuck toasr yohk lowos fah puhsrallah insiyacn kwewana Pahpah ac Wen. Ac fah utuckot nuh suwos sie ahkpwacye lowos sifacna Yohrohlos tuh moul lowos fah fohnlah ac mwe insewowo ma yohk srihpac uh fah tiac tuhlac nuh suwos.
In sie mwet kuhlwacnsap luhn Leum, orekma ke ohfohs ma nga akmuhsraiyucklac nuh kac, nga sang nuh selos ke kain ohiyac se olwelah ma ac fah wacngihn ma yohk srihpac nuh ke molwelah ac enganwack lowos ma fah tiac ke pacl la utuck nuh suwos. Paho ma pihsac ingena fah nwekyucklac, ac insiyac ma ngal ingena ke mwemwe muhsahllah ac kenakihnyuck uh fah ahkkweyeyucklac.
Sie pac ma pwacye ma nga etwaclah pa lah Nguhn Muhtahl el pwacye. El pa mempucr se ahktolu ke Sifac ke God. Ma kunacl pa in fahkwack ma pwacye ac suwohswohs. El ahkkahlwemyacl Sifacna ke kain inkacnek, weacng puhlakihnyuck luhn mihslac ac ahkpwacye. El kuh pac in use mwe ahkkwoye, mwe kolyuck, ac mwe ahksuwohs ke enenweyuck uh. Wi luhn Nguhn Muhtahl oan na ke moul lasr uh ke moul suwohswohs.
Mwe sang luhn Nguhn Muhtahl ituckyang ke sie akwuck ke wosasuc uh. Sie mwet ma oasr wal la fihliyac pahol fin sifen sie mempucr sasuc ke Alu uh ac fahk kahs ma oacna inge: “Eis Nguhn Muhtahl.”
Akwuck se inge muhkwena tiacna ikihlkuhtlac ke sie inkacnek in akihlenyuck, tuhsruhk kuht fin porongo ac ukwe mokleyuck uh, kuht fah eis mwe insewowo luhn Nguhn Muhtahl. Kais sie wen ac acn nuhtin Pahpah tuhmasr Inkuhsrao kuh in etwaclah ma pwacye ke olwelah lal Moroni: Lah ke kuh luhn Nguhn Muhtahl kom kuh in etuh ma pwacye ke ma nuh kwewa (liye Moroni 10:5; ahkuhtweyac wo ituckyang).
Sie ma pwacye wolacna ma nga eis ke moul luhk pa mwe lohoh luhk ke Leum Jisus Kraist.
Yohk srihpac ac ahkkweyeyacn ma nuh kwewa kuht oruh uh, kawucki nuh ke fwackyuck uh, pa inen Leum, suc pa wal ma kuht orekmakihn ke Alu uh. Pruhe oreklac nuh kwewa, finne sin tuhlihk srihsrihk, ahksahfyeyucklac ke inen Jisus Kraist. Mwe insewowo nuh kwewa, akwuck nuh kwewa, akmuhsra nuh kwewa, orekma ahokkihnyuck nuh kwewa oreklac ke inen Jisus Kraist. Pa inge Alu Lal, ac oreklac ke Inel—Alu luhn Jisus Kraist luhn Mwet Luhlahlfongi ke Lwen-sahflah (liye D&C 115:4).
Pa ingacn ma sikyak yohk lun Puk luhn Mormon ma Mwet Nephi pruhe nuh sin Leum ke Inel. Leum El sikyang ac siyuck:
Meac mwet uh kena Jisus elan sang nuh selos uh?
Ac elos fahk nuh sel Jisus, lah elos kena in etuh ine ma elos enenuh in pahngon alu uh; ke srihpen oasr akuhkuhin inmahsrlon mwet uh ke ma inge.
Ac Jisus El siyuck selos lah efuh elos enenuh in tohrkahskahs ac akuhkuhin ke ma inge?
El siyuck selos lah elos nuh riti ma suhmuhslah uh, ke ma suhmuhslah uh fwackyuck nuh selos lah elos enenuh in eis nuh faclos sifacna inen Kraist. Tuh ke Inel elos fah pahngonyuck ke lwen sahflah;
Ac oacna sie mwet suc eis nuh facl sifacna Inel, ac muhtweng nwe ke sahflah, mwet sacn pacna fah moullac. …
El fahk nuh selos lah ma nuh kwewa elos oruh, elos enenuh in oruh ke Inel; pwacnwacng elos enenuh in pahngon alu uh ke Inel; ac elos enenuh in pahng nuh sin Pahpah ke Inel tuh Pahpah elan fah ahkinsewowoye alu uh ke Srihpacl (liye 3 Nephi 27:2–7).
Pa Inel, Jisus Kraist, “fin facluh nohfohn wacngihn sie ine sahyac suc God El sang kuh nuh se in molikuhtlac” (Orekma 4:12).
Ke Alu uh kuht etuh lah suc El uh: Jisus Kraist, Wen nuhtin God. El pa Kuloh Sefanna nuhtin Pahpah. El pa Mwet se ma acnwucki ac El suc sifil moul. El pa Mwet Iwe yurin Pahpah. Esam lah kuht enenuh in muhsahelah pwelucng lasr fin yot luhn Mwet Molwelah lasr, suc pa Kraist, Wen nuhtin God, lah [kuht] enenuh in muhsahi pwelucng [lasr] (liye Helaman 5:12). El pa kawuck ma sruok kuht ac karihngihn kuht ac sucu lasr ke ma upac ke moul uh.
Kais sie Sacnri fin facluh nohfohn ma mwet alu uh fahsrweni ke kuhtwena acn kuh kahs, kuhfa luhn Leum ahkinsewowoye ke kahs ingacn pacna. Kuht eis nuh facsr sifacna inen Kraist ac esamuhl lwen nuh kwewa. Ma ingacn ikeyucki nuh facsr.
Mwet pahluh Nephi el fahkwack lah kuht sramsram ke Kraist, kaksyakihn Kraist, luti ke Kraist, fahkwack ke Kraist, ac suhmuhslah oacna nuh ke palye lasr, lah tuhlihk nahtuhsr uh kuh in etuh lah mwe kahsruh oyac elos enenuh in suk nuh ke elah luhn ma koluk lalos uh (liye 2 Nephi 25:26).
Kais sie sesr enenuh in eis fahkwack luhlahlfongi lasr sifacna ke Leum Jisus Kraist. Na kuht ac akacsruhi ke fahkwack luhlahlfongi sacn yurin sucu lasr ac mwet sahyac uh.
Kuht tiac enenuh in muhlkuhnlah lah oasr sie mwet lokoalok suc sifacna suk in ahkfohsye orekma luhn Leum. Kuht enenuh in sulaclah mwet in ukweyuck uh. Mwe karihngihn lasr uh fihsrwacsr oacna sulaclah la sifacna in ukwe Mwet Lahngo, oruh ahkwoyac lah kuht ac luhlahlfongi na ke ip Lal uh.
Ke Wuhlweacng Sasuc, John el suhmuhslah lah oasr kuhtuh mwet suc koflah in otwelah in wi Mwet Lahngo ac luti Lal uh, ac “ke srihpac se inge, mwet pucspucs sin mwet fahsr tohkohl elos fohlohklac ac tiac sifilpac weluhl.
“Ohinge El siyuck sin mwet tuhma lutlut singucul luo, ac kowos, yac kowos luhngse pac som?
“Simon Peter el topuk, Leum, kuht ac som nuh yurin suc? kahs ma acse moul ma pahtpaht oasr yurum.
“Ac inge kuht luhlahlfongi ac etuh lah kom pa El suc Muhtahl suc tuhkuh sin God me” (John 6:66–69).
Peter el eis ma ingacn ma kuh in lutlutkihnyuck sin kais sie mwet fahsr tukun Mwet Lahngo. In yohk luhlahlfongi la nuh sin Jisus Kraist, kuht Esacl oacna Mwet Molwelah lasr ac oruh ke kuhiyacsr nohfohn in moulkihn luti Lal uh.
Tukun yac nuh kwewa ma nga moulkihn ac lutiyuck ac kuhlwacnsap uh, tukun miliacn ke mael nga forfor raunweack facluh, ke ma nuh kwewa ma nga puhlakihn ah, oasr sie ma pwacye yohk ma nga luhngse in akacsruhi kac. Pa ingacn mwe lohloh luhk ke Mwet Lahngo Jisus Kraist.
Joseph Smith ac Sidney Rigdon suhmuhslah ma ten inge tukun sie puhla na muhtahl:
Tukun fahkwack luhlahlfongi puhkantwen ma oreklac Kacl, pa inge fahkwack luhlahlfongi ma Mwet Pahluh Joseph Smith ac Sidney Rigdon orwaclah Kacl: lah El moul!
Elos Liyacl (liye D&C 76:22–23).
Kahs lalos uh kahs luhk pac.
Nga luhlahlfongi ac nga etuh lah Jisus pa Kraist, Wen nuhtin God, ac lah El moul. El pa Wen Kuloh Sefanna nuhtin Pahpah, ac ke El, ac Kacl, ac Sel, facluh tuh oreklac, ac mwet kac pa wen ac acn kuloh nuhtin God (liye D&C 76:24).
Nga fahkwack mwe lohoh luhk lah Mwet Lahngo El moul. Nga etuh ke Leum. Nga mwet lohoh Lal. Nga etuh ke kihsackuhnlah ac luhngse ma pahtpaht Lal nuh sin tuhlihk nuh kwewa nuhtin Pahpah Lucng uh. Nga fahkwack mwe lohoh yohk srihpac luhk ke puhsisacl nuh kwewa tuhsruhk ke etuh na pwacye, ke inen Jisus Kraist, amen.