![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F1b%2F9c%2F1b9c7796fa89424f97d59f133e3f5390cd3f2dd7%2F1b9c7796fa89424f97d59f133e3f5390cd3f2dd7.jpeg/full/!250,/0/default)
Molo—ac Mwe Insewowo—ke Ohiyacn Mwet Tuhma Lutlut
Oruh kowos in fokoko. Moul oaru nuh ke wosasuc uh finne mwet sahyac siskowos an tiacna moulkihn.
Prestuhn Monson, kuht luhngse kom. Kom sang insiyom ac kuhiyen monum nuh ke pahng nuh kwewa ma Leum El usot nuh sum, yohkna ke ohfohs muhtahl se ma kom sruok ingena uh. Alu nohfohn se inge kuloh nuh sum ke kuhlwacnsap fokoko lom ac ke wo lom ke oaru nuh ke kunohkohn uh.
Ke suhnak ac ahkkweye nuh sin mwet nuh kwewa suc ac enenuh in kuh na ke lwen sahflah inge, nga fahk nuh sin mwet nuh kwewa ac yohkna nuh sin mwet fuhsr ke Alu uh lah kowos fin soenna oruh, kowos ac fah sie lwen pahngonyuck in loango luhlahlfongi lowos an kuh sahp muhtweng kuhtuh ke koaseyuck kowos ke srihpen kowos mempucr ke Alu luhn Jisus Kraist luhn Mwet Luhlahlfongi ke Lwen-sahflah. Kain pacl se inge enenuh kwewa puhlaik ac oruh elah wo ke ip lowos an.
In mwe srihkasrak, sie tahmtahel misineri pacl fototo somlah ah sihm nuh sihk: “Nga ac misineri se wiyuck ah liye mukul se muhta ke siyah soko ke acn in muhta monglac inwalihl ac mongo in infulwen lwen. Ke kuht fototoyang ah, el ngwetwack ac liyacack inesr lah kuht misineri. Koluklac ngwetngwet se lal ah, el sroyak nuh lucng ac sruhlwack pahol in puokyucwi. Nga sa na kuhi nuh ten, na el acnii mongo ke inwacluhl ah nuh feik nohfohn ac muhtwacwacack in kahskahs koluk na upac nuh sesr. Kuht fahlac luhkwel tiac fahk kuhtwena ma. Ke nga srihke in elah mongo ah liki muhtuhk ah, nga puhlahack ipin pihtuctuc fuhrahrrahr tuhngalyac kapihn macngok. Kuhtuh pacl uh upac in oruh sie misineri ke srihpen pacl sac na nga ke forlah fohlohk, sruokyac kihtin mukul sac, ac fahk, ‘MEAC SE!’ Tuhsruhk nga tiacna.”
Nuh sin misineri oaru se inge nga fahk, tuhlihk sacohk se, ke ohiyac puhsisacl lom sifacna kom welah sie u luhn muhtwacn ac mukul ma arulacna efahl suc, oacna ke mwet pahluh Jacob ke Puk luhn Mormon el tuh fahk in akihlen misac luhn Kraist, ac kweok fin sahkseng Lal ac eis nuh facl mwekihn luhn facluh.”1
Pwacyena, kacl Jisus sifacna, tamuhlwel lal Jacob, suc pa Nephi, el suhmuhslah lah facluh, ke srihpen ma koluk lalos, ac fah nuhnuhnkwacl in oacna sie ma wacngihn srihpac; pa oruh elos sruhngluhl, ac El kweok kac, elos kalyeiluhl ac El kweok kac. Elos oacyacpac acnwel ac El kweok kac, ke srihpen luhngse pahkotwen Lal ac mongfihsrwacsr Lal nuh sin tuhlihk nuhtin mwet.”2
Oacna ma puhlakihnyuck luhn Mwet Lahngo, ke lusen pacl loeloes oasr sruhngwacyuck ac molo na yohk se ma moliyuck sin mwet pahluh ac mwet sap, misineri ac mempucr ke fihl nuh kwewa—elos uh kwewa suc srihke in ahkfuhlwactye pahng luhn God in sruhlwack sucu uh nuh ke “ouiya se ma wo liki nukewa.”3
“Mea pac nga ac fahk?” mwet sihm se ke puk Hebrew el siyuck.
“Elos … kaliya oalin lion,
“Konela firir lulap, ac kaingkunla misa ke cutlass, … pulaik ke mweun, kutangla un mwet mweun lun mutunfacl saya …
“Elos sifil eis sou lalos ma misa[a mwet sahyac] elos luhngkin in misa ke keok, …
“Kutu … selos aksruksrukiyuk ac sringsring, … kapiri ke sein ac sisiyang nu in presin:
“Ac kutu pac tatngal, … kutu tahtaelik nu ke ip luo, ac kutu anwuki ke cutlass: … forfor ac wangin ma in nukum sayen kulun sheep ac nani: … elos sukasrup, akkeokyeyuk, [ac] orek koluk;
“([Elos suc] faclu kupansuwolla nu selos:) … forfor wel yen mwesis, ac fineol, ac muta in luf pe eol uh ac luf infohk uh.”4
Pwacyena lah lihpufacn inkuhsrao uh tuhng ke elos suhmuhslah molo se inge luhn mwet tuhma lutlut fin sie facl ma kwacna seahkos masap luhn God. Mwet Lahngo sifacnakahk sronin muhtahl sifacna kwaclos suc ke lusen yac foko elos sruhngwacyuck ac acnwucki ke elos kuhlwacnsapwacl. Ac ke pacl se ingacn El tuh sruhngwacyuck ac fahfahlac in acnwucki.
“Jerusalem, Jerusalem,” Jisus El wowoyak fahk, “Kom suc uniya mwet palu, ac tungal nu ke misa elos su God El supwalosme in fahkak kas lal nu sum! Pacl ekasr nga tuh kena sruokkomi inpouk oana ke sie won el kafisani torokrok natul ye paol, a kom tia lela!
“Ke ma inge, Tempul lom uh ac fah pisinmala.”5
Ke pohloh kahs se ingacn oasr sie pweng nuh sin mukul ac muhtwacn fuhsr nuh kwewa ke Alu se inge. Sahp kowos nuhnkuh fin ma se inge wo srihpac kowos in tu na ke puhlaik ke high school kuh in som ke sie misin ke acn ma luhlahlfongi sacohk emet lowos an ac sruhngwacyuck kuh lainyuck yohk ke acn ma kuhtuh pacl uh ahksruhksruhkye moul oaru nuh ke alu uh. Ahok, wo srihpac, ke srihpen ohiyac se sahyacn an pa “lohm” sesr in “pihsaclah”—pihsaclah mwet, pihsaclah sucu, pihsaclah mwet tuhlan, ac pihsaclah muhtuhnfacl uh.
Ma se inge ahkkahlwemye ma toasr lalos suc pahngyak in us pweng luhn Messiah. In weacng ke luti, ahkkweye, ac kahluhkluhki mwet uh (pa ingacn ip wo ke ohiyacn mwet tuhma lutlut), kuhtuh pacl uh mwet utuck pweng pacna inge pahngyak in fosrngahkihn, in sensenkackihn, ac kuhtuh pacl uh in tuhng (pa ingacn ip suhpwacr ke ohiyacn mwet tuhma lutlut uh). Elos etuh na pwacye lah inkacnek soko ma kol nuh ke acn olweyucklac uh “mut ac kasrup fohk we”6 ke ma enenweyuck uh ukwacma na sisken Finohl Sinai nwacnwaclah ke “kom fah” ac “nik kom.”7
Tuh mwe ahsor, in fahk lah mwet utuck pweng ke masap muhtahl ma kwacna tiac pwengpweng mihsenge liki na ke pacl mahtuh met ah, oacna ke tahmtahel misineri luo ma acniiyuck ac tuhngalyuck ke pihtuctuc fuhrahrrahr uh kuh in ahkpwacyeyei ingena. Ahngyahng uh sie kahs sifucng, tuhsruhk oasr mwet mihsenge suc ac weluhl mwet kuhtasrihk Ahab fahk, “nga srungal mweyen el tiana wi palu wo nu sik. Pal nukewa el fahk ma na koluk.”8 Kain in sruhnga se ingacn nuh ke suwohs luhn sie mwet pahluh uh eislah moul lal Abinadi. Oacna ke el fahk nuh sel Tohkohsrah Noah: Ke srihpen nga fahk nuh suwos ma pwacye kowos kasrkuhsrak sihk. … Ke srihpen nga sruhmuhn kahs luhn God kowos nuhnuhnkweyuc muh nga kasrkuhsrak9 kuh, kuht kuh in tahfwelah, lahlfon, mukul ma fuhnmwet, srahngwesr oa, sekuhlwacng, nihkihn nuhnak, facsin mahtuh ma tiac wo, ac mahtohoh.
Oacna ke Leum El sifacna fahk nuh sel mwet pahluh Isaiah:
“[Elos] ... srangesr porongo mwe luti lun God:
“[Elos] sapkin mwet palu in tia kaskas. Elos fahk nimet fahk nu sesr ma pwaye uh. Fahk nu sesr ma kut lungse lohng, finne sutuu:
“Tiok! Nimet lusrong kut. Kut tasak ke lohngyen God mutal lun Israel.”10
Suhpwacr kuhtuh, kawuck fuhsr luhk, lah pa inge ohiyacn matwacsr lah mwet uh fin luhngse kuhtwena god uh, elos luhngse elos in god suc ac tiac kai yohk, god fihsrwacsr, god fwel suc tiac wakrelos, god suc akak, oruh kuht in isrwacsr, na fahk nuh sesr in som sritacl. 11
Fuhkah ne sie mwet in oraclah God Elan oacna el! Kuhtuh pacl uh—ac ma se inge usrnguck liki nuh kwewa—mwet inge orekmakihn inen Jisus oacna sie mwet suc oacna in muh El God “fihsrwacsr” se. Yac pwacye? El suc fahk lah kuht enenuh in tiac kuhnaus masap, tuh kuht tiac enenuh in nuhnkuh in kuhnahoslah. Ac kuht fin nuhnkuh in kuhnahoslah, kuht kuhnahoslah tari ke nuhnak luhn insiyacsr. Yac ma sacn oacna mwe luti “fihsrwacsr” se, fihsrwacsr in lohng ac eye ke acn in toeni inwalihl?
Ac meac elos suc kena ngwetwacng liye ma koluk uh kuh kahl na tuh loeslac liki uh? Jisus El kai fahk, ahtron motom fin ahkkolukye kom, tihpallah. Poum fin ahkkolukye kom, pakwelah. 12 “Nga tia tuku in ase misla, a sie cutlass.”13 El sensenkackuhnuhlos suc nuhnkuh muh El sramsram ke ma wacngihn srihpac muhkwena. Nuh sukyuck na lah efuh, tukun luti nuh kwewa, mwet ke mura an “kwacfe sin Jisus Elan som liki facl selos.”14 Nuh sukyuck na lah efuh, tukun ma usrnguck nuh kwewa, kuh Lal akihlenyuck tiac nuh sin God tuhsruhk nuh sin devil.15 Kahlwem na lah pohloh kahs pwengpweng soko ke kihsen siyuck “Meac Jisus Elac oruh?” ac fah tiac kwacna use top eye uh.
Ke pacl wo se emet ke moul in luti Lal, Jisus El fahk, “lungse sie sin sie, oana ke Nga lungse kowos.”16 In ahkpwacyeye lah elos kahlwem na pwacye lah meac kain in luhngse se ingacn, El fahk, “Kowos fin lungse Nga, kowos ac akos ma sap Luk,”17 “kutena mwet … su tia akos kutena sin ma sap uh, finne masap srisrik se, ac luti nu sin mwet saya in oru oapana, el ac fah … srik liki nukewa in Tokosrai lun kusrao.”18 Luhngse oacna Kraist uh pa enenuh yohk se emet lasr fin facluh ke srihpen suwohswohs uh enenuh in wi na pacl nuh kwewa. Pwacnwacng fin luhngse pa in kahs pwengpweng se lasr uh, oacna in enenuh se na, na ke kahs Lal suc pa mwe akucl luhn luhngse, kuht enenuh in sislah tahfonglac ac kuhtwena ma srihsrngi in ahkkweye ma se inge kacn mwet sahyac. Jisus El kahlwem na pwacye ke ma suc mwet pucspucs ke facsin lasr mihsenge uh oacna in muhlkuhnlah: lah oasr sielacna na yohk srihpac se inmahsrlon masap in nuhnak muhnahs nuh ke ma koluk (suc El kuh ma pahtpaht in oruh) ac mwe sensenkackihn in tiac lwelah ma se inge (suc El tiacna oruh finne pacl se).
Kawuck, yohkna nuh sin kawuck fuhsr luhk an, eis puhlaik. Luhngse nwacsnwacs oacna Kraist uh kahklah tuhkuh ke suwohswohs pwacye uh kuh in ekuhllah facluh. Nga fahkwack lah wosasuc pwacye ac moul luhn Jisus Kraist oasr fin facluh ac kowos mempucr ke alu pwacye ac moul Lal, srihke in akacsruhi kac. Nga fahk lohoh ke wosasuc ac Alu uh sac, ke sie mwet loh ke ki luhn pristut ma ikucslah kuh ac ohiyac wo ke akwuck in molwelah. Nga etuh yohk lah ki ingacn fohlohkihnyuckyak ac lah akwuck ingacn sifilpac na oasr ke Alu luhn Jisus Kraist luhn Mwet Luhlahlfongi ke Lwen-sahflah liki na nga etuh lah nga tu ye motowos ke acn in tu sramsram se inge ac kowos muhta ye muhtuhk ke toeni se inge.
Oruh kowos in fokoko. Moul oaru nuh ke wosasuc uh finne mwet sahyac siskowos an tiacna moulkihn. Tu na kuh ke luhlahlfongi lowos an ke elah wo ac ke kuhlwacng, tuhsruhk tu na kuh kac. Lusen pacl loeloes ke puhsra mokleyuck uh, weacng puhsra ma kowos ac fah lohng ke toeni se inge ac puhsra se kowos tuhfahna lohng sel Prestuhn Thomas S. Monson, srihsrngi kowos nuh ke inkacnek luhn mwet tuhma lutlut luhn Kraist. Inkacnek na suwohs soko, ac inkacnek na ohsrihksrihk soko ma wacngihn kuhruh kac, tuhsruhk kuh in engankihn ac kuhtanglah in fuhfahsryucsr kac ke luhlahlfongi kuh in Kraist, ke kahlwem suwohs luhn finsrak, ac luhngse God ac mwet nuh kwewa. ” 19 In puhlaik in suk kain inkacnek se inge, kowos ac fah orwaclah luhlahlfongi ma tiac kuh in moklweyucklac, ac kowos fah konwacack acn lihsrihngyuckyak liki eng mas ma uk, finne ke eng for uh, ac kowos ac fah puhla yot kuhlwacna luhn Mwet Molwelah lasr, suc ma kowos fin muhsaheack ohiyacn mwet tuhma lutlut tiac ahlohloh lowos an, kowos tiacna kuh in puhtatlac. 20 Ke ine muhtahl luhn Jisus Kraist, amen.