Te Bubuti ae Kataweaki nakoia Ainen te Ekaretia ni Kabuta

Iroun President Russell M. Nelson

Beretitenti n te Kooram n Abotoro ake Tengaun ma Uoman

Ti kainnanoa korakorami, rairakimi, ami koaua, ami konabwai ni kairiiri, wanawanami, ao bwanaami.

Nakoia Unimwaane Rasband, Stevenson, ao Renlund, ngaira aika Tarimi, ti butimwaai ngkami nakon te Kooram n Abotoro n te Tengaun ma Uoman. Ti karabwa te Atua ibukim te kaotioti are e angan Ana burabeti, Beretitenti Thomas S. Monson.

Tariu ao mwaaneu, ngkana ti kaitibo n te maungatabu ni kabuta onoua te namwakaina n nako, akea mai ibuakora ae a kaman atai bitaki aika a na riki are e na rooti nanoia aomata ni kabane inanon te Ekaretia. Unimwaane L. Tom e anga te rongorongo ae rangi ni mwaaka ibukin te tabe ae aki kona n oneakimwiina bwa te mare ao te utu a karinaki n ana babaire te Uea. Ti kubanako ngke tabeua te bong imwiina, ti ataa te kaentia bwa e waekoa n anaa maiun Unimwaane Perry man te aonaaba rinanon matena.

E ngae ngke President Boyd K. E a kerikaaki marurungina, e teimatoa n “ninikoria n reitanako” n ana mwakuri te Uea. E mamaara n Eberi ae nako, ma e teimatoa ni katanoata ana kakoaua ngkai e teimatoa ni maiu. Ngkanne, tii 34 te bong imwiin motirawan Unimwaane Perry, Beretitenti Packer e nakon naba n te aonaaba n tamnei.

Ti aki noora Unimwane Richard G. Scott n ara kabanea ni Maungatabu ae e nako, ma ti uringa ana kakoaua ae korakora iroun te Tia Kamaiu ake e a tia ni kaotii ni Maungatabu ake mai imwaina. Ao ai tibwa 12 te bong n nako, Unimwane Scott e weteaki nakon mweengana ni manga kaitiboaki ma raona ae tangiria Jeanene.

E reke kaitiboou ma Taari aikai ni kabane n aia kabanea ni bong, n raonaki ma kaain ana utu Beretitenti Packer ao ana utu ni kaan Unimwaane Scott imwaain mateia. E rangi ni kangaanga irou ae N na kakoaua ae raao aika kakawaki aikai, ana toro te Uea aika rianako aroia, ake a tia ni bua n te maiu aei. I ururingiia riki nakon ae I kona n taekinna.

Ngke I tabe n iangoa te tai ae aki kantaningaki aei, teuana te bwai ae I nooria ae I aki kona ni mwaninga ae I noria irouia buia aika tangiraki. I aki kona ni mwaninga aron taraakin Titita Donna Smith Packer ao Titia Barbara Dayton Perry n rau n tekateka irarikin aia kainiwene buuia. Bon aine aika onrake n te tangira, koaua, ao te onimaki ae itiaki.

Ngke e tekateka Titita Packer irarikin kaainabana n ana kabanea n aoa, e kaota te banna ni katoto n te rau are aki kona n ataaki.¹ E ngae ngke e ataia ae raona ae tangiraki inanon te maan ae kaania 70 te ririki e a motirawa n te tai ae waekoa, e kaotia bwa te aine ae rau ae onrake n te onimaki. E taraa n itiaki, n aron tamneina aei are e na kaotaki n te tikuriin n ana tai n taetae Beretitenti Nelson n tain katabuan te Brigham City Tembora.

I noora te aekaki n tangira ao n onimaki ae oti iroun Titita Perry. Nanona ae korakora nakon kainnabana ao te Uea e bon ataia, ao I rootaki iai.

Rinanon aia kabanea n aoa kaainabaia ao n reitinako nakon te bong aei, aine aikai a teimatoa ni kaota te korakora ao te ungannano bwa aine aika a kawakin aia berita a kaotia n taainako.² E na kangaanga ataakin nanoia aine anne, tiaki ti iaoia aia utu ma iaon naba ana Ekaretia te Uea, n tabeia ae buuaine, tiina, ao tiibuaine, n tabeia ae taari aine ao ai tiina, n tabeia ae taan reirei ao taan kairiiri; ao riki tabeia bwa taan kaota te banna ni katooto ae tamaroa ao taan kamanoa te euangkerio ao te Ekaretia.³

E a tia ni kakoauaki aei ni koron bongin te euangkerio man aia tai Atam ao Ewa. E ngae n anne ao aine ni bong aikai a kaokoro mairouia aine riki tabeman, ibukina bwa te bong aei e kaokoro ma boong riki tabeua.⁴ Te bitaki aei e uota te tibwanga ao te mwakuri.

Tenibwi ma onoua te ririki n nako, n te 1979, President Spencer W. Kimball e anga te taetae ni burabeti ae nano irouia aine ake a tia ni karaoi berita aika a tabu n te Ekaretia nakon taai aika na roko. E taetae ni burabetiia: “Mwaitin te rikirake ae korakora are e roko nakon te Ekaretia n te kabanea ni bong e na roko bukin mwaitia aine aika raraoi n te aonaaba … a na katikaki nakon te Ekaretia n te aro ae mwaiti. E na riki aei nakon te karinan are ainen te Ekaretia a kaota te raoiroi ao te wanawana ni maiuia ao te karinan are ainen te Ekareia a taraaki bwa a onoti ao a kaokoro—n aroia ni kukurei—mairouia ainen te aonaaba.”⁵

Mwaaneu aika tangiraki, ngkami ara reitaki aika kam kakawaki inanon kabanea ni bong, te bong are e a kaman noria Beretitenti Kimball bon te bong aei. Ngkami aine aika a kaman noraki! Tamaroam, otam, am tangira, am atatai, am onimaki, ao maium ae raoiroi e na anai nanoia aine n te aonaaba, n raonaki ma aia utu, nakon te Ekaretia n te mwaiti ae bati nakon are mai mwaina!⁶

Ngaira, aika mwanemi, ti kainnanoa korakorami, rairakimi, kabaeakimi, ami konabwai ni kairiiri, wanawanami, ao bwanaami. “Abanuean te Atua e bon aki ao n aki kona ni bwanin ngkana akea aine aika a karaoi berita aika tabu, ao man kawakini, aine aika a kona n taetae ma te mwaaka ao man ana kariaia te Atua⁷

Beretitenti Packer e taekinna:

“Ti kainnanoia aine aika a barongaaki raoi ao aine aika kona ni karaoi babaire. Ti kainnanoia aine aika iai aia konabwai ni kairiiri aika kona ni babaire ao ni kaetieti ao n tararua; aine aika kona n reirei, aine aika kona ni kaoti bwanaaia. …

“Ti kainnanoia aine aika iai irouia bwaintangira n nonori aika a kona n noori bitaki n te aonaaba ao ni kunei aika, a kinaaki, aika aki boboto iaon te koaua ke aika a kakamaku.”⁸

N te bong aei, ti kainnanoia aine aika a ataa aron karaoan bwaai aika a kakaawaki man aia onimaki ao aika a ninikoria ni katani iango aika eti ao utu n te aonaaba ae onrake n te bure. Ti kainnanoia aine ake a babane nanoia ni kawakiniia natin te Atua ni kawain te berita nakon te karietataaki; aine ake a ataia bwa a na kanga ni karekea te kaotioti ae onoti, ake a ota ni mwaakan ao raun te entaumente n te tembora, aine ake a ataia bwa a na kanga ni wetea mwaakan karawa ni kamanoia ao ni kakorakoraia natiia ao aia utu; aine aika a reirei n aki maaku.

Inanon maiu, I a tia ni kabwaia man au reitaki ma aine aikanne. Kainnabau ae e a tia ni motirawa, Dantzel, bon te aekaki n aine anne. N na teimatoa ni karabwarabwa ibukin korakorana ae bita te maiu n ni kabane iteran nako maiu, n ikotaki ma au mwakuri ni katabwena n te korokoro n te buroo.

Nimabwi te ririki n nako I tuangaki bwa N na karaoa te korokoro iaon te ataeinaine, are e kakaiaki aorakina ibukin aorakin buroona ae e bungiaki ma ngaia. Mwanena ae ikawai riki e a tia ni mate n aorakina naba anne. A bubuti ana karo buokana. Akea au kantaninga bwa e na buokaki n te korokoro, ma I berita bwa N na karaoi bwaai ni kabane aika I kona ni kamaiua. E ngae ngke I karaoa au kabanea n tamaroa n au mwakuri, e mate te ataei. Imwiina, kaaro naba akanne a uota riki natiia te aine n te tai naba anne tii 16 ana namwakaina, e bungiaki naba ma buroona ae aki raoiroi. Man aia bubuti, ao I a manga karaoa naba te mwakuri ni korokoro. E mate naba te ataei aei. Kakoauakin te mate ae kananokawaki te kateniua n tai n te utu ae tii teuana e karika te rawawata ae korakora nakoiu.

I okira mweengau ni kaonaki n te nanokawaki. I bwaka nako aontano n ara ruu ni katangaina ao n tang n takarua ni kabanea te tairiki anne. Dantzel e tiku irarikiu, ni kakauongo ngke I kaokiokia n takaruaia bwa N na aki manga oki ni karaoa te korokoro n te buro. Ngkanne, ngke e a kaan 5.00 n te Moaningabong, e taraai Dantzel ao n titiraki ma te tangira, “E a toki tangim? Ngkanne karin am kunnikai. Oki nakon te onaoraki. Naako mwakuri! Ko riai n reiakina riki ae bati. Ngkana ko aki karaoia ngkai, tabeman a na maraki n reiakina te bwai ae ko a kaman ataia.”

O, I kainanoa raoi otan, matoatoan, ao ana tangira kainnabau! I oki rikaaki ni mwakuri ao n reirei riki. Ngke arona bwa akea ana kaunganano Dantzel, N na bon aki rabakau karaoan te korokoro nakon te buroo ao N na bon aki tauraoi ni karaoa te korokoro n 1972 are e a kawakinaki iai maiun Beretitenti Spencer W. Kimball.⁹

Mwaaneu, kam namakina kangaangan reken mwiin ami anainano ngkai kam taetae iaon bwaai aika kam iangoi ma n namakin ao ake a kaineti ma te Tamnei? Te beretitenti n te titeiki ae moan te tikiraoi e tuangai te bootaki ni kauntira n te titeiki ike a maroroakina iai taekan te bwai ae moan te kangaanga. Akea te karongoa n tain te bootaki, ngke e kunea bwa te beretitenti n te Moanrinan e tuai man taetae, ngaia ae e titirakina ngkana iai ana iango ae na tibwauaia. “Eng, ni bon arona iai,” e taku ao e a waaki n tibwaua ana iango are e bita kanoan te boowi. E reitia nako te beretitenti n te titeiki, “Ngke e taetae, te tamnei e kakoaua nakoiu bwa neiei e taekina te kaotioti are ti kakaea ni bootakira ni kauntira.”

Mwaaneu aika tangiraki, n aki tabe bwa tera nakoami, ti kainnanoa nanomi, ami atatai n noori koauan bwaai aika raba, ao ami kairami iroun te tamnei. Ti kainnanoi ngkami bwa kam na kabaibati n taetae inanon uoote ao ni kauntiran te titeiki. Ti kainnanoia buuaine nako bwa a na taetae n “aroia ni ibuobuoki ao ni bwanin nanoia ”¹⁰ n am tai ni katiteuanaaki ma kainnabami ni kairaia ami utu. Ae tia ni mare ke e tuai, ngkami aine iai iroumi te konabwai ao te taratara ae onoti ae kam a tia ni karekei bwa bwaintangira mairoun te Atua. Ngaira mwaane ti aki kona ni karaka aromi ae onoti anne.

Ti ataia bwa te moan tamaroa mai buakon karikibwai nako bon karikan te aine!11¹¹ Ti kainnanoi korakorami!

Kaitaran te Ekaretia, ana reirei, ao aron maiura a na rikirake. Ibukin aei, ti kainnanoia aine aika a matoa aan aia atatai n ana tua Kristo ao ake a na kamanena te atatai anne n reireia ao ni buoka tobwaan te roro ae kona n kaitara te bure.¹² Ti kainnanoia aine ake a kona ni kinaa te mwamwanaaki n aekaia nako. Ti kainnanoia aine ake ataia bwa a na kanga n rin ni mwaakan te Atua are e tauraoi nakoia taan kawakin aia berita ao ake a kaota aia koaua ma te onimaki ao te tangira ae kororaoi. Ti kainnanoia aine aika iai irouia te ninikoria ao n ana taratara Tinara ae Ewa.

Mwaaneu aika tangiraki, akea te bwai ae kakawaki riki ni maium ae akea tokina nakon ae bon oin rairakimi. Bon aine aika rairaki, man kawakin berita aika tabu —aine n aron kainnabau ae tangiraki Wendy—are maiuia aika raoiroi a na rikirake n ootara n te aonaaba ae rikirake ni buakaka ao a na taraaki bwa a kaokoro man n onoti n aaro aika a kakukurei .

Ngaia ae n te bong aei, I bubutia mwaaneu n Ana Ekaretia Iesu Kristo ibukiia Aika Itiaki ni Boong aika Kaitira bwa a na keerake! Taua ami tabo ae eti ao ae kainnanoaki, n oin mweengami, n ami kaawa, ao n abanuean te Atua—ae riaon riki ae kam tuai kakarekea mai imwaina. I bubutiko bwa ti na kakoroa nanon ana taeka ni burabeti Beretitenti Kimball. AAo I berita nakoimi n aran Iesu Kristo, ae ngkana kam karaoia, ao e na kakorakorai ami anainano te Tamnei ae Raoiroi ni kawai aika akea kabotauaia!

I kaota au kakoaua bwa e maiu te Uea Iesu Kristo ao Mwaakana ni kabooira, ni kamaiu, ao ni kaitiakiira. Ao ngkai ngai temanna Ana Abotoro, I karabwai ngkami mwaaneu aika tangiraki, ao ni kakabwaiai ngkami bwa kam na kakoroa nanon te kantaninga n ami karikibwai, ngkai ti bane n ibuobuoki n te mwakuri ae tabu aei. Ngaira ni kabane ti na ibuobuoki ni katauraoa te aonaaba ibukin Kauaokin te Tia Kamaiu. N aei ao I kakoaua, n tabeu ae mwanemi, n aran Iesu Kristo, amen.

Bwaai aika a na taraaki

1. Taraa Biribi 4:7.

2. Aio e raonaki ma rannimata—ni kawakinan tuua n tang ibukiia ake ti tangiriia ngkana a kiitana te maiu aei (taraa Reirei ao Berita aika Tabu 42:45).

3. Taraa aron Rebeka ni bita Itaaka ao natina Iakobwa ni Karikan Bwaai 27:46; 28:1–4.

4. Taraa Joseph Fielding Smith, Answers to Gospel Questions, comp. Joseph Fielding Smith Jr., 5 waorium. (1957–66), 4:166. Katanoata: Koron boong aika a nako a tianaki ni mwakorokoro aika uarereke n te aonaaba ao a bane ni bua n tain kitanan te koaua. Ni kabotauaki, ma koron boong ae ngkai e na bon aki tianaki n te tabo ke n te tai. E na kaona te aonaaba ao e na airi ma Kauaokin te Uea.

5. Teachings of Presidents of the Church: Spencer W. Kimball (2006), 222–23.

6. Ngke I moan bungiaki, mwaitiia kain te Ekaretia e kee iaan 600,000. N te bong aei e raka iaon 15 te mirion. Te mwaiti anne e na reitinako n rarakanako.

7. Beretitenti Joseph Fielding Smith e tuangiia aine n te Botaki n Aine, “Kam kona n taetae ma te kariaiakaki, ibukina bwa te Uea e a tia n angani ngkami te kariaia.” E taekinna naba bwa te Botaki n Aine e “a tia n anganaki te mwaaka ao te kariaiakaki ni karaoi bwaai aika mwaiti aika a korakora. Te mwakuri are a karaoia e karaoaki man te kariaia mai ieta”” (“Relief Society—an Aid to the Priesthood,” Relief Society Magazine, Jan. 1959, 4, 5). Taeka aikai a taekinaki naba iroun Unimwaane Dallin H. Oaks n ana taetae n te maungatabu, “The Keys and Authority of the Priesthood,” Ensign ke Riaona, Meei 2014, 51.

8. Boyd K. Packer, “The Relief Society,” Ensign, Nobembwa. 1978, 8; taraa naba M. Russell Ballard, Counseling with Our Councils: Learning to Minister Together in the Church and in the Family (1997), 93.

9. Taraa Spencer J. Condie, Russell M. Nelson: Father, Surgeon, Apostle (2003), 146, 153–56. Katanoata: N 1964 Beretitenti Kimball e katabuai bwa N na riki bwa te beretitenti n te titeiki ao e kakabwaiai bwa mwaitin te mate e na keerikaaki n au moan waaki n te mwakuri ni korokoro n te buroo. E karako iroura ae e ataia bwa waniua te ririki imwiina, N na karaoa te korokoro iaon Beretitenti Kimball ibukin onean bwaibun buroona.

10. “Ngkana ti taekina te mare bwa te aro n reitaki, ti na taekina te mare bwa te aro n reitaki ae bwanin. Ti aki tangiriia aine Aika Itiaki bwa a na riki bwa rao aika kainabwabu ke n tianaki ni mwiokoaia ane akea tokina anne! Riiki bwa te rao ae ibuobuoki ao ae bwanin nanona” (Spencer W. Kimball, “Privileges and Responsibilities of Sisters,” Ensign, Nobembwa. 1978, 106).

11. “Ni kabane kaantaninga n te aonaaba ao ni kabane bwaai n te aonaaba a na aki koro nanoia ngkana akea te aine—atibun te maninganinga n te Nakoanibonga n te karikibwai” (Russell M. Nelson, “Lessons from Eve,” Ensign, Nobembwa. 1987, 87). “E riki Ewa bwa ana kabanea ni karikibwai te Atua, te kabanea mai ieta mai buakon te mwakuri ae korakora ae e a tia n riki” (Gordon B. Hinckley, “The Women in Our Lives,” Ensign or Liahona, Nobembwa. 2004, 83).

12. Taraa Russell M. Nelson, “Children of the Covenant,” Ensign, Meei 1995, 33.