I Mimi n Ana Tangira
Iroun Unimwaane Ronald A. Rasband
Man te Kooram n Abotoro n te Tengaun ma Uoman
Au koaua iroun Iesu Kristo e reke man baika a riki i nanon maiu aika a onoti are I ataa iai Ana tangira ae korakora ibukira n tatabemaniira nako.
Tariu ao mwaneu aika a tangiraki, I rangi ni kakaitau nakon te Moan Beretitentii ibukin anganakiu te tibwanga bwa N na tibwaua au koaua n te Tabati aei. Au namakin n te tai aei e kona ni kabwarabwaraki n taekan te kuna ae kangai:
I mimi n ana tangira Iesu ibukiu,
I mwaninga ngke anganai ana tangira. …
I mimi bwa e na kitana ueana i karawa
Ni kamaiuia te tamnei ae kainikatonga,
E korakora ana tangira i buku,
N ana tangira e kamaiuai bwa a na bwai. …
E boni kamiimi tangirau irouna!!1
Tabeua te bong n nako e reke tibwangau ae onoti ni kaitibo ma Te Moan Beretitentii ao ni karekea te wewete aei mairoun ara burabeti ae tangiraki, Beretitenti Thomas S. Monson. I tangiria ni kakoaua nakoimi ni kabane aron korakoran ao ana tangira Beretitenti Monson n aron are e taekinna nakoiu, “E roko te wewete aei mairoun te Uea Iesu Kristo.”
I rangi ni kakatonga ao n rootaki ngke I iangoa kakaawakin ao bonganan taeka aikanne aika a taekinaki ma te tangira iroun ara burabeti ae tangiraki. Beretitenti Monson, Beretitenti Eyring, Beretitenti Uchtdorf, I tangiri ngkami ao N na beku ibukin te Uea ao ngkami ma nanou ni kabane, ao n tamneiu, ni wanawanau, ao ni korakorau ni kabane.
O, e korakora au tangira ibukiia Beretitenti Boyd K. Packer, Unimwaane L. Tom Perry ao Richard G. Scott. I rangi ni mitiniia. I rangin ni kakabwaiakaki bwa I a tia ni kataneiaaki ao n reireinaki irouia Taari aika tangiraki aikai. I aki tau bwa N na onea mwiin temanna mai irouia, e ngae n anne ao I karineaki bwa N na weteaki nakon te kooram are a mwakuri iai, ao ni waakina nako ana mwakuri te Uea.
Ngke I iangoia naake ake a tia ni buokai ni karikai bwa antai Ngai, I iangoa moa raou n te maiu ae akea tokina ae tangiraki ao n tangira, Melanie. Inanon ririki, ao e a tia ni buokai ni karikai bwa ana reirei Kristo ae nakoraoi. Ana tangira ao ana ibuobuoki, ao natira ake 5, buuia, ao tibura aika 24, a boutokaai. Nakoia au utu aika tangiraki, I tangiri ngkami.
Kanga aron te burabeti ngkoa ae Nibwaai, I a tia ni bungiaki irouia kaaro aika a tamaroa inanon te euangkerio ao au bakatibu a nako mai irouia aika tamaroa n okirikaaki nakon onoua te roro. Au bakatibu aika kain te Ekaretia a nako mai England ao Denmark. Bwaeoniia n taai akekei anga aia bwai ake iai irouia bwa a na maiuakina ana euangkerio Iesu Kristo ao ni katuka te kawai ibukiia aia kariki bwa a na iria. I rangin ni kakaitau ibukiia utu ake a tia ni kaina te Ekaretia inanon te tai ae maan. I ataia aio te kouru ae uaana ibukira ni kabane bwa ti na kataia ni kakoroa bukina.
A mwaiti aika a tia ni buokai ni katauraoa maiu ibukin te wewete ae boou aei. A raonaki ma raoraou ao au utu, taan kairiiri n te Ekaretia, ao ara taan kairiri. I riai ni kariniia naake man au mition ngkoa nakon te Eastern States ao ara mitinare aika tangiraki man te New York New York North Mission. I kakaitau ibukiia aomata ake man korakoraia ao e rotaki man bweenaki iai maiu.
I a tia ni kukurei ni mwakuri ma Tariu n te Itingaun. I a tia n riki bwa kaain te kooram ae te kabanea n tamaroa ao te tari n te Ekaretia ae tangiraki ibukin 15 te ririki. Kam rabwa, raoraou aika kam tangiraki. Ngkai e ingainga nanou ni kan riki bwa temanna kain te kooram ae boou. Beretitenti Russell M. Nelson , e korakora au tangira ibukim ao ibukiia ni kabane kaain te Kooram n Abotoro n te Tengaun ma Uoman.
Ngai ma Titita Rasband ti kakabwaiaaki bwa e reke ara tai ni kawariia membwa i nanon karaon tibwangara aika mwaiti ibukiia kaain te aro ao te mition ni kabuta te aonaaba. Ti tangiria Aika Itiaki ni Boong Aika Kaitira! E a tia am onimaki ni karikirakei ara onimaki; a tia ami koaua ni karinaki nakon ara koaua.
N te tai aei, ngkana e na iai au reirei ae N na katikua iroumi, bon aio: e taku ana taeka te uea “Itangitangiri i marenami, n ai arou ae I tangiri ngkami.”2 Akea au nanououa bwa bon akea te rinerine, te bure, ke te kairua ae ko karaoia ke ae karaoia te aomata ae kona ni bita Ana tangira ibukim ke ibukiia. Tiaki nanon anne ae E kariaia ke ni butimwaai mwakuri aika bure—I koaua E aki kona—ma e nanonaki bwa ti riai ni karoko irouia aomata nako n te tangira ni kaoia, anai nanoia, beku, ao ni kamaiu. Iesu Kristo e aki tabe bwa kaain iia, tera ana mwakuri, ao bwaai ake e rinanoi bwa kam aonga n reireiniia te koaua ae nano aei.
I a tia n tuangaki n te tai ae mwaiti ngke I karekea au koaua.
I aki kona n uringa ae I aki kakoaua te Tama are i Karawa ao Iesu Kristo. I a tia n Tangiriia man te tai are I kinaia iai man te tai are I reirei Taekaia ngke I katorobubua irarikin tinau, ae ai aron taraakin te anera irou, wareware man booki aika tabu ao reirein te euangkerio. Te onimaki e a tia ngkai n rikirake nakon te atatai ao te kakoaua n tangiran te Tama are i Karawa, are e ongo ao e kaekai ara tataro. Au koaua iroun Iesu Kristo e reke man baika a riki i nanon maiu aika a onoti are I ataa iai Ana tangira ae korakora ibukira n tatabemaniira nako.
I kakaitau ibukin ana Mwakuri ni Kamaiu ara Tia Kamaiu ao nanou ai aron Aramwa bwa N na takaruaeia ni bwanaan te Atua.3 I ataia bwa Iotebwa Timiti bon ana burabeti te Atua n Kaokan te euangkerio ao Ana Boki Moomon bon ana taeka te Atua. I ataia bwa Beretitenti Thomas S. Monson bon ana toro ao ana burabeti te Atua i aon te aba n te bong aei.
Ngkai ti iriira ara burabeti, I tataro bwa ti na bwaina te tangira nakoia tabeman ao n riki bwa taan kakoaua aika a maiu ao ni “mimi n ana tangira Iesu i [buku].” O, e bia “kamiimi, kamimi [nakoim ao] nakoiu.” N aran Iesu Kristo, amen.