O Se Talosaga i O’u Tuafafine
Saunia e Peresitene Russell M. Nelson
Peresitene o le Korama a Aposetolo e Toasefululua
Matou te manaomia lo outou malosi, lo outou liua, lo outou talitonuga maumaututu, lo outou tomai e taitai, lo outou atamai, ma o outou leo.
Uso Pele Rasband, Stevenson, ma Renlund, o i matou, o outou Uso, e faafeiloai atu ia te outou i le Korama a Aposetolo e Toasefululua. Tatou te faafetai i le Atua mo faaaliga ua Ia tuuina atu i Lana perofeta, o Peresitene Thomas S. Monson.
Uso e ma tuafafine, ina ua tatou feiloai i le konafesi aoao i le ono masina talu ai, sa leai se tasi o i tatou na mafaufau i suiga ua oo mai o le a matuai aafia loloto ai lagona o le Ekalesia atoa. Sa tuuina atu e Elder L. Tom Perry se savali mamana e uiga i le matafaioi e le masuia lea e saofai ai le faaipoipoga ma le aiga i le fuafuaga a le Alii. Sa matua faateia i matou i na o nai aso mulimuli ane, sa matou iloa ai e le o toe mamao ae toesea lea o ia mai ia i matou ona o le kanesa.
E ui ina sa fai ifo le soifua maloloina o Peresitene Boyd K. Packer ae “sa faaauau pea ona galue malosi” i le galuega a le Alii. Sa augavaivai o ia ia Aperila talu ai, ae sa naunau lava e tuu atu lana molimau po o le a lava le umi e soifua ai. Ona, na o le 34 aso talu ona tuumalo Elder Perry, ae fai i lagi foi le folauga a Peresitene Packer.
Sa tatou misia Elder Richard G. Scott i la tatou konafesi aoao talu ai, ae tatou te mafaufau i le molimau mamana e uiga i le Faaola na ia saunoa ai i le tele o konafesi ua mavae. Ma i le na o le 12 aso talu ai, ua valaauina ai Elder Scott e toefoi atu i le aiga ma toe faatasia ma lana pele ia Jeanene.
Sa ou maua le avanoa e mafuta ai ma nei Uso uma i o latou toe taimi, e aofia ai ma le faatasi atu ma tagata o aiga o Peresitene Packer ma Elder Scott a o lei tuumalo. Sa faigata ia te au ona talitonuina ua faafuasei lava ona mou atu nei uo faapelepele e toatolu, nei auauna ofoofogia a le Alii. Ua ou matua misia lava i latou e le mafai e a’u upu ona faamatala.
A o ou manatunatu i nei mea e lei faamoemoeina, o se tasi o mea sa ou matauina o se mea lea na ou vaaia i nei faletua o loo soifua pea. E le mafai ona galo ia te au le toafilemu o fofoga o Sister Donna Smith Packer ma Sister Barbara Dayton Perry a o saofafai ai i autafa o tofaaga o o la’ua alii, sa taufai tutumu nei tamaitai i le alofa, upumoni, ma le faatuatua mama a’ia’i.
A o saofai Sister Packer i autafa o lona alii i nai ona toe itula, sa ia faasusuluina mai lena filemu e silisili i mea uma e manatu i ai. E ui sa ia silafia e le o toe mamao ona tuua lea e lana soa pele ua toeitiiti atoa le 70 tausaga, ae sa ia faaalia lava le filemu o se tamaitai ua tumu i le faatuatua. Sa foliga mai o se agelu, pei lava ona i ai i lo la ata lea i le faapaiaga o le Malumalu o Brigham City Iuta.
Sa ou vaaia foi lena lava ituaiga alofa ma le faatuatua o susulu mai ia Sister Perry. O lona tuuto atu i lana tane ma le Alii sa iloagofie, ma sa matuai tuia ai lava lo’u loto.
Na ala mai i toe taimi o a laua tane, ma e oo mai lava i le taimi nei, ua faaalia ai e nei tamaitai mausali le malosiaga ma le lotototoa lea e faaalia pea e tamaitai tausi feagaiga. Na ala mai i toe taimi o a laua tane, ma e oo mai lava i le taimi nei, ua faaalia ai e nei tamaitai mausali le malosiaga ma le lotototoa lea e faaalia pea e tamaitai tausi feagaiga. O le a le mafai ona fua le faatosinaga a nei tamaitai faapea, e le gata i aiga ae faapea i le Ekalesia a le Alii, o ni ava, tina, ma tinamatutua; o ni tuafafine ma ni aunts; o ni faiaoga ma taitai; aemaise ai o ni faataitaiga aupito silisili ma ē puipuia ma le faamaoni le faatuatuaga.
Na moni lenei mea i tisipenisone uma talu mai ona po o Atamu ma Eva. Ae o tamaitai o lenei tisipenisione e tulaga ese mai isi lava tamaitai aua e tulaga ese lenei tisipenisione mai se isi lava [tisipenisione]. O lea tulaga ese ua aumaia ai avanoa e le laumaua ma tiutetauave.
O le tolusefulu-ono tausaga talu ai, i le 1979, na fofogaina mai ai e Peresitene Spencer W. Kimball se valoaga maoae e uiga i le aafiaga o le a i ai tamaitai tausi feagaiga i le lumanai o le Ekalesia a le Alii. Sa ia valoia, “O le tele o le faatupulaia ua oo mai i le Ekalesia i nei aso e gata ai, o le a oo mai ona o le toatele o tamaitai lelei o le lalolagi … o le a tosina mai i le Ekalesia i ni vaega toatele. O le a tupu lenei mea i se maualuga e faapea ona atagia mai ai i tamaitai o le Ekalesia le amiotonu ma le tulaga lelei i o latou olaga, atoa foi ma le maualuga o loo vaaia ai tamaitai o le Ekalesia o ni tamaitai iloga ma le tulaga ese—i ni tulaga fiafia—mai tamaitai o le lalolagi.”
Ou tuafafine pele, o outou o e o a matou paaga taua i lenei toe taimi, o le aso na valoia e Peresitene Kimball o le taimi nei. O outou o tamaitai na muai vaai i ai! O lo outou amioatua, malamalama, alofa, poto, lotototoa, uiga, faatuatua, ma olaga amiotonu o le a tosina mai ai tamaitai lelei o le lalolagi faatasi ai ma o latou aiga, i le Ekalesia i ni aofaiga e le mafaitaulia!
O i matou, o o outou tuagane, e manaomia lo outou malosi, lo outou liua, lo outou talitonuga maumaututu, lo outou tomai e taitai ai, lo outou atamai, ma o outou leo. E le mafai ona atoa le malo o le Atua ma e le mafai lava ona atoa e aunoa ma tamaitai o e osia feagaiga paia ona tausia lea, o tamaitai o e e mafai ona tautatala atu ma le mana ma le pule a le Atua!
Na tautino mai e Peresitene Packer:
“Matou te manaomia tamaitai o e ua faatulagaina lelei ma tamaitai e mafai ona faatulagaina [ni mea]. Matou te manaomia tamaitai e i ai tomai faapitoa o e e mafai ona fuafuaina ma faatonutonu ma faatautaia; o tamaitai e mafai ona faiaoga, o tamaitai e mafai ona tautatala atu ma le le fefefe. …
“Matou te manaomia tamaitai e i ai le meaalofa o le iloatino o e e mafai ona iloa taualumaga i le lalolagi ma iloaina i latou o e e le faavaea i upumoni pe lamatia foi, e tusa po o le a le lauiloa i fea.”
O le asō, sei ou faaopoopo atu faapea matou te manaomia ni tamaitai o e iloa le ala e faia ai mea taua ia tutupu e ala i lo latou faatuatua, ma e e puipuia ma le lotototoa le ola mama ma aiga i se lalolagi ua tumu i le agasala. Matou te manaomia ni tamaitai o e o tuuto atu i le taialaina o fanau a le Atua i le ala o feagaiga agai atu i le faaeaga; o tamaitai e iloa le ala e maua ai faaaliga patino, o e malamalama i le mana ma le filemu o faaeega paia o le malumalu; o tamaitai o e iloa pe faapefea ona valaau atu i mana o le lagi e puipui ma faamalolosia fanau ma aiga; o tamaitai o e aoao atu ma le le fefefe.
I lo’u olaga atoa, sa faamanuiaina au e ia ituaiga o tamaitai. O lo’u toalua ua maliu, o Dantzel sa o se tamaitai faapena. O le a tumu pea au i le faafetai mo lana faatosinaga na suia ai lo’u olaga i vaega uma o lo’u olaga, e aofia ai ma a’u taumafaiga e atinae ni faiga fou e faatino ai taotoga o fatu.
Limasefulu-valu tausaga talu ai, sa talosagaina ai au ou te faia se taotoga o se teineitiiti, sa matuai ma’i tigaina i se ma’i fatu na fanau mai ma ia. O lona tuagane matua na maliu muamua atu i se tulaga foi faapena. Sa augani mai ona matua mo se fesoasoani. Sa lei i ai so’u faamoemoe o le a aoga lena taotoga, ae sa ou tautino atu e faia mea uma ou te mafaia e laveai ai lona ola. E ui i a’u taumafaiga silisili, ae sa maliu le teineitiiti. Mulimuli ane, na toe aumai foi e matua lava nei se isi afafine ia te au, i lena taimi faatoa 16 masina le matua, sa fanau mai foi ma se faaletonu o le fatu. I le la toe talosagaina o a’u, sa ou toe faia foi le taotoga. Sa maliu foi lenei tamaitiiti. O lenei maliu lona tolu faamomoiloto i le aiga lava e tasi, na matuai lofituina ai au i le lotonutimomoia.
Na ou alu i le fale ua matua tumu i le faanoanoa. Sa ou faapau ifo i le fola o lo matou potu malolo ma tagi ai i le po atoa. Sa nofonofo Dantzel i o’u autafa, ma faalogologo a o ou tautino atu faafia o le a ou le toe faia lava se isi taotoga o se fatu. Ona oo lea pe tusa ua ta le 5:00 i le taeao, sa tilotilo mai Dantzel ia te au ma fesili mai ma le alofa, “Ua uma lou tagi? Alu la’ia e fai ou lavalava. Ma toe foi i le falemai. Alu e faigaluega! E manaomia ona e toe saga aoao atili. Afai e te faamaamulu nei, o le a aoaoina e isi ma le tiga le mea ua uma ona e iloa.”
Oka, sou manaomia o le vaaiga mamao a lo’u toalua, o le mausali, ma le alofa! Sa ou toe foi e faigaluega ma aoao atili ai. Pe ana leai le faamalosiauga musuia a Dantzel, semanu ou te le maua le tomai e faia ai taotoga o fatu ma semanu ou te le saunia e faia le taotoga i le 1972 lea na faasaoina ai le soifua o Peresitene Spencer W. Kimball.
Tuafafine, o outou silafia le lautele o le aafiaga o a outou faatosinaga pe a outou tautala atu i na mea e oo atu i o outou loto ma mafaufau a o faatonutonuina ai e le Agaga? Sa ta’u mai e se peresitene maoae o se siteki i se fonotaga a le aufono a le siteki lea sa latou tauivi ai ma se luitau faigata. I se tasi taimi, sa ia matauina ai e lei saunoa lava le peresitene o le Peraimeri, o lea na ia fesili ai pe na i ai ni ona manatu e fia faasoa. “Ia, o le mea moni lava, e i ai,” sa ia fai atu ai ona faaauau lea ona ia faasoa atu o se manatu na suia ai le itu na agai i ai le fonotaga atoa. Sa toe saunoa mai le peresitene o le siteki, “A o saunoa o ia, sa molimau le Agaga ia te au o la sa tautala mai o ia i se leo o le faaaliga lea sa matou tau sailia o se aufono.”
Ou tuafafine pele, po o le a lava lou valaauga, po o a lava ou tulaga, e manaomia ou manatu, o lou silafia, ma au musumusuga. Matou te manaomia oe e te saunoa mai i aufono a uarota ma siteki. Matou te manaomia tuafafine taitoatasi ua faaipoipo e saunoa mai “o se soa e saofaga ma atoa” a o oulua tutu faatasi ma lau tane i le puleaina o lo oulua aiga. Pe faaipoipo pe nofofua, ua ia te outou tuafafine ni gafatia iloga ma uunaiga faapitoa ua outou mauaina o ni meaalofa mai le Atua. E le mafai e i matou o le itupa o alii ona suitulaga i la outou faatosinaga tulaga ese.
Ua tatou iloa e faapea o le galuega faaiu ma le silisili o le foafoaga uma, o le foafoaina lea o le fafine! Matou te manaomia lo outou malosi!
O le a faateleina osofaiga e faasaga i le Ekalesia, o ona aoaoga faavae, ma le ala o loo tatou ola ai. Ona o lena mea, tatou te manaomia ai tamaitai o e ua i ai se malamalama mausali i aoaoga faavae a Keriso ma o le a faaaogaina lena malamalama e aoao atu ai ma fesoasoani e atinae se tupulaga e mafai ona tetee atu i le agasala. Tatou te manaomia tamaitai o e e mafai ona iloa le taufaasese i ona foliga uma. Tatou te manaomia tamaitai o e ua iloa le ala e maua ai le mana ua faaavanoa mai e le Atua i e tausia feagaiga ma e e faaalia o latou talitonuga ma le talitonuga maumaututu ma le alofa moni. Tatou te manaomia tamaitai o e lotototoa ma i ai le vaaiga mamao a lo tatou Tina o Eva.
Ou tuafafine pele, e leai se isi mea e sili ona taua i lou ola e faavavau nai lou lava liua. O tamaitai ua liua ma tausi-feagaiga—tamaitai e pei o lou toalua pele o Wendy—o o latou soifua amiotonu o le a tu matilatila atili i se lalolagi ua fai ifo, ma o le a vaaia e iloga lava ma e ese foi i auala e sili ona fiafia.
O lea la, o le asō, ou te augani atu ai i o’u tuafafine o Le Ekalesia a Iesu Keriso o le Au Paia o Aso e Gata Ai e laa i luma! Tu i lou tulaga tonu ma le manaomia i lou aiga, i lou nuu, ma i le malo o le Atua—ia sili atu nai lo le mea sa i ai muamua. Ou te augani atu ia outou faataunuuina le valoaga a Peresitene Kimball. Ma, ou te folafola atu ia te outou, i le suafa o Iesu Keriso, a outou faia lena mea, o le a faateleina e le Agaga Paia lau faatosinaga i se ala e matua sili atu nai lo le mea sa i ai!
Ou te molimau atu i le moni o le Alii o Iesu Keriso ma Lona mana togiola, faaola, ma faapaiaina. Ma, i le avea ai o se tasi o Ana Aposetolo, ou te faafetai atu ia te outou, o’u tuafafine pele, ma faamanuia atu ia te outou ia outou tulai ae ia ausia lo outou gafatia atoa, ina ia faataunuu ai le fuataga atoa o lou foafoaga, a o tatou savavali soosoo tauau ai i lenei galuega paia. Tatou tutu faatasi, e fesoasoani i le tapenaina o le lalolagi mo le Afio Mai Faalua o le Alii. Ou te molimau atu ai i nei mea, i le suafa o Iesu Keriso, amene.