Avea ma se Faataitaiga ma se Malamalama
Saunia e Peresitene Thomas S. Monson
A tatou mulimuli i le faataitaiga a le Faaola, o lo tatou avanoa lea e avea ai ma se malamalama i olaga o isi.
Uso e ma tuafafine, ua matagofie lava le toe faatasi ai foi ma outou. E pei ona outou silafia, talu mai le tatou faatasiga ia Aperila, ua tatou faanoanoa lava i le tuumalo ai o a tatou Aposetolo pele e toatolu: Peresitene Boyd K. Packer, Elder L. Tom Perry, ma Elder Richard G. Scott. Ua toefoi atu i latou i lo latou aiga faalelagi. Ua tatou misia lava i latou. Tatou te faafetai tele mo a latou faataitaiga o le alofa FaaKeriso atoa ai ma aoaoga musuia ua latou tuua ia i tatou uma.
Tatou te faafeiloai fiafia atu i a tatou Aposetolo fou, Elder Ronald A. Rasband, Elder Gary E. Stevenson, ma Elder Dale G. Renlund. O nei tamalii ua tuuto atu i le galuega a le Alii. Ua matua agavaa lelei i latou e faatumu ia avanoa taua ia ua valaauina i ai i latou.
Talu ai nei, a o ou faitauina ma mafaufau loloto i tusitusiga paia, na ou mafaufau ai lava i ni fuaitau patino se lua. Tatou te masani uma ai. O le mau muamua e mai le Lauga i luga o le Mauga: “Ia faapea ona pupula atu o lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.” O le mau lona lua o le mau na ou manatuaina a o ou mafaufau loloto i le uiga o le mau muamua. E maua i le Tusi a le Aposetolo o Paulo ia Timoteo: “Ia fai oe ma faaa’oa’o i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia.”
Ou te talitonu o le mau lona lua o loo faamatala mai ai i se vaega tele, le auala e mafai ai ona tatou faataunuuina le mau muamua. E avea i tatou ma faataitaiga o e talitonu [pe faatuatua] e ala i le ola i le talalelei a Iesu Keriso i upu, i amioga, i le alofa, i le loto, i le faatuatua, ma i le le gaoia. A tatou ola ai, o le a susulu atu lo tatou malamalama mo isi e vāai i ai.
Sa tatou o mai uma i le lalolagi ua tuuina i ai le Malamalama o Keriso. A tatou mulimuli i le faataitaiga a le Faaola ma ola e pei ona sa Ia soifua ai ma e pei ona sa Ia aoao mai, o le a mumu mai lena malamalama i totonu o i tatou ma o le a faamalamalama ai le ala mo isi.
Sa lisi mai e le Aposetolo o Paulo uiga paia e ono o se tagata talitonu, o uiga paia o le a faatagaina ai lo tatou malamalama ia susulu atu. Sei o tatou tagai i uiga paia uma taitasi.
Ou te taua faatasi uiga paia muamua e lua—o le avea ma faataitaiga i upu ma le amio. O upu tatou te faaaogaina e mafai ona siitia ma musuia, pe mafai foi ona faatiga ma faalumaina. I le lalolagi i le asō ua matua faateteleina le gagana masoa lea e foliga mai o loo siomia ai tatou i soo se vaipanoa. Ua faigata le aloese mai le faalogo atu i suafa o le Atua o loo faaaogaina faasamasamanoa ma le le mafaufau. O gagana masoa ua avea ma gagana masani i luga o televise, atatifaga, tusifaitau, ma musika. O ia talanoaga faasamasamanoa ua aofia ai faamatalaga faatiga ma gagana ita. Tatou talanoa atu i isi i le alofa ma le faaaloalo, ma ia tausia le mama o a tatou gagana i taimi uma. Ma aloese mai upu po o faamatalaga e faamanua pe faatiga [ai isi]. Tau lava o le tatou mulimuli i le faataitaiga a le Faaola, lea na fetalai ma le faapalepale ma le agalelei i Lana galuega atoa.
O le isi uiga paia na taua e Paulo o le alofa mama, lea e faamatalaina “o le alofa le pona o Keriso.” Ou te talitonu o loo i ai i latou i totonu o le lio o o tatou faatosinaga o e ua tuuatoatasi, i latou o loo mama’i, ma i latou ua lagonaina le faavaivai. O lo tatou avanoa lenei e fesoasoani ai ia i latou ma siitia o latou agaga. Na aumai e le Faaola le faamoemoe i ē na leai se faamoemoe, ma le malosi i ē na vaivai. Sa Ia faamalolo i ē mamai; sa Ia faasavavali ē na pipili, o tauaso na pupula, o ē logonoa na toe lagona. Sa Ia toefaatu mai foi ē na maliliu i le ola. I Lana galuega atoa sa Ia aapa atu ai i le alofa mama i soo se tasi na mafatia. A tatou mulimuli i Lana faataitaiga, o le a tatou faamanuiaina olaga, e aofia ai o tatou lava olaga.
O le isi, e ao ona avea i tatou ma se faataitaiga i le loto. Ia te au o lona uiga tatou te tauivi ia maua i o tatou olaga le agalelei, lotofaafetai, lotofaamagalo, ma le lotolelei. O nei uiga mama o le a tatou maua ai se agaga o le a pa’i atu i olaga o i latou o vagaia i tatou. Ua ou maua sea avanoa i le tele o tausaga e fegalegaleai ai ma le anoanoai o tagata o loo i ai lea agaga. Tatou te lagonaina se lagona faapitoa pe a tatou faatasi ma i latou, o se lagona e faaosofia ai i tatou e fegalegaleai ma i latou ma mulimuli i a latou faataitaiga. Latou te faasusulu maia le Malamalama o Keriso ma fesoasoani ia tatou lagonaina Lona alofa mo i tatou.
Ina ia faaali atu le malamalama e sau mai se loto mama ma le agaalofa lea e iloaina e isi, ou te fia faasoa atua se aafiaga o le tele o tausaga ua tea.
I lena taimi, sa feiloai ai taitai o le Ekalesia ma taitai i Ierusalema ina ia faagaoioi se maliliega o se lisi mo se fanua e fausia ai le Nofoaga Autu o le Ekalesia i Ierusalema. Ina ia maua la le faatagaga o loo manaomia, sa ao ai i le Ekalesia ona ioe e leai ni tala’iga e faia e o tatou tagata ia o le a nonofo i le nofoaga autu. Ina ua maea ona sainia le maliliega, o se tasi o taitai Isaraelu, o le sa masani lelei ma le Ekalesia ma ona tagata, sa saunoa e faapea, sa ia iloaina lava o le a faamamaluina e le Ekalesia le maliliega o le leai o se tala’iga. “Ae,” sa ia saunoa e faatatau i tamaiti aoga o le a aooga iina, “o le a se mea o le a tatou faia i le malamalama o loo i o latou mata?” Ia susulu mai pea lena malamalama faapitoa i taimi uma mai ia i tatou, ina ia iloaina ma talisapaia e isi.
Ina ia avea ma se faataitaiga o le faatuatua o lona uiga tatou te faalagolago i le Alii ma Lana afioga. O lona uiga tatou te umia ma faafaileleina talitonuga ia o le a taialaina o tatou mafaufauga ma a tatou amioga. O lo tatou faatuatua i le Alii o Iesu Keriso ma i lo tatou Tama Faalelagi o le a faatosinaina mea uma tatou te faia. I le lotolotoi o fenumiaiga o lo tatou olaga, o feteenaiga o le amiosa’o, ma le vāvāō o le olaga o aso uma, o se faatuatua tumau e avea ma se taula i o tatou olaga. Manatua o le faatuatua ma le masalosalo e le mafai ona i ai faatasi i le mafaufau e tasi i le taimi e tasi, aua o le a tuliese e le tasi le isi. Ou te faamamafa atu mea ua tau soo mai ia i tatou—ina ia maua ma faatumauina le faatuatua tatou te manaomia, e taua lo tatou faitauina ma suesueina ma le mafaufau loloto ia tusitusiga paia. O fesootaiga ma lo tatou Tama Faalelagi e ala i le tatalo e taua tele. E le mafai ona tatou lafoaia nei mea, aua o loo saili mai ma le tinoū le fili ma ana au mo o tatou vaivaiga, e faavaivaia ai lo tatou faatuatua. Na fetalai mai le Alii, “Saili ma le filiga, tatalo e le aunoa, ma ia talitonu, ma o le a galue faatasi mea uma mo lo outou lelei.”
Ma le mea mulimuli, e ao ona tatou mama, o lona uiga e ao ona tatou mama i le tino, mafaufau, ma le loto. Ua tatou iloa o o tatou tino o se malumalu, e ao ona taulimaina ma le migao ma le faaaloalo. O o tatou mafaufau e tatau ona faatumuina i mafaufauga musuia ma mamalu, ma ia saoloto mai mea na o le a faaleagaina ai. Ina ia maua le Agaga Paia e fai ma a tatou soa tumau, e tatau ona tatou agavaa. Uso e ma tuafafine, o le mama o le a aumaia ia i tatou le filemu o le mafaufau ma o le a tatou agavaa ai e maua ia folafolaga a le Faaola. Sa Ia fetalai, “Amuia e loto mama: aua latou te iloa atu le Atua.”
A tatou faamaonia i tatou e fai ma [faataitaiga] o e faatuatua i upu, le amio, i le alofa, i le loto, i le faatuatua, ma le [mama], o le a tatou agavaa e avea ma malamalama o le lalolagi.
Ou te fia faapea atu ia te outou uma, ae patino lava ia te outou le au talavou, a o agai ese pea ma le mamao le lalolagi mai mataupu faavae ma taiala na tuuina mai ia i tatou e se Tama Faalelagi alofa, o le a tatou tumatilatila mai le motu o tagata ona e ese ai lava i tatou. O le a tatou tumatilatila ona e tauagafau o tatou ofu. O le a ese ai i tatou ona tatou te le tautatala i upumasoa ma ona tatou te le faaoagaina vailaau oona e faatamaia ai o tatou tino. O le a ese i tatou ona tatou te aloese mai tausuaga eleelea ma faamatalaga faalumaluma. O le a ese i tatou pe a tatou filifili e lē faatumuina o tatou mafaufau i ata mataga ma faataumaoi ma mea o le a tuliesea le agaga mai o tatou aiga ma o tatou olaga. O le a tatou tutumatilatila ma le mautinoa pe a tatou faia ni filifiliga e faatatau i le ola mama—filifiliga e tausisia mataupu faavae ma tulaga faatonuina o le talalelei. O mea ia e faia i tatou ia ese ai mai le toatele o le lalolagi, tatou te maua ai foi lena malamalama ma lena agaga lea o le a susulu atu i se lalolagi ua faateleina le pogisa.
E tele lava ina faigata le avea ma se tasi e ese ai ma tu ai na o ia i le motu o tagata. O se lagona masani le fefe i mea e manatu pe talanoa ai isi. E mafanafana lava upu a le Fai Salamo: “O Ieova o lo’u malamalma ia, ma lo’u olataga: o ai ea se ou te fefe ai? O Ieova o le malosi ia o lo’u ola; ou te mata’u ea ia te ai?” A tatou faatotonugalemuina Keriso i o tatou olaga, o le a aveesea e le lototele o o tatou talitonuga maumaututu lo tatou fefe.
E leai ma se tasi o i tatou e atoatoa le olaga, ma i taimi o luitau ma faigata tatou te feagai ai, atonu e oo ina lofituina, ma mafua ai ona tau le susulu atu lo tatou malamalama. Peitai, faatasi ai ma le fesoasoaniga mai lo tatou Tama Faalelagi, ua vaavaalua ma le lagolagosua mai isi, e mafai ai ona tatou toe mauaina lena malamalama lea o le a toe faamalamalamaina ai lo tatou lava ala ma saunia ai le malamalama atonu o loo manaomia e isi.
Mo se faataitaiga, ou te faasoa atu upu ootia a se tusisolo ou te fiafia lava i ai, sa ou muai faitauina i le tele o tausaga ua tea:
Sa ou fetaui i se tagata ese i le po
O lana lamepa ua mate.
Sa ou tu ina ia ona tutu
Lana lamepa mai la’u lamepa.
Sa to faata’uta’u mai se matagi
Ma lulu ai le eleele i lana agi.
Ma ina ua mou atu le matagi
Na mate la’u lamepa!
Ou uso e ma tuafafine, o o tatou avanoa e faasusulu atu [ai le malamalama] ua siomia ai tatou i aso uma, po o a lava tulaga tatou te i ai. A tatou mulimuli i le faataitaiga a le Faaola, o lo tatou avanoa lenei e avea ai ma se malamalama i olaga o isi, pe o i latou o tagata o lo tatou lava aiga ma uo, tagata i falefaigaluega, pe na ona masani, po o ni tagata ese.
Ia te outou taitoatasi ou te faapea atu o oe o se atalii po o se afafine o lo tatou Tama Faalelagi. Na outou o mai mai Lona afioaga ia ola i lenei lalolagi mo se vaitau, ma ia avea ma faataitaiga o le alofa ma aoaoga a le Faaola ma ia faasusulu atu ma le lototoa tou malamalama mo tagata uma ia vāai i ai. A faamutaina lena vaitau i le lalolagi, afai na e faia lau vaega, o lou faamanuiaga la o le a matua mamalu i le toefoi atu e mau faatasi ma Ia e faavavau.
E maeu le faamautinoaga o le fetalaiga a le Faaola: “O au nei o le malamalama o le lalolagi: o le mulimuli mai ia te au e le savali o ia i le pouliuli, a e ia te ia le malamalama o le ola.” Ou te molimau atu ai ia te Ia. O Ia o lo tatou Faaola ma le Togiola, lo tatou Fautua i le Tama. O Ia o lo tatou Faataitaiga ma lo tatou malosi. O Ia “o le malamalama e susulu i le pouliuli.” Tau ina ia tautino atu e i tatou uma ua lagona mai lou leo ina ia mulimuli ia te Ia, ma avea ai ma se malamalama susulu i le lalolagi, o lau tatalo lea i Lona suafa paia, le suafa o Iesu Keriso le Alii, amene.