Kawakin Tuua
Iroun President Thomas S. Monson
Teuare e karikiira ao are e tangiriira ma te kororaoi e ataia bwa e na kanga arora ao tera ae ti na karaoia bwa e aonga n reke iroura te kukurei ae korakora ngkana e kona.
Tariu aika a tangiraki, e rangi n tamaroa manga rokou irarikimii. Ti a tia ni kaungaaki n te tairiki aei man taeka ake ti ongoraeakin. I tataro bwa N na kairaki n te bwai are I taekinna.
Au rongorongon nakoimi n te tairiki aei e bon kaineti. N aron aei: kawakin tuua.
Ti aki anganaki ana tua te Atua bwa a na karawawataira ke n riki bwa tuukan kukureira. Kaitaraana e boni koaua. Teuare e karikiira ao are e tangiriira ma te kororaoi e ataia bwa e na kanga arora ao tera arora bwa e aonga n reke iroura te kukurei ae korakora ngkana e kona. E a tia ni katauraoi kairan kawaira are, ngkana ti toui mwiia, e na kairiira ni kamanoira rinanon te mwananga n rabwata ae kakamaaku. Ti uringa mwanewen te anene ae kinaaki: “Kawakin tuua! Iai te kamanoaki iai; iai te rau iai.”1
Tamara are i Karawa e tau ana tangira ibukira n taekina: Kona tai kewe; ko na tai ira; ko na tai wenenibure; ko na tangira raom n ai aron tangiram i bon iroum; ao a mwaiti riki.2 Ti atai tuua. E oota bwa ngkana ti kawakin tuua, e na kakukurei maiura, e na bwanin raoi, ao ni karako te kaangaanga. Kakawaenakoara ma ara kaangaanga a bon bebete uotakiia, ao ti na karekei Ana kakabwaia aika a tia n taekinaki n te berita. Ma ngkai E anganiira ana moti ma ana tuua, E butimwaaira naba n rineia ngkana ti butimwaaia ke ti aki. Ara babaire n te kantaninga aei e bairea tokin kawaira.
I onimaki bwa ngaira ni kabane iai ara kouru aika akea tokiia imatan te Tama are i Karawa ao Natina, Iesu Kristo. E rangi ni kakaawaki, e ngae n anne, bon ibukira naba bwa ti na karaoi rinerine inanon maiura ae bwanin ake a na kairiira nakon te kouru aei. Ti ataia, e ngae n anne, Tatan e karikaki bwa e na kabwakaira. Ngaia ma ana anera akea aia momotirawa n aia mwakuri n urui ara iango aika raraoi. A tei ibukin te ruanimate ao te bwai ae kakamaaku nakon kamaiuara ae akea tokina ma tii ngkana tiaki motirawa n ara botumwaaka ao ara kekeiaki ni kakoroa nanon ara kouru. Te Abotoro Betero e kauringiira, “Kam na kamarurungingkami, ba e nakonako ami kairiribai are te riaboro, n ai aron te raian ae bekorara, n ukoukora ae e na ongnga.”3
E ngae ngke akea ara tai ni maiura ni kainaomataaki man te kariiri, ngkami ataenimwaane n ami ririki kam kai ikoaki. Ririki aika tebwitabun bon ririki n aki mano, n taian namakin n aron aki boraoini baike a kantaningaaki, ni kataia ni uarokoiia ma am roro, ao ni kataia bwa a na bootau iai. Ko na bae ni kariiriaki ni kamangori am kainibaire ao n iriiria te mwaiti n aomata bwa ko aonga ni butimwaeaki irouia naake ko tangiriia bwa a na riki bwa raoraom. Taiaoka kamatoatoako nakon bwaai ake a na tuukiko man karekean kakabwaia aika akea tokiia. Rinerine ake ko karaoi ikai ao ngkai a kakaawaki n aki toki.
Ti warekia n 1 I-Korinto: “Bon iai … aron taetae aika bati i aonaba.”4 Ti katobibiaki ni bwanaa aika a kairoro, bwanaa ni kamwane, bwanaa ni kakaniko, bwanaa ni kawanawana, ao bwanaa ni kananououa. N na bae n reitia bwa aikai boni bwanaa aika kaberoro. I reireiniko bwa ko na kauarerekea bwanaam ao n anaaki nanom man te bwanaa, ae, maraaraa are e na kairiko nakon te kamanoaki. Uringnga bwa te mwaane ae iai kariaiakana e na katokaa baina iaon atuum imwiin tiam ni bwabetitoaki, ni kamatoaaki bwa kaain te Ekaretia ao ni kangai, “E na reke iroum te Tamnei ae Raoiroi.”5 Kauka nanomi, ae bon tamneimi, nakon tangin te bwanaa ane e onoti are e kaotiota te koaua. N aron ae berita iai te burabeti ae Itaia, “A na ongo te taeka taningam … , ni kangai, Aio te kawai, kam na nakonako i nanona.”6 Au kantaninga bwa ti bia bootau, bwa ti aonga n ongo te bwanaa ni karaunano, are e na kateimatoaira ni kairiira ni kamanoira.
N aki tabeakin tuua e kauka te kawai nakon baike I arani bwa taian rekenikai inanon ara bong. A mena iai rekenikai n aki atatai, rekenikai n tamnei aika buakaka, rekenikai n taian turaki ao rekenikai ibukin aroaro aika buakaka, ao rekenikai ibukin kabwakaan te ataei man te biroto, n arana aika tabeua. Ti tuangaki ni booki aika tabu ao bwa teuare buakaka bon “ngaia ae e katei bwaai aikai.”7 Ti ataia bwa bon “tamaia taan kewe, ni mwamwanaiia ao ni kamatakiia aomata.”8
I bubuti ngkami katoki baike a na urua kukureimi n te maiu aei ao n te maiu ae akea tokina n te aonaaba are imwiina. Ma ana kamwane ao kewen, teuare buakaka e na kairiko inanon kawai aika raka man raka kaangaangaia n rairaki mai iai nakon kamaunaakim ngkana ko butimwaaia bwa e na karaoia. Ko mena ni kawai aika kaangaanga imwaain ataakina ae akea angan katokana. Ko ongoongora rongorongon teuare buakaka. E wewete ni kamwamwane: Tii aei akea te kangaanga iai, a karaoia aomata nako, tai riki bwa kaain rimoa; a tia ni bitaki taai; e kona ni kaikoaka temanna; bon am bwai ni maiuakinna. E ataira teuare e buakaka, ao e ataai kariiri ake a kaangaanga iroura bwa ti na katuai. E kakaawaki bwa ti na kamanoira n reitinako n tiku n tararuaira raoi n taainako bwa ti aonga n totokoi keewe ao kairiiri n aron akanne.
Te ninikoria ae korakora e kainnanoaki ngkana ti teimatoa ni kakaonimaki ao ni koaua n ribuakon te mwamwanaaki ao karawawata aika tabe n rikirake ao ake ti katobibiaki ma ngaai ao ake a bita te koaua, n uruana te tamaroa ao te raoi, ao ni kataia n oneamwin rabakaun te aonaaba ake a karaoi aomata. Ngkana a kaman koreaki tuua irouia aomata, ngkanne n onei man taian namakin ke tuua ke ni bwaai riki tabeua are a bwaibwai iai aomata. Taian Tua, e ngae n anne, bon mairoun te Atua. Kamanenaan ara rinerine, ti kona ni kaakeai. Ti aki kona, e ngae n anne, ni bitii aroia, ngkai ti aki kona ni bitii mwiia are a kaoti man te aki ongotaeka ao uruanakiia.
Ti bia ataia bwa kukureira ae korakora n te maiu aei e na roko ngkana ti tou mwiin ana tua te Atua ao n ongo n Ana moti! I tangiri taeka ake a kuneaki n Itaia mwakoro 32, kibuna 17: “Bon te raoi ana makuri te raoiroi; ao mwin te raoiroi te rau ao te mwiokoaki n aki toki.” N aron te rau, n aron te kakoaua a kona n roko rinanon te raoiroi.
Ti bon aki kona ni kariaia naba teutana n irekereke ma te bure. Ti bon aki kona ni kariaia ma ni kakoaua bwa ti kona ni karaoia “naba teutana” n aki ongeaba n ana tua te Atua, bwa te bure e kona na tautaekaniira ni kamarakiira ma ni kainaomataira. Waaki aika kareke ake a roko man taian turaki, tamnei aika buakaka, ao aroaro aika buakaka a boni koaua ni kuri ni kaangaanga kabwarakiia n akean te korakai ae korakora ao te ibuobuoki ae bati.
Ngkana iai ibuakomi ae kariaia te bure inanon maiuna, I kakoaua bwa iai te kawai n oki. Te waaki anne bon te rairannano. E ngae ngke e matoatoa te kawai, e boboto iaon kamaiuan tamneim. Baikara aika a na tau riki ibukin am konabwai? I bubuti ngkami ni baireia raoi ikai ao ngkai n tou mwanekan te rairannano ae bwanin. Moantaaim ni karaoia, moantaaim naba ni kona n rinanon te rau ma te nikoraoi ao te kakoaua are e taekinaki iroun Itaia.
Tabeua te tai ae nako I ongo ana koaua te aine are, ngaia ma buuna, a tiku ao imwiina a tionako man kawain te kamanoaki, a urui tuua ao, inanon te waaki, a kuri n uruana aia utu. Ngke ngaiia n tatabemaniia nako a noori uaan anua aika kareke ao n ataia bwa e aki kakukurei iai maiuia, n aron naba uruakan nanoia ake a tatangiriia, a moanna ni bitaki. Waakinan te rairannano teutana imwin teutana, n tabetai, e kamaraki, ma man aia ibuobuoki taan kairiiri n te nakoanibonga, n raonaki ma aia ibuobuoki te utu ao mairouia raao aika kakaonimaki, a manga reke okiia.
N na tibwa nakoimi mwakoron ana koaua te aine aei ni mwaakan te kamaiuaki man te rairannano: “E kanga temanna ni kiitana arona n riki bwa te tiibu ae bua ao ni kabaeaki n te [bure], nakon te rau ae kakukurei ae ti namakinna ngkai? E kanga n riki anne? Te kaeka … bon ibukin te euangkerio ae kororaoi, te Nati ae kororaoi ao Ana karea ibukiu. … Ike e mena iai te roo, ngkai iai te oota. Ike e mena iai te bwarannano ao te maraki, iai te kimwareirei ao te kantaninga. Ti rangi ni kakabwaiaki man te bitaki are e tii kona n roko rinanon te rairannano are e karaoaki man ana Mwakuri ni Kamaiu Iesu Kristo.”
E mate ara Tia Kamaiu bwa e katauraoa nakoim ao nakoiu te bwaintangira ni kakabwaia anne. N aki ongea te koaua are e matoatoa te kawai, te berita e bon koaua. E taku te Uea nakoia ake a rairi nanoia:
“Tao ai aroni kunnikai aika uraura ami bure, ao a na riki ni mainaina n ai aron te tino.”9
“Ao N na aki manga uring [aia] bure.”10
Ni maiura ae bwanin ti riai ni karikirakea ara koaua man kamatebwaian booki aika tabu ao man tataro ao man iangoan raoi koauan ana euangkerio Iesu Kristo. Ngkana a unikaki ni kamatoaki, ara koaua n te euangkerio, ibukin te Tia Kamaiu, ao ibukin Tamara are i Karawa e na iai mwiina ni baike ti karaoi ni kabane.
I kakoaua bwa ngaira ni kabane bon naati mwaane iroun Tamara are i Karawa, ni kanakomaiaki nako aon te aonaaba n te bong aei ma te tai ae iai bukina, ao n anganaki ana nakoanibonga te Atua bwa ti aonga ni buokiia tabeman ao ni karaoa ana mwakuri te Atua ikai iaon te aba. Ti tuangaki bwa ti na maiuakin raoi maiura n teimatoa ni kororaoi bwa ti aonga ni bwaina te nakoanibonga anne.
Tariu, ti bia kawakin tuua! E kakukurei ao e mimitong kaniwanga ake a tauraoi ibukira ngkana ti karaoia. E bia riki aei bwa ara kakabwaia, I tataro n aran Iesu Kristo, ara Tia Kamaiu ao ara Tia Kabooira, amen.