![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F3f%2F6e%2F3f6efbed2b74cef8b6a6dabc82099ba975574b4d%2F3f6efbed2b74cef8b6a6dabc82099ba975574b4d.jpeg/full/!250,/0/default)
Fetaiai ma Luitau o le Lalolagi i Lenei Vaitaimi
O filifiliga o outou faia—o le misiona, a’oga, faaipoipoga, galuega, ma auaunaga i le Ekalesia—o le a mamanuina o outou taunuuga e faavavau. O lona uiga e tatau lava ona e taulai atu i luma.
Ua tele mea ua tusia ma talanoaina e uiga i le augatupulaga o talavou matutua o lenei vaitaimi. Ua faaalia e suesuega e faapea e toatele ua teenaina tapuaiga faalelotu faatulagaina. E toatele o loo nonofo aitalafu ma e leai ni galuega. O le toatele e fiafia i le manatu o le faaipoipoga, ae toatele foi e mumusu e faia lena laasaga. O se fuainumera faateleina e le mananao i ni fanau. A aunoa ma le talalelei ma taitaiga musuia, ua fesesetai le toatele i ala ese ma leiloa lo latou auala.
O le mea e lelei ai, o le faateleina o nei suiga faigata e le o maualuga tele mo le autalavou nofofua matutua a le Ekalesia, o le mafuaaga ona ua faamanuiaina i tatou i le fuafuaga o le talalelei. O lena fuafuaga e aofia ai le pipiimau i le āi uamea—pipii atu i le afioga a le Atua ma upu a Ana perofeta. Ua manaomia ona tatou matua pipiimau i le āi uamea lea e taitai atu ai i tatou e toefoi atu ia te Ia. O le taimi nei o le “aso o le filifilia”1 mo i tatou uma.
A o ou tamaitiiti, a faapea o le a ou faia se filifiliga le lelei, e fai mai lo’u tama i nisi taimi, “Ropati, faasa’o i luga ma lele sa’o!” Sa e i ai iina. I le agaga o lana talanoa manino mai, ou te fia talanoa faapitoa atu ai i le autalavou—le autalavou tautupu—ma talavou matutua tautupu, aua “e fiafia lo’u agaga i le tautala manino atu … ina ia mafai ona [tatou] aoao.”2
O loo outou ola i se taimi taua tele o o outou olaga. O filifiliga o outou faia—o le misiona, a’oga, faaipoipoga, galuega, ma auaunaga i le Ekalesia—o le a mamanuina o outou taunuuga e faavavau. O lona uiga e tatau lava ona e taulai atu i luma—tagai atu i le lumanai.
I le avea ai ma se pailate i le Ea Fosi, sa ou aoao ai lenei mataupu faavae: aua nei e lele atu ma le loto i ai i se afā. (Ou te le tau atua pe na faapefea ona ou iloaina lena mea.) Ae, ia lele faataamilo ai, ui i se isi auala, pe faatali sei tea le afā ona tulaueleele lea.
Uso e ma tuafafine talavou matutua pele, ou te fia fesoasoani atu ina ia outou “felelei sa’o” atu i afā o faigata o aso amuli. O oe o le pailate. O lou tiutetauave o le mafaufau i taunuuga o filifiliga uma e te faia. Fesili ia te oe lava: “A ou faia lenei filifiliga, o le a se mea sili ona leaga e tupu mai ai?” O au filifiliga amiotonu o le a taofia oe mai le se ese mai le ala.
Mafaufau i ai: afai e te filifili e te le inu pia, o le a le avea oe ma se tagata inupia! Afai e te filifili e te le nofo aitalafu, o le a e aloese mai le tulaga o le leai o se tupe!
O se tasi o faamoemoega o tusitusiga paia o le faaali mai ia i tatou o le ala na tali atu ai tagata amiotonu i faaosoosoga ma le amioleaga. I se faapuupuuga, sa latou aloese mai ai! Na tamoe ese Iosefa mai le ava a Potifara.3 Sa ave e Liae lona aiga ma tuua Ierusalema.4 Sa sosola atu Maria ma Iosefa i Aikupito ina ia sao mai taupulepulega amioleaga a Herota.5 I soo se tulaga lava, na lapataia e le Tama Faalelagi nei tagata talitonu. E fesoasoani foi o Ia ia i tatou ia iloa pe tau, sosolaese, pe tali tulaga fesuisuia’i ua tatou oo i ai. O le a Ia fetalai mai ia i tatou e ala i le tatalo, ma pe a tatou tatalo, o le a tatou maua le Agaga Paia, e taitaiina i tatou. Ua tatou maua tusitusiga paia, aoaoga a perofeta soifua, faamanuiaga faapeteriaka, fautuaga a matua musuia, taitai perisitua ma ausilali, ma le mea e sili atu, o le leo itiiti o le Agaga.
O le a tausia pea e le Alii Lana folafolaga: “O le a Ou taitaia outou.”6 Pau lava le fesili, pe o le a tatou tuu atu ea i tatou ina ia taitaiina? Pe o le a tatou faalogo ea i Lona siufofoga ma leo o Ana auauna?
Ou te molimau atu afai e te i ai iina mo le Alii, o le a i ai o Ia iina mo oe.7 Afai e te alofa ia te Ia ma tausi Ana poloaiga, o le a e maua Lona Agaga e faatasi ma oe ma taitaia oe. “Tuu lou faalagolago i le Agaga lena lea na te taitai ia fai mea lelei. … Pe o le a e iloa i lenei mea … ua faatatau i mea o le amiotonu.”8
Faatasi ai ma le avea o na mataupu faavae ma se faavae mautu, ou te fia tuuina atu ai ni fautuaga mautu?
O le toatele o la outou tupulaga o loo feagai ma aitalafu soonafai. A o ou avea ma se talavou matua, o la’u peresitene o le siteki o se tagata tomai i le faasoasoaga o tupe i le Wall Street. Sa ia aoaoina a’u, “O oe o se mauoa pe afai e mafai ona e ola fiafia i mea ua e maua.” E faapefea ona e faia? Totogi muamua lau sefuluai ona sefe lea! A tele atu tupe e te maua, ia sefe ni tupe se tele atu. Aua e te fia faatautavā ma isi ina ia maua ni meataalo taugata. Aua e te faatauina se mea e te le gafatia.
O le toatele o talavou matutua i le lalolagi ua ola i aitalafu ina ia maua se aoaoga, ae iloa mulimuli ane ua taugata atu le tau o le a’oga nai lo mea e mafai ona totogiina. Saili ni sikolasipi ma ni foai faameaalofa. Ia faigaluega faavaitaimi pe a mafai ai, e fesoasoani ia te oe lava ia. O le a manaomia e lenei mea sina ositaulaga, ae o le a fesoasoani ia te oe ina ia faamanuiaina.
O le aoga e sauniaina oe mo avanoa faigaluega lelei atu. E tuu oe i se nofoaga sili ona lelei e auauna atu ai ma faamanuia i latou o siomiaina oe. O le a tuuina oe i le ala o le aoaoina mo le olaga atoa. O le a faamalosia oe e tetee atu i le valea ma mea sese. E pei ona aoao mai e Iosefa Samita: “O le atamai e aveeseina ai le pouliuli, le le mautonu ma le masalosalo; aua e le mafai ona i ai nei mea i le mea e i ai le atamai. … I le atamai o loo i ai le mana.”9 “E lelei le aoaoina pe afai latou te faalogologo i fautuaga a le Atua.”10 O le aoga o le a saunia oe mo mea o loo i luma atu, e aofia ai le faaipoipoga.
O lenei foi, e mafai ona ou tautala atu ma le sao? O le auala e tau atu i le faaipoipoga e pasi atu i nofoaga ua ta’ua o le tafao faamasani! O le tafao faamasani o le avanoa lea mo ni talanoaga uumi. A e tafao faamasani, aoao uma mea e te mafaia e uiga i le tasi ma le isi. Ia faamasani atu i aiga o le tasi ma le isi pe a mafai ai. Pe e tutusa a oulua sini? Pe tutusa o oulua lagona e uiga i poloaiga, le Faaola, le perisitua, le malumalu, tulaga faamatua, valaauga i le Ekalesia, ma le auauna atu i isi? Na lua matauina le tasi ma le isi i taimi o le atuatuvale, tali atu i tulaga manuia ma toilalo, tetee atu i le ita, ma le taulimaina o faafitauli? Pe o le tagata o lua tafafao faamasani e faaleaga tagata pe faamalosiau? Pe o ona uiga, gagana, ma amio, o le ituaiga tagata lea e te fia mafuta ai i aso uma?
E leai se tasi o i tatou e faaipoipo i se tasi ua atoatoa; tatou te faaipoipo i se tasi ua i ai le gafatia. O le faaipoipoga sa’o e le faatatau i mea ou te manao i ai na o a’u; e faatatau foi i mea e manao i ai o ia—o le o le a avea ma a’u soa—ma manao ia ou avea ai.
I le tautala manino atu, faamolemole aua e te tafao faamasani i lou vaitau atoa o le 20 ina ia “tau lava ia fiafia,” ma tolopo ai se faaipoipoga ona o isi mea faafiafia ma gaoioiga. Aisea? Ona o le tafao faamasani ma le faaipoipoga e le o ni taunuuga faaiu ia. O faitotoa ia i le nofoaga faaiu e te fia alu i ai. “O le mea lea e tuua ai e le tane lona tama ma lona tina a e faatasi ma lava ava.”11
O lou tiutetauave i le taimi nei o le agavaa lea mo le tagata e te fia faaipoipo i ai. Afai e te fia faaipoipo i se tagata lelei, aulelei, faamaoni, fiafia, galue malosi, faaleagaga, ia avea ma lena ituaiga o tagata. Afai e faapena lou tagata ma e te lei faaipoipo lava, ia onosai. Ou te molimau atu e silafia e le Alii ou manaoga ma e alofa ia te oe mo lou tuuto faamaoni atu ia te Ia. E i ai Sana fuafuaga mo oe, pe i lenei olaga po o le isi. Faalogo i Lona Agaga. “Aua tou te saili e fautuaina le Alii, a ia outou talia fautuaga mai Lona aao.”12 O le a faataunuuina Ana folafolaga i lenei olaga po o le isi. “Afai ua outou saunia o le a outou le matatau.”13
Afai e le tele ni mea e te maua, aua e te popole. Talu ai nei sa fai mai ai se tagata agalelei o le Ekalesia ia te au faapea, “Ou te lei tausia la’u fanau i tupe; sa ou tausia i latou i le faatuatua.” E maoae le moni o lena mea. Ia amata faatino lou faatuatua i soo se vaega o lou olaga. Afai e te le faia, o le a e mafatia i le mea ua ta’ua o le “vaivai o le faatuatua.” O le malosi lea e manaomia e faatino ai lou faatuatua o le a faaitiitia. O lea ia faatino lou faatuatua i aso uma, ma o le a “malolosi ma malolosi atili ai … ma mausali ma atili mausali ai i le faatuatua ia Keriso.”14
Ina ia saunia mo se faaipoipoga, ia mautinoa ua e agavaa e ‘ai ma inu i le faamanatuga ma ia umia se pepa faataga o le malumalu. Ia alu soo i le malumalu. Auauna atu i le Ekalesia. E le gata i valaauga o le Ekalesia, mulimuli i faataitaiga a le Faaola, o le “sa femaliuai ma agalelei.”15
Ua i ai nei ni au fesili faamaoni e uiga i filifiliga o i luma atu. I o’u tausaga o le talavou matua, sa ou sailia fautuaga mai o’u matua ma mai faufautua faamaoni, ma faatuatuaina. O se tasi o se taitai perisitua; o le isi o se faiaoga na talitonu ia te a’u. Sa fai mai uma i laua ia te au, “Afai e te manao i la’u fautuaga, ia saunia e faaaoga.” Sa ou malamalama i le uiga o lena mea. Ia saili ma le agaga tatalo ni faufautua o e popole i lou tulaga faaleagaga. Ia faaeteete i le mauaina o ni fautuaga mai lau tupulaga. Afai e te manao i nisi mea e sili atu, aapa atu i luga, ae le o autafa!16
Ia manatua, e leai se tasi e mafai ona aapa atu i luga mo oe. Ua na o lou faatuatua ma tatalo o le a mafai ai ona e siitia oe lava ia ma maua se liuga tele o le loto. Ua na o lau filifiliga ia usiusitai e suia ai lou olaga. Ona o le taulaga togiola a le Faaola mo oe, ua i ai ai le mana i totonu ia te oe.17 Ua ia te oe lou faitalia, ua ia te oe se molimau malosi, ma e mafai ona e mulimuli i le Agaga lea e taitaiina oe.
Talu ai nei, sa fai mai ai se talavou matua fai atatifaga, sa ia lagona sa avea o ia ma se vaega o se “tupulaga o faamaumau oa”—o se tupulaga “o saili mo le faamoemoe ma le olioli ma le faamalieina, ae o loo saili i nofoaga sese uma ma i auala sese.”18
I le faataoto a le Faaola i le atalii faamaumau oa, sa tele faamanuiaga sa faatalitali mai mo le atalii, ae a o lei mafai ona ia mauaina, sa tatau ona ia tagai totoa i lona olaga, o ana filifiliga, ma ona tulaga. O le vavega na sosoo ai o loo faamatalaina i le mau i se fasifuaitau faigofie lava: “Ona atamai ai lea o ia.”19 Sei ou uunaia outou ina ia outou iloaina outou lava? I le Ekalesia, afai e tatau ona faia ni filifiliga taua, e masani ona faia ni fonotaga a le aufono. E tutusa lelei lava ma faamoemoega mo fonataga a aiga. Atonu e te manao e taitaia le mea o le a ou ta’ua o se “fonotaga patino.” A uma se tatalo, faaalu atili se taimi na o oe. Mafaufau i mea o i luma atu. Fesili ifo ia te oe lava: “O a vaega o lo’u olaga ou te manao e faamalosia ina ia mafai ona ou faamalosia isi? O fea ou te manao ou te i ai i se tausaga mai le taimi nei? lua tausaga mai le taimi nei? O a filifiliga e tatau ona ou faia ina ia taunuu atu ai iina?” Ia manatua, o oe o le pailate, ma o oe e te pule. Ou te molimau atu pe a e iloaina oe lava, o le a afio lou Tama Faalelagi i totonu ia te oe. E ala i aao faamafanafana o Lona Agaga Paia, o le a Ia taitaiina oe.
Ou te molimau atu o loo soifua le Atua. Ou te tuuina atu lau molimau faapitoa e alofa le Faaola ia te outou. “Tatou te le ō ai pea ea i [Lana] savali sili? O atu i luma ae le o le solomuli.”20 A o outou mulimuli ia te Ia, o le a Ia faamalosia ma lagolagoina outou. O le a Ia avatua oe i lou aiga aupito sili ona maualuga. I le suafa o Iesu Keriso, amene.