To’a le Tai ma Sitaili Faa-Bristol: Ia Agavaa mo le Malumalu—i Taimi Lelei ma Taimi Leaga
Sauia e Elder Quentin L. Cook
O Le Korama a Apostolo e Toasefululua
O le usitai i mataupu faavae paia o le talalelei o le a mafai ai e i tatou ona agavaa mo le malumalu, maua le fiafia i lenei olaga, ma toe taitai atu ai i tatou i lo tatou aiga faalelagi.
Na ta’u mai e le perofeta o Liae, “Afai e leai se amiotonu e leai se faifia.”
Ua faamanuiaina le fili i le totoina o se talafatu sese i mafaufauga o le toatele o tagata. O loo tau mai e ia ma ana avefeau faapea o le filifiliga moni ua ia i tatou o le va lea o le fiafia ma le faamalieina nei i le olaga nei ma le fiafia i se olaga a sau (lea e fai mai le fili e ono leai se mea). O lea talafatu o se filifiliga pepelo, ae e ese le faatosinaloto.
O le faamoemoega tamalii taualuga o le fuafuaga o le fiafia a le Atua e mo soo amiotonu ma aiga o le feagaiga ia tuufaatasia i le alofa, ogatusa, ma filemu i lenei olaga ma maua le mamalu selesitila i le faavavau faatasi ma le Atua le Tama, lo tatou Foafoa; ma Lona Alo Pele, o Iesu Keriso, lo tatou Faaola.
A o avea au o se faifeautalai talavou na tofi i le Misiona a Peretaia, o la’u eria muamua o le galuega o le vaega lea sa le Itumalo o Bristol i le taimi lea. Sa faamamafa e se tasi o taitai o le Ekalesia i le lotoifale faapea, o faifeautalai sa galulue i le eria lea e tatau ona “to’a le tai ma sitaili faa-Bristol.”
O le taimi muamua ou te lei malamalama i le uiga o lana tala. E lei pine ae ou aoao i le talafaasolopito ma le uiga o le fuaitau faagataifale “ia to’a le tai ma sitaili faa-Bristol.” Sa i ai se taimi na avea ai Bristol ma uafu aupito sili ona pisi i Malo Tuufaatasi. I le sua tutu’i o le tai e 43 futu (13 m), o le lona lua aupito maualuga i le lalolagi. I le pe o le tai pe a maui atu le sami, e tuta’ia vaa tuai ma mafuli, ma afai e le lelei le fausaga o vaa, o le a faatamaia. E le gata i lea o mea uma e le teuesea faalelei pe noanoaina o le a felafoai solo i se faiga gaogaosa ma faaleagaina ai. Ina ua ou malamalama i le uiga o lena fasifuaitau, sa manino na ta’u mai e lena taitai ia i matou, o faifeautalai e tatau ona amiotonu, mulimuli i tulafono, ma sauniuni mo tulaga faigata.
E fetaui lelei foi lenei lu’i ia i tatou taitoatasi. Ou te fia faamalamalama i le fasifuaitau o le “to’a le tai ma sitaili faa-Bristol” o le “agavaa mo le malumalu”—I taimi lelei ma taimi leaga.
E ui o fesuisuiaiga o le tai i le Vaifanua o Bristol e foliga e mafai na muai iloa ma mafai ona tapenapena i ai, ae o afa ma faaosoosoga o lenei olaga e tele ina le mafai ona muai iloa. A e o le mea lenei ua tatou iloa: o le a oo mai! Ina ia faatoilaloina luitau ma faaosoosoga ua tofu feagai ma i tatou, o le a manaomia ai tapenaga amiotonu ma le faaaogaina o puipuiga ua saunia mai le lagi. E tatau ona tatou fuafua ia agavaa mo le malumalu tusa lava po o a mea tatou te fetaiai. Afai tatou te saunia, o le a tatou le matatau ai lava.
O le fiafia i lenei olaga ma le fiafia i le olaga a sau e faafesootaia e le amiotonu. E oo lava i le vaitau i le va o le oti ma le Toetu, “o agaga o i latou o e amiotonu e talia i se nofoaga o le fiafia, lea ua ta’ua o le parataiso, o se nofoaga e malolo ai, o se nofoaga o le filemu.”
I le amataga o le galuega a le Faaola i le lalolagi i Isaraelu ma mulimuli ane ia sa Nifae, sa talanoaina ai e le Faaola le mataupu o le fiafia i le olaga lenei ma i le faavavau. Sa Ia faamamafaina sauniga, ae sa Ia tuu foi se faamamafa tele i amioga mama. Mo se faataitaiga, o le a faamanuiaina le au soo pe afai latou te fia aai ma fia feinu i le amiotonu, ia alofa mutimutivale, ia loto mama, ia avea ma e faatupu le filemu, ma mulimuli i isi mataupu faavae autu mama. Sa manino i le avea ai ma se savali autu faaleaoaoga faavae, sa faamamafaina ai e lo tatou Alii o Iesu Keriso uiga amiotonu ma le amio i le olaga i aso faisoo. O Ana aoaoga sa le gata ina suia ai ma maualuga atu i elemene o le tulafono a Mose ae o se teena foi o filosofia pepelo o tagata.
I le tele o seneturi sa i ai talitonuga musuia o le talalelei a Iesu Keriso ma sa faatuina ai tulaga faatonuina o le amio e tusa ai ma le amiotonu, manaomia, ma lelei e taunuu i le fiafia, faamalieina, ma le olioli. Peitai, o muai mataupu faavae ma le ola mama na aoao mai e le Faaola ua osofaia i le lalolagi i ona po nei. Ua osofaia le faa-Kerisiano. Ua toatele ua talitonu faapea o mea sa muai avea ma mea mama ua suia nei.
Ua tatou ola i taimi faigata. Ua faateleina le lolo atu e “ta’u le leaga o le lelei ae ta’u le lelei o le leaga.” O se lalolagi o le saili atu i le faateleina o le taua po o le malosi o le tagata lava ia ma le faalelalolagi o se mafuaaga lea e popole tele ai. Na faaupu e se tasi tusitala lauiloa, e le auai i la tatou tapuaiga, faapea: “Paga lea e itiiti lava se faamaoniga ua ou vaaia faapea ua sili atu le fiafia o tagata i le vaitau ua tatou ulu atu nei i ai, pe faapea ua sili atu ona tulelei a latou fanau, pe faapea ua tautuaina lelei le faamoemoe o le faamasinotonu faaagafesootai, pe o le tuuitiitia o faaipoipoga ua faaitiitia ai aiga … ua folafola mai ai se mea, sei vagana ai le faateleina o le tuulafoaiina mo le toatele, ma i se tulaga lautele e le o i ai se alualu i luma.”
I le avea ai o ni soo o le Faaola, ua faamoemoeina i tatou e fuafua ma sauniuni. I le fuafuaga o le fiafia, o le faitalia e filifili tonu o se mataupu faavae tutotonu lea ua faatulagaina ma e taua a tatou filifiliga. Sa faamamafa mai e le Faaola i Lana galuega atoa, e aofia ai Ana faataoto i taupou valea ma taleni. I nei faataoto taitasi, sa fautuaina ai e le Alii le sauniuni ma le galue ae tausalaina le faatuutuu ma le paie.
Ua ou iloa faapea, e ui lava i le fiafia lofituina o loo i ai i le fuafuaga paia a le Atua, o nisi taimi e mafai ona manatu e mamao lava ma ua motusia mai o tatou tulaga i le taimi nei. E ono manatu ua le oo i ai lo tatou malosi o ni soo o loo tauivi. Mai la tatou vaaiga utiuti, e mafai ona vaaia faaosoosoga ma faalavefau o le taimi nei faapea e mananaia. O taui o le teenaina o na faaosoosoga, i se isi itu, e mafai ona manatu e mamao ma e le mafai ona maua. Ae o se malamalama moni i le fuafuaga a le Tama ua faaalia mai ai o loo maua ia taui o le amiotonu i le taimi nei lava. O le amioleaga, e pei o le amio le mama, e le o se vaega lea o le tali. Na ta’u manino atu e Alema i lona atalii o Korianetona: “Faauta, ou te fai atu ia te oe, o le amioleaga e le o le fiafia lea.”
O loo manino ona faaupu mai le tatou aoaoga faavae e Amoleka i le Alema 34:32: “Aua faauta, o le olaga lenei o le taimi lea mo tagata e saunia ai e feiloai ma le Atua; ioe, faauta o le aso o le olaga lenei o le aso lea mo tagata e fai ai a latou galuega.”
E faapefea la ona tatou saunia i se taimi ua matua faigata tele? E le gata i le agavaa mo le malumalu, ae e tele mataupu faavae e saofaga i le amiotonu. O le a ou faamamafa atu le tolu:
Muamua: Pulea o Oe Lava i le Amiotonu ma le Amio
Ou te talitonu o nisi taimi atonu e silasila mai lo tatou Tama Faalelagi i le fiafia tatou te lagonaina pe a tatou matamata i a tatou fanau laiti a o latou aoao ma tuputupu ae. Tatou te tautevateva uma lava ma pauu a o tatou mauaina le poto masani.
Sa ou talisapaia le saunoaga i le konafesi a Peresitene Dieter F. Uchtdorf i le 2010 e uiga i le suesuega na faia i mesimelo e le Iunivesite o Stanford i le 1960. O le a outou manatuaina na tuu atu i tamaiti ta’i fa tausaga le matutua se mesimelo. Afai e mafai ona latou faatalitali mo le 15 pe 20 minute e aunoa ma le ‘aia, o le a toe maua atu se isi mesimelo lona lua. Sa faaalia ni vitio ma faaalia ai foliga na faaaoga e le toatele o tamaiti e aloese ai mai le ‘aia o le mesimelo. Sa lei faamanuiaina isi.
O le tausaga na tea nei na tusia ai e le polofesa o Dr. Walter Mischel o le na faatautaia le uluai suesuega, lea na ia fai mai ai o se tasi o mafuaaga na faia ai le suesuega o lona popolega e uiga i le amio pulea o le tagata lava ia ma lona lava avea o le ulaula ma vaisu. Sa sili ona popole o ia i le lipoti lautele a Fomai Tipitipi Sinia o le Iunaite Setete o le 1964 lea na faaiu ai faapea o le ulaula tapaa e afua ai le kanesa o le mama. E fua i tausaga o le suesuega, sa lipotia mai e se tasi o ana paaga faapolofesa e faapea “o le amio pulea o le tagata lava ia e pei o se uaua: o le tele ona e faaaogaina, o le malosi tele foi lena. O le aloese faatasi mai se mea taufaaosooso o le a fesoasoani e te atinaeina ai le tomai e tetee atu ai i isi faaosoosoga i le lumanai.”
O se mataupu faavae o le alualu i luma e faavavau, o le faaaogaina lea o le amio pulea ma le ola amiotonu e faamalolosia ai lo tatou tomai e teena ia faaosoosoga. E moni lenei mea i mea faaleagaga ma mataupu faaletino.
O o tatou faifeautalai o se faataitaiga silisili lea. Latou te atinae uiga faa-Keriso ma faamamafaina le usiusitai ma le faaleagaga. Ua faamoemoeina i latou e mulimuli i se faasologa maua’i o mea e fai ma faaalu o latou aso e auauna atu ai i isi. O o latou foliga e tauagafau, e agamaualalo ae le o uiga faasamasamanoa o lavalava pe le tauagafau ua masani ai aso nei. O a latou amio ma foliga e avatu ai se savali tonu, ma le taua.
Pe tusa ma le 230,000 o tatou tagata talavou o loo galulue nei o ni faifeautalai, pe ua taliu mai le galuega faafaifeautalai i le lima tausaga talu ai. Sa latou atinaeina se malosi matagofie faaleagaga ma le amio pulea lea e manaomia ona faaaoga pea lava pea, a leai o le a vaivai nei uiga auaumama e pei lava o uaua e le faaaogaina. E manaomia e i tatou uma ona atinae ma faatino mai le amio ma foliga e ta’u atu ai o i tatou o ni soo moni o Keriso. O i latou o e lafoaia le amiotonu po o se foliga lelei, ma le tausaafia ua latou faaaliali atu i latou lava i tifiga o le olaga e leai se olioli po o se fiafia e maua mai ai.
Ua tuuina mai e le talalelei toefuataiina ia i tatou le taiala o le fuafuaga o le fiafia ma se mafuaaga ia malamalama ai ma faaaoga le amio pulea ma aloese mai faaosoosoga. O loo aoao mai ai foi i tatou i le ala e salamo ai pe a tulai mai ni solitulafono.
Lua: O Le Faamamaluina o le Sapati o le a Faateleina ai le Amiotonu ma Avea o se Puipuiga mo le Aiga
Na suia e le Ekalesia Kerisiano anamua le tausiga o le Sapati mai le Aso Toonai i le Aso Sa e faamanatu ai le Toetu mai o le Faaola. O isi faamoemoega paia o le Sapati sa tumau e lei suia. I tagata Iutaia ma le au Kerisiano, o le Sapati e faatusa i galuega silisiliese a le Atua.
O a’u ma lo’u toalua, ma a ma paaga e toalua ma o la faletua, sa matou auai atu i se Sapati FaaIutaia ona o le valaaulia a se uo pele, o Robert Abrams ma lona faletua o, Diane, i lo la aiga i Niu Ioka. Na amata i le amataga o le Sapati faa-Iutaia i le afiafi o se Aso Faraile. Na taulai i le faamamaluina o le Atua o le Foafoa. Na amata i le faamanuiaina o le aiga ma se viiga o le Sapati. Sa matou auai faatasi i le sauniga mulumulu o lima, o le faamanuiaina o le falaoa, o tatalo, o le tausamiga aloaia, o le faitauina o mau, ma le lagiina o pese o le Sapati i se lagona faafiafia. Sa matou faalogologo i upu Eperu, ma mulimuli i le faaliliuga faa-Peretania. O mau sa sili ona faamomoiloto na faitauina mai le Feagaiga Tuai, ia foi e pele ia i tatou, sa aumai i le Isaia, e ta’u mai ai o le Sapati o se aso fiafia, ma le Esekielu, e faapea o le Sapati “e fai ma faailoga ia te au ma outou, ia iloa ai e outou o a’u lava o Ieova lo outou Atua.”
O le lagona lofituina mai lena afiafi matagofie o le alofa faaleaiga, tapuai, ma le tali atu i le Atua. Ina ua ou mafaufau i lenei mea, sa ou toe manatua ai le sauaga maoae na feagai ma tagata Iutaia i le tele o seneturi. E manino lava, o le faamamaluina o le Sapati sa avea o se “feagaiga e faavavau,” e faapolopolo ai ma faamanuia tagata Iutaia e faataunuuina ai le mau. Na saofaga ai foi i le olaga faaleaiga tulaga ese ma le fiafia o loo iloagofie i olaga o le tele o tagata Iutaia.
Mo tagata o Le Ekalesia a Iesu Keriso o le Au Paia o Aso e Gata Ai, o le faamamaluina o le Sapati o se faailoga o le amiotonu lea o le a manuia ai ma faamalolosia aiga, e faafesootai atu ai i tatou i lo tatou Foafoa, ma faateleina ai le fiafia. E mafai ona fesoasoani le Sapati e tavavaeese ai i tatou mai mea faavalevale, e le talafeagai pe le mama. E mafai ai ona tatou i ai i le lalolagi ae le o ni o le lalolagi.
I le ono masina ua mavae atu, sa tulai mai ai se suiga ofoofogia i le Ekalesia. O le tali atu lea a tagata i le faamamafaga ua toe faafou i le Sapati na tuuina mai e le Au Peresitene Sili ma le Korama a le Toasefululua ma i le lu’i a Peresitene Russell M. Nelson ia avea le Sapati o se aso fiafia. E toatele tagata o le ekalesia ua malamalama o le tausia moni o le aso Sapati o se sulufaiga lea mai afa o lenei olaga. O se faailoga foi o lo tatou tuuto atu i lo tatou Tama oi le Lagi ma se malamalama ua faateleina i le paia o le sauniga faamanatuga. Ae o loo tele pea mea e tatau ona tatou faaleleia atili, ae ua matagofie le amataga. Ou te tuu atu se lu’i ia i tatou uma ina ia talia lenei fautuaga ma faaleleia atili la tatou tapuaiga i le Sapati.
Tolu: E Saunia Puipuiga Mai Le Lagi Pe a Tatou Amiotonu
E avea ai o se vaega o le fuafuaga paia a le Atua, ua faamanuiaina i tatou i le meaalofa o le Agaga Paia. O lenei meaalofa “o le aia tatau tatou te maua, i soo se taimi e agavaa ai se tagata, mo le mafutaga ma le Agaga Paia.” O lenei sui o le Aigaatua ua avea o se sui faamama pe afai e muamua le talalelei i o tatou olaga. O Ia foi o se siufofoga o le lapataiga mai mea leaga ma o se siufofoga o le puipuiga mai mea matautia. A o tatou tauasaina vasa o le olaga, e taua le mulimuli i uunaiga a le Agaga Paia. O le a fesoasoani le Agaga Paia ia i tatou e taumamao ai mai mea matautia, ma taitai lelei atu ai i tatou e ui atu i luitau. “O fua o le Agaga o le alofa, olioli, filemu, onosai, agamalu, agalelei, faatuatua.”
O le usitai i mataupu faavae paia o le talalelei o le a mafai ai e i tatou ona agavaa mo le malumalu, maua le fiafia i lenei olaga, ma toe taitai atu ai i tatou i lo tatou aiga faalelagi.
O’u uso e ma tuafafine pele, e le faigofie le olaga, e lei faamoemoe foi o le a faigofie. O se taimi e suesue ai i tatou ma tofotofoina. E faapei o vaa tuai i le Uafu o Bristol, o le a i ai taimi e pe atu ai le tai ma e foliga mai ua mou uma atu mea e mafai ona tatou faaopeopea ai i lenei lalolagi. Tatou te pa’ulia ma faasisipa atu ai i autafa. I le lotolotoi o na tofotofoga, ou te folafola atu ia te outou o le ola ma tausisia ni olaga e agavaa mo le malumalu, o le a maopo ai mea uma e taua. O faamanuiaga matagofie o le filemu, fiafia, ma le olioli, faatasi ai ma faamanuiaga o le ola e faavavau ma le mamalu selesitila faatasi ma lo tatou Tama Faalelagi ma Lona Alo, o Iesu Keriso, o le a mautinoa. Ou te molimau atu ai i le suafa o Iesu Keriso, amene.