Faamalosia e ala i le Togiola a Iesu Keriso
Saunia e Elder Dallin H. Oaks
O Le Korama a Aposetolo e Toasefululua
Ona o Lana Togiola, ua i ai ai i le Faaola le mana e lagolago ai—e fesoasoani ai—i tiga ma mafatiaga uma faaletino.
I le olaga faaletino tatou te maua ai le faamautinoaga o le oti ma le avega mamafa o le agasala. O le Togiola a Iesu Keriso e faaitiitia ai aafiaga o nei mea mautinoa e lua o le olaga faaletino. Ae e ese mai la i le oti ma le agasala, ua tele isi mau luitau a o tatou tauivi ai i le olaga faaletino. Ona o lena lava Togiola e tasi, ua mafai ai e le Faaola ona tuuina mai ia i tatou le malosi tatou te manaomiaina e faatoilalo ai nei luitau faaletino. O la’u mataupu lena i le asō.
I.
O le tele o tala faatusitusiga paia e uiga i le Togiola e faatatau i le motusiaina e le Faaola o noataga o le oti ma mafatiaga mai a tatou agasala. I lana lauga o loo tusia i le Tusi a Mamona, sa aoao atu ai e Alema nei mea faavae. Ae sa ia tuuina atu foi ni faamautinoaga sili ona manino faatusitusiga paia e faapea na lagona foi e le Faaola ia tiga ma ma’i ma vaivaiga o Ona tagata.
Sa faamatalaina e Alema le vaega lenei o le Togiola a le Faaola: “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia avea i ona luga tuga ma ma’i o ona tagata” (Alema 7:11; tagai foi 2 Nifae 9:21).
Mafaufau i ai! I le Togiola a le Faaola, na Ia mafatia i “tiga ma mafatiaga ma faaosoosoga o ituaiga eseese uma.” E pei ona faamalamalama mai e Peresitene Boyd K. Packer: “Sa leai sana aitalafu e totogi. Sa leai se sese na ia faia. Ae peitai, o le tuufaatasiga o ta’usalaga uma, le faavauvau ma le faanoanoa, le tiga ma le faalumaina, o sauaga uma faalemafaufau, faalelagona, ma faaletino ua iloa e tagata—na Ia oo uma i ai.”
Aisea na Ia mafatia ai i nei faigata faaletino “o ituaiga eseese uma”? Sa faamalamalama mai e Alema, “Ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale; e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga” (Alema 7:12).
Mo se faataitaiga, sa tautino mai e le Aposetolo o Paulo e faapea ona o le Faaola “na tigaina … ina o tofotofoina, o le mea lea ua mafai ai o ia ona fesoasoani i e ua tofotofoina” (Eperu 2:18). Sa faapena foi ona aoao mai Peresitene James E. Faust taught, “Talu ai sa mafatia le Faaola i soo se mea ma mea uma e mafai ona tatou lagonaina pe oo i ai, o lea ua mafai ai ona Ia fesoasoani i e vaivai ia toe malolosi.”Sa mafatia ma oo lo tatou Faaola i le atoaga o luitau uma faaletino “e tusa ai ma la le tino” ina ia mafai ai ona Ia silafia “e tusa ai ma la le tino” le auala e “fesoasoani atu ai [lona uiga o le tuu atu o le toomaga po o le fesoasoani i] ona tagata e tusa ai ma o latou vaivaiga.” O le mea lea ua Ia silafia ai o tatou faigata, o tatou lototiga, o tatou faaosoosoga, ma o tatou mafatiaga, aua na Ia loto
e oo i ai i na mea uma e fai ma vaega taua o Lana Togiola. Ma ona o lenei mea, ua Ia maua ai le mana o Lana Togiola e fesoasoani mai ai ia i tatou—e tuu mai ia i tatou le malosi e onosaia ai ia mea uma.
II.
E ui o le aoaoga a Alema i le mataupu e fitu o le vaega aupito sili lea ona manino i mau uma e uiga i lenei mana taua o le Togiola, ae o loo aoaoina foi i tusitusiga paia uma.
I le amataga o Lana galuega, sa faamalamalama atu ai e Iesu na auina mai o Ia “e faamalolo i e loto momomo” (Luka 4:18). E tele lava ina faamatala mai e le Tusi Paia ia i tatou e uiga i Lona faamaloloina o tagata i “o latou ma’i” (Luka 5:15; 7:21). O loo tusia i le Tusi a Mamona Lona faamaloloina o i latou “na puapuagatia i soo se ala” (3 Nifae 17:9). Ua faamalamalama mai e le Talalelei a Mataio na faamaloloina e Iesu tagata ina ia “taunuu ai o le upu a le perofeta o Isaia, ua faapea mai, O ia lava na aveina o tatou vaivai, ma na tauave o tatou ma’i” (Mataio 8:17).
Sa aoao mai Isaia o le a tauave e le Mesia o tatou “tiga” ma o tatou “faanoanoa” (Isaia 53:4). Sa aoao mai foi Isaia e uiga i Lona faamalosia o i tatou: “Aua e te fefe, aua ou te ia te oe; aua le fetepatepai, aua o au o lou Atua; ou te faamalosia oe; e moni ou te fesoasoani ia te oe” (Isaia 41:10).
O lea, tatou te pepese ai:
I le talanoa ai e uiga i nisi o ona lava luitau faaletino, sa tusia ai e le Aposetolo o Paulo, “Ou te mafaia mea uma lava i le faamalosi mai o Keriso ia te au” (Filipi 4:13).
Ma o lea ua tatou vaaia ai lena mea ona o Lana Togiola, o loo i ai i le Faaola le mana e lagolago ai—e fesoasoani ai—i tiga ma mafatiaga uma faaletino. O nisi taimi e faamaloloina ai e Lona mana se vaivaiga, ae ua aoao mai tusitusiga paia ma o tatou aafiaga e faapea o nisi taimi e lagolago pe fesoasoani mai o Ia e ala i le tuuina mai ia i tatou o le malosi po o le onosai e onosaia ai o tatou vaivaiga.
III.
O a ia tiga ma mafatiaga ma vaivaiga faaletino na oo i ai le Faaola ma mafatia ai?
Ua tofu i tatou ma tiga ma mafatiaga ma vaivaiga i lea taimi ma lea taimi. E ese mai mea tatou te oo i ai ona o a tatou agasala, ua faatumulia le olaga faaletino i faigata, lototiga ma mafatiaga e tutupu soo.
O i tatou ma ē tatou te alolofa i ai e mafatia foi i ma’i. I nisi taimi e oo aitatou taitoatasi i tiga mai manuaga tuga pe mai isi faigata faaletino ma faalemafaufau. Tatou te mafatia uma ma faavauvau i se fesootaiga ma le oti o sē e pele ia i tatou. Tatou te oo uma i le toilalo i o tatou lava tiutetauave faaletagata lava ia, a tatou mafutaga faaleaiga, po o a tatou galuega.
A teenaina e se toalua po o se tamaitiiti le mea ua tatou iloa e moni ma aluese mai ma le auala o le amiotonu, tatou te oo patino lava i le tiga matuitui, e pei lava o le tamā o le atalii faamaumau oa i le faataoto lemafaagaloina a Iesu (tagai Luka 15:11–32).
E pei ona tautino mai e le Fai-Salamo, “E tele lava mea leaga e oo i le ua amiotonu; a e laveaiina o ia e Ieova ai ia mea uma” (Salamo 34:19).
O lea, o loo i ai i a tatou viiga lenei faamautinoaga moni: “E leai se faanoanoa i le lalolagi e le mafai e le lagi ona faamaloloina.” O lē na te faamaloloina i tatou o lo tatou Faaola ma Lana Togiola.
E patino lava le tiga mo le autalavou o le lagona o le teenaina, pe a foliga mai ua i ai a latou uo i ni mafutaga ma ni gaoioiga fiafia ae faatuatuanai i latou ma le loto i ai. O le faailogalanu faaleaganuu ma faaleituaiga e tupu mai ai isi feteenaiga tiga mo talavou ma tagata matutua. E tele isi luitau o le olaga, e pei o le leai o ni galuega po o isi feteenaiga i a tatou fuafuaga.
O loo ou talanoa atu pea i vaivaiga faaletino e le o mafua mai ona o a tatou agasala. O nisi ua fananau mai ma ni le atoatoa faaletino pe faalemafaufau ia e mafua ai mafatiaga faaletagata mo i latou ma luitauina ai i latou e alolofa ma popole mo i latou. Mo le toatele, o vaivaiga o le faanoanoa e tiga tele pe tumau foi i le le fia faia o se mea. O le isi mafatiaga tiga tele o le tulaga o le tuuatoatasi. O i latou e mafatia i lenei tulaga e tatau ona manatua na oo foi lo tatou Faaola i lenei ituaiga o tiga ma, e ala i Lana Togiola, ua Ia ofo mai ai le malosi e onosaia ai.
O ni nai le atoatoa e sili atu ona faatamaia ai o tatou olaga faaletino pe faaleagaga nai lo vaisu. O nisi o nei mea, e pei o vaisu o ponokalafi po o fualaau faasaina, ua mafua mai ona o amioga agasala. E tusa lava pe ua salamoina, e mafai lava ona tumau le vaisu. O lena uu matagataga e mafai foi ona faamaloloina e le malosi mausali e maua mai le Faaola. E faapena foi i luitau ogaoga e oo i ai i latou o e auina atu i le falepuipui ona o solitulafono. Ua molimau mai se tusi talu ai nei i le malosiaga e mafai ona oo mai i se tasi o loo i ai i lena tulaga: “Ou te iloa o loo feafioa’i lo tatou Faaola i nei fale, ma e masani ona ou lagonaina le alofa o Keriso i totonu o nei puipui o le toese.”
Ou te fiafia i le molimau a le tatou tusisolo ma le uo ia Emma Lou Thayne. I upu ua tatou usuina nei o se viiga, sa ia tusia:
IV.
O ai e mafai ona fesoasoani i ai ma faamalosia e ala i le Togiola a Iesu Keriso? Sa aoao mai Alema e tauave e le Faaola i Ona luga “tiga ma ma’i o ona tagata” ma “fesoasoani i ona tagata” (Alema 7:11, 12; faaopoopo le faamamafa). O ai “ona tagata” i lenei folafolaga? Pe o tagata ola uma ea—tagata uma e olioli i le moni o le toetu e ala i le Togiola? Pe ua na o auauna filifilia ua agavaa e ala i sauniga ma feagaiga?
O le upu tagata e tele ona uiga i tusitusiga paia. O le uiga e sili ona talafeagai mo le aoaoga o le a fesoasoani le Faaola i “ona tagata”, o le uiga lea na faaaoga e Amona ina ua ia aoao mai e faapea “e manatu mai le Atua i tagata uma, i soo se laueleele atonu ua latou i ai” (Alema 26:37). O le mea foi lena na faatatau i ai fetalaiga a agelu ina ua latou faasilasila mai le soifua mai o le Keriso: “[O] le tala lelei e olioli tele ai … nuu uma” (Luka 2:10).
Ona o Lona aafiaga togiolaina i la le tino, ua mafai ai e lo tatou Faaola ona faamafanafana, faamalolo, ma faamalosia alii ma tamaitai uma i soo se mea, ae ou te talitonu ua na o i latou lava o ē e saili atu ia te Ia ma ole atu mo Lana fesoasoani, na te faia i ai. Sa aoao mai le Aposetolo o Iakopo: “Ina faamaulalo ia i luma o le Alii, ona faamaualugaina lea o outou e ia” (Iakopo 4:10). Tatou te agavaa mo lena faamanuiaga pe a tatou talitonu ia te Ia ma tatalo mo Lana fesoasoani.
E faitau miliona tagata e matatau i le Atua o loo tatalo i le Atua ina ia aveese atu o latou mafatiaga. Ua faaali mai e lo tatou Faaola o Ia na “afio ifo i lalo o mea uma” (MF&F 88:6). E pei ona aoao mai Elder Neal A. Maxwell, “I le ‘afio ifo ai i lalo o mea uma,’ ua Ia malamalama ai, atoatoa ma patino lava, i soo se auala o le a mafatia ai le tagata.” E mafai ona tatou faapea o le afio ifo ai i lalo o mea uma, ua tu ai o Ia ma le atoatoa e siitia i tatou ma tuu mai ia i tatou le malosi tatou te manaomia e onosaia ai o tatou mafatiaga. Pau lava le mea o lo tatou ole atu.
E tele taimi i faaaliga o aso nei, ua tautino mai ai le Alii, “O lea, afai tou te ole mai ia te a’u o le a outou mauaina; afai tou te tuitui mai o le a tatala atu ia te outou” (mo se faataitaiga, MF&F 6:5; 11:5; tagai foi Mataio 7:7). O le mea moni, ona o lo La alolofa i tagata uma, e faafofogaina ai e lo tatou Tama Faalelagi ma Lona Alo Pele, o Iesu Keriso, ma tali mai ma le talafeagai i tatalo a tagata uma e saili atu ia i Laua i le faatuatua. E pei ona tusia e le Aposetolo o Paulo, “Tatou te faamoemoe i le Atua soifua, o ia o le Faaola o tagata uma, a e sili lava o e ua faatuatua” (1 Timoteo 4:10).
Ou te iloa e moni nei mea. O le Togiola a le Faaola ua sili atu nai lo le faamautinoaina mai ia i tatou o le tino ola pea, e ala i se toetu mo le lalolagi uma ma saunia le avanoa mo i tatou ina ia faamamaina ai mai agasala e ala i le salamo ma le papatisoga. O Lana Togiola foi ua tatou maua ai le avanoa e valaau atu ai ia te Ia o lē ua oo i o tatou vaivaiga uma faaletino ina ia faamaloloina i tatou ma tuu mai ia i tatou le malosi e lavātia ai avega o le olaga faaletino. Na te silafia o tatou tiga, ma o loo i ai o Ia iina mo i tatou. E pei foi o le Samaria agalelei, a Ia mauaina i tatou o manunua i tafatafā ala, o le a Ia fusifusi i o tatou manua ma tausi i tatou (tagai Luka 10:34). O le mana faamalolo ma le faamalosiau o le Togiola a Iesu Keriso e mo i tatou uma o e o le a ole atu. Ou te molimau atu ai i lena mea ma molimau atu foi i lo tatou Faaola, o le ua mafai ai mea uma.
E i ai se aso o le a mavae atu ai nei avega uma faaletino ma o le a le toe i ai se tiga (tagai Faaaliga 21:4). Ou te tatalo ina ia tatou malamalama uma i le faamoemoe ma le malosiaga o le Togiola a lo tatou Faaola: le faamautinoaga o le tino ola pea, le avanoa mo le ola e faavavau, ma le malosi faifai pea e mafai ona tatou maua pe afai e tau lava o lo tatou ole atu, i le suafa o Iesu Keriso, amene.